“Lēsoni 83—Akoako Fakataukei Fakatokāteline 5: Ako Maʻulotó mo Hono Maʻu ʻo e ʻIlo Fakalaumālié,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Akoako Fakataukei Fakatokāteline 5,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 83: Tokāteline mo e Ngaahi Fuakava 71–75
Akoako Fakataukei Fakatokāteline 5
Ako Maʻulotó mo Hono Maʻu ʻo e ʻIlo Fakalaumālié
ʻE lava ke tokoni ʻa e fakataukei fakatokāteliné ki he kau akó ke langa honau makatuʻungá ʻia Sīsū Kalaisi mo ʻEne ongoongoleleí. ʻE ʻoange ʻe he lēsoni ko ʻení ki he kau akó ha ngaahi faingamālie ke ako maʻuloto ai e ngaahi potufolofolá mo e ngaahi kupuʻi lea fakafolofola mahuʻingá kae pehē foki ki hono ako mo fakaʻaongaʻi ʻo e ngaahi tefitoʻi moʻoni fakalangi ki hono maʻu ʻo e ʻilo fakalaumālié.
Ngaahi ʻEkitivitī Ako ʻOku Ala Fakahokó
Fakamanatu ʻo e fakataukei fakatokāteliné: ako maʻuloto
Fakakaukau ki ha ngaahi taimi ʻi hoʻo moʻuí naʻe tokoni ai hono ako maʻuloto ʻo e fakamatalá ʻi hono fakahoko ha ngāue.
-
Kuo tāpuekina fēfē nai hoʻo moʻuí ʻi hono ako maʻuloto ha fakamatalá?
-
Ko e hā ha ngaahi tūkunga ʻe ʻaonga kiate koe hono maʻuloto ha ngaahi potufolofolá?
Ko e ʻekitivitī ko ʻení ko ha founga ia ʻe taha ke tokoni ki he kau akó ke nau ako maʻuloto e ngaahi potufolofola fakataukei fakatokāteliné mo e ngaahi kupuʻi lea fakafolofola mahuʻingá. ʻOku maʻu ha ngaahi fakakaukau lahi ange ki he ako maʻulotó ʻi he fakamatala fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.” ʻOku ʻikai totonu ke laka hake ʻi he miniti ʻe 10–15 ʻa e ʻekitivitī ako maʻuloto ʻokú ke filí koeʻuhí ke ʻi ai hao taimi ki hono fakaʻaongaʻi ʻo e fakataukei fakatokāteliné.
Vahevahe ʻa e kau akó ki ha fanga kiʻi kulupu iiki pea paaki ha tatau ʻo e saati ko ʻení maʻá e kulupu takitaha. Fakaafeʻi ʻa e ngaahi kulupú ke kosi mavahevahe ʻa e potufolofolá mo e kupuʻi lea mahuʻinga takitaha. ʻAi ke tuifio ʻe he kau akó ʻa e ngaahi potufolofolá mo e ngaahi kupuʻi lea fakafolofola mahuʻingá pea ngāue fakakulupu ke fakatauhoa kinautolu ʻi he vave taha te nau lavá. ʻE lava ke toutou fakahoko tuʻo lahi ʻe he ngaahi kulupú ʻa e ʻekitivitī ko ʻení ke ʻiloʻi pe te nau lava ʻo fakatauhoa vave ange kinautolu ʻi he feinga takitaha.
