Lēsoni 114: Tokāteline mo e Ngaahi Fuakava 98–101

Tokāteline mo e Ngaahi Fuakava 101:1–42

“Neongo ʻEnau Ngaahi Angahalá, Ka ʻOku Fonu ʻa Hoku Lotó ʻi he ʻOfa Mamahi”

Naʻe faingataʻa ki he Kāingalotu ʻi Mīsulí ke nau moʻui angatonu ʻo hangē ko e fekau ʻa e ʻEikí. Ko hono olá, naʻe mole meiate kinautolu ha konga lahi ʻo e mālohi mo e maluʻi ʻa e ʻEikí pea tuli kinautolu mei honau ngaahi ʻapí ʻe honau ngaahi filí. Ka neongo ʻení, naʻe fakapapauʻi ange ʻe he ʻEikí ʻa ʻEne ʻofa mo e manavaʻofa kiate kinautolú. ʻOku fakataumuʻa ʻa e lēsoni ko ʻení ke tokoni ke ongoʻi ʻe he kau akó e ʻofa mamahi mo e ʻaloʻofa ʻa e Fakamoʻuí kiate kinautolú.

Ngaahi ʻEkitivitī Ako ʻOku Ala Fakahokó

Ngaahi ʻuhinga ki he mamahí

Fakakaukau ke fakaʻaliʻali ʻa e fakatātā ko ʻení pea ʻeke ki he kau akó ha ngaahi ʻuhinga kehekehe ʻe lava ke ongoʻi loto-mamahi ai ʻa e finemuí. ʻE lava ke ke lisi e ngaahi tali ʻa e kau akó ʻi he palakipoé.

Hili ha taimi feʻunga, vahevahe mo e kau akó ʻe lava ke hoko mai e ngaahi faingataʻa ʻoku tau aʻusiá ʻi ha ngaahi ʻuhinga kehekehe. ʻOku kau ʻi he ngaahi ʻuhinga ko iá ʻa ʻetau ngaahi filí, ko ha konga fakanatula ʻo e moʻuí, pe ko e ngaahi fili kovi ʻa ha niʻihi kehe. Fakakaukau ke lisi e ngaahi kulupu ʻe tolu ko ʻení ʻi ha konga kehe ʻo e palakipoé pea fakaʻatā e kau akó ke nau fokotuʻutuʻu ʻa e ngaahi ʻuhinga naʻa nau hiki ʻi he kulupu takitaha.

Mahalo te ke fie vakai ki he fakamatala ʻi he konga “Ngaahi Maʻuʻanga Tokoni Kehé” mei he Ngaahi Tefitó mo e Ngaahi Fehuʻi ko e “Faingataʻá” ki ha fakamatala lahi ange ki he ngaahi ʻuhinga ʻe tolu ko ʻeni ʻo e mamahí.

Ko e tali ʻa e ʻEikí ki he faingataʻaʻia ʻa e Kāingalotú

Te ke lava ʻo lau pe fakamatalaʻi fakanounou ʻi he lea pē ʻaʻau ʻa e fakamatala puipuituʻa ko ʻení.

ʻI he 1833, naʻe fakaʻau ke fakamamahi ʻa e fakafepaki ʻi Mīsulí ʻi he kamata ke fakamālohiʻi ʻe he kau fakatangá ʻa e Kāingalotú ke nau mavahe mei Tauʻatāiná. Naʻe ʻikai fakapapauʻi ʻe he Kāingalotú pe te nau fakafepaki pe hola ʻi he fakaʻau ke momoko ange ʻa e ʻeá pea fakalalahi ʻa e fekeʻikeʻí. Naʻe ʻi Ketilani, ʻOhaiō ʻa e Palōfita ko Siosefa Sāmitá ʻi he taimi ko ʻení ka naʻe fai ha lipooti kiate ia ʻi he tuʻunga naʻe ʻi ai ʻa e Kāingalotú. Naʻe lotu ʻa e Palōfitá ʻi heʻene ʻiloʻi ʻenau mamahí mo e faingataʻaʻiá, ke kole ki he Tamai Hēvaní pe ʻe lava ke toe fakafoki mai kinautolu ki honau ngaahi ʻapi ʻi Mīsulí. Naʻá ne maʻu ha fakahā ʻoku ʻiloa ʻi he taimí ni ko e Tokāteline mo e Ngaahi Fuakava 101. (Ki ha fakamatala lahi ange fekauʻaki mo e ngaahi faingataʻa ʻa e Kāingalotú, vakai, Kau Māʻoniʻoní, voliume 1, Ko e Fuka ʻo e Moʻoní, vahe 17.)

