“Lēsoni 92—Tokāteline mo e Ngaahi Fuakava 82:8–24: ‘Ko Au, ko e ʻEikí, ʻOku Ou Haʻisia ʻo Ka Mou Ka Fai ʻa e Meʻa ʻOku Ou Lea ʻAkí,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 82:8–24,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 92: Tokāteline mo e Ngaahi Fuakava 81–83
Tokāteline mo e Ngaahi Fuakava 82:8–24
“Ko Au, ko e ʻEikí, ʻOku Ou Haʻisia ʻo Ka Mou Ka Fai ʻa e Meʻa ʻOku Ou Lea ʻAkí”
Naʻe fakaafeʻi ʻe he Fakamoʻuí ʻa e kau mēmipa ʻo e Kautaha Uouongatahá ke nau haʻisia ʻi he fuakava ke puleʻi ʻa e ngaahi ngāue ʻa Hono Siasí. Naʻá Ne ʻoange ha ngaahi fekau mo talaʻofa ke tāpuakiʻi kinautolu ʻi heʻenau talangofuá. ʻI he taimi ʻoku tau fuakava ai ke talangofua ki he ngaahi fekau ʻa Sīsū Kalaisí, ʻokú Ne talaʻofa mai te Ne tāpuakiʻi kitautolu. ʻE lava ke tokoni ʻa e lēsoni ko ʻení ke mahino ki he kau akó e founga ke tauhi ai e ngaahi fuakava ʻoku tau fai mo e Tamai Hēvaní mo Sīsū Kalaisí.
Ngaahi ʻEkitivitī Ako ʻOku Ala Fakahokó
Haʻisia ki he ʻEikí
ʻE lava ke tokoni ʻa e lēsoni fakataumuʻa ko ʻení ki he kau akó ke nau fakakaukau ki honau vā fetuʻutaki mo e Tamai Hēvaní mo Sīsū Kalaisí. Fakaʻaliʻali ki he kau akó ha foʻi makinito ʻe ua. ʻE lava ke fakatātaaʻi ʻe ha tokotaha ako ʻa e founga ʻoku vāofi ai ʻa e ongo foʻi makinitó, te na pipiki pe ʻunu ʻo māvahevahe. Kole ki he kau akó ke nau fakakaukauloto ʻoku fakafofongaʻi ʻe ha taha ʻo e makinitó ʻa Sīsū Kalaisi pea kinautolu ʻa e taha.
-
Ko e hā te tau lava ʻo ako fekauʻaki mo hotau vā fetuʻutaki mo e Tamai Hēvaní mo Sīsū Kalaisi mei he ongo makinito ko ʻení?
Fakaafeʻi ʻa e kau akó ke fakakaukau ki honau vā fetuʻutaki mo e Tamai Hēvaní mo Sīsū Kalaisí. ʻI hono ako ʻe he kau akó ʻa e Tokāteline mo e Ngaahi Fuakava 82, poupouʻi kinautolu ke fekumi ki ha fakahā fakataautaha fekauʻaki mo e founga te nau lava ai ʻo fakamālohia honau vā fetuʻutaki mo e Tamai Hēvaní mo Sīsū Kalaisí.
“Ko au, ko e ʻEikí, ʻoku ou haʻisia, ʻo ka mou ka fai ʻa e meʻa ʻoku ou leaʻakí”
ʻI he Tokāteline mo e Ngaahi Fuakava 82, naʻe toutou fai ai ʻe he ʻEikí ha ngaahi fakahinohino naʻe ʻomi ʻi ha fakahā kimuʻa (vakai, Tokāteline mo e Ngaahi Fuakava 78). Ko e ngaahi fakahinohinó ke fokotuʻu ʻa e Kautaha Uouongatahá ke ne tokangaʻi e ngaahi meʻa fakatuʻasino ʻa e Siasí mo langa ʻa Saione.
Ko e Tokāteline mo e Ngaahi Fuakava 82:10 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.
Lau ʻa e Tokāteline mo e Ngaahi Fuakava 82:8–10, ʻo kumi e meʻa naʻe akoʻi ʻe he ʻEikí fekauʻaki mo ʻEne ngaahi fekaú.
-
Ko e hā e ʻuhinga ʻa e Fakamoʻuí ki hono ʻomi kiate kitautolu ha ngaahi fekaú?
-
Ko e hā ʻoku talaʻofa mai ʻe he Fakamoʻuí kapau te tau tauhi ʻEne ngaahi fekaú?