|
Potufolofola fakataukei fakatokāteliné |
Kupuʻi lea fakafolofola mahuʻingá |
|---|---|
Potufolofola fakataukei fakatokāteliné | Kupuʻi lea fakafolofola mahuʻingá Naʻe mamata ʻa Siosefa Sāmita ki he “Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi.” |
Potufolofola fakataukei fakatokāteliné | Kupuʻi lea fakafolofola mahuʻingá “Ko e Siasi moʻoni mo moʻui pē taha.” |
Potufolofola fakataukei fakatokāteliné | Kupuʻi lea fakafolofola mahuʻingá “Neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē.” |
Potufolofola fakataukei fakatokāteliné | Kupuʻi lea fakafolofola mahuʻingá “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē.” |
Potufolofola fakataukei fakatokāteliné | Kupuʻi lea fakafolofola mahuʻingá “Te u fakahā kiate koe ʻi ho ʻatamaí pea ʻi ho lotó, ʻi he Laumālie Māʻoniʻoní.” |
Potufolofola fakataukei fakatokāteliné | Kupuʻi lea fakafolofola mahuʻingá ʻOku maʻu ʻe he Lakanga Taulaʻeiki Faka-ʻĒloné “ʻa e ngaahi kī ʻo e tauhi mai ʻa e kau ʻāngeló, pea mo e ongoongolelei ʻo e fakatomalá, pea mo e papitaisó.” |
Potufolofola fakataukei fakatokāteliné | Kupuʻi lea fakafolofola mahuʻingá “ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá.” |
Potufolofola fakataukei fakatokāteliné | Kupuʻi lea fakafolofola mahuʻingá “Hono ʻikai ke lahi hoʻomo fiefiá, ʻo kapau te mo ʻomi ʻa e ngaahi laumālie tokolahi kiate au!” |
Potufolofola fakataukei fakatokāteliné | Kupuʻi lea fakafolofola mahuʻingá “Ko au, ko [Sīsū Kalaisi], kuó u kātakiʻi ʻa e ngaahi meʻá ni maʻá e kakai kotoa pē.” |
Potufolofola fakataukei fakatokāteliné | Kupuʻi lea fakafolofola mahuʻingá Ko e lea ki he palōfitá “ke mou tali ʻene leá, ʻo hangē ko e lea ia mei hoku ngutu ʻoʻokú.” |
Potufolofola fakataukei fakatokāteliné | Kupuʻi lea fakafolofola mahuʻingá “Te u fakahā au ʻe au mei he langí ʻi he mālohi mo e fuʻu nāunau lahi … ʻo nofo ʻi he māʻoniʻoni fakataha mo e tangatá ʻi he māmaní ʻi ha taʻu ʻe taha afe.” |
Potufolofola fakataukei fakatokāteliné | Kupuʻi lea fakafolofola mahuʻingá “Kuo tuʻutuʻuni ʻe he ʻOtuá ʻa e nofo-malí.” |
Potufolofola fakataukei fakatokāteliné | Kupuʻi lea fakafolofola mahuʻingá “Ko ia ia kuó ne fakatomala mei heʻene ngaahi angahalá, ʻoku fakamolemoleʻi ia.” |
Potufolofola fakataukei fakatokāteliné | Kupuʻi lea fakafolofola mahuʻingá “ʻOku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē.” |
Ko hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié
ʻOku nofotaha ʻa e toenga ʻo e lēsoní ʻi hono tokoniʻi ʻo e kau akó ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga moʻoni ʻo e moʻuí. Kimuʻa pea lau ʻa e tūkunga ʻi laló, fakakaukau ke fakaafeʻi ʻa e kau akó ke toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. ʻOku fakakau ʻa e ngaahi ʻekitivitī fakamanatu ʻoku fokotuʻu atú ʻi he fakamatala fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.” Te ke lava ʻo maʻu ha ngaahi fakamatala ʻo e ngaahi tefitoʻi moʻoní ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2023).
ʻOku fakatefito ʻa e tūkunga akoako ko ʻení ʻi ha aʻusia naʻe vahevahe ʻe Sisitā Kilisitina M. Ī, ko e Tokoni Ua ʻi he Kau Palesitenisī Lahi ʻo e Fineʻofá, ʻi he konifelenisi lahí. Kapau ʻe tokoni, te ke lava ʻo fakaʻaongaʻi ha tūkunga kehe fekauʻaki mo e fakamolemolé ke feau lelei ange ʻa e ngaahi fiemaʻu hoʻo kau akó.
Naʻe vahevahe ʻe Sisitā Kilisitina M. Ī, ko e Tokoni Ua ʻi he Kau Palesitenisī Lahi ʻo e Fineʻofá, ʻa e aʻusia fakataautaha ko ʻení.
Kuó u aʻusia tonu ʻa e mana ʻo hono fakamoʻui ʻe Kalaisi ʻa hoku loto-ʻitá mo e tāufehiʻá. ʻI he fakangofua ʻa ʻeku tamaí, ʻoku ou vahevahe ʻa ʻeku tupu hake ʻi ha ʻapi ʻa ia ne ʻikai ke u ongoʻi maʻu pē ʻoku ou malu koeʻuhí ko e ngaohikovia fakaelotó mo e lea taʻe-feʻungá. ʻI heʻeku kei finemuí mo e ngaahi taʻu ʻo ʻeku kei talavoú, ne u fehiʻa ki heʻeku tamaí pea ne u nofo mo e loto-ʻitá koeʻuhí ko e mamahi ko iá. (Kristin M. Yee, “Hoihoifua ko e fetongi ʻo e Efuefú: Ko e Halanga Faifakamoʻui ʻo e Fakamolemolé,” Liahona, Nōvema 2022, 37)
Fakaʻaongaʻi ha kiʻi taimi ke ke fakakaukau ki he ongo naʻá ke mei maʻu ke aʻusia e tūkunga ʻo Sisitā Ií. Fakakaukau ki ha meʻa naʻá ke mei fai kapau naʻá ke fehangahangai mo ha tūkunga tatau.
