« បុព្វកថានៃសៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« បុព្វកថា » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា
បុព្វកថានៃសៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា
គោលបំណងនៃថ្នាក់សិក្ខាសាលា និងថ្នាក់វិទ្យាស្ថានសាសនាគឺ « ដើម្បីជួយយុវវ័យ និងយុវមជ្ឈិមវ័យឲ្យមានការផ្លាស់ប្រែចិត្តជឿកាន់តែខ្លាំងទៅលើព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញរបស់ទ្រង់ ហើយមានភាពស័ក្តិសមដើម្បីទទួលពរជ័យទាំងឡាយនៃព្រះវិហារបរិសុទ្ធ ហើយរៀបចំខ្លួន រៀបចំក្រុមគ្រួសារ និងអ្នកដទៃទៀតសម្រាប់ជីវិតដ៏នៅអស់កល្បជានិច្ច ជាមួយនឹងព្រះវរបិតារបស់ពួកគេដែលគង់នៅស្ថានសួគ៌ » ( « គោលបំណងថ្នាក់សិក្ខាសាលា និងថ្នាក់វិទ្យាស្ថានសាសនា » [ ឆ្នាំ ២០២២ ], នៅលើគេហទំព័រ ChurchofJesusChrist.org).
ដើម្បីជួយសម្រេចគោលបំណងនេះ សៀវភៅសិក្សានេះផ្តល់ឲ្យសិស្សនូវបទពិសោធន៍នៃការរៀនសូត្រជាច្រើនតាមរយៈមេរៀនពីរប្រភេទផ្សេងគ្នា ៖ មេរៀនគោលលទ្ធិ និងសេចក្តីសញ្ញា និងមេរៀននៃការរៀបចំជីវិត ។ មេរៀនគោលលទ្ធិ និងសេចក្តីសញ្ញាដែលត្រូវគ្នានឹងបណ្តុំបទគម្ពីរបានគូសបញ្ជាក់ជារៀងរាល់សប្តាហ៍នៅក្នុង ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ។ មេរៀននៃការរៀបចំជីវិតជួយសិស្សឲ្យរៀនទាញយកកម្លាំងមកពី ព្រះយេស៊ូវគ្រីស្ទ ហើយអនុវត្តតាមការបង្រៀនរបស់ទ្រង់ ដើម្បីត្រៀមខ្លួនសម្រាប់បញ្ហាប្រឈមមុខទាំងឡាយក្នុងជីវិត ។
តាមរយៈការប្រើការផ្ដល់យោបល់ក្នុងការបង្រៀនដែលមាននៅក្នុងមេរៀនទាំងពីរប្រភេទនេះ និងការធ្វើតាមការណែនាំរបស់ព្រះវិញ្ញាណ នោះអ្នកអាចជួយសិស្សឲ្យទាញយកព្រះចេស្ដានៃព្រះយេស៊ូវគ្រីស្ទ នៅក្នុងទិដ្ឋភាពជាច្រើននៃជីវិតរបស់ពួកគេ—រួមទាំងខាងវិញ្ញាណ ខាងសង្គម ខាងបញ្ញា និងខាងរូបកាយ ។ អ្នកក៏នឹងជួយពួកគេឲ្យរៀបចំខ្លួនសម្រាប់អនាគតរបស់ពួកគេដោយសេចក្តីជំនឿ ទៅលើព្រះវរបិតាសួគ៌ និងព្រះយេស៊ូវគ្រីស្ទផងដែរ ។
សៀវភៅសិក្សាសម្រាប់គ្រូបង្រៀននេះមាននៅក្នុងបណ្ណាល័យដំណឹងល្អអនឡាញនៅលើគេហទំព័រ ChurchofJesusChrist.org,ជាកន្លែងដែលអ្នកអាចស្វែងរក PDF ដែលអាចទាញយកសៀវភៅសិក្សាបាន ។ វាក៏មាននៅក្នុងកម្មវិធីបណ្ណាល័យដំណឹងល្អផងដែរ ។ ប្រសិនបើអ្នកចង់ប្រើសៀវភៅសិក្សាដែលបានបោះពុម្ព សូមស្នើសុំវាមកពីអ្នកសម្របសម្រួល ឬអ្នកគ្រប់គ្រងកម្មវិធីក្នុងមូលដ្ឋានរបស់អ្នក ។
ឧបករណ៍ទាំងឡាយដែលជួយអ្នកឲ្យរៀបចំខ្លួនបង្រៀន
មិនថាមេរៀនប្រភេទណាដែលអ្នកកំពុងបង្រៀននោះទេ មានឧបករណ៍មួយចំនួនដែលនឹងជួយអ្នករៀបចំ ។
ព្រះគម្ពីរ
