Lēsoni 116: Tokāteline mo e Ngaahi Fuakava 102–105

Tokāteline mo e Ngaahi Fuakava 103

Ko Hono Fokotuʻutuʻu e ʻApitanga ʻo ʻIsilelí

ʻI he ʻaho 24 ʻo Fēpueli 1834, naʻe maʻu ai ʻe he Palōfita ko Siosefa Sāmitá ha fakahā mei he ʻEikí ʻo fekauʻi ia ke ne fokotuʻu ha kulupu ʻo ha kau ngāue tokoni ke nau tokoniʻi e Kāingalotu faingataʻaʻia ʻi Mīsulí. Naʻe fiemaʻu ʻe he ʻEikí ha tui lahi meiate kinautolu naʻa nau tali ʻa e ui ke kau ki he kulupú, ʻa ia naʻe ʻiloa ko e ʻApitanga ʻo ʻIsilelí. ʻE lava ke tokoni ʻa e lēsoni ko ʻení ki he kau akó ke nau talangofua ki he ngaahi fekau kuo foaki ange ʻe he ʻEikí kiate kinautolú.

Ngaahi ʻEkitivitī Ako ʻOku Ala Fakahokó

Ko e ʻuluaki ʻeni ʻo ha lēsoni ʻe tolu fekauʻaki mo e ngaahi aʻusia ʻa e ʻApitanga ʻo ʻIsilelí, ʻa ia ʻoku akoʻi ʻi he uike Tokāteline mo e Ngaahi Fuakava 102–105. Kapau ʻoku ʻikai ke ke lava ʻo akoʻi mavahevahe ʻa e ngaahi lēsoni ʻe tolú koeʻuhí ʻoku ʻikai feʻunga e taimi kalasí, fakakaukau ki ha founga te ke lava ai ʻo fakatahaʻi ha ngaahi fakakaukau mei he ngaahi lēsoni ko ʻení.

Ngaahi fakafeʻātungia ki he moʻui taʻengatá

Fakakaukau ke tā ha fakatātā faingofua ʻo ha taha (stick figure) ʻi ha tafaʻaki ʻe taha ʻo e palakipoé. Hiki ʻa e ongo foʻi lea moʻui taʻengatá ʻi he tafaʻaki ʻe taha ʻo e palakipoé, pea tā ha meʻa hangē ha ʻā vahevahé ʻi lotomālie. Hili iá pea vahevahe ange ʻa e lea ko ʻeni ʻa Palesiteni Uilifooti Utalafí.

Naʻe pehē ʻe Palesiteni Uilifooti Utalafi (1807–98):

ʻOku ou tulifua ki he fakamoʻuí mo e moʻui taʻengatá, pea ʻoku ʻikai te u fiemaʻu ha meʻa ke tuʻu ʻi hoku vahaʻá pea mo e meʻa ʻoku ou tulifua ki aí. (Wilford Woodruff, in Journal of Discourses, 17:246)

• Ko e hā ha ngaahi fakafeʻātungia pe ʻā vahevahe ʻe lava ke fakaʻatā ʻe he kakaí ke ne fakafaingataʻaʻiaʻi ʻenau tulifua ki he moʻui taʻengatá?

  Fakamahinoʻi ange ko e fakamatala ʻa Uilifooti Utalafí ko ha tali ia ki ha fekau faingataʻa naʻá ne maʻu mei he ʻEikí. Kimuʻa pea aleaʻi e fekau ko iá, fakakaukau ke fakaafeʻi e kau akó ke nau fakakaukau fakalongolongo ki heʻenau tali ki he fehuʻi ko ʻení.

• ʻI ha meʻafua mei he tahá (ʻikai loto ki ai) ki he hongofulú (loto-fiemālie moʻoni), ʻoku fēfē hoʻo loto-fiemālie ke talangofua ki he ʻEikí ʻi he taimi ʻoku ngali faingataʻa ai ʻEne ngaahi fekaú?

Fakakaukau ki he ngaahi ʻuhinga naʻá ke tali ai ʻi he founga naʻá ke faí. ʻI hoʻo ako he ʻaho ní, tokanga ki he ngaahi akonaki mo e ngaahi ueʻi fakalaumālie mei he Tamai Hēvaní ʻo fakafou ʻi he Laumālie Māʻoniʻoní ʻe lava ʻo tokoni atu ke ke muimui ki he Fakamoʻuí, naʻa mo e taimi ʻoku ngali faingataʻa ai ha fekaú.

