Lēsoni 55: Tokāteline mo e Ngaahi Fuakava 41–44

Tokāteline mo e Ngaahi Fuakava 41

ʻOku Fiefia ʻa e ʻEikí ke Tāpuakiʻi Kitautolu

ʻI he fakataha ʻa e Palōfitá mo e Kāingalotu faingataʻaʻia ʻi ʻOhaioó, naʻe fakamoʻoni ʻa e ʻEikí ʻokú Ne fiefia ʻi hono tāpuakiʻi ʻa kinautolu ʻoku fanongo kiate Iá. ʻOku fakataumuʻa ʻa e lēsoni ko ʻení ke tokoni ki he kau akó ke nau maʻu ha loto-falala ʻe tāpuakiʻi kinautolu ʻe he ʻEikí ʻi heʻenau fanongo mo talangofua kiate Iá.

Ngaahi ʻEkitivitī Ako ʻOku Ala Fakahokó

ʻOku fēfē nai hoʻo falala ʻoku …?

Tā ha fakatātā hangē ko ia ʻi he palakipoé:

Tuhu ki he tafaʻaki toʻomataʻu ʻo e meʻafuá. Fakaafeʻi ʻa e kau akó ke vahevahe ha meʻa ʻoku nau ongoʻi ʻoku nau loto-falala ki ai pea mo hono ʻuhingá.

Hiki ʻa e fakamatala ko ʻení ʻi he palakipoé: ʻE tāpuakiʻi kitautolu ʻe he ʻEikí kapau te tau fanongo mo talangofua kiate Ia. Kole ki he kau akó ke fakaʻaongaʻi ʻa e meʻafuá ke fakafuofuaʻi ʻenau loto-falala ki he fakamatala ko ʻení ʻi ha meʻafua mei he 1 ki he 5 (1 = ʻikai loto-falala, mo e 5 = loto-falala ʻaupito). Fakaafeʻi ʻa e kau akó ke fakakaukau ki he ʻuhinga naʻa nau fakafuofuaʻi ai ʻenau loto-falalá ʻo hangē ko ia naʻa nau faí.

• Ko e hā ha faikehekehe ʻe lava ke hoko ʻi hoʻo ongoʻi loto-falala moʻoni ʻe tāpuekina koe ʻe he ʻEikí?

Fakaafeʻi ʻa e kau akó ke fekumi ki ha tokoni mei he ʻEikí ke fakatupulaki ʻenau loto-falala te Ne tāpuakiʻi kinautolu ʻi heʻenau feinga ke fanongo mo talangofua kiate Iá.

Ko e ʻulungaanga ʻo e ʻEikí ʻi Heʻene tāpuakiʻi kitautolú

ʻI Tīsema ʻo e 1830, naʻe fekauʻi ʻe he ʻEikí ʻa e Kāingalotú ke nau hiki ki ʻOhaiō (vakai, Tokāteline mo e Ngaahi Fuakava 37:3). Hili ha taimi nounou mei ai, ʻi Sānuali mo Fēpueli ʻo e 1831, naʻe fononga ai ʻa e Palōfita ko Siosefa Sāmitá mo hono uaifi ko ʻEmá, ʻi ha maile ʻe laungeau ki Ketilani, ʻOhaiō. Naʻe maʻu leva ʻe he Palōfitá ha fakahā ʻo ʻomi ha ngaahi fakahinohino ʻi he kamata ke nofo ʻa e Kāingalotu mei he ngaahi feituʻu kehé ʻi Ketilaní.

Lau ʻa e Tokāteline mo e Ngaahi Fuakava 41:1, ʻo kumi ʻa e ʻulungaanga ʻo e ʻEikí fekauʻaki mo hono tāpuakiʻi ʻa kinautolu ʻoku fanongo kiate Iá.

