“Tokāteline mo e Ngaahi Fuakava 30–36, Konga 2: ‘Fakaava Homou Ngutú pea ʻe Fakafonu Ia,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 30–36, Konga 2,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 48: Tokāteline mo e Ngaahi Fuakava 30–36
Tokāteline mo e Ngaahi Fuakava 30–36, Konga 2
“Fakaava Homou Ngutú pea ʻe Fakafonu Ia”
ʻI he taimi naʻe ui ai ʻe he ʻEikí ha kau faifekau ke malanga ʻaki ʻEne ongoongoleleí hili pē ha taimi nounou mei hono fokotuʻu Hono Siasí, naʻá Ne ʻoange ha faleʻi ke fakamālohia mo tataki kinautolu ʻi heʻenau ngāue fakafaifekaú. ʻE lava ke tokoni ʻa e lēsoni ko ʻení ki he kau akó ʻi heʻenau feinga ke vahevahe ʻa e ongoongoleleí.
Ngaahi ʻEkitivitī Ako ʻOku Ala Fakahokó
Ngaahi hohaʻa ki hono vahevahe ʻo e ongoongoleleí
Fakakaukau ke kamata ʻa e lēsoní ʻaki hano vahevahe ʻa e tūkunga mo e ongo fehuʻi ko ʻení.
ʻI he taimi naʻe vahevahe ai ʻe ha taha naʻe lea ʻi he houalotu sākalamēnití ʻa e mahuʻinga ʻo e ngāue fakafaifekaú, naʻe ongoʻi ʻe Kona ʻoku ʻikai ke ne tali ʻa e fakakaukau ke talanoa ki he kakai kehé fekauʻaki mo e ongoongoleleí. ʻOku natula anga fakalongolongo pē ʻa Kona. ʻIkai ngata aí, kuo teʻeki ke ne talanoa fakamātoato ki he ongoongoleleí mo ha taha ʻoku ʻikai ko ha mēmipa ʻo e Siasí. ʻOkú ne hohaʻa pe ʻe fēfē nai ha fepōtalanoaʻaki pehē. Koeʻuhí ko hono natula fakalongolongó mo e ʻikai lahi ʻene ngaahi aʻusiá, naʻá ne taʻe-fiemālie ʻi he fakakaukau ke kamataʻi ha fepōtalanoaʻaki fekauʻaki mo e ongoongoleleí mo ha tokotaha kehé.
-
ʻOkú ke pehē nai ko e hā ʻe tokoni ke mahino kia Kona fekauʻaki mo e ngāue fakafaifekaú?
-
Ko e hā ha ngaahi hohaʻa kehe ʻoku faʻa maʻu ʻe he kakaí fekauʻaki mo hono vahevahe ʻo e ongoongolelei ʻa e Fakamoʻuí?
Fakamanatu ki he kau akó naʻa nau ako ʻi he lēsoni kimuʻá fekauʻaki mo ha niʻihi fakafoʻituitui tokolahi naʻe ui ke ngāue fakafaifekau hili pē ha taimi nounou mei hono fokotuʻu ʻo e Siasí. Naʻe ʻiloʻi ʻe ha niʻihi ʻo e kau tangatá ni ʻa e ongoongolelei kuo fakafoki maí ʻi ha kiʻi vahaʻataimi nounou pē kimuʻa pea ui kinautolu ke ngāue fakafaifekaú.
Fakaafeʻi ʻa e kau akó ke vahevahe ha niʻihi ʻo e ngaahi hohaʻa naʻe maʻu ʻe he kau faifekau toki uiuiʻi foʻou ko ʻení. Te ke lava foki ʻo kole ki he kau akó ke fakakaukau ki he ngaahi meʻa ʻoku nau hohaʻa ki aí fekauʻaki mo hono vahevahe ʻo e ongoongoleleí mo e niʻihi kehé. Vahevahe leva ʻa e ngaahi meʻá ni ke tokoni ki hono teuteu ʻo e kau akó ke nau akó.
Te ke ako ʻi he ʻahó ni ha ngaahi akonaki mei he ʻEikí ʻi he Tokāteline mo e Ngaahi Fuakava 30–36 ʻe lava ʻo tokoni ke ke fakatokangaʻi ʻEne hōifua ke tokoniʻi koe ke vahevahe ʻEne ongoongoleleí. ʻI hoʻo ako ʻi he ʻaho ní, kumi ha ngaahi akonaki ʻe lava ʻo tokoni ke fakatupulaki hoʻo loto-fiemālie mo e malava ke vahevahe ʻa e ongoongolelei ʻo Sīsū Kalaisí.
ʻOku ʻomi ʻe he ʻEikí ha faleʻi ʻaonga ki Heʻene kau faifekaú
ʻOange ha taimi ki he kau akó ke ako ʻa e faleʻi ʻa e ʻEikí ʻi he ngaahi veesi ko ʻení. Ko e founga ʻe taha ke fai ai ʻení ko hono vahevahe ʻa e kalasí ki ha kulupu ʻe nima. ʻOange ki he kulupu takitaha ha laʻipepa ʻatā, pea fakaafeʻi kinautolu ke teuteu ha peesi ʻoku ʻi ai ha ʻuluʻi tohi hangē ko e “Faleʻi ngāue fakafaifekau ʻaonga mei he ʻEikí.”
