Lēsoni 115: Tokāteline mo e Ngaahi Fuakava 98–101

Tokāteline mo e Ngaahi Fuakava 101:43–101

Ngaahi Talanoa Fakatātā fekauʻaki mo Saioné

ʻI he fanongo ʻa e Palōfita ko Siosefa Sāmitá ki he lahi ʻa e fakatanga naʻe fefaʻuhi mo e Kāingalotu Mīsulí, naʻá ne tautapa ki he ʻEikí maʻanautolu. Naʻe fakaʻaongaʻi ʻe he Fakamoʻuí ha ngaahi talanoa fakatātā ke ʻoange ki he Kāingalotú ha faleʻi mo ha fakafiemālie, ko ha konga ʻo ʻEne talí. ʻE ʻoange ʻe he lēsoni ko ʻení ki he kau akó ʻa e faingamālie ke ako ha talanoa fakatātā pea ʻiloʻi hono ʻuhinga fakalaumālié.

Ngaahi ʻEkitivitī Ako ʻOku Ala Fakahokó

Naʻe faʻa akonaki ʻa Sīsū Kalaisi ʻo ngāue ʻaki ‘a e talanoa fakatātā

Fakakaukau ke fakaʻaliʻali ha ngaahi meʻa ʻoku faitatau hangē ko e ʻū naunau akó, ngaahi fakamatala ʻo e valá, pe ngaahi meʻa fakaʻilekitulōniká. Pe fakaafeʻi e kau akó ke nau vakavakai hoko ki he ngaahi meʻa ʻi he loki akó pe ngaahi meʻa ʻoku ʻiate kinautolú. Fakaafeʻi e kau akó ke fili ha meʻa pea fakakaukau ki ha founga makehe ke fakafehoanaki ai ia ki ha tafaʻaki ʻo e palani ʻa e Tamai Hēvaní pe ko Sīsū Kalaisi mo ʻEne ongoongoleleí. Hangē ko ʻení, te nau lava ʻo fakafehoanaki ha telefoni toʻotoʻo ki he lotú, he ko e lotú ʻa e founga ʻoku tau fakaʻaongaʻi ke fetuʻutaki ai mo e Tamai Hēvaní. Fakaafeʻi ʻa e kau akó ke vahevahe ʻenau ngaahi meʻá mo e fakafehoanaki fakalaumālié mo ha hoa pe ko e kalasí.

Naʻe faʻa akonaki ʻa Sīsū Kalaisi ʻaki hono fakaʻaongaʻi ha fanga kiʻi talanoa faingofua ʻoku ʻiloa ko e ngaahi talanoa fakatātaá. ʻI he ngaahi talanoa fakatātā ko ʻení, naʻe fakafehoanaki ʻe Sīsū ʻa e ngaahi meʻa pe tūkunga angamahení ki he ngaahi moʻoni fakalaumālié (vakai, Fakahinohino ki he Ngaahi Folofolá, “Talanoa Fakatātaá,” scriptures.ChurchofJesusChrist.org).

• Ko e hā ha ngaahi sīpinga ʻo e ngaahi talanoa fakatātā naʻe akoʻi ʻe he Fakamoʻuí?

• Ko e hā ha ngaahi moʻoni fakalaumālie te tau lava ʻo ako mei he ngaahi akonaki ʻa e Fakamoʻuí ʻi he ngaahi talanoa fakatātā ko iá?

Hangē ko ʻení, ʻe lava ke vahevahe ʻe he kau akó ʻa e talanoa fakatātā ʻo e Samēlia leleí (vakai, Luke 10:25–37), ʻa ia ʻoku akoʻi ai fekauʻaki mo e ʻofa mo e tokoni ki he niʻihi kehé ʻo hangē ko e Fakamoʻuí. Pe te nau vahevahe ʻa e talanoa fakatātā ʻo e kau tāupoʻou ʻe toko hongofulú (vakai, Mātiu 25:1–13), ʻa ia ʻokú ne akoʻi kitautolu ke teuteu ki he Hāʻele ʻAnga Ua Mai ʻa e Fakamoʻuí.

