Lēsoni 56: Tokāteline mo e Ngaahi Fuakava 41–44

Tokāteline mo e Ngaahi Fuakava 42

Ko e Ngaahi Fono ʻa e ʻEikí

Naʻe fakahoko ʻe he ʻEikí ʻi he Tokāteline mo e Ngaahi Fuakava 42, ʻa ʻEne talaʻofa ki he Kāingalotú te Ne foaki kiate kinautolu ʻEne fonó hili ʻenau hiki ki ʻOhaioó. Naʻá Ne fokotuʻu ha ngaahi fono fakalūkufua ʻo e tōʻonga moʻuí maʻá e kāingalotu ʻo e Siasí. ʻE tokoni ʻa e lēsoni ko ʻení ke fakahaaʻi ʻe he kau akó ʻenau ʻofa ki he ʻEikí ʻaki ʻenau talangofua ki Heʻene ngaahi fekaú.

Ngaahi ʻEkitivitī Ako ʻOku Ala Fakahokó

Fakakaukau kehekehe ʻe ua

Kamata ʻa e kalasí ʻaki hono fakaafeʻi ʻa e kau akó ke fakalaulauloto pea vahevahe ʻenau ngaahi fakakaukau fekauʻaki mo e fehuʻi ko ʻení:

• Mei he meʻa ʻokú ke mamata ki ai ʻi he māmaní ʻi he ʻaho ní, ʻokú ke pehē ko e hā ʻoku tau fiemaʻu ai ha ngaahi fekau mei he ʻOtuá?

Tohiʻi ʻa e talangofua mo e talangataʻa ʻi ʻolunga ʻi ha kōlomu kehekehe ʻe ua ʻi he palakipoé. ʻE lava leva ke hiki ʻe he kau akó ʻi lalo ʻi he kōlomu totonú ʻa e ngaahi ʻuhinga ʻe ala talangofua pe talangataʻa ai ʻa e kakaí ki he ngaahi fekaú.

Fakaafeʻi ʻa e kau akó ke nau fakalaulauloto ʻi ha miniti ʻe taha ki heʻenau ngaahi ʻuhinga ki hono tauhi pe ʻikai tauhi e ngaahi fekau ʻa e ʻOtuá.

ʻI hoʻo ako ʻi he ʻaho ní, fekumi ki he fakahinohino ʻa e Laumālie Māʻoniʻoní ke tokoni ke mahino lelei ange kiate koe ʻa e ʻuhinga ʻoku ʻomi ai ʻe he ʻEikí ʻa e ngaahi fekaú mo e founga te ke lava ʻo hokohoko atu aí, pe naʻa mo hono fakatupulaki hoʻo talangofuá.

Ko e fono ʻa e ʻEikí

Naʻe talaʻofa ʻe he ʻEikí ki he Kāingalotú te Ne foaki kiate kinautolu ʻEne fonó ʻi heʻenau tānaki fakataha ki ʻOhaioó (vakai, Tokāteline mo e Ngaahi Fuakava 38:32). Hili ha taimi nounou mei heʻenau tūʻuta ki ʻOhaioó, naʻe fakatahaʻi ʻe he Palōfita ko Siosefa Sāmitá mo ha kaumātuʻa ʻe toko 12 ʻa ʻenau tuí ʻi ha lotu fakamātoato (Tokāteline mo e Ngaahi Fuakava 41:3) pea kole ki he ʻEikí ke fakahā mai ʻEne fonó.

Lau ʻa e Tokāteline mo e Ngaahi Fuakava 42:1–3 ke vakai ki he tali ʻa e ʻEikí.

• Ko e hā ʻoku makehe kiate koe ʻi he ngaahi veesi ko ʻení?

Naʻe akoʻi ange leva ʻe he ʻEikí ha ngaahi fekau lahi naʻá Ne finangalo ke moʻui ʻaki ʻe Hono kakaí.

ʻI he ʻekitivitī ko ʻení, ʻe lava ke fili ʻe he kau akó ʻa e ngaahi veesi te nau laú pe ko hoʻo vahe ange. Fakakaukau ke fakaafeʻi ʻa e kau akó ke nau hiki ʻi he palakipoé ʻa e ngaahi fekau naʻa nau maʻú pea mo e (ngaahi) veesi naʻa nau maʻu aí.

