Lesona 110: Mataupu Faavae ma Feagaiga 94–97

Mataupu Faavae ma Feagaiga 95

“O Le Fausiga o Lo’u Fale”

O se vaega o le Toefuataiga o Lana talalelei, sa poloaiina ai e Iesu Keriso le Au Paia e fausia se malumalu i Katelani, Ohaio. I ni masina mulimuli ane, ina ua le’i amataina lava e le Au Paia le fausaga, sa aoaiina ma le alofa i latou e le Faaola ma toe ta’u atu Lana poloaiga e fausia Lona maota. O le usiusitai, sa galulue ai ma le filiga le Au Paia e fausia le Malumalu o Katelani. O lenei lesona e mafai ona fesoasoani i tagata aoga ia lagonaina se naunautaiga faateleina e tapuai i le Alii i Lona malumalu.

Gaoioiga E Ono Mafai Ona Aoao Ai

Ia faamuamua le tapuaiga i le malumalu

Ina ia fesoasoani i tagata aoga e mafaufau e uiga i le taua o le tapuai atu i le Alii i Ona malumalu, e mafai ona e fesoasoani i tagata aoga e fatu se vaaiga faataitai o se tagata talavou atamai sa i ai ni fuafuaga e auai atu i le malumalu ae sa filifili e le auai i le malumalu. O se tasi o auala e faia ai lenei mea o le faaali atu lea o le uunaiga lenei ma fai atu i tagata aoga e faatumu le avanoa i mafuaaga e ono tuuina mai e se tasi mo le lē auai atu i le malumalu. Talanoaina pe aisea tatou te le faamuamua ai le auai i le malumalu i nisi taimi.

Afai o oe ma au tagata aoga e nonofo mamao ese mai se malumalu ina ia mafai ona faamuamua le auai i le malumalu, e mafai ona e amataina le lesona i le iloiloga a le tagata lava ia lea e sosoo ma le gaoioiga e faatumu ai avanoa.

Ou te manao e auai atu i le malumalu. Ae peitai, ona o , ou te lei alu ai.

Faaaoga le fua lenei e toe manatunatu ai i le taua o lou lagonaina o le tapuai i le Alii i totonu o le malumalu.

Uunaia tagata aoga e saili faaaliga faaletagata lava ia i le taimi o le lesona ia iloa ai auala e mafai ona latou faamuamua ai tapuaiga i le malumalu.

Afai e le maua e au tagata aoga se malumalu e lata ane, fetuunai le lesona e tusa ai ma le fesoasoani i tagata aoga ia lagonaina le taua o le sauniuni e auai i le malumalu i se aso.

E aoai e le Alii i latou e alofa i ai o Ia

I le faaiuga o Tesema 1832, sa poloaiina ai e le Faaola Lona nuu e fau le malumalu, po o “se fale o le Atua” (Mataupu Faavae ma Feagaiga 88:119). Ina ua faaali mai e le Alii le Mataupu Faavae ma Feagaiga 95 ia Iuni 1833, sa faatau mai e le Au Paia fanua, ae e lei amataina le fausaga.

• Faitau le Mataupu Faavae ma Feagaiga 95:1–3, ma vaavaai mo mea na fai ai le Alii i Ona tagata.

• O a mea o loo aoao mai e nei fuaiupu e uiga i lagona o le Alii mo le malumalu?

• Na faapefea ona faaali atu e le Alii Lona alofa mo Ona tagata?

Atonu e lelei le fesili atu i tagata aoga pe latou te iloa le uiga o le “aoaiga”. Afai e manaomia, faamalamalama atu o le “aoaiga” o lona uiga ia faasa’o ma le faamoemoega o le faaleleia o amioga.

Na poloaiina e le Aliii ona tagata e fausia se malumalu

Faitau le Mataupu Faavae ma Feagaiga 95:4,:8–9, ma vaavaai mo mafuaaga na poloaiina ai e le Alii le Au Paia e fausia Lona fale.

• O le a faapefea ona faamanuiaina le Au Paia i le usitaia o le poloaiga a le Alii e fausia se malumalu?

• O le a tonu lava le mea na folafola mai e le Tama Faalelagi ia i latou?