Ke teuteuʻi e kau akó ke nau ako ha talanoa fakatātā fekauʻaki mo e huhuʻi ʻo Saioné, fakakaukau ke kole ki he kau akó ke vahevahe e meʻa ʻoku nau manatuʻi mei he ngaahi lēsoni kimuí ni fekauʻaki mo e ngaahi faingataʻa naʻe kātekina ʻe he Kāingalotu ʻi Mīsulí. ʻO ka fiemaʻu, ʻe lava ke ke vahevahe ʻa e fakamatala fakanounou ko ʻení:

Lolotonga ha taimi ne lahi ai e fakatangá, naʻe fakaʻaongaʻi ʻe he Fakamoʻuí ha ngaahi talanoa fakatātā ke akoʻi ʻa Siosefa Sāmita mo e Kāingalotú fekauʻaki mo hono huhuʻi ʻo Saioné (vakai, Tokāteline mo e Ngaahi Fuakava 101:43). ʻI he konga kimui ʻo e 1833, naʻe iku e fakamamahi ʻa e kau fakatangá ke tuli ai ha Kāingalotu ʻe toko 1,000 tupu mei he Vahefonua Siakisoni, Mīsulí, pea naʻe tupu hanau ngaahi ʻapi ʻe 200 tupu. Naʻe fehuʻi ʻe he Palōfita ko Siosefa Sāmitá ki he ʻEikí pe ko e hā naʻe tuli ai ʻa e Kāingalotú mei Saioné pea ko e hā ha meʻa ʻoku totonu ke fai kae lava ke nau foki mai aí. Naʻe tali ʻe he ʻEikí ʻaki ha talanoa fakatātā.

Ko hono ako ʻo e ngaahi talanoa fakatātaá

Naʻe akoʻi ʻe ʻEletā Tēvita A. Petinā ʻa e ngaahi meʻá ni fekauʻaki mo e ako mei he ngaahi talanoa fakatātā ʻa e Fakamoʻuí:

ʻOku ʻikai faʻa fakahaaʻi fakaʻauliliki ʻa e ʻuhinga pe pōpoaki ʻo ha talanoa fakatātā. Ka, ʻoku fakahā pē ʻe he talanoá ʻa e moʻoni fakalangí ki ha taha ʻo fakatatau mo ʻene tui ki he ʻOtuá, teuteu fakalaumālie fakafoʻituituí, mo e loto fie akó. Ko ia, kuo pau ke fakaʻaongaʻi ʻe he tokotahá ʻa e tauʻatāina ke filí pea toutou “kole, kumi, mo tukituki” [vakai, Mātiu 7:7–8; Luke 11:9–10] ke ʻilo ʻa e ngaahi moʻoni kuo fūfuuʻi ʻi ha talanoa fakatātā. (David A. Bednar, “ʻAi Ho Mālohí ʻe Saione,” Liahona, Nōvema 2022, 92)

• ʻOku tākiekina fēfē ʻe heʻetau tui kia Sīsū Kalaisí ʻetau malava ke maʻu ha mahino ki Heʻene ngaahi akonakí?

• Ko e hā ʻoku hanga ʻe heʻetau feinga ke ako e ngaahi folofola ʻa e Fakamoʻuí ʻo fakahaaʻi kiate Ia fekauʻaki mo ʻetau ongo kiate Iá?

Fakakaukau ke ʻoange ki he kau akó ʻa e laʻipepa tufa “Founga ke Ako ai e Ngaahi Talanoa Fakatātā ʻa e Fakamoʻuí” ke tokoni ki hono tataki kinautolu ʻi he lēsoni ko ʻení.

Founga ke Ako ai e Ngaahi Talanoa Fakatātā ʻa e Fakamoʻuí

1. Kumi ha ngaahi fakaikiiki mahuʻinga. ʻE lava ke kau ʻi he ngaahi fakaikiiki ko ʻení ha kakai, ngaahi feituʻu, ngaahi meʻa, ngaahi ngāue, pe ngaahi meʻa naʻe hoko.

2. Fai ha ngaahi fakafehoanaki. Fakapapauʻi pe ko e hā ha meʻa ʻe lava ke fakafofongaʻi pe fakataipe ʻe he fakaikiiki takitaha ʻi he talanoa fakatātaá. ʻE lava ke tokoni ʻa e ngaahi fakahinohino ki he puipuituʻá, ngaahi tokoni ki he ako folofolá, mo e fakalaulaulotó.

