Lēsoni 62: Tokāteline mo e Ngaahi Fuakava 46–48

Tokāteline mo e Ngaahi Fuakava 46:7–33, Konga 1

Ngaahi Meʻa-foaki ʻo e Laumālié

ʻOku tāpuakiʻi ʻe he Tamai Hēvaní ʻa e kāingalotu faivelenga ʻo e Siasí ʻaki ha ngaahi meʻa-foaki fakalaumālie. ʻOku fakaʻatā ʻe he ngaahi meʻa-foaki ko ʻení ke tau hoko ʻo tatau ange mo e Fakamoʻuí pea mo faitāpuekina ʻa kinautolu ʻoku tau feohí. ʻE lava ke tokoni ʻa e lēsoni ko ʻení ke ongoʻi ʻe he kau akó e ʻofa ʻa e Tamai Hēvaní maʻanautolú ʻi heʻenau ako ʻa e ʻuhinga ʻokú Ne tāpuekina ai kitautolu ʻaki ha ngaahi meʻa-foaki fakalaumālié.

Ngaahi ʻEkitivitī Ako ʻOku Ala Fakahokó

Ko e ʻuluaki ʻeni ʻo ha lēsoni ʻe ua fekauʻaki mo e ngaahi meʻa-foaki ʻo e Laumālié. ʻE nofotaha ʻa e konga 1 ʻi he ngaahi taumuʻa ʻa e Tamai Hēvaní ki hono tāpuakiʻi kitautolu ʻaki ha ngaahi meʻa-foaki fakalaumālié. ʻE tokoni ʻa e konga 2 ke ʻiloʻi ʻe he kau akó ʻa e founga te nau lava ai ʻo fekumi ki ha ngaahi meʻa-foaki fakalaumālié. Kapau ʻoku fakangatangata ʻa e taimi kalasí pea ko e lēsoni pē ʻe taha ʻi he tefito ko ʻení ʻe lava ke akoʻí, fakakaukau ki ha founga ʻe lava ke fakatahaʻi lelei ai ʻa e ongo lēsoní.

Fakamoʻoni ʻo e ʻofa ʻa e Tamai Hēvaní

Fakakaukau ke kamata ʻa e kalasí ʻaki hono hivaʻi pe fanongo ki ha himi pe foʻi hiva fekauʻaki mo e ʻofa ʻa e Tamai Hēvaní ki Heʻene fānaú, hangē ko e “ʻOku ʻOfa ʻEku Tamai Hēvaní ʻIate Au” (2:58). Kapau naʻe fakaafeʻi ʻa e kau akó ke fai ʻa e ʻekitivitī teuteú, ʻe lava ke hoko ʻeni ko ha taimi lelei ke toe vakaiʻi ai. Pe ko haʻo kole ki he kau akó ke fakalaulauloto pea vahevahe ha tali ki ha ngaahi fehuʻi hangē ko ʻení:

• Ko e fē ha taimi kuo ueʻi ai koe ʻe he Laumālie Māʻoniʻoní ke ke fakakaukau, lea ʻaki, pe fai ha meʻa naʻá ne tāpuekina hoʻo moʻuí pe moʻui ʻa e niʻihi kehé?

• Ko e hā naʻe akoʻi atu ʻe he aʻusia ko ʻení fekauʻaki mo e ʻofa ʻa e Tamai Hēvaní ki Heʻene fānaú?

Ngaahi Meʻa-foaki ʻo e Laumālié

ʻOku ui ʻa e ngaahi tāpuaki mo e ngaahi tuʻunga malava ʻoku ʻomi ʻe he ʻOtuá ʻo fakafou ʻi he Laumālie Māʻoniʻoní ko e ngaahi meʻa-foaki fakalaumālie.

• Ko e hā ʻokú ke ʻilo fekauʻaki mo e ngaahi meʻa-foaki fakalaumālié mo ʻenau taumuʻá?

