“Lēsoni 91—Tokāteline mo e Ngaahi Fuakava 82:1–7: ‘Ko Ia ʻOku Foaki Ki Ai ʻa e Meʻa Lahí ʻOku ʻEkeʻi ʻa e Meʻa Lahi Meiate Ia,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 82:1–7,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 91: Tokāteline mo e Ngaahi Fuakava 81–83
Tokāteline mo e Ngaahi Fuakava 82:1–7
“Ko Ia ʻOku Foaki Ki Ai ʻa e Meʻa Lahí ʻOku ʻEkeʻi ʻa e Meʻa Lahi Meiate Ia”
ʻI ʻEpeleli ʻo e 1832, naʻe fononga ʻa e Palōfita ko Siosefa Sāmitá mo ha niʻihi kehe ki Tauʻatāina, Mīsuli. Naʻa nau muimui ki he fekau ʻa e ʻEikí ke fokotuʻu ha kautaha ke langa hake ʻa Saione mo tokangaʻi ʻa e masivá (vakai, Tokāteline mo e Ngaahi Fuakava 78). Hili e tokoni ʻa e Palōfitá ke fakaleleiʻi ha ngaahi fakakikihi ʻi he vahaʻa ʻo e kāingalotú, naʻá ne maʻu ʻa e fakahā ko ʻení naʻe fakamatalaʻi ai e finangalo ʻo e ʻEikí ki Hono kakaí. ʻE lava ke tokoni ʻa e lēsoni ko ʻení ke mahino ki he kau akó e ngaahi founga kuo tāpuekina ai kinautolu ʻe he ʻEikí mo e founga ʻokú Ne finangalo ke nau fakaʻaongaʻi ai e ngaahi tāpuaki ko iá.
Ngaahi ʻEkitivitī Ako ʻOku Ala Fakahokó
Ko e meʻa kuo foaki atu ʻe he ʻEikí
Ke tokoni ke teuteuʻi ʻa e kau akó ki he lēsoni ko ʻení, fakakaukau ke hivaʻi ha himi fekauʻaki mo e ngaahi tāpuaki kuo foaki ʻe he ʻEikí. Ko ha sīpinga ʻe taha ʻa e “Kuo Lahi Hoku Tāpuakí” (Ngaahi Himí, fika 126). ʻE lava ke hoko ʻa e himí ko ha konga ʻo ha fakataha lotu.
Fakaafeʻi ha kau ako ʻe toko tolu ke nau tuʻu ʻi muʻa he kalasí. ʻOange ki he taha ha tatau ʻo e Tohi ʻa Molomoná, ʻoange ki he taha ha sila mo ha paʻanga lahi ʻoku tohiʻi ʻi tuʻa (hangē ko e, $1,000,000), pea ki he taha leva ha ngaahi foʻi lole.
-
Makatuʻunga ʻi he meʻa kuo foaki ange kiate kinautolú, ko e hā ʻokú ke ʻamanaki ʻe fai ʻe he kau ako ko ʻení?
Fakakaukau ke fakaafeʻi ʻa e kau ako ʻi muʻa ʻi he kalasí ke vahevahe ha foʻi fakakaukau ʻe taha pe ua ʻo e founga te nau lava ai ʻo tāpuekina e niʻihi kehé ʻaki e meʻa kuo foaki angé.
Fakamahinoʻi ange he ʻikai ke tau maʻu ʻa e ʻamanaki tatau ki ha taha kuo teʻeki ke ne maʻu ʻa e ngaahi meʻa tatau.
ʻI heʻetau hoko ko e fānau ʻa e Tamai Hēvaní mo e kāingalotu ʻo Hono Siasí, kuo lahi ha ngaahi meʻa kuo foaki mai maʻatautolu. Fakaafeʻi ʻa e kau akó ke fakaʻaongaʻi ha ngaahi miniti siʻi ke hiki e ngaahi tāpuaki kuo nau maʻu mei he ʻEikí. ʻE ala tokoni ke fokotuʻu ha ngaahi kulupu ʻe niʻihi ke fakakaukau ki ai e kau akó ʻi heʻenau hiki ʻenau lisí (hangē ko ʻení, ngaahi tāpuaki ʻo e kau ki he Siasí, ngaahi aʻusia fakalaumālie kuo nau maʻú, kakai ʻoku nau tāpuekina ʻenau moʻuí, koloa fakamāmaní mo e ngaahi faingamālie ʻoku nau maʻú, mo e alā meʻa peheé).