ការសិក្សាបណ្តុំបទគម្ពីរដែលមានមកជាមួយ ចូរមកតាមខ្ញុំ គឺជាវិធីដ៏សំខាន់មួយសម្រាប់រៀបចំដើម្បីបង្រៀនសិស្ស ។ មេរៀនដែលមាននៅក្នុងសៀវភៅសិក្សានេះ ត្រូវការគ្រូបង្រៀនដែលបំផុសគំនិត ដែលសិក្សាព្រះគម្ពីរជាទៀងទាត់ ហើយស្វែងរកភាពជាដៃគូនៃព្រះវិញ្ញាណបរិសុទ្ធ ។ នៅពេលអ្នកសិក្សាព្រះគម្ពីរជាទៀងទាត់ អ្នកអាចមានទំនុកចិត្តថា ព្រះវរបិតាសួគ៌នឹងបំផុសគំនិតអ្នកតាមរយៈព្រះវិញ្ញាណរបស់ទ្រង់អំពីរបៀបកែសម្រួលសម្ភារទាំងនេះទៅនឹងតម្រូវការសិស្សរបស់អ្នក ។
ទិដ្ឋភាពទូទៅ
ទិដ្ឋភាពទូទៅគឺត្រូវបានផ្តល់ជូននៅដើមសប្តាហ៍នីមួយៗនៃមេរៀន ព្រះគម្ពីរគោលលទ្ធិ និងសេចក្តីសញ្ញា និងនៅដើមនៃផ្នែកនីមួយៗនៃមេរៀនការរៀបចំជីវិត ។ ទិដ្ឋភាពទូទៅទាំងនេះផ្តល់ព័ត៌មានមេរៀន-ជាក់លាក់ដើម្បីជួយអ្នករៀបចំខ្លួនបង្រៀនរួមមាន ៖
-
គោលបំណងមេរៀន
-
គំនិតសម្រាប់ការរៀបចំសិស្ស
-
បញ្ជីនៃមេរៀនដែលមានប្រើវត្ថុតំណាង សំណៅចែក រូបភាព វីដេអូ ឬសម្ភារផ្សេងៗទៀតដែលប្រហែលជាត្រូវរៀបចំទុកជាមុន
ការពិនិត្យមើលទិដ្ឋភាពទូទៅមុនពេលអ្នកបង្រៀនមេរៀន ដែលត្រូវគ្នាអាចជួយអ្នកក្នុងការសម្រេចចិត្តថា តើសម្ភារណាដែលត្រូវរៀបចំទុកជាមុន ។
សូមស្វែងរកទិដ្ឋភាពទូទៅប្រចាំសប្តាហ៍សម្រាប់មេរៀនសប្តាហ៍ក្រោយដែលអ្នកនឹងបង្រៀន ។
-
តើអ្នករកឃើញព័ត៌មានអ្វីខ្លះនៅទីនេះដែលមានប្រយោជន៍សម្រាប់អ្នកដើម្បីដឹងទុកជាមុន ?
-
តើអ្នកអាចប្រើព័ត៌មាននេះដោយរបៀបណានៅពេលអ្នករៀបចំខ្លួនដើម្បីបង្រៀន ?
គន្លឹះក្នុងការបង្រៀន
ទិដ្ឋភាពទូទៅនីមួយៗនៅខាងដើមមេរៀនព្រះគម្ពីរគោលលទ្ធិ និងសេចក្តីសញ្ញា មាននូវគន្លឺះក្នុងការបង្រៀនដែលពន្យល់អំពីការអនុវត្ត ឬគោលការណ៍ណែនាំដកស្រង់មកពី ការបង្រៀនតាមរបៀបរបស់ព្រះអង្គសង្គ្រោះ ៖ សម្រាប់អ្នកទាំងអស់ដែលបង្រៀននៅក្នុងគេហដ្ឋាន និង សាសនាចក្រ ។ គន្លឹះទាំងនេះត្រូវបានគូសសម្គាល់ដោយរូបតំណាងនេះ ៖ ។ នៅពេលអ្នកមានអារម្មណ៍ថាត្រៀមខ្លួនរួចហើយ សូមព្យាយាមធ្វើតាមការអនុវត្ដ និងគោលការណ៍ទាំងនេះនៅពេលកំពុងបង្រៀន ។ អ្នកនឹងសម្គាល់ឃើញថាការដាក់បញ្ចូលការផ្ដល់យោបល់ទាំងនេះអាចជួយកែលម្អសមត្ថភាពបង្រៀនរបស់អ្នក ។
គន្លឹះក្នុងការបង្រៀននៅក្នុងទិដ្ឋភាពទូទៅនីមួយៗ ចង្អុលបង្ហាញដល់អ្នកទៅកាន់លំនាំនៃការអនុវត្ត និងគោលការណ៍ដែលបានផ្ដល់អនុសាសន៍ ។ សូមរកមើលរូបតំណាងការបំពាក់បំប៉នក្នុងមេរៀននោះ ដើម្បីស្វែងរកឧទាហរណ៍អំពីនៃពាក្យគន្លឹះ ។ ចំណុងទាំងនេះក៏ជួយចង្អុលបង្ហាញអ្នកទៅកាន់ ជំនាញការអភិវឌ្ឍគ្រូបង្រៀន ដែលអាចជួយអ្នករៀនបន្ថែមទៀតអំពីការអនុវត្តការបង្រៀន ឬគោលការណ៍ដែលបានសង្កត់ធ្ងន់ ។ បើពេលវេលារបស់អ្នកអំណោយផល ហើយមានលទ្ធភាព សូមពិចារណាប្រើការបណ្តុះបណ្តាលទាំងនេះជាផ្នែកនៃការរៀបចំមេរៀនរបស់អ្នក ។
សូមពិនិត្យមើលគន្លឹះក្នុងការបង្រៀន នៅក្នុងទិដ្ឋភាពទូទៅសម្រាប់មេរៀនក្នុងសប្តាហ៍បន្ទាប់ដែលអ្នកនឹងបង្រៀន ។ តើអ្នកអាចព្យាយាមអនុវត្តតាមយោបល់នេះនៅក្នុងមេរៀនបន្ទាប់ដោយរបៀបណា ?
