Lēsoni 77: Tokāteline mo e Ngaahi Fuakava 64–66

Tokāteline mo e Ngaahi Fuakava 64:1–17

“ʻOku ʻEkeʻi Meiate Kimoutolu ʻa Hoʻomou Fakamolemoleʻí”

Lolotonga ha fononga mei Mīsuli ki ʻOhaiō, naʻe aʻusia ʻe Siosefa Sāmita mo ha niʻihi kehe ha fefakakikihiʻaki mo ha feʻiteʻitani. ʻI he Tokāteline mo e Ngaahi Fuakava 64, naʻe fakahinohinoʻi ai kinautolu ʻe Sīsū Kalaisi fekauʻaki mo e fiemaʻu ke nau fakamolemolé. ʻE lava ke tokoni ʻa e lēsoni ko ʻení ke muimui ʻa e kau akó ʻi he sīpinga ʻa Sīsū Kalaisí pea faʻa fakamolemole ange.

Ngaahi ʻEkitivitī Ako ʻOku Ala Fakahokó

Fakakaukau ki he fakamolemolé

Fakaafeʻi ʻa e kau akó ke vahevahe ha talanoa fekauʻaki mo e fakamolemolé. Pe te ke lava ʻo vahevahe ha talanoa ʻo e fakamolemolé hangē ko e “Forgiveness: My Burden Was Made Light” (8:24), ʻoku maʻu ʻi he ChurchofJesusChrist.org. Fakaafeʻi ʻa e kau akó ke nau tali ʻa e ongo fehuʻi ko ʻení ʻi heʻenau tohinoa akó.

• ʻOkú ke pehē nai ko ha tokotaha faʻa fakamolemole koe? Ko e hā hono ʻuhinga ʻoku ʻio pe ʻikai aí?

• ʻOkú ke pehē ko e hā ʻoku finangalo ai ʻa e Tamai Hēvaní mo Sīsū Kalaisi ke ke fakamolemoleʻi ʻa e niʻihi kehé?

• Ko hai ha taha ʻoku fiemaʻu ke ke fakamolemoleʻi?

Fakaafeʻi ʻa e kau akó ke fekumi ki ha fakahā fakataautaha ke ʻiloʻi pe ko hai ʻoku fiemaʻu ke nau fakamolemoleʻí pea mo e meʻa te nau lava ʻo fai ke fakahoko ʻa e fakamolemoleʻí.

ʻOku faʻa fakamolemole ʻa Sīsū Kalaisi

Fakakaukau ke fakaafeʻi ha tokotaha ako ke ne lau leʻolahi ʻa e puipuituʻa ko ʻeni ki he Tokāteline mo e Ngaahi Fuakava 64.

ʻI ʻAokosi 1831, hili hono fakatapui ʻo Saione ʻi Mīsulí, naʻe foki ʻa Siosefa Sāmita, ʻŌliva Kautele, ʻAisake Moalī, ʻEselā Puufi, mo ha niʻihi kehe ki ʻOhaiō. Naʻe hoko e vela ʻa e ʻeá, fakatuʻutāmaki ʻa e ngaahi tūkunga fefonongaʻakí, mo e ngaahi taʻe-femahinoʻaki ʻi he tuʻunga fakatakimuʻá ke fefakaangaʻaki mo fekeʻikeʻi ai ʻa e kulupú. Hili ʻenau aʻu ki ʻapí, naʻe kei ʻi ai pē ha fefusiaki ʻiate kinautolu (vakai, Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 145–46, 148–49). ʻI he tali ki heʻenau ʻausiá, naʻe foaki ai ʻe he ʻEikí ʻa e fakahā ʻoku ʻiloa ko e Tokāteline mo e Ngaahi Fuakava 64.

Lau ʻa e Tokāteline mo e Ngaahi Fuakava 64:1–7, ʻo kumi e tali ʻa Sīsū Kalaisi kiate kinautolu kuo faiangahalá.

Fakakaukau ke fakaʻaliʻali ha laʻitā ʻo e Fakamoʻuí. Kole ki he kau akó ke nau fakalaulauloto ki he ngaahi fehuʻi ko ʻení. Hili iá, fakaafeʻi ʻa e kau akó ke vahevahe ʻenau ngaahi fakakaukaú mo e kalasí, pe ko hanau hoa.

