Lēsoni 61: Tokāteline mo e Ngaahi Fuakava 46–48

Tokāteline mo e Ngaahi Fuakava 46:1–6

“ʻOua Naʻa Mou Kapusi Ha Taha”

ʻI he 1831, koeʻuhí ko e fakatangá mo e fakahohaʻá, naʻe kamata ai ʻe ha Kāingalotu ʻe niʻihi hono fakaʻatā ʻa e kau mēmipa pē ʻo e Siasí ke nau kau atu ki he ngaahi fakatahaʻanga moihuú. ʻI he hohaʻa ʻa Siosefa Sāmita ki he meʻá ni mo ha ngaahi meʻa kehe, naʻá ne lotua ha fakahinohino mo maʻu ʻa e fakahā ʻoku lekooti ʻi he Tokāteline mo e Ngaahi Fuakava 46. ʻI he fakahā ko ʻení, naʻe fekauʻi ai ʻe he Fakamoʻuí ʻa e kāingalotu ʻo e Siasí ke talitali lelei ʻa kinautolu kotoa pē naʻa nau “fekumi fakamātoato ki he puleʻangá” (Tokāteline mo e Ngaahi Fuakava 46:5) ke nau kau ki he ngaahi fakatahaʻanga moihuú. ʻE lava ke tokoni ʻa e lēsoni ko ʻení ki he kau akó ke fakatupulaki ʻenau feinga ke fokotuʻu ha ʻātakai fakakaumeʻa ʻi he ngaahi fakatahaʻanga ʻa e Siasí.

Ngaahi ʻEkitivitī Ako ʻOku Ala Fakahokó

Ko hono talitali lelei ʻo e taha kotoa

Fakakaukau ke fakaʻaliʻali ha fakatātā ʻo ha falelotu fakalotofonua mo ha fakaʻilonga ʻoku ʻasi ai ʻa e ngaahi foʻi lea “Talitali Lelei ʻa e Kau ʻAʻahí.” Te ke lava foki ʻo fakaʻaliʻali ʻa e ngaahi leá ni ʻi he palakipoé. ʻE ala tokoni ʻa e foʻi vitiō “Welcome” (1:05) pea teuteuʻi ʻa e kau akó ki he fealēleaʻaki ʻo e ʻaho ní.

Fakakaukau ki he ʻuhinga ʻokú ke pehē ʻoku faʻa maʻu ai ʻa e fakaʻilonga ko ʻení ʻi he ngaahi ʻapisiasi ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

• ʻE tokoni fēfē nai ʻa e ongoʻi talitali lelei ʻi he lotú ki he aʻusia ʻa ha taha ʻi heʻene moihuú?

  Fakakaukau ke fakaʻaliʻali ʻa e ngaahi fehuʻi ko ʻení pea fakaafeʻi ʻa e kau akó ke fakafuofuaʻi fakalongolongo kinautolu ʻi ha meʻafua mei he 1 (ʻIkai ʻaupito) ki he 5 (Maʻu pē). ʻE lava ke lekooti ʻenau ngaahi talí ʻi heʻenau tohinoa akó.

• ʻOkú ke ongoʻi ʻoku talitali lelei fēfē nai koe ʻi ho uōtí, koló, pe kalasi seminelí?

• Ko e hā hono tuʻo lahi hoʻo feinga ke ʻiloʻi lelei ange ʻa e niʻihi kehé ʻi he ngaahi polokalama ʻa e siasí?

• ʻOkú ke pehē ʻe ongoʻi ʻe hoʻo ngaahi kaungāmeʻá mo e kakai kehe ʻi homou kaungāʻapí ʻoku talitali lelei kinautolu ʻi he ngaahi fakatahaʻanga lotú?

ʻI hoʻo ako ʻi he ʻaho ní, kumi ʻa e ngaahi akonaki ʻa e Fakamoʻuí te ke lava ʻo fakaʻaongaʻi ke tokoniʻi koe mo e niʻihi kehé ke mou ongoʻi ʻoku talitali lelei kimoutolu ʻi he lotú.