ការផ្ដល់យោលបល់ស្តីពីល្បឿនបង្រៀន
ទិដ្ឋភាពទូទៅសម្រាប់មេរៀននីមួយៗនៃមេរៀននៃការរៀបចំជីវិត រួមមានការផ្តល់យោលបល់អំពីល្បឿនបង្រៀន ។ យោបល់ទាំងនេះផ្ដល់ជាគំនិតអំពីមេរៀនទាំងនេះថាអាចបញ្ចូលទៅត្រង់ណានៅក្នុងសេចក្ដីណែនាំស្ដីពីល្បឿនបង្រៀន ។ អ្នកសម្របសម្រួល និងអ្នកគ្រប់គ្រងកម្មវិធីអាចប្រើការផ្តល់យោបល់ទាំងនេះ កាលណាពួកគេបង្កើតសេចក្តីណែនាំអំពីល្បឿនបង្រៀន ។
ការរៀបចំសិស្ស
ទិដ្ឋភាពទូទៅនីមួយៗក៏ដាក់បញ្ចូលយោបល់សម្រាប់ការជួយសិស្សរៀបចំគំនិត និងដួងចិត្តរបស់ពួកគេសម្រាប់មេរៀននីមួយៗផងដែរ ។ អ្នកអាចមើលគំនិតទាំងនេះនៅដើមសប្តាហ៍ ហើយសម្រេចចិត្តប្រកបដោយការអធិស្ឋានថា តើគំនិតណាមួយដែលអ្នកមានអារម្មណ៍ថា អាចជួយសិស្សរបស់អ្នកបានល្អបំផុត ។ អ្នកមិនចាំបាច់ប្រើគ្រប់យោបល់ទាំងអស់អំពីការរៀបចំសិស្សនោះទេ ។ អ្នកអាចបត់បែនវា ឬបង្កើតគំនិតផ្ទាល់ខ្លួនរបស់អ្នកបាន ។ យោបល់ទាំងនេះត្រូវបានរៀបចំឡើងដើម្បីផ្តល់ឲ្យសិស្សនូវបទពិសោធន៍សិក្សាមួយថ្ងៃមុន ឬច្រើនជាងនេះ ។
សូមពិនិត្យមើលគំនិតសម្រាប់ការរៀបចំសិស្សនៅក្នុងទិដ្ឋភាពទូទៅសម្រាប់មេរៀនក្នុងសប្តាហ៍បន្ទាប់ដែលអ្នកនឹងបង្រៀន ។ សូមពិចារណាអំពីគំនិតមួយណាដែលអ្នកនឹងប្រើ កែសម្រួល ឬមិនប្រើ ។ ប្រសិនបើអ្នកសម្រេចចិត្តអញ្ជើញសិស្សរបស់អ្នកឲ្យរៀបចំ តើអ្នកនឹងចែកចាយគំនិតរៀបចំនេះជាមួយពួកគេដោយរបៀបណា ? អ្នកអាចចែកចាយវាដោយផ្ទាល់មាត់ ឬបង្ហាញវានៅចុងបញ្ចប់ថ្នាក់មុន ។ ឬប្រសិនបើសមស្រប សូមផ្ញើវាតាមរយៈអ៊ីមែល ឬកម្មវិធីផ្ញើសារ ។
សេចក្ដីណែនាំអំពីការបង្រៀន
ពេញមួយមេរៀននីមួយៗ អ្នកនឹងសម្គាល់ឃើញប្រអប់ដែលមានសេចក្ដីណែនាំសម្រាប់គ្រូបង្រៀន ។ សេចក្ដីណែនាំអំពីការបង្រៀន ត្រូវបានរៀបចំឡើងដើម្បីជួយអ្នករៀបចំខ្លួនបង្រៀន ។ សេចក្តីណែនាំនេះ អាចជួយអ្នកឲ្យចេះប្រើសកម្មភាពរៀនសូត្រដែលបានស្នើនៅក្នុងមេរៀននេះ ។ សេចក្ដីណែនាំទាំងនេះអាចពន្យល់អំពីគោលបំណងនៃសកម្មភាពមេរៀន ឬផ្តល់យោបល់អំពីរបៀបបត់បែនមាតិកាមេរៀនដើម្បីបំពេញតាមតម្រូវការរបស់សិស្សឲ្យកាន់តែប្រសើរឡើង ។ យោបល់ទាំងនេះអាចរួមបញ្ចូលវិធីសាស្រ្ត សំណួរ ឬសកម្មភាពផ្សេងៗដែលជួយអ្នកឲ្យកែសម្រួលមាតិកា និងសកម្មភាពតាមការចាំបាច់ ។
សូមពិនិត្យមើលឡើងវិញនូវសេចក្ដីណែនាំអំពីការបង្រៀនមួយចំនួននៅក្នុងមេរៀនដែលអ្នកនឹងបង្រៀនក្នុងពេលឆាប់ៗនេះ ។ តើការបត់បែនអ្វីខ្លះដែលអ្នកបានធ្វើដោយផ្អែកលើសេចក្ដីណែនាំអំពីការបង្រៀនដែលអ្នករកឃើញ ?
