Lēsoni 113: Tokāteline mo e Ngaahi Fuakava 98–101

Tokāteline mo e Ngaahi Fuakava 98

ʻE Fengāueʻaki Fakataha ʻa e Ngaahi Meʻa Kotoa Pē Koeʻuhí Ko Hoʻomou Leleí

ʻI he faʻahitaʻu māfana ʻo e 1833, naʻe iku ʻa e fekeʻikeʻi ʻi he vahaʻa ʻo e kau Mīsulí mo e Kāingalotu ʻi he Vahefonua Siakisoní ke ʻohofi ai ʻe he kau fakatangá ʻa e ngaahi ʻapí, fakaʻauha e ngaahi pisinisí, pea tuʻutuʻuni ke mavahe ʻa e kāingalotu kotoa pē ʻo e Siasí mei he feituʻú. ʻI he Tokāteline mo e Ngaahi Fuakava 98, naʻe fai ai ʻe he Fakamoʻuí ha fakafiemālie mo ha faleʻi ki he Kāingalotu faingataʻaʻiá mo fakahinohinoʻi e kau taki ʻo e Siasí ʻi he founga ke tali ʻaki honau ngaohikoviá. ʻE lava ke tokoni ʻa e lēsoni ko ʻení ki he kau akó ke nau tatali ʻi he faʻa kātaki ki he ʻEikí ʻi he taimi ʻo e faingataʻá.

Ngaahi ʻEkitivitī Ako ʻOku Ala Fakahokó

Faʻa-kātaki

Fakakaukau ke kamata e lēsoní ʻaki hono tokoniʻi e kau akó ke nau fakakaukau ki he faʻa kātakí. ʻE lava ke teuteuʻi ai kinautolu ke nau ako fekauʻaki mo e tatali ʻi he faʻa kātaki ki he ʻEikí ʻi he taimi ʻo e faingataʻá. Te ke lava ʻo hiki ʻa e foʻi lea “faʻa kātakí” ʻi he palakipoé pea ʻeke ange ha niʻihi ʻo e ngaahi fehuʻi ko ʻení.

• Ko e fē taimi ʻoku faingataʻa ai ke faʻa kātakí?

• Ko e hā ha ngaahi tūkunga naʻe pau ai ke ke faʻa kātaki?

• ʻI he meʻafua 1–10, ko e 10 ʻa e faʻa kātaki lahí, ʻokú ke pehē ʻoku fēfē hoʻo faʻa kātakí?

• Ko e hā ha ngaahi tūkunga ʻe ala fiemaʻu ai koe ʻe he ʻEikí ke ke faʻa kātaki? Ko e hā hono ʻuhingá?

Ko hono tuli ʻo e Kāingalotú mei he Vahefonua Siakisoni, Mīsulí

ʻE lava ke lau pe fakamatalaʻi fakanounou ʻa e palakalafi ko ʻení ʻi he lea pē ʻaʻau ke tokoni ke mahino ki he kau akó ʻa e puipuituʻa fakahisitōlia ʻo e vahe 98.

ʻI he tūʻuta ʻa e Kāingalotú ki Mīsuli ke langa ʻa Saioné, naʻe kamata ke fekeʻikeʻi ʻa e kakai ʻo e Vahefonua Siakisoní. Naʻe fakalahi ʻe he ngaahi fepakipaki fakapolitikalé, taʻefemahinoʻaki fakalotú, mo e ngaahi fili taʻe fakapotopotó (kau ai ʻa e ʻikai ke langa e temipalé ʻo hangē ko e fekau ʻe he Fakamoʻuí) ʻa e ngaahi palopalemá. Lolotonga e faʻahitaʻu māfana ʻo e 1833, naʻe fakatahataha mai ha ngaahi kulupu fakatonutolu ke tuli fakamālohi ʻa e Kāingalotú mei he Vahefonua Siakisoní. Naʻe taaʻi, vali ʻaki ha valitā, mo fakapipiki fulufuluʻi moa ʻa Pīsope ʻEtuate Pātilisi mo Sālesi ʻĒleni. Naʻe fakaʻauha e fale paaki ʻa W. W. Felipisí, pea fakamovetevete e ʻū laʻipeesi ʻo e Tohi ʻo e Ngaahi Fekaú. Naʻe toʻo loto-toʻa ʻe Viena Siekisi, fakataha mo e ongo tautehina ko Mele mo Kalolaine Lōliní ʻa e lahi taha ʻo e ʻū laʻipeesi ʻo e ngaahi fakahaá kimuʻa ʻoku teʻeki ke nau maumaú. Naʻa nau lele ʻo toitoi pea mo e ngaahi fakahaá mei he kau fakatangá. ʻI he ʻohofí, naʻe fakamanamanaʻi ha tokolahi ke nau mavahe mei honau ngaahi ʻapí (vakai, Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 188–98).

