« មេរៀនទី ១១០—គោលលទ្ធិ និងសេចក្តីសញ្ញា ៩៥ ៖ អំពីការកសាងគេហដ្ឋានរបស់យើង » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្ដីសញ្ញា ៩៥ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញាសម្រាប់គ្រូបង្រៀនថ្នាក់សិក្ខាសាលា
មេរៀនទី ១១០ ៖ គោលលទ្ធិ និងសេចក្តីសញ្ញា ៩៤–៩៧
គោលលទ្ធិ និងសេចក្តីសញ្ញា ៩៥
« អំពីការកសាងគេហដ្ឋានរបស់យើង »
ដោយជាផ្នែកមួយនៃការស្ដារឡើងវិញនៃដំណឹងល្អរបស់ទ្រង់ ព្រះយេស៊ូវគ្រីស្ទបានបញ្ជាដល់ពួកបរិសុទ្ធឲ្យសាងសង់ព្រះវិហារបរិសុទ្ធនៅទីក្រុងខឺតឡង់ រដ្ឋអូហៃអូ ។ ប៉ុន្មានខែក្រោយមក នៅពេលដែលពួកបរិសុទ្ធនៅតែមិនបានចាប់ផ្តើមសាងសង់ ព្រះអង្គសង្គ្រោះបានប្រដៅពួកគេដោយក្ដីស្រឡាញ់ ហើយបានរំឭកឡើងវិញនូវបទបញ្ញត្តិរបស់ទ្រង់ដើម្បីសាងសង់ព្រះដំណាក់របស់ទ្រង់ ។ ដោយគោរពប្រតិបត្តិ ពួកបរិសុទ្ធបានធ្វើការដោយឧស្សាហ៍ព្យាយាមដើម្បីសាងសង់ព្រះវិហារបរិសុទ្ធ ខឺតឡង់ ។ មេរៀននេះអាចជួយសិស្សឲ្យមានបំណងប្រាថ្នាដើម្បីថ្វាយបង្គំព្រះអម្ចាស់នៅក្នុងព្រះវិហារបរិសុទ្ធរបស់ទ្រង់កាន់តែខ្លាំងឡើង ។
សកម្មភាពរៀនសូត្រដែលអាចមាន
ការធ្វើឲ្យការថ្វាយបង្គំនៅព្រះវិហារបរិសុទ្ធជាអាទិភាព
ដើម្បីជួយសិស្សគិតអំពីសារៈសំខាន់នៃការថ្វាយបង្គំព្រះអម្ចាស់នៅក្នុងព្រះវិហារបរិសុទ្ធ អ្នកអាចជួយសិស្សបង្កើតសាច់រឿងប្រឌិតមួយពីយុវជនម្នាក់ ដែលមានគម្រោងទៅព្រះវិហារបរិសុទ្ធ ប៉ុន្តែបានជ្រើសរើសមិនទៅវិញ ។ របៀបមួយដើម្បីធ្វើការណ៍នេះគឺបង្ហាញការបំផុសគំនិតដូចខាងក្រោម ហើយសុំឲ្យសិស្សបំពេញចន្លោះទទេដោយមានហេតុផលដែលនរណាម្នាក់អាចផ្តល់ឲ្យសម្រាប់ការមិនចូលព្រះវិហារបរិសុទ្ធ ។ សូមពិភាក្សាអំពីមូលហេតុដែលពេលខ្លះយើងមិនផ្តល់អាទិភាពដល់ការចូលព្រះវិហារបរិសុទ្ធ ។
ប្រសិនបើអ្នក និងសិស្សរបស់អ្នករស់នៅឆ្ងាយពីព្រះវិហារបរិសុទ្ធពេក ដើម្បីអាចដាក់អាទិភាពក្នុងការចូលព្រះវិហារបរិសុទ្ធ នោះអ្នកគ្រាន់តែអាចចាប់ផ្តើមមេរៀនដោយការគ្រាន់តែធ្វើស្វ័យវាយតម្លៃដែលមានបន្ទាប់ពីសកម្មភាពបំពេញចន្លោះទទេ ។
ខ្ញុំចង់ចូលរួមនៅព្រះវិហារបរិសុទ្ធ ។ ទោះជាយ៉ាងណា ដោយសារតែ ខ្ញុំមិនបានទៅ ។
