“Lēsoni 82—Tokāteline mo e Ngaahi Fuakava 71: Ko e Tali Kiate Kinautolu ʻOku Nau Fakaangaʻi ʻa e Siasi ʻo e Fakamoʻuí,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 71,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 82: Tokāteline mo e Ngaahi Fuakava 71–75
Tokāteline mo e Ngaahi Fuakava 71
Ko e Tali Kiate Kinautolu ʻOku Nau Fakaangaʻi ʻa e Siasi ʻo e Fakamoʻuí
ʻI he faʻahitaʻu momoko ʻo e 1831, naʻe tufaki ai ha ngaahi tohi mo ha fakamatala loi fekauʻaki mo Siosefa Sāmita mo e Siasí ʻi he feituʻu Ketilaní. ʻI he Tokāteline mo e Ngaahi Fuakava 71, naʻe fakahinohinoʻi ai ʻe he Fakamoʻuí ʻa Siosefa Sāmita mo Sitenei Likitoni ke na fononga holo ʻi he vahefonuá, ʻo fakatonutonu ʻa e ngaahi meʻa halá (vakai, veesi 1–2). ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻoku finangalo ai ʻa e Fakamoʻuí ke tau tali ʻaki ʻi he taimi ʻoku fakaangaʻi ai ʻe he kakaí ʻetau tuí.
Ngaahi ʻEkitivitī Ako ʻOku Ala Fakahokó
Ko hono tali ʻo e ngaahi fakaanga ki he Siasi ʻo e Fakamoʻuí
Ke tokoni ke mahino ki he kau akó ʻa e puipuituʻa fakahisitōlia ʻo e Tokāteline mo e Ngaahi Fuakava 71, vahevahe ʻa e palakalafi ko ʻení pe fakamatalaʻi fakanounou ia ʻi he lea pē ʻaʻau.
Naʻe fakautuutu ke lahi ange ʻa e fakatanga kia Siosefa Sāmita mo e Kāingalotu ʻi Ketilaní ʻi he faʻahitaʻu momoko ʻo e 1831. Naʻe kamata ke mavahe ha Kāingalotu ʻe niʻihi mei he Siasí, kau ai ʻa ʻĒsela Puuti mo Saimone Laita. Naʻe kamata hono pulusi ʻe Puuti ha ngaahi tohi ʻo fakafepakiʻi ʻa Siosefa mo feinga ke liua e ngāue ʻa e ʻEikí (vakai, History, 1838–1856 [Manuscript History of the Church], volume A-1, 153–54, josephsmithpapers.org). Naʻe kole faleʻi ʻa Siosefa ki he ʻEikí, pea naʻe maʻu ai ʻa e Tokāteline mo e Ngaahi Fuakava 71.
-
Naʻá ke mei fie tali fēfē nai ʻa e ngaahi ʻohofi ki he Siasi ʻo e Fakamoʻuí mo Siosefa Sāmitá?
Fakaafeʻi ʻa e kau akó ke vahevahe ha ngaahi sīpinga ʻo ha taimi ne nau siotonu ai ʻi hono fakaangaʻi ʻo e Siasí pe ongoongoleleí. Kole ki he kau akó ke nau fakalaulauloto ki he founga ʻoku nau pehē ʻoku finangalo ʻa e Fakamoʻuí ke nau fakahoko ai ha tali ʻi he taimi ʻoku anga taʻeʻofa ai e kakaí fekauʻaki mo ʻenau ngaahi tui fakalotú. Fakaafeʻi ha fealēleaʻaki nounou ʻi hono tali ʻe he kau akó ʻa e ngaahi fehuʻi ko ʻení.
-
Te tau ʻilo fēfē nai ʻa e founga lelei taha ke fehangahangai ai mo e ngaahi tūkungá ʻi he taimi ʻoku fakaangaʻi ai ʻe he niʻihi kehé ʻetau tuí pe vahevahe ha fakamatala loi fekauʻaki mo e Siasi ʻo e Fakamoʻuí?
-
ʻOkú ke pehē ko e fē ʻa e taimi ʻoku lelei ange ai ke tukunoaʻi ʻa e fakaangá?
