Lesona 69: Mataupu Faavae ma Feagaiga 51–57

Mataupu Faavae ma Feagaiga 57

Auala e Fausia ai e le Alii Siona

A o faaali atili mai e le Alii e uiga ia Siona i le Perofeta o Iosefa Samita, sa lagona e le Au Paia le naunau ma le fiafia e avea o se vaega o sea nuu. O le taimi lava na faaali mai ai le mea e tatau ona fausia ai Siona, sa faatonuina loa e le Alii ni tagata patino e amata ona faatuina le nuu. O lenei lesona ua faamoemoe e fesoasoani i tamaiti aoga ia lagonaina se naunautaiga sili atu ia avea ma nuu o le Alii e ala i le fausiaina o Siona.

Gaoioiga E Ono Mafai Ona Aoao Ai

Siona

Mafaufau e faaali atu se ata o le Faaola.

Vaai faalemafaufau e faapea, ua ia te oe le avanoa e nofo latalata ai ia Iesu Keriso.

• O a ni uiga o ia te Ia o le a faafiafiaina ai le ola latalata ia te Ia?

Vaai faalemafaufau la pe o le a se lagona o le ola ai i se nuu e tumu i tagata o e taumafai e mulimuli i aoaoga ma faataitaiga a Iesu Keriso. O se faataitaiga o se nuu faapena na tupu i taimi o le Feagaiga Tuai i le nuu o Enoka.

Mafaufau e faaali atu se ata o Enoka ma lona nuu ma fesili atu i tamaiti aoga po o le a se mea latou te iloa e uiga i lenei tala i tusitusiga paia.

Faitau le Mose 7:18, ma vaavaai mo uiga o nei tagata.

• O a ni faafitauli o tatou feagai i aso nei o le a foia pe faaitiitia i se nuu faapena?

• O le a sou manatu i le mea na manaomia mo nei tagata e oo atu ai i lenei tulaga?

Faaalu sina taimi e mafaufau ai e uiga i le ala e mafai ai ona faamanuiaina lou olaga i le ola ai i se ala faaKeriso e pei o tagata o Siona. A o e suesue i le asō, vaavaai mo aoaoga e mafai ona fesoasoani e te malamalama atili ai i mea e mafai ona e faia e fesoasoani ai e faatuina Siona ia siomia ai oe.

O Le aai o Siona

Ina ia fesoasoani i tamaiti aoga ia malamalama i le talaaga mo fuaiupu o le a latou suesueina i le asō, faitau pe aotele ia faamatalaga nei. E mafai foi ona e faitauina le Au Paia, 1:118–19.

E lei leva ona faatulaga le Ekalesia, ae toatele le Au Paia na fiafia e uiga i le faatuina o se nuu o Siona e pei o le nuu o Enoka. Sa folafola mai e le Alii o le a i ai se aai o Siona e fausia i aso e gata ai (tagai Mataupu Faavae ma Feagaiga 45:65–71; Mose 7:62).

Ia Iuni 1831, sa poloaiina ai e le Alii ia Iosefa Samita ma se vaega o toeaina e malaga pe tusa ma le 800 maila (1,287 km) mai Ohaio i Misuri, lea o le a latou faia ai se konafesi ma aoao ai e uiga i le laueleele o lo latou tofi (tagai Mataupu Faavae ma Feagaiga 52:1–2, 5). O le faaaliga o loo tusia i le Mataupu Faavae ma Feagaiga 57 na maua ina ua taunuu Iosefa Samita ma toeaina i Misuri ia Iulai 1831.

Faitau le Mataupu Faavae ma Feagaiga 57:1–3 e tagai ai i mea sa aoaoina e le Au Paia.

• O fea na ta’u mai e le Alii o le a fausia ai le aai o Siona?

• O le a le mea ua fesoasoani le fuaiupu 3 e te malamalama ai e uiga i le taua o le malumalu i le Alii?

Atonu e i ai ni fesili a tamaiti aoga e uiga i aoaoga a le Faaola i fuaiupu 1–3. Atonu e fesoasoani le faamalamalama atu o taumafaiga a le Au Paia i le vaitau o le 1830 e faatuina se aai o Siona i Initipene, Misuri, sa le faamanuiaina ona o sauaga. E oo atu i le 1838, ua tutuliese le Au Paia mai Misuri e o latou fili.