Lau ʻa e Tokāteline mo e Ngaahi Fuakava 101:1–2, ʻo kumi ʻa e ʻuhinga naʻe fakaʻatā ai ʻe he ʻEikí ke faingataʻaʻia ʻa e Kāingalotú ʻi he founga ne nau faingataʻaʻia aí.

• Ko e hā ʻa e meʻa naʻá ke maʻú?

• Ko e hā mo ha toe ngaahi tupuʻanga kehe ʻo ʻenau faingataʻaʻiá?

Tokoni ke mahino ki he kau akó naʻe ʻikai ngata pē ʻi he mamahi ʻa e Kāingalotú koeʻuhí ko ʻenau maumaufonó, ka naʻa nau faingataʻaʻia ʻi he ngaahi fili hala ʻa e niʻihi kehé (kau fakatangá) pea ko ha konga fakanatula pē ia ʻo e moʻuí (ʻa e faʻahitaʻu momokó).

ʻI he ʻekitivitī ko ʻení, te ke lava ʻo vahevahe e kau akó ke nau tauhoa. Te ke lava ʻo fakaafeʻi ke nau lau ʻa e ngaahi vēsí, pea kumi ʻe ha hoa ʻe taha ʻa e ngaahi meʻa naʻe mei faingataʻa ke fanongo ki aí pea kumi ʻe he hoa ʻe tahá ʻa e ngaahi meʻa naʻe mei fakafiemālie ke fanongo ki aí.

Lau ʻa e Tokāteline mo e Ngaahi Fuakava 101:3–9, ʻo kumi e meʻa naʻe mei fakafiemālie ke fanongo ki aí pea mo e meʻa naʻe mei faingataʻa ke fanongo ki aí.

• Ko e hā ʻa e meʻa naʻá ke maʻú?

• Fakatatau ki he veesi 3 mo e 9, ʻoku ʻafioʻi fēfē nai ʻe he ʻEikí ʻa kinautolu kuo faiangahalá?

  ʻE lava ke ʻilo ʻe he kau akó ha ngaahi moʻoni, ʻo kau ai ʻa e naʻa mo e taimi kuo tau faiangahala aí, ʻoku fakahaaʻi mai ʻe he ʻEikí ʻa e manavaʻofá mo e ʻaloʻofá kiate kitautolu.

  Tokoni ki he kau akó ke aleaʻi ʻa e founga ʻe lava ke tokoniʻi ai kitautolu ʻe he tefitoʻi moʻoni ko ʻení ke tau hanga ki he ʻEikí ʻi hotau kuongá ni. ʻE lava ke tokoni ha ngaahi fehuʻi hangē ko ʻení.

• Ko e hā e meʻa ʻokú ke ako fekauʻaki mo e ʻEikí ʻi Heʻene fakahaaʻi mai ʻa e manavaʻofá mo e ʻaloʻofá kiate kitautolu ʻi he taimi ʻoku tau faiangahala aí kae ʻikai tukunoaʻi ʻetau ngaahi angahalá?

• ʻOkú ke pehē ko e hā ʻoku malava ai ke manavaʻofa mo ʻaloʻofa ʻa Sīsū Kalaisi ko e tali ki heʻetau ngaahi angahalá?