Ko e ngaahi fakahinohino ʻa e ʻEikí fekauʻaki mo hono talitali lelei ʻo e niʻihi kehé

Vahevahe ʻa e fakamatala fakanounou ko ʻení ke tokoni ke mahino ki he kau akó ʻa e puipuituʻa ki he ngaahi veesi te nau ako ʻi he Tokāteline mo e Ngaahi Fuakava 46.

ʻI he 1831, naʻe ʻi ai ha hohaʻa ʻi he fakafisi ʻa ha niʻihi ʻo e kāingalotu ʻo e Siasí ke fakaʻatā ʻa e kakai naʻe ʻikai kau ki he Siasí ke nau kau ki he ngaahi fakatahaʻanga moihū ʻa e Siasí. Naʻe hoko ʻa e tōʻonga ko ʻení ko ha ola ʻo hono fakahohaʻasi ʻe he ngaahi fili ʻo e Siasí ʻa e ngaahi fakatahaʻanga moihuú. Hili ʻa e lotua ʻe Siosefa Sāmita ha fakahinohinó, naʻe fakahā ʻe he ʻEikí ha ngaahi akonaki mahuʻinga fekauʻaki mo e founga ʻoku totonu ke tataki ʻaki ʻe he Kāingalotú ʻenau ngaahi fakatahá.

Lau ʻa e Tokāteline mo e Ngaahi Fuakava 46:1–6, ʻo kumi ʻa e fakahinohino ʻa e Fakamoʻuí fekauʻaki mo kinautolu naʻa nau fie kau atu ki he ngaahi fakatahaʻanga lotú.

• Ko e hā ʻokú ke ako mei he ngaahi veesi ko ʻení fekauʻaki mo e founga ʻoku finangalo ʻa e ʻEikí ke tau fakafōtunga ʻaki ki he niʻihi kehé ʻi heʻetau ngaahi fakatahaʻanga lotú?

  ʻE lava ke ʻiloʻi ʻe he kau akó ha moʻoni hangē ko ʻení: Kuo fekauʻi kitautolu ʻe he ʻEikí ke talitali lelei ʻa e tokotaha kotoa pē ki heʻetau ngaahi fakatahaʻanga lotú.

  Ke fakamamafaʻi ʻa e mahuʻinga ʻo e foʻi moʻoni ko ʻení, ʻe ala tokoni ke lau ʻe he kau akó ʻa e 3 Nīfai 18:22–25. Te ke lava foki ʻo ʻai ke lau ʻe he kau akó ʻa e palakalafi ʻi he ʻuluʻi tohi “Lau ʻa e tokotaha kotoa pē ko ha fānau ʻa e ʻOtuá” ʻi he konga “ʻOfa ki he ʻOtuá, ʻofa ki ho kaungāʻapí” ʻi he Ki Hono Fakamālohia ʻo e Toʻu Tupú: Ko ha Fakahinohino ki hono Fakahoko ha Ngaahi Filí ([2022], 12).

• ʻOkú ke pehē ko e hā ʻoku fuʻu mahuʻinga ai ki he Fakamoʻuí ʻa hono talitali lelei ʻa e niʻihi kehé ki Hono Siasí?

• Ko e hā ha ngaahi faingataʻa ʻi hotau kuongá ʻe ala faingataʻa ai ki ha taha ke ne ongoʻi ʻoku talitali lelei ia ʻi he ngaahi fakatahaʻanga lotú?

• Ko e hā ha ngaahi meʻa pau te tau lava ʻo fai ke tokoni ki he niʻihi kehé ke nau ongoʻi ʻoku talitali lelei kinautolu ʻi heʻetau ngaahi fakatahaʻanga lotú?

ʻI he fealeaʻaki ʻi he fehuʻi kimuʻá, fakakaukau ke huluʻi ʻa e foʻi vitiō “Fakaafeʻi e Niʻihi Kehé ke ‘Haʻu ʻo Nofo’” (1:39), ʻoku maʻu ʻi he ChurchofJesusChrist.org.