  A o faasoa mai e tagata aoga ia mafuaaga na poloaiina ai e le Alii le Au Paia e fausia Lona maota, fesoasoani ia i latou e faailoa mai se mataupu faavae e pei ona poloaiina ai e Iesu Keriso Lona nuu e fausia malumalu e faataunuu ai le folafolaga a le Tama Faalelagi e faaeeina i latou i le mana.

• O le a sou manatu i le uiga o le faaeeina i le mana o le Atua”?

  Pe a manaomia, faamalamalama atu e faapea, o le “faaee” o lona uiga o le tuuina atu i se tasi o se meaalofa. Ina ia faaeeina i totonu o le malumalu o lona uiga o le mauaina lea o se meaalofa o le malamalama faaleagaga ma le mana .

  Fai fesili e uunaia ai le talanoaga: O fesili nei e mafai ona faaaoga e fatu ai se talanoaga anoa a le vasega. Mo nisi faataitaiga i le auala e faia ai lenei mea tagai i le aoaoga ua faaautuina “Help Learners Take Responsibility for Their Learning”, o loo maua i le Tomai o le Atinaega o Faiaoga. Mafaufau e faataitai le tomai, “Tetee atu i le uiga o le tali atu i manatu ma fesili uma ma valaaulia le vasega e tali mai”.

• O a nisi o auala eseese e ono filifili ai le Atua e faamanuia i tatou i Lona mana e ala i Ona malumalu?

• O le a sou manatu i le mauaina o le mana o le Atua i Lona malumalu e aafia ai oe i le aiga, aoga, po o isi vaega o lou olaga?

“O le a e maua le mana e fausia ai”

Faitau le Mataupu Faavae ma Feagaiga 95:11–14, ma vaavaai mo upu po o fasifuaitau atonu na faaosofia ai le Au Paia e usitai i le poloaiga a le Alii e fausia se malumalu.

• O le a se mea sa e mauaina? Mata na faapefea ona faaosofia lenei mea?

Mafaufau e vaevae le vasega i ni vaega toalaiti. E mafai ona e tuuina atu i vaega taitasi se kopi o le pepa e tufa atu “O Osigataulaga na Faia e Fausia ai le Malumalu o Katelani.” Valaaulia tagata aoga e faitau e uiga i le fausiaina o le Malumalu o Katelani i luga o le pepa e tufa atu po o i le Au Paia, vol. 1, O Le Tagavai o le Upumoni, 210–11, 221.

E mafai e tagata aoga ona lisi i luga o le pepa e tufa atu po o luga o le laupapa nisi o osigataulaga na faia e le Au Paia mo le Malumalu o Katelani. Ona mafai lea ona latou talanoaina ma lisi ni osigataulaga e mafai ona tatou faia e auai atu ai i le malumalu pe saunia ai e tapuai i le Alii i Ona malumalu i o tatou aso.

O Osigataulaga na Faia e Fausia ai le Malumalu o Katelani

I le taimi lava na maua ai le vaega 95 na amata ai e Ailama Samita ona faamama le fanua lea o le a fausia ai le malumalu. O le fausiaina o le malumalu o se luitau faigata. Sa na o le 150 tagata o le Ekalesia i le eria. Latou te lei maua se aafiaga po o ni tomai e vaaia ai se fale tele faapea. O le fausiaina o le malumalu o le a tuu ai foi se faigata tautupe i luga o le Ekalesia ma tagata o le ekalesia. E ui i lea, sa latou galulue, ma sa faataunuuina e le Alii Lana folafolaga e tuu atu ia i latou le “mana e fausia ai” (Mataupu Faavae ma Feagaiga 95:11). O Artemus Millet, o se tagata liliu mai Kanata ma o se tufuga faufale poto, na siitia atu i Katelani ma vaavaaia le fausiaina. O le isi tagata liliu mai, o Ioane Tanner, na tuuina atu le fesoasoani tautupe i se taimi taua tele. O alii, tamaitai, ma tamaiti i le eria na foai atu, taimi, galuega, ma punaoa e fausia ai le malumalu. (Tagai Lisa Olsen Tait and Brent Rogers, “A House for Our God,” i le Revelations in Context [2016], 167; Au Paia, vol. 1, O Le Tagavai o le Upumoni, 210–11.)