Fakalotoa ʻe he ʻulungaanga ʻo Kalaisí

Fakaafeʻi e kau akó ke fakalaulauloto ki he ʻuhinga ʻoku nau fiemaʻu fakataautaha ai e manavaʻofa mo e ʻaloʻofa ʻa e Fakamoʻuí. Kole ange ke nau fakakaukau ki he founga ʻe faitāpuekina ai ʻenau moʻuí ʻi heʻenau maʻu ʻEne manavaʻofá mo e ʻaloʻofá.

ʻOange ki he kau akó ha ngaahi faingamālie ke aleaʻi ʻa e ngaahi moʻoni ʻo e ongoongoleleí. ʻOku poupouʻi ʻe he ʻekitivitī ko ʻení ʻa e kau akó ke nau ako pea aleaʻi e ngaahi moʻoni ʻo e ongoongoleleí ʻoku nau akó. Ki ha ako lahi ange ki he founga hono fakahoko ʻení, vakai ki he ako ʻoku ui ko e “Poupouʻi e kau akó ke vahevahe e ngaahi moʻoni ʻoku nau akó,” ʻa ia ʻoku maʻu ʻi he Fakatupulaki ʻa e Ngaahi Taukei ʻa e Faiakó. Fakakaukau ke akoako ʻa e taukeí ʻaki hono fakaafeʻi e kau akó ke fevahevaheʻaki ʻa e meʻa ʻoku nau akó.

Te ke lava ʻo vahevahe ʻa e kau akó ke nau tauhoa pea fakaafeʻi ke nau lau ʻa e fakamatala mo e potufolofola ʻi laló. Hili iá ʻe lava ke nau aleaʻi fakataha ʻa e ngaahi fehuʻí.

Lau ʻa e fakamatala mo e potufolofola ko ʻení, ʻo kumi e meʻa ʻokú ke ako fekauʻaki mo e ʻulungaanga ʻo Sīsū Kalaisí ʻe ala tokoni ki ha taha kuo faiangahala.

Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e Manavaʻofa Tuʻuloa ʻa e Fakamoʻuí

ʻOku malava ʻe Kalaisi ʻo ʻafioʻi lelei ʻa e tapa kotoa pē ʻo ha tūkunga pau. Neongo ʻokú Ne ʻafioʻi ʻetau ngaahi vaivai kotoa pē, ka ʻoku ʻikai ke Ne fakavave ke tauteaʻi kitautolu ka ʻokú Ne hokohoko atu ke ngāue mo kitautolu ʻi he manavaʻofa ʻi ha taimi lōloa. (Ulisses Soares, “Ko e Manavaʻofa Tuʻuloa ʻa e Fakamoʻuí,” Liahona, Nōvema 2021, 15)

Hepelū 4:14–16

• Ko e hā ʻa e meʻa naʻá ke maʻú? ʻE tokoni fēfē ia ki ha taha kuo faiangahala?

Fakakaukau ke vahevahe ha aʻusia fakataautaha ʻo ha founga kuo tāpuekina ai koe ʻe he manavaʻofa mo e ʻaloʻofa ʻa e Fakamoʻuí. Fakaafeʻi ha kau ako ʻe loto-fiemālie ke vahevahe foki mo ʻenau ngaahi aʻusiá. Manatuʻi ʻoku ʻikai totonu ke ke vahevahe pe ko e kau akó ha ngaahi aʻusia ʻoku fuʻu fakataautaha pe vete ha ngaahi angahala he kuohilí.

Fēfē ʻa Saione?

Fakakaukau ke vahevahe mo e kau akó naʻe fakaʻamu e Kāingalotu ʻi Mīsulí ke langa ʻa Saione ʻi Tauʻatāina ka naʻe fakamālohiʻi kinautolu ke nau mavahe. Neongo he ʻikai lava ke fakafelāveʻi ʻa e kau akó mo e mole ʻa Saioné, kae mahalo te nau ongoʻi kuo mole meiate kinautolu ha meʻa mahuʻinga pe toputapu, hangē ko e ngaahi kaungāmeʻá pe faingamālie ke tupulaki fakalaumālié. Fakaafeʻi kinautolu ke nau lau ʻa e ngaahi veesi ko ʻení pea fakakaukau ki he meʻa ʻoku nau akoʻi fekauʻaki mo e Fakamoʻuí.