Naʻe hoko ʻa Sīsū Kalaisi ko ha sīpinga ʻo hono talitali lelei ʻa e taha kotoa pē

Ko e Fakamoʻuí ʻa e sīpinga haohaoa ʻo hono fakaafeʻi mo talitali lelei ʻa e taha kotoa pē. Kumi ha sīpinga ʻe taha pe lahi ange mei he folofolá ʻo hono talitali lelei mo ʻofaʻi ʻe Sīsū ʻa e taha kotoa pē.

Kapau ʻoku fiemaʻu ʻe he kau akó ha fakahinohino lahi ange, te ke lava ʻo fakahinohino kinautolu ki he ngaahi potufolofola hangē ko e Mātiu 9:9–13; 19:13–15; Luke 19:1–10; pe 3 Nīfai 11:12–15. Fakakaukau ke fakaafeʻi ʻa e kau akó ke vahevahe ʻa e meʻa ʻoku nau ʻiloʻí pea aleaʻi ʻenau ngaahi tali ki he ngaahi fehuʻi ko ʻení. Te ke lava ʻo fakaafeʻi ʻa e kau akó ke nau hiki ha fanga kiʻi fakamatala ʻi heʻenau tohinoa akó mo ha ngaahi fakakaukau ki he founga te nau lava ai ʻo muimui ki he sīpinga ʻa e Fakamoʻuí.

Fakamamafaʻi ʻa e sīpinga ʻa Sīsū Kalaisí: Ke maʻu ha tokoni lahi ange ʻi hono fakaafeʻi ʻa e kau akó ke vakai ki he founga ʻoku fakahaaʻi ai ʻe he Fakamoʻuí ʻa e meʻa ʻoku nau akó, vakai ki he ako ʻoku ui ko e “Fakamamafaʻi ʻa e sīpinga ʻa Sīsū Kalaisí,” ʻoku maʻu ʻi he Fakatupulaki Ngaahi Taukei ʻa e Faiakó: Tokanga Taha kia Sīsū Kalaisi.

ʻE lava ke fakaʻaongaʻi ʻa e ngaahi fehuʻi ko ʻení ke tokoni ki he kau akó ke vahevahe ʻa e meʻa naʻa nau ako mo ongoʻí.

• ʻI hoʻo ako e sīpinga ʻa e Fakamoʻuí, naʻe liliu fēfē nai ʻe Heʻene ʻofá ʻa e kakai naʻá Ne feohi mo iá?

• Ko e hā ha meʻa naʻá ke ako fekauʻaki mo e Fakamoʻuí mei he meʻa naʻá ke akó te ke lava ʻo feinga ke faʻifaʻitaki ki ai ʻi hoʻo moʻuí?

Fakakaukau ke fakaafeʻi ʻa e kau akó ke fakakaukau mo vahevahe ha ngaahi aʻusia kuo nau maʻu ʻi haʻanau mamata ki he lelei ʻe lava ke maʻu mei hono tokoniʻi ʻa e niʻihi kehé ke nau ongoʻi ʻoku talitali lelei kinautolu ʻi heʻetau ngaahi fakatahaʻanga lotú. Te ke lava foki ʻo vahevahe ha aʻusia mei hoʻo moʻuí.

Ko hono fakaʻaongaʻi e ngaahi akonaki ʻa e Fakamoʻuí

Faʻu ha palani ke fakaʻaongaʻi e fekau ʻa e Fakamoʻuí ke tokoni ke ongoʻi ʻe he taha kotoa ʻoku talitali lelei kinautolu ʻi he ngaahi fakatahaʻanga lotú. Lēkooti hoʻo palaní ʻi hoʻo tohinoa akó. Fakakaukau ki he ngaahi fehuʻi ko ʻení ke tokoni ki hoʻo palaní:

• Ko e hā ha ngaahi founga pau te ke lava ai ʻo fakaʻaongaʻi e faleʻi ʻa e Fakamoʻuí naʻá ke ako ʻi he ʻaho ní?