សកម្មភាពរៀនសូត្រដែលអាចមាន
មេរៀននីមួយៗមានគំនិតអំពីរបៀបដែលអ្នកអាចទទួលបានបទពិសោធន៍នៃការរៀនសូត្រ ។ អ្នកមិនតម្រូវឲ្យប្រើសកម្មភាពការរៀនសូត្រដែលបានផ្តល់ជូននេះទាំងអស់នៅក្នុងមេរៀនដែលអ្នកបង្រៀននោះទេ ។
ដើម្បីឲ្យសិស្សរបស់អ្នកមានបទពិសោធន៍ល្អបំផុតតាមដែលអាចធ្វើទៅបាន អ្នកគួរតែប្រើមាតិកានៅក្នុងផ្នែកនេះធ្វើជាការណែនាំជាជាងប្រើអត្ថបទ ។ ប្រសិនបើអ្នកទើបតែចាប់ផ្តើមធ្វើជាគ្រូបង្រៀនថ្នាក់សិក្ខាសាលា វាអាចជាការល្អបំផុតក្នុងការចាប់ផ្តើមដោយធ្វើតាមសកម្មភាពការរៀនសូត្រដែលបានផ្តល់ជូនឲ្យបានដិតដល់ ។ ជាមួយបទពិសោធន៍កាន់តែច្រើន អ្នកនឹងមានសមត្ថភាពក្នុងការកែសម្រួលមាតិកានៃសៀវភៅសិក្សានេះឱ្យសមស្របបំផុត ដើម្បីបំពេញតាមតម្រូវការរបស់សិស្សអ្នកបានកាន់តែប្រសើរ ។
សកម្មភាពរៀនសូត្រដែលបានស្នើជាច្រើននឹងអញ្ជើញសិស្សឲ្យបំពេញវានៅក្នុងសៀវភៅកំណត់ហេតុការសិក្សា ។ សៀវភៅកំណត់ហេតុការសិក្សាជា PDF ដែលសិស្សអាចប្រើមាននៅលើគេហទំព័រ ChurchofJesusChrist.org/si/seminary/manuals ។ សូមទាក់ទងអ្នកសម្របសម្រួល ឬអ្នកគ្រប់គ្រងកម្មវិធីរបស់អ្នកដើម្បីទទួលបានច្បាប់ចម្លងដែលបានបោះពុម្ពនៃសៀវភៅកំណត់ហេតុនេះសម្រាប់ថ្នាក់របស់អ្នក ប្រសិនបើអ្នកចង់បាន ។
សម្រាប់ជំនួយដើម្បីដឹងអំពីរបៀបក្នុងការដាក់បញ្ចូលសកម្មភាពរៀនសូត្រដែលបានស្នើជាមួយនឹងសម្ភារកម្មវិធីសិក្សាឲ្យមានតុល្យភាព ដើម្បីបំពេញតាមតម្រូវការរបស់សិស្សឲ្យកាន់តែប្រសើរ សូមមើល « ការបំពាក់បំប៉នស្តីពីការទទួលយក បន្ទាប់មកកែសម្រួលកម្មវិធីសិក្សាថ្នាក់សិក្ខាសាលា » នៅក្នុងវគ្គបណ្តុះបណ្តាលកម្មវិធីសិក្សាថ្នាក់សិក្ខាសាលា ( ឆ្នាំ ២០២៥ ) ។ វាអាចមានប្រសិទ្ធិភាពបំផុតក្នុងការបញ្ចប់ការបំពាក់បំប៉ននេះក្នុងរយៈពេលពីរបីសប្តាហ៍ដំបូងនៃឆ្នាំសិក្សា ។
ធនធានបន្ថែមទាំងឡាយ
មេរៀនភាគច្រើនមាននូវផ្នែក « ធនធានបន្ថែមទាំងឡាយ » នៅចុងបញ្ចប់នៃមេរៀននោះ ។ ផ្នែកនេះដាក់បញ្ចូលព័ត៌មានដែលអាចជួយឲ្យការរៀនសូត្រកាន់តែមានភាពស៊ីជម្រៅ ។ អ្នកអាចស្វែងរកចម្លើយដែលអាចមានចំពោះសំណួរដែលសិស្សអាចសួរ ឬស្វែងរកសេចក្តីថ្លែងការណ៍ដោយថ្នាក់ដឹកនាំសាសនាចក្រ ដែលអ្នកប្រហែលជាចង់ដាក់បញ្ចូលក្នុងមេរៀន ។ ផ្នែកនេះអាចប្រើបានលុះត្រាតែអ្នកចូលប្រើសៀវភៅសិក្សាសម្រាប់គ្រូបង្រៀន តាមរយៈកម្មវិធីបណ្ណាល័យដំណឹងល្អ ឬបណ្ណាល័យដំណឹងល្អអនឡាញនៅលើគេហទំព័រ ChurchofJesusChrist.org ។ ផ្នែក « ធនធានបន្ថែមទាំងឡាយ » មិនបានដាក់បញ្ចូលនៅក្នុងកំណែ PDF របស់សៀវភៅសិក្សាសម្រាប់គ្រូបង្រៀននោះទេ ។
សូមមើលថាតើមេរៀនដែលអ្នកបង្រៀនបន្ទាប់មានដាក់បញ្ជូល « ធនធានបន្ថែមទាំងឡាយ » ដែរឬទេ ។ តើមានសំណួរ ចម្លើយ ឬសេចក្តីថ្លែងការណ៍ណាមួយដោយថ្នាក់ដឹកនាំសាសនាចក្រ ដែលអាចមានប្រយោជន៍ក្នុងការចែកចាយជាមួយសិស្សរបស់អ្នកដែរឬទេ ?