Fakaafeʻi ʻa e kau akó ke nau fakakaukau ki ha ngaahi ʻahiʻahi pe faingataʻa ʻoku nau ala fehangahangai mo ia. Poupouʻi kinautolu ke nau fekumi ki ha fakahā fakataautaha ʻi heʻenau ako e Tokāteline mo e Ngaahi Fuakava 98 pea fakafanongo ki he meʻa ʻoku finangalo e ʻEikí ke nau faí.

Lau ʻa e Tokāteline mo e Ngaahi Fuakava 98:1–3, ʻo kumi e founga naʻe tali ai ʻe he Fakamoʻuí e ngaahi lotu ʻa e Kāingalotu ʻi he Vahefonua Siakisoní.

• Naʻe mei tokoni fēfē nai ʻa e faleʻi ko ʻení ki he Kāingalotu ʻi Mīsulí?

• ʻE tokoni fēfē ia kiate koe pe ko ha taha ʻokú ke ʻiloʻi ke fehangahangai mo ha meʻa faingataʻa?

• Ko e hā ha ngaahi tefitoʻi moʻoni te ke lava ʻo ʻilo mei he ngaahi veesi ko ʻení?

ʻE lava ke vahevahe ʻe he kau akó ha ngaahi tefitoʻi moʻoni kehekehe. Ko e founga ʻe taha ke tokoni ki he kau akó ke nau ʻiloʻi ha ngaahi tefitoʻi moʻoní ko hono hiki e fakamatala taʻe kakato ko ʻení ʻi he palakipoé pea fakaafeʻi e kau akó ke fakakakato ia.

ʻI heʻetau tatali ʻi he faʻa kātaki ki he ʻEikí, ʻokú Ne fuakava

ʻE lava ke fakaʻosi ʻe he kau akó ʻa e fakamatalá ʻaki ha ngaahi tefitoʻi moʻoni hangē ko ʻení:

• ke tali ʻetau ngaahi lotú.

• ʻe hoko ha lelei mei heʻetau ngaahi faingataʻaʻiá.

Tatali ʻi he faʻa kātaki ki he ʻEikí

Fekumi ki ha ueʻi fakalaumālie ke ʻiloʻi ʻa e ngaahi tefitoʻi moʻoni ke tokanga taha ki aí. Fakakaukau ki he ngaahi fiemaʻu hoʻo kau akó, pea fili e naunau ʻokú ke ongoʻi ʻe tokoni lahi tahá. Fili pe ko e fē ʻi he ngaahi naunau ko ʻení ke vahevahe mo hoʻo kau akó. ʻOku ʻikai fiemaʻu ia ke mou aleaʻi kotoa ia.

Ko ha founga ʻe taha ko hono vahevahe ʻa e kau akó ki ha ngaahi kulupu pea vahe ki he kulupu takitaha ke nau ako ha taha ʻo e ngaahi fakamatalá pe potufolofola ʻi he Tohi ʻa Molomoná. Hili iá, fakaafeʻi ʻa e kau akó ke vahevahe mo e kalasí ʻa e meʻa naʻa nau akó.

Naʻe akonaki ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e tatali ki he ʻEikí. Lau ʻa e fakamatala ko ʻení, pe mamata ʻi he foʻi vitiō “ʻAmanaki Lelei ʻia Kalaisi” mei he taimi 9:13 ki he 10:06, ʻoku maʻu ʻi he ChurchofJesusChrist.org.