Lau ʻa e Tokāteline mo e Ngaahi Fuakava 101:16–19, ʻo kumi ʻa e fakafiemālie mo e fakakaukau ʻoku ʻomi ʻe he ʻEikí.

• Ko e hā ʻoku tokoni ʻa e ngaahi veesi ko ʻení ke mahino kiate koe fekauʻaki mo e finangalo ʻo e Fakamoʻuí?

• Ko e hā e meʻa naʻe akoʻi ʻe he ʻEikí fekauʻaki mo Saioné ʻe lava ke fekauʻaki mo ʻetau moʻuí he taimi ní?

  Te ke lava ʻo fakaafeʻi e kau akó ke nau fakakaukau ki honau ngaahi faingataʻaʻiá mo e ngaahi filí. ‘E lava ke nau tali e ngaahi fehuʻi ko ʻení ‘i heʻenau tohinoa akó.

• Ko e hā ha veesi mei he Tokāteline mo e Ngaahi Fuakava 101:1–19 ʻokú ke fie manatuʻi?

• Ko e hā kuó ke ongoʻi fekauʻaki mo e manavaʻofa pe ʻaloʻofa ʻa e Fakamoʻuí ʻe lava ke hoko ko ha tāpuaki ki hoʻo moʻuí?

• Ko e hā ha sitepu te ke lava ʻo fai ke ke ngāueʻi ai e meʻa naʻá ke ongoʻí?

Ngaahi Maʻuʻanga Tokoni Kehé

Ko e hā ha ngaahi tupuʻanga kehekehe ʻo ʻetau faingataʻaʻiá?

“ʻOku lahi e ngaahi tupuʻanga ʻo e ʻahiʻahí. ʻE lava ke hoko mai e ngaahi faingataʻá ko ha nunuʻa ʻo e hikisia mo e talangataʻa ʻa ha tokotaha. ʻE lava ke fakaʻehiʻehi mei he ngaahi faingataʻa ko ʻení ʻo fakafou ʻi he moʻui angatonú. ʻE lava ke hoko mai ha ngaahi faingataʻa kehe ia ko ha konga fakanatula pē ia ʻo e moʻuí ʻi ha ngaahi taimi lolotonga e moʻui angatonu ʻa e kakaí. Hangē ko ʻení, ʻe lava ke aʻusia ʻe he kakaí ha ngaahi faingataʻa ʻi he ngaahi taimi ʻo e mahamahakí pe ongoʻi taʻepaú pe ʻi he pekia ha taha ʻoku nau ʻofa ai. ʻOku hoko mai ʻa e ʻahiʻahí he taimi ʻe niʻihi koeʻuhí ko e ngaahi fili taʻe fakapotopoto, lea mo e tōʻonga fakamamahi ʻa ha niʻihi kehe” (Ngaahi Tefito ʻo e Ongoongoleleí, “Faingataʻá,” topics.ChurchofJesusChrist.org).

ʻOku malava nai ke ope atu ʻeku ngaahi fehalaākí ʻi he malava ko ia ʻe he Fakamoʻuí ke fakahaofi aú?

Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē:

Ko e Kau Ngāue ʻi he Ngoue Vainé

Neongo pe ko e hā ʻene ngali tōmui kiate koé, neongo pe ko e hā e ngaahi faingamālie kuo ngali mole meiate koé pe ko e lahi e ngaahi fehalaaki kuó ke faí pe talēniti ʻokú ke pehē ʻoku ʻikai ke ke maʻú pe ko hoʻo pehē neongo ʻene mamaʻo hoʻo fonongá mei ʻapi mo e fāmilí mo e ʻOtuá, ka ʻoku ou fakamoʻoni atu kuo teʻeki ai ke ke aʻu koe ki ha tuʻunga he ʻikai taʻe lava ke aʻu atu ki ai ʻa e ʻofa ʻa e ʻOtuá. He ʻikai malava ke taʻe-aʻu atu kiate koe e maama [taʻefakangatangata] ia ʻo e Fakalelei ʻa Kalaisí. (Jeffrey R. Holland, “Ko e Kau Ngāue ʻi he Ngoue Vainé,” Liahona, Mē 2012, 33)

