Lēsoni 78: Tokāteline mo e Ngaahi Fuakava 64–66

Tokāteline mo e Ngaahi Fuakava 64:20–43

“ʻOku Fiemaʻu ʻe he ʻEikí ʻa e Loto mo e ʻAtamai Fie Faí”

ʻI he feinga ʻa e fuofua Kāingalotú ke fokotuʻu ʻa Saioné, naʻe kole ange ʻe Sīsū Kalaisi ke nau feilaulau mo tokoni ʻi ha ngaahi founga kehekehe. ʻI he hokohoko atu ʻetau feinga ke muimui kia Sīsū Kalaisí, ʻokú Ne kole mai ke tau foaki kiate Ia hotau lotó mo e ʻatamai fie faí. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke foaki ki he ʻEikí honau lotó mo e ʻatamai fie faí.

Ngaahi ʻEkitivitī Ako ʻOku Ala Fakahokó

Ngaahi koloa fakatāutahá

Te ke lava ʻo kamata ʻa e kalasí ʻaki haʻo kole ki he kau akó ke nau fakakaukau ki ha ngaahi koloa fakataautaha ʻoku nau pehē ʻoku mahuʻinga. Fakakaukau ke ʻoange ha ngaahi fehuʻi ʻe lava ke tokoni ki ha fevahevaheʻaki mo e kalasí pe ʻi ha fanga kiʻi kulupu iiki. Hangē ko ʻení:

• Ko e hā ha meʻa ʻokú ke maʻu naʻá ke ngāue mālohi ke maʻu?

• Ko e hā ha meʻa ʻokú ke maʻu ʻe faingataʻa ke ke foaki ki ha taha kehe? Ko e hā ka faingataʻa aí?

Ko e faama ʻa ʻAisake Moalií

Te ke lava ʻo fakaʻaliʻali ʻa e fakatātā ʻi he kamataʻanga ʻo e lēsoni ko ʻení pea fakaafeʻi ha tokotaha ako ke ne lau leʻolahi ʻa e fakamatala ko ʻení.

Naʻe ngāue mālohi ʻa ʻAisake mo Lusi Moalī ke langa ha faama lahi ʻeka ʻe 80 naʻe ofi ki Ketilani, ʻOhaiō. Naʻá na fakaafeʻi ʻa e kakaí ke nau nofo ʻi hona ʻapí, vahevahe ʻena koloá, pea faitatau ʻa e meʻa kotoa pē mo e niʻihi kehé, ko ha konga ʻo ʻena tui fakalotú. ʻI he taimi naʻe tuʻu atu ai ʻa e kau faifekau ʻo e Siasí ʻi Ketilaní, naʻa nau malangaʻi ʻa e pōpoaki ʻo hono Fakafoki Mai ʻo e Ongoongoleleí kiate kinautolu naʻe nofo ʻi he faama Moalií. Naʻe kau ʻiate kinautolu naʻe uluí ʻa ʻAisake mo Lusi Moalī. Hili pē ha taimi nounou mei heʻena papitaisó, naʻe talitali lelei ʻe he fāmili Moalií ʻa Siosefa mo ʻEma Sāmita ke nofo ʻi heʻena fāmá. (Vakai, Susan Easton Black, Who’s Who in the Doctrine and Covenants [1997], 198.)

Lau ʻa e Tokāteline mo e Ngaahi Fuakava 64:20, pea kumi e ngaahi fakahinohino ʻa e ʻEikí kia ʻAisake Moalií.

• ʻOkú ke pehē naʻe mei fēfē nai hoʻo fakafeangaí kapau naʻá ke ʻi he tūkunga ʻo ʻAisaké? Ko e hā hono ʻuhingá?

• ʻE tokoniʻi fēfē nai koe ke ke talangofua ʻi hoʻo ʻiloʻi naʻe haʻu ʻa e kolé mei he Fakamoʻuí?