Ke tokoni ke mahino ki he kau akó ʻa e loto-holi naʻe maʻu ʻe he fuofua kāingalotu ʻo e Siasí ke maʻu ʻa e ngaahi meʻa-foaki ʻo e Laumālié, ʻe lava ke ke lau mei he Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 (2018), 120–23, pe fanongo ki he vahe 10 mei he taimi 12:36 ki he 15:52 (ʻoku maʻu ʻi he saints.ChurchofJesusChrist.org). Pe, ko hoʻo vahevahe ʻa e fakamatala fakanounou ko ʻení.

Naʻe fiefia ʻa e kau fuofua ului ki he Siasí ʻi Ketilaní fekauʻaki mo e talaʻofa ko ia te nau lava ʻo maʻu ha ngaahi meʻa-foaki fakalaumālié. Ka neongo ia, naʻe maʻuhala ha niʻihi ki he founga naʻe fakahaaʻi ai ʻa e ngaahi meʻa-foaki ko ʻení.

Naʻe fakahoko ʻe ha niʻihi ʻo e kāingalotú ʻenau ngaahi tuí ʻo fuʻu tōtuʻa, ʻo nau fiefia ʻi he meʻa naʻa nau pehē ko e ngaahi meʻa-foaki ʻo e Laumālié. Naʻe tokolahi ha kakai naʻa nau pehē naʻe ʻi ai haʻanau ngaahi vīsone naʻe ʻikai malava ke fakamatalaʻi. Naʻe tui ʻa e niʻihi kehe naʻe ʻai kinautolu ʻe he Laumālie Māʻoniʻoní ke nau heke ʻi he kelekelé. Naʻe punopuna takai holo ha tangata ʻi he ngaahi lokí pe tautau ʻi he sā ʻo e falé ʻi ha faʻahinga taimi pē naʻá ne ongoʻi ai ʻa e Laumālié. Naʻe hangē ha ngelí ʻa e tōʻonga ia ʻa ha tokotaha kehe.

Naʻe fakalotosiʻi ki he kau papi uluí ʻenau sio ki he tōʻonga ko ʻení, pea nau tukuange ʻa e siasi foʻoú. (Kau Māʻoniʻoní, 1:123)

• Ko e hā ha ngaahi fehuʻi pe taʻe-femahinoʻaki ʻe ala maʻu ʻe he kakaí fekauʻaki mo e ngaahi meʻa-foaki ʻo e Laumālié ʻi hotau kuongá ni?

ʻE lava ke fakaafeʻi ʻa e kau akó ke vahevahe ʻenau ngaahi fehuʻi fekauʻaki mo e ngaahi meʻa-foaki fakalaumālié. Poupouʻi ʻa e kau akó ke kumi ha ngaahi akonaki ʻe lava ʻo tokoni ke mahino lelei ange kiate kinautolu ʻa e ngaahi meʻa-foaki fakalaumālié pea mo e founga ʻoku hoko ai ʻa e ngaahi meʻa-foaki ko ʻení ko ha fakamoʻoni ʻo e ʻofa ʻa e ʻOtuá.

Naʻe fakahā ʻe he ʻEikí ha ngaahi moʻoni fekauʻaki mo e ngaahi meʻa-foaki fakalaumālié

Naʻe fekumi ʻa e Palōfita ko Siosefa Sāmitá ki ha fakahinohino fakalangi fekauʻaki mo e founga ke tokoniʻi ai ʻa e Kāingalotu ʻi Ketilaní. Ko e konga ʻo e fakahā naʻe maʻu ʻe he Palōfitá, naʻe akoʻi ʻe he ʻEikí ha ngaahi tefitoʻi moʻoni ʻe tokoni ki he Kāingalotú ke nau fakaʻehiʻehi mei hono kākaaʻi kinautolú mo tokoni ke mahino kiate kinautolu ʻa e ngaahi meʻa-foaki moʻoni ʻo e Laumālié.