Vahe ha seti ʻe taha ʻo e ngaahi vēsí ki he kulupu takitaha. Hili iá, ʻe lava ke tānaki ʻe he kau akó ki heʻenau ngaahi pēsí ha ngaahi faleʻi ʻe tolu pe lahi ange te nau maʻu ʻi heʻenau ngaahi vēsí. Te nau lava ʻo tānaki mo ha ngaahi fakatātā ki heʻenau ngaahi pēsí kapau ʻe fiemaʻu. Hili iá, te ke lava ʻo fakaafeʻi ha kau ako ke vahevahe ʻenau ngaahi pēsí mo e kalasí.
Lau ʻa e ngaahi veesi ko ʻení, ʻo kumi ʻa e faleʻi naʻe fai ʻe he ʻEikí ʻe lava ʻo tokoni atu ke ke loto-fiemālie ange mo lava ke vahevahe ʻa e ongoongoleleí.
Tokāteline mo e Ngaahi Fuakava 30:5, 8–11 (ʻE ala tokoni ke ʻiloʻi ko e “tokoua” ʻo Pita Uitemā naʻe lave ki ai ʻa e veesi 5 ko ʻŌliva Kautele, ʻa ia naʻe ui ke ngāue fakafaifekau ʻi ha fakahā kimuʻa ange [vakai, Tokāteline mo e Ngaahi Fuakava 28:14–16].)
Tokāteline mo e Ngaahi Fuakava 31:4–9, 11–13
Tokāteline mo e Ngaahi Fuakava 32:1–5
Tokāteline mo e Ngaahi Fuakava 33:8–12, 16–17
Tokāteline mo e Ngaahi Fuakava 35:13–15, 24
ʻI he ʻosi e ako ʻa e kau akó, ʻoange ha faingamālie ke vahevahe ai ʻa e meʻa naʻa nau akó. Ko e founga ʻe taha ke fai ai ʻení ko hono fakaafeʻi ha kau ako kehekehe ke vahevahe ʻa e faleʻi naʻa nau maʻu mei heʻenau ngaahi vēsí ʻa ia naʻe mahuʻingamālie taha kiate kinautolú pea ke vahevahe ha moʻoni te tau lava ʻo ako mei he faleʻi ko ʻení. Te ke lava ʻo hiki ʻa e ngaahi moʻoni ko ʻení ʻi he palakipoé pe fakaafeʻi ʻa e kau akó ke hiki kinautolu.
ʻE lava ke kau ʻi he ngaahi sīpinga ʻe talaatu ʻe he kau akó ʻa e ngaahi meʻá ni: ʻe lava ke tau falala ki he ʻEikí ki ha tokoni ʻi hono vahevahe ʻEne ongoongoleleí kae ʻikai ke tau manavahē ki he niʻihi kehé (vakai, Tokāteline mo e Ngaahi Fuakava 30:11); ʻe fakaava ʻe he ʻEikí ʻa e loto ʻo e kakai ʻoku tau akoʻí (vakai, Tokāteline mo e Ngaahi Fuakava 31:7); ʻe ʻiate kitautolu ʻa e ʻEikí ʻi heʻetau feinga ke vahevahe ʻEne ongoongoleleí (vakai, Tokāteline mo e Ngaahi Fuakava 32:3); ʻi he fakaava hotau ngutú ke vahevahe ʻa e ongoongoleleí, ʻe tokoniʻi kitautolu ʻe he ʻEikí ke ʻilo ʻa e meʻa ke tau lea ʻakí (vakai, Tokāteline mo e Ngaahi Fuakava 33:8–10); ʻoku foaki ʻe he ʻEikí ʻa e mālohi ʻo Hono Laumālié ki he vaivai ʻoku ngāue Maʻaná (vakai, Tokāteline mo e Ngaahi Fuakava 35:13–14).
-
ʻOkú ke pehē ko e hā ʻoku hōifua ai ʻa e ʻEikí ke tokoniʻi kitautolu ke vahevahe ʻa e ongoongoleleí?
-
ʻE tokoniʻi fēfē nai kitautolu ʻe he ngaahi moʻoni ko ʻeni fekauʻaki mo e ʻEikí ʻi heʻetau feinga ke malanga ʻaki ʻa e ongoongoleleí?
Ngaahi fakakaukau ki hono fakaava ho ngutú ke vahevahe ʻa e ongoongoleleí
Tuku ha taimi ke tokoniʻi ʻa e kau akó ke nau ako mo aleaʻi ha ngaahi founga pau te nau lava ai ʻo fakahoko ʻa e fekau ʻa e ʻEikí ke “fakaava [honau] ngutú” (Tokāteline mo e Ngaahi Fuakava 33:8–10; vakai foki, 30:5,11) pea vahevahe ʻa e ongoongoleleí. ʻE lava ʻe hono tokoniʻi ʻo e kau akó ke nau vakai ki ha ngaahi founga pau mo malava ke fakahoko ai ʻení ke fakatupulaki ʻenau loto-falala ke vahevahe ʻa e ongoongoleleí.