• Ko e hā te ke lava ʻo fai ke ke ongoʻi ʻoku talitali lelei ange ai koe ʻi he ngaahi fakatahaʻanga lotú?

Fakakaukau ke fakaafeʻi ʻa e kau akó ke fai honau lelei tahá ke ngāueʻi ʻa e ngaahi ueʻi fakalaumālie naʻa nau maʻú pea mo e palani naʻa nau fakahoko ʻi he ʻaho ní. Poupouʻi ʻa e kau akó ke feinga ke ongoʻingofua ʻa e ngaahi fiemaʻu ʻa kinautolu ʻoku nau feohí. Mahalo naʻa taau ke fakaafeʻi ʻa e kau akó ke vahevahe mo e kalasí ʻenau aʻusia ʻi hono talitali lelei ʻa e niʻihi kehé lolotonga ha lēsoni hoko mai.

Ngaahi Maʻuʻanga Tokoni Lahi Ange

Ko e hā ʻoku totonu ke u fai kapau ʻoku ʻikai ke u ongoʻi ʻoku talitali lelei au ʻi he ngaahi fakatahaʻanga lotú?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻOku pehē ʻe ha niʻihi ʻoku ʻikai tokoni kiate kinautolu ʻa e ʻalu ko ia ki he lotú. Ko ha niʻihi ʻoku nau pehē, “Naʻe ʻikai ke u ako ha meʻa ʻi he ʻahó ni” pe “Naʻe ʻikai ha taha ʻe anga fakakaumeʻa mai kiate au” pe “Naʻe fakaʻitaʻi au.” ʻOku ʻikai totonu ke teitei hoko ʻa e ngaahi taʻe-fiemālie fakatāutahá ke taʻofi ai kitautolu mei he tokāteline ʻo Kalaisí, ʻa ia ʻokú ne akoʻi kitautolu ke tau ngāue, kae ʻoua ʻe toki fakakounaʻi pē [vakai, Sēmisi 1:27]. Ke fakakaukau ki hení, naʻe fakamatalaʻi ʻe ha mēmipa ʻe taha ʻa e meʻa naʻe tuku taha ki ai ʻa e tokangá ʻi heʻene maʻu lotu ʻi hono Siasí:

“ʻI he ngaahi taʻu kuohilí, naʻe liliu ‘eku fakakaukau fekauʻaki mo ʻeku ‘alu ki he lotú. Naʻe ʻikai ke u toe ʻalu ki he lotú koeʻuhí ko au, ka koeʻuhí ko e fakakaukau ki he niʻihi kehé. ʻOku ou fokotuʻu ha taumuʻa ke fakalea ki he kakai ʻoku tangutu toko tahá, ke talitali lelei ʻa e kau ʻaʻahí, … ke tokoni ki ha ngāue. …

ʻI hono fakanounoú, ʻoku ou ʻalu ki he lotú ʻi he uike takitaha mo e taumuʻa ke u longomoʻui, kae ʻikai fakafiefiemālie, pea fai ha lelei lahi ʻi he moʻui ʻa e kakaí.” (Dallin H. Oaks, “Ko e Fiemaʻu ke ʻi ai ha Siasí,” Liahona, Nōvema 2021, 24)

Ko e hā ʻoku totonu ai ke u feinga ke fokotuʻu ha ʻātakai fakakaumeʻa ʻi he lotú?