Lau ʻa e Tokāteline mo e Ngaahi Fuakava 46:7–8, ʻo kumi ʻa e fakatokanga naʻe fai ʻe he ʻEikí ki he Kāingalotú.

• Ko e hā naʻe akoʻi ʻe he ʻEikí ʻi he ngaahi veesi ko ʻení fekauʻaki mo e founga te tau lava ai ʻo fakaʻehiʻehi mei hano kākaaʻi kitautolú?

Lau ʻa e Tokāteline mo e Ngaahi Fuakava 46:9–12, 26. Fekumi ki ha tali ki he ongo fehuʻi ko ʻení:

• Ko hai ʻoku foaki ki ai ʻa e ngaahi meʻa-foaki fakalaumālié?

• Ko e hā ʻoku foaki ai ʻe he Tamai Hēvaní ha ngaahi meʻa-foaki fakalaumālie ki Heʻene fānaú?

  Fakaʻaliʻali ʻa e ongo fehuʻi kimuʻá ke vakai ki ai ʻa e kau akó ʻi heʻenau akó. Te nau lava ʻo ako ʻiate kinautolu pē pe ʻi ha fanga kiʻi kulupu iiki. Hili ʻenau maʻu ha taimi feʻunga ke akó, fakaafeʻi kinautolu ke aleaʻi ʻenau tali ki he ngaahi fehuʻí.

  Tokoniʻi ʻa e kau akó ke nau ʻiloʻi ʻa e foʻi moʻoni ko ʻení ko ha konga hoʻomou fealēleaʻakí: ʻOku tāpuekina ʻe he Tamai Hēvaní ʻEne fānaú ʻaki ha ngaahi meʻa-foaki fakalaumālie koeʻuhí ke ʻaonga ki he tokotaha kotoa pē.

• ʻE tokoni fēfē nai hono ʻiloʻi ʻa e taumuʻa ʻo e ngaahi meʻa-foaki fakalaumālié ke tau fakatokangaʻi kinautolu ʻi heʻetau moʻuí?

Ko e mahino lahi ange ʻa e ngaahi meʻa-foaki fakalaumālié

Ke tokoni ki he kau akó ke ako fekauʻaki mo e ngaahi meʻa-foaki fakalaumālie ʻoku fakamatala ki ai ʻi he Tokāteline mo e Ngaahi Fuakava 46, ʻoange kiate kinautolu ʻa e laʻipepa tufa ʻoku hiki ai “ʻOku Mei He ʻOtuá ʻa e Ngaahi Meʻa-foaki ko ʻEní .” ʻE lava ke fakakakato fakafoʻituitui pe fakakulupu ia ʻe he kau akó. ʻE ala tokoni foki ke fakaʻaliʻali ʻa e ngaahi fakaʻuhinga ko ʻení:

• ʻIloʻi ʻa e ngaahi faikehekehe ʻi he pulé (veesi 15): ʻE lava ke tokoni ʻa e meʻa-foaki ko ʻení ki he kau takí ke nau ʻiloʻi ʻa e ngaahi meʻa-foaki fakalaumālie ʻa e niʻihi kehé pea mo e founga ʻe lava ke nau tokoni ai ʻi he ngaahi tuʻunga kehekehe ʻo e ngāue tokoní.

• ʻIloʻi ʻa e faikehekehe ʻo e ngaahi ngāué (veesi 16): ʻOku tokoni ʻa e meʻa-foaki ko ʻení ki he fakafoʻituituí ke fakapapauʻi pe ʻoku mei he ʻOtuá nai pe mei ha maʻuʻanga tokoni kehe ha akonaki pe ivi tākiekina.

• Meʻafoaki ʻo e kikité (veesi 22): “Ko e fakamoʻoni kia Sīsuú, ko e laumālie ia ʻo e kikite” (Fakahā 19:10). Ko e fakahā fakatāutahá ko e tupuʻanga ia ʻo e fakamoʻoní, pea ʻoku tokoni ʻa e fakamoʻoní ke kikiteʻi pe fakamoʻoniʻi ai ʻe ha taha ʻa e ngāue ʻa e ʻOtuá.