Tokoni ke fakatokangaʻi ʻe he kau akó ʻa e ivi tākiekina ʻo e ʻEikí: Ki ha ako lahi ange ke tokoni ke fakatokangaʻi ʻe he akó ʻa e ivi tākiekina ʻo e ʻEikí ʻi he folofolá pea ʻi heʻenau moʻuí, vakai ki he taukei “Fakahoko e ngaahi fehuʻi ʻoku nofotaha ki hono fakafehokotaki e ʻofa, mālohi, mo e ʻaloʻofa ʻa e ʻEikí ki he moʻoni ʻoku akoʻí,” ʻi he ako ʻoku fakahingoa ko e, “Tokoniʻi e kau akó ke nau fakatokangaʻi e ʻofa, mālohi mo e ʻaloʻofa ʻa e ʻEikí ʻi heʻenau moʻuí” ʻoku maʻu ʻi he Fakatupulaki ʻa e Ngaahi Taukei ʻa e Faiakó: Tokanga Taha kia Sīsū Kalaisi. ʻI hono vahevahe ʻe he kau akó ʻa e meʻa naʻa nau maʻú, hiki ʻa e moʻoni ko ʻení ʻi he palakipoé: ʻOku hōifua ʻa e ʻEikí ke tāpuakiʻi ʻa kinautolu ʻoku fanongo kiate Iá. Te ke lava ʻo poupouʻi ʻa e kau akó ke fakaʻilongaʻi ʻa e moʻoni ko ʻení ʻi heʻenau folofolá.

• ʻOkú ke pehē ʻoku ʻuhinga ki he hā ke fiefia ʻi ha meʻá?

• ʻOkú ke pehē ko e hā ha niʻihi ʻo e ngaahi “meʻaʻofa ʻoku mahuʻinga taha ʻi he ngaahi meʻaʻofa kotoa pē ʻa e ʻOtuá.”? (Tokāteline mo e Ngaahi Fuakava 14:7).

• Ko e hā ha ngaahi founga te tau lava ai ʻo fanongo kiate Ia?

Fakafanongo ki he ngaahi tali ʻa e kau akó. Kapau ʻe ʻaonga, fakaafeʻi ʻa e kau akó ke lau ʻa e fakamatala ko ʻení, ʻo kumi ʻa e ngaahi founga te tau lava ai ʻo fanongo ki he ʻEikí.

Naʻe akonaki ʻa Palesiteni Lāsolo M. Nalesoni ʻo pehē:

ʻOku fiemaʻu ha ngāue ʻiloʻi pau mo hokohoko ke fakafonu ʻetau moʻui fakaʻahó ʻaki ʻEne folofolá, ʻEne ngaahi akonakí, mo ʻEne ngaahi moʻoní. …

Te tau lava ʻo ō ki he folofolá. ʻOku nau akoʻi kitautolu kau kia Sīsū Kalaisi mo ʻEne ongoongoleleí, maʻongoʻonga ʻo ʻEne Fakaleleí, mo e palani lahi ʻo e fiefia mo e huhuʻi ʻa ʻetau Tamaí. … ʻI heʻetau keinanga fakaʻaho ʻi he folofola ʻa Kalaisí, ʻe fakahā mai ʻe he folofola ʻa Kalaisí ʻa e founga ke tau tali ʻaki ʻa e ngaahi faingataʻa naʻe ʻikai ke tau lavelave ʻiloa te tau fehangahangai mo iá.

Te tau lava foki ʻo fanongo kiate Ia ʻi he temipalé. Ko e fale ʻo e ʻEikí ko ha fale ia ʻo e ako. ʻOku faiako ʻi ai ʻa e ʻEikí ʻi Heʻene founga pē ʻAʻana. …

… ʻOku tau fanongo kiate Ia ʻi heʻetau talangofua ki he lea ʻa e kau palōfitá, kau tangata kikite, mo e kau tangata maʻu fakahaá. ʻOku fakamoʻoniʻi maʻu pē Ia ʻe he Kau ʻAposetolo ʻa Sīsū Kalaisi kuo fakanofó. ʻOku nau fakahinohino ʻa e halá ʻi heʻetau foua ʻa e hala fihituʻu ʻo ʻetau aʻusia fakamatelié. (Russell M. Nelson, “Fanongo Kiate Ia,” Liahona, Mē 2020, 89–90)

Fakakaukau ke kole ki he kau akó ke toe vakaiʻi ʻa e veesi 1 ke ʻilo pe ko e hā ʻe hoko kiate kinautolu ʻoku nau fakafisi ke fanongo ki he ʻEikí. Mahalo ʻe tokoni ke fakamahinoʻi ange ʻoku ʻuhinga ʻa e foʻi lea “malaʻiá” ʻi hono fakaʻaongaʻi ʻi he veesi ko ʻení ki ha ngaahi fakamaau pe ngaahi nunuʻa.