E ui ina sa folafola mai e le Alii o le a i ai se aai o Siona i le lumanai ua fausia i luga o le konetineta o Amerika (tagai Mataupu Faavae o le Faatuatua 1:10), o aso nei ua fautuaina i tatou e fausia Siona i soo se mea lava tatou te nonofo ai e ala i le taumafai e ola amiotonu ma faatuina le Ekalesia i le lalolagi atoa (tagai “Siona,” Autu ma Fesili, topics.ChurchofJesusChrist.org).

Faatuina o le aai o Siona

I le faaaliga o loo tusia i le Mataupu Faavae ma Feagaiga e 57, na avatu ai e le Alii faatonuga i nisi tagata e amata ona fausia Siona.

O se tasi o auala e mafai ona e fesoasoani ai i tamaiti aoga e aoao mai fuaiupu nei o le tuu lea i ni vaega taitoafa ma vaevae fuaiupu i le va o tagata o le vaega (fuaiupu 6–7, 8–10, 11–12, 13–14). E mafai e tagata taitoatasi o le vaega ona faailoa mai le tagata po o tagata taitoatasi o loo talanoaina ma mea na talosagaina i latou e fai. Ona mafai lea e tamaiti aoga ona faasoa mai mea na latou maua i tagata o a latou vaega.

Faitau le Mataupu Faavae ma Feagaiga 57:6–14, ma vaavaai mo le mea na poloaiina e le Alii i latou taitoatasi e fai.

• Aisea e te manatu na fetalai atu ai le Alii i tagata eseese e fai ni galuega eseese?

• O le a se mea ua aoao mai e lenei mea ia i tatou e uiga i le ala e fausia ai e le Alii Ia Siona, Lona malo, i le lalolagi?

  Fesoasoani i tamaiti aoga e faailoa mai le mataupu faavae lenei: E fausia e le Faaola Siona e ala i le faaaogaina o o tatou tomai taitoatasi.

  Faamalamalama atu na ō nei alii e galulue ma faataunuuina le mea na poloaiina ai i latou e le Alii e fai. O le ositaulagaina o le tele o mea, sa latou “totoina” (tagai i le Mataupu Faavae ma Feagaiga 57:8, 11, 14, 15) i latou lava i Misuri, o se nofoaga e aunoa ma le tele o avanoa i lena taimi o le tuaoi i sisifo o le Iunaite Setete o Amerika.

• E mafai faapefea ona fesoasoani lea mea tatou te malamalama ai e fausia e le Faaola Lona malo i lenei ala?

Atonu o le a le tuuina atu e le Alii ia te oe ia lava galuega e tasi e fausia ai Siona e pei ona ta’ua e tagata taitoatasi i nei fuaiupu. Peitai, ua Ia fetalai mai ia i tatou e fausia Siona i aso nei. E ala mai i Ana perofeta, ua Ia faamalosia ai i tatou e fausia Siona i soo se mea tatou te nonofo ai (tagai D. Todd Christofferson, “O Mai i Siona,” Liahona, Nov. 2008, 38).

• O a nisi o auala e mafai ona e faatuina ai Siona e siomia ai oe i le asō?

E mafai ona e valaaulia tamaiti aoga e mafaufau i ni vaega patino o o latou olaga e mafai ona latou faatuina ai Siona, e pei o le aiga, i a latou uarota po o paranesi, i le aoga, po o isi a latou fegalegaleaiga.

I le avea ai ma se vaega o lenei talanoaga, mafaufau e faaaoga se tasi po o faataitaiga uma nei. Valaaulia tamaiti aoga e mafaufau pe faapefea e nei faataitaiga ona fesoasoani ia i latou e malamalama atili ai pe mafai faapefea ona latou fausia Siona e siomia ai i latou.

Matamata le “Mata e Vaai” mai le faailotaimi 4:54 i le 6:54 ma le “O Manaoga i o Tatou Luma” mai le faailotaimi 6:03 i le 8:10. O loo maua uma nei vitio i luga o le ChurchofJesusChrist.org.