Fakamatalaʻi ange naʻe kole kia ʻAisake kimuʻa ke fakatau atu ʻene fāmá pea ʻikai ke ne tali. Ka ʻi hono maʻu ʻo e fakahā ko ʻení, naʻe talangofua ʻa ʻAisake ʻo fakatau atu ʻene fāmá, foaki ʻa e paʻangá ki he Siasí, pea hiki mo hono fāmilí ki Mīsuli ke tokoni ki hono langa hake ʻo Saioné. Te ke lava foki ʻo fakamahinoʻi ange naʻe fakahā ki ha kau tangata kehe ʻi he fakahā ko ʻení ke ʻoua te nau fakatau atu ʻenau koloá (vakai, Tokāteline mo e Ngaahi Fuakava 64:21, 26). Naʻe fakatapui ʻe he kau tangatá ni ʻenau koloá ki he ʻEikí ʻaki hono fakaʻaongaʻi kinautolu ke poupouʻi ʻa e Siasí mo e Kāingalotu ʻi Ketilaní. ʻE lava ke hoko ʻeni ko ha feituʻu lelei ke fakamanatu ki he kau akó ʻa e ngaahi moʻoni ne nau ako fekauʻaki mo e Fakamoʻuí mo e fono ʻo e fakatapuí ʻi he Tokāteline mo e Ngaahi Fuakava 42:29–39.

ʻOku fiemaʻu ʻe he ʻEikí ʻa e loto mo e ʻatamai fie faí

Fakamatalaʻi ange neongo he ʻikai fiemaʻu ʻe he ʻEikí ke tau fakatau atu ʻetau koloá, ka ʻoku ʻi ai ha ngaahi meʻa ʻokú Ne kole mai ʻi heʻetau feinga ke muimui kiate Iá.

Lau ʻa e Tokāteline mo e Ngaahi Fuakava 64:22, 34. Kumi ha ngaahi meʻa ʻoku fiemaʻu ʻe he ʻEikí meiate kitautolu.

• Ko e hā naʻá ke maʻú?

Tokoni ke ʻiloʻi ʻe he kau akó ʻoku finangalo ʻa e ʻEikí ke tau foaki kiate Ia hotau lotó mo e ʻatamai fie faí.

Fakakaukau ki ha ngaahi founga ke tokoni ke mahino lelei ange ai ki hoʻo kau akó ʻa e ʻuhinga ke foaki ki he ʻEikí hotau lotó mo e ʻatamai fie faí. Ko ha founga ʻe taha ko hono fakaafeʻi e kau akó ke nau fakakaukauloto naʻe kole ange ke nau tokoni ʻi hono hiki ha lēsoni Haʻu, ʻo Muimui ʻIate Au ki he Tokāteline mo e Ngaahi Fuakava 64. ʻE lava ke ako ʻe he kau akó ʻiate kinautolu pē pe ʻi ha fanga kiʻi kulupu iiki, ʻa e ngaahi potufolofola ko ʻení pe ko ha ngaahi potufolofola ʻanautolu pē, pea hiki leva ha fakamatala ʻo e ʻuhinga ke foaki ki he ʻEikí hotau lotó mo ha ʻatamai fie faí. Fakaʻatā ke nau vahevahe mo aleaʻi ʻa e meʻa naʻa nau tohí.

Poupouʻi ʻa e kau akó ke fekumi ki ha fakahā fakataautaha ke ʻiloʻi ʻa e founga te nau lava ai ʻo foaki fakataautaha ki he ʻEikí honau lotó mo ha ʻatamai fie faí.

Lau ʻa e ngaahi potufolofola ko ʻení pea kumi ki ha ngaahi fakakaukau ʻe lava ʻo tokoni ke mahino kiate koe ʻa e ʻuhinga ke foaki ki he ʻEikí hotau lotó mo ha ʻatamai fie faí. ʻE lava ke ke hiki ha fakamatala ʻi hoʻo tohinoa akó.