• O a nisi o osigataulaga na faia e le Au Paia e fausia ai le Malumalu o Katelani? O le a se mea ua faagaeetia ai oe e uiga i nei osigataulaga?

• O a nisi o osigataulaga e mafai ona tatou faia e auai atu ai i le maota o le Alii?

A ua lava se taimi, valaaulia tagata aoga e faasoa mai mea na latou aoaoina. Mafaufau ma le agaga tatalo pe a mafai ona e faasoa atu i tagata aoga le faamatalaga lenei mai ia Peresitene Nelson lea e toe ta’u mai ai le taua o le faia o osigataulaga e tapuai ai i le Alii i totonu o le malumalu.

Na faamanuia Peresitene Russell M. Nelson ia i matou e faia se osigataulaga e tapuai ai i totonu o le malumalu:

Ou uso e ma tuafafine pele, o le fauina o nei malumalu atonu e le suia ai lou olaga, ae o lou taimi i totonu o le malumalu o le a mautinoa. I lena lava agaga, ou te faamanuia atu ia te outou ia iloa mea na e mafai ona outou lafoaiesea ina ia mafai ai ona outou faaaluina atili se taimi i le malumalu. (Russell M. Nelson, “Faamalosi ia i le Galuega Nei,” Liahona, Me 2018, 119)

• Na faapefea ona faamanuiaina oe po o isi e te iloa e ala i le faia o osigataulaga e tapuai ai i le Alii i Lona malumalu?

  Afai na i ai ni ou aafiaga i le tapuai atu i le Alii i Lona malumalu, mafaufau e faasoa atu ni auala ua faamanuiaina ai oe e le Alii o se taunuuga. Afai e te lei maua po o soo se tagata aoga le avanoa e auai ai i le malumalu, o le vitiō “Temples Are A Beacon” (2:50) e mafai ona fesoasoani i tagata aoga ia lagona se manao e tapuai i le Alii i le malumalu, e tusa lava po o le a le osigataulaga.

  Temples are a Beacon

  E ono penefiti ai tagata aoga mai le faamaumauina o latou tali i fesili nei i totonu o a latou api faamaumau suesuega. Ona mafai loa lea ona e valaaulia tagata aoga naunau e faasoa o latou manatu.

• O le a sou manatu e mafai faapefea ona faatatau aoaoga o loo i le Mataupu Faavae ma Feagaiga 95 ia te oe i le asō?

• O le a se mea ua e aoaoina e uiga i le taua o le tapuai i le Alii i Ona malumalu?

Punaoa Faaopoopo

O a nisi o uluai manatu na i ai i le Au Paia e uiga i le fausiaina o le malumalu?

Sa toe ta’ua e Lusi Maka Samita, le tina o le Perofeta o Iosefa Samita, “Sa taloina se fono ma sa talosagaina e Iosefa le usoga, taitoatasi, e tutulai ma faaali mai ona manatu, ma ina ua uma ua oo i le taimi e tuu atu ai lona manatu. … Sa manatu nisi e sili ai pe a fausia se [fale] faaiviivi. Fai mai isi o se [fale] faaiviivi e taugata tele …, ma sa faia e le toatele se faaiuga e faatu se fale ogalaau ma sa latou faia a latou fua faatatau i le mea sa mafai ona latou faia i le fauina. Sa tulai Iosefa ma faamanatu atu ia i latou latou te le o faia se fale mo i latou lava po o se isi lava tagata ae o se fale mo le Atua: ‘Ma, uso e, pe tatou te fauina ea se fale mo lo tatou Atua mai ogalaau? E leai, le au uso e. Ua i ai sa’u fuafuaga e sili atu i lo o lena. Ua ia te a’u le ata o le maota o le Alii, na tuuina mai e Ia lava. O le a outou vaai ai i lenei, le eseesega o a tatou fuafaatatau ma Ana lava auala.” Ona tuuina atu lea e le Perofeta le “ata atoa o le fale o le Alii i Katelani,” lea “sa matua fiafia” ai le usoga. Ina ua maea le fonotaga, sa latou savavali atu i le nofoaga o le fale ma amata ona galulue—aveese se pa, faamama le eleele, ma eli se alavai mo le puipui. (“Lucy Mack Smith, History, 1844–1845, tusi 14, itulau 1–2, josephsmithpapers.org; sipelaina, faailoga, ma mataitusi i tulaga masani)

Mataupu Faavae ma Feagaiga 95:4. O le a le “galuega uiga ese” a le Alii?