Fausiaina o Siona e siomia ai oe

Mafaufau e valaaulia tamaiti aoga e faasoa mai ni aafiaga na latou maua pe iloa foi na fesoasoani ia i latou po o isi e faatu Siona. Valaaulia i latou e faasoa mai faamanuiaga na latou oo i ai ona o nei taumafaiga.

Fesoasoani i tagata aoao ia taumafai ma le loto i ai ia avea atili e faapei o Iesu Keriso: A o faasoa mai e tamaiti aoga nei aafiaga, atonu latou te faailoa mai ni auala ua avea atili ai i latou po o isi e faapei o Keriso. Mo nisi faataitaiga i auala e mafai ona e faailoa atu ai auala ua avea atili ai i latou e faapei o Keriso, tagai i le aoaoga “Matau uiga faaKeriso i tamaiti aoga ma faasoa mai mea ua e matauina i ni auala e musuia ai i latou e faaauau pea ona faapei o Ia,” o loo maua i le aoaoga faamasani Tomai o le Atinaega o Faiaoga: Taulai atu i a Iesu Keriso .

Ona valaaulia lea o tamaiti aoga e tali se tasi po o fesili uma foi ia latou api faamaumau mo suesuega.

• O le a se mea na e a’oa’oina pe lagonaina e uiga i le Tama Faalelagi ma Iesu Keriso e ala i au suesuega o le asō?

• O le a se mea ua uunaia oe e fai ona o mea ua e suesueina i le asō?

Afai e le patino tele, valaaulia nai tamaiti aoga e faasoa mai o latou manatu. Molimau atu i upu moni sa outou talanoaina, ma valaaulia tamaiti aoga e faatino soo se uunaiga latou te maua e ala i le Agaga Paia e fausia Siona.

Punaoa Faaopoopo

O le a le taua o le faatuina o Siona?

Sa aoao mai le Perofeta o Iosefa Samita (1805–44):

E tatau ona avea le atiina ae o Siona ma o tatou faamoemoe sili (Aoaoga a Peresitene o le Ekalesia: Iosefa Samita [2007], 186).

O le a le uiga o le, o Initipene Misuri, o le nofoaga tutotonu lea?

Ina ua atofa mai e le Alii le Itumalo o Siakisone, Misuri, o le nofoaga o le a fausia ai le aai o Siona, sa Ia faailoa mai foi o le aai o Initipene o le a avea “ma nofoaga tutotonu” (Mataupu Faavae ma Feagaiga 57:3). O le avea ai ma nofoaga tutotonu ua faasino mai, i se isi itu, o le matafaioi faapea o Siona, po o le Ierusalema Fou, o le a avea o se tasi o laumua e lua (o le isi o Ierusalema) o le malo o le Alii i le taimi o le Mileniuma (tagai Joseph Fielding Smith, Doctrines of Salvation,comp. Bruce R. McConkie [1955], 3:71). Mai lenei nofoaga o le a vaavaaia ai e le Alii lava Ia gaoioiga ma faagasologa o Lona malo.

E mafai faapefea ona tatou iloa le auala e fesoasoani ai i isi ma fausia Siona?

Na aoao mai e Sister Michelle D. Craig o lē sa i le au Peresitene Aoao o Tamaitai Talavou:

Ou te molimau atu e alofa Iesu Keriso ia i tatou ma e mafai ona Ia aumaia mata e vaai ai—e tusa lava pe faigata, e tusa lava pe tatou te lelavava, e tusa lava pe tuuatoatasi i tatou, ma e tusa lava po o taunuuga e le o ni mea sa tatou faamoemoeina. E ala i Lona alofa tunoa, o le a Ia faamanuia i tatou ma faateleina lo tatou gafatia. E ala i le mana o le Agaga Paia, o le a mafai ai e Keriso ona tatou vaai ia i tatou lava ma vaai i isi e pei ona Ia faia. Faatasi ai ma Lana fesoasoani, e mafai ona tatou iloatino mea e sili ona manaomia. E mafai ona tatou amata vaaia le aao o le Alii o loo galue i, ma e ala i auiliiliga patino masani o o tatou olaga—o le a tatou vaai loloto i ai. (Michelle D. Craig, “Mata e Vaai Ai,” Liahona, Nov. 2020, 17)

O le vitio lenei o loo faamamafa mai ai se faataitaiga na faasoa mai e Sister Craig e uiga i le i ai o mata e vaai ai i manaoga o isi.

