“Lēsoni 108—Tokāteline mo e Ngaahi Fuakava 93:19–53: Ko Hono Maʻu ʻa e Maama mo e Moʻoni ʻo e Fakamoʻuí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 93:19–53,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 108: Tokāteline mo e Ngaahi Fuakava 93
Tokāteline mo e Ngaahi Fuakava 93:19–53
Ko Hono Maʻu ʻa e Maama mo e Moʻoni ʻo e Fakamoʻuí
Naʻe fakamatalaʻi ʻe he Fakamoʻuí ʻi he fakahā ʻoku lekooti ʻi he Tokāteline mo e Ngaahi Fuakava 93, ʻa e founga te tau lava ai ʻo maʻu lahi ange ʻa e maama mo e moʻoni ʻoku haʻu meiate Iá. ʻE lava ke tokoni ʻa e lēsoni ko ʻení ke palani ʻa e kau akó ke maʻu lahi ange ʻa e maama mo e moʻoni ʻa e ʻOtuá ʻi heʻenau moʻuí.
Ngaahi ʻEkitivitī Ako ʻOku Ala Fakahokó
Māmá mo e poʻulí
Naʻe fakamatalaʻi ʻe ʻEletā Tīmote J. Taisesi ʻo e Kau Fitungofulú, ha aʻusia naʻá ne maʻu mo hono ngaahi fohá lolotonga ʻenau hifo maea ki ha ʻana loloto.
ʻOku Pīkitai ʻa e Māmá ki he Māmá
ʻOku akoʻi ʻe ʻEletā Dyches ko Sīsū Kalaisi ʻa e Maama ʻo e Māmaní pea ko e tupuʻanga ʻo e moʻoní, fiefiá mo e melinó.
Fakafokifā kuo mate kotoa e maama [ʻi he ʻaná] ʻo ʻikai ha tomuʻa fakatokanga mai. ʻI heʻemau kei tautau ʻi ʻolungá, ne ʻākilotoa kimautolu ʻe ha fuʻu fakapoʻuli lahi ʻo ʻikai ai ke mau lava ʻo sio, naʻa mo homau nimá pē ā ʻi he ngaahi maea ʻi muʻa ʻiate kimautolú. Ne ongo mai leva ha leʻo, “Teti, teti, ko feʻia koe?”
Ne u tali ange, “Ko au ʻeni, foha; ʻoku ou ʻi heni pē.”
Naʻe fakataumuʻa e puli fakafokifā ʻa e māmá ke fakahaaʻi, ʻi he mate ʻa e ʻuhilá, he ʻikai lava ke tekeʻi atu e fakapoʻuli ʻo e loto ʻaná. Naʻe moʻoni ia, ne ma “ongoʻi” ʻa e fakapoʻulí. (Timothy J. Dyches, “ʻOku Pīkitai ʻa e Māmá ki he Māmá,” Liahona, Mē 2021, 113)
-
Ko e hā ha ngaahi ongo ʻoku fakahoa ʻe he kakaí ki he fakapoʻulí?
-
Ko e hā ha ngaahi foʻi lea pe kupuʻi lea ʻokú ne fakamatalaʻi e ongo ʻo e māmá?
Naʻe fakamatalaʻi ʻe ʻEletā Taisesi ʻa e ongo naʻá ne maʻu mo hono ongo fohá ʻi he taimi naʻe toe moʻui ai ʻa e maama ʻi he ʻaná.
ʻOku Pīkitai ʻa e Māmá ki he Māmá
ʻOku akoʻi ʻe ʻEletā Dyches ko Sīsū Kalaisi ʻa e Maama ʻo e Māmaní pea ko e tupuʻanga ʻo e moʻoní, fiefiá mo e melinó.