• [Ko e] ʻiloʻi ʻo e ngaahi laumālié (veesi 23): ʻOku fakaʻatā ʻe he meʻa-foaki ko ʻení ke ʻiloʻi pe mahino ki ha taha ʻa e ngaahi taumuʻa moʻoni ʻa e niʻihi kehé mo e ngaahi taumuʻa fufuú. ʻOku tokoni ʻa e meʻa-foaki ko ʻení ki ha taha ke ʻiloʻi ʻa e ngaahi kovi fufuú mo vakai ki he lelei ʻi he niʻihi kehé.

“ʻOku Mei He ʻOtuá ʻa e Ngaahi Meʻa-foaki ko ʻEní ”

Lau ʻa e Tokāteline mo e Ngaahi Fuakava 46:13–26 pea feinga ke ʻiloʻi ʻa e ngaahi meʻa-foaki fakalaumālie kehekehe ʻoku foaki ʻe he ʻOtuá ki Heʻene fānaú. Ke mahino lelei ange ʻa e founga ʻe lava ke ʻaonga ai ʻa e ngaahi meʻa-foaki ko ʻení ki he fānau ʻa e ʻOtuá, fakatauhoa ʻa e veesi takitaha mo e tūkunga totonú.

Ngaahi Meʻa-foaki Fakalaumālié		Ngaahi Meʻa-foaki Fakalaumālié
Ngaahi Meʻa-foaki Fakalaumālié Tokāteline mo e Ngaahi Fuakava 46:13	Ngaahi Meʻa-foaki Fakalaumālié Lolotonga ʻa e hoko ʻa Mīsela ko e palesiteni ʻo ʻene kalasi ʻi he Kau Finemuí, kuó ne lava ʻo fakatokangaʻi ʻa e ngaahi mālohinga kehekehe ʻo e kau mēmipa ʻo ʻene kalasí. Kuo tokoniʻi ia ʻe he ʻilo ko ʻení ke ne vahe ha ngaahi ngāue ʻe lava ai ʻa e kau mēmipa ʻo ʻene kalasí ʻo tokoni ʻi ha ngaahi founga ʻoku mahuʻingamālie.
Ngaahi Meʻa-foaki Fakalaumālié Tokāteline mo e Ngaahi Fuakava 46:14	Ngaahi Meʻa-foaki Fakalaumālié ʻI he fakafanongo ʻa Samanitā ki he fakamoʻoni ʻa e niʻihi kehé, ʻoku ʻikai ke ne fakapapauʻi te ne lava ʻo kau fakataha mo kinautolu ʻo lea pehē ʻokú ne ʻiloʻi ʻoku moʻoni ʻa e Siasí. Ka ʻoku fakatupulaki ʻene tui ki he Fakamoʻuí ʻi heʻene fanongo ki heʻenau ngaahi fakamoʻoní. ʻOku ueʻi ia ʻe he tui ko ʻení ke hokohoko atu ʻene moʻui faivelengá.
Ngaahi Meʻa-foaki Fakalaumālié Tokāteline mo e Ngaahi Fuakava 46:15	Ngaahi Meʻa-foaki Fakalaumālié ʻOku fakaafeʻi ʻa Lusi ki ha paati. Neongo ʻoku teʻeki ʻoange ʻe ha taha ʻa e fakaikiikí, ka ʻokú ne ongoʻi taʻe-fiemālie ke ʻalu ki ai. Naʻe ʻikai ke ne tali ʻa e fakaafé ʻi he loto-fakaʻapaʻapa, pea neongo ʻoku faingataʻa, ka ʻokú ne ongoʻi ʻokú ne fai ʻa e meʻa totonú.