Sa valoia e Isaia e faapea a o lei Afio Mai Faalua Iesu Keriso, o le Alii o le a “faia lana galuega, ua ese lava, ina ia faia foi lana galuega, o lana galuega ese lava” (Isaia 28:21). O le “galuega uiga ese” na ta’ua e Isaia, ma toe faamautuina i le faaaliga o loo tusia i le Mataupu Faavae ma Feagaiga 95, e faasino i le Toefuataiga o le talalelei (tagai i le Mataupu Faavae ma Feagaiga 95:4; 101:95). I le avea ai o se vaega o lenei galuega, na folafola mai e le Alii e “sasaa atu [Lona] Agaga i luga o tagata uma” (Mataupu Faavae ma Feagaiga 95:4; tagai foi i le Ioelu 2:28–32). O i latou o e le talitonu i asiasiga faalelagi, faaaliga, faaaliga vaaia, meaalofa a le Agaga, ma isi mataupu faaleagaga atonu latou te vaavaai atu i le talalelei toefuataiina e “ese.”

Na faapefea ona faataunuuina e le Alii Lana folafolaga i le Mataupu Faavae ma Feagaiga 95:14?

“O ni nai aso [talu ona maua mai le faaaliga ua faamaumauina i le Mataupu Faavae ma Feagaiga 95 ], sa faataunuu ai e le Alii Lana folafolaga, i le tuuina mai ia Iosefa Samita ma ona fesoasoani i le Au Peresitene Sili se faaaliga vaaia matagofie lea sa latou vaaia ai fuafuaga auiliili mo le malumalu. Frederick G. Williams, le Fesoasoani Lua i le Au Peresitene Sili, i se taimi mulimuli ane e faapea: “Na maua e Iosefa [Samita] le afioga a le Alii mo ia e ave ona fesoasoani e toalua o, [Frederick G.] Williams ma [Sini] Rikitone, ma o mai i luma o le Alii, ma o le a Ia faaali atu ai ia te i latou le ata po o le faataitaiga o le fale e tatau ona fausia. Sa matou o ifo i o matou tulivae, ma valaau atu i le Alii, ma sa faaalia mai le fale i se tulaga sa mafai ona matou vaai atu i ai, ma o au sa muamua iloaina. Ona matou vaavaai faatasi atu lea i ai. Ina ua uma ona matou vaai lelei i fafo, sa foliga mai sa sau le fale i o matou luga’ [Frederick G. Williams, sii mai e Truman O. Angell, i le Truman Osborn Angell, Autobiography 1884, pp. 14–15, Church Archives, O Le Ekalesia a Iesu Keriso o le Au Paia o Aso e Gata Ai, Salt Lake City, Utah]” (Aoaoga a Peresitene o le Ekalesia: Iosefa Samita [2007], 271).

Pe na tutusa faaeega paia na folafolaina i le Malumalu o Katelani ma faaeega paia o le malumalu i aso nei?

O le faaeega o loo tautalagia i le faaaliga o loo tusia i le Mataupu Faavae ma Feagaiga 95 e le tutusa ma sauniga o le faaeega paia o loo faatautaia i malumalu na mulimuli mai. O le faaeega paia na maua e tagata o le Ekalesia i Katelani, Ohaio, na aofia ai nisi o sauniga e pei o sauniga na faatinoina i malumalu i aso nei ae sa aofia ai foi taimi na liligi mai ai e le Alii Lona Agaga ma faaeeina i latou i le mana faaleagaga (tagai i le Mataupu Faavae ma Feagaiga 109; 110 ma Autu o le Talafaasolopito o le Ekalesia, “Faaeega o le Mana,” Potutusi o le Talalelei). O le faaeega paia atoa muamua i lenei tisipenisione na folasia mai e le Perofeta o Iosefa Samita i Navu, Ilinoi, ia Me, 1842. Sa aofia ai nisi o mea sa faatautaia i Katelani ae faapea foi le tele o isi vaega faaopoopo.

O fea e mafai ona ou aoao atili ai e uiga i le fausiaina o le malumalu o Katelani?

