“Lēsoni 81—Tokāteline mo e Ngaahi Fuakava 68:25–31: Ko Hono Akoʻi mo Ako ʻo e Ongoongoleleí ʻi ʻApí,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 68:25–31,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 81: Tokāteline mo e Ngaahi Fuakava 67–70
Tokāteline mo e Ngaahi Fuakava 68:25–31
Ko Hono Akoʻi mo Ako ʻo e Ongoongoleleí ʻi ʻApí
ʻOku tokoni hono ako e ongoongolelei ʻo Sīsū Kalaisí ke teuteuʻi ʻa e fānaú ke nau fehangahangai mo e ngaahi faingataʻa mo e ngaahi ʻahiʻahi ʻo e moʻuí ʻaki ʻa e tui ki he Fakamoʻuí. ʻOku maʻu ʻe he mātuʻá ha ivi makehe ke tokoniʻi ʻenau fānaú ke ako ʻa e ongoongoleleí. ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e fekau ʻa e ʻEikí ki he ngaahi mātuʻá ke akoʻi ʻa e ongoongoleleí ki heʻenau fānaú ʻi ʻapi.
Ngaahi ʻEkitivitī Ako ʻOku Ala Fakahokó
Tokoni ʻi heʻetau fononga fakamatelié
Fakakaukau ke fakamanatu ki he kau akó ʻi he taimi naʻa tau omi ai ki he māmaní, naʻe mole ʻetau manatu ki heʻetau nofo ʻi he maama fakalaumālié mo ʻetau Tamai Hēvaní. ʻIkai ngata aí, ka naʻa tau omi ki ha māmani hinga ʻoku kau ai ʻa e ivi tākiekina kākā mo fakaʻauha ʻo Sētané. ʻOku fakatupu ʻe he ngaahi moʻoniʻi meʻa ko ʻení ha ngaahi pole ki he moʻui faivelengá ʻo fakatatau mo e palani ʻa e Tamai Hēvaní.
-
Ko e hā ha ngaahi meʻa kuo foaki mai ʻe he Tamai Hēvaní ke tokoniʻi kitautolu ke tau ako fekauʻaki mo Ia pea mo foua ʻa e ngaahi faingataʻa fakamatelié?
ʻE lava ke ke lisi ʻa e ngaahi tali ʻa e kau akó ʻi he palakipoé. Tānaki atu ki he lisí ʻa e “mātuʻá pe tauhí” ʻo kapau he ʻikai ke talaatu ia ʻe he kau akó.
-
Kuo tāpuekina fēfē nai koe ʻe he taha ʻo e ngaahi ivi tākiekina ko ʻení?
-
ʻOkú ke pehē ko e hā ʻoku hoko ai ʻa e mātuʻá pe tauhí ko ha ivi tākiekina ʻi hono tokoniʻi e fānaú ke nau fehangahangai mo e ngaahi faingataʻa ʻo e moʻui fakamatelié?
Fakakaukau ke vahevahe mo e kau akó te nau ako ʻi he ʻahó ni mei ha potufolofola ʻokú ne fakamatalaʻi ʻa e ngaahi fatongia ʻo e mātuʻá ʻi hono tokoniʻi ʻo e fānaú ke nau ako ʻa e ongoongoleleí. ʻAi ke ke ongoʻingofua ʻa e foʻi moʻoni ko ia ʻoku haʻu ʻa e tokotaha ako takitaha mei ha tūkunga fakafāmili kehekehe pea mahalo ʻoku ʻikai maʻu ʻe ha kau ako ʻe niʻihi ha tūkunga lelei ʻi ʻapi.
ʻIloʻi ʻa e ngaahi tūkunga ʻo e tokotaha ako takitaha: Ki ha ako lahi ange ke ʻiloʻi ʻa e founga ke ongoʻingofua ai ʻa e ngaahi tūkunga ʻo e tokotaha ako takitahá, vakai ki he ako ʻoku ui ko e“Vakai ki he kau akó ʻi he founga ʻoku ʻafioʻi ai kinautolu ʻe he ʻOtuá” ʻi he Fakatupulaki Ngaahi Taukei ʻa e Faiakó: ʻOfa ʻi he Niʻihi ʻOkú ke Akoʻí. Fakakaukau ke akoako fakahoko ʻa e taukei “Kiʻi taimi, fakakaukau, pea tali ʻa e ngaahi fehuʻi ʻoku tau fehuʻi loto pē kiate kitautolú.”