ʻOku ʻuhinga ʻa e tatali ki he ʻEikí ke hokohoko atu ʻa e talangofuá mo e tupulaki fakalaumālie kiate Iá. ʻOku ʻikai ʻuhinga ʻa e tatali ki he ʻEikí ke fakafiefiemālie pē taʻe fai ha meʻa. ʻOku ʻikai teitei totonu ke ke ongoʻi ʻokú ke ʻi ha loki talitaliʻanga.

Ko e fakatatali ki he ʻEikí ʻokú ne fakahuʻunga ha ngāue. Kuó u ako ʻi he ngaahi taʻu lahi ʻoku tupulaki ʻetau ʻamanaki lelei ʻia Kalaisí ʻi he taimi ʻoku tau tokoniʻi ai e niʻihi kehé. ʻI heʻetau ngāue tokoni ʻo hangē ko Sīsuú, ʻoku fakanatula pē ʻa e tupulaki ʻetau ʻamanaki lelei kiate Iá.

Ko e tupulaki fakatāutahá ʻe lava ke maʻu ʻe ha taha he taimí ni lolotonga ʻene tatali ki he ʻEikí mo ʻEne ngaahi talaʻofá ko ha ʻelemēniti mahuʻinga mo toputapu ʻo ʻEne palaní maʻatautolu takitaha. (M. Russell Ballard, “ʻAmanaki Lelei ʻia Kalaisi,” Liahona, Mē 2021, 55)

• Ko e hā ha ngaahi founga te tau lava ai ʻo tatali ʻi he faʻa kātaki ki he ʻEikí ʻi he taimi ʻo e faingataʻá?

Naʻe fakaʻaongaʻi ʻe Palesiteni Lāsolo M. Nalesoni ʻa e Tokāteline mo e Ngaahi Fuakava 98:1–3 ke akoʻi fekauʻaki mo e ngaahi tali ki heʻetau ngaahi lotú.

Kapau te tau lotu ʻi he fakakaukau taʻengata, he ʻikai fiemaʻu ia ke tau ofo ʻo kapau ʻe ongona ʻetau ngaahi tautapa fakaloloma mo fakamātoato tahá. …

Naʻe fili ʻe he ʻEikí ʻa e kupuʻi lea mālohi tahá ke fakamahinoʻi mai ai kiate kitautolu! ʻA e meʻa fakamaʻú! Fakamoʻoní! Fuakavá! Tuʻutuʻuní! Fuakava taʻe-faʻa-liliu! ʻE kāinga, mou tui kiate Ia! ʻE ongoʻi ʻe he ʻOtuá hoʻo ngaahi lotu fakamātoato mo moʻoní pea ʻe fakamālohia ai hoʻo tuí. (Russell M. Nelson, “Fehangahangai mo e Kahaʻú ʻi he Tui,” Liahona, Mē 2011, 35)

• Ko e hā ‘oku akoʻi atu ʻe he fakamatala ko ʻení fekauʻaki mo e ʻEikí?

• ʻE tokoni fēfē ʻa e mahino ʻo e ngaahi akonaki ko ʻení ki ha taha ke tatali ʻi he faʻa kātaki kiate Iá?

Lau ʻa e 2 Nīfai 2:1–2, ʻo kumi ʻa e meʻa naʻe akoʻi ʻe he palōfita ko Līhaí ki hono foha ko Sēkopé ʻo fekauʻaki mo hono ngaahi faingataʻaʻiá.

• Ko e hā ha ngaahi founga ʻe lava ai ʻe he ʻEikí ʻo “fakatapui ʻa [hotau] ngaahi faingataʻaʻiá ke hoko ko ha tāpuaki kiate [kitautolu]”?

Ko e faleʻi ʻa e Fakamoʻuí

Ke ako ʻa e Tokāteline mo e Ngaahi Fuakava 98:11–22, ʻe lava ke ngāue ʻa e kau akó mo ha hoa pe kulupu tokosiʻi ange. ʻE lava ke fili ʻe he kau akó ha tefitoʻi moʻoni ke tokanga taha ki ai pea kumi e faleʻi ʻa e Fakamoʻuí ʻe tokoni ki ha taha ke ne fakaʻaongaʻi e tefitoʻi moʻoni ko iá.