3. ʻIloʻi ha ngaahi lēsoni mahuʻinga. Hili hono fakahoko ha fakafehoanakí, fekumi ki ha tokoni mei he Laumālie Māʻoniʻoní ke ʻiloʻi e ngaahi lēsoni mahuʻinga naʻe akoʻi ʻe he Fakamoʻuí ʻi he talanoa fakatātaá.

4. Fakapapauʻi hono fakaʻaongaʻi fakatāutahá. Fekumi ki ha tokoni mei he Tamai Hēvaní mo e Laumālie Māʻoniʻoní ke ʻiloʻi e meʻa te ke lava ʻo fai ke fakaʻaongaʻi fakataautaha ai e ngaahi lēsoni ʻokú ke ʻiló.

Ko e talanoa takatātā ʻo e ʻeikí

ʻE lava ke tokoni ʻa e ʻekitivitī ko ʻení ki he kau akó ke nau akoako fakahoko ʻa e sitepu ʻe fā ki hono ako ʻo e ngaahi talanoa fakatātaá. Fakakaukau ke fakaʻaliʻali ʻa e saati ko ʻení pe hiki ia ʻi he palakipoé. Faʻu ha kulupu ʻe ono, pea vahe ki he kulupu takitaha ke nau fakakakato ha foʻi tapafā kehekehe ʻi he sātí. Pe fakaafeʻi e kau akó ke nau hiki ha tatau ʻo e sātí ʻi heʻenau tohinoa akó pea fakafonu fakafoʻituitui ia.

Kumi e ngaahi fakamatala fakaikiiki mahuʻingá

Lau ʻa e Tokāteline mo e Ngaahi Fuakava 101:43–62. Ki he kulupu takitaha ʻo e ngaahi vēsí, faʻu ha fakatātā faingofua pe tohi ha fakamatala fakanounou ke fakatātaaʻi ʻaki e ngaahi vēsí.

Tokāteline mo e Ngaahi Fuakava 101:43–45. Ngaahi fakahinohino ʻa e ʻeikí	Tokāteline mo e Ngaahi Fuakava 101:46–50. Ko e ngaahi ngāue ʻa e kau tamaioʻeikí
Tokāteline mo e Ngaahi Fuakava 101:51. Ko e ngaahi nunuʻa ʻo e ngaahi ngāue ʻa e kau tamaioʻeikí	Tokāteline mo e Ngaahi Fuakava 101:52–54. Ko e tali ʻa e ʻeikí
Tokāteline mo e Ngaahi Fuakava 101:55–58. Ko e fakahinohino hoko ʻa e ʻeikí	Tokāteline mo e Ngaahi Fuakava 101:59–62. Ko e tali ʻa e tamaioʻeikí

ʻI he ʻosi ʻa e kau akó, fakaafeʻi kinautolu ke vahevahe ʻa e meʻa ne nau ʻiló. Fakapapauʻi ʻoku mahino kiate kinautolu ʻa e fakaikiiki ʻo e talanoa fakatātaá.

Fakakaukau ke fakakakato fakakalasi ʻa e sitepu fakaʻosi ʻe tolu ʻo hono ako ʻo e ngaahi talanoa fakatātaá.

Fai ha ngaahi fakafehoanaki

• Ko e hā ha ngaahi meʻa ʻe lava ʻo tokoni ke tau ʻilo ʻoku fakafofongaʻi ʻe he ʻeikí ʻa Sīsū Kalaisi?

• Ko e hā nai ʻe lava ke fakafofongaʻi ʻe he ngoue vainé pe tauá?

• ʻOku tatau fēfē nai ʻetau ngaahi angafaí he taimi ʻe niʻihi mo e ngaahi ngāue ʻa e kau tamaioʻeikí?

Fakakaukau ke fakaafeʻi e kau akó ke toe vakaiʻi ʻa e potufolofola fakataukei fakatokāteline ʻIsikeli 3:16–17 ke kumi ha fakafehoanaki ki he kau tangata leʻó. ʻE lava ke tokoni ʻa e puipuituʻa ko ʻení ke fai ʻe he kau akó ha ngaahi fakafehoanaki lahi ange:

Hangē ko e fakafisi ʻa e kau tamaioʻeiki ʻi he talanoa fakatātaá ke langa ha tauá, naʻe ʻikai tokanga ʻa e Kāingalotu ʻi Mīsulí ke langa ha temipale ʻo hangē ko hono fakahinohinoʻi kinautolu ʻe he ʻEikí (vakai, Tokāteline mo e Ngaahi Fuakava 57:3; 84:3–4; 97:10–12).