ʻI he toe ulo mai ʻa e māmá, ne puli atu leva ʻa e fakapoʻulí, ʻo hangē ko e pau maʻu pē ke mole atu ʻa e fakapoʻulí, naʻa mo ha kihiʻi maama siʻisiʻi. Kuó u manatua maʻu ai pē mo hoku ongo fohá ha fakapoʻuli kuo teʻeki ke mau aʻusia, kuo mau maʻu ai ha loto-fakafetaʻi ki he māmá ʻa ia he ʻikai toe ngalo, pea mo e fakapapau ko ia he ʻikai ke tau teitei tuenoa ʻi he fakapoʻulí.
Hangē ʻoku fakapotupotu tatau ʻe he ʻalu hifo ki he fakapoʻulí ʻa ʻetau fononga ʻi he maama fakamatelié. (“ʻOku Pīkitai ʻa e Māmá ki he Māmá,” 113)
-
Ko e hā ha ngaahi faitatau naʻá ke fakatokangaʻi ʻi he talanoa ko ʻení mo ʻetau fononga ʻi he moʻui fakamatelié?
Lau ʻa e Tokāteline mo e Ngaahi Fuakava 93:36, ʻo kumi ha ngaahi lea ʻoku nau fakamatalaʻi e nāunau ʻo e ʻOtuá.
-
ʻE tokoniʻi fēfē koe ʻe he maama mo e moʻoni ʻoku haʻu mei he Tamai Hēvaní mo Sīsū Kalaisi ʻi hoʻo fononga ʻi he moʻui fakamatelié?
Fakaafeʻi e kau akó ke nau fakakaukau ki he lahi ʻo e maama pe ivi tākiekina ʻo e ʻOtuá ʻoku nau lolotonga ongoʻi ʻi heʻenau moʻuí. Te ke lava foki ʻo fakaafeʻi kinautolu ke nau fakakaukau ki he founga naʻe mei kehe ai ʻenau moʻuí kapau naʻe mahu ai e ivi tākiekina ʻo e Tamai Hēvaní mo Sīsū Kalaisí.
Fakamatalaʻi ange naʻe akoʻi ʻe he Fakamoʻuí ʻi he Tokāteline mo e Ngaahi Fuakava 93, fekauʻaki mo e ngaahi ʻulungaanga te ne lava ʻo fakatupulaki pe holoki ʻetau malava ke maʻu ʻa e maama mo e moʻoni ʻoku haʻu meiate Iá. ʻI he ako ʻa e kau akó, poupouʻi kinautolu ke fekumi ki ha ngaahi akonaki ʻe lava ʻo tokoni ke nau maʻu lahi ange ai ʻa e maama mo e moʻoni ʻo e Fakamoʻuí ʻi heʻenau moʻuí.
ʻOku akoʻi kitautolu ʻe Sīsū Kalaisi ʻi he founga ke maʻu ai ʻEne māmá
Fakakaukau ke fakaʻaliʻali ʻa e saati ko ʻení pea fakaafeʻi e kau akó ke hiki tatau ia ki heʻenau tohinoa akó. ʻE lava ke nau fakakakato ʻenau ʻekitivitī akó mo hanau hoa pe ʻi ha kulupu tokosiʻi.
|
Fakatupulaki ʻa e māmá mo e moʻoní |
Holoki ʻa e māmá mo e moʻoní |
|---|---|
Lau e ngaahi veesi ʻoku hiki atu ʻi he sātí, pea kumi e ngaahi akonaki ʻa e Fakamoʻuí ʻokú ne fakamatalaʻi e founga te tau lava ai ʻo fakatupulaki pe holoki ʻEne māmá mo e moʻoní ʻi heʻetau moʻuí. Lekooti e ngaahi meʻa naʻá ke maʻú ʻi he kōlomu takitaha.
-
Ko e hā ha ngaahi tāpuaki ʻe lava ke maʻu ʻe kinautolu ʻoku fekumi ki he maama mo e moʻoni ʻa e Fakamoʻuí?