Fakakaukau ke fakamatalaʻi ʻa e ngaahi meʻá ni:
ʻOku kehekehe ʻaupito ʻa e ngaahi tūkunga fakafāmilí. ʻOku ʻi ai ha kakai ʻe niʻihi, hangē ko Nīfaí, naʻe fanauʻi ki ha mātuʻa naʻe feinga ke tataki kinautolu ke muimui ki he Fakamoʻuí (vakai, 1 Nīfai 1:1). Naʻe tupu hake ha niʻihi, hangē ko Palesiteni Lāsolo M. Nalesoni pe ʻEletā Tēvita A. Petinā mo Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá, mo ha mātuʻa ʻe toko taha pe lahi ange naʻe ʻikai kau ki he Siasí pe māmālohi pē. ʻOku ʻi ai mo ha niʻihi, hangē ko Palesiteni Tāleni H. ʻOakesi ʻo e Kau Palesitenisī ʻUluakí, ne mole ha taha ʻo ʻenau mātuʻá ʻi heʻenau kei īkí. ʻOku tupu hake ha toʻu tupu ʻe niʻihi, mavahe mei heʻenau mātuʻá, hangē ko Mōsese (vakai, ʻEkesōtosi 2:10) pea mo Samuelá (vakai, 1 Samuela 1:24–28). Pea ʻi ai mo ha niʻihi kehe, hangē ko ʻĒpalahame mo Limihaí, ʻoku nau maʻu ha mātuʻa ʻoku feinga mālohi ke faikovi (vakai, ʻĒpalahame 1:1–17, 27; Mōsaia 7:9; 11:1–5).
Fakamatalaʻi ʻi hoʻo tohinoa folofolá ʻa e tūkunga ho fāmilí. Fakalaulauloto ki he meʻa ʻokú ke ako mei he ngaahi aʻusia ho fāmilí. ʻE lava ke ke fakakau ai hoʻo ngaahi ongo fekauʻaki mo e hoko ko ha mātuʻa ʻi he kahaʻú pea mo e founga te ke fie fakahoko ai iá.
Kapau ʻoku ongoʻi fiemālie ʻa e kau akó, ʻe lava ke nau vahevahe ha niʻihi ʻo ʻenau ngaahi fakakaukaú.
Fakaafeʻi ʻa e kau akó ke nau fakakaukau ki he founga ʻe ala tokoni ai ʻa e meʻa ʻoku nau ako ʻi he ʻaho ní ke poupouʻi ʻa kinautolu ʻoku feinga ke akoʻi kiate kinautolu ʻa e ongoongolelei ʻo Sīsū Kalaisí, kau ai ʻa e mātuʻá pe tauhi fānaú. ʻE lava foki ke nau fakakaukau ki he founga te nau lava ai ʻo fakaʻaongaʻi ʻa e meʻa ʻoku nau akó ʻi he kahaʻú.
Ko e meʻa naʻe fekau ʻe he ʻEikí ki he mātuʻá ke akoʻi ki heʻenau fānaú
Lolotonga ʻenau fakataha mai ki ha konifelenisi ʻi ʻOhaiō, naʻe fekumi ha kau tangata ʻe toko fā ki he fakahinohino ʻa e ʻEikí ʻo fakafou ʻi he Palōfita ko Siosefa Sāmitá. Hili hono ʻoange ha faleʻi ki he kau tangatá ni fekauʻaki mo honau ngaahi fatongiá, naʻe fai ʻe he ʻEikí ha faleʻi lahi ange ki he ngaahi fāmili kotoa pē ʻoku kau ki Saioné.
Fakakaukau ke hiki ʻi he palakipoé ʻa e sētesi taʻe-kakato [ko ʻení] Kuo fekau ʻe he ʻEikí ke akoʻi ʻe he mātuʻá ki heʻenau fānaú …. Hili iá, ʻe lava ke tānaki ʻe he kau akó ha ngaahi foʻi lea pe kupuʻi lea ki he fakamatala ʻi he palakipoé ʻi heʻenau maʻu kinautolu ʻi he ngaahi veesi ko ʻení. Pe, ko hoʻo fakaafeʻi ʻa e kau akó ke hiki ʻa e sētesí ʻi heʻenau tohinoá pea tānaki atu ki ai ʻenau ngaahi talí.
Lau ʻa e Tokāteline mo e Ngaahi Fuakava 68:25–31, ʻo kumi ʻa e meʻa naʻe fekauʻi ʻe he ʻEikí ke akoʻi ʻe he mātuʻá ki heʻenau fānaú.