Lau ha potufolofola ʻe ua pe lahi ange mei he ngaahi potufolofolá ni, ʻo kumi ʻa e ngaahi fekau ʻa e ʻEikí:

• Tokāteline mo e Ngaahi Fuakava 42:4–7

• Tokāteline mo e Ngaahi Fuakava 42:18–21

• Tokāteline mo e Ngaahi Fuakava 42:22–26

• Tokāteline mo e Ngaahi Fuakava 42:27–30

• Tokāteline mo e Ngaahi Fuakava 42:40–42

Fakatatau ki he veesi 29, ko e hā ʻoku totonu ai ke tau tauhi ʻa e ngaahi fekau ʻa e ʻEikí?

ʻOku akoʻi ʻe he veesi ko ʻení ʻi heʻetau tauhi e ngaahi fekau ʻa e ʻEikí, ʻoku tau fakahaaʻi ai ʻetau ʻofa kiate Iá. ʻE lava ke fakaʻilongaʻi ʻe he kau akó ʻa e foʻi moʻoni ko ʻení ʻi he veesi 29 pea fakafekauʻaki pe fakafehokotaki ia ki he Sione 14:15. ʻE lava foki ke lau ʻe he kau akó ʻa e Tokāteline mo e Ngaahi Fuakava 41:5, ʻo kumi mo ha toe ʻuhinga ʻe taha ʻo ʻetau talangofuá ki he ʻEikí.

Fakakaukau ke fakakulupu ʻa e kau akó ke nau lau mo tali ʻa e ngaahi meʻa ko ʻení.

ʻOku akoʻi ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí:

ʻOku ʻomi ʻe he ʻOtuá ha ngaahi fekau, ke tokoniʻi koe ke ke fakahoko ha ngaahi fili ʻoku leleí. ʻOkú Ne fakahoko ʻeni koeʻuhí ʻokú Ne ʻofa ʻiate koe. Pea ko e ʻuhinga lelei taha ke talangofua ai ki he ngaahi fekau ʻa e ʻOtuá ko hoʻo ʻofa kiate Iá. Ko e ʻofá ʻa e uho ʻo e ngaahi fekau ʻa e ʻOtuá. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí [2022], 11)

• ʻOku hoko fēfē nai ʻa e ngaahi fekau ʻa e ʻOtuá ko hano fakahaaʻi ia ʻo ʻEne ʻofá?

• ʻOku fakahaaʻi fēfē nai ʻe heʻetau talangofua ki he ngaahi fekau ʻa e ʻOtuá ʻoku tau ʻofa kiate Iá?

Ko ʻEne ngaahi fekaú

Mahalo ʻokú ke maʻu ha kau ako te nau fie fakakakato ʻa e ʻekitivitī ko ʻení ʻo fakaʻaongaʻi ha fekau ʻoku ʻikai ʻasi ʻi he Tokāteline mo e Ngaahi Fuakava 42. Fakakaukau ke fakalahi ʻa e ngaahi fekaú ke feau ʻa e ngaahi fiemaʻu hoʻo kau akó.

Fili ha fekau ʻe taha mei he vahe 42 ʻokú ke fie ako lahi ange pe fakalaulauloto ki ai.

ʻI hoʻo akó, teuteu ke vahevahe ʻa e ngaahi meʻá ni fekauʻaki mo e fekau kuó ke filí. Mahalo te ke fie hiki hoʻo ngaahi fakakaukaú ʻi hoʻo tohinoa akó.

1. Ngaahi veesi folofola kehe, ngaahi fakamatala ʻo e konifelenisi lahí, pe ngaahi konga lea ʻi he (kiʻi tohi) Ki Hono Fakamālohia ʻo e Toʻu Tupú ʻokú ne fakaloloto ʻa e mahino ʻokú ke maʻu ki he fekau ko ʻení

2. Ngaahi ʻuhinga ʻokú ke pehē ʻe ʻomi ai ʻe ha Tamai Hēvani ʻofa mo tokaimaʻananga ʻa e fekau ko ʻení kiate kitautolú

3. Founga ʻokú ke pehē ʻoku tokoniʻi ai kitautolu ʻe hono tauhi ʻo e fekau ko ʻení ke tau muimui ʻi he Fakamoʻuí, fakahaaʻi ʻetau ʻofa kiate Iá, pea hoko ʻo hangē ange ko Iá

4. Ngaahi aʻusia kuó ke maʻu ʻi hoʻo tauhi ʻa e fekau ko ʻení (fili pē; vahevahe pē kapau ʻoku ʻikai ke fuʻu toputapu pe fakataautaha)

ʻOange ha faingamālie ki he kau akó ke vahevahe ʻa e meʻa kuo nau akó. Te ke lava ʻo ʻai ke nau vahevahe ʻenau ngaahi fakakaukaú ʻi ha fanga kiʻi kulupu iiki.