Naʻe pehē ʻe ʻEletā C. Sikoti Kolou ʻo e Kau Fitungofulú:

The Miracle of the Atonement

Ko Sīsū Kalaisi ʻa e Faifakamoʻui Maʻongoʻonga ki hotau ngaahi laumālié. ʻOku ʻikai ha angahala pe maumaufono, mamahi pe faingataʻa, ʻoku taʻemalava ke fakamoʻui ʻe he mālohi ʻo ʻEne Fakaleleí, tuku kehe ʻa e ngaahi angahala ʻo e malaʻiá.

ʻOku talamai ʻe Sētane kuo tau hē he taimi ʻoku tau faiangahala aí. Ka [ko hono fehangahangaí], ʻoku foaki mai ʻe hotau Huhuʻí ʻa e huhuʻí ki he tokotaha kotoa—ʻo tatau ai pē pe ko e hā e fehālaaki kuo tau faí—ʻo aʻu pē kiate koe mo au. (C. Scott Grow, “Ko e Mana ʻo e Fakaleleí,” Liahona, Mē 2011, 109)

ʻI ha fakamafola ʻa e toʻu tupú, naʻe vahevahe ai ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e sīpinga ko ʻeni ʻo ha toʻu tupu naʻe ʻikai ke ne ongoʻi ʻokú ne taau mo e ʻofa ʻa e ʻOtuá:

Worldwide Event for Youth: I Can Do All Things Through Christ

Tokāteline mo e Ngaahi Fuakava 101:5. Ko e hā ʻoku tauteaʻi ai kitautolu ʻe he ʻEikí?

ʻOku tolu ʻa e taumuʻa ʻo e fakatonutonu fakalangí: (1) ke fakalotoʻi kitautolu ke fakatomala, (2) ke fakaleleiʻi mo fakamāʻoniʻoniʻi kitautolu, pea (3) toe fakatonutonu hotau hala ʻi he moʻuí ke fenāpasi mo e meʻa ʻoku ʻafioʻi ʻe he ʻOtuá ko ha hala ʻoku lelei angé. (D. Todd Christofferson, “Ko Kimoutolu ʻOku Ou ʻOfa aí, ʻOku Ou Valokiʻi mo Tauteaʻi,” Liahona, Mē 2011, 98)

Tokāteline mo e Ngaahi Fuakava 101:2. Ko e hā ha niʻihi ʻo e ngaahi maumaufono ʻa e Kāingalotú?

Kimuʻa pea kapusi e Kāingalotú mei he Vahefonua Siakisoni, Mīsulí, naʻa nau maʻu ha ngaahi fakatokanga lahi te nau foua ʻa e faingataʻá ʻo kapau naʻe ʻikai ke nau fakatomala. Hangē ko ʻení, ʻi Sānuali ʻo e 1833, naʻe valokiʻi ai ʻe Siosefa Sāmita ʻa Uiliami W. Felipisi mo Sitenei Kilipate koeʻuhí ko ha ʻū faitohi naʻá na tohi naʻe fakaanga mo kovi. Naʻe fai ʻe ʻOasoni Haiti mo Hailame Sāmita ha tohi ki he kau taki ʻo e Siasí ʻi Mīsulí ʻo fakatokanga kiate kinautolu fekauʻaki mo e “ngaahi fakamatala tukuhifo, fakapoʻuli, & loi” naʻe fai fekauʻaki mo e Palōfita ko Siosefa Sāmitá. Koeʻuhí ko e ngaahi maumaufono ko ʻení mo ha ngaahi meʻa kehe, naʻe fakatokanga ai ʻa ʻOasoni Haiti mo Hailame Sāmita ʻe fehangahangai ʻa e Kāingalotu ʻi Mīsulí “mo ha tautea & ha fakamaau” (The Joseph Smith Papers, Documents, Volume 2: July 1831–January 1833, ed. Matthew C. Godfrey and others [2013], 367, 373–74).