Fakaʻaliʻali e ngaahi fehuʻi ko ʻení ke fakalaulauloto ki ai ʻa e kau akó.
Fakalaulauloto ki he ngaahi fehuʻi ko ʻení:
-
Kuo tokoniʻi fēfē koe ʻe he ngaahi tāpuaki ko ʻení?
-
Ko e hā te nau lava ʻo akoʻi atu fekauʻaki mo e ʻEikí?
-
Ko e hā nai ha founga ʻoku ʻamanaki ʻa e ʻEikí ke kehe ai hoʻo fakafōtungá mei ha taha kuo teʻeki ai ke ne maʻu ʻa e ngaahi tāpuaki ko ʻení?
ʻI hoʻo ako ʻa e lēsoni ko ʻení, fekumi ki ha ngaahi fakakaukau lahi ange kau ki he ngaahi fehuʻi ko ʻení.
Tokāteline mo e Ngaahi Fuakava 82
Fakakaukau ke fakamatalaʻi fakanounou e fakamatala ko ʻení:
Naʻe maʻu ʻe he Kāingalotú ʻi he taimi ko ʻení ha ngaahi tāpuaki maʻongoʻonga mei he ʻEikí. Naʻe kau ʻi he ngaahi tāpuaki ko ʻení ʻa e Siasi kuo fakafoki maí, tohi ʻa Molomoná, mo ha palōfita moʻui ʻokú ne fakahā ʻa e ngaahi folofola ʻa e ʻEikí. Ka neongo ia, naʻa nau kei faingataʻaʻia pē ke moʻui ʻi he founga naʻe finangalo ki ai ʻa e ʻEikí. Ko ha ngaahi sīpinga ʻeni ʻe niʻihi:
-
Naʻe lau māhina e tupulaki ʻa e ngaahi ongo taʻeʻofá ʻia Sitinei Likitoni ʻi ʻOhaioó pea mo Pīsope ʻEtuate Pātilisi ʻi Mīsulí. Naʻá na toki fakalelei kimuí ni mai.
-
Naʻe fakaangaʻi ʻe ha niʻihi e kāingalotu ʻo e Siasí ʻi Mīsulí ʻa Siosefa Sāmita.
-
ʻI he hiki ʻa e kāingalotu ʻo e Siasí ki Mīsulí, naʻe ʻikai talangofua honau tokolahi ki he faleʻi mo e ngaahi fekau ʻa e ʻEikí, kau ai hono moʻui ʻaki ʻa e fono ʻo e fakatapuí.
Naʻe fononga ʻa e Palōfita ko Siosefa Sāmitá mo ha kau taki kehe ʻo e Siasí ki Mīsuli ʻo fakahoko ai ha fakataha alēlea ʻa e kau taulaʻeiki lahi ʻo e Siasí. Naʻe maʻu ʻa e fakahā ʻi he Tokāteline mo e Ngaahi Fuakava 82 lolotonga e fakataha hoʻataá.
Lau ʻa e Tokāteline mo e Ngaahi Fuakava 82:1–7, ʻo kumi ʻa e meʻa naʻe fiemaʻu ʻe he ʻEikí mei he Kāingalotú koeʻuhí kuo tāpuekina lahi kinautolu.
-
Ko e hā ʻokú ke ako mei he ngaahi veesi ko ʻení?
ʻE lava ke vahevahe ʻe he kau akó ha ngaahi moʻoni kehekehe. Fehuʻi ange pe ko e hā ʻoku mahuʻinga ai ke mahino ʻa e ngaahi moʻoni ʻoku nau vahevahé.
Mahalo ʻe vahevahe ʻe he kau akó pe ʻikai ʻa e tefitoʻi moʻoni ko ia ʻoku fiemaʻu ʻe he ʻEikí ha meʻa lahi meiate kinautolu kuó Ne foaki lahi ki aí. Ka ʻikai vahevahe ʻa e kau akó, fakaafeʻi kinautolu ke vahevahe ʻa e meʻa ne nau ako mei he veesi 3.