Ngaahi Meʻa-foaki Fakalaumālié Tokāteline mo e Ngaahi Fuakava 46:16	Ngaahi Meʻa-foaki Fakalaumālié Naʻe tokoniʻi ʻe he ʻEikí ha kau palōfita tokolahi ke nau tomuʻa fakahā ʻa e ngaahi meʻa ʻe hoko ʻi he kahaʻú, kau ai ʻa e ngāue fakafaifekau ʻa Sīsū Kalaisí (vakai, ʻĪsaia 7:14; 1 Nīfai 11:27–28; Mōsaia 3:5–10).
Ngaahi Meʻa-foaki Fakalaumālié Tokāteline mo e Ngaahi Fuakava 46:17–18	Ngaahi Meʻa-foaki Fakalaumālié ʻI he feinga ko ia ʻa Lōpeti ke moʻui ʻaki ʻa e ongoongoleleí, lotu maʻu pē, mo ako ʻa e folofolá, kuó ne ʻilo ai ko Sīsū Kalaisi ʻa hono Fakamoʻuí.
Ngaahi Meʻa-foaki Fakalaumālié Tokāteline mo e Ngaahi Fuakava 46:19–20	Ngaahi Meʻa-foaki Fakalaumālié Naʻe faingataʻa kia ʻEletā Vasikuesi mo ʻEletā Koka ʻa e ngāue fakafaifekaú. Ka neongo ia, ʻokú na fakapapau ke ngāue ʻi he tui kia Sīsū Kalaisí. ʻI he fakalau ʻa e taimí, ʻoku kamata ke na mamata ki hono fakamolū ʻo e ngaahi lotó pea hoko ha ngaahi mana ʻi he moʻui ʻa e kakai ʻokú na akoʻí.
Ngaahi Meʻa-foaki Fakalaumālié Tokāteline mo e Ngaahi Fuakava 46:21	Ngaahi Meʻa-foaki Fakalaumālié ʻI he taimi ʻoku puke ai ʻa Maʻaké, ʻokú ne ʻiloʻi te ne lava ʻo kole ki heʻene tamaí ha tāpuaki lakanga fakataulaʻeiki. Kuo tuʻo lahi hono ʻomi ʻe he ngaahi tāpuakí ni ha nonga mo ha mālohi lahi ange kiate ia.
Ngaahi Meʻa-foaki Fakalaumālié Tokāteline mo e Ngaahi Fuakava 46:22	Ngaahi Meʻa-foaki Fakalaumālié Kuo hanga ʻe ha fakamatala ʻi he mītia fakasōsialé ʻo fakatupu ha taha ʻo e ngaahi kaungāmeʻa ʻo ʻĀlisí ke ne fakafehuʻia ʻene tuí. ʻI he taimi naʻá ne vahevahe ai ʻa e fakamatalá mo ʻĀlisí, naʻá ne fakatokangaʻi naʻe ʻikai maʻu ʻa e fakamatalá mei he ʻOtuá.
Ngaahi Meʻa-foaki Fakalaumālié Tokāteline mo e Ngaahi Fuakava 46:23	Ngaahi Meʻa-foaki Fakalaumālié Naʻe kole kia Siuti ke ne akoʻi ʻene kalasi ʻi he Kau Finemuí. ʻI heʻene fekumi ki he tokoni ʻa e Tamai Hēvaní, naʻá ne ongoʻi naʻe tataki ia ʻi heʻene teuteú pea lava ke ne akoʻi ha lēsoni langaki moʻui.
Ngaahi Meʻa-foaki Fakalaumālié Tokāteline mo e Ngaahi Fuakava 46:24–25	Ngaahi Meʻa-foaki Fakalaumālié Kuo uiuiʻi ʻa Sisitā ʻElikisoni ke ngāue fakafaifekau ʻi ha fonua kehe. ʻI heʻene fekumi ki he tokoni ʻa e ʻOtuá mo feinga ke ako ʻa e lea fakafonuá, ʻokú ne fakatokangaʻi ʻoku lava ke mahino kiate ia ʻa e niʻihi kehé mo vahevahe mālohi ʻene fakamoʻoní.