ʻOku ui ʻe he ʻEikí ha niʻihi fakafoʻituitui ke huhuʻi ʻa Saione

Mahalo ʻe tokoni ke fakaafeʻi e kau akó ke nau vahevahe e meʻa ʻoku nau manatuʻi fekauʻaki mo e ngaahi tūkunga naʻe fehangahangai mo e Kāingalotu ʻi Mīsulí ʻi he konga kimui ʻo e 1833. Kapau ʻe fiemaʻu, fakamanatu ange naʻe fakatangaʻi mo tuli ʻa e Kāingalotú mei honau ngaahi ʻapí.

Naʻe lotu ʻa e Palōfita ko Siosefa Sāmitá ki he Tamai Hēvaní ke ʻiloʻi Hono finangalo fekauʻaki mo e meʻa ne hokó. Naʻe maʻu ʻa e fakahā ʻoku lekooti ʻi he Tokāteline mo e Ngaahi Fuakava 103 ʻi he ʻaho naʻe alēlea fakataha ai ʻa Siosefa Sāmita mo e kau taki kehe ʻo e Siasí fekauʻaki mo e founga ke tokoniʻi ai e Kāingalotu ʻi Mīsulí.

Lau ʻa e Tokāteline mo e Ngaahi Fuakava 103:15–18, 22, 27–28, ʻo kumi e meʻa naʻe fekau ʻe Sīsū Kalaisi ʻa e Kāingalotú ke nau faí.

• Te ke fakamatalaʻi fakanounou fēfē nai e ngaahi fakahinohino ʻa e ʻEikí ʻi he ngaahi veesi ko ʻení?

Naʻe fekauʻi ʻe he ʻEikí ha niʻihi fakafoʻituitui ke nau fokotuʻutuʻu kinautolu ki ha ngaahi kulupu ʻo tautau toko hongofulu, uofulu, nimangofulu, mo e laungeau. Naʻá Ne ui ha kau tangata ʻe toko nimangeau, ka naʻe ʻikai fiemaʻu ke toe siʻi hifo ʻi he kakai tangata ʻe toko teaú ke kau mai (vakai, Tokāteline mo e Ngaahi Fuakava 103:29–34). Ko hono fakakātoá, naʻe iku ʻo kau ha kau tangata ʻe toko uangeau tupu ki he kulupu naʻe ʻiloa ko e ʻApitanga ʻo ʻIsilelí, ʻa ia naʻe ui kimui ko e ʻApitanga ʻo Saioné.

• Ko e hā ha ngaahi fakakaukau pe ongo ʻokú ke pehē te ke ala maʻu kapau naʻe ui koe ke ke kau ʻi he ʻApitanga ʻo ʻIsilelí? Ko e hā hono ʻuhingá?

Fakakaukau ke fakaafeʻi e kau akó ke nau lau mo hanau hoa ʻa e ngaahi veesi ko ʻení pea aleaʻi ʻa e fehuʻi ʻi laló.

Lau ʻa e Tokāteline mo e Ngaahi Fuakava 103:20, 36, ʻo kumi ʻa e meʻa ne talaʻofa ʻe he ʻEikí maʻanautolu ʻe kau atu ki he ʻApitanga ʻo ʻIsilelí.

• Ko e hā ha meʻa naʻá ke maʻu ʻi he ngaahi veesi ko ʻení naʻe ala fakafiemālie ki he kau mēmipa ʻo e ʻApitanga ʻo ʻIsilelí?

Fakamatalaʻi ange, ʻi he fakamatala mei he kamataʻanga ʻo e lēsoní, naʻe lave ai ʻa Uilifooti Utalafi ki hono ui ia ke kau ʻi he ʻApitanga ʻo ʻIsilelí. Fakakaukau ke fakaʻaliʻali ki he kau akó ʻa e tatau ko ʻeni ʻo e fakamatalá kuo fakalahí.