Hili hono maʻu ʻe he kau akó ha taimi ke fakakakato ai ʻa e sētesí ʻaki ʻa e ngaahi tefitoʻi moʻoni kehekehe ʻoku finangalo ʻa e ʻEikí ke akoʻi ʻe he mātuʻá, fakaafeʻi kinautolu ke tali ʻa e ngaahi fehuʻi ko ʻení:
-
Kapau ʻoku ʻikai ke maʻu ʻe he kakaí ʻa e ongoongoleleí ʻi honau ʻapí, ko e hā ha ngaahi founga kehe kuo ʻomi ʻe he ʻEikí maʻanautolu ke nau ako ai ʻa e ngaahi tefitoʻi moʻoni ko ʻení?
-
Ko hai kuó ne akoʻi atu ha taha ʻo e ngaahi tefitoʻi moʻoni ʻi he ngaahi veesi ko ʻení ʻi hoʻo tupulakí? ʻOku ʻi ai haʻo manatu melie ki heʻenau akoʻi koé? Kapau ʻoku ʻi ai, ko e hā ʻa e ngaahi manatu melie ko iá?
-
Kuo tokoniʻi fēfē nai hoʻo moʻuí ʻe he ngaahi tefitoʻi moʻoni ʻi he ngaahi veesi ko ʻení, pe te nau tokoniʻi fēfē nai koé?
ʻE lava ke fakalaulauloto ʻa e kau akó ki he founga kuo tokoniʻi pe ʻe lava ke tokoniʻi ai kinautolu ʻe he ngaahi akonaki mei he tokotaha pe ngaahi veesi ko iá ke nau ongoʻi ʻa e ʻofa ʻa e ʻEikí mo Hono finangalo ke nau ako ʻa e ngaahi tefitoʻi moʻoni ko ʻení.
Ko hono fakaʻaongaʻi ʻo e Tokāteline mo e Ngaahi Fuakava 68:25–31
Ke fakakaukau ki ha founga ʻe ala tokoni ai ʻa e Tokāteline mo e Ngaahi Fuakava 68:25–31 ki he toʻu tupú ʻi ha ngaahi tūkunga kehekehé, ʻoange ki he kau akó ha ngaahi tūkunga ke nau vakaiʻi. Te ke lava ʻo fakaʻaongaʻi ʻa e ngaahi tūkunga mo e ngaahi fehuʻi ʻoku ʻoatu ʻi laló pe faʻu ha ngaahi fehuʻi pē ʻaʻau ʻe ʻaonga ki he kau akó. ʻE lava ke fakakaukau ʻa e kau akó ki he ngaahi tūkunga ko ʻení ko ha kalasi, fakakulupu, pe fakafoʻituitui.
ʻEkitivitī A
ʻOku ʻi ai ha mātuʻa ʻa ha talavou ʻokú na feinga ke hoko ko ha faʻifaʻitakiʻanga ʻo e muimui ki he Fakamoʻuí, ka ʻokú ne faʻa lāunga ʻi he taimi ʻoku fakaafeʻi ai ia ʻe heʻene mātuʻá ki he ako folofola pe lotu fakafāmilí. ʻOkú ne faʻa tukunoaʻi kinaua pe vaʻinga ʻi heʻene telefoní ʻi he taimi ʻokú na feinga ai ke faleʻi iá.
-
ʻE tokoni fēfē nai ʻa e ngaahi akonaki ʻa e ʻEikí ʻi he Tokāteline mo e Ngaahi Fuakava 68:25–31 ke mahino kiate ia ʻa e ongo ʻoku maʻu ʻe he ʻEikí fekauʻaki mo e meʻa ʻoku feinga ʻene ongomātuʻá ke fakahokó?
-
Ko e hā ha ngaahi potufolofola te nau tataki ia ke ne tali lelei ange ʻa e tūkungá? (ʻOku kau ʻi he ngaahi sīpingá ʻa e ʻEfesō 6:1–3; Mōsaia 4:14–15; pea mo e sīpinga ʻa e Fakamoʻuí ʻi Heʻene taʻu 12 ʻi he Luke 2:51–52.)
-
Ko e hā ha ngaahi founga te ne lava ai ʻo poupou ki heʻene ongomātuʻá? ʻE fakahoko fēfē nai ʻe he ngaahi ngāue ko ʻení ha liliu ʻi hono fāmilí?
