“Lesona 70—Atamai i Aoaoga Faavae Faataitaiga 4: Faaaoga Mataupu Faavae o le Mauaina o le Malamalama Faaleagaga,” Tusi Lesona a le Faiaoga Seminare o le Mataupu Faavae ma Feagaiga (2025)
“Atamai i Aoaoga Faavae Faataitaiga 4,” Tusi Lesona a le Faiaoga Seminare o le Mataupu Faavae ma Feagaiga
Lesona 70: Mataupu Faavae ma Feagaiga 51–57
Atamai i Aoaoga Faavae Faataitaiga 4
Faaaoga Mataupu Faavae o le Mauaina o le Malamalama Faaleagaga
O le atamai i aoaoga faavae e mafai ona fesoasoani i tamaiti aoga e fausia le faavae mo o latou olaga i luga o Iesu Keriso ma Lana talalelei. O lenei lesona o le a tuuina atu ai i tamaiti aoga ni avanoa e faataitai ai le taulotoina o fuaitau o le atamai i aoaoga faavae o loo aoaoina atu e nei fuaitau. O le a aoaoina foi e tamaiti aoga ma faaaoga mataupu faavae paia mo le mauaina o le malamalama faaleagaga.
Gaoioiga E Ono Mafai Ona Aoao Ai
Faamanatu o le atamai i aoaoga faavae: Faaaoga
O fesili nei e mafai ona faaaoga e fesoasoani ai i tamaiti aoga e faataitai le aoaoina pe faapefea ona faaaoga aoaoga o fuaitau o le atamai i aoaoga faavae i tulaga moni o le olaga. Afai e manaomia, e mafai ona e fatuina ni fesili e fesootai i fuaitau o le atamai i aoaoga faavae ua aoaoina e au tamaiti aoga.
Valaaulia tamaiti aoga e filifili se fesili se tasi latou te mananao e taulai i ai.
-
Afai o au o se tagata lelei, e afaina po o le a le lotu ou te auai ai?
-
E mafai faapefea ona ou iloa lelei pe ua ou maua faaaliga faaletagata lava ia?
-
Aisea e tatau ai ona ou faasoa atu le talalelei i a’u uo ma aiga?
-
Aisea e tatau ai ona ou auai i le konafesi aoao?
-
E mafai faapefea ona ou faamalosia lo’u sootaga ia Iesu Keriso?
E mafai e tamaiti aoga ona faia lenei gaoioiga i vaega toalaiti, pe o se vasega.
O se tasi o tomai e mafai ona tatou aoaoina o le auala e faaaoga ai fuaitau o mau i tulaga moni o le olaga. Mo fesili taitasi o i luga, filifili se fuaitau o le atamai i aoaoga faavae e ono fesoasoani i se tasi i o latou popolega. Mo le lisi o fuaitau o le atamai i aoaoga faavae ma fasifuaitau autu o mau, vaai i le Pepa Autu o le Atamai i Aoaoga Faavae (2023).
Ia mautinoa ua malamalama tamaiti aoga e sili atu ma le tasi le fuaitau o le atamai i aoaoga faavae e faaaoga e tali ai fesili taitasi.
A uma ua lava se taimi o tamaiti aoga e faailoa mai ai fuaitau o le atamai i aoaoga faavae e faatatau i o latou tulaga na filifilia, talanoaina mea na latou maua e ala i le fai atu o fesili e pei o nei:
-
O le fea fuaitau o le atamai i aoaoga faavae e te lagona e faatatau i le ata faataitai sa e taulai i ai?
-
E mafai faapefea ona fesoasoani nei fuaitau o le atamai i aoaoga faavae i lena ata faataitai?
Mafaufau e fai atu i ni nai tamaiti aoga e faasoa mai le fuaitau na latou filifilia ma pe o a ni o latou lagona e ono fesoasoani ai i se tasi o i ai lena fesili.
Fuafua e faaalu ia le sili atu ma le 10–15 minute le umi i lenei gaoioiga ina ia lava ai le taimi mo le faatinoga o le faataitaiga o le atamai i aoaoga faavae i se taimi mulimuli ane o le lesona.
O manatu faaopoopo e uiga i le auala e fesoasoani ai i tamaiti aoga e faaaoga fuaitau o le atamai i aoaoga faavae e mafai ona maua i anomea i lalo o le “Gaoioiga Faamanatu o le Atamai i Aoaoga Faavae” o loo i le faaopoopoga.
Aoao ma faaaoga mataupu faavae o le mauaina o le atamai faaleagaga
Mo le vaega o totoe o le lesona, taulai atu i le fesoasoani ai i tamaiti aoga e faaaoga mataupu faavae o le mauaina o le malamalama faaleagaga i se tulaga moni o le olaga. A o lei faia le ata faataitai o i lalo, atonu e fesoasoani le valaaulia o tamaiti aoga e toe faamanatu ia mataupu faavae o le mauaina o le malamalama faaleagaga. O gaoioiga toefaamanatu fautuaina o loo aofia atu i le itulau o le faaopoopoga i lalo o le “Gaoioiga Faamanatu o le Atamai i Aoaoga Faavae.” O loo maua faamatalaga o mataupu faavae i parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae.
Fatu se ata faataitai
Ina ia fesoasoani i tamaiti aoga e faaaoga mataupu faavae o le mauaina o le malamalama faaleagaga, mafaufau e fatu se ata faataitai o se vasega e uiga i se tasi e i ai ni atugaluga e uiga i le faaipoipoga po o le amataina o se aiga.