សកម្មភាពរៀនសូត្របន្ថែម
ផ្នែកនេះក៏មានដាក់បញ្ចូលនៅចុងបញ្ចប់នៃមេរៀនដែរ ដែលមានគំនិតបន្ថែមសម្រាប់ការទទួលបានបទពិសោធន៍នៃការរៀនសូត្រផងដែរ ។ សកម្មភាពរៀនសូត្រទាំងនេះរួមមាន របៀបដើម្បីសម្របសកម្មភាពបច្ចុប្បន្នក្នុងមេរៀន ឬរបៀបបង្រៀនសម្ភារ ដែលមិនបានបញ្ចូលក្នុងមេរៀននេះ ។ សកម្មភាពរៀនសូត្របន្ថែមត្រូវបានដាក់បញ្ចូលតែនៅក្នុងសៀវភៅសិក្សាសម្រាប់គ្រូបង្រៀនតែប៉ុណ្ណោះ ប្រសិនបើអ្នកកំពុងចូលប្រើវាតាមរយៈកម្មវិធីបណ្ណាល័យដំណឹងល្អ ឬបណ្ណាល័យដំណឹងល្អតាមអនឡាញនៅលើគេហទំព័រ ChurchofJesusChrist.org ។ ផ្នែកនេះមិនបានដាក់បញ្ចូលនៅក្នុងកំណែ PDF នៃសៀវភៅសិក្សាសម្រាប់គ្រូបង្រៀនទេ ។
ប្រសិនបើមេរៀនបន្ទាប់របស់អ្នកដាក់បញ្ចូលផ្នែក« សកម្មភាពរៀនសូត្របន្ថែម » សូមពិនិត្យមើលសកម្មភាពទាំងនេះ ។ តើមានអ្វីខ្លះដែលអ្នកគិតថានឹងមានប្រយោជន៍ដើម្បីប្រើជាមួយសិស្សរបស់អ្នកបន្ថែមពីលើ ឬជំនួសឲ្យសកម្មភាពរៀនសូត្រដែលមានក្នុងសម្ភារមេរៀននេះ ?
មេរៀនព្រះគម្ពីរគោលលទ្ធិ និងសេចក្តីសញ្ញា និងមេរៀននៃការរៀបចំជីវិត
សិស្សគួរតែបានរៀនទាំងមេរៀនព្រះគម្ពីរគោលលទ្ធិ និងសេចក្តីសញ្ញា និងមេរៀននៃការរៀបចំជីវិតពេញមួយឆ្នាំ ។ ជាទូទៅ យើងនឹងបង្រៀនមេរៀនព្រះគម្ពីរគោលលទ្ធិ និងសេចក្តីសញ្ញាបីមេរៀនក្នុងមួយសប្ដាហ៍ ខណៈដែលមេរៀននៃការរៀបចំជីវិតគួរតែបង្រៀនពីរមេរៀនក្នុងមួយសប្តាហ៍ ។ ប្រហែលជាមានសប្តាហ៍ដែលតម្រូវឲ្យអ្នកកែសម្រួលការរំពឹងទុកទូទៅទាំងនេះ ។
ព័ត៌មានខាងក្រោមនេះអាចជួយអ្នកឲ្យយល់អំពីគោលបំណង និងវិធីអនុវត្តមេរៀនទាំងពីរប្រភេទនេះ ។
មេរៀនព្រះគម្ពីរគោលលទ្ធិ និងសេចក្តីសញ្ញា
មេរៀនព្រះគម្ពីរគោលលទ្ធិ និងសេចក្តីសញ្ញា ដែលត្រូវគ្នានឹងបណ្តុំបទគម្ពីរដែលបានគូសបញ្ជាក់ជារៀងរាល់សប្តាហ៍នៅក្នុង ចូរមកតាមខ្ញុំ ។ មេរៀនទាំងនេះផ្តល់ឱកាសដល់សិស្សដើម្បីមានបទពិសោធន៍ការសិក្សាដ៏ស៊ីជម្រៅអំពីការបង្រៀនរបស់ព្រះអង្គសង្រ្គោះនៅក្នុងព្រះគម្ពីរគោលលទ្ធិ និងសេចក្ដីសញ្ញា ។ មេរៀនព្រះគម្ពីរគោលលទ្ធិ និងសេចក្តីសញ្ញា ក៏ដាក់បញ្ចូលមេរៀននៃការអនុវត្តចំណេះចំណានខាងគោលលទ្ធិ និងមេរៀនវាយតម្លៃការរៀនសូត្ររបស់អ្នកផងដែរ ។
ចំណេះចំណានខាងគោលលទ្ធិ
អាទិភាពសំខាន់មួយសម្រាប់អ្នកក្នុងនាមជាគ្រូបង្រៀន គឺដើម្បីជួយសិស្សឲ្យសម្រេចបានលទ្ធផលនៃចំណេះចំណានខាងគោលលទ្ធិ ។ លទ្ធផលទាំងនេះរួមមានការជួយសិស្សឲ្យ ៖
-
រៀន និងអនុវត្តគោលការណ៍ដ៏ទេវភាពទាំងឡាយដើម្បីទទួលបានចំណេះដឹងខាងវិញ្ញាណ ។
-