ʻI he taimi kuo fakakakato ai ʻe he kau akó ʻa e ʻekitivitií, vahevahe ʻa e ngaahi talí mo kinautolu: 1i, 2e, 3a, 4m, 5n, 6l, 7k, 8h, 9f, 10ng. Fakahoko ha fakamatala fakamahino ʻo ka fiemaʻu.

• Ko e hā naʻá ke ako fekauʻaki mo e founga ʻoku tāpuekina ai ʻe he Tamai Hēvaní ʻEne fānaú ʻo fakafou ʻi he ngaahi meʻa-foaki ʻo e Laumālié?

  Fakamatalaʻi ange ʻe lava ke fakatokangaʻi ʻe he kau akó ʻoku tāpuakiʻi kinautolu ʻe he Tamai Hēvaní ʻaki ha ngaahi meʻa-foaki fakalaumālie ʻoku mahulu atu ʻi he ngaahi meʻa kuo hiki ʻi he folofolá. Hangē ko ʻení, fakafou ʻi he Laumālie Māʻoniʻoní, ʻe lava ke Ne tāpuakiʻi kinautolu ʻaki ha faʻa kātaki ʻi ha tūkunga fakaloto-hohaʻa, ko e malava ke fakamolemoleʻi ha taha kuó ne fakaʻitaʻi kinautolú, loto-toʻa ʻi ha taimi faingataʻa, pe ko ha holi lahi ange ke tokoniʻi ha taha. ʻE lava ke ke fakaafeʻi ʻa e kau akó ke fakakaukau ki ha toe ngaahi meʻa-foaki fakalaumālie ʻoku malava ke tau maʻu pea mo e founga ʻoku hāsino ai e ʻofa ʻa e ʻOtuá. ʻE lava ke ke hiki ha niʻihi [ʻo e ngaahi meʻa-foaki fakalaumālie ko ʻení] ʻi he palakipoé.

• Ko e hā ha ngaahi meʻa-foaki fakalaumālie kuo faitāpuekina ʻaki koe ʻe he Tamai Hēvaní?

• Kuó Ne tāpuekina fēfē nai koe ʻo fakafou ʻi he ngaahi meʻa-foaki fakalaumālie ʻa e niʻihi kehé?

• Kuo tokoni fēfē hoʻo aʻusia ʻi he ngaahi meʻa-foaki fakalaumālié ki ho vā fetuʻutaki mo e Tamai Hēvaní?

Ngaahi Maʻuʻanga Tokoni Lahi Ange

Ko e fē te u lava ʻo ako lahi ange ai fekauʻaki mo e ngaahi meʻa-foaki fakalaumālié?

Ki ha fakamatala fakaikiiki ʻo ha niʻihi ʻo e ngaahi meʻa-foaki fakalaumālie naʻe kau ʻi he lēsoni ko ʻení, vakai ki he tēpile ʻi he New Testament Student Manual (2018), “1 Corinthians 12–14.”

Tokāteline mo e Ngaahi Fuakava 46:7–8: ʻOku kākaaʻi fēfē nai ʻe he filí ʻa e kakaí ke nau tui ʻoku nau ongoʻi ʻa e Laumālié?

Neongo ʻoku ʻikai angamaheni ʻi he Siasí ʻi he ʻahó ni ʻa e ngaahi kākā fakalaumālie naʻe aʻusia ʻe ha niʻihi ʻo e Kāingalotu ʻi Ketilaní, ka ʻoku kei kākaaʻi pē ʻe he filí ʻa e kakaí, ʻo iku ki ha tōʻonga ʻoku ʻikai fenāpasi mo e ongoongolelei ʻo Sīsū Kalaisí.