Ngaahi Akonaki ʻi he Folofolá

• Lea Fakatātā 3:5–6

• Mātiu 22:36–39

• Mōsaia 3:19

• Tokāteline mo e Ngaahi Fuakava 20:77, 79

Ngaahi Sīpinga mei he Moʻui ʻa e Fakamoʻuí

• Sione 6:38

• Luke 22:42

• 3 Nīfai 27:13–14

• Tokāteline mo e Ngaahi Fuakava 19:24

• ʻOku hoko fēfē nai ʻa Sīsū Kalaisi ko ha sīpinga lelei ʻo hono foaki Hono lotó mo e ʻatamai fie faí ki he Tamai Hēvaní?

• ʻI hoʻo feinga ke muimui kia Sīsū Kalaisí, kuo liliu fēfē nai hoʻo moʻuí ʻi hoʻo foaki kiate Ia ho lotó mo ha ʻatamai fie faí?

Mahalo te ke fie tuku ha taimi ke tokoni ke mahino ki he kau akó ʻoku ʻi ai ha faikehekehe ʻi hono fakahoko pē ʻo e meʻa ʻoku kole ʻe he ʻEikí meiate kitautolú mo e talangofua kiate Ia ʻaki hotau lotó mo e ʻatamai fie faí.

Fakakaukau ke fakaafeʻi ʻa e kau akó ke hiki ʻi he palakipoé ha ngaahi fekau ʻoku kole mai ʻe he ʻEikí ke tau tauhi pe ngaahi feilaulau te Ne ala kole mai ke tau fakahoko. Kole ki he kau akó ke nau aleaʻi tautau toko ua pe fakakulupu iiki ʻa e founga te tau foaki ai ki he ʻEikí hotau lotó mo e ʻatamai fie faí ʻi heʻetau fakahoko ʻa e ngaahi meʻa ko ʻení. Hangē ko ʻení, ʻe lava ke nau aleaʻi ʻa e founga te tau lava ai ʻo foaki ki he ʻEikí hotau lotó mo e ʻatamai fie faí ʻi heʻetau fāifeinga ke tauhi ʻa e ʻaho Sāpaté ke māʻoniʻoní.

Fakakaukau fakatāutahá

Kapau kuó ke fili ke hiki ha ngaahi fekau pe feilaulau ʻi he palakipoé, fakaafeʻi ʻa e kau akó ke nau sio ki he lisí pea fakakaukau ki heʻenau loto-fiemālie ke fakahoko ʻa e ngaahi meʻa ko ʻení. Fakakaukau ke fakahinohinoʻi e kau akó ke tā ha foʻi haati mo ha ʻatamai ʻi heʻenau tohinoa akó. Te ke lava ʻo fakaʻaliʻali ʻa e fakatātā ʻi laló ko ha sīpinga. Fakaafeʻi kinautolu ke fakakaukau ki he lahi ʻo honau lotó mo e ʻatamaí ʻoku foaki ki he Fakamoʻuí pea valivali ʻa e lahi ʻo e meʻa ʻoku nau ongoʻi ʻoku nau foaki kiate Iá. Hili iá, te ke lava ʻo fakaafeʻi kinautolu ke nau fakalaulauloto pea hiki ʻenau tali ki he ongo fehuʻi ko ʻení.

• Ko e hā kuó ke ako ʻi he ʻahó ni te ne lava ʻo fakatupulaki hoʻo holi ke foaki ki he ʻEikí ho lotó mo ha ʻatamai fie faí?

• ʻOkú ke pehē ʻe tokoniʻi fēfē nai koe ʻi hoʻo foaki ho lotó mo e ʻatamaí ki he Fakamoʻuí ke ke hoko ʻo hangē ange ko Iá?

Fakakaukau ke fakaafeʻi e kau akó ke vahevahe mo e kalasí ʻa e meʻa kuo nau ongoʻi mo akó. Te ke lava foki ʻo fakahoko hoʻo fakamoʻoní pe vahevahe ha aʻusia ʻo ha taimi naʻá ke mamata ai ki ha taha ʻokú ne foaki ki he ʻEikí hono lotó mo ha ʻatamai fie fai.

Ngaahi Maʻuʻanga Tokoni Kehé

Tokāteline mo e Ngaahi Fuakava 64:23–25. ʻOku ʻuhinga ki he hā ʻa e “ngāue lolotonga ʻoku kei ui ʻa e taimí ko e ʻahó ni”?