• Ko e hā ha ngaahi ʻulungaanga ʻo Sīsū Kalaisi ʻokú ke maʻu ʻi he ngaahi veesi ko ʻení?

• Ko e fē ʻi he ngaahi ʻulungaanga ko ʻení ʻokú ke houngaʻia lahi taha aí? Ko e hā hono ʻuhingá?

ʻOku fiemaʻu ke tau fakamolemoleʻi

Lau ʻa e Tokāteline mo e Ngaahi Fuakava 64:9–11, ʻo kumi ʻa e founga ʻoku fakaafeʻi ai kitautolu ʻe Sīsū Kalaisi ke muimui ʻi Heʻene sīpingá.

Ko e Tokāteline mo e Ngaahi Fuakava 64:9–11 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.

• Ko e hā ʻoku makehe kiate koe fekauʻaki mo e meʻa naʻe akoʻi ʻe he Fakamoʻuí kia Siosefa mo e niʻihi kehé?

  Tokoni ke ʻiloʻi ʻe he kau akó ʻa e foʻi moʻoni ko ia ʻoku finangalo ʻa Sīsū Kalaisi ke tau fakamolemoleʻi ʻa e kakai kotoa pē. Fakakaukau ke hiki ʻa e moʻoni ko ení ʻi he palakipoé. Te ke lava foki ʻo fakaafeʻi ʻa e kau akó ke hiki ia ʻi heʻenau folofolá.

  Fakaʻaongaʻi ha taimi feʻunga ke tokoni ke mahino ki he kau akó ʻa e veesi 9–11. ʻE lava ke tokoni ha niʻihi ʻo e ngaahi fehuʻi ko ʻení.

• ʻOkú ke pehē ko e hā ʻoku finangalo ai ʻa Sīsū Kalaisi ke tau fakamolemoleʻi ʻa e tokotaha kotoa peé?

• ʻOkú ke pehē ko e hā ʻoku tau fakahoko ai ʻa e “angahala lahi angé” (veesi 9) ʻi he taimi ʻoku tau fili ai ke ʻoua ʻe fakamolemoleʻi ʻa e niʻihi kehé?

• ʻOkú ke pehē ʻe tokoni fēfē nai ʻa e pehē ʻi hotau lotó ke “tuku ke fakamaau ʻe he ʻOtuá ʻi hoku vahaʻa mo koé” (veesi 11) ke tau fakamolemoleʻi ʻa e niʻihi kehé?

• Ko e hā ha ngaahi ʻulungaanga faka-Kalaisi ʻe tokoni hono fakamolemoleʻi ʻo e niʻihi kehé ke ke fakatupulakí?

Ko e ako e founga ke fakamolemoleʻi ʻa e niʻihi kehé

Fakakaukau ke ʻoange ha taimi maʻá e kau akó ke nau fai ha ngaahi fehuʻi pe vahevahe ha ngaahi pole fekauʻaki mo e fakamolemoleʻí. ʻE lava ke tali ʻe he kau akó ʻa e ngaahi fehuʻi ko ʻení ʻi he palakipoé, ʻo fakafou ʻi ha founga tānaki fakamatala ʻoku ʻikai fakahaaʻi ai ʻa e hingoá, pe ʻi ha ngaahi laʻipepa ʻe lava ke vahevahe mo e kalasí.

• Ko e hā ha ngaahi fehuʻi ʻe ala maʻu ʻe he kakaí ʻi heʻenau feinga ke fakamolemoleʻi ʻa e niʻihi kehé?

• Ko e hā ha ngaahi faingataʻa ʻe ala fehangahangai mo e kakaí ʻi heʻenau feinga ke muimui ki he sīpinga ʻa e Fakamoʻuí ke fakamolemoleʻí?

ʻE lava ke ʻeke ʻe he kau akó ha ngaahi fehuʻi hangē ko e “ʻE lava fēfē nai ke tokoniʻi au ʻe he Fakamoʻuí ke u fakamolemoleʻi ʻa e niʻihi kehé?” pe “ʻOku ʻuhinga nai hono fakamolemoleʻi ʻo e niʻihi kehé ʻoku fiemaʻu ke u toe mamahi pē?”

