“Lēsoni 70—Akoako Fakataukei Fakatokāteline 4: Fakaʻaongaʻi ʻa e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Akoako Fakataukei Fakatokāteline 4,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 70: Tokāteline mo e Ngaahi Fuakava 51–57
Akoako Fakataukei Fakatokāteline 4
Fakaʻaongaʻi ʻa e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié
ʻE lava ke tokoni ʻa e fakataukei fakatokāteliné ki he kau akó ke langa ʻa e makatuʻunga maʻa ʻenau moʻuí ʻia Sīsū Kalaisi mo ʻEne ongoongoleleí. ʻE ʻoange ʻe he lēsoni ko ʻení ha ngaahi faingamālie ki he kau akó ke ako maʻuloto ʻa e ngaahi potufolofolá pea mo e tokāteline ʻoku akoʻi ʻe he ngaahi potufolofola ko ʻení. ʻE ako foki mo fakaʻaongaʻi ʻe he kau akó ʻa e ngaahi tefitoʻi moʻoni fakalangi ki hono maʻu ʻo e ʻilo fakalaumālié.
Ngaahi ʻEkitivitī Ako ʻOku Ala Fakahokó
Fakamanatu ʻo e fakataukei fakatokāteliné: Fakaʻaongaʻí
ʻE lava ke fakaʻaongaʻi ʻa e ngaahi fehuʻi ko ʻení ke tokoni ke akoako fakahoko ʻe he kau akó ʻa e founga ke fakaʻaongaʻi ai ʻa e ngaahi akonaki ʻo e ngaahi potufolofola fakataukei fakatokāteliné ki ha ngaahi tūkunga moʻoni ʻo e moʻuí. Kapau ʻe fiemaʻu, te ke lava ʻo faʻu ha ngaahi fehuʻi ʻoku fekauʻaki mo e ngaahi potufolofola fakataukei fakatokāteline kuo ako ʻe hoʻo kau akó.
Fakaafeʻi ʻa e kau akó ke fili ha fehuʻi ʻe taha ʻoku nau fie tokanga taha ki aí.
-
Kapau ko ha tokotaha lelei au, ʻoku mahuʻinga nai ʻa e siasi ʻoku ou kau ki aí?
-
Te u ʻilo fēfē nai kapau ʻoku ou maʻu ha fakahā fakatāutaha?
-
Ko e hā ʻoku totonu ai ke u vahevahe ʻa e ongoongoleleí mo hoku ngaahi kaungāmeʻá mo e fāmilí?
-
Ko e hā ʻoku totonu ai ke u kau ʻi he konifelenisi lahí?
-
Te u lava fēfē nai ʻo fakamālohia ʻeku fetuʻutaki mo Sīsū Kalaisí?
ʻE lava ke fakahoko ʻeni ʻe he kau akó ʻi ha fanga kiʻi kulupu iiki pe fakakalasi.
Ko e taha ʻo e ngaahi taukei te tau lava ʻo akó ko e founga ke fakaʻaongaʻi ai ʻa e ngaahi potufolofolá ki ha ngaahi tūkunga moʻoni ʻo e moʻuí. Ki he fehuʻi takitaha ʻi ʻolungá, fili ha potufolofola fakataukei fakatokāteline ʻe ala tokoni ki ha taha ʻi he meʻa ʻoku hohaʻa ki aí. Ki ha lisi ʻo e ngaahi potufolofola fakataukei fakatokāteliné mo e ngaahi kupuʻi lea fakafolofola mahuʻingá, vakai ki he Fakamatala ki he ʻElito ʻo e Fakataukei Fakatokāteliné (2023).
Fakapapauʻi ʻoku mahino ki he kau akó ʻoku fakaʻaongaʻi ha potufolofola fakataukei fakatokāteline ʻe taha pe lahi ange ke tali ʻaki ʻa e fehuʻi takitaha.
Hili hono maʻu ʻe he kau akó ha taimi feʻunga ke ʻiloʻi ʻa e ngaahi potufolofola fakataukei fakatokāteline ʻoku fekauʻaki mo e ngaahi tūkunga kuo nau filí, aleaʻi ʻa e ngaahi meʻa ʻoku nau maʻú ʻaki hano ʻeke ange ha ngaahi fehuʻi hangē ko ʻení:
-
Ko e ngaahi potufolofola fakataukei fakatokāteline fē ʻokú ke ongoʻi ʻoku fekauʻaki mo e tūkunga naʻá ke tokanga taha ki aí?
-
ʻE tokoni fēfē nai ʻa e ngaahi potufolofola fakataukei fakatokāteline ko ʻení ki he tūkunga ko iá?
Fakakaukau ke kole ki ha kau ako ʻe niʻihi ke vahevahe ʻa e potufolofola naʻa nau filí mo e founga ʻoku nau ongoʻi ʻe tokoni ai ki ha taha ʻokú ne maʻu ʻa e fehuʻi ko iá.
