“Lēsoni 99—Tokāteline mo e Ngaahi Fuakava 87: Ko e Kikiteʻi ʻe Siosefa Sāmita ʻa e Taú,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 87,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 99: Tokāteline mo e Ngaahi Fuakava 85–87
Tokāteline mo e Ngaahi Fuakava 87
Ko e Kikiteʻi ʻe Siosefa Sāmita ʻa e Taú
Koeʻuhí ko ha moveuveu fakapolitikale ʻi he ʻIunaiteti Siteiti ʻo ʻAmeliká ʻi he 1830 tupú, naʻe lotu ai ʻa Siosefa Sāmita ki he ʻOtuá ke ʻiloʻi Hono finangaló ʻi he meʻa ʻoku hokó. Naʻe kau ʻi he fakahā ne hoko mai aí ha kikite kau ki he taú mo ha ngaahi fakaikiiki pau ko e ʻOtuá pē te Ne lava ʻo ʻilo ʻi he taimi ko iá. ʻE lava ke tokoni ʻa e lēsoni ko ʻení ke mahino ki he kau akó ʻe fakahoko kotoa e ngaahi folofola ʻa e ʻEikí ki Heʻene kau palōfitá.
Ngaahi ʻEkitivitī Ako ʻOku Ala Fakahokó
Aʻusia ʻa ʻOasoni Pālatí
Ke tokoni ki he kau akó ke nau teuteu ke ako ʻa e Tokāteline mo e Ngaahi Fuakava 87, fakakaukau ke fakamatalaʻi fakanounou pe lau ʻa e ngaahi aʻusia fakafaifekau ko ʻeni ʻa ʻOasoni Pālatí.
Naʻe kau ʻa ʻOasoni Pālati ʻi he kau fuofua mēmipa ʻo e Siasí ʻa ia naʻe hoko ko e taha ʻo e kau fuofua mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻe ui ia ʻi ha ngaahi uiuiʻi fakafaifekau lahi lolotonga ʻene moʻuí ke malanga ʻaki e ongoongolelei ʻo Sīsū Kalaisi kuo fakafoki maí ʻi he ʻIunaiteti Siteití mo Kānata. ʻI heʻene ngaahi fonongá, naʻá ne ʻalu holo mo ha tatau ʻo ha fakahā pau naʻe maʻu ʻe Siosefa Sāmita mei he ʻEikí ʻi he 1832. Neongo naʻe teʻeki fakahoko ʻa e kikite ʻi he fakahaá, ka naʻe faʻa vahevahe ia ʻe ʻEletā Pālati mo e niʻihi kehé. Naʻe faʻa manukiʻi ia, ʻo ne manatu ki he pehē ʻe he kakaí “naʻe laulaunoa ʻaupito” ʻa e kikité pea “kuo kākaaʻi ia” (Orson Pratt, Journal of Discourses, 18:224–25).
-
Kapau ko ʻOasoni Pālati koe, ʻokú ke pehē naʻe mei uesia fēfē koe ʻe he ngaahi lau ʻa e kakaí?
Ko ha kikite mei he ʻEikí
ʻOku lekooti ʻa e kikite naʻe vahevahe ʻe ʻOasoni Pālati mo e niʻihi kehé ʻi he Tokāteline mo e Ngaahi Fuakava 87. ʻE lelei ke mahino ki he kau akó ʻa e ngaahi fakaikiiki fakahisitōlia ʻoku ʻi he ʻuluʻi vahé kimuʻa pea lau e kikité.
Tokoni ki he kau akó ke nau ʻiloʻi ha tokāteline mo ha ngaahi tefitoʻi moʻoni ʻo e ongoongoleleí: Ke akoako fakahoko ʻení, vakai ki he ako ʻoku ui ko e “Ako ʻiate koe pē ʻa e tokāteline ʻo Sīsū Kalaisí” ʻoku maʻu ʻi he Fakatupulaki Ngaahi Taukei ʻa e Faiakó: Akoʻi ʻa e Tokāteliné. Faʻu ha ngaahi fehuʻi fekumi tauʻatāina ʻoku tokoni ke ʻilo he kau akó ʻiate kinautolu e tokāteline mo e ngaahi tefitoʻi moʻoni ʻo e ongoongoleleí pea ʻoua ʻe taki e kau akó ki ha tali pau.