Naʻe fakamatalaʻi ʻe Uilifooti Utalafi ʻene fili ke kau ki he ʻApitanga ʻo ʻIsilelí ʻo pehē:

Naʻe ui au ke fakafalala ʻeku moʻuí ki hoku ongo nimá pea ʻalu hake ki Mīsuli, fakataha mo ha niʻihi tokosiʻi pē ke huhuʻi homau ngaahi tokouá. Naʻe pau ke mau fononga ʻi he tui. Naʻe ui au mo kolenga mai hoku ngaahi kaungāʻapí ke ʻoua te u ʻalu; ne nau pehē mai—“ʻOua naʻá ke ʻalu, he ʻo ka ke ka ʻalu ʻe mole ai hoʻo moʻuí.” Ne u talaange kiate kinautolu—“Kapau ne u ʻilo ʻoku totonu ke fanaʻi au ʻi heʻeku fuofua tūʻuta pē ki he Siteiti ʻo Mīsulí te u ʻalu.” … Ko e ongo ia ne u maʻu ʻi he ngaahi ʻaho ko iá fekauʻaki mo e ngāue ʻa e ʻOtuá, pea ko e meʻa ia ʻoku ou ongoʻi he ʻaho ní. ʻOku ou tulifua ki he fakamoʻuí mo e moʻui taʻengatá, pea ʻoku ʻikai te u fiemaʻu ha meʻa ke tuʻu ʻi hoku vahaʻá pea mo e meʻa ʻoku ou tulifua ki aí. (Wilford Woodruff, in Journal of Discourses, 17:246; naʻe fakaleleiʻi ʻa e sipelá)

• Ko e hā ha meʻa naʻe mahuʻinga kiate koe mei he fakamatala ko ʻení?

• Ko e hā ha meʻa naʻá ke ako mei he fakamatala ko ʻení ʻe lava ʻo tokoni kiate koe ʻi he taimi ʻokú ke fehangahangai ai mo e ngaahi fekau ʻoku faingataʻa ke talangofua ki aí?

ʻI hono vahevahe ʻe he kau akó ʻa e meʻa ne nau akó, mahalo te nau ʻiloʻi ha moʻoni hangē ko ʻení: ʻI he taimi ʻoku tau ngāue ʻaki ai e tui kia Sīsū Kalaisí, te tau lava ʻo ongoʻi ha loto-fiemālie lahi ange mo ha malava ke talangofua ki Heʻene ngaahi fekaú.

Tui ke talangofua ki he ngaahi fekau ʻa e ʻEikí

Fakaʻaliʻali pe hiki e ngaahi fehuʻi ko ʻení ʻi he palakipoé. Kimuʻa pea aleaʻi fakakalasi kinautolú, ʻe lava ke tomuʻa aleaʻi kinautolu ʻe he kau akó mo hanau hoa pe ko ha kiʻi kulupu tokosiʻi. ʻE lava foki ke ke fakakaukau ke hiki ʻe he kau akó ʻenau ngaahi tali ki he fehuʻi ʻuluakí ʻi he palakipoé.

• Ko e hā ha ngaahi sīpinga ʻe niʻihi ʻo e ngaahi fekau ʻa e ʻEikí ʻe ala faingataʻa ke talangofua ki ai e toʻu tupú he ʻahó ni?

• Ko e hā ka faingataʻa ai ke talangofua ki he ngaahi fekau ko ʻení?

ʻE lava ke tokoni ʻa e ʻekitivitī ako ko ʻení ke ako lahi ange ʻa e kau akó fekauʻaki mo hono ngāue ʻaki e tui kia Sīsū Kalaisí ke talangofua ki Heʻene ngaahi fekaú. Fakakaukau ke fakaʻaliʻali e ongo tefito ako ko ʻení pea ʻoange ki he kau akó ha taimi ke nau ako ai. ʻE lava ke ke vahevahe e kalasí ki ha kulupu ʻe tolu, pea vahe ki he kulupu takitaha ha taha ʻo e ngaahi tefito ko ʻení. Pe ko hoʻo tuku ke fili ʻe he kau akó ha tefito ke nau ako ʻi ha fanga kiʻi kulupu iiki.

Fakakaukauloto ʻoku ʻi ai haʻo kaungāmeʻa ʻoku fehangahangai mo ha fekau ʻoku faingataʻa ke talangofua ki ai. Fili ha taha ʻo e ngaahi tefito ako ko ʻení, pea kumi ha ngaahi akonaki mo ha ngaahi moʻoni te ke fie vahevahe mo ho kaungāmeʻá.