Ngaahi ʻEkitivitī Fakalahi ki he Akó

Ko ha tūkunga

Kapau ʻokú ke ongoʻi ʻe tokoni ha tūkunga ke mahino ki he kau akó ʻa e moʻoni ne nau ʻilo mei he Tokāteline mo e Ngaahi Fuakava 101:3, 9, te ke lava ʻo fakaʻaongaʻi ha tūkunga hangē ko ʻení:

Ko Kuleisí ko ha finemui ia kuo taʻu lahi ʻene mamaʻo mei he Siasí pe ongoongoleleí. Lolotonga e taimi ko ʻení, kuó ne fai ha ngaahi fili lahi ʻoku ʻikai taau mo e ngaahi akonaki ʻa e Fakamoʻuí. Kuo hanga ʻe he ngaahi fili ko ʻení ʻo ʻai ke ne ongoʻi mamaʻo mei he Siasí pea mo e toʻu tupu ʻi hono uōtí. Ko ʻene fakakaukau kia Sīsū Kalaisí ko ha tokotaha haohaoa Ia ʻoku ʻikai ke Ne tali ʻene ngaahi filí. ʻOkú ne ongoʻi fiemālie ange ʻi hono tukunoaʻi e ngaahi fakakaukau pe ngaahi fehuʻi fakalotu ʻi heʻene moʻuí. ʻOkú ne ongoʻi foki kuo mole meiate ia ha ngaahi faingamālie ke ako mo fakalakalaka ʻo hangē ko e toʻu tupu kehe ʻi hono toʻú hili ʻene mavahe fuoloá.

• Ko e hā ha meʻa ʻe ala tokoni ke mahino kia Kuleisi ʻa e meʻa kuó ke ako pe ongoʻi he ʻaho ní?

• ʻE tokoni fēfē ʻa e mahino kau ki he manavaʻofa mo e ʻaloʻofa ʻa Sīsū Kalaisí ki heʻetau fakaʻaiʻai ke fakatomalá?

• Ko e hā ha fakamoʻoni pe aʻusia mei hoʻo moʻuí te ke lava ʻo vahevahe mo Kuleisi fekauʻaki mo e manavaʻofa mo e ʻaloʻofa ʻa e Fakamoʻuí?

Tokāteline mo e Ngaahi Fuakava 101:27–35. Ngaahi tūkunga lolotonga ʻo e Nofotuʻí

ʻE lava ke ueʻi fakalaumālie ki he kau akó ke nau ako fekauʻaki mo e ngaahi tūkunga lolotonga ʻo e Nofotuʻí.

Mahalo te ke fie fakamatalaʻi ange, naʻe vahevahe ʻe he ʻEikí ko ha konga ʻo ʻEne fakafiemālie ki he Kāingalotú, ha fakakaukau lahi ange ki Saione pea mo hono tānaki mo e tāpuaki ʻo e Kāingalotú (vakai, Tokāteline mo e Ngaahi Fuakava 101:16–19). Naʻe fakalahi ʻe he ʻEikí ʻa e fakakaukau ko iá ʻi hono akoʻi e Kāingalotú fekauʻaki mo e Nofotuʻi ʻe hoko maí, ʻa ia ʻe hoko hili hono langa ʻo Saioné pea mo e Hāʻele ʻAnga Ua Maí (vakai, Tokāteline mo e Ngaahi Fuakava 101:20–23).