Kapau naʻe hiki ʻe he kau akó ha ngaahi fekau ʻi he palakipoé kimuʻa, te ke lava ʻo fakaafeʻi kinautolu ke siakaleʻi ʻa e ngaahi fekau naʻa nau toki akó. Fakaafeʻi leva ʻa e kau akó ke fili ha fekau ʻe taha pe ua ʻoku nau pehē ʻe ʻaonga taha ke aleaʻi fakakalasí. Kole ange ke nau fakakaukauloto ki ha taha ʻoku faingataʻaʻia ke mahino ki ai mo tauhi ʻa e fekau ko ʻení. Fakaafeʻi ʻa e kalasí ke nau ngāue fakataha ke tokoniʻi ʻa e tokotahá ni. Te ke lava ʻo kamata ʻaki hano fakaafeʻi ʻa e kau ako naʻa nau ako ʻa e ngaahi fekau ko ʻení ke vahevahe ha ngaahi fakakaukau mei heʻenau akó. Fakaafeʻi foki mo e kau ako kehé ke vahevahe ha ngaahi fakakaukau ʻe ala tokoni. Te ke lava ʻo fai ha ngaahi fehuʻi vakaiʻi hangē ko ʻení: “Ko e hā ha ngaahi faingataʻa ʻe ala fehangahangai mo e tokotaha fakafoʻituitui ko ʻení?” “Te tau lava fēfē nai ʻo tokoniʻi ia ke ikunaʻi ʻa e ngaahi faingataʻa ko ʻení?” “Te tau lava fēfē nai ʻo tokoniʻi ia ke mahino mo ne ongoʻi e ʻofa ʻa e ʻEikí ʻo fakafou ʻi he fekau ko ʻení?”

Ko ʻeku talangofua ki he ngaahi fekau ʻa e ʻOtuá

ʻI hoʻo fakamanatu ʻa e meʻa kuó ke ako mo ongoʻi ʻi he lēsoni ko ʻení, fili ha fekau ʻokú ke ongoʻi ʻe finangalo ʻa e ʻEikí ke ke tokanga taha ki ai. Tali ʻa e ngaahi fehuʻi ko ʻení ʻi hoʻo tohinoa akó:

• ʻE lava fēfē nai ʻe he talangofua ki he fekau ko ʻení ʻo tāpuekina ʻeku moʻuí?

• ʻOku tokoniʻi fēfē nai au ʻe he fekau ko ʻení ke fakahaaʻi ʻeku ʻofa ki he Tamai Hēvaní mo Sīsū Kalaisi pea muimui ʻiate Kinauá?

• Ko e hā ha meʻa pau ʻe taha ʻoku ou fie fai ke fakahaaʻi ai ʻeku ʻofa ki he ʻEikí mo tauhi ʻa e fekau ko ʻení?

Poupouʻi ʻa e kau akó ke faʻu ha palani ke tauhi lelei ange ai ʻa e fekau naʻa nau filí.

Ngaahi Maʻuʻanga Tokoni Lahi Ange

Ko e hā ʻoku ʻomi ai ʻe he ʻOtuá kiate kitautolu ʻa e ngaahi fekaú?

Naʻe akonaki ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku kau ʻi he palani ʻa e ʻOtuá ha ngaahi fakahinohino maʻatautolu, ʻoku lau ki ai ʻa e folofolá ko e ngaahi fekau. Ko e ngaahi fekau ko ʻení ʻoku ʻikai ko ha ngaahi lao fakaholomamata pe taʻe-ʻuhinga pē ke akoʻi kitautolu ke tau talangofua. ʻOku nau fekauʻaki mo ʻetau fakatupulaki ʻa e ngaahi ʻulungaanga ʻo e anga fakaʻotuá, foki ki he Tamai Hēvaní, mo e maʻu ʻo e fiefia tuʻuloá. (Dale G. Renlund, “Mou Fili he ʻAhó Ni,” Liahona, Nōvema 2018, 105)

Te ke lava foki ʻo huluʻi ʻa e foʻi vitiō “Why Does God Give Us Commandments?” (0:39) ke tokoni ke fakakaukauloto ʻa e kau akó ki he ʻuhinga ʻoku ʻomi ai ʻe he ʻOtuá ha ngaahi fekau kiate kitautolú.