• Ko e hā ʻoku mahuʻinga ai ke ʻiloʻi ʻe lava ke iku ʻa e fakafisi ke fanongo ki he ʻEikí ki ha ngaahi nunuʻa koví?

Ngaahi sīpinga ʻo hono tāpuakiʻi ʻe he ʻEikí ʻa kinautolu ʻoku fanongo kiate Iá

Fakaafeʻi ha kau ako ke vahevahe ʻenau ngaahi tali ki he ngaahi fehuʻi ko ʻení. ʻE ala tokoni hono vahevahe ʻenau fiefiá mo e ʻofá ke mahino kiate kinautolu ʻa e fiefia ʻoku maʻu ʻe he ʻEikí. ʻE lava foki ke hoko ʻeni ko ha faingamālie lelei ke ke ʻiloʻi lelei ange ai hoʻo kau akó.

• Ko e hā ʻokú ke ʻofa pe fiefia aí?

Fakamatalaʻi ange ʻoku lahi ha ngaahi sīpinga ʻo e fiefia moʻoni ʻa e ʻEikí ʻi hono tāpuakiʻi ʻa kinautolu ʻoku fanongo kiate Iá.

Lau ʻa e ngaahi veesi ko ʻení ʻo kumi ʻa e founga ʻoku tāpuekina ai ʻe he ʻEikí Hono Kāingalotú ʻi heʻenau fanongo kiate Iá.

Fakakaukau ke vahevahe ʻa e kalasí ki ha ngaahi kulupu ke lau ʻa e ngaahi vēsí pea tali ʻa e ngaahi fehuʻi ʻoku ʻoatu fakataha mo iá. Hili iá, ʻe lava ke fevahevaheʻaki ʻe he kau akó ʻa e meʻa naʻa nau akó.

Tokāteline mo e Ngaahi Fuakava 41:2–5

• ʻE lava fēfē nai ke hoko hono maʻu ʻa e fono pe fakahinohino ʻa e ʻEikí ko ha tāpuakí? (Vakai, veesi 3.)

• ʻE lava fēfē nai ʻa e talangofua ki he fono ʻa e ʻEikí mo e hoko ko ha kau ākonga lelei ange ʻa Kalaisí ʻo tokoniʻi kitautolu? (Vakai, veesi 5.)

Ki ha sīpinga fakaeonopōní, vakai ki hono vahevahe ʻe Palesiteni Kōtoni B. Hingikelī (1910–2008) ʻa e founga naʻe tāpuekina ai ʻe he ʻEikí ha taha naʻe fanongo mo talangofua kiate Ia, ʻi he vitiō “We Walk by Faith,” ʻoku maʻu ʻi he ChurchofJesusChrist.org, mei he taimi 7:30 ki he 12:39.

We Walk by Faith

We reach toward the unknown, but faith lights the way. If we will cultivate that faith, we shall never walk in darkness.

Ngaahi sīpinga kehe

Fakaafeʻi ʻa e kau akó ke fekumi pe fakakaukau ki ha toe sīpinga ʻe ua ʻokú na langaki ʻenau loto-falala ʻe tāpuakiʻi ʻe he ʻEikí ʻa kinautolu ʻoku fanongo kiate Iá. Poupouʻi kinautolu ke fekumi ki he fakahinohino ʻa e ʻEikí ke maʻu ha ngaahi sīpinga te nau tāpuekina kinautolu mo e kalasí.