Hangē ko ʻení, ʻe lava ke tokoni ʻa e “te ne foaki ki he kau tui faivelengá ʻa e ʻotu lea ki he ʻotu leá” (veesi 12) ki ha taha ke tatali ʻi he faʻa kātaki ki he ʻEikí ʻi Heʻene tali ʻenau ngaahi lotú ʻo ʻikai fakaʻangatahá. ʻE lava ke tokoni ʻa e kupuʻi lea “liʻaki ʻa e kovi kotoa pē pea pīkitai ki he lelei kotoa peé” (veesi 11) ki ha taha ke ne moʻui ʻi ha founga ʻe lava ai ʻe he ʻOtuá ʻo ngaohi ʻenau ngaahi mamahí ke “fengāueʻaki fakataha … koeʻuhí ko [ʻenau] leleí” (veesi 3).

Lau ʻa e Tokāteline mo e Ngaahi Fuakava 98:11–22, ʻo kumi e faleʻi ʻa e Fakamoʻuí ʻe lava ʻo tokoni atu kiate koe pe ko ha taha kehe ke tatali ʻi he faʻa kātaki ki he ʻEikí.

• Ko e hā ha meʻa naʻá ke maʻu ʻi he ngaahi veesi ko ʻení ʻe lava ʻo tokoni ki ha taha ke tatali ʻi he faʻa kātaki ki he ʻEikí?

• Ko e hā ha ngaahi foʻi lea pe kupuʻi lea te ke vahevahe mo ha taha ʻokú ne foua ha faingataʻa? Ko e hā hono ʻuhingá?

Te ke lava ʻo fakaafeʻi e kau akó ke nau fakalaulauloto ki ha taimi naʻe tokoniʻi ai kinautolu ʻe he Fakamoʻuí ke nau vakai ki he lelei ʻe lava ke hoko mai ʻi he ngaahi taimi ʻo e faingataʻá. Te ke lava ʻo huluʻi ʻa e foʻi vitiō “God Will Lift Us Up” (4:59) pe vitiō “Mountains to Climb” (5:05), ʻoku maʻu ʻi he ChurchofJesusChrist.org.

ʻOange ha faingamālie ki ha kau ako ʻoku nau loto-fiemālie ke vahevahe ʻa e founga kuo tokoniʻi ai kinautolu ʻe he Fakamoʻuí ke nau tatali ʻi he faʻa kātaki kiate Ia lolotonga ha faingataʻa. ʻE lava ke vahevahe ʻe he kau akó ha aʻusia naʻa nau mamata ai ki he lelei naʻe hoko koeʻuhí ko ha faingataʻa, ʻo ka feʻunga ke fai pehē.

Fakaʻaongaʻi e ngaahi akonaki ʻa e Fakamoʻuí

Tali ʻi he faʻa lotu ʻi hoʻo tohinoa akó ʻa e ongo fehuʻi ko ʻení mei he meʻa kuó ke ako he ʻaho ní:

• Ko e hā kuó ke ako te ne lava ke fakatupulaki hoʻo malava ke tatali ʻi he faʻa kātaki ki he ʻEikí?

• Ko e hā kuó ke ongoʻi kuo ueʻi koe ke ke fai ʻe lava ʻo tokoni atu ke ke tatali ʻi he faʻa kātaki ki he Fakamoʻuí ʻi he taimi ʻokú ke fehangahangai ai mo e ngaahi faingataʻá?

Ke fakaʻosi e kalasí, te ke lava ʻo vahevahe ha aʻusia ʻi haʻo tatali ʻi he faʻa kātaki ki he ʻEikí pe ko ha taimi naʻá Ne fakatupu ai ha faingataʻa ke fengāueʻaki fakataha koeʻuhí ko hoʻo leleí mo Hono nāunaú. Te ke lava ʻo fai hoʻo fakamoʻoní ki he finangalo lelei ʻa e Tamai Hēvaní ke tāpuakiʻi kitautolu ʻi he faingataʻá ʻi heʻetau tatali kiate Iá.