ʻEkitivitī E
Kuo vete-mali ha ongomātuʻa ʻa ha finemui. ʻOkú ne vahevahe hono taimí ʻiate kinaua. ʻOku fakakata ʻaki ʻe heʻene faʻeé ʻa e Siasí pea ʻoku ʻikai tokanga pe ʻe muimui hono ʻofefiné ki he ngaahi akonaki ʻo e ongoongoleleí ʻi he taimi ʻokú ne ʻi hono ʻapí aí. ʻOku poupouʻi ia ʻe heʻene tamaí ke ne moʻui ʻaki ʻa e ongoongoleleí mo ʻalu maʻu pē ki he seminelí, lotú, mo e ngaahi ʻekitivitī ʻa e toʻu tupú. ʻI hono fakafehoanaki ki heʻene feohi mo ʻene faʻeé, ʻokú ne ongoʻi ʻoku faingataʻa pea fakangatangata ʻene moʻuí ʻi heʻene nofo mo ʻene tamaí.
-
ʻE tokoni fēfē nai ʻa e Tokāteline mo e Ngaahi Fuakava 68:25–31 ke tataki ʻa e finemui ko ʻení?
Lau ʻa e ʻEkesōtosi 20:12.
-
Ko e hā ha ngaahi founga ʻe lava ke fakaʻapaʻapaʻi ai ʻe he finemuí ni ʻa ʻene ongomātuʻá kae kei muimui pē ki he ʻEikí?
-
Ko e hā ha ngaahi fakakaukau kehe, ngaahi akonaki mei he kau taki ʻo e Siasí, pe ngaahi aʻusia ʻe ala tokoni kiate ia?
ʻEkitivitī F
ʻOku ʻi ai ha talavou kuó ne foua ha ngaahi faingataʻa ʻi heʻene kei ʻi he toʻu tupú pea kuó ne mavahe mei heʻene ongomātuʻá. ʻOku fakamamahi ke ne fakakaukau kiate kinaua.
-
ʻE tokoni fēfē nai ki he talavou ko ʻení ke fakalaulauloto ki he kakai kehe kuo fekauʻi mai ʻe he ʻEikí ke nau akoʻi kiate ia ʻa e ngaahi tefitoʻi moʻoni ʻoku hiki ʻi he Tokāteline mo e Ngaahi Fuakava 68:25–31?
-
ʻE tokoni fēfē nai ʻa e Tokāteline mo e Ngaahi Fuakava 68:25–31 ki he talavoú ni ke teuteu ki hono kahaʻú?
Ke fakaʻosi ʻa e ʻekitivitī ko ʻení, fili ha tefitoʻi moʻoni ʻe taha naʻe fekau ʻe he ʻEikí ki he mātuʻá ke nau akoʻi ʻi he Tokāteline mo e Ngaahi Fuakava 68:25–31, pea kumi ha veesi ʻi he folofolá te ke lava ʻo fakaʻaongaʻi ke akoʻi ʻaki ʻa e tefitoʻi moʻoni ko iá. Vahevahe ʻa e founga ʻe lava ke tokoniʻi ai ʻe he tefitoʻi moʻoni ko ʻení ʻa e toʻu tupú ʻi he ʻaho ní.
Fakaafeʻi ʻa e kau akó ke vahevahe ʻa e meʻa naʻa nau akó. ʻE ala tokoni ke ʻoange ki he kau akó ha faingamālie ke vahevahe ʻenau ngaahi aʻusiá, fehuʻí pe ngaahi hohaʻa fekauʻaki mo hono ako ʻo e ongoongoleleí ʻi ʻapí. Fakakaukau ke tuku ki he kau akó ke nau tali ʻa e ngaahi fehuʻí pe ngaahi hohaʻa honau toʻú ʻaki hono fakaʻaongaʻi ʻa e ngaahi maʻuʻanga tokoni kuo fokotuʻu fakalangí mo ʻenau ngaahi aʻusiá.
Tokoni ke mahino ki he kau akó ko e hā pē honau tūkunga fakafāmilí, ʻoku finangalo ʻa e ʻEikí ke nau ului fakamātoato mo tuʻuloa kiate Ia mo ʻEne ongoongoleleí ʻi he founga lelei taha te nau lavá. Fakakaukau ke fakaafeʻi ʻa e kau akó ke nau fekumi ki ha fakahā fakataautaha ki he founga te nau ala fakaʻaongaʻi ai ʻa e meʻa kuo nau akó. ʻE lava ke hoko ʻeni ʻi hono poupouʻi ʻenau mātuʻá ʻi heʻenau feinga ke fakahoko honau fatongia ke tokoniʻi kinautolu ke haʻu kia Sīsū Kalaisí, fakahoungaʻi ʻa e niʻihi kehe naʻe teuteuʻi ʻe he ʻEikí ke akoʻi kiate kinautolu ʻa e ngaahi tefitoʻi moʻoni naʻa nau ako ʻi he ʻaho ní, pe teuteu ke akoʻi ʻenau fānaú ʻi he kahaʻú.