Naʻe vahevahe ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni:

Naʻe talamai ʻe ha tangata kiate au hono ngaahi faingataʻaʻia ke tauhi maʻu ʻa e tuʻunga fakapaʻanga hono fāmilí. Naʻá ne fakakaukau ko e solovaʻangá pē ko e kākaaʻi ha paʻanga, ʻo ne lotua ia, peá ne ongoʻi kuó ne maʻu ha fakahā pau ke ne fakahoko ia. Naʻá ku ʻiloʻi naʻe kākaaʻi ia koeʻuhí he naʻá ne fekumi ki ha fakahā naʻe fepaki mo e fekau ʻa e ʻOtuá. Naʻe fakatokanga mai ʻa e Palōfita ko Siosefa Sāmitá, “ʻOku ʻikai ke ʻi ai ha meʻa ʻe fakatupu maumau lahi ange ki he fānau ʻa e tangatá ka ko hono maʻu kinautolu ʻe he laumālie halá ka nau fakakaukau ʻo pehē ʻoku nau maʻu ʻa e Laumālie ʻo e ʻOtuá” [Joseph Smith, ʻi he Times and Seasons, Apr. 1, 1842, 744, josephsmithpapers.org]. (Dale G. Renlund, “Ko ha Founga Ngāue ki he Fakahā Fakafoʻituituí,” Liahona, Nōvema 2022, 17)

ʻOku fiemaʻu nai ʻa e meʻa-foaki ʻo e Laumālie Māʻoniʻoní kae lava ke maʻu ʻa e ngaahi meʻa-foaki fakalaumālié?

Naʻe akoʻi ʻe he Palōfita ko Siosefa Sāmita ʻo pehē:

ʻOku mau … tui ki he kikité, lea ʻi he lea kehekehé, ki he ngaahi meʻa hā maí, mo e ngaahi fakahā, ngaahi meʻa-foaki pea mo e fakamoʻui mahakí; pea he ʻikai ke lava ʻo maʻu ʻa e ngaahi meʻá ni taʻe-kau ai ʻa e meʻa-foaki ʻo e Laumālie Māʻoniʻoní. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 134)

Ko e hā ha ngaahi meʻa-foaki fakalaumālie kehe te tau lava ʻo maʻu?

Naʻe akonaki ʻa ʻEletā Sione C. Pingilī ko e Siʻí ʻo e Kau Fitungofulú ʻo pehē:

ʻOku lahi ʻa e ngaahi meʻa-foaki fakalaumālie ʻoku lekooti ʻi he tohi folofolá [vakai, 1 Kolinitō 12:1–11, 31; Molonai 10:8–18; Tokāteline mo e Ngaahi Fuakava 46:8–26], ka ʻoku lahi pē mo e ʻū meʻa-foaki kehe. ʻE lava ke kau ai ʻa e manavaʻofá, fakahaaʻi ʻo e ʻamanaki leleí, fakamaheni-ngofua ki he kakaí, palani leleí, lea pe tohi mahino-ngofuá, akoʻi ke mahinó mo e ngāue mālohí. (John C. Pingree Jr., “ʻOku ʻi ai Haʻaku Ngāue Ke Ke Fai,” Liahona, Nōvema 2017, 33)

Naʻe akonaki ʻa ʻEletā Māvini J. ʻEsitoni (1915–1994) ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo ha toe ngaahi meʻa-foaki ʻo pehē:

Ngaahi ʻEkitivitī Fakalahi ki he Akó

ʻOku tau takitaha maʻu ha ngaahi meʻa-foaki kehekehe kae mahuʻinga

ʻE lava ke fakaʻaongaʻi ʻa e ʻekitivitī ko ʻení kae ʻikai ko e laʻipepa tufá.