Fakalaulauloto ki he loto-falala ʻokú ke maʻu ʻi hoʻo ʻiloʻi ʻa e founga naʻe mei tali ʻaki ʻe Sīsuú. ʻI hoʻo akó, kumi ʻa e ngaahi founga kehekehe ʻoku akoʻi mai ʻe he Fakamoʻuí ke tau tali ʻakí.
ʻOku akoʻi kitautolu ʻe he Fakamoʻuí ke tau lea pea vahevahe ʻEne ongoongoleleí
Lau ʻa e Tokāteline mo e Ngaahi Fuakava 71:1–3, pea kumi ʻa e founga naʻe finangalo ʻa e Fakamoʻuí ke tali ʻaki ʻe Siosefa mo Sitenei ʻa e ngaahi loi naʻe fakamafola fekauʻaki mo e Siasí ʻi he taimi ko iá.
-
Ko e hā ʻa e meʻa naʻe mahuʻinga kiate koé?
-
Fakatatau ki he veesi 1, ko e hā naʻe ʻomi ʻe he Fakamoʻuí ke tokoni kia Siosefa mo Sitenei ke na ʻilo ʻa e founga ke tali ʻakí?
-
ʻOku tokoni fēfē nai e faleʻi ʻa e Fakamoʻuí kiate kitautolu ʻi hotau kuongá?
Tokoni ke ʻiloʻi ʻe he kau akó ʻa e foʻi moʻoni ko ia ʻe akoʻi kitautolu ʻe he Fakamoʻuí ʻo fakafou ʻi he folofolá mo e Laumālié pea mo e founga ke tali ʻaki kiate kinautolu ʻoku fakaangaʻi Hono Siasí.
-
ʻOkú ke pehē ko e hā ʻoku hoko ai hono fakaʻaongaʻi ʻo e folofolá mo e muimui ki he ngaahi ueʻi ʻa e Laumālié ko e founga lelei taha ke tali ʻaki ʻa e fakaangá?
-
Ko e hā ha ngaahi founga ʻe lava ke tokoniʻi ai ʻe he ivi tākiekina ʻo e Laumālié ʻa e founga ʻo ʻetau tali ki he fakaangá?
Fakakaukau ke fakaafeʻi ha tokotaha ako ke ne hiki ʻa e “Ko e Tali ʻi he founga ʻa e Fakamoʻuí” ʻi he tafaʻaki ki ʻolunga ʻo e palakipoé. Te ke lava foki ʻo ʻai ke tohi ʻe he kalasí ʻa e ʻuluʻi tohi ko ʻení ʻi ha peesi ʻo ʻenau tohinoa akó. ʻE lava ke kamataʻi ʻe he kau akó ha lisi ʻaki hono tohi ʻa e “fakaʻaongaʻi ʻo e folofolá” mo e “muimui ki he Laumālié” ʻi he ʻuluʻi tohi ko ʻení. ʻI hono fakaʻaongaʻi ʻe he kau akó ʻa e lisi naʻa nau faʻú, te nau maʻu ai ha faingamālie ke fakaangaanga ki hono tali e ngaahi tūkungá ʻi he founga ʻa e Fakamoʻuí.
Naʻe fakaʻaongaʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fakaʻilonga fakafolofola ʻo e ngaahi ngahau velá ke fakamatalaʻi ʻaki hono fakaangaʻi ʻe he niʻihi kehé ʻa ʻetau tuí. ʻI hoʻo ako ʻa e fakamatala ko ʻení, fakakaukau ki he meʻa te ke lava ʻo tānaki ki he lisi “Ko e Tali ʻi he founga ʻa e Fakamoʻuí.”