Palani ke ʻoua naʻa toe laka ʻi he miniti ʻe 10–15 hoʻomou nofo ʻi he ʻekitivitī ko ʻení ke fakaʻatā ha taimi feʻunga ki hono akoako fakaʻaongaʻi ʻo e fakataukei fakatokāteliné ʻamui ange ʻi he lēsoní.
ʻE lava ke maʻu ha ngaahi fakakaukau lahi ange fekauʻaki mo e founga ke tokoniʻi ai ʻa e kau akó ke fakaʻaongaʻi ʻa e ngaahi potufolofola fakataukei fakatokāteliné ʻi he ngaahi naunau ʻi he “Ngaahi ʻEkitivitī Fakamanatu ʻo e Fakataukei Fakatokāteliné” ʻi he fakamatala fakalahí.
Ako mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié
ʻI he toenga ʻo e lēsoní, nofo taha ʻi hono tokoniʻi ʻo e kau akó ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga moʻoni ʻo e moʻuí. Kimuʻa pea faʻu ʻa e tūkunga ʻi laló, mahalo ʻe tokoni ke tomuʻa fakaafeʻi ʻa e kau akó ke fakamanatu ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. ʻOku fakakau ʻa e ngaahi ʻekitivitī fakamanatu ʻoku fokotuʻu atú ʻi he fakamatala fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.” ʻOku maʻu ʻa e ngaahi fakamatala ʻo e ngaahi tefitoʻi moʻoní ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné.
Faʻu ha tūkunga
Ke tokoni ke fakaʻaongaʻi ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié, fakakaukau ke fokotuʻu ha tūkunga fakakalasi fekauʻaki mo ha taha ʻoku hohaʻa fekauʻaki mo e nofo-malí pe kamataʻi ha fāmili.
Te ke lava ʻo fakaafeʻi ʻa e kau akó ke lisi ha ngaahi tui kuo nau fanongo ai fekauʻaki mo e nofo-malí mo e fāmilí ʻi he palakipoé. Fakaafeʻi ʻa e kau akó ke fili ha meʻa mei he lisi ko ʻení ʻoku nau ongoʻi ʻoku mahuʻinga ke tokoni ki hono faʻu ʻo e tūkungá. Kole ki he kau akó ke fili ha hingoa maʻá e tokotaha ʻi he tūkunga ko ʻení ʻokú ne maʻu ʻa e hohaʻá ni pea tānaki atu ha ngaahi fakaikiiki kae ʻoua kuo hangē ko ha tūkunga moʻoni, mo mahuʻinga te nau ala fehangahangai mo ia pe ko ha taha ʻoku nau ʻilo.
Ko ha sīpinga ʻeni ʻo e tūkungá:
Naʻe vete mali ʻa e ongomātuʻa ʻa Tuloí ʻi heʻene kei siʻí. ʻOkú ne maʻu ha vā fetuʻutaki lelei mo ʻene ongomātuʻá fakatouʻosi, ka ʻoku hangē kiate ia ʻoku fakaʻamu ʻene ongomātuʻá naʻe ʻikai ke na malí. Kuó ne sio tonu foki ʻi ha ngaahi taʻe-femahinoʻaki mo ha loto-mafasia lahi. ʻOkú ne fifili pe ʻoku ʻaonga nai ʻa e malí. ʻOkú ne ongoʻi taʻe-pauʻia pe te ne toe fie mali nai ʻi ha taimi.
Ngaahi feituʻu alēleá
Ko e founga ʻe taha ke fakaʻaongaʻi ai ʻe he kau akó ʻa e tūkungá ke akoako ʻa e ngaahi tefitoʻi moʻoni ki hono maʻu ʻo e ʻilo fakalaumālié ko hono ʻiloʻi ʻa e ngaahi faingataʻá pea fakakaukauʻi ʻa e ngaahi founga ke fakaleleiʻi aí. ʻE lava ke fokotuʻu takai ʻa e ngaahi taumuʻa alēlea ko ʻení ʻi he lokí. Te ke lava ʻo fokotuʻutuʻu ʻa e kau akó ki ha fanga kiʻi kulupu iiki ange ke nau tali ʻa e ngaahi fehuʻí ʻi he feituʻu takitaha.
Hili ha taimi feʻunga ʻi ha feituʻu pau, te ke lava ʻo vilohi ʻa e ngaahi kulupú koeʻuhí ke akoako fakaʻaongaʻi ʻe he tokotaha ako kotoa pē ʻa e ngaahi tefitoʻi moʻoni ʻe tolu ki hono maʻu ʻo e ʻilo fakalaumālié. Makatuʻunga ʻi he tūkunga naʻe faʻu ʻe he kalasí, mahalo naʻa ʻaonga ke liliu ʻa e ngaahi fehuʻi alēlea ʻoku ʻoatú.