ចេះចាំវគ្គបទគម្ពីរចំណេះចំណានខាងគោលលទ្ធិ និងគោលលទ្ធិនៃដំណឹងល្អរបស់ព្រះយេស៊ូវគ្រីស្ទ ដែលវគ្គបទគម្ពីរនោះបង្រៀន ។
ការចេះស្ទាត់វគ្គបទគម្ពីរដែលបានជ្រើសរើស និងគោលលទ្ធិនៃដំណឹងល្អរបស់ព្រះយេស៊ូវគ្រីស្ទដែលវគ្គបទគម្ពីរទាំងនេះបង្រៀនមានន័យថាសិស្សនឹង ៖
-
ស្គាល់ ហើយយល់អំពីគោលលទ្ធិដែលបានបង្រៀននៅក្នុងវគ្គបទគម្ពីរចំណេះចំណានខាងគោលលទ្ធិទាំងនេះ ។
-
ពន្យល់គោលលទ្ធិឲ្យបានច្បាស់ៗ ដោយប្រើវគ្គបទគម្ពីរចំណេះចំណានខាងគោលលទ្ធិដែលទាក់ទងនានា ។
-
អនុវត្តតាមគោលលទ្ធិនៃដំណឹងល្អនៃព្រះយេស៊ូវគ្រីស្ទ និងគោលការណ៍ទាំងឡាយនៃការទទួលបានចំណេះដឹងខាងវិញ្ញាណនៅក្នុងការជ្រើសរើសប្រចាំថ្ងៃរបស់ពួកគេ និងក្នុងការឆ្លើយតបចំពោះគោលលិទ្ធ និងបញ្ហាផ្ទាល់ខ្លួន បញ្ហាសង្គម និងបញ្ហាប្រវត្តិសាស្ត្រ និងសំណួរទាំងឡាយរបស់ពួកគេ ។
-
ចងចាំ និងដឹងពីទីតាំងវគ្គបទគម្ពីរចំណេះចំណានខាងគោលលទ្ធិ ហើយទន្ទេញចាំឃ្លាបទគម្ពីរគន្លឹះទាំងឡាយ ។
កម្មវិធីចំណេះចំណានខាងគោលលទ្ធិ អាចជួយសិស្សឲ្យសម្រេចបានលទ្ធផលនៃចំណេះចំណានខាងគោលលទ្ធិ ។ កម្មវិធីនេះត្រូវបានរៀបចំឡើង ដើម្បីជួយសិស្សទន្ទេញចាំសេចក្តីយោងបទគម្ពីរ និងឃ្លាបទគម្ពីរគន្លឹះសម្រាប់វគ្គបទគម្ពីរចំណេះចំណានខាងគោលលទ្ធិនីមួយៗ ។ អ្នកប្រហែលជាចង់ប្រើកម្មវិធីនេះនៅក្នុងថ្នាក់ ហើយលើកទឹកចិត្តសិស្សឲ្យទាញយកកម្មវិធីនេះតាមឧបករណ៍ផ្ទាល់ខ្លួនរបស់ពួកគេ ប្រសិនបើអាចធ្វើបាន ។ មានកម្មវិធីសម្រាប់ឧបករណ៍ iOS និង Android ។
សម្រាប់ព័ត៌មានបន្ថែមអំពីគោលបំណងនៃចំណេះចំណានខាងគោលលទ្ធិ សូមមើល « What Is Doctrinal Mastery? » ( ៣:៥៦ ), មាននៅលើគេហទំព័រ ChurchofJesusChrist.org ។
មេរៀន ការអនុវត្តចំណេះចំណានខាងគោលលទ្ធិ
មេរៀនការអនុវត្ដចំណេះចំណានខាងគោលលទ្ធិ មានបំណងជួយសិស្សដើម្បីធ្វើកិច្ចការឆ្ពោះទៅរកការសម្រេចបាននូវលទ្ធផលនៃចំណេះចំណានខាងគោលលទ្ធិ ។
សម្រាប់ព័ត៌មានបន្ថែមអំពីរបៀបជួយសិស្សឲ្យសម្រេចបានលទ្ធផលនៃចំណេះចំណានខាងគោលលទ្ធិ សូមមើល« ការបំពាក់បំប៉នចំណេះចំណានខាងគោលលទ្ធិ » ដែលមាននៅក្នុង ការបំពាក់បំប៉នកម្មវិធីសិក្សាថ្នាក់សិក្ខាសាលា ។ វាអាចមានប្រសិទ្ធិភាពបំផុតក្នុងការបញ្ចប់ការបំពាក់បំប៉ននេះក្នុងរយៈពេលពីរបីសប្តាហ៍បន្ទាប់ពីអ្នកបញ្ចប់ការបំពាក់បំប៉ន « ការបំពាក់បំប៉នស្តីពីការទទួលយក បន្ទាប់មកកែសម្រួលកម្មវិធីសិក្សាថ្នាក់សិក្ខាសាលា » ។
មេរៀនវាយតម្លៃការរៀនសូត្ររបស់អ្នក