ʻI he pā ʻo ʻetau tui kia Sīsū Kalaisí, ʻoku tau hoko ai ko e kau faʻa fakalelei, [ʻo] fakamaʻumaʻu … e ngaahi ngahau vela kotoa pē ʻa e tokotaha angakoví [vakai, ʻEfesō 6:16; Tokāteline mo e Ngaahi Fuakava 3:8]. …
ʻOku fakanonga mo fakafiemālieʻi fēfē nai ʻe he tokotaha faʻa fakaleleí ʻa e ngaahi ngahau velá? Ko hono moʻoní he ʻikai lava ia ʻi he mavahe pē meiate kinautolu ʻoku nau talanoa tukuhifoʻi kitautolú. Ka ʻoku tau tuʻu maʻu ʻi heʻetau tuí, vahevahe atu ʻetau tuí ʻi he loto fakapapau, kae fakamamaʻo maʻu pē mei he ʻitá pe tāufehiʻá. …
ʻOku ʻikai ke fakalongolongo pē ʻa e kau faʻa fakaleleí; ka ʻoku nau fakalotoa ʻi he founga ʻa e Fakamoʻuí.
Ko e hā ha mālohi ʻi loto ke ne fakafiemālieʻi, fakanonga, mo tamateʻi ʻa e ngaahi ngahau vela ʻoku fakataumuʻa mai ki he ngaahi moʻoni ʻoku tau ʻofa aí? ʻOku maʻu ʻa e mālohi ko iá mei heʻetau tui kia Sīsū Kalaisí mo ʻetau tui ki Heʻene ngaahi folofolá. (Neil L. Andersen, “Muimui ʻia Sīsū: Hoko ko ha Tokotaha Faʻa Fakalelei,” Liahona, Mē 2022, 17–18)
Fakaafeʻi ʻa e kau akó ke nau aleaʻi ʻa e meʻa te nau tānaki ki he lisí hili ʻenau toe vakaiʻi e lea ʻa ʻEletā ʻEnitasení. Te ke lava ʻo fai ha fehuʻi hangē ko ʻení:
-
Te ke lava fēfē nai ʻo hoko ko ha tokotaha faʻa fakalelei ʻi hoʻo tali ki he niʻihi kehé?
Lau ʻa e Tokāteline mo e Ngaahi Fuakava 71:4–7, pea kumi ʻa e meʻa naʻe akoʻi ʻe he ʻEikí kia Siosefa Sāmita mo Sitenei Likitoni ʻi he tūkunga pau ko ʻení ke tokangaekina e fakamatala hala kuo pulusí.
-
Ko e hā ʻa e meʻa naʻá ke ʻiló?
-
Ko e hā ha fehokotaki ʻokú ke vakai ki ai ʻi he faleʻi ʻa e Fakamoʻuí ʻi he ngaahi veesi ko ʻení mo e ngaahi akonaki ʻa ʻEletā ʻEnitasení?
Fakamamafaʻi ʻa e sīpinga ʻa Sīsū Kalaisí: Ko e ʻekitivitī ko ʻení ko ha faingamālie ia ke fakamamafaʻi ai ʻa e sīpinga ʻa Sīsū Kalaisí. Ki ha akoako lahi ange heni, vakai ki he ako ʻoku ui ko e “Fakamamafaʻi ʻa e sīpinga ʻa Sīsū Kalaisí” ʻi he Fakatupulaki Ngaahi Taukei ʻa e Faiakó: Tokanga Taha kia Sīsū Kalaisi. Fakakaukau ke akoako ʻa e taukei “Tokoniʻi e kau akó ke fakafehokotaki ʻa e meʻa ʻoku nau akó mo e founga hono fakahaaʻi ʻe Kalaisi ʻa e tefitoʻi moʻoní.”
Ke tokoni ke ʻiloʻi ʻe he kau akó ha ngaahi tali faka-Kalaisi lahi ʻe lava ʻo tokoni ke nau maluʻi ʻenau tuí, fakakaukau ke fokotuʻutuʻu ʻa e kalasí ki ha ngaahi kulupu ki he ʻekitivitī ko ʻení.
