“Lēsoni 98: Tokāteline mo e Ngaahi Fuakava 86: ʻOku Tānaki Fakataha ʻe he Fakamoʻuí ʻa ʻIsileli,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 86,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 98: Tokāteline mo e Ngaahi Fuakava 85–87
Tokāteline mo e Ngaahi Fuakava 86
ʻOku Tānaki Fakataha ʻe he Fakamoʻuí ʻa ʻIsileli
ʻI he fakahā ʻoku lekooti ʻi he Tokāteline mo e Ngaahi Fuakava 86, naʻe fakahā ʻe he Fakamoʻuí ha toe ʻuhinga kehe ki Heʻene ʻuluaki fakaʻuhinga ki he talanoa fakatātā ʻo e uité mo e teá (Mātiu 13:36–43). Naʻá Ne akoʻi fekauʻaki mo ʻEne feinga ke tānaki fakataha ʻa e kau māʻoniʻoní ʻi he teuteu ki Heʻene Hāʻele ʻAnga Ua Maí. ʻE lava ke tokoni ʻa e lēsoni ko ʻení ki he kau akó ʻi heʻenau feinga ke kau fakataha mo e Fakamoʻuí ʻi hono tānaki fakataha ʻo ʻIsilelí.
Ngaahi ʻEkitivitī Ako ʻOku Ala Fakahokó
ʻE tānaki fakataha ʻe he Fakamoʻuí ʻa Hono kakaí
Fakakaukau ke fakaafeʻi e kau akó ke nau fakakaukau ki ha ngaahi sīpinga ʻo ha kakai ʻoku nau saiʻia ke feohi mo ia pea mo hono ʻuhingá.
Hili iá, te ke lava ʻo fakaafeʻi e kau akó ke nau fakakaukau ki ha kakai naʻa nau fie feohi mo Sīsū Kalaisi lolotonga ʻEne ngāue fakafaifekau ʻi he māmaní. Kapau ʻe fiemaʻu, te ke lava ʻo vahevahe ha ngaahi sīpinga ʻe niʻihi, hangē ko e Mātiu 9:10; 19:1–2, 13–15; Sione 6:1–14; 3 Nīfai 17:1–5.
-
ʻOkú ke pehē ko e hā naʻe fie ofi holo ai pē ʻa e kakaí ʻi he Fakamoʻuí?
-
ʻOkú ke pehē ko e hā ʻoku finangalo ai ʻa e Fakamoʻuí ke tānaki fakataha ʻa e kakaí kiate Iá?
Fakakaukau ke fakaafeʻi e kau akó ke nau ako ha ngaahi potufolofola ʻokú ne akoʻi mai e ʻuhinga ʻoku finangalo ai e Fakamoʻuí ke tau tānaki fakataha kiate Iá. ʻE lava ke kau ʻi he ngaahi sīpingá ʻa e Mātiu 11:28–30; 3 Nīfai 9:13–14; 10:4–6.
Fakakaukau ki hoʻo ngaahi holi ke muimui pe tānaki fakataha ki he Fakamoʻuí. Fakakaukau foki ki hoʻo ngaahi holi ke tokoni ki hono tānaki fakataha ʻo e niʻihi kehé kiate Iá. ʻI hoʻo akó, kumi ha ngaahi moʻoni ʻe lava ʻo tokoni atu ke ke ʻiloʻi ʻa e mahuʻinga ʻo hono tānaki koe mo e niʻihi kehé kia Sīsū Kalaisí.
Ko e talanoa fakatātā ʻo e uité mo e teá
Lau pe fakamatalaʻi fakanounou ʻa e palakalafi ko ʻení ke tokoni ke mahino ki he kau akó ʻa e puipuituʻa fakahisitōlia ʻo e fakahā ʻoku lekooti ʻi he Tokāteline mo e Ngaahi Fuakava 86.
ʻI he ngāue ʻa Siosefa Sāmita mo Feletiliki G. Uiliamisi ki hono liliu fakalaumālie ʻo e Tohi Tapú, naʻe fakahā ʻe he Fakamoʻuí ha fakaʻuhinga ʻo e talanoa fakatātā ʻo e uité mo e teá. ʻOku lekooti ʻa e fakaʻuhinga ko ʻení ʻi he Tokāteline mo e Ngaahi Fuakava 86.