-
Te ke fakamatalaʻi fakanounou fēfē ʻa e ngaahi meʻa naʻá ke maʻu ki he kōlomu takitaha ʻi hoʻo sātí ko ha fakamatala ʻo e moʻoní?
ʻE lava ke ʻiloʻi ʻe he kau akó ha ngaahi moʻoni tatau mo ʻení: ʻOku tau fakatupulaki ʻa e maama mo e moʻoni ʻa e Fakamoʻuí ʻi heʻetau moʻuí ʻi heʻetau tauhi ʻEne ngaahi fekaú (veesi 20, 28). ʻE lava ke fakatupu ʻe he talangataʻá ha mole mei heʻetau moʻuí ʻa e maama mo e moʻoni ʻa e Fakamoʻuí (veesi 39).
-
ʻOkú ke pehē ʻe liliu fēfē hoʻo malava ke ʻiloʻi ʻa e moʻoní ʻi hono tauhi e ngaahi fekau ʻa e Fakamoʻuí?
Fakakaukau ke fakaʻaliʻali pe tā ʻa e fakatātā ko ʻení ko ha konga ʻo hoʻomou fealeaʻaki ʻi he fehuʻi kimuʻá. Fakaafeʻi e kau akó ke vahevahe e founga ʻoku nau vakai ai ki hono fakafofongaʻi ʻo e ngaahi akonaki mei he Tokāteline mo e Ngaahi Fuakava 93. Kapau ʻe fiemaʻu, fakamatalaʻi ange ko e taimi ʻoku tau talangofua ai ki he ngaahi fekau ʻa e ʻOtuá, ʻoku tāpuekina kitautolu ʻaki ha maama lahi ange ʻa e Fakamoʻuí ʻi heʻetau moʻuí, ʻa ia ʻokú ne fakatupulaki ʻetau malava ke mahino pe ʻiloʻi ʻa e moʻoní. ʻI he taimi ʻoku tau talangataʻa ai ki he ngaahi fekaú, ʻoku mole leva meiate kitautolu ʻa e maama ʻa e Fakamoʻuí pea holo ʻetau malava ke mahino pe ʻiloʻi ʻa e moʻoní.
-
ʻE tokoni fēfē ʻetau mahino ki he ngaahi akonaki ʻa e Fakamoʻuí mei he ngaahi veesi ko ʻení ki he ngaahi fili ʻoku tau faí?
Ko hono fakalahi e maama mo e moʻoni ʻa e Fakamoʻuí ʻi heʻetau moʻuí
-
Ko e hā ha ngaahi meʻa pau kuó ne tokoniʻi pe lava ʻo tokoniʻi koe ke ke maʻu ha maama lahi ange ʻo e Fakamoʻuí ʻi hoʻo moʻuí?
ʻE lava ke aleaʻi ʻe he kau akó ʻa e fehuʻi kimuʻá mo ha hoa pe ʻi ha fanga kiʻi kulupu iiki kimuʻa pea vahevahe ʻenau ngaahi talí mo e kalasí. ʻE lava foki ke ke fakakaukau ke fakaʻaongaʻi ʻa e lea ko ʻeni ʻa ʻEletā Tieta F. ʻUkitofá ke tokoni ki he kau akó ke maʻu ha ngaahi fakakaukau.
Naʻe vahevahe ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi sīpinga ʻo e founga ʻe lava ke tau aʻusia ai ʻa e maama ʻo e Fakamoʻuí.
Fataki ʻo e Maama Fakalangí
Ko hono akoʻi ʻe Palesiteni ʻUkitofa e kau maʻu lakanga fakataulaʻeikí, ko kinautolu ʻoku nau fataki e maama ʻa e ʻOtuá, ʻa ia te ne lava ʻo fai ha fakamoʻui fakalaumālie ki he niʻihi ʻi he fakapoʻulí.