E mafai ona e valaaulia tamaiti aoga e lisi mai talitonuga atonu na latou faalogo i ai e uiga i le faaipoipoga ma le aiga i luga o le laupapa. Valaaulia tamaiti aoga e filifili se aitema mai lenei lisi latou te lagona e talafeagai e fesoasoani e fatu ai le ata faataitai. Fai atu i tamaiti aoga e filifili se igoa mo le tagata i le ata faataitai o loo i ai lenei atugaluga ma faaopoopo i ai faamatalaga seia oo ina lagona e pei o se olaga moni, tulaga talafeagai latou te ono feagai po o se tasi latou te iloa.
O se ata faataitai lenei:
Na tetea matua o Troy a o talavou o ia. E lelei lana faiā ma ona matua uma, ae e foliga mai ia te ia e pei o ona matua e moomoo lava la te lei faaipoipo lava. Ua ia molimauina foi le tele o feeseeseaiga ma le atuatuvale tele. E mafaufau o ia pe aoga le faaipoipoga. E lagona e ia le le mautinoa pe afai e manao o ia e faaipoipo.
Nofoaga e talanoaina ai
O se tasi o auala mo tamaiti aoga e faaaoga ai le ata faataitai o mataupu faavae o le mauaina o le malamalama faaleagaga o le faailoa mai lea o luitau ma palepalealuga ni vaifofo. O uunaiga nei mo talanoaga e mafai ona tuu solo i le potu. E mafai ona e faatulagaina tamaiti aoga i ni vaega toalaiti e talanoaina fesili i nofoaga taitasi.
A uma ua lava se taimi i se nofoaga, e mafai ona e faataamilo i vaega ina ia faataitai e tamaiti aoga uma le faaaogaina o mataupu faavae e tolu o le mauaina o le malamalama faaleagaga. E tusa ai ma le ata faataitai na faia e le vasega, e ono fesoasoani le fetuunai o fesili o talanoaga ua saunia.
Nofoaga 1
O luitau: O a ni vaaiga e ono aafia ai lagona o lenei tagata e uiga i le faaipoipoga ma le aiga? Aisea e te manatu ai e ono faigata ona vaai atu i se vaaiga e faavavau i lenei tulaga?
Auala talafeagai e fesoasoani ai: O le a se mea e te manao ia malamalama i ai lenei tagata e uiga i le ata o le faaolataga a le Tama Faalelagi? E mafai faapefea e se vaaiga e faavavau ona taulimaina luitau na e faailoaina?
Toe faamanatu ia palakalafa 8–10 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae, ma faailoa mai faamatalaga faaopoopo o le upu moni e mafai ona fesoasoani.
Nofoaga 2
O luitau: O fea na ono fetaiai ai lenei tagata ma nei manatu? Aisea e ono faatauanau ai nei filosofia?
Auala talafeagai e fesoasoani ai: Aisea e taua ai le faalagolago i punaoa mamana ua filifilia pe a sailia faamatalaga e uiga i le faaipoipoga ma le aiga? Sue se mau se tasi pe lua po o ni faamatalaga faaperofeta e mafai ona fesoasoani i lenei ata faataitai.
Toefaamanatu ia palakalafa 11–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae, ma faailoa mai faamatalaga faaopoopo o le upu moni e mafai ona fesoasoani.
Mo le nofoaga 2, mafaufau e tuu atu i tamaiti aoga se kata po o se pepa pipii e tusi ai le mau po o upusii faaperofeta latou te maua ma tuu i luga o le laupapa. A oo ina faataamilo tamaiti aoga i nofoaga uma e tolu, e mafai ona e fai atu i ni nai tamaiti aoga e faasoa mai pe aisea e mafai ai e le mau po o le faamatalaga faaperofeta na latou filifilia ona fesoasoani i le tagata o loo i le ata faataitai.
Afai e manaomia e tamaiti aoga se fesoasoani i le sueina o se mau, e mafai ona e lisiina fuaitau e pei o le Kenese 1:28; 2:24; 1 Korinito 11:11; Mataupu Faavae ma Feagaiga 42:22–25; 49:15–17; 131:1–4 i luga o le laupapa.
Nofoaga 3
O luitau: O le a se mea e ono faigata ai mo lenei tagata ona faatino i le faatuatua?
Auala talafeagai e fesoasoani ai: O le a se mea e te valaaulia lenei tagata e fai e faatino ai i le faatuatua? E mafai faapefea e nei faatinoga ona faateleina le faalagolago o lenei tagata ia Iesu Keriso a o latou galulue i nei luitau?
Toefaamanatu ia palakalafa 5–7 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae, ma faailoa mai faamatalaga faaopoopo o le upu moni e mafai ona fesoasoani.
O mea ua e aoaoina
O fesili nei e mafai ona faaaoga i se gaoioiga o se talanoaga po o se api talaaga:
-
Mai mea ua e aoaoina i le asō, o le a se mea o le a e faasoa atu i se tasi sa i ai ni fesili e uiga i le aoaoga faavae a le Tama Faalelagi o le faaipoipoga ma le aiga?
-
O le a se mea ua e aoaoina e uiga i le mauaina o le malamalama faaleagaga lea e mafai ona fesoasoani i se tasi e talanoaina se fesili e faatatau i le talalelei?
E mafai ona e faamanatu i tamaiti aoga o se mea masani le i ai o ni fesili e uiga i le talalelei. E mafai ona e faasoa atu ou lagona e uiga i le mana o le faaaogaina o mataupu faavae o le mauaina o le malamalama faaleagaga e talanoaina ai soo se fesili po o ni atugaluga patino.