Fakaafeʻi ʻa e kau akó ke fili ha fehuʻi fakakalasi pe fakafoʻituitui. Hili iá pea ʻai ke nau fekumi ki ha ngaahi tali ʻi he ngaahi maʻuʻanga tokoni kuo fokotuʻu fakalangí.

ʻE lava ke maʻu ʻe he kau akó ha ngaahi tali ʻaki ʻenau fekumi ʻaki ha ngaahi lea hangē ko e “Sīsū,” “fakamolemolé,” “Fakamoʻuí,” mo e “ʻaloʻofá” ʻi he polokalama Gospel Library pe ko e Fakahinohino ki he Ngaahi Folofolá. Te ke lava foki ʻo ʻomi ha ngaahi potufolofola, hangē ko e Mātiu 5:7; 18:21–35; mo e Mōsaia 26:30–31, mo e ngaahi fakamatala fakaepalōfita ʻoku hiki atu ʻi laló.

Naʻe akoʻi ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻe lava ke tokoniʻi ai kitautolu ʻe Sīsū Kalaisi ke fakamolemoleʻi ʻa e niʻihi kehé:

ʻI he taimi ʻe niʻihi ʻoku hanga ʻe heʻetau loto ke fakamolemoleʻi ha tahá ʻo fakatou ʻai kinautolu mo kitautolu ke tau tui te tau lava ʻo fakatomala pea mo fakamolemoleʻi. Ko e taimi ʻe niʻihi ʻoku hoko taimi kehekehe mai ʻa e loto ke fakatomalá mo e malava ke fakamolemoleʻí. Ko hotau Fakamoʻuí ʻa hotau Fakalaloa ki he ʻOtuá, ka ʻokú Ne toe tokoni foki ke tau ʻiloʻi hotau tuʻunga taʻengatá mo fakamālohia hotau vā fetuʻutaki mo e niʻihi kehé ʻi heʻetau haʻu kiate Iá. Tautautefito ki he taimi ʻoku tau loto-mamahi mo kafo aí, ʻoku faingataʻa leva hano fakaleleiʻi hotau ngaahi vā fetuʻutakí mo hotau lotó, pea mahalo he ʻikai ke tau lava ʻiate kitautolu pē. Ka ʻe lava ʻo foaki mai ha ivi mo ha poto mei langi ʻoku mahulu ange ʻi haʻatautolú, ke ʻilo ʻa e taimi ke kātekina aí mo e founga ke tukuange aí. (Gerrit W. Gong, “Fiefia Taʻengatá,” Liahona, Nōvema 2022, 85)

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻe akoʻi ʻe Kalaisi ʻi he kuonga ʻo e Fuakava Foʻoú “Mou fakamolemole, pea ʻe fakamolemolea ʻakimoutolu” [Luke 6:37]. Pea ʻi hotau kuongá: “Ko au, ko e ʻEikí, te u fakamolemoleʻi ʻa ia ʻoku ou loto ke fakamolemoleʻí, ka ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē” [Tokāteline mo e Ngaahi Fuakava 64:10]. Ka neongo ia, ʻoku mahuʻinga ke fakatokangaʻi ʻe hamou niʻihi ʻoku fuʻu moʻui loto mamahí ʻa e meʻa naʻe ʻikai ke Ne folofola ʻakí. Naʻe ʻikai ke Ne pehē, “ʻOku ʻikai ngofua ke mou ongoʻi ʻa e mamahi moʻoní pe loto-mamahi moʻoní, ʻi he ngaahi aʻusia fakamamahi mei he nima ʻo ha taha.” Pe naʻá Ne pehē, “Koeʻuhí ke fakamolemoleʻi kakato kimoutolú, kuo pau ke mou toe foki ki ha ngaahi tūkunga ʻoku ʻikai lelei pe tuʻunga ngaohikovia, pe maumau.” Kae naʻa mo e ngaahi maumau-fono kovi taha ʻe ala hokó, te tau toki lava pē ʻo hao hake mei heʻetau mamahí ʻi ha taimi te tau fokotuʻu ai hotau vaʻé ʻi he hala ki he fakamoʻui moʻoní. Ko e halá ko e fakamolemole ʻa ia naʻe foua ʻe Sīsū ʻo Nāsaletí, ʻa ia ʻokú Ne ui mai kiate kitautolu takitaha, “Haʻu, ʻo muimui ʻiate au” [Luke 18:22]. (Jeffrey R. Holland, “Ko e Ngāue ʻo e Fakaleleí,” Liahona, Nōvema 2018, 78–79)

