Lesona 111: Mataupu Faavae ma Feagaiga 94–97

Mataupu Faavae ma Feagaiga 97

Siona—O E Loto Mama

A o feagai ai ma sauaga matuia, sa mananao le Au Paia i le laueleele o Siona (Itumalo o Siakisone, Misuri) ia iloa le finagalo o le Alii mo i latou. Na aoaoina i latou e le Alii e uiga i faamanuiaga o le loto mama. O lenei lesona e mafai ona fesoasoani i tagata aoga ia loto mama.

Gaoioiga E Ono Mafai Ona Aoao Ai

Vai mama

Mafaufau e amata le vasega i se lesona faatino e faaaoga ai le vai. Faaali atu i le vasega le vai mama, ma talanoa i faamanuiaga o le vai mama ma taunuuga o le faaaogaina o vai le mama. E mafai ona e fesoasoani i tagata aoga e faatusatusa ia faamanuiaga o le vai mama i faamanuiaga o le i ai o se loto mama.

• O a nisi o faamanuiaga i le i ai o ni vai mama ma manino?

• Pe a le mama le vai, o a nisi o auala e faamama ai?

• E mafai faapefea ona faatusatusa le vai mama i se loto mama?

I le Mataupu Faavae ma Feagaiga 97, na faailoa mai ai e le Alii Ona manaoga ia i ai i Lona nuu ni loto mama. A o e suesue i le aso, mafaufau e uiga i le tulaga o lou loto. Saili musumusuga ia malamalama ai i faamanuiaga o le faatagaina o le Alii e faamamaina lou loto.

O Siona o e loto mama

O se vaega o toeaina i totonu o “Siona,” o se igoa i lena taimi sa faaaoga ina ua faasino atu i le Itumalo o Siakisone, Misuri, sa mananao e iloa le finagalo o le Alii mo i latou, o lea sa latou tusia ai se tusi ia Iosefa Samita e saili ai tali. I le tali atu i ai, sa faamatala ai e le Alii ni fuafuaga maoae mo le aoga, le Ekalesia, ma e oo lava i le malumalu i le laueleele o Siona. Ina ia faaosofia le Au Paia ina ia mama ma taliaina o Ia, sa faatusatusa e le Alii i latou i laau e lua: o le tasi o le a tipiina i lalo ae o le isi e fua mai (tagai i le Mataupu Faavae ma Feagaiga 97:1–10). E pei lava ona ta’ua e le Alii le nuu o Enoka Siona (tagai Mose 7:18), sa finagalo le Alii e valaau Lana Au Paia i aso e gata ai o Siona. Sa finagalo o Ia ia latou avea faapei o Ia, ae le na o le nonofo i se nofoaga e ta’ua o Siona.

Faitau le Mataupu Faavae ma Feagaiga 97:21, ma vaavaai pe o faapefea ona faamatala e le Alii le aai o Siona.

Atonu e te manao e tusi Siona o le loto e mama i luga o le laupapa. E mafai ona e valaaulia tagata aoga e faailoga upu i a latou tusitusiga paia o loo aoao mai ai lenei upumoni.

Afai e manaomia e tagata aoga se fesoasoani i le taliina o le fesili lenei, e mafai ona e taitaia i latou i le Mosaea 5:2 po o le Alema 13:12.

• O le a lou manatu i le uiga o le ia loto mama?

Na aoao mai Peresitene Russell M. Nelson e uiga i mea e mafai ona tatou faia ina ia mama ai:

E le o faamoemoeina e le Alii se atoatoa mai ia i tatou i lenei taimi i lo tatou alualu i luma e faavavau. Ae ua Ia faamoemoeina i tatou ia faateleina lo tatou mamā. O le salamo i aso taitasi o le ala lea i le mamā, ma o le mamā na te aumaia le mana. (Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 68)

• O le a se mea ua fesoasoani lenei fuaitau ia te oe e malamalama ai e uiga i le mama?