Kapau ʻe fehuʻi ʻa e kau akó fekauʻaki mo e toe foki ki he ngaahi angahala kimuʻá (vakai, veesi 7), tokoni ke mahino kiate kinautolu kapau ʻoku hokohoko atu ʻetau fai ʻa e angahala tatau, ʻoku fiemaʻu ke hokohoko atu ʻetau fakatomalá. Te tau lava ʻo falala ki he Fakamoʻuí ʻi he faʻa kātaki pea hokohoko atu ʻetau feinga ke fakalakalaká, ʻi heʻetau ʻiloʻi te Ne tokoniʻi kitautolú. (Vakai, Neil L. Andersen, “Fakatomala … Koeʻuhí Ke u Fakamoʻui ʻa Kimoutolu,” Liahona, Nōvema 2009, 40).
-
ʻOkú ke pehē ko e hā ʻoku finangalo ai ʻa e ʻEikí ki he ngaahi meʻa ko ʻení?
-
Ko e hā ʻoku mahuʻinga ai ke mahino ia kiate kitautolú?
Ki ha ngaahi fakakaukau lahi ange, lau ʻa e lea ko ʻeni ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻOku lahi e meʻa ʻoku ʻamanaki mai ʻetau Tamai Hēvaní meiate kitautolú. …
… Ko e taumuʻa ʻa e ʻOtuá kiate kitautolu ko ʻEne fānaú, ke tau lava ʻo aʻusia ʻa e fiefia taupotu tahá, pea nofo mo Ia ʻo taʻengata, pea hoko ʻo hangē pē ko Iá. …
Kapau te tau holi moʻoni mo feinga ke fakahoko e ngaahi ʻamanaki lahi ʻetau Tamai Hēvaní, te Ne fakapapauʻi ʻoku tau maʻu kotoa e tokoni ʻoku tau fie maʻú pe ko e fakafiemālie, fakamālohia, pe tauteaʻi. (D. Todd Christofferson, “Ko Kimoutolu ʻOku Ou ʻOfa aí, ʻOku Ou Valokiʻi mo Tauteaʻi,” Liahona, Mē 2011, 97, 99)
-
Ko e hā ʻoku tokoni ai foki ke manatuʻi e natula mahino mo angaʻofa ʻa e ʻEikí? (vakai, veesi 1, 7).
Ko hono manatuʻi ʻo e meʻa kuo foaki mai ʻe he ʻEikí kiate kitautolú
Ko ha founga ʻeni ʻe taha ke tokoni ke mahino ki he kau akó ʻa e ʻuhinga ʻoku fiemaʻu ai ʻe he ʻOtuá ha meʻa lahi ange meiate kinautolu “kuo foaki ki ai [ha] meʻa lahí” (Tokāteline mo e Ngaahi Fuakava 82:3). ʻE lava ke fakahoko ʻe he kau akó ʻa e ʻekitivitií ʻi ha fanga kiʻi kulupu iiki pe fakafoʻituitui.
Ngaahi Tāpuaki mei he ʻEikí
Fili ha tāpuaki ʻe ua pe lahi ange mei he ngaahi tāpuaki ko ʻení, pe fili ha ngaahi tāpuaki kehe ʻoku ʻikai hiki atu.
-
Ngaahi Folofolá
-
Kau palōfita moʻuí
-
Fakamolemoleʻi ʻo e ngaahi angahalá
-
Ko e meʻafoaki ʻo e Laumālie Māʻoniʻoní
-
Ko ha ʻilo kia Sīsū Kalaisi mo ʻEne Fakalelei maʻatautolú
-
Ngaahi temipalé
Ako ʻi ha ngaahi miniti siʻi fekauʻaki mo e ngaahi tāpuaki naʻá ke filí. Fakaʻaongaʻi e folofolá, ngaahi lea ʻo e konifelenisi lahí, mo ha ngaahi maʻuʻanga tokoni kehe ʻa e Siasí hangē ko e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022). Kumi ʻa e:
-
Ngaahi founga ʻoku fakaleleiʻi ai ʻe he ʻEikí ʻetau moʻuí ʻo fakafou ʻi he ngaahi tāpuaki ko ʻení.
-
Meʻa ʻoku finangalo ki ai ʻa e ʻEikí meiate kinautolu ʻoku foaki ki ai ʻa e ngaahi tāpuaki ko ʻení.