ʻI heʻetau ako ʻa e meʻa naʻe fai ʻe Sisitā Ií, fakakaukau pe ko e hā ha ngaahi lēsoni te ke lava ʻo ako mei heʻene aʻusiá. Tokanga makehe ki he founga naʻá ne fakaʻaongaʻi ai e ngaahi tefitoʻi moʻoni ki hono maʻu ʻo e ʻilo fakalaumālié mo e founga naʻe tokoniʻi ai ia ʻe he Fakamoʻuí.
Tufaki ʻa e laʻipepa tufa ʻoku ʻoatu hení ki he kau akó. Fakakaukau ke fakaʻaliʻali ʻa e ngaahi fehuʻi ko ʻení ʻi he palakipoé ke vakai ki ai ʻa e kau akó ʻi heʻenau ako ʻa e lea ʻa Sisitā Ií. Poupouʻi ʻa e kau akó ke nau fakakaukau ki ha ngaahi founga kehe ʻe lava ke fakaʻaongaʻi ai ʻe ha taha ʻi ha tūkunga tatau ʻa e ngaahi tefitoʻi moʻoni ki hono maʻu ʻo e ʻilo fakalaumālié.
-
Ko e hā naʻe fai ʻe Sisitā Ī ke ngāue ʻi he tuí? Naʻe tokoni fēfē nai ʻa e Fakamoʻuí kiate iá?
-
Ko e hā naʻe fai ʻe Sisitā Ī ke vakai ai ki hono tūkungá ʻi he puipuituʻa ʻo e palani ʻo e fakamoʻuí mo e ngaahi akonaki ʻa e Fakamoʻuí?
-
Ko e hā ha ngaahi maʻuʻanga tokoni kuo fokotuʻu fakalangi naʻe fakafalala ki ai ʻa Sisitā Ī? Naʻe tokoni fēfē nai ʻa e ngaahi maʻuʻanga tokoni ko ʻení ke ne maʻu ha mahino pe fakakaukau fekauʻaki mo hono tūkungá?
Fakakaukau ke fakaʻaongaʻi ha taha ʻo e ngaahi fakakaukau ko ʻení ke tokoni ki he kau akó ke nau ʻiloʻi ʻa e founga naʻe fakaʻaongaʻi ai ʻe Sisitā Ī ʻa e ngaahi tefitoʻi moʻoni ki hono maʻu ʻo e ʻilo fakalaumālié:
-
Fakapapauʻi fakakalasi ha ngaahi founga makehe ke fakaʻilongaʻi ʻaki ʻa e founga naʻe fakaʻaongaʻi ai ʻe Sisitā Ī ʻa e tefitoʻi moʻoni takitaha ki hono maʻu ʻo e ʻilo fakalaumālié. Hangē ko ʻení, te ke lava ʻo laineʻi ha tefitoʻi moʻoni ʻe taha, tā ha puha ʻi ha taha, pea siakaleʻi ha taha. Te ke lava foki ʻo fakaʻaongaʻi ha ngaahi lanu kehekehe ke fakaʻilongaʻi ʻaki e tefitoʻi moʻoni takitaha. Fakaafeʻi ʻa e kau akó ke nau ako e toenga ʻo e laʻipepa tufá, ʻo kumi mo fakaʻilongaʻi e ngaahi sīpinga ʻo e tefitoʻi moʻoni takitaha.
-
Vahe ki he kau akó pe ngaahi kulupu ʻo e kau akó ha tefitoʻi moʻoni kehe ʻo hono maʻu ʻo e ʻilo fakalaumālié. ʻI heʻenau ako e lea ʻa Sisitā Ií, fakaafeʻi kinautolu ke hiki ʻa e meʻa naʻá ne fai ke fakaʻaongaʻi ai ʻa e tefitoʻi moʻoni ko iá.
-
Te ke lava ʻo huluʻi ʻa e foʻi vitiō ʻo e lea ʻa Sisitā Ií, kae ʻikai fakaʻaongaʻi e laʻipepa tufá. Fakaafeʻi ʻa e kau akó ke nau fakafanongo ki ha ngaahi founga naʻá ne fakaʻaongaʻi ai e ngaahi tefitoʻi moʻoni ki hono maʻu ʻo e ʻilo fakalaumālié. ʻE lava ke hiki ʻe he kau akó honau nimá ʻi he taimi ʻoku nau fanongo ai ki ha ngaahi sīpingá, pea te ke lava ʻo kiʻi taʻofi ʻa e vitioó pea ʻai ke nau vahevahe ʻa e meʻa ne nau maʻú.