1. Kumi ha sīpinga ʻe taha mei he folofolá. ʻE lava pē ʻeni ke hoko:

   1. Ko ha fakamatala ʻo e taimi naʻe tāpuakiʻi ai ʻe he ʻEikí ʻa kinautolu naʻe fanongo mo talangofua kiate Iá. (Ko ha ngaahi sīpinga ʻeni ʻe niʻihi: Ko hono langa ʻe Noa ʻa e ʻaʻaké pea fakahaofi mei he Lōmakí [vakai, Sēnesi 6–8]; Talangofua ʻa Tēpola ki he fekau ʻa e ʻEikí ke fakatauʻatāinaʻi ʻa ʻIsileli mei he pōpulá [Kau Fakamaau 4:1–8, 13–15]; Ko hono tali ʻe Mele ʻa e fatongia ke hoko ko e faʻē ʻa e Fakamoʻuí mo ongoʻi ʻa e ngaahi tāpuaki ʻa e ʻEikí [Luke 1:38, 46–49]; Ko hono maʻu ʻe Nīfai ʻa e ʻū lauʻipeleti palasá [vakai, 1 Nīfai 3–5]; Ko e lava ke maluʻi ʻe Siosefa Sāmita ʻa e ʻū lauʻipeletí [vakai, Siosefa Sāmita—Hisitōlia 1:46, 60]; Ko e fepapitaisoʻaki ʻa Siosefa Sāmita mo ʻŌliva Kautele hili ʻena maʻu ʻa e Lakanga Taulaʻeiki Faka-ʻĒloné peá na maʻu leva ʻa e fakahā ʻo e Laumālie Māʻoniʻoní [vakai, Siosefa Sāmita—Hisitōlia 1:68–74].)

   2. Ko ha veesi pe ʻū veesi ʻoku fakamoʻoni ʻe tāpuakiʻi kitautolu ʻe he ʻEikí ʻi heʻetau fanongo mo talangofua kiate Iá. (ʻOku kau ʻi he ngaahi sīpingá ʻa e Malakai 3:10; 1 Sione 3:22; Seilome 1:9; Mōsaia 2:41; Tokāteline mo e Ngaahi Fuakava 19:38; 82:10; 89:1, 18–21; 130:21.)

2. Fakakaukau ki ha toe sīpinga ʻe taha. ʻE lava pē ʻeni ke hoko:

   1. Ko ha aʻusia fakataautaha ʻo ha taimi kuo tāpuekina ai koe ʻe he ʻEikí.

   2. Ko ha aʻusia mei ha kaungāmeʻa pe ha tokotaha ʻokú ke ʻofa ai.

   3. Ko ha lea mei he konifelenisi lahí.

   4. Ko ha vitiō ʻi he ChurchofJesusChrist.org.

Fakaafeʻi ʻa e kau akó ke hiki ʻenau ngaahi sīpingá ʻi ha ʻū laʻipepa kehekehe. Talaange ki he kau akó ʻe lava ke nau vahevahe mo e toenga ʻo e kalasí ʻa e meʻa naʻa nau tohí. Fakatahaʻi ʻa e ʻū laʻipepá, ʻai ke nau tuifio, pea fili ha ʻū laʻipepa ʻe niʻihi pe fakaafeʻi ha tokotaha ako ke ne fili ia. Mahalo te ke fie lau taha taha ʻa e ngaahi sīpingá pea kole ange pe ʻe loto-fiemālie ʻa e tokotaha ako naʻá ne tohí ke vahevahe ʻa e ʻuhinga naʻá ne fili ai ʻa e sīpinga ko iá. Fehuʻi ange pe ʻe fakatupulaki fēfē nai ʻe he sīpingá ʻa e loto-falala ʻa e tokotaha akó ʻe tāpuakiʻi kinautolu ʻe he ʻEikí ʻi heʻenau fanongo kiate Iá. ʻI he vahevahe ʻa e kau akó, fakamālōʻia kinautolu ʻi heʻenau ngāué pea feinga ke tokoniʻi kinautolu ke nau ongoʻi ʻa e mahuʻinga ʻo hono vahevahe ʻenau ngaahi fakakaukaú mo e aʻusiá ʻi he kalasí.

Ke fakaʻosi ʻa e lēsoni ko ʻení, lekooti hoʻo ngaahi fakakaukau mo e ongo fekauʻaki mo hono tāpuakiʻi kitautolu ʻe he ʻEikí ʻi heʻetau fanongo kiate Iá. ʻOkú ke maʻu nai ha loto-falala te Ne tāpuekina koe? Ko e hā te ke lava ʻo fai ke fakatupulaki ai hoʻo loto-falalá?