Tokāteline mo e Ngaahi Fuakava 42:22–23. Ko e hā ʻoku hoko ai ʻa e holi koví ko ha angahala mamafá?

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ʻikai ngata pē ʻene fakaʻauha kakato ʻa e Laumālié ʻo uesia ai ʻetau moʻuí, ka ʻoku ou pehē ko e faiangahala ia, he ʻokú ne fakaʻuliʻi ʻa e vā fetuʻutaki māʻoniʻoni taha ʻoku foaki mai kiate kitautolu ʻe he ʻOtuá ki māmaní—ʻa e feʻofaʻaki ʻa e tangatá mo e fefiné mo e holi ʻoku maʻu ʻe ha ongomeʻa mali ke ʻomi ha fānau ki ha fāmili ʻoku fakataumuʻa ke taʻengata. Naʻe pehē ʻe ha tokotaha, ko e ʻofa moʻoní kuo pau ke tuʻuloa ia. ʻOku tolonga ʻa e ʻofa moʻoní. Ka ʻoku liliu vave ʻa e holi koví ʻi he taimi pē ko ia ʻoku lava ke ne huke hake ai ha peesi [ponokalafi] pe sio ki ha toe meʻa ʻoku ʻasi hake, ko ha tangata pe fefine, ke fakafiemālieʻi ʻene ngaahi holi koví. … ʻOku ngaohi kitautolu ʻe he ʻofá ke tau fekumi ki he ʻOtuá mo tokoni ki he kakai kehé. Ka ko e holi koví, ʻoku ʻikai anga faka-ʻOtua ia pea ʻokú ne fakafiefiaʻi pē ʻene holí. ʻOku fakatupu ʻe he ʻofá ʻa ʻetau fie tokoní mo e angaʻofá; ʻoku ʻomi ʻe he holi koví ʻa e havalá. (Jeffrey R. Holland, “ʻIkai ha Feituʻu moʻó e Fili ʻo Hoku Laumālié,” Liahona, Mē 2010, 44–45)

Tokāteline mo e Ngaahi Fuakava 42:24–26. Ko e hā ʻa e tono, pea ko e hā ʻoku totonu ke tau fakaʻehiʻehi ai mei aí?

Ko e tonó “ko e feohi fakasekisuale taʻe-fakalao ia ʻa e tangatá mo e fefiné” (Fakahinohino ki he Ngaahi Folofolá, “Tonó,” scriptures.ChurchofJesusChrist.org).

Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ʻoku totonu ke tau moʻui kotoa ʻaki ai ʻa e fono ʻo e angamaʻa ʻa e ʻEikí ʻo tatau ai pē pe kuo tau mali pe ʻikai:

ʻOku mahuʻinga fakalaumālie ʻa e mālohi ke maʻu ha fānaú. ʻI hono ngāue hala ʻaki ʻa e mālohi ko ʻení, ʻokú ne veuki ai ʻa e ngaahi taumuʻa ʻo e palani ʻa e Tamaí mo ia ʻo ʻetau moʻui fakamatelié. Ko ʻetau Tamai Hēvaní mo Hono ʻAlo ʻOfaʻangá naʻá Na fai ʻa e fakatupú peá Na tuku mai kiate kitautolu takitaha ha konga ʻo Hona mālohi ke fakatupú. Ko e konga mahuʻinga ʻo e palani ʻa e Tamaí, ko e ngaahi fakahinohino pau ki he malava ʻo ngāue totonu ʻaki ia ke fakatupu ai ha moʻuí. ʻE fakapapauʻi moʻoni hotau ikuʻanga taʻengatá mei he anga ʻetau ongoʻi mo fakaʻaongaʻi ʻa e mālohi fakalangi ko iá. …