ការវាយតម្លៃគឺជាផ្នែកសំខាន់នៃការរៀនសូត្រ ។ ឱកាសដើម្បីសម្រាក និងពិចារណាអំពីការរៀនសូត្រអាចជាបទពិសោធន៍វិជ្ជមានមួយសម្រាប់សិស្ស និងជំរុញពួកគេក្នុងការបន្តរីកចម្រើន និងអភិវឌ្ឍឆ្ពោះទៅរកការក្លាយកាន់តែដូចជាព្រះវរបិតាសួគ៌ និងព្រះយេស៊ូវគ្រីស្ទ ។ តាមរយៈការវាយតម្លៃការរៀនសូត្ររបស់ពួកគេ សិស្សក្លាយជាអ្នកចូលរួមយ៉ាងសកម្មក្នុងដំណើរការសិក្សា និងមានការទទួលខុសត្រូវបន្ថែមទៀតសម្រាប់ការរៀនសូត្ររបស់ពួកគេ ។
មេរៀនវាយតម្លៃការរៀនសូត្ររបស់អ្នក ផ្តល់ឲ្យសិស្សនូវឱកាសដើម្បី ពន្យល់អំពីគោលលទ្ធិគន្លឹះ ចេញពីព្រះគម្ពីរគោលលទ្ធិ និងសេចក្ដីសញ្ញា ពិចារណាអំពីអាកប្បកិរិយា និងបំណងប្រាថ្នារបស់ពួកគេ ហើយ ចែកចាយការរីកចម្រើនរបស់ពួកគេក្នុងការអភិវឌ្ឍអាកប្បកិរិយាដែលជួយពួកគេឲ្យក្លាយជាសិស្សកាន់តែស្មោះត្រង់របស់ព្រះយេស៊ូវគ្រីស្ទ ។ មេរៀនទាំងនេះអាចជួយសិស្សឲ្យមានអារម្មណ៍រីករាយ ពេលពួកគេស្គាល់ការរីកចម្រើនរបស់ពួកគេ និងស្វែងរកកត្តានានាដើម្បីរីកចម្រើនបន្ថែមសម្រាប់ពេលអនាគត ។ ដើម្បីទទួលបានក្រេឌីតសម្រាប់វគ្គសិក្សា សិស្សនឹងត្រូវចូលរួមរៀនយ៉ាងហោចណាស់មួយមេរៀននៃមេរៀនវាយតម្លៃការរៀនសូត្ររបស់អ្នកក្នុងពាក់កណ្តាលនៃវគ្គនីមួយៗ ។
សិស្សដែលមិនបានចូលរួមក្នុងមេរៀនណាមួយក្នុងចំណោមមេរៀនទាំងនេះ ក្នុងអំឡុងពេលពាក់កណ្តាលនៃវគ្គសិក្សានឹងត្រូវបញ្ចប់មេរៀនវាយតម្លៃការរៀនសូត្ររបស់អ្នក សម្រាប់វគ្គសិក្សាពាក់កណ្តាលនីមួយៗតាមដែលចាំបាច់ដើម្បីទទួលបានក្រេឌីតសម្រាប់វគ្គសិក្សានោះ ។ បានដាក់បញ្ចូលទៅក្នុងឧបសម្ព័ន្ធនៃសៀវភៅសិក្សានេះគឺ មេរៀនវាយតម្លៃការរៀនសូត្ររបស់អ្នកចំនួនពីរមេរៀន ។ « វាយតម្លៃការរៀនសូត្ររបស់អ្នកផ្នែកទី ១ » អាចឲ្យសិស្សប្រើដើម្បីជំនួសការវាយតម្លៃសម្រាប់វគ្គពាក់កណ្ដាលទីមួយនៃវគ្គសិក្សាដែលបានខកខាន ។ « វាយតម្លៃការរៀនសូត្ររបស់អ្នកផ្នែកទី ២ » អាចឲ្យសិស្សប្រើដើម្បីជំនួសការវាយតម្លៃសម្រាប់វគ្គពាក់កណ្ដាលទីពីរនៃវគ្គសិក្សា ។ អ្នកអាចផ្តល់ឲ្យសិស្សនូវការវាយតម្លៃនេះ ហើយឲ្យពួកគេបញ្ចប់វាជាមួយមិត្តរួមថ្នាក់ផ្សេងទៀត ឬសមាជិកគ្រួសារ ។ នៅពេលពួកគេបញ្ចប់ សូមលើកទឹកចិត្តពួកគេឲ្យចែកចាយជាមួយអ្នកនូវអ្វីដែលពួកគេបានរៀនចេញមកពីបទពិសោធន៍នេះ ។ ការវាយតម្លៃនេះអាចផ្ដល់ឱកាសដល់អ្នកដើម្បីបម្រើដល់សិស្សទាំងនេះ ហើយអបអរនូវការរីកចម្រើនខាងវិញ្ញាណរបស់ពួកគេជាមួយពួកគេ ។ សូមដាក់ក្រេឌីតឲ្យពួកគេចំពោះការវាយតម្លៃពាក់កណ្តាលនៃវគ្គសិក្សានៅពេលដែលពួកគេបញ្ចប់មេរៀនវាយតម្លៃការរៀនសូត្ររបស់អ្នក ។