Ngaahi Maʻuʻanga Tokoni Kehé

Fēfē kapau ʻoku ou ongoʻi ʻo hangē ʻoku ʻikai tali ʻeku ngaahi lotú?

Naʻe fakamoʻoni ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE ʻi ai ʻa e taimi ʻi heʻetau moʻuí he ʻikai ʻomi ʻe heʻetau ngaahi ngāue fakalaumālie lelei tahá, ngaahi tautapá ʻa e ngaahi ikuna ʻa ia ʻoku tau fakaʻamuá ʻo tatau ai pē pe ʻoku fekauʻaki ia mo ha meʻa fakaemāmani lahi pe ko ha ngaahi meʻa iiki fakataautaha. Ko ia ʻi he lolotonga ko ia ʻetau lotu mo tatali fakataha ki he ngaahi tali ʻo e niʻihi ʻo ʻetau ngaahi lotú, ʻoku ou fie ʻoatu ʻa ʻeku palōmesi fakaeʻaposetolo ʻoku fanongoa mo tali mai ʻa kinautolu neongo ʻoku ʻikai fakahoko mai ia ʻi he taimi mo e founga naʻa tau fiemaʻú. Ka ʻoku tali maʻu pē kinautolu ʻi he taimi mo e founga ʻoku totonu ke tali mai ʻaki ʻe ha mātuʻa tokaimaʻananga mo angaʻofa taʻengata. Siʻoku kāinga ʻofeina, kātaki ʻo feinga ke ʻiloʻi ko Iá ʻoku ʻikai tulemohe pe mohe ʻoku tokanga ia ki he fiefia mo e hakeakiʻi fakamulituku ʻo ʻEne fānaú ʻo mahulu hake ʻi he meʻa kotoa ʻe lava ke fakahoko ʻe ha tokotaha fakalangí. Ko Ia ʻa e ʻofa haohaoa kuo fakahaaʻí, pea ko Hono huafá ko e Tamai Angaʻofa. (Jeffrey R. Holland, “Tatali ki he ʻEikí,” Liahona, Nōvema 2020, 115–116)

Ko e hā ha meʻa te u lava ʻo fai ʻi he taimi ʻoku ou fehangahangai ai mo e ngaahi taimi faingataʻá?

Naʻe fakamatalaʻi ʻe Sisitā Mīseli D. Keleki ʻo e Kau Palesitenisī Lahi ʻo e Kau Finemuí ʻo pehē:

ʻI he hoko ʻa e ngaahi taimi faingataʻá, ʻoku ou feinga ke manatuʻi ne u fili ke muimui ʻia Kalaisi kimuʻa peá u haʻu ki he māmaní pea ʻoku hoko ʻa e ngaahi pole ki heʻeku tuí, moʻui leleí, mo ʻeku kātakí kotoa ko e konga ʻo e ʻuhinga ʻoku ou ʻi heni aí. Pea ʻoku ʻikai totonu ke u teitei fakakaukau ke hoko e ngaahi faingataʻa ʻo e ʻaho ní ke u fehuʻia ai e ʻofa ʻa e ʻOtuá kiate aú pe liliu ai ʻeku tui kiate Iá ki he veiveiuá. ʻOku ʻikai ʻuhinga ʻa e ngaahi faingataʻá ʻoku ʻikai lava ʻa e palaní; ʻoku nau hoko ko e konga ʻo e palaní ʻo fakataumuʻa ke tokoniʻi au ke fekumi ki he ʻOtua. ʻOku ou hoko ʻo tatau ange mo Ia ʻi heʻeku kātaki fuoloa pea fakatauange ke u hangē ko Ia, ʻo lotu lahi ange, ʻi heʻeku faingataʻaʻiá. (Michelle D. Craig, “Lotó Kotoa,” Liahona, Nōvema 2022, 61–62)

Ko e fē ha feituʻu te u lava ʻo ako lahi ange ai fekauʻaki mo hono tuli ʻo e Kāingalotú mei he Vahefonua Siakisoní?