Gaoioiga Faaopoopo e Aoao Ai

Ia totoina

Afai e i ai se taimi o totoe i le vasega, atonu e te manao e faasino atu i tamaiti aoga se isi aoaoga na tuuina atu ia i latou o e o mai i Siona. E mafai ona e faaali atu se ata o se laau pe aumai se laau i totonu ma valaaulia tamaiti aoga e vaavaai mo le fasifuaitau e o faatasi ma le ata o loo i le Mataupu Faavae ma Feagaiga 57:8, 11, 14, 15. E mafai ona e valaaulia tamaiti aoga e faasoa mai o latou manatu i le uiga o le totoina a o faamatala mai e nei fuaiupu. Mafaufau ia vaavaai tamaiti aoga i le Mataupu Faavae ma Feagaiga 51:17 mo se faauigaga o le totoina. E mafai ona e fai atu fesili nei:

• E mafai faapefea ona faatatau le “totoina” i se talavou i aso nei? O a ni auala e mafai ai e se talavou ona “galue [e peiseai] mo ni tausaga”?

• O le a sou manatu e mafai faapefea e le totoina o oe lava ona fesoasoani ia te oe e avea ai ma soo sili atu o Iesu Keriso?

• Aisea e ono lagona ai e se tagata le faaosoosoina e aua nei totoina i latou lava i se vaega a le uarota po o le autalavou?

Fausiaina o Siona i soo se mea e te nofo ai

Mafaufau e faaali atu le vitio lea mai ia Elder D. Todd Christofferson o le Korama a Aposetolo e Toasefululua ma valaaulia tamaiti aoga e vaavaai mo auala e tolu ua ia fai mai e mafai ona tatou faatuina ai Siona i a tatou aulotu i le lotoifale.

A uma le vitio, e mafai ona e valaaulia tamaiti aoga e lisi mea na latou maua ma maua mai ni auala aoga e mafai ona faataunuuina ai vaega taitasi e tolu i se vaega a se uarota, paranesi, po o le autalavou. E mafai ona e fesili i tamaiti aoga pe aisea e le mafai ai ona tatou faatali mo Siona e o mai ia i tatou.

O le faataitaiga a le Au Paia i Kolesavile

Atonu e te manao e faamamafa atu le auala na faamuamua ai e le Au Paia i Kolesavile le fausiaina o Siona e sili atu i lo o latou lava tulaga o le lagolelei. Mafaufau e faaaoga vaega filifilia mai le mataupu 12 o le Au Paia, vol. 1 pe faaaoga le aotelega lenei.

Na tuua e tagata o le paranesi a Kolesavile o latou fale i Niu Ioka e faapotopoto i Ohaio. Sa na o sina taimi puupuu na latou nonofo ai iina ae toe faafiti Limani Copley i lana maliega e faataga le Au Paia e faamautu i lona fanua. Ona faatonuina lea o le Au Paia i Kolesavile e fai le malaga e 800 maila e faapotopoto ai i Siona i Misuri.

Mafaufau e faasoa atu le tala lenei a Newel Knight, o se tasi o le Au Paia i Kolesavile:

“Sa [matou] o i [se vaasitima] … mo Initipene. Sa tulaga faaletonu lava le soifua maloloina o lo’u tina, ma sa faapena mo se taimi umi lava. Ae ui i lea, sa le loto o ia e malolo le malaga; na pau lava lona manao, po o lona manao silisili, ia tuvae i luga o le laueelele o Siona, ma ia tanumia lona tino i lena laueleele. Sa ou alu i le pa’umātu ma faatau mai laupapa e fai ai se pusamaliu ina ne’i maliu o ia ae matou te le’i taunuu i le nofoaga matou te taunuu i ai, oka se vave o lona faasolo vaivai” (Newel Knight autobiography and journal, circa 1846–1847, Church History Library, Salt Lake City; ua faalaugatasia le sipelaga, faamataitusi lapopoa, ma faailoga).

• Aisea e te manatu sa naunau ai nei Au Paia e tuuina atu le tele o mea ina ia avea ai ma vaega o Siona?