Fakakaukau ke fakaafeʻi ʻa e kau akó ke vahevahe ʻa e meʻa naʻa nau ako pe ongoʻi ʻi he kalasí ʻi he ʻaho ní. Vahevahe hoʻo fakamoʻoní mo hoʻo loto-falala ʻe tāpuekina kitautolu ʻe he ʻEikí ʻi heʻetau fanongo kiate Iá.

Ngaahi Maʻuʻanga Tokoni Kehé

Te u lava fēfē nai ʻo fanongo lelei ange ki he ʻEikí?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

To Acquire Spiritual Guidance

By careful practice, through the application of correct principles, and by being sensitive to the feelings that come, you will gain spiritual guidance.

ʻOku ʻamanaki atu ʻetau Tamaí ke ke ako ki he founga ke maʻu ai ʻa e tokoni fakalangi ko iá, ʻaki hoʻo fakahaaʻi hoʻo tui kiate Ia mo Hono ʻAlo Māʻoniʻoni ko Sīsū Kalaisí. Kapau naʻá ke talitali kole ʻataʻatā pē ke maʻu ha tataki fakalaumālie taʻe-te-ke ngāueʻi ia, te ke hoko ai ʻo vaivai mo fakafalala lahi ange kiate Kinaua. ʻOkú Na ʻafioʻi ʻe hoko mai ha tupulaki fakataautaha mahuʻinga ʻi hoʻo faifeinga ke ʻiloʻi ʻa e founga ʻe tākiekina ai koe ʻe he Laumālié.

Ko e ngāue ko ia ʻe hā ngali fakapipiko ʻi he kamataʻangá, ʻe ʻalu pē taimí mo ʻene toe faingofua angé ʻi hoʻo feinga maʻu pē ke ʻiloʻi mo muimui ki he ngaahi ueʻi ʻa e Laumālié. Ko hoʻo falala ko ia ki he fakahinohino ʻokú ke maʻu mei he Laumālie Māʻoniʻoní, ʻe ʻalu pē ke toe mālohi ange. (Richard G. Scott, “Ke Maʻu Ha Tataki Fakalaumālie,” Liahona, Nōvema 2009, 7)

Fēfē kapau ʻoku hangē he ʻikai hoko mai ʻa e ngaahi tāpuaki ia ʻa e ʻOtuá?

Naʻe pehē ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻI haʻo maʻu ha faʻahinga tāpuaki mei he ʻOtuá, te ke lava ʻo pehē naʻá ke talangofua ki ha fono taʻengata ʻoku makatuʻunga mei ai ʻa e tāpuaki ko iá. Kae manatuʻi ko e fono “naʻe tuʻutuʻuni paú” ʻoku ʻikai ke fakatatau ia ki heʻetau taimí ka ki he taimi pē ʻa e ʻOtuá. Naʻa mo e kau palōfita ʻi he kuonga muʻá ʻi heʻenau fekumi ki honau ʻapi fakalangí “naʻe mate ʻa kinautolú ni kotoa pē ʻi he tuí, ʻo ʻikai ke nau lavaʻi ʻa e ngaahi talaʻofá, ka naʻa nau mamata mamaʻo atu, mo ʻilo pau ki ai, ʻo fāʻofua ia” [Hepelū 11:13]. Kapau ʻoku teʻeki ke maʻu ha tāpuaki naʻe fiemaʻu mei he ʻOtuá—ka—he ʻikai fiemaʻu ke ke hohaʻa, mo fakakaukau pe ko e hā mo ha toe meʻa ʻoku fiemaʻu ke ke fai. Ka naʻá ne tuitala ki he faleʻi ʻa Siosefa Sāmitá ke “fai ʻi he loto fiefia ʻa e ngaahi meʻa kotoa pē ʻokú [ke] maʻu ʻa e mālohi ke faí; pea toki … tuʻu maʻu, ʻi he loto fakapapau, ke mamata ki he … fakahā mai e toʻukupu [ʻo e ʻOtuá] … .” [Tokāteline mo e Ngaahi Fuakava 123:17]. ʻOku ʻi ai ha ngaahi tāpuaki ʻoku fakatatali ki ha taimi ʻamui ange, ʻo aʻu ki he fānau faivelenga taha ʻa e ʻOtuá. (Dale G. Renlund, “Mohu Tāpuekina,” Liahona, Mē 2019, 72)

ʻOku tau maʻu nai ʻa e ngaahi tāpuaki ʻa e ʻOtuá?