O faamanuiaga a le Alii o loo maua i totonu o malumalu

I le Mataupu Faavae ma Feagaiga 97:10–21, na tuuina mai ai e le Alii i Lona nuu ia faatonuga o le a fesoasoani ia i latou ia mama i le loto. Faitau i le Mataupu Faavae ma Feagaiga 97:10–12, ma saili mo faatonuga na tuuina atu e le Alii i Ona tagata.

• O le a se mea ua e iloa e uiga i malumalu o le Alii e fesoasoani e te malamalama ai pe aisea e mafai ai ona latou fesoasoani i Lona nuu ia loto mama?

Atonu o se nofoaga lelei lea e fesoasoani ai i tamaiti aoga e faataitai le tomai o le suesueina o tusitusiga paia o le sailia o lisi i tusitusiga paia. E mafai e tamaiti aoga ona lisi ia faamanuiaga o le a oo mai mai le fausiaina o le malumalu.

E mafai foi ona e tusia se otootoga o se malumalu i luga o le laupapa. Valaaulia tagata aoga e faatumu i upu ma fasifuaitau o loo faamatala ai faamanuiaga a le Alii.

Faitau le Mataupu Faavae ma Feagaiga 97:13–21, ma vaavaai mo faamanuiaga na faamatalaina e le Alii e fesootai ma tapuaiga i Ona malumalu.

• E mafai faapefea e nei faamanuiaga ona faaosofia i tatou ia loto mama?

Atonu na matauina e tagata aoga o se tasi o faamanuiaga na folafola mai e le Alii o le, o e loto mama “o le a vaai i le Atua” (fuaiupu 16). Atonu e te manao e valaaulia tagata aoga e faafesootai le fuaiupu lenei i le Salamo 24:3–5 ma le Mataio 5:8 ma fesili i tagata aoga po o a sootaga latou te matauina i nei fuaiupu i le va o le mama i le loto ma le vaai i le Atua.

Na sii mai e Peresitene Henry B. Eyring o le Au Peresitene Sili le Mataupu Faavae ma Feagaiga 97:15–17 ma aoao mai le uiga o le vaai i le Atua i totonu o le malumalu:

Sa faamanino mai mo i tatou e Peresitene Russell M. Nelson faapea e mafai ona tatou “vaai” i le Faaola i le malumalu i se tulaga faapea e le o toe tagata ese o Ia ia i tatou. Na saunoa mai Peresitene Nelson: “Tatou te malamalama ia te Ia. Ua tatou malamalama i Lana galuega ma Lona mamalu. Ma e amata ona tatou lagonaina le aafiaga e le muta o Lona soifua lemafaatusalia” [Teachings of Russell M. Nelson (2018), 369].

Afai tatou te o i le malumalu ma le le atoatoa o le mamā, o le a le mafai ona tatou vaai, e ala i le mana o le Agaga Paia, le aoaoga faaleagaga e uiga i le Faaola lea e mafai ona tatou mauaina i le malumalu. (Henry B. Eyring, “Ou Te Fia Vaai i le Malumalu,” Liahona,, Me 2021, 30)

• E mafai faapefea e lenei folafolaga ona faaosofia se tasi ia loto mama?

• Aisea e te manatu ai ua finagalo le Alii ia mama le loto e ulufale atu i Lona malumalu?

Ia mama i le loto

E mafai ona e fesoasoani i tamaiti aoga e talanoaina pe mafai faapefea e le faatalanoaga o le pepa faataga o le malumalu ona fesoasoani ia i tatou e iloilo ai pe afai tatou te loto mama. Atonu o ni nai tamaiti aoga sa faatalanoaina talu ai nei ina ia maua se pepa faataga o le malumalu e mafai ona faasoa mai pe na faapeī le taliina o na fesili mo i latou. E mafai foi ona e tuuina atu le valaaulia lenei:

O fesili o le faatalanoaga o pepa faataga o le malumalu e mafai ona maua i le Mo le Malosi o le Autalavou: O Se Taiala mo le Faia o Filifiliga. Faaalu se taimi e mafaufau loloto ai i fesili taitasi o pepa faataga o le malumalu. Mafaufau pe faapefea ona atagia mai i au tali le tulaga o lou loto.