Fakaafeʻi ʻa e kau akó ke nau toe lea ʻaki ha foʻi moʻoni mei he ngaahi veesi ko ʻení ʻi he lea pē ʻanautolu. ʻE lava foki ke nau hiki ia ʻi heʻenau tohinoá pe ʻi he palakipoé. ʻE lava ke ʻiloʻi ʻe he kau akó ha ngaahi moʻoni tatau mo ʻení: ʻI he taimi ʻoku tau talangofua ai ki he ngaahi fekau ʻa e ʻEikí, ʻokú Ne talaʻofa ke tāpuakiʻi kitautolu.
Ko e hā ʻoku akoʻi atu ʻe he ngaahi veesi ko ʻení fekauʻaki mo e ʻulungaanga ʻo e Tamai Hēvaní mo Sīsū Kalaisí?
Ke tokoni ke ʻiloʻi ʻe he kau akó ʻa e taimi kuo nau mamata ai ki hono fakahoko ʻo e moʻoni ko ʻení, mahalo te ke fie fakahoko ha ʻekitivitī hangē ko ʻení:
Vahevahe ʻa e kalasí ki he ngaahi kulupu iiki. Kole ki he kulupu takitaha ke nau kumi ha ngaahi sīpinga ʻo hono tāpuakiʻi ʻe he Fakamoʻuí ʻa e kakaí ʻi heʻenau talangofua ki Heʻene ngaahi fekaú. ʻE lava ke lisi ʻe he kau akó ha ngaahi sīpinga mei he folofolá, mei heʻenau moʻuí, pe moʻui ʻa ha kakai ʻoku nau ʻilo. Hili ha taimi feʻunga, te ke lava ʻo fakaafeʻi e ngaahi kulupú ke nau taufetongi ʻi hono vahevahe ha ngaahi sīpingá. Te mou lava ʻo aleaʻi ʻa e meʻa te tau lava ʻo ako mei he ngaahi sīpinga ko ʻení fekauʻaki mo e finangalo lelei ʻa e Fakamoʻuí ke tauhi ʻEne ngaahi talaʻofá.
Haʻisia ʻi he fuakavá
Mahalo te ke fie tokoniʻi e kau akó ke nau sio ki he founga ʻe lava ke akoʻi ai ʻe he veesi 1 fekauʻaki mo hotau vā fetuʻutaki ʻi he fuakava mo e Tamai Hēvaní mo Sīsū Kalaisí. ʻOku tau fakahoko ʻi he fuakava ha ngaahi palōmesi ki he Tamai Hēvaní mo Sīsū Kalaisi, pea ʻokú Na fakahoko mai ha ngaahi talaʻofa maʻatautolu.
-
ʻOkú ke pehē ko e hā ʻoku akoʻi ʻe he veesi 10 fekauʻaki mo e ngaahi fuakava ʻoku tau fai mo e Tamai Hēvaní mo Sīsū Kalaisí?
Lau e lea ko ʻeni ʻa Palesiteni Lāsolo M. Nalesoní, ʻo kumi ʻa e meʻa naʻá ne akoʻi fekauʻaki mo e ngaahi fuakavá.
Ko ʻetau fakahoko pē ha fuakava mo e ʻOtuá, ʻoku tau mavahe leva mei he tuʻu tauʻatāiná ʻo taʻengata. He ʻikai liʻaki ʻe he ʻOtuá Hono vā fetuʻutaki mo kinautolu kuo nau fokotuʻu ha faʻahinga vā fetuʻutaki pehē mo Iá. Ko hono moʻoní, ko kinautolu kotoa pē kuo nau fakahoko ha fuakava mo e ʻOtuá, ʻoku nau lava ʻo maʻu ha faʻahinga ʻofa mo ha ʻaloʻofa makehe. …
ʻI he taimi pē kuó ta fakahoko ai ha fuakava mo e ʻOtuá, ʻoku toe vāofi ange ai hota vā fetuʻutaki mo Iá ʻo laka ange ia ʻi he taimi kimuʻa peá ta fakahoko e fuakavá. Kuo haʻi fakataha ʻeni kitautolu. Koeʻuhí ko ʻetau fuakava mo e ʻOtuá, he ʻikai ke Ne teitei fiu ʻi Heʻene feinga ke tokoniʻi kitautolú, pea he ʻikai ʻaupito ke tau teitei lava ʻo ikunaʻi ʻEne faʻa kātaki ʻaloʻofa kiate kitautolú. ʻOku tau takitaha maʻu ha potu makehe ʻi he loto ʻo e ʻOtuá. ʻOkú Ne ʻamanaki lahi mai kiate kitautolu. (Russell M. Nelson, “Ko e Fuakava Taʻengatá,” Liahona, ʻOkatopa 2022, 5, 6).