Naʻe pehē ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻE kāinga ʻofeina, ʻoku finangalo ʻa e Tamai Hēvaní mo Sīsū Kalaisi ke tāpuakiʻi kotoa kitautolu. … ʻOku ʻikai ke maʻu ʻa e ngaahi tāpuaki ʻo e langí ʻi hano tānaki pē ʻo ha “ngaahi ngāue lelei,” pe ko e fakaongoongo pe te tau maʻu ʻa e lulu monūʻia ki he ngaahi tāpuakí. ʻIkai, ʻoku mahulu ange ʻa e ʻuhinga kehe ʻo e moʻoní ʻo lahi ange ki he vā fetuʻutaki lelei ʻa ha Tamai Hēvani ʻofa mo kinautolu ʻoku malava ke hoko ko Hono kau ʻea hokó—ʻa kitautolu. ʻOku fakahā mai ʻe he ngaahi moʻoni kuo toe fakafoki maí ʻoku ʻikai ke ngāueʻi ʻa e ngaahi tāpuakí, ka ʻoku mahuʻinga ʻetau ngaahi ngāue ʻoku kamataʻi mo hokohoko atu hono tataki ʻe he tuí. (Dale G. Renlund, “Mohu Tāpuekina,” Liahona, Mē 2019, 70)

Ngaahi ʻEkitivitī Fakalahi ki he Akó

ʻOku tāpuekina ʻe he ngaahi sīpinga kehe ʻa e ʻEikí ʻa kinautolu ʻoku fanongo kiate Iá

Ko ha sīpinga ʻe taha ʻo e fiefia ʻa e ʻEikí ʻi hono tāpuakiʻi ʻa kinautolu ʻoku fanongo kiate Iá ko ha fakamatala kia Ane mo Niueli K. Uitenī. Lau ʻa e Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 (2018), 123, pe fanongo mei he taimi 13:01 ki he 15:52.

• Naʻe feinga fēfē nai ʻa e ongo Uitenií ke fanongo ki he leʻo ʻo e ʻEikí?

• Naʻe tāpuekina fēfē nai ʻe he ʻEikí ʻa e ongo Uitenií?

Naʻe ʻikai ngata pē ʻi hono fekauʻi ʻe he ʻEikí ʻa e Palōfita ko Siosefa Sāmitá ke nofo ʻi Ketilaní, ka naʻá Ne tāpuekina foki ʻa e Kāingalotú ʻi ha ngaahi founga kehe.

Ko ha sīpinga ʻe taha ko ʻEtuate Pātilisi. Lau ʻa e Tokāteline mo e Ngaahi Fuakava 41:9–11, ʻo kumi ʻa e meʻa naʻe ui ʻe he ʻEikí ʻa ʻEtuate ke ne faí.

• Naʻe fakamatalaʻi fēfē nai ʻa ʻEtuate ʻi he ngaahi veesi ko ʻení?

• ʻOkú ke pehē ʻe tāpuekina fēfē nai ʻa e Kāingalotu ʻi Ketilaní ʻi heʻene fakahoko hono fatongia ko e pīsopé?

Fakamatalaʻi ange naʻe ngāue faivelenga ʻa Pīsope Pātilisi ʻi hono uiuiʻí ʻi ʻOhaiō, pea hoko ki Mīsuli, pea ki he vahaʻataimi ʻi ʻIlinoisi ʻa ia naʻá ne pekia ai ʻi he 1840. Naʻe hoko ʻene ngāué ko ha tāpuaki maʻongoʻonga ki he Kāingalotú.

• ʻOku hoko fēfē nai hono maʻu ha pīsopé ko ha tāpuaki ʻi heʻetau moʻuí ʻi he ʻahó ni?