Naʻe akonaki ʻa Sisitā Poni L. ʻOsikasoni naʻe hoko kimuʻa ko e Palesiteni Lahi ʻo e Kau Finemuí ʻo pehē:

ʻE hoku [ngaahi] kaungāmeʻa kei talavou, te u lava ʻo fakapapauʻi atu kuo pau maʻu pē ke ʻi ai ha tokotaha ʻi he fakataha kotoa pē ʻa e Siasí te ke ʻalu ki aí ʻoku tuenoa, ʻokú ne lolotonga foua ha ngaahi faingataʻa pea ʻokú ne fiemaʻu ha kaumeʻa, pe ongoʻi ʻoku ʻikai ke ne kau mai. ʻOkú ke maʻu ha meʻa mahuʻinga ke tokoni ai ki he fakataha pe ʻekitivitī kotoa pē, pea ʻoku finangalo ʻa e ʻEikí ke ke vakavakai holo ʻi ho toʻú peá ke tokoni leva ʻi he founga tatau naʻá Ne mei fakahoko ai iá. …

Ko e moʻoni ʻoku tau ʻalu ʻi he uike kotoa ki heʻetau ngaahi fakataha ʻi he Siasí ke kau ʻi he ngaahi ouaú, ako ʻa e tokāteliné mo maʻu ʻa e ueʻi fakalaumālié, ka ko ha ʻuhinga mātuʻaki mahuʻinga ʻe taha ki heʻetau ʻalú ke tau fetokoniʻaki, fefakalotolahiʻaki mo fekumi ki ha ngaahi founga ke tau fefakamālohiaʻaki ai ʻi hotau fāmili fakauōtí pea ʻi heʻetau hoko ko e kau ākonga ʻo e Fakamoʻui ko Sīsū Kalaisí. ʻOku ʻikai ke tau nofo ʻataʻatā pē ʻo tali ke maʻu mai pe foaki mai ha meʻa ʻi he lotú; ʻoku fiemaʻu ke tau fai ʻa e foakí pea hoko ko e maʻuʻanga tokoni ki he foakí. Kau talavou mo e kau finemui, ko hoʻomou toe ʻalu pē ki he [ngaahi ʻekitivitī ʻa e toʻu tupú], kiʻi tuʻu ʻo fakasiosio ki he tafaʻakí peá ke fehuʻi loto kiate koe, “Ko hai ʻokú ne fiemaʻu ʻeku tokoní ʻi he ʻaho ní?” Mahalo pē ko koe ʻa e kī ki hono fai ʻo ha tokoni ki hao maheni pe fakalotolahiʻi ha kaungāmeʻa ʻoku faingataʻaʻia fakalongolongo pē.

Kole ki hoʻo Tamai Hēvaní ke fakahā atu ko hai ʻi he niʻihi ʻoku mou feohí ʻokú ne fiemaʻu hoʻo tokoní, pea ueʻi koe ke ke ʻiloʻi ʻa e founga lelei taha ke tokoniʻi ai iá. Manatuʻi naʻe faʻa tokoni ʻa e Fakamoʻuí ki ha foʻi toko taha ʻi he taimi pē ʻe taha. (Bonnie L. Oscarson, “Ko e Ngaahi Fiemaʻu Hotau Tafaʻakí,” Liahona, Nōvema 2017, 26–27)

Te u tokoni fēfē nai ke ongoʻi ʻe he niʻihi kehé ʻoku talitali lelei kinautolu?

Naʻe akoʻi ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

[ʻOku kole mai ʻe he ʻEikí] ke tau ngaohi Hono [Siasí] ko ha feituʻu ʻo e ʻaloʻofa mo ʻataʻatā, ʻa ia ʻe lava ʻa e tokotaha kotoa ʻo fakataha ki ai, pea mo ha feituʻu ʻoku ʻataʻatā ki he kakai kotoa pē. ʻI heʻetau hoko ko e kau ākonga ʻa Sīsū Kalaisí, ʻoku tatau ʻa e tokotaha kotoa pē, ʻo ʻikai ha kulupu maʻulalo ange.

‘Oku talitali lelei ʻa e kakai kotoa pē ke ʻalu ki he houalotu sākalamēnití, ngaahi fakataha kehe ʻi he Sāpaté, mo e ngaahi meʻa fakasōsialé. ʻOku tau faʻa fakakaukau mo fetokaʻiʻaki ʻi heʻetau moihū ʻi he loto ʻapasia ki hotau Fakamoʻuí. ʻOku tau vakai pea fakatokangaʻi ʻa e tokotaha kotoa. ʻOku tau malimali, tangutu mo kinautolu ʻoku nofo toko tahá, ako ha ngaahi hingoa, kau ai ʻa kinautolu ʻoku papi ului foʻoú, ko e kāinga foki maí, kau finemuí mo e kau talavoú, mo e kiʻi tamasiʻi Palaimeli takitaha.