• Kau Māʻoniʻoní, 1:188–209

• David W. Grua, “Waiting for the Word of the Lord,” ʻi he Revelations in Context [2016]

• Ngaahi Tefito ʻi he Hisitōlia ʻo e Siasí, “Fakaehaua ʻi he Vahefonua Siakisoní,” ChurchofJesusChrist.org/study/history/topics

Ngaahi ʻEkitivitī Fakalahi ki he Akó

Ko e angavaivai ʻa Pīsope ʻEtuate Pātilisí

Toe fakamanatu ʻa e talanoa ʻo e valitaaʻi mo e fakapipiki fulufuluʻi moa ʻo Pīsope Pātilisi ʻi he Kau Māʻoniʻoní, 1:197–98. Fakaafeʻi e kau akó ke nau ako e ngaahi fakakaukau ʻa Pīsope Pātilisi fekauʻaki mo e meʻa naʻe hokó (ʻoku maʻu ʻi laló), ʻo kumi e founga naʻá ne fakahoʻata ai e ngaahi akonaki ʻa e Fakamoʻuí ʻi he Tokāteline mo e Ngaahi Fuakava 98:1–3. Fakaafeʻi ʻa e kau akó ke nau fakakaukau ki he founga te nau lava ai ʻo fakahoko ha tali ʻi he founga tatau.

Naʻe manatu ʻa Pīsope ʻEtuate Pātilisi ʻo pehē:

Kimuʻa pea valitaaʻi mo fakapipiki fulufuluʻi moa aú, naʻe fakangofua au ke u lea. Ne u talaange kiate kinautolu kuo fuesia ʻe he Kāingalotú e fakatangá talu pē mei muʻa, pea ʻoku teʻeki ke u fai ha meʻa ke mamahi mai ai ha taha kiate au; pea kapau te nau fakamamahiʻi au, te nau fakamamahiʻi ha tokotaha taʻehalaia; pea ʻoku ou loto-fiemālie ke u mamahi koeʻuhí ko Kalaisi; ka ko e meʻa ki he mavahe mei he fonuá, ne ʻikai ke u loto ki ai he taimi ko iá. …

… Ne u fuesia hono fakamamahiʻi aú ʻi he faʻa kātaki mo e loto-maʻulalo ʻo ngali fakaofo ki he kakaí, ʻa ia ne nau fakaʻatā au ke u mavahe fakalongolongo, naʻe ʻi ai hanau tokolahi ne fofonga mamahi, naʻe ongo ʻenau fie kaungāmamahí ʻo hangē ko ia ne u fakakaukau ki aí; ka kiate aú, ne u fonu ʻi he Laumālie mo e ʻofa ʻa e ʻOtuá, naʻe ʻikai ai ke u maʻu ha loto-tāufehiʻa ki he kakai ne nau fakatangaʻi aú pe ki ha taha kehe. (Edward Partridge, ʻi he History, 1838–1856 [Manuscript History of the Church], volume A-1, 327–28, josephsmithpapers.org; fakaleleiʻi ʻa e sipelá, mataʻitohi lahí, mo e fakaʻilonga leá)

Ko Hono Fakahaofi ʻo e Tohi ʻo e Ngaahi Fekaú

Ke tokoni ki he kau akó ke nau vakai ki ha sīpinga ʻo hono fakahaaʻi ʻe ha ongo finemui ha mālohi mo ha loto-toʻa lolotonga e ngaahi taimi ʻo e faingataʻá, te ke lava ʻo vahevahe e talanoa ʻo Mele mo Kalolaine Lōlini mei he Kau Māʻoniʻoní, 1:195–96. Te mou lava ʻo aleaʻi e founga ʻe lava ai ʻe he ngaahi sīpinga ʻa e kau fafine ko ʻení ʻo ueʻi fakalaumālie e toʻu tupú he ʻaho ní.