សូមប្រើរង្វាស់ខាងក្រោមដើម្បីជញ្ជឹងគិត ថាតើអ្នកមានអារម្មណ៍ថាវាសំខាន់ប៉ុនណាក្នុងការថ្វាយបង្គំព្រះអម្ចាស់នៅក្នុងព្រះវិហារបរិសុទ្ធ ។
សូមលើកទឹកចិត្តសិស្សឲ្យស្វែងរកវិវរណៈផ្ទាល់ខ្លួនអំឡុងពេលមេរៀន ដើម្បីដឹងពីរបៀបដែលពួកគេអាចផ្តល់អាទិភាពដល់ការថ្វាយបង្គំក្នុងព្រះវិហារបរិសុទ្ធ ។
ប្រសិនបើសិស្សរបស់អ្នកមិនមានព្រះវិហារបរិសុទ្ធដែលក្បែរនោះទេ សូមបត់បែនមេរៀននេះទៅតាមនោះ ដើម្បីជួយសិស្សទទួលអារម្មណ៍នៃសារៈសំខាន់នៃការរៀបចំខ្លួនដើម្បីចូលរួមព្រះវិហារបរិសុទ្ធនៅថ្ងៃណាមួយ ។
ព្រះអម្ចាស់ទ្រង់វាយផ្ចាលអ្នកទាំងឡាយដែលទ្រង់ស្រឡាញ់
នៅចុងខែ ធ្នូ ឆ្នាំ ១៨៣២ ព្រះអង្គសង្គ្រោះបានបញ្ជាប្រជារាស្រ្តរបស់ទ្រង់ឲ្យសាងសង់ព្រះវិហារបរិសុទ្ធ ឬ « ដំណាក់នៃព្រះ » ( គោលលទ្ធិ និងសេចក្តីសញ្ញា ៨៨:១១៩ ) ។ នៅពេលព្រះអម្ចាស់បានបើកសម្តែង គោលលទ្ធិ និងសេចក្តីសញ្ញា ៩៥ នៅខែមិថុនា ឆ្នាំ ១៨៣៣ ពួកបរិសុទ្ធបានទិញដី ប៉ុន្តែការសាងសង់មិនទាន់បានចាប់ផ្តើមនៅឡើយទេ ។
-
សូមអាន គោលលទ្ធិ និងសេចក្តីសញ្ញា ៩៥:១–៣ ដោយរកមើលអ្វី ដែលព្រះអម្ចាស់បានមានព្រះបន្ទូលប្រាប់ប្រជារាស្រ្តរបស់ទ្រង់ ។
-
តើខគម្ពីរទាំងនេះបង្រៀនអ្វីខ្លះអំពីព្រះទ័យរបស់ព្រះអម្ចាស់ចំពោះព្រះវិហារបរិសុទ្ធ ?
-
តើព្រះអម្ចាស់បង្ហាញសេចក្តីស្រឡាញ់របស់ទ្រង់ចំពោះប្រជារាស្រ្តរបស់ទ្រង់ដោយរបៀបណា ?
វាប្រហែលជាការល្អក្នុងការសួរសិស្សថា តើពួកគេដឹងថាពាក្យ « វាយផ្ចាល » មានន័យដូចម្តេច ។ បើចាំបាច់ សូមពន្យល់ថា « វាយផ្ចាល » មានន័យថា កែតម្រូវដោយមានចេតនាកែលម្អអាកប្បកិរិយា ។
ព្រះអម្ចាស់បានបញ្ជាប្រជារាស្រ្តរបស់ទ្រង់ឲ្យសាងសង់ព្រះវិហារបរិសុទ្ធ
សូមអាន គោលលទ្ធិ និងសេចក្តីសញ្ញា ៩៥:៤, ៨–៩ ដោយរកមើលពីមូលហេតុ ដែលព្រះអម្ចាស់បានបញ្ជាឲ្យពួកបរិសុទ្ធសាងសង់ព្រះដំណាក់របស់ទ្រង់ ។
-
តើពួកបរិសុទ្ធនឹងទទួលបានពរជ័យសម្រាប់ការគោរពប្រតិបត្តិតាមបទបញ្ញត្តិរបស់ព្រះអម្ចាស់ ក្នុងការសាងសង់ព្រះវិហារបរិសុទ្ធដោយរបៀបណា ?
-
តើព្រះវរបិតាសួគ៌បានសន្យាអ្វីជាពិសេសដល់ពួកគេ ?