Tuu atu i tagata aoga se taimi e manatunatu ai i nei fesili i le vasega. A mafaufau loloto loa tagata aoga i fesili taitasi, e mafai ona e fautuaina i latou e filifili se mea se tasi pe lua e mafai ona latou faia e mafai ona fesoasoani e faamama ai o latou loto. E te ono fai i tagata aoga e tali fesili nei i a latou api talaaga o suesuega:

• O le a se mea o le a e faia e faataga ai le Alii e faamama lou loto?

• Aisea e te manatu ai e taua tele i le Tama Faalelagi ma Iesu Keriso le mama o lou loto?

Punaoa Faaopoopo

Mataupu Faavae ma Feagaiga 97:11–12. O le a le uiga o le fetalaiga a le Alii ina ua Ia ole atu mo le sefuluai e fausia ai le malumalu?

E pei ona faaaogaina i le vaega 97, sefuluai sa faasino i soo se taulaga po o foai ma le loto malie (tagai i leThe Joseph Smith Papers, Documents, Volume 3: Fepuari 1833–Mati 1834, 201, note 241).

O a faamanuiaga ua tuuina mai e le Alii e ala i le fausiaina o malumalu?

Na aoao mai Peresitene Russell M. Nelson:

Ia ‘aua lava ne’i see ese la tatou vaai mai mea o loo faia e le Alii mo tatou i le taimi nei. O loo Ia faia Ona malumalu ia mauagofie atili. O loo Ia faatelevaveina le saoasaoa o loo tatou fausiaina ai malumalu. O loo Ia faateleina lo tatou gafatia e fesoasoani ai e faapotopoto Isaraelu. O loo Ia faafaigofieina foi mo i tatou taitoatasi ina ia faamamāina faaleagaga. Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e le mafai e se isi lava mea ona e manuia ai. (Russell M. Nelson, “Taulai Atu i le Malumalu,” Liahona, Nov. 2022, 121)

E faapefea e le agavaa mo se pepa faataga o le malumalu ona saunia ai a’u mo le malumalu?

Na faamatala mai e Peresitene Russell M. Nelson:

O le agavaa faaletagata lava ia e ulufale atu ai i le maota o le Alii e manaomia ai le tele o sauniuniga faaleagaga a le tagata lava ia. Ae faatasi ai ma le fesoasoaniga a le Alii, e leai se mea e faigata. I nisi tulaga, e faigofie atu le fausiaina o se malumalu nai lo le fausiaina o se nuu ia saunia mo se malumalu. O le agavaa faaletagata lava ia e manaomia ai se liua atoa o le mafaufau ma le loto ina ia avea atili e faapei o le Alii, ia avea ma se tagatanuu faamaoni, ia avea ma se faataitaiga sili atu, ma ia avea ma se tagata paia atu. (Russell M. Nelson, “Malelega Faaiu,” Liahona, Nov. 2019, 121–122)

Na aoao mai Elder Quentin L. Cook o le Korama a Aposetolo e Toasefululua:

O lo tatou naunautaiga sili o le ola lea o tagata o le Ekalesia ia agavaa mo se pepa faataga o le malumalu. Faamolemole aua nei vaai atu i le malumalu o se sini mamao ma masalo o se sini e le mafai ona ausiaina. O le galulue ai ma o latou epikopo, e mafai ai e le toatele o tagata ona ausia tulaga manaomia uma amiotonu i se taimi puupuu lava pe a i ai so latou naunautaiga ia agavaa ma salamo atoatoa i solitulafono. (Quentin L. Cook, “Vaai ia Oe Lava ia i totonu o le Malumalu,” Liahona, Me 2016, 98)

Gaoioiga Faaopoopo e Aoao Ai

Mataupu Faavae ma Feagaiga 97:1–2. Saili ma le filiga e aoao le poto

Atonu e aoga i tagata aoga le aoao e uiga i le faateleina o lo latou tomai e aoao ai le poto ma le upumoni. Fai atu i tagata aoga e faasoa mai nisi o uiga ma amioga a se tasi e i ai se manao tele e aoao.