Naʻe fakamatalaʻi ʻe he ʻEikí ha niʻihi ʻo e ngaahi tāpuaki naʻe maʻu ʻe ʻEtuate Pātilisi hili ʻene pekiá. Lau ʻa e Tokāteline mo e Ngaahi Fuakava 124:19 ʻo kumi ʻa e ngaahi tāpuaki ko ʻení.

Sī ʻa e ngaahi mataʻi tofé ki he fanga puaká

Hili hono lau ʻe he kau akó ʻa e Tokāteline mo e Ngaahi Fuakava 41:5–6, fakaʻaliʻali ʻa e laʻitā ko ʻení pea fehuʻi ange pe ʻoku nau pehē ko e hā ia.

Fakaafeʻi ʻa e kau akó ke fakamatalaʻi ki hanau hoa ʻa e meʻa ʻoku nau pehē ʻoku ʻuhinga ki ai ʻa e kupuʻi lea “pe sī hoʻomou mataʻi tofé ki he fanga puaká” (Mātiu 7:6). Pea fakaafeʻi leva ʻa e kau akó ke nau lau ʻa e lea ko ʻeni ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

Naʻe folofola ʻa e ʻEikí ʻo pehē, “Ko e meʻa ʻoku haʻu mei ʻolungá ʻoku toputapu, pea kuo pau ke tokanga ʻi hono lea ʻakí, pea ke lea ʻi he ueʻi ʻa e Laumālié” (T&F 63:64). Naʻá Ne fekau foki, kuo pau ke ʻoua naʻa tau laku ʻa e mataʻitofé ki he fanga puaká pe foaki ʻa e meʻa ʻoku māʻoniʻoní ki he fanga kulií (vakai, 3 Nīfai 14:6; T&F 41:6), ko hono ʻuhingá ʻoku ʻikai totonu ke aleaʻi ʻa e ngaahi meʻa ʻoku toputapú mo kinautolu ʻoku ʻikai mateuteu ke fakahoungaʻi honau mahuʻingá.

Ngāue fakapotopoto ʻaki ʻa e meʻa ʻoku foaki atu ʻe he ʻEikí. Ko ha falala ia. Hangē ko ʻení, he ʻikai ke ke fakamatalaʻi noaʻia pē ho tāpuaki fakapēteliaké ki ha taha pē. (D. Todd Christofferson, “A Sense of the Sacred,” New Era, June 2006, 31)

• Ko e hā ha ngaahi meʻa toputapu ʻoku totonu ke tau ngāue ʻaki ʻi he loto-ʻapasia mo e fakaʻapaʻapa?

Ako lahi ange fekauʻaki mo e founga ke fanongo ai kiate Iá

Mahalo te ke fakakaukau ke huluʻi ha foʻi vitiō ʻe taha pe lahi ange mei heni lolotonga ʻa e kalasí. Fakaafeʻi ʻa e kau akó ke vahevahe ʻa e meʻa ʻoku nau ako fekauʻaki mo e fanongo ki he leʻo ʻo e ʻEikí ʻi heʻenau moʻuí.

#HearHim: Listen to the Voice of Jesus Christ

What happens when we mute the noise around us, and listen with our hearts? That’s when we can feel the influence of Jesus Christ. #HearHim

#FanongoKiateIa: ʻOku fakaafeʻi kitautolu ʻe Palesiteni Nalesoni ke tau Fanongo ki he Leʻo ʻo e ʻEikí

Ko e hā ʻoku kole ai ʻe he Tamai Hēvaní ke tau fanongo ki Hono ʻalo ko Sīsū Kalaisí? ʻOku fakafeʻiloaki ʻe Palesiteni Russell M. Nelson ʻa e #FanongoKiateIá, mo fakaafe ke tau vakaiʻi e founga ʻo ʻetau fanongo mo muimui ki hotau Fakamoʻuí.

Founga ʻo ʻEku #FanongoKiateIá: ʻEletā Gary E. Stevenson

ʻOku fēfē hoʻo #FanongoKiateIá? Naʻe ako ʻe ʻEletā Gary E. Stevenson ke ne ʻiloʻi e folofola ʻa Sīsū Kalaisí ʻi he Laumālie Māʻoniʻoní.