“Lēsoni 63—Tokāteline mo e Ngaahi Fuakava 46:7–33, Konga 2: “Mou Kumi Fakamātoato ki he Ngaahi Meʻa-foaki Lelei Tahá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 46:7–33, Konga 2,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 63: Tokāteline mo e Ngaahi Fuakava 46–48
Tokāteline mo e Ngaahi Fuakava 46:7–33, Konga 2
“Mou Kumi Fakamātoato ki he Ngaahi Meʻa-foaki Lelei Tahá”
ʻI heʻetau fāifeinga ke hangē ko Sīsū Kalaisí, ʻe lava ke tau ongoʻi loto-foʻi ʻi hotau ngaahi vaivaí. Koeʻuhí ko Sīsū Kalaisi, te tau lava ʻo maʻu ʻa e Laumālie Māʻoniʻoní mo e ngaahi meʻa-foaki fakalaumālié ke tokoniʻi kitautolu ke tau hoko ʻo hangē ange ko e Fakamoʻuí. ʻE lava ke tokoni ʻa e lēsoni ko ʻení ke hoko ʻa e kau akó ʻo hangē ange ko Sīsū Kalaisí ʻi heʻenau kumi ki he ngaahi meʻa-foaki ʻo e Laumālié.
Ngaahi ʻEkitivitī Ako ʻOku Ala Fakahokó
Ko e feinga ke hoko ʻo hangē ko e ʻOtuá
Te ke lava ʻo kamata ʻa e kalasí ʻaki hono fakaafeʻi ʻa e kau akó ke fakakaukau ki ha ngaahi vaivai pe ngaahi tōnounou te nau lava ʻo fakatupu ha loto-mamahi pe taʻofi kitautolu mei heʻetau hoko ʻo hangē ko e Tamai Hēvaní mo Sīsū Kalaisí. Fakaafeʻi ha kau ako ke hiki ʻenau ngaahi talí ʻi he palakipoé.
Fakakaukauloto ʻoku pehē ʻe ha taha ʻokú ne aʻusia ha niʻihi ʻo e ngaahi vaivai ʻi he palakipoé peá ne fakakaukau, “He ʻikai ke u lava ʻo ikunaʻi ʻa e ngaahi meʻá ni. ʻOku ou peheni pē au.”
-
Ko e hā ʻokú ke ʻilo fekauʻaki mo Sīsū Kalaisi ʻe tokoni ke mahino ki he tokotaha ko ʻení?
Ngaahi Meʻa-foaki ʻo e Laumālié
Ko e taha ʻo e ngaahi founga ʻe lava ke tokoniʻi ai kitautolu ʻe he Tamai Hēvaní mo Sīsū Kalaisi ke tau ikunaʻi hotau ngaahi vaivaí ko hono foaki mai ʻa e ngaahi meʻa-foaki fakalaumālié.
-
Ko e hā ʻokú ke ʻilo pe manatuʻi fekauʻaki mo e ngaahi meʻa-foaki fakalaumālié?
ʻE lava ke tali ʻe he kau akó ʻaki ʻa e ngaahi moʻoni naʻa nau ako mei he lēsoni kimuʻá (“Tokāteline mo e Ngaahi Fuakava 46:7–33, Konga 1”). Kapau kuo teʻeki ai ke ke akoʻi ʻa e lēsoni ko ʻení, ʻe lava ke ke feangai mo ia koeʻuhí ke ke lava ʻo tokoni ke mahino ki he kau akó ʻa e ngaahi meʻa-foaki fakalaumālié ʻo ka fiemaʻu.
Lau ʻa e Tokāteline mo e Ngaahi Fuakava 46:8 pea fakaʻilongaʻi ʻa e fakaafe ʻa e Fakamoʻuí ʻoku fekauʻaki mo e ngaahi meʻa-foaki fakalaumālié.
ʻOkú ke pehē ʻoku ʻuhinga ki he hā ʻa e kumi ki he ngaahi meʻa-foaki fakalaumālié?
-
ʻE tokoniʻi fēfē nai kitautolu ʻe he kumi ki he ngaahi meʻa-foaki fakalaumālié ʻi heʻetau feinga ke hoko ʻo hangē ko e ʻOtuá?
Naʻe fakamatalaʻi ʻe Brother Teti R. Kalisitā, ko e Palesiteni Lahi mālōlō ʻo e Lautohi Faka-Sāpaté, ʻa e founga ʻoku tokoniʻi ai kitautolu ʻe he ngaahi meʻa-foaki fakalaumālie ko ʻení ke tau hoko ʻo hangē ange ko e ʻOtuá:
Koeʻuhí ko e Fakalelei ʻa Kalaisí, ʻoku tau lava ke maʻu ʻa e meʻa-foaki ʻo e Laumālie Māʻoniʻoní fakataha mo hono ngaahi meʻa-foaki fakalaumālié. Ko e ngaahi meʻafoaki ko ʻení ko e ngaahi ʻulungaanga [ia] ʻo e anga faka-ʻOtuá; ko ia ai, ko e taimi kotoa pē ʻoku tau maʻu ai ha meʻa-foaki ʻo e Laumālié, ʻoku tau hoko ai ʻo hangē ange ko e ʻOtuá. ʻOku ʻikai ha toe veiveiua ʻi hono toutou faleʻi kitautolu ʻe he folofolá ke kumi ki he ngaahi meʻa-foaki ko ʻení.