Ko e founga ʻe taha ke fakahoko ai ʻení ko hono huluʻi ha foʻi vitiō ʻe taha pe lahi ange mei heni. Fakaafeʻi ʻa e kau akó ke kumi ha ngaahi founga kehekehe naʻe fakaava ai ʻe he kakaí honau ngutú pea fakaafea ʻa e ngaahi tāpuaki ʻa e ʻEikí. Te ke lava foki ʻo vahevahe ha ngaahi maʻuʻanga tokoni kehe mei he ʻū peesi “Ko Hono Vahevahe ʻo e Ongoongoleleí” ChurchofJesusChrist.org.
ʻOku vahevahe ʻe he ngaahi vitiō ko ʻení ha ngaahi fakakaukau fekauʻaki mo e founga te ke lava ai ʻo “fakaava ho ngutú” (Tokāteline mo e Ngaahi Fuakava 30:5) pea fakaafeʻi ʻa e niʻihi kehé ʻi he founga fakanatula mo mahuʻingamālie ke nau aʻusia ʻa e ongoongolelei ʻo Sīsū Kalaisí.
Fakaafeʻi e Niʻihi Kehé ke "Hau ʻo Mamata"
ʻOku fie kau mai e tokolahi. Ko e toé pē ke fakaafeʻi kinautolu. ʻOku ʻi he vitiō ko ʻení ʻa e hoko e fakaafe ke "haʻu ʻo mamatá" ko ha meʻa angamaheni he moʻui e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Fakaafeʻi e Niʻihi Kehé ke "Haʻu ʻo Tokoni"
ʻOku fie alanima ʻa e kakaʻi ʻo tokoni; taimi lahi ko e meʻa pē ʻoku fie maʻu ko hono fakaafeʻi kinautolu.
Sharing the Gospel
What we call “member missionary work” is not a program but an attitude of love and outreach to help those around us.
-
Ko e hā ha ngaahi aʻusia kuó ke maʻu ʻi hono vahevahe ʻo e ongoongoleleí? Ko e hā ʻa e meʻa naʻá ke fakatokangaʻi ko e teuteu ʻaonga taha ia ki he ngaahi aʻusia ko iá?
Faʻu ha palani
ʻOange ha taimi ki he kau akó ke hiki ha palani faingofua fekauʻaki mo e meʻa te nau fai ke vahevahe ai ʻa e ongoongoleleí mo e niʻihi kehé. ʻE lava ke ʻoange ʻe he ngaahi fehuʻi ko ʻení ha ngaahi fakakaukau ʻo e meʻa ke nau tohí.
-
Ko hai ha taha ʻokú ke ongoʻi te ke lava ʻo vahevahe ki ai ʻa e ongoongoleleí?
-
Mei he meʻa naʻá ke ako ʻi he ʻaho ní, ko e hā ha ngaahi founga fakanatula mo mahuʻingamālie te ke lava ʻo tokoni ai ki he tokotaha ko ʻení ke ofi ange kia Sīsū Kalaisí?
-
Ko e hā ha ngaahi fakafeʻātungia ʻokú ke pehē te nau lava ʻo taʻofi koe mei hono ngāueʻi hoʻo palaní?
-
Ko e hā ha ngaahi moʻoni fekauʻaki mo e Fakamoʻuí kuó ke ako mei he Tokāteline mo e Ngaahi Fuakava 30–36 ʻe lava ʻo tokoni ke ke ikunaʻi ai ʻa e ngaahi fakafeʻātungia ko ʻení?
Fakakaukau ki he founga te ke lava ai ʻo poupouʻi ʻa e kau akó ke ngāueʻi ʻi he tui ʻa e meʻa naʻa nau ongoʻi ʻi he ʻaho ní. Te ke lava ʻo fakaafeʻi kinautolu ke nau fakakaukau ke fokotuʻu ha taimi ke ngāueʻi ai ʻa e meʻa naʻa nau tohí. Vahevahe hoʻo loto-falala ki he ivi malava ʻo e Fakamoʻuí ke ueʻi ʻa e loto ʻo e niʻihi kehé ʻo fakafou ʻiate kinautolú.
Fakaafeʻi ʻa e kau akó ke moʻui ʻaki ʻa e meʻa ʻoku nau akó: Ki ha ako ʻi he founga ke muimuiʻi ʻaki e palani ʻa e kau akó ke moʻui ʻaki ʻa e meʻa ʻoku nau akó, vakai ki he ako ʻoku ui ko e, “Fakaafeʻi ʻa e kau akó ke moʻui ʻaki ʻa e meʻa ʻoku nau akó,” ʻoku maʻu ʻi he ako Fakatupulaki Ngaahi Taukei ʻa e Faiakó.