Poupouʻi ʻa e kau akó ke nau fakaʻaongaʻi ʻa e folofolá ke kumi ha ngaahi sīpinga pe akonaki ʻoku fakahaaʻi ai ha ngaahi founga kehekehe naʻe tali ʻaki ʻe he Fakamoʻuí mo ʻEne kau ākongá ʻa e fakaangá. Kapau ʻoku fiemaʻu ʻe he kau akó ha fakahinohino lahi ange, te ke lava ʻo fakaʻaliʻali ha niʻihi ʻo e ngaahi potufolofola ko ʻení ʻoku nau fakamatalaʻi ʻa e ngaahi aʻusia mo e ngaahi akonaki ʻa e Fakamoʻuí ke nau akó.
Fakaafeʻi ʻa e kau akó ke nau aleaʻi ʻa e meʻa ʻoku nau ʻiló mo ʻenau kulupú pea fili leva ha taki fealēleaʻaki ke vahevahe ʻa e fakamatalá mo e kalasí.
-
Mātiu 4:3–11 (Ko e tali ʻe Sīsū ʻa e ngaahi ʻahiʻahi ʻa Sētané ʻaki ʻa e folofolá.)
-
Luke 23:8–10 (ʻAfio ʻa Sīsū ʻi he ʻao ʻo Hēlotá, ʻo fakalongolongo pē.)
-
Sione 8:2–11 (Sīsū, ʻi hono fakafehuʻia ʻe ha kau taki ʻo e kakai Siú, ʻi Heʻene fakahaofi ʻa e moʻui ʻa ha fefine.)
-
Tokāteline mo e Ngaahi Fuakava 100:5–7 (ʻOku talaʻofa ʻe he ʻEikí te Ne ʻomi kiate kitautolu ʻa e ngaahi lea ke tau lea ʻakí kapau te tau lea ʻi Hono huafá.)
-
Tokāteline mo e Ngaahi Fuakava 121:41–45 (Ko e ʻomi ʻe he ʻEikí ha faleʻi ki he founga hono fai ʻo e fakatonutonú.)
Fakakaukau ke fakaafeʻi ʻa e kau taki ʻo e kulupú ke nau vahevahe mo e kalasí ʻa e meʻa ne nau aleaʻí pea tānaki atu ki he lisi ʻo e ngaahi tali ʻoku tāú ʻi he palakipoé. Fakamanatu ki he kau akó ʻoku ʻi ai ha ngaahi taimi ʻe ueʻi ai kitautolu ʻe he Laumālié ke tau fakalongolongo kae ʻikai fakatonutonu tauʻatāina ʻa e meʻa ʻoku lea ʻakí.
Akoako tali ʻi he founga ʻa e Fakamoʻuí
Ke tokoni ke fakahaaʻi ʻe he kau akó ʻa e mahino ʻoku nau maʻu ki he tefitoʻi moʻoni naʻe ako ʻi he ʻaho ní, te ke lava ʻo ʻoange pe fakaʻaliʻali ʻa e ngaahi tūkunga ko ʻení. ʻI hono aleaʻi ʻe he kau akó ha ngaahi founga kehekehe te tau ala tali ʻakí, poupouʻi kinautolu ke fekumi ʻi he lisi naʻa nau faʻu kimuʻa angé ki ha ngaahi fakakaukau. Tokoni ke mahino kiate kinautolu ʻe lava ke lahi ha ngaahi founga totonu ki hono tali ʻo e tūkunga takitaha. ʻE lava ke tokoniʻi kitautolu ʻe he Laumālié ke tau ʻiloʻi ʻa e meʻa ʻoku finangalo ʻa e Tamai Hēvaní ke tau fai pe lea ʻakí ʻi he taimi ʻoku hoko ai ha ngaahi tūkungá.
Te ke lava ʻo faʻu ha ngaahi tūkunga kehekehe te nau feau lelei ange ʻa e ngaahi fiemaʻu hoʻo kalasí pe tānaki ha ngaahi fakaikiiki ki he ngaahi tūkunga ʻi laló ke fakatupulaki e tokanga ʻa e kau akó. Te ke lava foki ʻo ʻai ke faʻu ʻe he kalasí haʻanau ngaahi tūkunga mei heʻenau ngaahi aʻusia fakatāutahá. Mahalo naʻa taau ke fakaafeʻi ʻa e kau akó ke vahevahe ʻenau ngaahi aʻusia ʻi he kuohilí.