E mafai ona e faamalamalama atu na valaauina Pale P. Palate e pulefaamalumalu i se aoga a toeaina i Siona e pei o le Aoga a Perofeta na faavaeina e Iosefa Samita i Ohaio. Sa tusia e Pale ma Iosefa ni tusi i tua ma luma, ma na oo mai le Mataupu Faavae ma Feagaiga 97 e tali atu ai i se tasi o na tusi. Valaaulia tagata aoga e faitau fuaiupu 1–2, ma vaavaai mo mea na fetalai le Alii na faia ai toeaina i Siona o ni tagata aoao lelei. Fesoasoani i tagata aoga e faailoa mai se upumoni mai nei fuaiupu, e pei o le e alofa mutimutivale le Alii ma o le a faamanuiaina i tatou i le poto ma le upumoni a o tatou faamaualaloina i tatou lava ma saili ma le filiga e aoao.

E mafai ona e fai atu i tagata aoga e talanoaina ma iloa pe aisea atonu e naunau ai le Alii e faamanuia i tatou i le poto ma le upumoni pe a tatou taulimaina le aoaoina i lenei ala.

Mataupu Faavae ma Feagaiga 97:7–9. O laau e lua

E mafai ona fesoasoani leMataupu Faavae ma Feagaiga 97:7–9 i tagata aoga e aoao ai e uiga i mea e mafai ona latou faia ina ia taliaina ai e le Alii. Valaaulia tagata aoga e mafaufau loloto pe aisea o le a latou mananao ai ina ia taliaina e le Alii. E mafai ona e valaaulia tagata aoga e faamatala ia laau e lua i fuaiupu pe fai se ata faigofie o laau taitasi. E mafai ona latou faaigoaina le fua i luga o le laau lelei faatasi ai ma uiga o loo faamatala mai i le fuaiupu 8. Talanoa le uiga o le i ai o se loto momomo ma se agaga salamo ma ia tausia a tatou feagaiga e ala i le ositaulaga. Fai atu i tagata aoga e faasoa mai pe mafai faapefea e le faia o nei mea ona fesoasoani ia i tatou ina ia taliaina e le Alii.

Mataupu Faavae ma Feagaiga 97:18–28. “O Siona— o e loto mamā.”

Atonu e lelei mo tagata aoga le malamalama po o le a le uiga o Siona ma pe faapefea ona fesootai ia i latou. Tusi le upu Siona i luga o le laupapa ma fai i tagata aoga e faasoa mai mea ua latou iloa e uiga ia Siona. Fesoasoani i tagata aoga ia malamalama o tagata sa nonofo i le Itumalo o Siakisone, Misuri, sa faasino i le nofoaga sa latou nonofo ai o Siona. Sa mananao le Au Paia sa nonofo i Misuri e faatu Siona a o latou faitau e uiga i tusitusiga paia (tagai i le Taiala Mo Autu, “Siona”). Fesoasoani i tagata aoga ia iloa pe na faapefea ona faauigaina e le Alii ia Siona e ala i le faitauina o le Mataupu Faavae ma Feagaiga 97:21 (tagai foi Mose 7:18). Ona mafai lea ona e valaaulia tagata aoga e suesue le Mataupu Faavae ma Feagaiga 97:18–28, ma vaavaai po o a faamanuiaga na finagalo le Alii e tuu atu i le Au Paia i Misuri, pe afai latou te filifili e avea ma “e loto mama” (Mataupu Faavae ma Feagaiga 97:21).