នៅពេលសិស្សចែកចាយពីមូលហេតុដែលព្រះអម្ចាស់បានបញ្ជាដល់ពួកបរិសុទ្ធឲ្យសាងសង់ព្រះដំណាក់របស់ទ្រង់ សូមជួយពួកគេឲ្យស្វែងយល់អំពីគោលការណ៍មួយដូចជា ព្រះយេស៊ូវគ្រីស្ទបញ្ជាប្រជារាស្ដ្រទ្រង់ឲ្យសាងសង់ព្រះវិហារបរិសុទ្ធ ដើម្បីបំពេញការសន្យារបស់ព្រះវរបិតាសួគ៌ក្នុងការប្រទានអំណាចដល់ពួកគេ ។
-
តើអ្នកគិតថាបានទទួលអំណោយទានពិសិដ្ឋដោយមានព្រះចេស្ដារបស់ព្រះមានអត្ថន័យយ៉ាងណា ?
តាមតម្រូវការ សូមពន្យល់ថា « អំណោយទានពិសិដ្ឋ » មានន័យថា ផ្តល់អំណោយដល់នរណាម្នាក់ ។ ដើម្បីទទួលបានអំណោយទានពិសិដ្ឋក្នុងព្រះវិហារបរិសុទ្ធ មានន័យថាទទួលបានអំណោយទាននៃចំណេះដឹង និងអំណាចខាងវិញ្ញាណ ។
សូមសួរសំណួរដែលលើកទឹកចិត្តឲ្យមានការពិភាក្សា ៖ សំណួរខាងក្រោមអាចត្រូវបានប្រើដើម្បីបង្កើតការពិភាក្សាក្នុងថ្នាក់ដ៏មានអត្ថន័យ ។ សម្រាប់ការអនុវត្តបន្ថែមទៀតអំពីរបៀបធ្វើកិច្ចការនេះ សូមមើលការបំពាក់បំប៉នដែលមានចំណងជើងថា « ជួយសិស្សឲ្យទទួលខុសត្រូវលើការរៀនសូត្ររបស់ពួកគេ » ដែលមាននៅក្នុង ជំនាញការអភិវឌ្ឍគ្រូបង្រៀន ។ សូមពិចារណាអនុវត្តជំនាញនេះ « ព្យាយាមទប់ខ្លួនឯងកុំឲ្យឆ្លើយតបទៅនឹងរាល់មតិយោបល់ និងសំណួរ ហើយអញ្ជើញសិស្សក្នុងថ្នាក់ឲ្យឆ្លើយតបវិញ » ។
-
តើមានវិធីខុសគ្នាណាខ្លះដែលព្រះអាចនឹងជ្រើសរើស ដើម្បីប្រទានពរដល់យើងដោយព្រះចេស្ដារបស់ទ្រង់តាមរយៈព្រះវិហារបរិសុទ្ធរបស់ទ្រង់ ?
-
តើអ្នកគិតថាការទទួលបានព្រះចេស្ដារបស់ព្រះតាមរយៈព្រះវិហារបរិសុទ្ធរបស់ទ្រង់នឹងជះឥទ្ធិពលដល់អ្នកនៅផ្ទះ សាលារៀន ឬទិដ្ឋភាពផ្សេងទៀតនៃជីវិតរបស់អ្នកយ៉ាងដូចម្ដេច ?
« អ្នកនឹងមានអំណាច ដើម្បីកសាងគេហដ្ឋាននោះ »
សូមអាន គោលលទ្ធិ និងសេចក្តីសញ្ញា ៩៥:១១–១៤ ដោយរកមើលពាក្យ ឬឃ្លាដែលអាចលើកទឹកចិត្តពួកបរិសុទ្ធឲ្យគោរពតាមបទបញ្ញត្តិរបស់ព្រះអម្ចាស់ ដើម្បីសាងសង់ព្រះវិហារបរិសុទ្ធ ។
-
តើអ្នកបានរកឃើញអ្វីខ្លះ ? តើការណ៍នេះអាចជាការលើកទឹកចិត្តយ៉ាងដូចម្តេច ?