Feituʻu 1
Ko e ngaahi faingataʻá: Ko e hā ha ngaahi fakakaukau te nau ala tākiekina ʻa e ngaahi ongo ʻa e tokotahá ni fekauʻaki mo e nofo-malí mo e fāmilí? ʻOkú ke pehē ko e hā ʻoku faingataʻa ai ke vakai ki ha fakakaukau taʻengata ʻi he tūkunga ko ʻení?
Ngaahi founga ʻe lava ke tokoni aí: Ko e hā te ke fiemaʻu ke mahino ki he tokotahá ni fekauʻaki mo e palani ʻo e fakamoʻui ʻa e Tamai Hēvaní? ʻE lava fēfē nai ʻe ha fakakaukau ʻoku taʻengatá ʻo tokoni ʻi ha ngaahi faingataʻa naʻá ke ʻiloʻi?
Toe vakaiʻi ʻa e palakalafi 8–10 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné, pea feinga ke ʻiloʻi ha ngaahi fakamatala lahi ange ʻo e moʻoní ʻe ala tokoni.
Feituʻu 2
Ko e ngaahi faingataʻá: Naʻe maʻu nai ʻe he tokotahá ni ʻa e ngaahi fakakaukau ko ʻení mei fē? Ko e hā ʻe ala fakalotoa ai ʻa e ngaahi fakakaukau ko ʻení?
Ngaahi founga ʻe lava ke tokoni aí: Ko e hā ka mahuʻinga ai ke fakafalala ki he ngaahi maʻuʻanga tokoni kuo fokotuʻu fakalangí ʻi he fekumi ki ha fakamatala fekauʻaki mo e nofo-malí mo e fāmilí? Kumi ha potufolofola ʻe taha pe ua pe ngaahi fakamatala fakaepalōfita ʻe lava ʻo tokoni ʻi he tūkunga ko ʻení.
Toe vakaiʻi ʻa e palakalafi 11–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné, pea feinga ke ʻiloʻi ha ngaahi fakamatala lahi ange ʻo e moʻoní ʻe ala tokoni.
Ki he feituʻu 2, fakakaukau ke ʻoange ki he kau akó ha kaati pe kiʻi laʻipepa pikipiki ke hiki ai ʻa e potufolofola pe lea fakaepalōfita ʻoku nau maʻú pea fakapipiki ia ʻi he palakipoé. ʻI he taimi kuo vilo takai ai ʻa e kau akó ʻi he ngaahi feituʻu kotoa ʻe tolú, te ke lava ʻo kole ki ha niʻihi ʻo e kau akó ke vahevahe ʻa e ʻuhinga ʻe lava ke tokoni ai ʻa e potufolofola pe fakamatala fakaepalōfita naʻa nau filí ki he tokotaha ʻi he tūkungá.
Ka fiemaʻu tokoni ʻa e kau akó ʻi hono kumi ha potufolofolá, ʻe lava ke ke hiki ʻi he palakipoé ha ngaahi potufolofola hangē ko e Sēnesi 1:28; 2:24; 1 Kolinitō 11:11; Tokāteline mo e Ngaahi Fuakava 42:22–25; 49:15–17; 131:1–4.
Feituʻu 3
Ko e ngaahi faingataʻá: Ko e hā ʻe ala faingataʻa ai ki he tokotahá ni ke ngāue ʻi he tuí?
Ngaahi founga ʻe lava ke tokoni aí: Ko e hā te ke fakaafeʻi ʻa e tokotahá ni ke ne fai ke ngāue ʻi he tuí? ʻE fakatupulaki fēfē nai ʻe he ngaahi ngāue ko ʻení ʻa e falala ʻa e tokotahá ni kia Sīsū Kalaisí ʻi heʻene fehangahangai mo e ngaahi faingataʻa ko ʻení?
Toe vakaiʻi ʻa e palakalafi 5–7 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné, pea feinga ke ʻiloʻi ha ngaahi fakamatala lahi ange ʻo e moʻoní ʻe ala tokoni.
Ko e meʻa kuó ke akó
ʻE lava ke fakaʻaongaʻi ʻa e ngaahi fehuʻi ko ʻení ʻi ha ʻekitivitī fealēleaʻaki pe tohinoa:
-
Mei he meʻa naʻá ke ako ʻi he ʻaho ní, ko e hā te ke vahevahe mo ha taha ʻokú ne maʻu ha ngaahi fehuʻi fekauʻaki mo e tokāteline ʻa e Tamai Hēvaní ki he nofo-malí mo e fāmilí?
-
Ko e hā kuó ke ako fekauʻaki mo hono maʻu ʻo e ʻilo fakalaumālié ʻe lava ʻo tokoni ki ha taha ke ne tali ha fehuʻi fekauʻaki mo e ongoongoleleí?
Te ke lava ʻo fakamanatu ki he kau akó ʻoku angamaheni pē ke ʻi ai haʻanau ngaahi fehuʻi fekauʻaki mo e ongoongoleleí. Te ke lava ʻo vahevahe hoʻo ngaahi ongo fekauʻaki mo e mālohi ʻo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ke tali ʻaki ha faʻahinga fehuʻi pe hohaʻa fakataautaha.