Lau ʻa e Tokāteline mo e Ngaahi Fuakava 87:1–4, pea kumi ʻa e meʻa naʻe fakahā ʻe Sīsū Kalaisi ʻo fakafou ʻi Heʻene palōfitá.
-
Ko e hā naʻe folofola ʻe he ʻEikí ʻe “ofi ke hokó”?
-
Ko e hā ʻe lava ke tau ako fekauʻaki mo e ʻEikí mei he ngaahi veesi ko ʻení?
ʻOange ha faingamālie ki he kau akó ke vahevahe ha ngaahi moʻoni kehekehe ʻoku nau ako fekauʻaki mo Sīsū Kalaisi. Makehe mei he meʻa ʻoku nau lave ki aí, tokoniʻi kinautolu ke nau fakatokangaʻi ʻe lava ke fakahā mai ʻe he ʻEikí ʻa e ngaahi meʻa ʻe hoko ʻi he kahaʻú kiate kitautolu ʻo fakafou ʻi Heʻene kau palōfitá.
Lau ha niʻihi pe kotoa ʻo e ngaahi potufolofola ko ʻení ke tokoni ke mahino lelei ange kiate koe ʻa e māfimafi ʻo e ʻEikí.
-
Ko e hā naʻá ke akó? ʻOkú ke pehē ko e hā ʻoku ʻaonga ai ke mahino e ngaahi meʻa ko ʻeni fekauʻaki mo Sīsū Kalaisí?
-
ʻOku fakamālohia fēfē ʻe he ʻilo ko ʻení ʻa hoʻo tui kiate Iá?
Tui ki he ʻEikí mo ʻEne ngaahi kikité
Lau pe fakamatalaʻi fakanounou ʻa e palakalafi ko ʻení ke tokoni ke mahino ki he kau akó ʻa e meʻa naʻe hoko hili hono fakahā ʻe he ʻEikí ʻa e ngaahi meʻa ko ʻeni ʻe hoko ʻi he kahaʻú kia Siosefa Sāmitá.
ʻI he konga kimuʻa ʻo e 1833, ʻikai fuoloa mei he kikite naʻe maʻu ʻe Siosefa Sāmitá, naʻe fakaleleiʻi ʻi he melino ʻa e ngaahi taʻefemahinoʻaki naʻe hoko ʻa ia naʻe pehē ʻe hoko ai ha tau ʻi ʻAmelika.
-
ʻOkú ke pehē ko e hā ha ngaahi fehuʻi naʻá ke mei maʻu kapau naʻá ke ʻilo e kikite ʻa Siosefa Sāmita ʻi he taimi ko iá?
Naʻe manatu ʻa ʻOasoni Pālati ki ha ngaahi fakakaukau naʻá ne maʻu ʻi he taimi naʻe ʻikai mahino ai e founga pe taimi ʻe fakahoko ai ʻa e kikité.
Naʻá ku ʻiloʻi naʻe moʻoni ʻa e kikité, he kuo folofola mai ʻa e ʻEikí kiate au pea kuó Ne foaki mai ha fakahā. Naʻá ku ʻilo foki ki he fakalangi ʻo e ngāue ko ʻení. ʻI he ʻosi atu ha ngaahi taʻu lahi, naʻe pehē ʻe haku ngaahi maheni ʻe niʻihi ʻi ha ngaahi taimi ʻe niʻihi, “Sai, ko e hā e meʻa ʻe hoko ki he kikite ko iá? He ʻikai fakahoko ia.” Naʻá ku pehē ange, “Tatali, ʻoku ʻi ai e taimi pau ʻa e ʻEikí.” (Orson Pratt, Journal of Discourses, 18:224–25)
-
Ko e hā ʻoku makehe kiate koe mei he tali ʻa ʻOasoni Pālatí?
-
Naʻá ne fili fēfē ke ngāue ʻi he tui mo tauhi ha fakakaukau ʻoku taʻengata?
Fili ke tuʻu fakataha mo e ʻEikí
Fakakaukau ke fakaafeʻi e kau akó ke nau aleaʻi ʻa e fehuʻi ko ʻení mo ha hoa pe kulupu tokosiʻi kimuʻa pea nau vahevahe ʻenau ngaahi talí mo e kalasí.