សូមពិចារណាបែងចែកសិស្សជាក្រុមតូចៗ ។ អ្នកអាចផ្តល់ឲ្យក្រុមនីមួយៗនូវសំណៅចែកមួយច្បាប់ « ការពលិកម្មដែលបានធ្វើឡើងដើម្បីស្ថាបនាព្រះវិហារបរិសុទ្ធ ខឺតឡង់ » ។ សូមអញ្ជើញសិស្សឲ្យអានអំពីការសាងសង់ព្រះវិហារបរិសុទ្ធ ខឺតឡង់ នៅលើសំណៅចែក ឬនៅក្នុង ពួកបរិសុទ្ធ ភាគ ១ បទដ្ឋាននៃសេចក្តីពិត ទំព័រ ២១០–២១១, ២២១ ។
សិស្សអាចរាយបញ្ជីនៅលើសំណៅចែក ឬនៅលើក្ដារខៀននូវការពលិកម្មមួយចំនួនដែលពួកបរិសុទ្ធបានធ្វើសម្រាប់ព្រះវិហារបរិសុទ្ធ ខឺតឡង់ ។ បន្ទាប់មក ពួកគេអាចពិភាក្សា និងរាយបញ្ជីនៃការពលិកម្មដែលយើងអាចធ្វើដើម្បីចូលរួមព្រះវិហារបរិសុទ្ធ ឬរៀបចំខ្លួនដើម្បីថ្វាយបង្គំព្រះអម្ចាស់នៅក្នុងព្រះវិហារបរិសុទ្ធរបស់ទ្រង់នៅក្នុងជំនាន់របស់យើង ។
ការពលិកម្មទាំងឡាយដែលត្រូវបានធ្វើដើម្បីសាងសង់ព្រះវិហារបរិសុទ្ធ ខឺតឡង់
ភ្លាមៗបន្ទាប់ពី កណ្ឌទី ៩៥ ត្រូវបានទទួល ហៃរុម ស្ម៊ីធ បានចាប់ផ្ដើមឈូសឆាយដីដែលព្រះវិហារបរិសុទ្ធនឹងត្រូវសាងសង់ ។ ការសាងសង់ព្រះវិហារបរិសុទ្ធគឺជាបញ្ហាលំបាកមួយ ។ មានសមាជិកសាសនាចក្រប្រហែល ១៥០ នាក់ប៉ុណ្ណោះនៅក្នុងតំបន់នេះ ។ ពួកគេមិនមានបទពិសោធន៍ ឬជំនាញដើម្បីមើលការខុសត្រូវអគារដ៏ធំបែបនេះនោះទេ ។ ការសាងសង់ព្រះវិហារបរិសុទ្ធក៏នឹងដាក់សម្ពាធផ្នែកហិរញ្ញវត្ថុលើសាសនាចក្រ និងសមាជិកផងដែរ ។ យ៉ាងណាក៏ដោយ ពួកគេបានទៅធ្វើការ ហើយព្រះអម្ចាស់បានបំពេញតាមការសន្យារបស់ទ្រង់ដើម្បីប្រទានដល់ពួកគេ « អំណាចដើម្បីកសាង » ( គោលលទ្ធិ និងសេចក្តីសញ្ញា ៩៥:១១ ) ។ អាតេមុស មៀលលិត ជាអ្នកប្រែចិត្តជឿមកពីប្រទេសកាណាដា និងជាអ្នកសាងសង់សំណង់ដែលមានបទពិសោធន៍ម្នាក់ បានផ្លាស់ទៅទីក្រុង ខឺតឡង់ ហើយបានគ្រប់គ្រងការសាងសង់នេះ ។ អ្នកប្រែចិត្តជឿម្នាក់ទៀតគឺ ចន ថានណឺ បានផ្តល់ជំនួយផ្នែកហិរញ្ញវត្ថុនៅពេលដ៏សំខាន់ចាំបាច់ ។ បុរស ស្ត្រី និងកុមារនៅតំបន់នោះបានបរិច្ចាគ ពេលវេលា កម្លាំងពលកម្ម និងធនធានទាំងឡាយ ដើម្បីសាងសង់ព្រះវិហារបរិសុទ្ធ ។ ( សូមមើល Lisa Olsen Tait and Brent Rogers « A House for Our God » នៅក្នុង Revelations in Context [ ឆ្នាំ ២០១៦ ] ទំព័រ ១៦៧; ពួកបរិសុទ្ធ ភាគ ១ បទដ្ឋាននៃសេចក្តីពិត ទំព័រ ២១០–២១១ ) ។
-
តើការពលិកម្មអ្វីខ្លះដែលពួកបរិសុទ្ធបានធ្វើដើម្បីសាងសង់ព្រះវិហារបរិសុទ្ធ ខឺតឡង់ ? តើអ្វីធ្វើឲ្យអ្នកចាប់អារម្មណ៍ចំពោះការពលិកម្មទាំងនេះ ?
-
តើការពលិកម្មអ្វីខ្លះដែលយើងអាចធ្វើដើម្បីចូលរួមក្នុងដំណាក់របស់ព្រះអម្ចាស់ ?
