“Lēsoni 69—Tokāteline mo e Ngaahi Fuakava 57: Ko e Founga ʻOku Langa Ai ʻe he ʻEikí ʻa Saioné,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 57,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 69: Tokāteline mo e Ngaahi Fuakava 51–57
Tokāteline mo e Ngaahi Fuakava 57
Ko e Founga ʻOku Langa Ai ʻe he ʻEikí ʻa Saioné
ʻI hono fakahā ʻe he ʻEikí ha meʻa lahi ange fekauʻaki mo Saione ki he Palōfita ko Siosefa Sāmitá, naʻe ongoʻi hohaʻa mo vēkeveke ʻa e Kāingalotú ke nau kau ki ha faʻahinga kolo pehē. ʻI he taimi pē naʻe fakahā ai ʻa e feituʻu ke langa ai ʻa Saioné, naʻe fakahinohinoʻi ʻe he ʻEikí ha niʻihi fakafoʻituitui pau ke nau kamata fokotuʻu ʻa e koló. ʻOku fakataumuʻa ʻa e lēsoni ko ʻení ke tokoni ki he kau akó ke nau ongoʻi ha loto-holi lahi ange ke hoko ko e kakai ʻa e ʻEikí ʻaki hono langa ʻa Saioné.
Ngaahi ʻEkitivitī Ako ʻOku Ala Fakahokó
Saione
Fakakaukau ke fakaʻaliʻali ha fakatātā ʻo e Fakamoʻuí.
Fakakaukauloto naʻá ke maʻu ʻa e faingamālie ke nofo ofi kia Sīsū Kalaisi.
-
Ko e hā ha ngaahi ʻulungaanga ʻokú Ne maʻu te ne ʻai ke fakafiefia ʻa e nofo ofi kiate Iá?
Fakakaukauloto leva ki he ongo ʻe maʻu ʻi he nofo ʻi ha kolo ʻoku fonu ʻi ha kakai ʻoku feinga ke muimui ki he ngaahi akonaki mo e sīpinga ʻa Sīsū Kalaisí. Naʻe ʻi ai ha sīpinga ʻo ha kolo pehē ʻi he kuonga ʻo e Fuakava Motuʻá ʻi he kakai ʻo ʻĪnoké.
Fakakaukau ke fakaʻaliʻali ha fakatātā ʻo ʻĪnoke mo hono kakaí pea fehuʻi ki he kau akó pe ko e hā ʻoku nau ʻilo fekauʻaki mo e fakamatala ko ʻení ʻi he folofolá.
Lau ʻa e Mōsese 7:18, ʻo kumi ʻa e ngaahi ʻulungaanga ʻo e kakai ko ʻení.
-
Ko e hā ha ngaahi palopalema ʻoku tau fehangahangai mo ia ʻi he ʻahó ni ʻe fakaleleiʻi pe fakasiʻisiʻi ʻi ha faʻahinga kolo pehē?
-
ʻOkú ke pehē ko e hā naʻe fakahoko ʻe he kakaí ni ke nau aʻu ai ki he tuʻunga ko ʻení?
Fakaʻaongaʻi ha kiʻi taimi ke fakakaukau ki he founga ʻe lava ke faitāpuekina ai hoʻo moʻuí ʻe he moʻui ʻi ha founga faka-Kalaisi ange ʻo hangē ko e kakai ʻo Saioné. ʻI hoʻo ako ʻi he ʻaho ní, kumi ha ngaahi akonaki ʻe lava ʻo tokoni ke mahino lelei ange kiate koe ʻa e meʻa te ke lava ʻo fai ke tokoni ki hono fokotuʻu ʻo Saione ʻi ho ʻātakaí.
Ko e kolo ʻo Saioné
Ke tokoni ke mahino ki he kau akó ʻa e puipuituʻa ʻo e ngaahi veesi te nau ako ʻi he ʻaho ní, lau pe fakamatalaʻi fakanounou ʻa e fakamatala ko ʻení. Te ke lava foki ʻo lau ʻa e Kau Māʻoniʻoní, 1:128–29.
Hili ha taimi nounou mei hono fokotuʻu ʻo e Siasí, naʻe vēkeveke ha tokolahi ʻo e Kāingalotú ke fokotuʻu ha kolo ʻo Saione hangē ko e kakai ʻo ʻĪnoké. Naʻe talaʻofa ʻe he ʻEikí ʻe ʻi ai ha kolo ʻo Saione ʻe langa hake ʻi he ngaahi ʻaho fakaʻosí (vakai, Tokāteline mo e Ngaahi Fuakava 45:65–71; Mōsese 7:62).
ʻI Sune ʻo e 1831, naʻe fekauʻi ʻe he ʻEikí ʻa Siosefa Sāmita mo ha kulupu ʻo ha kaumātuʻa ke nau fononga ʻi ha maile nai ʻe 800 (1,287 km) mei ʻOhaiō ki Mīsuli, ʻa ia te nau fakahoko ai ha konifelenisi mo ako fekauʻaki mo e fonua ʻo honau tofiʻá (vakai, Tokāteline mo e Ngaahi Fuakava 52:1–2, 5). Naʻe maʻu ʻa e fakahā ʻoku lekooti ʻi he Tokāteline mo e Ngaahi Fuakava 57 ʻi he tūʻuta ʻa Siosefa Sāmita mo e kaumātuʻá ki Mīsuli ʻi Siulai ʻo e 1831.