Tānaki atu haʻo ngaahi fakakaukau pē ʻaʻau mei ha ngaahi aʻusia fakataautaha. ʻE lava ke ke fakakau ai ʻa e founga ʻe ala tokoni ai ʻa e kakai ʻoku nau maʻu e ngaahi tāpuaki ko ʻení pe hoko ko ha faʻifaʻitakiʻanga kiate kinautolu kuo teʻeki ke foaki kiate kinautolu ʻa e ngaahi aʻusia mo e ʻilo tatau.
Fakaafeʻi ʻa e kau akó ke vahevahe ʻa e meʻa naʻa nau akó. Ko e founga ʻe taha ʻo hono fai ʻení ko hano kole ki ha tokotaha ʻe loto-fiemālie ke vahevahe, hili iá pea ui ha tokotaha ako ʻoku nau ongoʻi kuó ne hoko ko ha tāpuaki lahi ki he kalasí. Hili iá pea kole ki he tokotaha ako ʻoku fokotuʻu atú pe te ne loto-fiemālie ke vahevahe ʻa e meʻa naʻá ne akó. Fakapapauʻi ʻoku nau ʻiloʻi ʻa e meʻa ʻoku ʻikai ke nau haʻisia ke vahevahé. Toutou fakahoko ʻa e ʻekitivitī ko ʻení.
Kapau ʻe tokoni ke fakaʻaliʻali ha sīpinga ʻo ha taha naʻá ne moʻui ʻaki e tefitoʻi moʻoni ko ʻení, huluʻi ʻa e “Treasures in Heaven: The John Tanner Story” mei he taimi 8:21 ki he 12:24. Fakamatalaʻi ange ko Sione Tená ko ha tangata ia naʻe tāpuakiʻi ʻaki ʻe he ʻEikí ha koloa lahi kimuʻa pea ului ki he ongoongoleleí. Fakaafeʻi ʻa e kau akó ke kumi e founga naʻe fakaʻaongaʻi ai ʻe Sione ʻene koloá.
Finangalo mo e ʻofa ʻa e ʻOtuá
ʻI hono tali ʻe he kau akó ʻa e ngaahi fehuʻi ko ʻení, fakafuofuaʻi ʻa e tuʻunga ʻo ʻenau mahino ki he tefitoʻi moʻoni ʻi he lēsoni ko ʻení. Kumi ha ngaahi founga ke fakamamafaʻi ai e ʻofa ʻa e ʻEikí mo e founga te tau lava ai ʻo tāpuakiʻi lahi ange ʻEne fānaú ʻi heʻetau moʻui ʻo fakatatau ki he meʻa kuó Ne foaki mai maʻatautolú.
Fakahinohinoʻi e kau akó ke nau fakatokangaʻi e ivi tākiekina ʻo e ʻEikí ʻi heʻenau moʻuí: Ki ha ako lahi ange ki he founga ke fakahoko ai ʻení, vakai ki he ako ʻoku ui ko e “Tokoniʻi e kau akó ke ʻilo e ʻofa, mālohi mo e ʻaloʻofa ʻa e ʻEikí heʻenau moʻuí” ʻoku maʻu ʻi he Fakatupulaki Ngaahi Taukei ʻa e Faiakó: Tokanga Taha kia Sīsū Kalaisi. Fakakaukau ke akoako fakahoko ʻa e taukeí. Te ke lava ʻo ʻeke ki he kau akó ha ngaahi fehuʻi ʻoku nofotaha ʻi hono fakafehokotaki e ʻofa, mālohi, mo e ʻaloʻofa ʻa e ʻEikí ʻi heʻenau moʻuí.
-
Ko e hā ʻokú ke houngaʻia ai ʻi he ngaahi finangalo ʻo e ʻEikí?
-
ʻOku fakahaaʻi fēfē ʻe he ngaahi finangalo ʻo e ʻEikí ʻa ʻEne ʻofá?
Fakaafeʻi ʻa e kau akó ke vakai ki heʻenau lisi ʻo e meʻa kuo foaki ange ʻe he ʻEikí kiate kinautolú. Te nau lava ʻo tānaki atu mo ha toe ngaahi tāpuaki ne nau fakakaukau ki ai lolotonga e lēsoní. Kole ange ke nau lekooti e meʻa ʻoku nau fie manatuʻi pe fai koeʻuhí ko e meʻa kuo foaki ange ʻe he ʻEikí maʻanautolú.