Naʻe fakaʻaongaʻi ʻe he ʻEikí ʻa e foʻi lea ʻaho ní ke ʻuhinga ki he vahaʻataimi naʻe maʻu ai ʻa e Tokāteline mo e Ngaahi Fuakava 64 ʻo aʻu ki he Hāʻele ʻAnga Ua Maí (vakai, Tokāteline mo e Ngaahi Fuakava 64:23). Mei he ʻafio mai ʻa e ʻEikí, ʻoku ʻuhinga ʻa e ʻaho ní ki he “moʻuí ni,” ʻa e taimi ʻoku fiemaʻu ai ʻa e fānau ʻa e ʻOtuá ke “fai … ʻenau ngaahi ngāué” pea “teuteu ai ke feʻiloaki mo e ʻOtuá” (ʻAlamā 34:32; vakai foki, ʻAlamā 34:31, 33–35). ʻI he Tokāteline mo e Ngaahi Fuakava 64:24, ʻoku ʻuhinga ʻa e foʻi lea ʻapongipongí ki he fakaʻauha ʻo e kau faiangahalá ʻi he Hāʻele ʻAnga Ua Mai ʻa Sīsū Kalaisí.

Tokāteline mo e Ngaahi Fuakava 64:23. Ko e hā ʻa e vahehongofulu ʻoku ʻuhinga ki ai ʻa e ʻEikí?

Makehe mei heʻene ʻuhinga ki ha peseti ʻo e paʻanga hū maí, ʻoku ʻuhinga ʻa e foʻi lea vahehongofulú ʻi he Tokāteline mo e Ngaahi Fuakava 64:23 ki he ngaahi foaki kotoa ʻa e Kāingalotú ki he Siasí, tautautefito ʻi he fono ʻo e fakatapuí. Naʻe talaʻofa e ʻEikí ko kinautolu ko ia ne talangofua ki he ngaahi fono ʻo e feilaulaú mo e fakatapuí te nau hao mei he tutu ko ia ʻe fakaʻauha ai e kau taʻe-fakatomalá ʻi he ʻaho fakaʻosí. Naʻe fakamahinoʻi lahi ange ʻa e mahino ʻoku tau maʻu ki he fono ʻo e vahehongofulú ʻi he 1838, ʻi he taimi naʻe foaki mai ai ʻe he ʻEikí ʻa e fakahā ʻoku lekooti ʻi he Tokāteline mo e Ngaahi Fuakava 119.

Te u lava fēfē nai ʻo foaki ki he ʻEikí hoku lotó mo ha ʻatamai fie faí?

Naʻe akoʻi ʻe ʻEletā Siaosi Kelepingikati ʻo e Kau Fitungofulú:

Ko e Hū Lototoʻa Atu ki he ʻAfioʻanga ʻo e ʻOtuá

Fakahoko foki e meʻa leleí ʻi he ʻuhinga lelei. ʻOku ʻafioʻi ʻe he ʻEikí, ʻa ia ʻokú Ne “fiemaʻu ʻa e loto mo e ʻatamai fie faí” (T&F 64:34) peá Ne “ʻafioʻi ʻa e ngaahi fakakaukau mo e ngaahi holi ʻo e lotó” (T&F 33:1), ʻa e ʻuhinga hoʻo ʻalu ki he lotú, ʻo tatau ai pē pe ko hoʻo maʻulotu pē pe moihū kakato ai.… Manatuʻi kuo teʻeki ai hoko ʻa e fakafiefiemālie ʻi he ngaahi meʻa fakalaumālié ko ha fiefia. Tuku ke hoko e Siasí mo e ongoongolelei kuo fakafoki maí ko hoʻo moʻuí kotoa ia, kae ʻikai ko ha konga pē hoʻo moʻui fakasōsialé. (Jörg Klebingat, “Ko e Hū Lototoʻa Atu ki he ʻAfioʻanga ʻo e ʻOtuá,” Liahona, Nōvema 2014, 36)