Kimuʻa pea ako ʻe he kau akó ʻa e Tokāteline mo e Ngaahi Fuakava 86, tokoni ke mahino kiate kinautolu ʻa e talanoa fakatātā ʻo e uité mo e teá. ʻE lava ke nau lau ʻa e Mātiu 13:24–30, ʻe lava ke vahevahe ʻe ha tokotaha ako ha fakamatala fakanounou ʻo e talanoa fakatātaá, pe te ke huluʻi ʻa e vitiō “Ko e Fakahā ʻe Sīsū ʻa e Talanoa Fakatātā ʻo e Uité mo e Teá, Tengaʻi Mūsitá, mo e Lēvaní” mei he taimi 0:00 ki he 1:30. ʻOku maʻu ʻa e vitioó ni ʻi he ChurchofJesusChrist.org.
ʻE ala ʻaonga ke fakamatalaʻi ange ko e teá ko ha faʻahinga tengaʻiʻakau kona ia. ʻOku meimei faitatau pē ʻa e uité mo e teá ʻi heʻena tā huli haké, ka ʻe lava pē ke fakafaikehekeheʻi ʻi heʻena motuʻá. Ka feinga ha tokotaha ke taʻaki ʻa e teá kimuʻa pea motuʻa ʻa e uité mo e teá, te ne ngalingali fakaʻauha foki ai e konga lahi ʻo e uité.
-
Ko e hā ʻoku hā makehe kiate koe ʻi he talanoa fakatātā ko ʻení?
-
Ko e hā ʻoku fakataipe ʻe he uité mo e teá? (Vakai, Mātiu 13:38.)
ʻOku ʻomi ʻe he Fakamoʻuí ha fakaʻuhinga ʻo e talanoa fakatātaá
Lau ʻa e Tokāteline mo e Ngaahi Fuakava 86:1–7, ʻo kumi pe ko e ngaahi fakataipe fē mei he talanoa fakatātaá naʻe tokoni ʻa e Fakamoʻuí ke fakamahinoʻi mai kiate kitautolú.
-
Ko e hā naʻá ke ako mei he talanoa fakatātā ko ʻení fekauʻaki mo e ngaahi teuteu ʻoku fai ʻe he ʻEikí ki Heʻene Hāʻele ʻAnga Ua Maí?
Hili hono vahevahe ʻe ha kau ako tokosiʻi ʻa e meʻa ne nau ʻiló, fakamahinoʻi ange ʻa e moʻoni ko ʻení: ʻOku tānaki ʻe he ʻEikí ʻa ʻIsileli kimuʻa ʻi Heʻene Hāʻele ʻAnga Ua Maí.
-
ʻE tokoni fēfē hono ʻiloʻi e moʻoni ko ʻení ke ke ongoʻi ʻa e ʻamanaki leleí mo e melinó ʻi hoʻo fakakaukau ki he Hāʻele ʻAnga Ua Mai ʻa Sīsū Kalaisí?
-
ʻE tataki fēfē ʻe he moʻoni ko ʻení ʻa e ngaahi fili ʻokú ke fai ʻi he ʻaho ní?
Naʻe vahevahe ʻe Palesiteni Lāsolo M. Nalesoni ʻa e founga te tau lava ai ʻo kau mo e ʻEikí ʻi hono tānaki fakataha ʻo ʻIsileli he ʻaho ní.
ʻOku tānaki ʻe he ʻEikí ʻa kinautolu te nau fili ke tuku ke hoko ʻa e ʻOtuá ko e ivi tākiekina mahuʻinga taha ʻi heʻenau moʻuí.