ʻOku taha pē pea ʻoku teʻeki ha liliu ki he tuʻunga moʻui maʻa fakasekisuale ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní: ʻoku toki ngofua pē ʻa e feohi vāofi ʻa ha tangata mo ha fefine ʻi he feohi fakamalí ʻo fakatatau ki he fakahinohino ʻi he palani ʻa e ʻOtuá. Ko e faʻahinga feohi vāofi fakaesino ko iá ʻoku ʻikai ko ha fie ʻilo pē ki ha meʻa ke ʻahiʻahiʻi, fakafiemālieʻi ha holi, pe ha faʻahinga fakafiefia pe meʻa fakamānako ke tulifua siokita ki ai. ʻOku ʻikai ko ha tau ke ikunaʻi pe ko ha foʻi ngāue pē ke fakahoko. Ka ko e meʻa pē ia ʻe taha ʻi he moʻui fakamatelié ʻokú ne fakahaaʻi ai hotau anga fakalangí mo e meʻa ʻoku tau malavá mo ha founga ke fakamālohia ai ʻa e ngaahi haʻi fakaeloto mo fakalaumālie ʻi he vā ʻo e husepānití mo e uaifí. (David A. Bednar, “ʻOku Mau Tui ki he Angamaʻá,” Liahona, Mē 2013, 42).

Ngaahi ʻEkitivitī Fakalahi ki he Akó

Faleʻi fakafaifekau

Fakaafeʻi ʻa e kau akó ke fakakaukau pe ko e hā ha faleʻi te nau fai ki ha faifekau foʻou ʻoku hohaʻa ki he founga ke ngāue lelei aí. ʻE lava ke lau ʻe he kau akó ʻa e Tokāteline mo e Ngaahi Fuakava 42:6–7, 12–17; 50:13–14, 17–20, ʻo kumi e faleʻi ʻa e ʻEikí ki he kaumātuʻa te Ne fekauʻi mei ʻOhaiō ke akoʻi ʻa e ongoongoleleí. ʻE lava ke fakaʻaongaʻi ʻe he kau akó ʻa e meʻa ʻoku nau ako ʻi he ngaahi vēsí pea tulamaʻi leva ʻa e faleʻi te nau fai ki he faifekaú. Fakakaukau ke fakaafeʻi ʻa e kau akó ke fakalaulauloto pe ko e faleʻi fakafaifekau fē ʻoku ʻaonga kiate kinautolu ʻi he taimi ní.

Tokāteline mo e Ngaahi Fuakava 42:43–52. ʻOku ʻomi ʻe he ʻEikí ʻa e ngaahi faleʻi ʻo kau ki he maté mo e fakamoʻuí

Kole ki he kau akó ke fakalaulauloto ki heʻenau tali ki he fehuʻi ko ʻení:

• Ko e hā ha faleʻi te ke fai ki ha taha kuó ne lotua ha fakafiemālie mei ha mahamahaki ka kuo teʻeki ai fakamoʻui?

Fakamatalaʻi ange, naʻe ʻomi ʻe he ʻEikí ha ngaahi fakahinohino kau ki he maté mo e fakamoʻuí ʻi he Tokāteline mo e Ngaahi Fuakava 42:43–52. Fakaafeʻi ʻa e kau akó ke nau vahevahe ki ha ngaahi kulupu tautau toko ua pe toko tolu. Kole ange ke nau lau ʻa e Tokāteline mo e Ngaahi Fuakava 42:43–52 ʻi heʻenau ngaahi kulupú, ʻo kumi ʻa e meʻa naʻe akoʻi ʻe he ʻEikí fekauʻaki mo e fakamoʻuí. Fakaafeʻi kinautolu ke hiki ha fakamatala ʻo ha tefitoʻi moʻoni ʻokú ne fakafofongaʻi ʻa e fono ʻa e ʻEikí ki hono fakamoʻui ʻo e mahakí. ʻE lava ke nau tohi ha meʻa hangē ko e “Kapau te tau maʻu ʻa e tui kia Sīsū Kalaisí, ʻe lava ke fakamoʻui kitautolu ʻo fakatatau ki Hono finangaló.”

Aleaʻi ʻa e ngaahi tali ʻa e kau akó ki he fehuʻi ko ʻení:

• Ko e hā ʻoku mahuʻinga ai ke manatuʻi ʻoku makatuʻunga ʻa e fakamoʻuí ʻi he tui mo e finangalo ʻo e ʻEikí?

Te ke lava foki ʻo fakahinohino ʻa e kau akó ki he talanoa ʻo Sione mo Heta ʻi he “Ko Hono Tali e Finangalo mo e Taimi ʻa e ʻEikí” (David A. Bednar, Liahona, ʻAokosi 2016, 16–23).