“Lēsoni 80—Tokāteline mo e Ngaahi Fuakava 67: Ko ha Fakamoʻoni ki hono Moʻoní,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 67,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 80: Tokāteline mo e Ngaahi Fuakava 67–70
Tokāteline mo e Ngaahi Fuakava 67
Ko ha Fakamoʻoni ʻo e Moʻoní
Naʻe poupouʻi ʻe ha kau taki tokolahi ʻo e Siasí hono pulusi ʻo e ngaahi fakahā naʻe maʻu ʻe he Palōfita ko Siosefa Sāmitá pea mahino naʻe maʻu kinautolu mei he ʻOtuá. Naʻe tukutaha e tokanga ʻa e niʻihi kehé ki he ngaahi tōnounou naʻa nau ʻilo ʻi he ngaahi fakahaá, pea ko hono olá, naʻe ʻikai ke nau fakapapauʻi pe naʻe maʻu nai kinautolu mei he ʻEikí. ʻE lava ke tokoni ʻa e lēsoni ko ʻení ke fakatupulaki ʻa e loto-falala ʻa e kau akó ʻoku folofola mai ʻa e ʻEikí kiate kitautolu ʻo fakafou ʻi he kau palōfitá pea ko e Tokāteline mo e Ngaahi Fuakavá ko ʻEne folofolá ia.
Ngaahi ʻEkitivitī Ako ʻOku Ala Fakahokó
Ko ha fakamoʻoni
Fakapapauʻi ha founga ke tokoni ki he kau akó ke nau fakakaukau ki heʻenau fakamoʻoni ki he ngaahi moʻoni ʻo e ongoongoleleí ʻoku fekauʻaki mo e palani ʻa e Tamai Hēvaní. Te nau lava ʻo fai ʻa e ʻekitivitī ko ʻení ʻi he palakipoé pe ʻi heʻenau tohinoa akó.
Tā ha fakatātā faingofua ʻo ha tangata (stick figure) ʻi ha tafaʻaki ʻe taha ʻo e palakipoé. ʻI he tafaʻaki ʻe tahá, hiki ha ngaahi tafaʻaki kehekehe ʻo e palani ʻa e Tamai Hēvaní ʻe ala fiemaʻu ʻe ha taha ke ne maʻu ha fakamoʻoni ki ai. Te ke lava foki ʻo fakaʻaliʻali ha ngaahi fakatātā ʻoku nau fakafofongaʻi ʻa e ngaahi tafaʻaki ʻo e palani ʻa e Tamai Hēvaní, hangē ko ha fakatātā ʻo Sīsū Kalaisi, ko e palōfita lolotongá, pe ko e folofolá. Fili ha niʻihi ʻo e ngaahi tafaʻaki ko ʻení pea fakaafeʻi ʻa e kau akó ke aleaʻi ʻa e ngaahi meʻá ni.
-
Ko e hā hono ʻuhinga ʻe ala tokoni ai ke maʻu ha fakamoʻoni ki he ngaahi tafaʻaki ko ʻeni ʻo e palani ʻa e Tamai Hēvaní?
-
Ko e hā ha ngaahi meʻa te nau ala fakafeʻātungiaʻi hono fakamālohia ʻa e fakamoʻoni ko ʻení?
ʻI he vahevahe ʻa e kau akó, te ke lava ʻo hiki ʻa e ngaahi fakafeʻātungiá ʻi he vahaʻa ʻo e fakatātaá pea mo e lisi ʻo e ngaahi meʻa ʻoku totonu ke tau fekumi ke maʻu ha fakamoʻoni ki ai ʻi heʻetau moʻuí.
Hili ʻa e fealēleaʻakí, te ke lava ʻo fakaafeʻi ʻa e kau akó ke nau fakakaukau ki heʻenau fakamoʻoni ki he ngaahi konga kehekehe ʻo e palani ʻa e Tamai Hēvaní. Fakaafeʻi kinautolu ke kumi ha ngaahi moʻoni lolotonga ʻa e lēsoní ʻa ia ʻe lava ʻo tokoni ke nau maʻu pe fakamālohia ʻenau fakamoʻoní.