Naʻe akoʻi mai ʻe Palesiteni Siaosi Q. Kēnoni: “ʻOku ʻikai totonu ke pehē ʻe ha taha, ʻHe ʻikai ke u lava ia ʻe au; ko hoku natulá pē ia ʻoʻokú.’ ʻOku ʻikai ke fakatonuhiaʻi ia ʻi he meʻá ni, koeʻuhi he naʻe talaʻofa mai ʻa e ʻOtuá ke ʻomi ʻa e ngaahi meʻa-foaki te nau toʻo [hotau ngaahi vaivaí]. … Kapau ʻoku ʻi ai hatau niʻihi ʻoku ʻikai haohaoa, ko hotau fatongiá ke lotua ʻa e meʻa-foaki te ne ʻai ke tau haohaoá.” (Tad R. Callister, “Ko e Fakalelei ʻa Sīsū Kalaisí,” Liahona, Mē 2019, 87)
-
Ko e hā ʻokú ke ako mei he fakamatala ko ʻení fekauʻaki mo e ngaahi meʻa-foaki fakalaumālié?
Tokoni ke mahino ki he kau akó ʻoku fakaafeʻi kitautolu ʻe he Tamai Hēvaní ke tau kumi ki he ngaahi meʻa-foaki ʻo e Laumālié kae lava ke tau hoko ʻo hangē ange ko Iá.
-
Ko e hā ha ngaahi meʻa-foaki fakalaumālie ʻe lava ke kumi ki ai ha taha ke ne ikunaʻi ʻa e ngaahi vaivai naʻe ʻiloʻi kimuʻa ʻi he lēsoní?
Te ke lava ʻo fakaafeʻi ʻa e kau akó ke hiki ʻi he palakipoé ha ngaahi meʻa-foaki fakalaumālie ʻi he tafaʻaki ʻo ha vaivai ʻoku fekauʻaki mo ia. Hangē ko ʻení, kapau naʻe hiki ʻa e ʻitá ʻi he palakipoé, mahalo ʻe ʻilo ʻe he kau akó ʻa e meʻa-foaki ʻo e faʻa kātakí. Kapau naʻe hiki ʻe he kau akó ʻa e siʻisiʻi ʻo e loto-falalá, te nau lava ʻo kumi ki he meʻa-foaki ʻo e loto-toʻá pe tuí.
Ke tokoni ki he kau akó ʻi he ʻekitivitī ko ʻení, te ke lava ʻo fakaafeʻi kinautolu ke toe vakaiʻi ʻa e ngaahi meʻa-foaki fakalaumālie ʻi he Tokāteline mo e Ngaahi Fuakava 46:13–25. Te ke lava foki ʻo fakaʻaongaʻi ʻa e lea ʻa Brother Kalisitaá ke fakamanatu ki he kau akó ʻe lava ke ui ʻa e ngaahi ʻulungaanga faka-Kalaisí, hangē ko ia ʻoku hiki ʻi he Molonai 7:45 pe Tokāteline mo e Ngaahi Fuakava 4:5–6, ko ha ngaahi meʻa-foaki fakalaumālie. Fakamanatu ki he kau akó ʻoku ʻi ai ha ngaahi meʻa-foaki fakalaumālie kehe ʻoku ʻikai ke hiki ʻi he folofolá.
Fakakaukau ki hoʻo ngaahi feinga ke hoko ʻo hangē ko e Tamai Hēvaní mo Sīsū Kalaisí. Tali ʻa e ngaahi fehuʻi ko ʻení ʻi hoʻo tohinoa akó:
-
Ko e hā ha vaivaiʻanga pe tōnounou ʻokú ke fie ikunaʻi?
-
Ko e hā ha ngaahi meʻa-foaki fakalaumālie te ke lava ʻo feinga ke ikunaʻi ʻaki ʻa e vaivai ko iá?
ʻOku tau kumi fēfē nai ki he ngaahi meʻa-foaki fakalaumālié?
Poupouʻi ʻa e kau akó ke nau fakaʻaongaʻi ʻa e ngaahi ʻekitivitī ako ko ʻení ke kumi ha ngaahi founga ʻe lava ke tokoniʻi ai kinautolu ʻe he Tamai Hēvaní mo Sīsū Kalaisi ʻi heʻenau kumi ki he ngaahi meʻa-foaki fakalaumālie kuo nau hiki ʻi heʻenau tohinoá.
Lau ʻa e Tokāteline mo e Ngaahi Fuakava 46:7–10, 30–33. Kumi ha fakahinohino te ne tokoniʻi koe ke ke kumi ki he ngaahi meʻa-foaki fakalaumālié.