Fakakaukau ke fakaafeʻi ʻa e kau akó ke vahevahe ha ngaahi tali ʻoku nau maʻu pe ngaahi ongo ʻoku nau ongoʻi fekauʻaki mo e fakamolemolé. Te nau lava foki ʻo vahevahe ha ngaahi sīpinga ʻo e founga kuo tāpuekina ai kinautolu ʻi heʻenau muimui ki he sīpinga ʻa e Fakamoʻuí ke fakamolemoleʻi ʻa e niʻihi kehé. Fakamanatu ki he kau akó ke ʻoua ʻe vahevahe ha ngaahi aʻusia pe fakaikiiki ʻoku fuʻu fakataautaha.

• Ko e hā ha ngaahi ngāue pau te tau lava ʻo fai ʻe tokoni ke tau fakamolemoleʻi ʻa e niʻihi kehé?

ʻOku kau ʻi he ngaahi tali ʻe lava ke vahevahe ʻe he kau akó ʻa e ngaahi meʻá ni:

• Ako ʻa e ngaahi talanoa ʻo e fakamolemole ʻa e Fakamoʻuí mo e niʻihi kehé

• Fakalaulauloto ki he founga naʻe mei kehe ai ʻetau moʻuí kapau naʻa tau fakahaaʻi ha fakamolemole

• Fakahoko ha lotu fakamātoato ʻa ia ʻoku tau tekaki ai ki he ʻOtuá hotau mafasiá mo kolea ʻEne tokoní ke fakamolemoleʻi ʻa e niʻihi kehé

• Fakahaaʻi ʻoku fakafou ʻia Sīsū Kalaisi ʻa e lava ke liliu hotau lotó ʻi he fakalau atu ʻa e taimí kae lava ke tau fakamolemoleʻi ʻa e niʻihi kehé

Fakaʻaongaʻi fakatāutahá

ʻI he konga kimuʻa ʻo e lēsoní, naʻe fakaafeʻi ʻa e kau akó ke nau fakakaukau ki ha taha ʻoku fiemaʻu ke nau fakamolemoleʻi. Fakaafeʻi kinautolu ke fakakaukau ki he tūkunga ko iá pea fekumi ki ha ueʻi fakalaumālie ʻi heʻenau tali ʻa e ongo fehuʻi ko ʻení.

Fakalaulauloto ki he ongo fehuʻi ko ʻení, pea fakakaukau ke tohi hoʻo ngaahi fakakaukaú pe ongó ʻi hoʻo tohinoa akó.

• Ko e hā te ke lava ʻo fai ke falala ki he Fakamoʻuí ke fakamolemolé?

• Ko e hā ha ngaahi ngāue te ke fai ke muimui ai ki he sīpinga ʻa Sīsū Kalaisí pea hoko ʻo faʻa fakamolemole ange?

Ako Ma‘uloto

Mahalo te ke fie tokoni ki he kau akó ke ako maʻuloto ʻa e fakamoʻoni fakafolofola ki he fakataukei fakatokāteliné mo e kupuʻi lea mahuʻinga ʻo e potufolofolá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea folofola mahuʻingá ko e “ʻOku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahí ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Tokāteline mo e Ngaahi Fuakava 64:9–11. ʻOku tokoniʻi fēfē nai au ʻe he fakamolemoleʻi ʻo e niʻihi kehé ke u hangē ko Sīsū Kalaisí?