Lau ʻa e Tokāteline mo e Ngaahi Fuakava 57:1–3 ke vakai ki he meʻa naʻe ʻilo ʻe he kāingalotú.
-
Ko e fē ʻa e feituʻu naʻe fakahā ʻe he ʻEikí ʻe langa ai ʻa e kolo ko Saioné?
-
Ko e hā ʻa e meʻa ʻoku tokoni ʻa e veesi 3 ke mahino kiate koé fekauʻaki mo hono mahuʻinga ʻo e temipalé ki he ʻEikí?
Mahalo ʻe ʻi ai ha ngaahi fehuʻi ʻa e kau akó fekauʻaki mo e ngaahi akonaki ʻa e Fakamoʻuí ʻi he veesi 1–3. Mahalo ʻe tokoni ke fakamatalaʻi ange naʻe ʻikai ola lelei ʻa e ngaahi feinga ʻa e Kāingalotú ʻi he 1830 tupú ke fokotuʻu ha kolo ʻo Saione ʻi Tauʻatāina, Mīsulí koeʻuhí ko e fakatangá. ʻI he 1838, naʻe tuli ʻa e Kāingalotú mei Mīsuli ʻe honau ngaahi filí.
Neongo kuo talaʻofa ʻe he ʻEikí ʻe langa ha kolo ʻo Saione ʻi he kahaʻú ʻi he konitinēniti ʻo ʻAmeliká (vakai, Ngaahi Tefito ʻo e Tuí 1:10), ka ʻoku faleʻi kitautolu ʻi he ʻahó ni ke langa hake ʻa Saione ʻi he feituʻu pē ʻoku tau nofo aí ʻaki ʻetau feinga ke moʻui angatonu pea mo hono fokotuʻu ʻo e Siasí ʻi he funga ʻo e māmaní (vakai, “Saione,” Ngaahi Tefito ʻo e Ongoongoleleí, topics.ChurchofJesusChrist.org).
Ko hono fokotuʻu ʻo e kolo ʻo Saioné
ʻI he fakahā ʻoku lekooti ʻi he Tokāteline mo e Ngaahi Fuakava 57, naʻe ʻomi ai ʻe he ʻEikí ha fakahinohino ki ha niʻihi fakafoʻituitui ke kamata hono langa ʻo Saioné.
Ko e founga ʻe taha te ke lava ai ʻo tokoni ki he kau akó ke ako mei he ngaahi veesi ko ʻení ko hono fakakulupu tautau toko fā kinautolu pea vahevahe ʻa e ngaahi vēsí ʻi he kau mēmipa ʻo e kulupú (veesi 6–7, 8–10, 11–12, 13–14). ʻE lava ke ʻiloʻi ʻe he mēmipa takitaha ʻo e kulupú ʻa e tokotaha fakafoʻituitui pe niʻihi fakafoʻituitui naʻe fakahoko ki ai ʻa e leá pea mo e meʻa naʻe kole ange ke nau faí. ʻE lava leva ke vahevahe ʻe he kau akó ʻa e ngaahi meʻa naʻa nau maʻú mo e kau mēmipa ʻo ʻenau kulupú.
Lau ʻa e Tokāteline mo e Ngaahi Fuakava 57:6–14, ʻo kumi ʻa e meʻa naʻe kole ʻe he ʻEikí kiate kinautolu takitaha ke fakahokó.
-
ʻOkú ke pehē ko e hā naʻe kole ai ʻe he ʻEikí ki ha kakai kehekehe ke nau fakahoko ha ngaahi ngāue kehekehé?
-
Ko e hā ʻoku akoʻi mai ʻe he meʻá ni fekauʻaki mo e founga ʻoku langa ai ʻe he ʻEikí ʻa Saione, Hono puleʻangá, ʻi he māmaní?
Tokoni ke ʻiloʻi ʻe he kau akó ʻa e tefitoʻi moʻoni ko ʻení: ʻOku langa hake ʻe he Fakamoʻuí ʻa Saione ʻaki hono fakaʻaongaʻi hotau ngaahi tuʻunga malava fakafoʻituituí.
Fakamatalaʻi ange naʻe ngāue ʻa e kau tangata ko ʻení mo fakahoko ʻa e meʻa naʻe kole ange ʻe he ʻEikí ke nau fakahokó. ʻI heʻenau ngaahi feilaulaú, naʻa nau “fokotuʻu” (vakai, Tokāteline mo e Ngaahi Fuakava 57:8, 11, 14, 15) kinautolu ʻi Mīsuli, ko ha feituʻu naʻe ʻikai lahi hano ngaahi faingamālie ʻa ia naʻe ʻiloa ʻi he taimi ko iá ko e kauʻāfonua fakahihifo ʻo e ʻIunaiteti Siteiti ʻo ʻAmeliká.