-
ʻOkú ke pehē ko e hā ʻe lava ai ʻe he ngaahi ngāue naʻá ke ʻiló ʻo tokoniʻi koe ʻi hoʻo feinga ke kumi ki ha ngaahi meʻa-foaki fakalaumālié?
ʻE ala tokoni ke fakamanatu ki he kau akó ko e kumi ki he ngaahi meʻa-foaki fakalaumālié ko ha ngāue ia ʻi he moʻuí kotoa, pea ʻoku foaki kinautolu ʻe he ʻEikí ʻo fakatatau ki Hono finangaló mo ʻEne taimí (vakai, Molonai 10:17).
Naʻe vahevahe ʻe ʻEletā Melovini B. ʻĀnolo, ko ha Fitungofulu mālōlō, ha founga ʻe taha te tau lava ai ʻo fekumi ki ha ngaahi meʻa-foaki fakalaumālie mei he ʻOtuá:
ʻI heʻetau feinga ke maʻu ha meʻa-foaki fakalaumālié, te tau lava ʻo ako ʻa e ngaahi sīpinga mo e akonaki ʻa e Fakamoʻuí ʻoku fekauʻaki mo e meʻa-foaki pau ko iá pea feinga ke fakakau ʻa e ngaahi akonaki ko iá ʻi heʻetau moʻuí. (Mervyn B. Arnold, “Messages from the Doctrine and Covenants: Seek Ye the Best Gifts,” Ensign, Mar. 2005, 66)
Ke tokoni ki he kau akó ke teuteu ke fakaʻaongaʻi ʻa e faleʻi mei he fakamatala kimuʻá, ʻe lava ke ke fakaafeʻi kinautolu ke fakakaukau ki ha meʻa-foaki fakalaumālie pea faʻifaʻitaki ʻa e ngaahi akonaki ʻa ʻEletā ʻĀnoló mo e kalasí. Hangē ko ʻení, kapau ʻe fili ʻe he kau akó ʻa e meʻa-foaki ʻo e loto-toʻá, te ke lava ʻo fehuʻi ange:
-
Naʻe fakahaaʻi fēfē nai ʻe Sīsū Kalaisi ʻa e loto-toʻá ʻi he kotoa ʻo ʻEne moʻuí? (Vakai, Mātiu 26:47–56.)
-
Ko e hā kuo akoʻi mai ʻe he Fakamoʻuí fekauʻaki mo e loto-toʻá ʻi he folofolá? (Vakai, Sosiua 1:9.)
-
Ko e hā ʻe lava ke fai ʻe ha taha ke akoako fakaʻaongaʻi ai ʻa e loto-toʻá ʻi heʻene moʻuí?
-
Ko e hā ha ngaahi ngāue ʻe lava ke fai ʻe ha taha ke fakaafeʻi ai ʻa e tokoni ʻa e Fakamoʻuí ʻi heʻene fekumi ki he meʻa-foaki ʻo e loto-toʻá?
Hili ʻa e fealēleaʻaki ko ʻení, fakaʻaliʻali ʻa e ngaahi fakahinohino ko ʻení pea fakaafeʻi ʻa e kau akó ke ako ha meʻa-foaki fakalaumālie ʻiate kinautolu pē.
Sio ki hoʻo tohinoá ki he meʻa-foaki naʻá ke tohí ʻa ia te ke fie kumi ki aí. Fakakakato ʻa e ngaahi sitepu ko ʻení:
-
Fekumi ʻi he folofolá ki ha sīpinga ʻo hono fakatātaaʻi ʻe he Fakamoʻuí ʻa e meʻa-foaki ko iá.
-
Kumi ha ngaahi potufolofola ʻoku ʻi ai ha toe ngaahi akonaki fekauʻaki mo e meʻa-foaki ko iá.
-
Hiki ha meʻa ʻe ua pe tolu te ke lava ʻo fai ke akoako fakaʻaongaʻi ai ʻa e meʻa-foaki ko iá ʻi hoʻo moʻuí.
-
Hiki ha meʻa te ke fai ke fakaafeʻi ʻa e tokoni ʻa e Fakamoʻuí ʻi he hokohoko atu hoʻo kumi ki he meʻa-foaki ko iá. Lau ʻa e Tokāteline mo e Ngaahi Fuakava 46:7–10, 30–33 ʻo ka fiemaʻu.
Te ke lava ʻo fakaʻosi ʻaki hano fakaafeʻi ʻa e kau akó ke vahevahe ʻa e meʻa-foaki ʻoku nau fekumi ki aí mo e meʻa naʻa nau ako mei he sīpinga ʻa e Fakamoʻuí. Fakatokanga ange ke ʻoua naʻa nau vahevahe ha ngaahi vaivai ʻoku nau feinga ke ikunaʻi ʻa ia ʻe fuʻu fakataautaha ke nau talanoa ki ai. Poupouʻi ʻa e kau akó ke ngāueʻi faivelenga ʻa e ngaahi ueʻi kuo nau maʻú pea hokohoko atu hono fakaafeʻi ha tokoni mei he Tamai Hēvaní ʻi heʻenau fekumi ki ha ngaahi meʻa-foaki fakalaumālié.