Founga ke maʻu mo fakamālohia ai ha fakamoʻoní
Ke tokoni ke mahino ki he kau akó ʻa e puipuituʻa ʻo e vahe 67, te ke lava ʻo vahevahe ha ngaahi fakaikiiki mei he palakalafi ko ʻení.
ʻI he fakaʻosinga ʻo e 1831, naʻe maʻu ʻe Siosefa Sāmita ha ngaahi fakahā mei he ʻEikí, ka naʻe tokosiʻi pē ha kakai naʻa nau maʻu ha ngaahi tatau ʻo e ngaahi fakahaá. Naʻe fakahā ʻe he ʻEikí ʻoku fiemaʻu ke nau pulusi ʻa e ngaahi fakahaá ʻi ha tohi. Hangē ko e Tohi ʻa Molomoná, naʻe totonu ke fakakau ʻi he Tohi ʻo e Ngaahi Fekaú (naʻe pulusi kimui ange ko e Tokāteline mo e Ngaahi Fuakavá) ha ngaahi fakamoʻoni mei he kau fakamoʻoní. Ka neongo ia, naʻe momou ha kau taki ʻe niʻihi ʻo e Siasí ke fakamoʻoni; naʻa nau hohaʻa ki ha niʻihi ʻo e leá pea nau fie fakaleleiʻi ia.
Fakakaukau ke tānaki atu ʻa e “leá” ki he lisi ʻo e ngaahi fakafeʻātungiá. Fehuʻi ange pe ʻoku ʻi ai nai ha ngaahi founga ʻe lava ke felāveʻi ai ʻeni mo e toʻu tupú ʻi he ʻaho ní.
Lau ʻa e Tokāteline mo e Ngaahi Fuakava 67:1–5, ʻo kumi ʻa e meʻa naʻe vahevahe ʻe he ʻEikí mo e kau tangatá ni.
-
ʻOkú ke pehē ko e hā naʻe fiemaʻu ai ke nau fanongo ki hení?
-
Ko e hā ha foʻi moʻoni ʻo e ongoongoleleí te ke lava ʻo maʻu mei he ngaahi veesi ko ʻení?
Lolotonga e vahevahe ʻa e kau akó, tokoni ke nau ʻiloʻi ha foʻi moʻoni hangē ko ʻení: ʻOku fanongo mai ʻa e ʻEikí ki heʻetau ngaahi lotú, ʻafioʻi hotau lotó, pea lava ke ʻomi ha fakamoʻoni ki he moʻoni ʻoku tau fekumi ki aí.
-
ʻOkú ke pehē ʻe tokoni fēfē nai ʻeni kiate kitautolu ʻi he taimi ʻoku tau fekumi pe fefaʻuhi ai mo ha fakamoʻoní?
-
ʻOkú ke pehē ko e hā ʻe ala taʻofi ai kitautolu ʻe he “manavahē ʻi [hotau] lotó” (Tokāteline mo e Ngaahi Fuakava 67:3) mei hono maʻu e ngaahi tāpuakí?
-
ʻI he veesi 5, ko e hā naʻe fakahā ʻe he ʻEikí fekauʻaki mo Siosefa Sāmitá? Neongo naʻe ʻikai ke haohaoa pe pōtoʻi lea ʻa e Palōfitá, ko e hā nai ʻoku ʻikai fakapotopoto ai ke feinga ke “lea ʻo lelei ange ʻi heʻene leá”? (Tokāteline mo e Ngaahi Fuakava 67:5).