Naʻe vahevahe ʻe ʻEletā Tōnolo L. Holositolomu, ko ha mēmipa ʻo e Kau Palesitenisī ‘o e Kau Fitungofulú ʻi he taimi ko iá:

Ko e [mafú] ko e fakataipe ia ʻo e ʻofa mo e tukupā. ʻOku tau fai ha ngaahi feilaulau mo fua e ngaahi kavenga ʻa ha kakai ʻoku tau ʻofa ai, ʻa ia he ʻikai ke tau fakahoko ʻi ha toe ʻuhinga kehe. Kapau ʻoku ʻikai ke ʻi ai ha ʻofa, ʻoku mōlia leva ʻetau tukupaá.

Kapau ʻoku tau ʻofa ki he ʻEikí ʻaki hotau lotó kotoa, ʻoku tau loto fiemālie ke foaki kiate Ia e meʻa kotoa pē ʻoku tau maʻú. …

ʻOku ʻuhinga ʻa e maʻu ha “ʻatamai fie faí” ke fai hotau lelei tahá mo e fakakaukau lelei tahá pea fekumi ki he poto ʻo e ʻOtuá. ʻOkú ne fokotuʻu mai ko e ako līʻoa taha ʻi he kotoa ʻo ʻetau moʻuí ʻoku totonu ke fekauʻaki ia mo e ngaahi meʻa ʻoku natula taʻengatá. ʻOku ʻuhinga ia kuo pau ke ʻi ai ha vā fetuʻutaki faaitaha ʻi he fanongo ki he folofola ʻa e ʻOtuá mo e talangofua ki aí. (Donald L. Hallstrom, “The Heart and a Willing Mind,” Ensign, June 2011, 31–32)

Ke maʻu ha mahino lahi ange ki he founga ʻe lava ke tau foaki ai hotau lotó mo e ʻatamaí ki he ʻEikí, te ke lava ʻo mamata ʻi he “Kotoa Hotau Lotó” naʻe fai ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá mei he taimi 12:25 ki he 13:37.

Kotoa Hotau Lotó

Ngaahi ʻEkitivitī Fakalahi ki he Akó

Ngaahi sīpinga mei he hisitōlia ʻo e Siasí

Fakakaukau ke vahevahe tauhoa ʻa e kau akó. ʻOange ki he tokotaha ako takitaha ʻi he hoá ha talanoa kehe mei he hisitōlia ʻo e Siasí, hangē ko ia ʻoku hiki atu ʻi laló. Fakaafeʻi ʻa e kau akó ke nau lau ʻa e talanoá pea vahevahe ia mo honau hoá fakataha mo ha fakamatala ki he founga ʻoku hoko ai ʻa e niʻihi fakafoʻituitui ko ʻení ko ha sīpinga lelei ʻo hono foaki honau lotó mo e ʻatamaí ki he ʻEikí. ʻE lava leva ke vahevahe ʻe he kau akó ha sīpinga fakataautaha mei heʻenau moʻuí pe mei ha taha ʻoku nau ʻilo.

ʻAisake mo Lusi Moalī

Hili ʻenau hiki ki Mīsulí, naʻe fehangahangai e fāmili ʻo ʻAisake mo Lusi Moalií mo ha fakatanga fakalotu lahi. Naʻá na moʻui ilifia maʻu pē naʻa tutu ʻe he kau fakatangá hona ʻapí. Naʻe toitoi ʻa ʻAisake ʻi ha ngoue koane ʻi ha māhina ʻe taha ke hola mei he kau fakatangá. ʻI he kotoa ʻo e fakatangá, naʻe tuʻu maʻu pē ʻa e ongomātuʻa Moalií ʻi heʻena tuí. ʻI ha taimi ʻe taha, naʻe kau ʻa ʻAisake ʻi he kau tangata ʻe toko ono naʻa nau loto ke foaki ʻenau moʻuí kapau ʻe fakahaofi ʻe he kau fakatangá honau ngaahi kaungāmeʻá. Naʻe tuʻo lahi hono hiki ʻe ʻAisake mo Lusi hona fāmilí, ʻo tokanga maʻu pē ki he lelei ʻa e niʻihi kehe naʻa nau feinga foki ke hao mei he fakatangá. Naʻe faifai pea fononga fakahihifo ʻa ʻAisake mo Lusi mo e Kāingalotú. ʻI he malumalu ʻo e fakahinohino ʻa Pilikihami ʻIongí, naʻa nau tokoni ki he fakanofonofo ʻi Manitai, ʻIutaá. (Vakai, Susan Easton Black, Who’s Who in the Doctrine and Covenants [1997], 199–200.)