Tokāteline mo e Ngaahi Fuakava 98:23–48. Ko e ngaahi fono ʻa e ʻEikí ki he sāuní, taú, mo e fakamolemolé

Kapau ʻe ʻaonga ki he kau akó ʻenau ako lahi ange fekauʻaki mo e founga tali ʻa e Fakamoʻuí ki he fakatangá, fakaafeʻi ke nau fakamatalaʻi ha ngaahi founga ʻe ala fakahoko ʻaki ʻe he kakaí ha tali ʻi he taimi ʻe fakaʻitaʻi pe fakamamahiʻi ai kinautolu ʻe ha taha. Fakamatalaʻi ange ʻoku akoʻi ʻe he ʻEikí ʻi he fakahā ʻoku lekooti ʻi he Tokāteline mo e Ngaahi Fuakava 98:23–48, ha ngaahi tefitoʻi moʻoni ʻe lava ke tokoni ke tau ʻiloʻi ʻa e founga ke fakahoko ai ha tali ʻi heʻetau mamahi ʻi he ngaahi lea pe tōʻonga ʻa e niʻihi kehé. Te ke lava ʻo fokotuʻutuʻu ʻa e kalasí ki ha ngaahi hoa pe fanga kiʻi kulupu iiki. ʻE lava ke fili ʻe he kulupu takitaha ha taha ʻo e ngaahi tefito ko ʻení ke ako pea lava ke nau teuteu ke vahevahe ʻa e meʻa ne nau akó mo e kalasí.

1. Tokāteline mo e Ngaahi Fuakava 98:23–32—Ko e fono ʻa e Fakamoʻuí ki he tali ʻo e fakatangá

2. Tokāteline mo e Ngaahi Fuakava 98:33–38—Ko e fono ʻa e Fakamoʻuí ki he taú

3. Tokāteline mo e Ngaahi Fuakava 98:39–48—Ko e fono ʻa e Fakamoʻuí ki he fakamolemolé

Te ke lava ʻo fakaafeʻi e kau akó ke nau aleaʻi e ngaahi fehuʻi ko ʻení ʻo fakaʻaongaʻi e ngaahi tūkunga ʻi laló, pe ʻe lava ke faʻu ʻe he kau akó ha ngaahi tūkunga tatau mo kinautolu.

• Ko e hā ha meʻa te ke loto ke fai kapau naʻe hoko ʻeni?

• ʻOku kole fēfē mai ʻe he Fakamoʻuí ke tau fakahoko ha tali ʻo fakatatau ki he Tokāteline mo e Ngaahi Fuakava 98?

• Naʻe hanga ʻe he ngaahi tokoua ʻo Nīfaí ʻo haʻi ia pea tuku ia ʻi he toafá, naʻa nau meimei fakatupunga ʻene mate ʻi he vaka ne folau ki he fonua ʻo e talaʻofá, pea mo faʻufaʻu ke fakapoongi ia hili e pekia ʻa Līhaí.

• ʻI hoʻo tuku hake ha ʻū tā ʻo e Fakamoʻuí mo e temipalé ʻi he ʻinitanetí, ʻoku tohi hake ʻe ha taha mei ho ʻapiakó ha ngaahi fakamatala taʻeʻofa ʻi he mītia fakasōsialé.

• ʻOku tohi atu ha faifekau mei ho uōtí pe koló, ʻo kole fakamolemole atu ʻi heʻene fakamamahiʻi koe ʻi he ako māʻolungá.

Te ke lava foki ʻo huluʻi e foʻi vitiō “That We Might Be One: The Story of the Dutch Potato Project” (11:57) mei he ChurchofJesusChrist.org. ʻOku vahevahe ʻe he vitiō ko ʻení ʻa e talanoa ʻo e Kāingalotu ʻi Netaleni naʻa nau loto-fiemālie ke feilaulauʻi ʻenau meʻakaí maʻa honau ngaahi fili kimuʻá hili ʻa e Tau Lahi Hono II ʻa Māmani. Te ke lava ʻo fakaafeʻi e kau akó ke nau kumi e founga naʻe tāpuakiʻi ai ʻe he Fakamoʻuí ʻa e Kāingalotu Hōlaní ʻi heʻenau ngaahi ngāue faka-Kalaisí.