Vahevahe ha ngaahi founga kehekehe te ke ala tali ʻaki ʻa e ngaahi tūkunga takitaha ko ʻení ʻi ha founga faka-Kalaisi:
-
ʻOkú ke tuku hake ha tā ʻo e temipalé ʻi he mītia fakasōsialé, pea ʻoku tali ia ʻe ha taha ʻaki haʻane fakaangaʻi ʻa e Siasí ʻi he ngaahi tuʻunga moʻui māʻolunga ʻoku fiemaʻu kae toki hū ki he temipalé.
-
ʻOku lea ʻaki ʻe ha faʻētangata ʻi ha fakataha fakafāmili ha ngaahi meʻa taʻeʻofa fekauʻaki mo e Palōfita ko Siosefa Sāmitá.
-
ʻOku pehē ʻe ha kaungāmeʻa ʻoku fakavalevale ke tui ki ha ʻOtua he ʻikai ke ke lava ʻo fakamoʻoniʻi ʻoku moʻui.
-
ʻOku talaange ʻe ha taha ʻi hoʻo ngāueʻangá ki ho kaungā-ngāué ʻoku ʻikai ko ha kau Kalisitiane ʻa e Kau Māʻoniʻoni ʻi he Ngaahi ʻAho Kimui Ní.
ʻI he taimi totonu pē ʻa e Fakamoʻuí
Naʻe talangofua ʻa Siosefa Sāmita mo Sitenei Likitoni ki he fakahā naʻá na maʻú. Naʻá na fononga ʻi he feituʻu kotoa pē, ʻo malanga ʻaki e ongoongolelei ʻa e Fakamoʻuí mo fakatonutonu ʻa e ngaahi meʻa hala kuo fakamafolá.
Lau ʻa e Tokāteline mo e Ngaahi Fuakava 71:8–11, pea kumi ʻa e fakapapau ʻoku fai ʻe he Fakamoʻuí kiate kinautolu kotoa pē ʻoku nau taukaveʻi Hono Siasí mo ʻEne ongoongoleleí.
-
Ko e hā ʻoku akoʻi atu ʻe he ngaahi veesi ko ʻení fekauʻaki mo Sīsū Kalaisi mo ʻEne ngāué?
-
ʻOkú ke pehē ʻoku ʻuhinga ki he hā he ʻikai tuʻumālie ha leʻo pe meʻatau ʻoku fakafepaki kiate kitautolú (vakai, veesi 9–10)?
Tokoni ke mahino ki he kau akó neongo kapau ʻoku ʻikai ke nau maʻu ʻa e tali haohaoá ki ha taha, ka he ʻikai fakaʻatā ʻe he Fakamoʻuí ʻa e ngaahi fili ʻo Hono Siasí ke nau tuʻumālie ʻo taʻengata. ʻOku talaʻofa ʻe he Fakamoʻuí ʻe “veuveuki [ʻa e kau fakaangá] ʻi [Hono] taimi totonu pē [ʻOʻoná]” (veesi 10).
-
Ko e hā naʻá ke ako ʻi he ʻahó ni ʻe lava ʻo tokoni atu ke ke fehangahangai mo ha ngaahi tūkunga ʻi he taimi ʻoku fakaangaʻi ai ʻe ha taha ʻokú ke ʻiloʻi, ʻa e Siasí pe ko e ngaahi akonaki ʻa e Fakamoʻuí?
Te ke lava ʻo fakaʻosi e kalasí ʻaki hono poupouʻi ʻa e kau akó ke muimui ki he faleʻi ʻa e Fakamoʻuí ʻi he taimi ʻoku nau fehangahangai ai mo ha ngaahi tūkunga ʻoku fakaangaʻi ai ʻe he niʻihi kehé ʻa e Siasí mo e ongoongoleleí. Te ke lava ʻo vahevahe hoʻo fakamoʻoní ki he mālohi kuo foaki kiate kinautolu te nau taukaveʻi ʻenau tuí ʻo hangē ko ia naʻe mei fai ʻe he Fakamoʻuí.