• Tagai i Autu o le Talafaasolopito o le Ekalesia: Malumalu o Katelani

• Tagai ia Lisa Olsen Tait and Brent Rogers, i le “A House for Our God,” Revelations in Context (2016)

Gaoioiga Faaopoopo e Aoao Ai

Mataupu Faavae ma Feagaiga 95:1. “O e Ou te alofa i ai Ou te aoaiina foi”

Mafaufau e fesoasoani i tagata aoga e aoao e uiga i le uiga o le Faaola e ala i le malamalama pe aisea Na te aoaiina ai i tatou. A uma ona talanoaina le uiga o le aoaiina, e mafai e tagata aoga ona suesue fuaiupu nei, ma vaavaai mo mafuaaga e aoai ai e le Faaola Lona nuu:

• Eperu 12:5–7, 9

• Mosaea 23:21

• Mataupu Faavae ma Feagaiga 98:19–22

• Mataupu Faavae ma Feagaiga 105:2–6

Fai i tagata aoga e mafaufau pe faapefea ona latou tali masani atu pe a aoaiina i latou. Ona mafai lea ona e fai atu ia i latou e faasoa mai ni auala e mafai ona tatou tali atu ai ma le faamaoni pe a aoai i tatou e le Alii.

Mo nisi faamatalaga i le aoaiga, tagai i le Elder D. Todd Christofferson “Ou te Aoai Atu ma Sasa ia i Latou Uma Ou te Alofa I Ai,” Liahona, Me 2011, 97–100; pe matamata le vitio “O le Finagalo o le Atua” (3:02) i ChurchofJesusChrist.org.

O Le Finagalo o le Atua

Mataupu Faavae ma Feagaiga 95:6. “Savavali i le pouliuli i le aoauli”

O lenei gaoioiga e mafai ona fesoasoani i tagata aoga ia malamalama i le taua o le tausia o poloaiga a le Alii. E mafai ona e valaaulia tagata aoga e faamatala mai o latou manatu i le uiga o le fasifuaitau “savavali i le pouliuli i le aoauli”. Ona mafaufau lea e talanoaina fesili nei:

• E faapefea ona pei le le amanaiaina o le poloaiga a le Alii e fausia se malumalu o le “savali i le pogisa i le aoauli”?

• E faapefea ona tatou ono “savali i le pogisa i le aoauli” pe afai tatou te filifili e le amanaia isi poloaiga? (tagai foi i le Mataupu Faavae ma Feagaiga 95:12).

Faalagiga o Iesu Keriso

O lenei gaoioiga e mafai ona fesoasoani i tagata aoga e aoao atili ai e uiga ia Iesu Keriso e ala i le taulai atu i Ona faalagiga. Valaaulia tagata aoga e sue ia faalagiga o le Faaola i le Mataupu Faavae ma Feagaiga 95:7, 17. E mafai e tagata aoga ona faasoa mai mea ua latou aoaoina e uiga i le Faaola mai nei faalagiga.

Pe a manaomia, faamalamalama atu mea nei:

I le fuaiupu 7, ua tuuina mai ai e le Alii se faauigaga o le uiga o le “Alii o Sapaota”. O le upu Eperu foi lenei o lona uiga o “au” po o “autau.” O au e aofia ai autau agelu a le lagi (tagai Bible Dictionary, “Sapaota”).

E tusa ai ma Iosefa Samita, o le upu Amani o le suafa o le Atua i le gagana mama a’ia’i a Atamu, ma le “Atalii o Amani” (fuaiupu 17) o le suafa o le Alo o le Atua, o Iesu Keriso (tagai The Joseph Smith Papers, Documents, Volume 2: Iulai 1831–Ianuari 1833,, ed. Mataio C. Godfrey ma isi [2013], 213–15). Sa ia faamalamalama mai foi o Amani o lona uiga “o le uluai tagata po o le uluai Atua” (“Minutes, 5 April 1844,” itulau 84, josephsmithpapers.org; tagai foi i le Mataupu Faavae ma Feagaiga 78:20).

O Alefa ma le Omeka o mataitusi muamua ma le mulimuli o le alafapeta faaEleni. Latou te faamatalaina “le natura o Keriso e aofia ai mea uma, o le natura muamua ma le mulimuli, o le amataga ma le gataaga” (Bible Dictionary, “Alpha”).