-
ʻOkú ke pehē ko e hā ʻoku mahuʻinga ke manatuʻi mei he lea ko ʻení?
ʻOku ʻomi ʻa e ngaahi tāpuakí ʻi hono tauhi ‘o e ngaahi fuakavá
Ko e konga ʻo e fakahinohino ʻa e ʻEikí ki he kau taki ʻo e Kautaha Uouongatahá, naʻá Ne faleʻi ʻa Siosefa Sāmita, ʻŌliva Kautele, ʻEtuate Pātilisi mo ha niʻihi kehe ke “fehaʻiʻaki [kinautolu] ʻi ha alea papau mo e fuakava” (Tokāteline mo e Ngaahi Fuakava 82:11) ke tokangaʻi e ngaahi meʻa fakatuʻasino ʻa e Siasí. ʻI heʻetau hoko ko e fānau fuakava ʻa e ʻOtuá, ʻoku tau fuakava ai foki ke fai ha ngaahi meʻa pau ʻi heʻetau muimui kia Sīsū Kalaisí.
Fakakaukau ke vahevahe ʻa e kau akó ki ha kulupu ʻe ua ʻo fakaafeʻi ʻa e kulupu takitaha ke nau fakatahatahaʻi ha taha ʻo e ngaahi lisi ko ʻení. ʻE lava ke hiki ʻe he kau akó ʻenau lisí ʻi he palakipoé.
Lau ʻa e Tokāteline mo e Ngaahi Fuakava 82:12–19 pea hiki ha lisi ʻo e meʻa naʻe kole ʻe he ʻEikí ki he kau mēmipa ʻo e Kautaha Uouongatahá ke nau fuakava ke faí.
Lau ʻa e Mōsaia 18:8–10 mo e Tokāteline mo e Ngaahi Fuakava 20:77 pea hiki ha lisi ʻo e meʻa ʻoku kole mai ʻe he ʻEikí ke tau fuakava ke fai ʻi he ʻaho ní.
-
Ko e hā ʻoku makehe kiate koe mei he ongo lisi ko ʻení?
-
ʻOku faitatau fēfē nai ʻa e ngaahi fatongia fakafuakava ko ʻení?
-
ʻOkú ke pehē ʻe tokoni fēfē hono tauhi ʻetau ngaahi fuakavá ke tau hoko ʻo hangē ko e Fakamoʻuí?
Lau ʻa e Tokāteline mo e Ngaahi Fuakava 82:24, ʻo kumi ʻa e meʻa ʻoku talaʻofa ʻe he ʻEikí maʻanautolu ʻoku tauhi ʻenau ngaahi fuakava mo Iá.
Fakakaukau ke fakaʻaliʻali ange ʻa e ongo foʻi makinito ʻoku pipikí. Fakaafeʻi e kau akó ke vahevahe ʻa e meʻa ne nau ako mei he lēsoni ko ʻení fekauʻaki mo honau vā fetuʻutaki mo Sīsū Kalaisí. Te ke lava foki ʻo vahevahe hoʻo ngaahi ongo fekauʻaki mo e ngaahi tāpuaki kuó ke maʻu mei hono fakahoko mo tauhi e ngaahi fuakava mo e Tamai Hēvaní mo Sīsū Kalaisí.
Ako maʻuloto ʻa e fakataukei fakatokāteliné
Lolotonga e lēsoni ko ʻení, mahalo te ke fie tokoni ki he kau akó ke nau ako maʻuloto ʻa e Tokāteline mo e Ngaahi Fuakava 82:10 pea mo e kupuʻi lea folofola mahuʻinga “Ko au, ko e ʻEikí, ʻoku ou haʻisia, ʻo ka mou ka fai ʻa e meʻa ʻoku ou leaʻakí.” ʻE lava ke mou toe vakaiʻi ia ʻi he ngaahi lēsoni he kahaʻú. ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Toe Vakaiʻi ʻo e Fakataukei Fakatokāteliné.”