Ki he Kāingalotu ʻi he Vahefonua Siakisoní, naʻe fakafofongaʻi ʻe he tamaioʻeiki ʻoku lau ki ai ʻi he veesi 55 ʻa Siosefa Sāmita (vakai, Tokāteline mo e Ngaahi Fuakava 103:21). Naʻe muimui ʻa Siosefa Sāmita ki he fekau ʻa e ʻEikí pea fokotuʻu ha kulupu naʻe ui ko e ʻApitanga ʻo Saioné ke huhuʻi ʻa e fonua ko Saioné. ʻE aleaʻi ʻa e ʻApitanga ʻo Saioné ʻi he ngaahi lēsoni Tokāteline mo e Ngaahi Fuakava 103 mo e 105.

ʻIloʻi ha ngaahi lēsoni mahuʻinga

• Ko e hā ha ngaahi lēsoni mahuʻinga ʻe lava ke akoʻi ʻe he ʻEikí ʻo fakafou ʻi he talanoa fakatātā ko ʻení?

• Ko e hā ʻoku akoʻi atu ʻe he foʻi moʻoni ko ʻení fekauʻaki mo e ngaahi ʻulungaanga ʻo Sīsū Kalaisí?

  Kapau ʻoku fāinga ʻa e kau akó ke ʻiloʻi ha ngaahi lēsoni mahuʻinga, fakakaukau ke ʻoange ha tefitoʻi moʻoni ʻe taha pe lahi ange mei he ngaahi tefitoʻi moʻoni ko ʻení. Fakaafeʻi e kau akó ke nau vahevahe ʻa e founga ʻoku fakatātaaʻi ai ʻe he talanoa fakatātaá ʻa e ngaahi moʻoni ko ʻení. ʻI he taimi ʻoku tau talangofua ai ki he ngaahi fekau ʻa e ʻEikí, ʻokú Ne fakamālohia kitautolu ke tau matuʻuaki ʻa e ngaahi fili fakalaumālie mo fakatuʻasinó. ʻOku hoko ʻa e kau palōfitá ko ha kau tangata leʻo ʻi he tauá, ʻo ʻomi ha ngaahi fakatokanga mei he ʻEikí ki he ngaahi faingataʻa ʻoku tuʻunuku maí. ʻOku teuteu kitautolu ʻe he Fakamoʻuí ʻo fakafou ʻi he ngāue fakatemipalé, ke tau matuʻuaki ʻa e filí.

• Ko e hā e ʻuhinga naʻe mei tokoni ai e ngaahi lēsoni ko ʻení ki he Kāingalotú ʻi he 1833?

• Kuó ke mamata fēfē ki ha fakamoʻoni ʻo ha foʻi moʻoni ʻe taha pe lahi ange ʻi he ngaahi moʻoni ko ʻení ʻi hoʻo moʻuí?

Fakapapauʻi hono fakaʻaongaʻi fakatāutahá

• Ko e hā ha ngaahi founga te ke lava ai ʻo fakaʻaongaʻi ʻa e talanoa fakatātā ko ʻení ʻi hotau kuongá ni?

Fekumi ki ha tokoni mei he Laumālie Māʻoniʻoní ke ʻiloʻi ha founga ʻe taha pe ua te ke lava ai ʻo fakaʻaongaʻi ha foʻi moʻoni ʻoku ongo mahuʻinga kiate koe mei he talanoa fakatātā ko ʻení. Hiki hoʻo ngaahi ongó ʻi hoʻo tohinoa akó.

Fakaafeʻi e kau akó ke nau vahevahe ʻa e meʻa naʻa nau ako fekauʻaki mo hono ako e ngaahi talanoa fakatātaá te nau lava ʻo fakaʻaongaʻi ke fakatupulaki ʻenau ako fakataautaha e folofolá. Poupouʻi e kau akó ʻi heʻenau feinga ke ngāue ʻaki e tui kia Sīsū Kalaisí ʻi heʻenau ako, fakalaulauloto, mo fakaʻaongaʻi fakataautaha ʻEne ngaahi akonakí.