ʻEtuate mo Litia Pātilisi

Lolotonga ʻenau fononga mo e Palōfita ko Siosefá, naʻe kole kia ʻEtuate Pātilisi ke nofo ʻi Tauʻatāina, Mīsuli, pea tokoni ke langa hake ʻa Saioné. Naʻe hohaʻa ʻa ʻEtuate naʻe ʻikai ke ne taukei ki he ngāué. Naʻá ne faitohi ki hono uaifi ko Litiá ʻo pehē, “ʻOku ou manavasiʻi ko hoku fatongiá ʻoku māʻolunga ange ia ʻi he meʻa teu lava ʻo fakahoko ke hōifua ʻa ʻeku Tamai Hēvaní. Lotu mai maʻaku ke u lavaʻi ia” (Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 143). Naʻe maʻu ʻe Litia ʻa e tohí pea teuteuʻi hono fāmilí ke nau hiki ki Tauʻatāina ʻo kau fakataha mo hono husepānití. Naʻe ʻikai faʻa tui hona ngaahi kaungāʻapí ʻe tukuange ʻe he fāmili Pātilisí honau ʻapi fakaʻofoʻofá mo e pisinisi leleí. Naʻe ʻiloʻi ʻe Litia ʻe hoko hono liʻaki hono ʻapí ko ha faingataʻa, ka naʻá ne tui ko ha lāngilangi ia ke fokotuʻu ʻa e fakavaʻe ʻo e kolo ʻo e ʻOtuá. (Vakai, Kau Māʻoniʻoní, 1:143–44, 146–47.)

Pe ko hoʻomou mamata mo e kalasí ʻi he “The Heart and a Willing Mind” (7:57) pe “Your Day for a Mission” (3:31). Fakaafeʻi ʻa e kau akó ke kumi ha ngaahi sīpinga ʻo e founga naʻe foaki ai ʻe he niʻihi fakafoʻituituí ki he ʻEikí honau lotó mo e ʻatamai fie faí.

The Heart and a Willing Mind

Your Day for a Mission

Tokāteline mo e Ngaahi Fuakava 64:34. Ko e lotó, ʻatamai fie faí, pea mo hono maʻu ʻo e fakahaá

Kapau ʻe fiemaʻu ʻe hoʻo kau akó ke mahino lelei ange ʻa e founga ke maʻu ai ha fakahā mei he Tamai Hēvaní, te ke lava ʻo tokoniʻi kinautolu ke tā ha ngaahi fehokotaki ʻi he meʻa ʻoku fiemaʻu ʻe he ʻEikí ʻi he Tokāteline mo e Ngaahi Fuakava 64:34 mo e founga ʻoku fetuʻutaki ai ʻa e Tamai Hēvaní mo kitautolú, ʻo hangē ko ia ʻoku akoʻi mai ʻi he Tokāteline mo e Ngaahi Fuakava 8:2–3. Hili hono ako ʻe he kau akó ʻa e ʻuhinga ʻo e foaki ki he ʻEikí honau lotó mo ha ʻatamai fie faí ʻi he vahe 64, te mou lava ʻo aleaʻi ʻa e founga ʻe lava ke tokoniʻi ai kinautolu ʻe he meʻá ni ke nau maʻu fakahaá. Te ke lava ʻo fakaafeʻi ʻa e kau akó ke toe vakaiʻi ʻa e palakalafi 1–3 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023), ko ha konga ʻo e fealēleaʻaki ko ʻení, ʻo kumi ʻa e sīpinga kuo fokotuʻu ʻe he ʻEikí ke tau maʻu ai ha fakahā meiate Iá.