Kuo lauisenituli hono kikiteʻi ʻe he kau palōfitá ʻa e tānaki ko ʻení [vakai, ʻĪsaia 11:11–12; 2 Nīfai 21:11–12; Mōsaia 15:11], pea ʻoku lolotonga hoko ia ʻi he taimí ni! Ko ha talateu mahuʻinga ki he Hāʻele ʻAnga Ua Mai ʻa e ʻEikí, he ko e ngāue mahuʻinga taha ia ʻi he māmaní! …
Ko e taimi ʻoku tau lea ai kau ki he tānaki ʻo ʻIsileli ʻi he ongo tafaʻaki fakatouʻosi ʻo e veilí, ko ʻetau ʻuhingá ki he ngāue fakafaifekaú, ngāue fakatemipalé, mo e hisitōlia fakafāmilí. ʻOku tau toe ʻuhinga foki ai ki he langaki ʻo e tuí mo e fakamoʻoní ʻi he loto ʻo kinautolu ʻoku tau nofo, ngāue, pea mo tokoniʻí. Ko ha taimi pē ʻoku tau fai ai ha faʻahinga meʻa ʻoku tokoni ki ha taha—ʻi ha tafaʻaki pē ʻo e veilí—ke ne fakahoko mo tauhi ʻene ngaahi fuakava mo e ʻOtuá, ʻoku tau tokoni ai ke tānaki ʻa ʻIsileli. (Russell M. Nelson, “Tuku ke Lāngilangiʻia ʻa e ʻOtuá,” Liahona, Nōvema 2020, 92–93)
-
Ko e hā naʻá ke ako mei he fakamatala ko ʻení fekauʻaki mo e founga te ke lava ai ʻo tokoni ki he ʻEikí ke tānaki ʻa ʻIsilelí?
“Ko ha maama ki he kau Senitailé”
Lau ʻa e Tokāteline mo e Ngaahi Fuakava 86:11, ʻo kumi e meʻa naʻe akoʻi ʻe he Fakamoʻuí fekauʻaki mo e founga te tau lava ai ʻo tokoni ke tānaki ʻa e kakaí kiate Iá.
Mahalo ʻe tokoni ke fakamatalaʻi ange ʻe lava ke ʻuhinga ʻa e foʻi lea Kau Senitaile ʻi he veesi 11 kiate kinautolu ʻoku ʻikai kau ki he Siasí.
Fakakaukau ke fakaafeʻi ʻa e kau akó ke nau lau ʻa e Mātiu 5:14–16 mo e 3 Nīfai 18:24, ko ha konga ʻo hoʻomou aleaʻi ʻo e fehuʻi hokó. Te nau lava ʻo vahevahe ʻa e meʻa ʻoku tānaki mai ʻe he ngaahi veesi ko ʻení ki heʻenau mahinó.
-
ʻOkú ke pehē ʻoku ʻuhinga ki he hā ʻa e “maama ki he kau senitailé”?
-
Ko e hā ha ngaahi founga te ke lava ai ʻo tokoni ke tānaki ʻa ʻIsileli ʻaki hono vahevahe e maama ʻa e Fakamoʻuí mo e niʻihi kehé?
Fakakaukau ke hiki e ngaahi fakakaukau ʻa e kau akó ʻi he palakipoé. Te ke lava ʻo fakaafeʻi e kau akó ke nau vahevahe ha ngaahi aʻusia kuo nau maʻu, ko ha konga ʻo e fealēleaʻaki ko ʻení. Ke vakai ki ha ngaahi sīpinga lahi ange, fakaʻaliʻali ʻa e foʻi vitiō “FakamaamaʻAeMāmaní—Muimui ʻi he Sīpinga ʻa Sīsū Kalaisí. Vahevahe ʻEne Māmá—Tokoni ʻo Hangē ko ʻEne Tokoní” (2:17) mei he taimi 0:29 ki he 2:17, lava ke maʻu ʻi he ChurchofJesusChrist.org.
Faʻu ha palani ke tānaki fakataha ʻa ʻIsileli ki he Fakamoʻuí
Tokoni ki he kau akó ke fakaʻaongaʻi ʻa e ngaahi moʻoni kuo nau akó ʻaki hono fakaafeʻi kinautolu ke tali ha fehuʻi ʻe taha pe fakatouʻosi ʻo e ongo fehuʻi ko ʻení ʻi heʻenau tohinoa akó.
-
Ko e hā ha meʻa te ke feinga ke fai ke tānaki fakataha ai koe ki he Fakamoʻuí?
-
Ko e hā ha meʻa pau te ke fai ke tokoni ki he Fakamoʻuí ʻi hono tānaki ʻo ʻIsilelí?
Fakakau ai ha ngaahi fakaikiiki fekauʻaki mo e founga mo e taimi te ke aʻusia ai hoʻo taumuʻá.
ʻE lava ke vahevahe ʻe ha kau ako ʻe niʻihi ʻa e meʻa kuo nau ʻosi tohí. Fakamoʻoni ki he ngaahi moʻoni kuo mou aleaʻí, pea poupouʻi ʻa e kau akó ke ngāueʻi e ngaahi taumuʻa kuo nau fokotuʻu maʻanautolú.