Ko hono ikunaʻi ʻo e ngaahi fakafeʻātungiá ʻi he tokoni ʻa e ʻEikí
ʻOku ʻafioʻi ʻe he ʻEikí hotau lotó pea te Ne lava ʻo tokoniʻi kitautolu ke tau ikunaʻi ʻa e ngaahi fakafeʻātungia ki heʻetau ngaahi fakamoʻoní. ʻI he tuʻunga ko ʻení, naʻe tuku ʻe he ʻEikí ha tukupā ki he kaumātuʻa ʻo Hono Siasí ke tokoniʻi kinautolu ke nau maʻu “ha fakamoʻoni ki hono moʻoni” (veesi 4) ʻo e ngaahi fakahā naʻe maʻu ʻe Siosefa Sāmitá.
Kapau ʻe fiefia hoʻo kau akó ʻi ha tukupā, ʻe lava ke fakahoko ʻa e ʻekitivitī ko ʻení ko ha sivi. Fakaafeʻi kinautolu ke lau tokanga ʻa e ngaahi vēsí pea tāpuniʻi ʻenau folofolá pea feinga ke tali ʻa e ngaahi fehuʻi ko ʻení.
Lau ʻa e Tokāteline mo e Ngaahi Fuakava 67:6–9, ʻo kumi ʻa e fakaikiiki ʻo e tukupā ʻa e ʻEikí.
-
Ko e hā ʻa e faʻahinga fakahā naʻe totonu ke nau filí? (Vakai, veesi 6.)
-
Ko e tokotaha fēfē nai naʻe totonu ke nau filí? (Vakai, veesi 6.)
-
Ko e hā ʻa e meʻa naʻe fakaafeʻi ʻa e tokotaha ko ʻení ke ne tohí? (Vakai, veesi 7.)
-
Ko e hā naʻe mei hokó kapau naʻa nau lava? (Vakai, veesi 7.)
-
Ko e hā ʻe hokó kapau he ʻikai ke nau lava? (Vakai, veesi 8–9.)
Ke ʻiloʻi ʻa e meʻa ne hokó, te ke lava ʻo paaki pe fakaʻaliʻali ʻa e fakatātā “ʻOku Moʻoni ʻa e Ngaahi Lea ʻa e Palōfitá” mei he makasini Ki Hono Fakamālohia ʻo e Toʻu Tupú ki Sune 2021, pea fakaafeʻi ʻa e kau akó ke nau lau ia. Pe ko hoʻo fakamatalaʻi naʻe fili ʻa Uiliami Makalēlini, ko ha faiako taʻu 25 pea mo ha papi ului ki he Siasí, ko e “poto taha” (veesi 6) ʻo e kulupú pea naʻá ne tali e tukupā ʻa e ʻEikí. ʻI heʻene ʻosí, naʻe fakatokangaʻi ʻe he taha kotoa naʻe ʻikai mei he ʻEikí ʻa e meʻa naʻá ne tohí.
-
ʻOkú ke pehē ko e hā ha niʻihi ʻo e ngaahi lēsoni naʻe ako ʻe he kau tangata ko ʻení mei he aʻusiá ni?
ʻI he tali ʻa e kau akó, te ke lava ʻo fakaafeʻi kinautolu ke nau toe vakaiʻi ʻa e veesi 9. Te ke lava foki ʻo fakamatalaʻi ange naʻe fakamoʻoni hingoa ha tokolahi ʻo e kaumātuʻá ʻi ha tohi ʻo fakahaaʻi ai ʻenau fakamoʻoni ki he moʻoni ʻo e ngaahi fakahā ʻi he Tohi ʻo e Ngaahi Fekaú.
-
ʻOku fakahaaʻi fēfē nai ʻe he aʻusia ko ʻení naʻe ʻafioʻi kinautolu ʻe he ʻEikí pea ʻe lava ke tokoni ʻi heʻenau ngaahi fakamoʻoní?
Naʻe hoko atu ʻa e ʻEikí ke talaʻofa ha ngaahi aʻusia fakalaumālie lahi ange ki he kau tangata ko ʻení kapau te nau “fakamaʻa ʻa [kinautolu] mei he ngaahi meheká mo e ngaahi manavaheé, pea fakavaivaiʻi ʻa [kinautolu] ʻi hoku ʻaó” (Tokāteline mo e Ngaahi Fuakava 67:10).