បន្ទាប់ពីទុកពេលគ្រប់គ្រាន់ហើយ សូមឲ្យសិស្សចែកចាយអ្វីដែលពួកគេបានរៀន ។ សូមពិចារណាដោយការអធិស្ឋាននៅពេលអ្នកអាចចែកចាយជាមួយសិស្សនូវសេចក្តីថ្លែងការណ៍ខាងក្រោមមកពីប្រធាន ណិលសុន ដែលបញ្ជាក់ឡើងវិញអំពីសារៈសំខាន់នៃការពលិកម្ម ដើម្បីថ្វាយបង្គំព្រះអម្ចាស់នៅក្នុងព្រះវិហារបរិសុទ្ធ ។
ប្រធាន រ័សុល អិម ណិលសុន បានផ្ដល់ពរដល់យើងឲ្យធ្វើការពលិកម្មដើម្បីថ្វាយបង្គំនៅក្នុងព្រះវិហារបរិសុទ្ធ ៖
បងប្អូនប្រុសស្រីជាទីស្រឡាញ់របស់ខ្ញុំអើយ ការសាងសង់ព្រះវិហារបរិសុទ្ធទាំងនេះប្រហែលជាពុំអាចផ្លាស់ប្ដូរជីវិតបងប្អូនបានទេ ប៉ុន្តែពេលវេលាដែលបងប្អូនចំណាយក្នុងព្រះវិហារបរិសុទ្ធនឹងផ្លាស់ប្ដូរជីវិតរបស់បងប្អូន ។ នៅក្នុងស្មារតីនោះ ខ្ញុំផ្តល់ពរដល់បងប្អូនឲ្យស្គាល់អំពីរឿងទាំងឡាយដែលបងប្អូនអាចទុកមួយអន្លើសិន ដើម្បីបងប្អូនអាចចំណាយពេលកាន់តែច្រើននៅក្នុងព្រះវិហារបរិសុទ្ធ ។ ( រ័សុល អិម ណិលសុន « Let Us All Press On » Liahona ខែ ឧសភា ឆ្នាំ ២០១៨ ទំព័រ ១១៩ )
-
តើអ្នក ឬអ្នកដទៃទៀតដែលអ្នកស្គាល់បានទទួលពរជ័យដោយការធ្វើពលិកម្មដើម្បីថ្វាយបង្គំព្រះអម្ចាស់នៅក្នុងព្រះវិហារបរិសុទ្ធរបស់ទ្រង់ដោយរបៀបណា ?
ប្រសិនបើអ្នកធ្លាប់មានបទពិសោធន៍ក្នុងការថ្វាយបង្គំព្រះអម្ចាស់នៅក្នុងព្រះវិហារបរិសុទ្ធរបស់ទ្រង់ សូមពិចារណាចែកចាយនូវរបៀបដែលព្រះអម្ចាស់បានប្រទានពរដល់អ្នកដែលជាលទ្ធផល ។ ប្រសិនបើអ្នក ឬសិស្សណាមិនមានឱកាសដើម្បីចូលរួមនៅក្នុងព្រះវិហារបរិសុទ្ធទេ នោះវីដេអូ « Temples Are A Beacon » ( ២:៥០ ) អាចជួយសិស្សឲ្យមានអារម្មណ៍ចង់ថ្វាយបង្គំព្រះអម្ចាស់នៅក្នុងព្រះវិហារបរិសុទ្ធ មិនថាត្រូវធ្វើការពលិកម្មប៉ុនណាទេ ។
2:50Temples are a Beacon
សិស្សអាចទទួលបានអត្ថប្រយោជន៍មកពីការកត់ត្រាចម្លើយរបស់ពួកគេចំពោះសំណួរដូចខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ។ បន្ទាប់មក អ្នកអាចឲ្យសិស្សដែលស្ម័គ្រចិត្តចែកចាយគំនិតរបស់ពួកគេ ។
-
តើអ្នកគិតថា ការបង្រៀននៅក្នុង គោលលទ្ធិ និងសេចក្តីសញ្ញា ៩៥ អាចអនុវត្តនៅសព្វថ្ងៃនេះដោយរបៀបណា ?
-
តើអ្នកបានរៀនអ្វីខ្លះអំពីសារៈសំខាន់នៃការថ្វាយបង្គំព្រះអម្ចាស់នៅក្នុងព្រះវិហារបរិសុទ្ធរបស់ទ្រង់ ?