ʻI heʻetau fakakaukauloto atu kiate kitautolu ʻi honau tuʻungá, ʻoku tau talitali lelei ai ʻa e ngaahi kaungāmeʻá, kau ʻaʻahí, toki hiki foʻou maí, mo e niʻihi fakafoʻituitui ʻoku femoʻuekina ʻi he ngaahi meʻa kehekehé. ʻOku tau mamahi, fiefia, mo fepoupouʻaki. ʻI heʻetau tō nounoú, mo ongoʻi fakavaveʻi, taʻe-ʻilo, loto-fakamaau, pe lau lanú, ʻoku tau fefakamolemoleʻaki pea fai lelei ange. (Gerrit W. Gong, “Loki ʻAtā ʻi he Fale Tali-fonongá,” Liahona, Mē 2021, 25-26)

Ngaahi ʻEkitivitī Fakalahi ki he Akó

Ko hono fakaʻaongaʻi ʻo e ngaahi tūkungá

Ke tokoni ke fakakaukau ʻa e kau akó ki ha niʻihi ʻo e ngaahi ongo ʻe ala maʻu ʻe he kakaí ʻi heʻenau ʻi ha ngaahi tūkunga taʻe-pau ʻi he ngaahi polokalama ʻa e siasí, fakakaukau ke fakaʻaongaʻi ha tūkunga ʻe taha pe lahi ange mei he ngaahi tūkunga ko ʻení. ʻE lava foki ke maʻu ʻe he kau akó ha tūkunga kehe.

• Kuo ako mai ʻeni ʻa Tēvita fekauʻaki mo e ongoongoleleí pea naʻe toki fakaafeʻi ia ʻe he kau faifekaú ke haʻu ki he ngaahi fakatahaʻanga ʻa e siasí ʻi he Sāpaté mo e ngaahi ʻekitivitī fakauike ʻa e toʻu tupú.

• Naʻe toki hiki ʻa Lakeili ki ha feituʻu foʻou ʻoku ʻikai maheni mo ia pea ʻoku ʻikai ke ne ʻiloʻi ha taha ʻi hono uooti pe kolo foʻoú.

• Naʻe fili ʻa Peleiki ke ʻoua ʻe kau ki he seminelí ʻi hono ʻuluaki taʻu ʻe uá ka kuó ne fakakaukau ʻeni ʻoku fie ʻalu ki ai.

Hili hono fakamatalaʻi ʻa e tūkungá, fakaafeʻi ʻa e kau akó ke aleaʻi ʻa e ngaahi fehuʻi ko ʻení:

• Ko e hā ha ngaahi ongo ʻoku ala aʻusia ʻe he tokotahá ni?

• ʻOkú ke pehē ko e hā ʻe finangalo ʻa e Fakamoʻuí ke ʻilo pe fai ʻe he tokotaha ko ʻení?

• Ko e hā ha ngaahi ngāue pau te ke lava ʻo fai ke tokoni ki he tokotaha ko ʻení ke ne ongoʻi ʻoku talitali lelei ange ia?

• Ko e hā ha ngaahi faingataʻa ʻe ala hoko ʻi heʻetau ngāué? ʻE lava fēfē nai ke ikunaʻi ʻa e ngaahi faingataʻa ko iá?

Ko e kau ki he seminelí

ʻE lava ke ʻomi ʻe he lēsoni ko ʻení ha faingamālie lelei ke vakaiʻi ai ʻe he kau akó ʻa e ongo ʻoku talitali lelei kinautolu ʻi he seminelí. Te ke lava ʻo fakaafeʻi kinautolu ke tali ha ngaahi fakakaukau hangē ko ʻení:

• ʻOku ou ongoʻi ko ha mēmipa mahuʻinga au ʻo e kalasi ko ʻení.