Fakakaukau ke fakaafeʻi e kau akó ke nau lau ʻa e Tokāteline mo e Ngaahi Fuakava 101:27–35, ʻo kumi e meʻa naʻe fakahā ʻe he ʻEikí ʻe hoko lolotonga e Nofotuʻí. ʻE lava ke ke fehuʻi ki he kau akó pe ko e hā ha meʻa ne nau ako ʻoku fakafiefia kiate kinautolú. Te ke lava ʻo fakaafeʻi e kau akó ke nau ʻeke ha faʻahinga fehuʻi pē ʻoku nau maʻu fekauʻaki mo e ngaahi vēsí. ʻE lava ke fakaʻilongaʻi ʻe he kau akó ʻi heʻenau folofolá ʻoku ʻuhinga ʻa e ngaahi veesi ko ʻení ki he Nofotuʻí.

Hili iá, ʻe lava ke ke fakaafeʻi e kau akó ke nau lau ʻa e Tokāteline mo e Ngaahi Fuakava 101:36–38 pea vahevahe e founga ʻoku tokoniʻi ai kinautolu ʻe he ngaahi vēsí ni ke tali e ongo fehuʻi ko ʻení:

• Ko e hā ʻe finangalo ʻa e Fakamoʻuí ke ke ongoʻi ʻi hoʻo ʻilo fekauʻaki mo e meʻa ʻe hoko maí?

• ʻE liliu fēfē ʻe he ʻiloʻi ʻo e meʻa ʻe hoko maí ʻa ʻetau fakakaukau ki he ngaahi faingataʻa lolotongá?

Tokāteline mo e Ngaahi Fuakava 101:39–41. “Māsima ʻo e māmaní”

Ke tokoni ke mahino lelei ange ki he kau akó ʻa e Tokāteline mo e Ngaahi Fuakava 101:39–41 (vakai foki, Mātiu 5:13), ʻe lava ke ke ʻeke ange pe ko e hā ʻa e ʻaonga ʻo e māsimá. Tokoni ke mahino kiate kinautolu ʻoku tānaki atu ʻa e māsimá ki he ifo ʻo e meʻakaí, fakatolonga e meʻakaí, pea ʻi ai foki hono ngaahi ʻaonga faifakamoʻui. Fakaafeʻi ke nau lau ʻa e veesi 39–40, ʻo kumi e meʻa naʻe akoʻi ʻe he Fakamoʻuí fekauʻaki mo e kakaí mo e māsimá.

Fakakaukau ke vahevahe ʻa e lea ko ʻeni meia ʻEletā Kālosi E. ʻĒsei (1926–1999): “Naʻe fakahā mai kiate au ʻe ha tokotaha huʻi vai ʻiloa fakaemāmani lahi he ʻikai teitei mole ʻa e konokona ʻo e māsimá ʻi heʻene motuʻá. ʻOku mole ʻa e konokoná ʻi hono fehuʻiʻakí mo e ʻuliʻí” (Carlos E. Asay, “Salt of the Earth: Savor of Men and Saviors of Men,” Ensign, May 1980, 42). ʻE lava ke ke ʻeke ange e ngaahi fehuʻi ko ʻení:

• ʻE lava fēfē ke hangē ʻa e tangatá mo e fefiné ko ha māsima ki he kakai ʻo e māmaní?

• ʻE fakafehoanaki fēfē nai ʻa e talanoa fakatātā ko ʻení ki he Kāingalotu ʻi Mīsulí?

• ʻE lava fēfē ke tauhi ʻe he kakai ʻo e ʻEikí honau tuʻungá he ʻahó ni?

Lau ʻa e Tokāteline mo e Ngaahi Fuakava 101:41–42, ʻo kumi e meʻa naʻe akoʻi ʻe he Fakamoʻuí naʻe fiemaʻu ke hoko kae kamata ke toe maʻu ʻe he Kāingalotú honau tuʻungá. ʻOange ki he kau akó ha faingamālie ke vahevahe mo tokoni ke mahino kiate kinautolu naʻe finangalo ʻa e ʻEikí ke fakahaohaoaʻi Hono Kāingalotú ʻi hono tauteaʻi mo fakavaivaiʻi kinautolu ʻi Hono ʻaó.

• ʻE lava fēfē ke ʻiloʻi ʻa e ʻofa ʻa e ʻEikí ʻi he ongo veesi ko ʻení?