សម្រាប់ព័ត៌មានបន្ថែមអំពីរបៀបអនុវត្តមេរៀនវាយតម្លៃការរៀនសូត្ររបស់អ្នក សូមមើល « ការបំពាក់បំប៉នអំពីការវាយតម្លៃ » នៅក្នុង ការបំពាក់បំប៉នកម្មវិធីសិក្សាថ្នាក់សិក្ខាសាលា ។ វាអាចមានប្រសិទ្ធិភាពបំផុតក្នុងការបញ្ចប់ការបំពាក់បំប៉ននេះក្នុងរយៈពេលពីរបីសប្តាហ៍បន្ទាប់ពីអ្នកបញ្ចប់ « ការបំពាក់បំប៉នចំណេះចំណានខាងគោលលទ្ធិ » ។
មេរៀននៃការរៀបចំជីវិត
មេរៀននៃការរៀបចំជីវិតផ្ដល់ដល់សិស្សនូវឱកាសដើម្បីអនុវត្ដការបង្រៀនរបស់ព្រះអង្គសង្គ្រោះដើម្បី ៖
-
ទប់ទល់នឹងសំណួរពិបាកៗ និងឧបសគ្គក្នុងកាលៈទេសៈនៃជីវិត
-
ធ្វើការជ្រើសរើសដ៏បំផុសគំនិត ដោយប្រើការបង្រៀនរបស់ព្រះយេស៊ូវគ្រីស្ទ និងព្យាការីរបស់ទ្រង់
-
ស្ថាបនាភាពខ្លួនទីពឹងខ្លួនដើម្បីចិញ្ចឹមបីបាច់ខ្លួនឯង និងគ្រួសារ ។
-
មានសុខភាពខាងផ្លូវកាយ និងខាងសតិអារម្ម៍ល្អកាន់តែប្រសើរឡើង ។
-
អភិវឌ្ឍជំនាញទាំងឡាយដើម្បីជោគជ័យនៅក្នុងសាលា
-
ដាក់ផែនការរៀបចំសម្រាប់ការអប់រំ និងការងារនាពេលអនាគត ។
-
រៀបចំខ្លួនសម្រាប់ការបម្រើជាអ្នកផ្សព្វផ្សាយសាសនា និងបម្រើក្នុងសាសនាចក្រ ។
-
រៀបចំខ្លួនដើម្បីចុះ និងរក្សាសេចក្តីសញ្ញាក្នុងព្រះវិហារបរិសុទ្ធ ។
ព្យាយាមបង្រៀនមេរៀននៃការរៀបចំជីវិតពីរមេរៀនជារៀងរាល់សប្តាហ៍ ។ សប្តាហ៍ខ្លះអ្នកអាចបង្រៀនច្រើនជាងសប្ដាហ៍នេះ និងសប្ដាហ៍ផ្សេងទៀតដែលអ្នកអាចបង្រៀនតិច ប៉ុន្តែជាមធ្យមអ្នកគួរតែព្យាយាមបង្រៀនពីរមេរៀនក្នុងមួយសប្ដាហ៍ឲ្យបានញឹកញាប់តាមដែលអាចធ្វើទៅបាន ។ ការណ៍នេះនឹងផ្ដល់ឱកាសឲ្យសិស្សបានរៀនមេរៀននីមួយៗក្នុងអំឡុងឆ្នាំសិក្សា ។ ជាធម្មតា វាមិនចាំបាច់សម្រាប់អ្នកក្នុងការបង្រៀនមេរៀនទាំងនេះតាមលំដាប់ជាក់លាក់នោះទេ ទោះបីជាមានមេរៀនមួយចំនួនដែលទាក់ទងទៅនឹងគំនិតដែលបានបង្រៀននៅក្នុងមេរៀនមុនក៏ដោយ ។
ទិដ្ឋភាពទូទៅសម្រាប់ប្រភេទនីមួយៗនៃមេរៀននៃការរៀបចំជីវិត អាចជាធនធានដ៏មានតម្លៃមួយក្នុងការជួយអ្នកធ្វើការសម្រេចចិត្តអំពីពេលណាដើម្បីបង្រៀនមេរៀននៃការរៀបចំជីវិតជាក់លាក់ ។ ទិដ្ឋភាពទូទៅទាំងនេះនឹងជួយអ្នកឲ្យមើលឃើញយ៉ាងឆាប់រហ័សនូវគោលបំណងនៃមេរៀននៃការរៀបចំជីវិតផ្សេងៗ ព្រមទាំងពិចារណាអំពីយោបល់ស្តីពីល្បឿនដែលអាចបង្រៀនមេរៀនទាំងនោះក្នុងឆ្នាំនេះ ។
សូមប្រាកដថានឹងទទួលបានច្បាប់ចម្លងនៃសេចក្តីណែនាំស្តីពីល្បឿនបង្រៀន ដែលបានផ្ដល់ឲ្យអ្នកដោយអ្នកសម្របសម្រួល ឬអ្នកគ្រប់គ្រងកម្មវិធីរបស់អ្នក ។
អ្នកក៏អាចនឹងចង់ពិគ្រោះយោបល់ « ការបំពាក់បំប៉នស្តីពីការបង្កើតសេចក្តីណែនាំអំពីល្បឿនបង្រៀន » នៅក្នុងការបំពាក់បំប៉នកម្មវិធីសិក្សាថ្នាក់សិក្ខាសាលា ដើម្បីជួយអ្នកឲ្យសម្របតាមសេចក្តីណែនាំស្តីពីល្បឿនបង្រៀនរបស់អ្នកទៅនឹងតម្រូវការសិស្សរបស់អ្នក ។