Kimuʻa ʻi he kalasí, hiki ʻa e mataʻifika 13 ki he 25 ʻi ha ngaahi feituʻu kehekehe ʻi ha laʻipepa. Kosikosi leva ʻa e laʻipepá ki ha konga pāsolo ʻe 13, ke mataʻifika ʻe taha ʻi he konga pāsolo takitaha.

Hili hono ʻiloʻi ʻa e moʻoni ʻoku tohi mataʻāʻā ʻi he lēsoní, tufa ʻa e ngaahi konga pāsoló ki he kau akó. Fakamatalaʻi ange ʻoku ʻuhinga ʻa e mataʻifika ʻi he ngaahi kongá ki he ngaahi veesi ʻi he Tokāteline mo e Ngaahi Fuakava 46 pea ʻoku talamai ʻe he ngaahi veesi takitaha ko ʻení ha meʻa-foaki ʻo e Laumālié. Fakaafeʻi ʻa e kau akó ke lau leʻolahi ʻa e ngaahi veesi ʻoku fekauʻaki mo e ngaahi mataʻifika kuo ʻoange kiate kinautolú.

Hili hono lau ʻa e veesi takitaha, kole ki he kau akó ke nau fokotuʻu mai ha tūkunga ʻe lava ke ʻaonga ai ʻa e meʻa-foaki ko iá ki he fānau ʻa e ʻOtuá. ʻI heʻenau fevahevaheʻakí, fakaafeʻi ʻa e kalasí ke ngāue fakataha ke fakatahatahaʻi ʻa e pāsoló. Fakamahinoʻi ange, ʻoku foaki mai kiate kitautolu kotoa ha ngaahi meʻa-foaki fakalaumālie kehekehe ke tau feʻaongaʻaki ai ʻo hangē pē ko hono tufotufa ki he kau akó ha ngaahi konga kehekehe ke fakakakato ʻaki ʻa e pāsoló (vakai, veesi 12).

ʻIloʻí mo e tuí

Mahalo ʻe ʻaonga ke ʻiloʻi ʻe he kau akó ko e meʻa-foaki ʻo e tui kia Sīsū Kalaisí ko ha meʻa-foaki mahuʻinga ia mei he ʻOtuá, neongo kapau ʻoku teʻeki ke tau maʻu ʻa e meʻa-foaki ʻo hono ʻiloʻi ko e ʻAlo Ia ʻo e ʻOtuá (vakai, Tokāteline mo e Ngaahi Fuakava 46:13–14).

Naʻe vahevahe ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻe lea momou mai ha kiʻi tamasiʻi taʻu 14 kiate au, “ʻEletā Hōlani, he ʻikai ke u lava au ʻo lea pehē [ʻoku ou ʻiloʻi] ʻoku moʻoni ʻa e Siasí, ka ʻoku ou tui pē ki ai.” Naʻá ku fāʻofua ʻo kuku ʻa e kiʻi tamasiʻí kae ʻoua kuo mei tuʻu ʻene mānavá. Naʻá ku talaange ki ai [ʻi he] mālohi kotoa hoku lotó ko e tuí ko ha foʻi lea mahuʻinga, pea ko ha ngāue ia ʻoku mahuʻinga ange, pea ʻoku ʻikai fiemaʻu ke teitei kole fakamolemole ia ʻi heʻene “tui ʻataʻatā peé.” (Jeffrey R. Holland, “ʻEiki, ʻOku ou Tui,” Liahona, Mē 2013, 94–95)

ʻE lava ke fekumi ʻa e kau akó ʻi he ngaahi maʻuʻanga tokoni kuo fokotuʻu fakalangí ke mahino lelei ange ʻa e founga ʻoku fakaʻapaʻapaʻi ai ʻe he ʻEikí ʻa kinautolu ʻoku maʻu ʻa e meʻa-foaki ʻo e tuí. Hangē ko ʻení, ʻe lava ke nau ako lahi ange mei he lea ʻa ʻEletā Hōlani “ʻEiki, ʻOku ou Tui” pe ʻAlamā 32:16–27.