Ngaahi Maʻuʻanga Tokoni Kehé

Tokāteline mo e Ngaahi Fuakava 101:77–79. Ko e hā ʻa e taumuʻa ʻa e ʻOtuá ʻi hono fokotuʻu e Konisitūtone ʻo e ʻIunaiteti Siteití?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Ko e hā ʻa e taumuʻa ʻa e ʻOtuá ʻi hono fokotuʻu e Konisitūtone ʻo e ʻIunaiteti Siteití? ʻOku lava ke tau vakai ki ai ʻi he tokāteline ʻo e tauʻatāina ke filí. ʻI he fuofua taʻu ʻe hongofulu ʻo hono fakafoki mai ʻo e Siasí, naʻe faingataʻaʻia e Kāingalotu ʻo e Siasí ʻa ia ne nofo ʻi he fakahihifo mamaʻo ʻo e fonuá mei he fakatanga fakatāutahá mo fakalūkufuá. Ko e ʻuhinga ʻe taha ne hoko ai ʻení ko ʻenau fakafepaki ki he nofo pōpula naʻe hoko ʻi he ʻIunaiteti Siteití ʻi he taimi ko iá. ʻI he ngaahi tūkunga ko ʻení, naʻe fakahā ʻe he ʻOtuʻá ʻo fakafou ʻi he Palōfita ko Siosefa Sāmitá ha ngaahi moʻoni taʻengata fekauʻaki mo ʻEne tokāteliné.

Kuo foaki ʻe he ʻOtuá ki Heʻene fānaú ʻa e tauʻatāina ke filí—ʻa e mālohi ke fili mo ngāué. Ko e tuʻunga fakaʻofoʻofa taha ʻo hono ngāue ʻaki ʻa e tauʻatāina ke fili ko iá ʻa e tauʻatāina kakato ʻa ha tokotaha ke fili mo ngāue ʻo fakatatau mo ʻene ngaahi fili fakafoʻituituí. ʻOku fakamatalaʻi ʻi he fakahaá, ʻoku ʻalu fakataha ʻa e tauʻatāina ko ʻení pea mo e moʻui haʻisiá, koeʻuhí “ke lava ʻo ʻekeʻi mei he tangata kotoa pē ʻa ʻene ngaahi angahala ʻaʻaná ʻi he ʻaho ʻo e fakamāú” (Tokāteline mo e Ngaahi Fuakava 101:78). Naʻe fakahā ʻe he ʻEikí, “Ko ia, ʻoku ʻikai totonu ke pōpula ha tangata ki ha tokotaha kehe” (Tokāteline mo e Ngaahi Fuakava 101:79). (Dallin H. Oaks, “Ko Hono Maluʻi ʻEtau Konisitūtone Tataki Fakalangí,” Liahona, Mē 2021, 106)

Tokāteline mo e Ngaahi Fuakava 101:76, 86–88. Ko e hā e meʻa naʻe hoko ʻi he taimi naʻe kumi tokoni ai e Kāingalotú ki he kau taki ʻo e puleʻangá?

Naʻe muimui e Kāingalotu ʻi Mīsulí ki he fakahinohino ʻa e ʻEikí pea nau kole ki he kau taki fakapuleʻangá “ki ha fakatonutonu” (Tokāteline mo e Ngaahi Fuakava 101:76), pe totongi fakafoki ʻenau ngaahi koloa ne molé. Naʻe kau ʻi he kau taki ko ʻení ha ongo fakamaau fakalotofonua, kōvana ʻo Mīsulí ko Taniela Tanikilini, mo ʻAnitelū Siakisoni, ʻa ia naʻe hoko ko e palesiteni ʻo e ʻIunaiteti Siteití. Neongo e toutou feinga e Kāingalotu Mīsulí, ka ne ʻikai ke nau maʻu ha maluʻi mo ha totongi fakafoki ʻo ʻenau koloá mei he kau maʻu mafai ʻo e puleʻangá ki he ngaahi fakamaau taʻetotonu ne nau fepaki mo iá.

Ki ha fakamatala lahi ange, vakai, “Vahe 39: Tokāteline mo e Ngaahi Fuakava 101” ʻi he Tokāteline mo e Ngaahi Fuakava – Tohi Lēsoni ʻa e Tokotaha Akó ki he ʻinisititiutí.

Tokāteline mo e Ngaahi Fuakava 101:53. ʻE lava fēfē ʻe he temipalé ʻo ʻomi ha maluʻi kiate au?