-
ʻE tokoni fēfē nai ke mahino kiate kitautolu ʻoku langa ʻe he Fakamoʻuí Hono puleʻangá ʻi he founga ko ʻení?
ʻOku ngalingali he ʻikai ʻoatu ʻe he ʻEikí ʻa e ngaahi ngāue tatau ke fokotuʻu ʻa Saione ʻo hangē ko e niʻihi fakafoʻituitui ʻoku lau ki ai ʻi he ngaahi veesi ko ʻení. Ka neongo ia, ʻokú Ne kole mai ke tau langa hake ʻa Saione ʻi he ʻahó ni. Kuó Ne poupouʻi kitautolu ʻo fakafou ʻi Heʻene kau palōfitá, ke tau langa ʻa Saione ʻi ha feituʻu pē ʻoku tau nofo ai (vakai, D. Todd Christofferson, “Haʻu ki Saione,” Liahona, Nōvema 2008, 38).
-
Ko e hā ha ngaahi founga te ke lava ai ʻo fokotuʻu ʻa Saione ʻi ho ʻātakaí ʻi he ʻahó ni?
Te ke lava ʻo fakaafeʻi ʻa e kau akó ke fakakaukau ki ha ngaahi tafaʻaki pau ʻo ʻenau moʻuí te nau lava ai ʻo fokotuʻu ʻa Saione, hangē ko ʻapi, ʻi honau uōtí pe koló, ʻi he akó, pe ʻi heʻenau ngaahi fengāueʻaki kehé.
Fakakaukau ke fakaʻaongaʻi ha taha pe fakatouʻosi ʻo e ongo sīpinga ko ʻení ko ha konga ʻo e fealēleaʻakí ni. Fakaafeʻi ʻa e kau akó ke fakakaukau ki he founga ʻoku tokoniʻi ai kinautolu ʻe he ngaahi sīpinga ko ʻení ke mahino lelei ange kiate kinautolu ʻa e founga te nau lava ai ʻo langa ʻa Saione ʻi honau ʻātakaí.
Mamata ʻi he “Mata ke Mamatá” mei he taimi 4:54 ki he 6:54 mo e “Ko e Ngaahi Fiemaʻu Hotau Tafaʻakí” mei he taimi 6:03 ki he 8:10. ʻOku maʻu ʻa e ongo vitioó ni fakatouʻosi ʻi he ChurchofJesusChrist.org.
Ko hono langa hake ʻo Saione ʻi ho ʻātakaí
Fakakaukau ke fakaafeʻi ʻa e kau akó ke vahevahe ha ngaahi aʻusia kuo nau maʻu pe ʻilo fekauʻaki mo ha meʻa naʻa nau tokoni ai pe ko ha niʻihi kehe ke langa hake ʻa Saioné. Fakaafeʻi kinautolu ke vahevahe ʻa e ngaahi tāpuaki naʻa nau aʻusia koeʻuhí ko e ngaahi ngāue ko ʻení.
Tokoniʻi ʻa e kau akó ke nau feinga ʻi he ʻiloʻilo pau ke hangē ange ko Sīsū Kalaisí: ʻI hono vahevahe ʻe he kau akó ʻa e ngaahi aʻusia ko ʻení, mahalo te nau ʻiloʻi ha ngaahi founga ʻoku nau hoko ai pe ko ha niʻihi kehe ʻo hangē ange ko Kalaisí. Ki ha ako lahi ange ki he founga te ke lava ai ʻo fakamahinoʻi ʻa e ngaahi founga ʻoku nau hoko ai ʻo hangē ange ko Kalaisí, vakai ki he ako “Observe Christlike attributes in students and share what you’ve noticed in ways that inspire them to continue to be like Him,” ʻoku maʻu ʻi he ako Fakatupulaki Ngaahi Taukei ʻa e Faiakó: Tokanga Taha kia Sīsū Kalaisi.
Hili iá, fakaafeʻi ʻa e kau akó ke tali ha taha pe fakatouʻosi ʻo e ongo fehuʻi ko ʻení ʻi heʻenau tohinoa akó.
-
Ko e hā ha meʻa kuó ke ako pe ongoʻi fekauʻaki mo e Tamai Hēvaní mo Sīsū Kalaisi lolotonga hoʻo ngaahi ako ʻi he ʻaho ní?
-
Ko e hā ha meʻa kuó ke ongoʻi kuo ueʻi koe ke ke fai koeʻuhí ko e meʻa kuó ke akó?
Kapau ʻoku ʻikai fuʻu fakataautaha, fakaafeʻi ha kau ako ke vahevahe ʻenau ngaahi fakakaukaú. Fakamoʻoni ki he ngaahi moʻoni kuo mou aleaʻí, pea fakaafeʻi ʻa e kau akó ke ngāueʻi ha faʻahinga ueʻi pē naʻa nau maʻu ʻo fakafou ʻi he Laumālie Māʻoniʻoní ke langa hake ʻa Saioné.