Naʻe akonaki ʻa Palesiteni Lāsolo M. Nalesoni ʻo pehē:

ʻE lava pē ke fuʻu mātuʻaki faingataʻa ke tukuange ʻa e loto-ʻita ʻoku ongoʻi tonuhia ʻaupitó. ʻE lava pē ke ngali taʻe-malava ke fakamolemoleʻi ʻa kinautolu naʻe fakalaveaʻi ʻe heʻenau ngaahi ngāue fakaʻauhá ʻa e niʻihi ʻoku tonuhiá. Ka neongo iá, naʻe faleʻi kitautolu ʻe he Fakamoʻuí ke tau “fakamolemoleʻi ʻa e kakai kotoa pē” [Tokāteline mo e Ngaahi Fuakava 64:10; vakai foki, veesi 9].

Ko e kau muimui kitautolu ʻo e Pilinisi ʻo e Melinó. ʻOku tau fiemaʻu ʻi he taimí ni ʻo lahi ange ʻi ha toe taimi, ʻa e melino ko Ia toko taha pē te Ne lava ʻo ʻomí. ʻE lava fēfē nai ke tau ʻamanaki ki ha melino ʻi he māmaní, ka ʻoku ʻikai ke tau feinga fakafoʻituitui kitautolu ke maʻu ʻa e melinó mo e maʻumaʻulutá? Kāinga, ʻoku ou ʻiloʻi pē ʻoku ʻikai ke faingofua ʻa e meʻa ʻoku ou fokotuʻu atú. Ka ʻoku totonu ke fokotuʻu ʻe he kau muimui ʻo Sīsū Kalaisí ʻa e sīpinga ke muimui kotoa ki ai ʻa e māmaní. ʻOku ou kōlenga atu ke mou fai ʻa e meʻa kotoa ʻe malavá ke fakangata ai ʻa e ngaahi fekeʻikeʻi fakataautaha ʻoku lolotonga hoko ʻi homou lotó mo hoʻomou moʻuí. (Russell M. Nelson, “Ko e Mālohi ʻo e Ivi Fakalaumālié,” Liahona, Mē 2022, 97)

Tokāteline mo e Ngaahi Fuakava 64:9. ʻE tokoniʻi fēfē nai au ʻe he Fakamoʻuí ke u hoko ko ha tokotaha faʻa fakamolemole ange?

Naʻe pehē ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku siʻi ange ʻetau liʻekiná ʻi he taimi ʻoku tau ʻilo ai ʻoku ʻikai ke tau tuenoá. ʻOku mahino maʻu pē ki hotau Fakamoʻuí. Te tau lava ʻi he tokoni ʻa hotau Fakamoʻuí ke tukulolo ʻetau hīkisiá, loto-mamahí, mo ʻetau angahalá ki he ʻOtuá. Ka neongo iá ʻe lava ke tau ongoʻi ʻi heʻetau kamatá, ʻoku fakaʻau ke tau haohaoa ange ʻi heʻetau falala kiate Ia ke fakaleleiʻi hotau ngaahi vaá.

Ko e ʻEikí ʻokú Ne ʻafioʻi mo mahino lelei ki aí, ʻokú Ne fakamolemoleʻi ʻa ia te Ne loto ke fakamolemoleʻí; ka ko kitautolu (ʻi heʻetau tōnounoú) ʻoku fiemaʻu ke tau fakamolemoleʻi e taha kotoa. ʻI heʻetau haʻu ki hotau Fakamoʻuí, ʻoku siʻi ange ʻetau tokanga pē kiate kitautolú. ʻOku siʻi ange ʻetau fakamāú mo faʻa fakamolemole lahi ange. ʻE lava ʻe he falala ki Heʻene ngaahi ngāue māʻoniʻoní, ʻaloʻofá mo e manavaʻofá [vakai, 2 Nīfai 2:8] ʻo fakatauʻātainaʻi kitautolu mei he fekeʻikeʻí, ʻitá, ngaohikoviá, liʻekiná, filifili-mānakó, mo e ngaahi faingataʻa fakatuʻasino mo fakaʻatamai ʻoku hoko ʻi he taimi ʻe niʻihi ʻi ha sino fakatuʻasino ʻi ha māmani fakamatelié. ʻOku ʻikai ʻuhinga ʻa e fiefia taʻengatá ia ko e vā fetuʻutaki kotoa pē ʻe fiefia taʻengata. Ka ʻe ala foaki mai ʻe he nofotuʻi ʻi he taʻu ʻe afé ʻi he taimi ʻe haʻi ai ʻa Sētané ʻa e taimi ʻoku tau fiemaʻú mo ha ngaahi founga fakaofo ke ʻofa, mahino, mo fakaleleiʻi ha ngaahi meʻa ʻi heʻetau teuteu ki he nofo taʻengatá. (Gerrit W. Gong, “Fiefia Taʻengatá,” Liahona, Nōvema 2022, 85)