• ʻOku tokoni fēfē nai hoʻo foaki ki he ʻEikí ho lotó mo ha ʻatamai fie faí ke ke maʻu ai ha fakahā meiate Ia ʻi ho ʻatamaí pea ʻi ho lotó?

Tokāteline mo e Ngaahi Fuakava 64:33. “ʻOku tupu mei he ngaahi meʻa īkí ʻa e ngaahi fuʻu meʻa lalahí”

Fakakaukau ke huluʻi ʻa e “Flecks of Gold” (3:15). Fakaafeʻi ʻa e kau akó ke kumi ha ngaahi moʻoni mei he Tokāteline mo e Ngaahi Fuakava 64:33 ʻoku hā ʻi he vitiō ko ʻení. Te nau lava leva ʻo vahevahe ha ngaahi sīpinga ʻo e “ngaahi meʻa iiki” te tau lava ʻo fai ke hoko ai ha faikehekehe lahi ʻi heʻetau feinga ke muimui ʻia Sīsū Kalaisí.

Te ke lava foki ʻo fakaafeʻi ʻa e kau akó ke nau lau ʻa e ʻAlamā 37:6–7 pe vahevahe ha ngaahi talanoa mei heʻenau moʻuí pe ko e folofolá ʻoku nau fakatātaaʻi ʻa e moʻoni ko ʻení.

Flecks of Gold

Ko ha fakaafe ʻoku toutou ʻasi

Fakakaukau ke fakaafeʻi ʻa e kau akó ke fakaʻilongaʻi ʻa e kupuʻi lea tatau ʻoku toutou ʻasi ʻi he Tokāteline mo e Ngaahi Fuakava 64:22 mo e Tokāteline mo e Ngaahi Fuakava 64:34. Te ke lava leva ʻo fakamatalaʻi ange ʻoku toutou fakaafeʻi kitautolu ʻe he Fakamoʻuí ke foaki kiate Ia hotau lotó mo e ʻatamaí ʻi he kotoa ʻo e folofolá. Fakaafeʻi ʻa e kau akó ke fakafehokotaki ʻa e Tokāteline mo e Ngaahi Fuakava 64:34 mo e Tokāteline mo e Ngaahi Fuakava 4:2 mo e Mātiu 22:36–39. Kole ange ke vahevahe ha ngaahi fakakaukau lahi ange mei he ngaahi meʻá ni pe ngaahi veesi kehe ʻe lava ʻo tokoni pe ueʻi fakalaumālie kitautolu ke foaki ki he ʻEikí hotau lotó mo e ʻatamaí.

Tokāteline mo e Ngaahi Fuakava 64:41–43. Ko ha fuka ki he kakaí

Fakaafeʻi ʻa e kau akó ke lau ʻa e Tokāteline mo e Ngaahi Fuakava 64:41–43, ʻo kumi e ngaahi founga ʻoku fakamatalaʻi ai ʻe he ʻEikí ʻa Saioné. ʻE lava ke ke fakamatalaʻi ange ko e fuká “ko ha fuka pe fakaʻilonga ʻa ia ʻoku fakatahataha mai ki ai ʻa e kakaí ʻi he taumuʻa tatau pea mo e meʻa ʻoku ʻiloa ai ʻa kinautolu” (Fakahinohino ki he Ngaahi Folofolá, “Fuká,” scriptures.ChurchofJesusChrist.org). Te ke lava ʻo fakaafeʻi ʻa e kau akó ke nau fekumi ʻi he “Ngaahi Hisitōlia Fakaemāmani Lahí” ʻi he konga “Hisitōlia ʻo e Siasí” ʻi he Gospel Library ke maʻu ha fakamatala ki ha kakai mei ha ngaahi puleʻanga lahi naʻe tānaki fakataha ki he Siasi ʻo e Fakamoʻuí. Te nau lava ʻo lau ha talanoa pea vahevahe ia mo hanau hoa pe ʻi ha fanga kiʻi kulupu iiki.