• ʻOku ou ongoʻi fiemālie ke vahevahe ʻeku ngaahi fakakaukaú mo e ongó ʻi he kalasí.

• ʻOku ou maʻu ha loto-falala ʻoku ʻi ai haʻaku ngaahi kaungāmeʻa ʻi he kalasí ni.

Te ke lava ʻo fakaafeʻi ʻa e kau akó ke vahevahe ha meʻa ʻe tokoni ke nau ongoʻi ʻoku talitali lelei ange kinautolu ʻi he kalasí. ʻE ala tokoni ʻa e ngaahi tali fakapulipuli pe ʻikai fakahā ʻa e tokotaha talí ke ke ʻiloʻi ʻa e ngaahi tefitoʻi moʻoni ʻo e kau atú te ke lava ʻo fakamamafaʻi ke tokoni ki he kau mēmipa kotoa ʻo e kalasí ke nau ongoʻi ʻoku fiemaʻu mo talitali lelei kinautolu.

Tokāteline mo e Ngaahi Fuakava 46:1–2. ʻOku fiemaʻu ke tākiekina ʻe he Laumālie Māʻoniʻoní ʻa e ngaahi fakatahaʻangá

Ke fakamamafaʻi ʻa e fiemaʻu ke fokotuʻutuʻu mo tataki ʻa e ngaahi fakatahaʻanga kotoa ʻa e siasí ʻi he Laumālié, fakakaukau ke fakaafeʻi ʻa e kau akó ke ako ʻa e Tokāteline mo e Ngaahi Fuakava 46:1–2 pea vahevahe ʻa e meʻa naʻa nau maʻú. Fakaafeʻi ʻa e kau akó ke fakalaulauloto ki he founga te nau lava ai ʻo fakaafeʻi ʻa e Laumālie Māʻoniʻoní ke tokoni ke ʻuhingamālie ange ʻa e ngaahi fakatahaʻanga ʻa e siasí kiate kinautolu. ʻE lava ke tokoni ʻa e ngaahi fehuʻi ko ʻení ke kamataʻi ha fealeaʻaki:

• Ko e hā te tau lava ʻo fai ke fakahaaʻi ki he Laumālié ʻoku tau loto-fiemālie ke akoʻi kitautolú?

• ʻE tataki fēfē nai ʻe he Laumālie Māʻoniʻoní ʻetau ngaahi fakakaukaú mo e tōʻongá ʻi heʻetau ʻalu ki he ngaahi fakatahaʻanga ʻa e siasí?

• ʻE lava fēfē nai ke tau tauhi maʻu ha laumālie ʻo e ʻapasiá pea mo talitali lelei ʻa e niʻihi kehé?

Tokāteline mo e Ngaahi Fuakava 46:5–6. “Fekumi fakamātoato ki he puleʻangá”

Fakaafeʻi ʻa e kau akó ke lau ʻa e Tokāteline mo e Ngaahi Fuakava 46:5–6, pea fakaʻilongaʻi ʻa e kupuʻi lea “fekumi fakamātoató.” Ke tokoni ke mahino ki he kau akó ʻa e mahuʻinga ʻo e fekumi ki he ʻEikí ʻi ha founga fakamātoato (faitotonu pe fakapapaú), te ke lava ʻo fakaafeʻi ʻa e kau akó ke aleaʻi ha ngaahi fehuʻi hangē ko ʻení:

• Ko e hā ʻoku fai pe ʻikai fai ʻe ha taha ʻokú ne fekumi fakamātoato ki he ʻEikí?

• Ko e hā ka mahuʻinga ai ʻa e ʻulungaanga fekumi fakamātoato ʻa kinautolu ʻoku ʻalu ki he ngaahi fakatahaʻanga ʻa e siasí? ʻE tokoni fēfē nai ia ki ha taha ke ne ongoʻi ʻa e Laumālié?