Tokāteline mo e Ngaahi Fuakava 64:9. Ko e hā ha ngaahi tāpuaki ʻo hono fakamolemoleʻi ʻo e niʻihi kehé?

Naʻe pehē ʻe ʻEletā Kēvini R. Tanikeni ʻo e Kau Fitungofulú:

Kae fakamālō kuo hanga ʻe he ʻOtuá ʻi Heʻene ʻofá mo e ʻaloʻofá ʻo teuteuʻi ha hala ke tau fou ai ʻi he ngaahi taimi faingataʻa ko ʻeni ʻo e moʻuí. Kuó Ne ʻomi ha founga ke hao kotoa ai ʻa kinautolu kuo uesia ʻe he ngāue kovi ʻa e niʻihi kehé. Kuó Ne akoʻi mai ʻe lava ke tau fakamolemoleʻi! Neongo te tau ala hoko ko ha tokotaha mamahi ʻi heʻene fuofua hoko maí, ka ʻoku ʻikai fiemaʻu ia ke tau toe hoko ko ha tokotaha mamahi tuʻo ua ʻi hono fuesia ʻa e kavenga ʻo e tāufehiʻá, ʻitá, mamahí, fakafisifisí, pea mo e sāuní. ʻE lava ke tau fakamolemoleʻi, pea lava ke tau tauʻatāina! (Kevin R. Duncan, “Ko e Faitoʻo Faifakamoʻui ʻo e Fakamolemolé,” Liahona, Mē 2016, 33)

Tokāteline mo e Ngaahi Fuakava 64:10. Ko hai ʻoku fiemaʻu ke u fakamolemoleʻí?

Naʻe fakamatala ʻa Palesiteni Tieta F. ʻUkitofa, ʻi heʻene hoko ko ha mēmipa ʻo e Kau Palesitenisī ʻUluakí ʻi he taimi ko iá ʻo pehē:

Kuo folofola mahino mai hotau Fakamoʻuí ʻi he kaveingá ni ʻoku ʻikai ha ʻuhinga lelei ia ki heʻetau fakaʻuhinga fakatāutahá. “Ko au, ko e ʻEikí, te u fakamolemoleʻi ʻa ia ʻoku ou loto ke fakamolemoleʻí,” ka naʻá Ne folofola, “… ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē” (Tokāteline mo e Ngaahi Fuakava 64:10; tānaki atu hono fakamamafaʻí].

Ke u toe kiʻi fakamahino atu muʻa? ʻI he taimi ʻoku fiemaʻu ai ʻe he ʻEikí ke tau fakamolemoleʻi e kakai kotoa peé, ʻoku kau ai ʻetau fakamolemoleʻi foki mo kitautolú. Taimi ʻe niʻihi, neongo ʻa e kakai kotoa ʻi he māmaní, ka ko e tokotaha ʻoku faingataʻa taha ke fakamolemoleʻí—pea mahalo ko e tokotaha ia ʻokú ne fiemaʻu taha ʻetau fakamolemolé—ʻa e tokotaha ko ia ʻoku sio atu kiate koe mei he sioʻatá. (Dieter F. Uchtdorf, “ʻOku Maʻu ʻa e ʻAloʻofá ʻe he Kau Manavaʻofá,” Liahona, Mē 2012, 75)