Ko e taha ʻo e ngaahi ʻuhinga ʻo e talanoa fakatātā ʻo e ʻeikí, kapau naʻe langa ʻe he Kāingalotú ha temipale ʻi Mīsuli ʻo hangē ko e fakahinohino ʻa e ʻEikí, naʻe mei maluʻi kinautolu (vakai, Tokāteline mo e Ngaahi Fuakava 101:53).

Kuo akoʻi ʻe he kau taki ʻo e Siasí ʻoku tau maʻu ha maluʻi ʻi heʻetau tauhi e ngaahi fuakava ʻoku tau fai ʻi he temipalé.

Naʻe akoʻi ʻe Sisitā Sini B. Pingihami, ko e Palesiteni Lahi mālōlō ʻo e Fineʻofá, ʻo pehē:

[Kuó u] fakapapauʻi maʻu pē ʻoku hanga ʻe heʻetau tauhi ʻa e ngaahi fuakava ʻoku tau fakahoko mo e ʻOtuá ʻo fakaʻatā kitautolu ke tau maʻu ʻa e mālohi ʻo e Fakamoʻuí, ʻa ia ʻokú ne fakamālohia kitautolu ʻi hotau ngaahi faingataʻaʻia paú, ʻomi ha maluʻi mei he tākiekina ʻo e filí, mo teuteuʻi kitautolu ki ha kahaʻu ʻo e nāunau taʻengatá. (Jean B. Bingham, “ʻOku Fakamālohia, Maluʻi, mo Teuteuʻi Kitautolu ʻe he Ngaahi Fuakava mo e ʻOtuá ki he Nāunau Taʻengatá,” Liahona, Mē 2022, 67)

Ngaahi ʻEkitivitī Fakalahi ki he Akó

Ngaahi talanoa fakatātā kehe ʻi he Tokāteline mo e Ngaahi Fuakava 101

Ko e talanoa fakatātā ʻo e uité mo e teá

Fakakaukau ke akoako fakahoko fakakalasi ʻa e ngaahi sitepu ʻe fā ki hono ako ʻo e ngaahi talanoa fakatātaá ʻo fakaʻaongaʻi ʻa e Tokāteline mo e Ngaahi Fuakava 101:63–67.

Kumi ha ngaahi fakaikiiki mahuʻinga.

Fakaafeʻi e kau akó ke lau ʻa e Tokāteline mo e Ngaahi Fuakava 101:63–67 pea kumi e ngaahi fakaikiiki mahuʻingá.

Mahalo naʻe fakatokangaʻi ʻe he kau akó hono tānaki malu ʻo e uité ʻi he feleokó, kae haʻi mo tutu ʻa e teá. Fakatokangaʻi ange ko e feleokó ko ha ngaahi feituʻu ia ke tauhi ai ʻa e kēlení hili hono ututaʻú.

Fai ha ngaahi fakafehoanaki.

• Ko e hā ha “ngaahi potu toputapu” (veesi 64) ʻe lava ke fakafofongaʻi ʻe he feleokó?

• Ko e hā ha ngaahi fakakaukau ʻokú ne ʻomi fekauʻaki mo e meʻa ʻe lava ke fakafofongaʻi ʻe he uité pe teá?

ʻE lava ke hoko e ngaahi temipale māʻoniʻoní ko ha fakataipe ʻe taha ʻo e feleokó. (Vakai, David A. Bednar, “Maʻu ha Hingoa mo ha Ongoongo ʻOku Leleí,” Liahona, Mē 2009, 97.)

ʻIloʻi ha ngaahi lēsoni mahuʻinga.

• Kapau ʻoku tau ʻilo ʻe lava ke fakafofongaʻi ʻe he feleokó ʻa e ngaahi potu māʻoniʻoni hangē ko e temipalé, ko e hā ha ngaahi lēsoni ʻoku finangalo ʻa e Fakamoʻuí ke mahino kiate kitautolu mei he talanoa fakatātā ko ʻení?

Ko ha lēsoni ʻe taha ʻe ala ʻilo ʻe he kau akó ʻoku fakaafeʻi kitautolu ʻe he Fakamoʻuí ke tau fakataha ki Hono temipalé ke maʻu ʻEne maluʻí mo teuteuʻi kitautolu ki he moʻui taʻengatá.

Fakapapauʻi hono fakaʻaongaʻi fakatāutahá.