Hoihoifua ko e fetongi ʻo e Efuefú: Ko e Halanga Faifakamoʻui ʻo e Fakamolemolé
ʻI he fakalau e ngaahi taʻú pea ʻi heʻeku feinga ke maʻu ha nonga mo e fakamoʻui ʻi he hala ko ia ʻo e fakamolemolé, ne u ʻiloʻi ai ʻi ha founga mahuʻinga ko e ʻAlo tatau pē ʻo e ʻOtuá ʻa ia naʻá Ne fakalelei ʻeku ngaahi angahalá, ko e Huhuʻi tatau pē ia te Ne fakahaofi ʻa kinautolu ne nau fakamamahiʻi lahi aú. Naʻe ʻikai ke u lava ʻo tui ki he moʻoni ʻuluakí taʻe te u tui ki he moʻoni hono uá.
ʻI he tupulaki ko ia ʻeku ʻofa ki he Fakamoʻuí, kuo tupulaki foki ai mo ʻeku holi ke fakafetongi e mamahí mo e ʻitá ʻaki ʻEne lolo faifakamoʻuí. Ko ha ngāue faingataʻa ia ʻi ha ngaahi taʻu lahi, naʻe fiemaʻu ki ai ʻa e loto-toʻá, fakavaivaí, faʻa kātakí, mo e ako ke falala ki he mālohi faka-ʻOtua ʻo e fakamoʻuí ke fakahaofi mo fakamoʻuí. ʻOku kei ʻi ai pē ʻeku ngāue ke fai, ka kuo ʻikai ke u toe maʻu ʻa e loto-ʻitá mo e tāufehiʻá. Kuo foaki mai kiate au “ha loto foʻou” [ʻIsikeli 36:26]—ko ha loto kuó ne ongoʻi ʻa e ʻofa loloto mo tāumaʻu ʻo ha Fakamoʻui fakataautaha, ʻa ia kuó Ne ʻi hoku tafaʻakí, kuó Ne tataki au ʻi he angavaivai mo e faʻa kātaki ki ha feituʻu lelei ange, kuó Ne tangi mo au, kuó Ne ʻafioʻi ʻeku loto-mamahí. …
Naʻe pehē ʻe ʻEletā Lisiate G. Sikoti: “He ʻikai te ke lava ʻo tamateʻi ʻa e meʻa kuo ʻosi hokó, ka te ke lava ʻo fakamolemoleʻi. ʻOku fakamoʻui ʻe he fakamolemolé ʻa e ngaahi kafo fakalilifu mo fakamamahí, he ʻoku lava ai ʻa e ʻofa ʻa e ʻOtuá ke fakamaʻa ʻa e kona ʻo e tāufehiʻá mei ho lotó mo e ʻatamaí. ʻOkú ne fakamaʻa ho konisēnisí mei he holi ke sāuní. ʻOkú ne fakaʻatā ha potu ki he fakahaohaoá, fakamoʻuí mo e ʻofa taumamaʻo ʻa e ʻEikí” [“Healing the Tragic Scars of Abuse,” Ensign, May 1992, 33].
Kuo maʻu foki ʻe heʻeku tamai ʻi māmaní ha liliu fakaofo ʻi he lotó ʻi he ngaahi taʻu kimuí ni maí pea kuó ne tafoki ki he ʻEikí—ko ha meʻa naʻe ʻikai te u ʻamanaki ki ai ʻi he moʻuí ni. Ko ha fakamoʻoni ia ʻe taha kiate au ʻo e mālohi fakaʻaufuli mo liliu-moʻui ʻo Sīsū Kalaisí.
ʻOku ou ʻiloʻi ʻokú Ne malava ke fakamoʻui ʻa e tokotaha faiangahalá pea mo kinautolu kuo fai ki ai ʻa e angahalá. Ko Ia ʻa e Fakamoʻui mo e Huhuʻi ʻo e māmaní, ʻa ia naʻá Ne foaki ʻEne moʻuí kae lava ke tau toe moʻuí. Naʻá Ne folofola, “ʻOku ʻiate au ʻa e Laumālie ʻo [e ʻEikí], koeʻuhí kuó ne fakanofo au ke u malanga ʻaki ʻa e ongoongoleleí ki he masivá; kuó ne fekau au ke fakamoʻui ʻa e loto mafesí, ke malanga ʻaki ʻa e huhuʻí ki he kau pōpulá, mo e fakaʻā ʻo e kuí, ke vete ange ʻa kinautolu kuo laveá” [Luke 4:18; tānaki atu hono fakamamafaʻí].