-
Ko e hā ha ngaahi tūkunga ʻe ala fiemaʻu ai ha taha ke ngāue ʻi he tui ko e tali ki he pōpoaki ʻa ha palōfita ʻi he ʻahó ni?
Poupouʻi e kau akó ke nau fakalaulauloto ki he tuʻunga loto-vēkeveke ʻoku nau maʻu ke tuʻu fakataha mo e kau palōfita ʻa e ʻEikí ʻi he taimi ʻoku nau akoʻi ai ha ngaahi meʻa ʻoku ʻikai tui ki ai e niʻihi kehé.
Lau ʻa e Tokāteline mo e Ngaahi Fuakava 1:37–38 mo e 21:4–6. Kumi ha ngaahi akonaki ʻe lava ʻo tokoni atu ke ke tauhi faivelenga ki he ʻEikí mo ʻEne kau palōfitá, naʻa mo ē ʻoku ʻikai tui ai e niʻihi kehé ki heʻenau ngaahi leá.
-
Ko e hā naʻá ke maʻú?
Ke tokoni ke ʻiloʻi ʻe he kau akó ʻoku faʻa fiemaʻu ʻa e tuí mo e faʻa kātakí ke mamata ki hono fakahoko ʻo e ngaahi kikite ʻa e ʻEikí, fakakaukau ke vahevahe ʻa e ngaahi fakaikiiki fakahisitōlia ko ʻení.
Neongo naʻe ʻikai moʻui ʻa Siosefa Sāmita ke mamata ki hono fakahoko ʻo e kikité, ka naʻe fakakakato hano konga ʻi he meimei taʻu ʻe 30 hili hono fakahoko iá. Naʻe kamata ʻa e fekeʻikeʻí ʻi Kalolaina Saute, pea naʻe fetauʻaki ʻa e ngaahi siteiti Fakatongá mo e Fakatokelaú mei he 1861 ki he 1865. Hangē ko hono kikiteʻí, naʻe ui ʻa e feituʻu Sauté ki Pilitānia Lahi ke maʻu ha tokoni pea tauʻi ʻe ha tokolahi naʻa nau hoko ko ha kau pōpula ʻa honau kau pule kimuʻá (vakai, Tokāteline mo e Ngaahi Fuakava 87:1–4). Naʻe mālōlō ha kakai tokolahi ʻi he tau ko ʻení. Hangē ko hono fakamatalaʻi ʻi he kikité, naʻe fai ha ngaahi tau kimui ange ʻi ha ngaahi puleʻanga ʻi he funga ʻo e māmaní (vakai, Tokāteline mo e Ngaahi Fuakava 87:6–7).
Tuʻu ʻi he ngaahi potu toputapú
Mahalo ʻe ongoʻi veiveiua pe ilifia ha kau ako ʻe niʻihi ʻi heʻenau fakakaukau ki he tau mo e fakaʻauha ʻoku fakamatalaʻi ʻi he kikite ko ʻení. Fakamatalaʻi ange ʻoku ʻomi ʻe he ngaahi folofola fakaʻosi ʻa e ʻEikí ʻi he fakahā ko ʻení ha faleʻi ʻe lava ke tokoni kiate kitautolu lolotonga e ngaahi faingataʻa ʻo e ngaahi ʻaho fakaʻosí.
Lau ʻa e Tokāteline mo e Ngaahi Fuakava 87:8, ʻo kumi ki he faleʻi ʻa e ʻEikí.
-
Ko e hā ha ngaahi potu toputapu kuo foaki mai ʻe he ʻEikí ʻe lava ke tokoni atu ke ke maʻu ai ʻa e melinó mo e malú ʻi hotau māmaní?
Fakakaukau ke fakamatalaʻi ange ko e tauhi faivelenga ki he ʻEikí mo ʻEne kau palōfitá ko ha founga ia ʻe taha te tau lava ai ʻo “tuʻu ʻi he ngaahi potu toputapú, pea ʻoua ʻe hiki mei ai.” Fakamoʻoni ki he ngaahi moʻoni kuo mou aleaʻi ʻi he ʻaho ní pea poupouʻi ʻa e kau akó ke nau ngāueʻi ha faʻahinga ongo fakalaumālie pē ne nau maʻu.