Ngaahi ʻEkitivitī Fakalahi ki he Akó

Ngaahi talanoa ʻo e faʻa fakamolemolé

Fakakaukau ke vahevahe ha talanoa ʻe taha pe lahi ange mei he ngaahi talanoá ni lolotonga e lēsoní. Te ke lava ʻo vahevahe ha talanoa ʻe taha ʻi he kamataʻanga ʻo e lēsoní pea fakaafeʻi ʻa e kau akó ke nau fakakaukau ki heʻenau fiemaʻu ke fakamolemoleʻi ʻa e niʻihi kehé. Pe vahevahe ha taha ʻo e ngaahi talanoá ko ha founga ke tali ʻaki ʻa e ngaahi fehuʻi pe ngaahi hohaʻa ʻa e kau akó. Te ke lava ʻo kole ki he kau akó ke nau feinga ke ʻiloʻi ʻa e ngaahi faingataʻa naʻe fehangahangai mo e kakai ko ʻení ʻi heʻenau fakamolemoleʻi ʻa e niʻihi kehé mo e founga naʻe tokoniʻi ai kinautolu ʻe he Fakamoʻuí.

Ko e “Required to Forgive” (7:52) ko e talanoa ia ʻo hono fakamolemoleʻi ʻe Siosefa Sāmita ʻa Uiliami W. Felipisí.

Ko e “We Must Forgive” (2:43) ko e talanoa ia ʻo Koli Teni Pumi, ko ha tokotaha naʻe hao moʻui mei he Fakapō Fakatokolahí, ʻa ia naʻe fetaulaki mo ha tangata leʻo mei he ʻapitanga ʻo e kau Nasí, naʻe tuku pōpula ai iá. Naʻe vahevahe ʻa e talanoa ko ʻení ʻe Pīsope Kiifi B. Makamōleni, ko ha mēmipa mālōlō ʻo e Kau Pīsopeliki Pulé.

ʻI he lea ʻa Palesiteni Sēmisi E. Fausi (1920–2007) ʻo e Kau Palesitenisī ʻUluakí “The Healing Power of Forgiveness,” mei he taimi 0:00 ki he 6:03, naʻá ne vahevahe e tali ʻa e kakai ʻĀmisí hili ha fana ʻi ha ʻapiako ʻi honau koló.

ʻI he lea ʻa ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ko e “Fiefia Taʻengatá,” mei he taimi 2:45 ki he 4:22, naʻá ne vahevahe ai ʻa e talanoa ʻo ha fefine naʻá ne fakamolemoleʻi ʻene tamaí mo fakakakato ʻene ngāue fakatemipalé.

Ngaahi maʻuhala mo e ngaahi tokoni ki hono fakamolemoleʻi ʻo e niʻihi kehé

ʻE lava ke tokoni ʻa e fakamatala “Forgiving Others: Misconceptions and Tips” ke maʻu ʻe he kau akó ʻa e tali ki heʻenau ngaahi fehuʻí mo e ngaahi meʻa ʻoku nau hohaʻa ki aí (Elizabeth Lloyd Lund, Ensign, Apr. 2018, 18–21).

Ako fekauʻaki mo e fakamolemolé mei he ngaahi ʻulungaanga mo e sīpinga ʻa e Fakamoʻuí

Ke tokoni ke ʻilo lahi ange ʻa e kau akó fekauʻaki mo e ʻulungaanga faka-Kalaisi ʻo e fakamolemolé, fakaafeʻi kinautolu ke nau fekumi ʻi he ngaahi fakamatala ko ʻeni ʻo hono fakamolemoleʻi ʻe he Fakamoʻuí ʻa e niʻihi kehé. ʻE lava ke vahevahe ʻe he kau akó ha ngaahi founga te nau ala muimui ai ki he sīpinga ʻa e Fakamoʻuí ʻi heʻenau feinga ke faʻa fakamolemolé.

• Luke 7:36–50

• Luke 23:33–34

• Sione 8:1–11

ʻE lava foki ke lau ʻe he kau akó ʻa e ngaahi potufolofola ko ʻení pea feinga ke ʻiloʻi ha ngaahi ʻulungaanga ʻo Sīsū Kalaisi ʻe lava ʻo tokoni ke nau faʻa fakamolemole ange.

• Maika 7:18–20

• Tokāteline mo e Ngaahi Fuakava 4:5–6