• Te ke fakaʻaongaʻi fēfē ʻa e lēsoni naʻá ke ʻiló ʻi hoʻo moʻuí?

Ko e talanoa fakatātā ‘o e fakamaau taʻe-angatonú

ʻE lava foki ke akoako ʻe he kau akó ʻa e ngaahi sitepú ʻaki hono lau ʻa e talanoa fakatātā ʻo e fakamaau taʻe-angatonú ʻi he Tokāteline mo e Ngaahi Fuakava 101:81–84. Hili hono vahevahe ʻe he kau akó e meʻa ne nau ʻiló, fakamatalaʻi ange naʻe fakaʻaongaʻi ʻe he Fakamoʻuí ʻi he Tokāteline mo e Ngaahi Fuakava 101, ʻa e talanoa fakatātā ʻo e fakamaau taʻe-angatonú ke fakahinohinoʻi e Kāingalotu naʻe fakatangaʻí ke kumi tokoni mei he kau maʻu mafai fakapuleʻangá (vakai, veesi 85–92). Naʻá Ne akoʻi foki ʻa e talanoa fakatātā ko ʻení lolotonga ʻEne ngāue fakafaifekau ʻi he māmaní ke akoʻi ʻEne kau ākongá fekauʻaki mo e lotú (vakai, Luke 18:1–8; Tokāteline mo e Ngaahi Fuakava 101:81).

Tokāteline mo e Ngaahi Fuakava 101:76–80. Ko e Konisitūtone ʻo e ʻIunaiteti Siteití

Ke tokoni ke ʻilo lahi ange ʻa e kau akó ki he Konisitūtone ʻo e ʻIunaiteti Siteití mo e founga ʻe lava ke fakaʻaongaʻi fakaemāmani lahi ai hono ngaahi tuʻutuʻuní, fakakaukau ke ako ʻa e lea “Ko Hono Maluʻi ʻEtau Konisitūtone Tataki Fakalangí,” naʻe fai ʻe Palesiteni Tāleni H. ʻOakesi ʻi he konifelenisi lahi ʻo ʻEpeleli 2021. Fakakaukau ke fakaʻaongaʻi ha taha ʻo e ngaahi fakakaukau ʻi he lēsoni “Sīpingá: Ngaahi Akonaki ʻa e Kau Taki ʻo e Siasí.”

Tauʻatāina ke fili ki he totonú

Fakaafeʻi e kau akó ke nau aleaʻi e founga te nau tali ai ki ha taha ʻoku ʻikai fili ke muimui ki he ngaahi akonaki ʻa e Fakamoʻuí mo pehē, “ʻOku ou maʻu ʻeku tauʻatāina ke filí. Te u lava ʻo fai ha meʻa pē ʻoku ou fiemaʻu!”

Lau ʻa e Tokāteline mo e Ngaahi Fuakava 101:78. Kumi ha ngaahi fakakaukau ʻi he veesi ko ʻení te ke lava ʻo fakakau ʻi hoʻo talí.

• ʻE tākiekina fēfē ʻe he ʻiloʻi ʻoku tau haʻisia ki he ʻEikí ʻa e anga ʻo ʻetau vakai mo fakaʻaongaʻi ʻetau tauʻatāina ke filí?

Fakakaukau ke fakaafeʻi e kau akó ke nau lau ʻa e potufolofola fakataukei fakatokāteline 2 Nīfai 2:27, ʻo kumi ha toe ngaahi fakakaukau fekauʻaki mo e tauʻatāina ke filí. ʻE lava ke nau fakafehokotaki ʻa e veesi ko ʻení mo e Tokāteline mo e Ngaahi Fuakava 101:78.

Naʻe vahevahe ʻe Palesiteni ʻEselā Tafu Penisoni (1899–1994) ʻa e meʻá ni fekauʻaki mo ʻetau fakaʻaongaʻi ʻa e tauʻatāina ke filí:

ʻOku tau tauʻatāina ke fili, ka ʻoku ʻikai ke tau tauʻatāina ke liliu ʻa e ngaahi nunuʻa ʻo e ngaahi fili ko iá. (Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni [2014], 73)

Ki ha fakatātā lahi ange ʻo e tokāteline ʻo e tauʻatāina ke fili ki he totonú, fakakaukau ke mamata ʻi he “Agency” (6:20), ʻoku maʻu ʻi he ChurchofJesusChrist.org.