Founga ʻoku fakaʻaongaʻi ai ʻa e moʻoni ko ʻení ʻi he ʻaho ní
Fakakaukauloto ʻoku faingataʻa ki ha taha ʻokú ke ʻilo ke tui ʻoku folofola mai ʻa e ʻEikí kiate kitautolu ʻo fakafou ʻi he kau palōfitá pea ko e Tokāteline mo e Ngaahi Fuakavá ko e folofola ia ʻa e ʻEikí.
Kapau ʻe fiemaʻu ʻe he kau akó, te nau lava ʻo tānaki atu ha ngaahi fakaikiiki ki he tūkungá ʻaki hano fili ha taha ʻo e ngaahi fakafeʻātungia ʻoku hiki ʻi he palakipoé ʻo fokotuʻu ange ʻoku fiemaʻu ke ikunaʻi ia ʻe he tokotahá kae toki maʻu ha fakamoʻoni. Hili iá, ʻe lava ke ke vahevahe pe fakaʻaliʻali ʻa e ngaahi fakahinohino ko ʻení.
Fakakaukau ki he founga te ke lava ʻo tokoni ai ki he tokotaha ko ʻení ʻaki haʻo fai ʻa e ngaahi meʻá ni:
-
Hiki ʻa e meʻa te ke lea ʻaki ke tokoniʻi kinautolu ke nau ʻiloʻi ʻoku fanongo mai ʻa e ʻEikí ki heʻetau ngaahi lotú, ʻafioʻi hotau lotó, pea te Ne lava ʻo ʻomi kiate kitautolu ha fakamoʻoni ki he kau palōfitá mo e Tokāteline mo e Ngaahi Fuakavá. Kapau ʻe lava, mahalo te ke fie fakakau ai ha faʻahinga aʻusia fakataautaha pē, pe ngaahi aʻusia ʻa kinautolu ʻoku mou vāofí, ʻoku nau fakamoʻoniʻi ʻa e ngaahi moʻoni ko ʻení.
-
Fakaʻaongaʻi ʻa e folofolá, ngaahi talanoa mei he folofolá, pe ngaahi aʻusia pē ʻaʻau ke vahevahe ha ngaahi meʻa te tau lava ʻo fai ke fakatupulaki ai ʻetau fakamoʻoni ki he kau palōfitá mo e Tokāteline mo e Ngaahi Fuakavá (ʻoku kau ʻi ha ngaahi sīpinga ʻe niʻihi ʻa e Tokāteline mo e Ngaahi Fuakava 1:37–38; 21:4–6; Molonai 10:4–5). Vahevahe ʻa e founga ʻe lava ke tāpuekina ai kitautolu ʻe he ʻEikí ʻi he ngaahi ngāue ko ʻení.
Fakaafeʻi ha kau ako kehekehe ke vahevahe ʻa e meʻa naʻa nau teuteú. Fakamālō ki he kau akó ʻi heʻenau ngaahi fakakaukaú mo e aʻusiá.
Fakaʻosi ʻaki hano fakaafeʻi ʻa e kau akó ke fakalaulauloto ki heʻenau ngaahi fakamoʻoni ʻa ia ʻoku folofola ʻa e ʻEikí ʻo fakafou ʻi he kau palōfitá pea ʻoku moʻoni ʻa e Tokāteline mo e Ngaahi Fuakavá. Fakamoʻoniʻi ʻoku fanongo mai ʻa e ʻEikí ki heʻenau ngaahi lotú, ʻafioʻi honau lotó, pea mo lava ʻo tokoni ke nau maʻu ha fakamoʻoni. Fakaafeʻi kinautolu ke hiki ha faʻahinga ueʻi fakalaumālie pē ne nau maʻu lolotonga ʻa e lēsoni ko ʻení.