ʻOkú Ne ʻomi ʻa e fakamoʻuí, fakaakeaké mo e fakahaofí kiate kinautolu kotoa pē ʻoku loto-mamahí, pōpulá, kafó pea mahalo kuo fakakuihi ʻe he mamahí pe angahalá. ʻOku ou fakamoʻoni ʻoku moʻoni ʻa e fakamoʻui mo e fakaakeake ʻokú Ne ʻomí. Ko e taimi ʻo e fakamoʻui ko iá ʻoku kehekehe ia ki he tokotaha kotoa pē, pea he ʻikai lava ke tau fakamaauʻi ʻa e taimi ʻa ha taha kehe. ʻOku mahuʻinga ke tau fakaʻataʻatā maʻatautolu ʻa e taimi ke fakamoʻui aí pea mo angaʻofa pē kiate kitautolu lolotonga ʻene hoko iá. ʻOku ʻaloʻofa mo tokanga maʻu pē ʻa e Fakamoʻuí pea mateuteu ke ʻomi ʻa e tokoni ʻoku tau fiemaʻú.
ʻI he hala ʻo e fakamolemolé mo e fakamoʻuí, ʻoku ʻi ai ha fili ke ʻoua naʻa fakatolonga ʻa e ngaahi sīpinga pe vā fetuʻutaki ʻoku ʻikai moʻui leleí ʻi hotau fāmilí pe ʻi ha toe feituʻu pē. Te tau lava ʻo fakahaaʻi kiate kinautolu kotoa pē ʻoku tau lava ʻo tākiekiná ʻa e angaʻofá ko e fetongi ʻo e anga-taʻeʻofá, ʻofá ko e fetongi ʻo e tāufehiʻá, angavaivaí ko e fetongi ʻo e angamālohí, malú ko e fetongi ʻo e loto-hohaʻá, mo e melinó ko e fetongi ʻo e fekeʻikeʻí.
Ko e foaki ko ia ʻo e meʻa kuo fakasītuʻaʻi meiate koé ko ha konga mahuʻinga ia ʻo e fakamoʻui fakalangí ʻa ia ʻoku malava ʻo fakafou ʻi he tui kia Sīsū Kalaisí. Ko e moʻui ʻi ha founga ʻokú te foaki ai ʻa e hoihoifuá ko e fetongi ʻo e efuefú, hangē ko ia ne lea ʻaki ʻe ʻĪsaiá, [vakai, ʻĪsaia 61:3] ko ha ngāue ia ʻo e tuí ʻoku muimui ʻi he sīpinga fungani ʻo ha Fakamoʻui kuó Ne kātekina e meʻa kotoa pē kae lava ke Ne tokoniʻi ʻa e tokotaha kotoa pē. …
ʻOku ou fakamoʻoni ko e sīpinga maʻongoʻonga taha ʻo e ʻofá mo e fakamolemolé ʻa hotau Fakamoʻui ko Sīsū Kalaisí, ʻa ia naʻá Ne folofola ʻi Heʻene mamahi faingataʻaʻiá, “ʻE Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí” [Luke 23:34]. (Kristin M. Yee, “Hoihoifua ko e fetongi ʻo e Efuefú: Ko e Halanga Faifakamoʻui ʻo e Fakamolemolé,” Liahona, Nōvema. 2022, 37–38)
Hili hono vahevahe ʻe he kau akó ʻa e meʻa naʻa nau maʻú, fakaafeʻi kinautolu ke nau feinga ke ʻiloʻi ʻa e ngaahi potufolofola fakataukei fakatokāteline mahuʻingá pea fakamatalaʻi ʻa e founga ʻe lava ke tokoniʻi ai ʻe he ngaahi potufolofola ko ʻení ha taha ʻi he faʻahinga tūkunga pehení. ʻOku kau ʻi he ngaahi sīpingá ʻa e Tokāteline mo e Ngaahi Fuakava 6:36 mo e Tokāteline mo e Ngaahi Fuakava 64:9–11.
-
Naʻe tokoni fēfē nai kiate koe ke ke ako ha sīpinga ʻo hono fakaʻaongaʻi ʻe ha taha ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ʻi ha aʻusia ne nau fehangahangai mo ia?
-
ʻE tokoniʻi fēfē nai koe ʻe hono fakaʻaongaʻi ʻo e ngaahi tefitoʻi moʻoni ko ʻení ʻi he ngaahi tūkunga ʻokú ke fehangahangai mo iá?