Ko e taimi kotoa pē ʻoku fakatafoki ai ho lotó ki he ʻOtuá ʻi he lotu loto-fakatōkilaló, ʻokú ke aʻusia ai ʻEne māmá. Ko e taimi kotoa pē ʻokú ke fekumi ai ki Heʻene folofolá mo Hono finangaló ʻi he ngaahi folofolá, ʻoku tupulaki ʻa e ulo ngingila ʻa e māmá. Ko e taimi kotoa pē ʻokú ke fakatokangaʻi ai ha fiemaʻu tokoni ʻa ha taha peá ke feilaulauʻi hoʻo fiemālié ke fai ha tokoní, ʻokú ke fakamafola mo fakatupulaki ai ʻa e māmá. Ko e taimi kotoa pē ʻokú ke fakafisingaʻi ai ʻa e ʻahiʻahí mo fili ki he angamaʻá, fekumi pe foaki ai ha fakamolemolé, pe fakamoʻoni loto-toʻa ki he moʻoní, ʻoku hanga ʻe he māmá ʻo tuli atu ʻa e fakapoʻulí kae tohoakiʻi mai ʻa e niʻihi ʻoku fekumi foki ki he māmá mo e moʻoní. (Dieter F. Uchtdorf, “Fataki ʻo e Maama Fakalangí,” Liahona, Nōvema 2017, 79)
Fakakaukau ke fakaafeʻi ha niʻihi tokosiʻi ʻo e kau akó ke vahevahe ʻa e founga kuo liliu ai ʻenau moʻuí ʻe he ngaahi fakakaukau ne nau aleaʻí. Fakakaukau ke huluʻi ʻa e “Finding Christ during Difficult Times” (4:35), ko ha konga ʻo e fealeaʻaki ko ʻení, ʻoku maʻu ʻi he ChurchofJesusChrist.org. Te ke lava ʻo fakaafeʻi e kau akó ke nau fakatokangaʻi ʻa e founga naʻe liliu ai ʻa e talavou ʻi he foʻi vitioó ʻe he ʻikai maʻu [ʻo e māmá] pea mo hono fakalahi atu ʻo e maama ʻo e Fakamoʻuí.
Finding Christ During Difficult Times
A young pole-vaulter contemplates suicide, then turns his life around when he fasts to know if the Church is true and gets baptized.
Fakaʻaongaʻi e ngaahi akonaki ʻa e Fakamoʻuí
Fakaafeʻi e kau akó ke nau fakakaukau ʻi he faʻa lotu ki he founga te nau lava ai ʻo fakalahi e maama mo e moʻoni ʻa e Fakamoʻuí ʻi heʻenau moʻuí ʻi heʻenau tali e ngaahi fehuʻi ko ʻení ʻi heʻenau tohinoa akó.
-
Ko e hā kuó ke ongoʻi naʻe ueʻi koe ke ke kamata fai ke fakaafeʻi lahi ange ai ʻa e moʻoni mo e maama ʻa e Fakamoʻuí ki hoʻo moʻuí? Ko e hā ha meʻa ʻokú ke ongoʻi ʻoku ueʻi koe ke taʻofi hono faí?
-
Ko e hā ha ngaahi faingataʻa te ke ala fehangahangai mo ia ʻi hoʻo kamata pe taʻofi e ngaahi ngāue ko ʻení? Te ke tokangaekina fēfē e ngaahi faingataʻa ʻokú ke ʻiló?
Ke fakaʻosi e lēsoní, fakakaukau ke vahevahe hoʻo ngaahi ongo fekauʻaki mo e mālohi kuo ʻomi ʻe he maama mo e moʻoni ʻa Kalaisí ki hoʻo moʻuí. Fakaafeʻi e kau akó ke nau feinga ke fakatupulaki e maama ʻa e Fakamoʻuí ʻi heʻenau moʻuí ʻaki e meʻa kuo nau ongoʻi kuo ueʻi kinautolu ke fai he ʻaho ní.