Tefito 1: Ngaahi fakamatala mei he folofolá

• Mōsese 6:26–34 (ʻĪnoke)

• Luke 1:26–38 (Mele ko e faʻē ʻa Sīsuú)

• 1 Nīfai 3:1–8 (Nīfai)

Tefito 2: Ngaahi Fakamatala fekauʻaki mo Sīsū Kalaisí

• Luke 22:39–44

• Sione 18:1–12, 33–37

• 1 Nīfai 19:8–9

Tefito 3: Ngaahi akonaki ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (tohi tufa, 2022)

• “Fakahoko ha ngaahi fili ʻoku ueʻi fakalangí”

• “ʻE tokoniʻi koe ʻe Sīsū Kalaisi”

• “ʻAʻeva ʻi he maama ʻa e ʻOtuá”

Hili hono maʻu ʻe he kau akó ha taimi ke fakakakato ai ʻa e ʻekitivitī akó, ʻoange ha ngaahi faingamālie ke vahevahe ʻa e meʻa ne nau maʻú. Te ke lava ʻo ʻeke ha ngaahi fehuʻi hangē ko ʻení:

• Ko e hā ha meʻa naʻá ke ako mei he ngaahi maʻuʻanga tokoni naʻá ke akó ʻe lava ʻo tokoni ke tau talangofua ki he ngaahi fekau ʻoku faingataʻa ke tau tauhí?

• Kuo tāpuekina fēfē koe ʻe he ʻEikí ʻi hoʻo fakaʻaongaʻi hoʻo tui kiate Iá ʻi he taimi naʻe faingataʻa ai ke talangofua ki Heʻene ngaahi fekaú?

Faʻu ha palani

ʻOange ha taimi ki he kau akó ke nau fekumi ki ha fakahinohino mei he Tamai Hēvaní ʻi heʻenau fakakaukau ke fakaʻaongaʻi ʻa e meʻa kuo nau akó ʻi heʻenau moʻuí. Fakakaukau ke fakaʻaliʻali e ngaahi fakakaukau ko ʻení pea fakaafeʻi e kau akó ke lekooti ʻenau ngaahi talí ʻi heʻenau tohinoa akó pe nouti fakaʻilekitulōniká.

1. Fakakaukau ki ha fekau ʻe ala faingataʻa ke ke talangofua ki ai.

2. Feinga ke ʻiloʻi ʻa e meʻa ʻokú ne ʻai ʻa e fekau ko ʻení ke faingataʻá.

3. Feinga ke ʻiloʻi ha meʻa kuó ke ako he ʻahó ni ʻe lava ʻo tokoni atu ke ke talangofua lelei ange ai ki he fekau ko ʻení.

4. Faʻu ha palani ʻe tokoni atu ke ke ngāue ʻaki hoʻo tui kia Sīsū Kalaisí ke talangofua ki he fekau ko ʻení.

Ngaahi Maʻuʻanga Tokoni Kehé

Tokāteline mo e Ngaahi Fuakava 103:12. ʻE lava fēfē ke ʻomi ʻe he ngaahi faingataʻá ha ngaahi tāpuaki?

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Mahalo te ke fifili ki he ʻuhinga ʻoku fakaʻatā ai ʻe ha ʻOtua ʻofa mo māfimafi ke fuʻu faingataʻa ʻa hotau sivi fakamatelié. He ko hono ʻuhingá ʻokú Ne ʻafioʻi kuo pau ke tau tupulaki ʻi he maʻa fakalaumālié mo e lahí kae lava ke tau nofo ʻi Hono ʻaó ko ha ngaahi fāmili ʻo taʻengata. …

Ko e tāpuaki maʻongoʻonga taha te tau maʻu ʻi heʻetau fakamoʻoniʻi ʻetau tauhi faivelenga ki hotau ngaahi fuakavá lolotonga hotau ngaahi faingataʻá ko e liliu ko ia ʻi hotau natulá. ʻI heʻetau fili ke tauhi hotau ngaahi fuakavá, ʻe lava ke ngāue ʻa e mālohi ʻo Sīsū Kalaisí pea mo e ngaahi tāpuaki ʻo ʻEne Fakaleleí ʻiate kitautolu. ʻE lava ʻo fakavaivaiʻi hotau lotó ke ʻofa, faʻa fakamolemole, pea fakaafeʻi ʻa e niʻihi kehé ke haʻu ki he Fakamoʻuí. ʻOku fakautuutu leva ʻetau loto falala ki he ʻEikí. ʻOku hōloa ʻa ʻetau manavasiʻí. (Henry B. Eyring, “ʻOsi Siviʻi, Fakamoʻoniʻi, pea Fakaleleiʻi,” Liahona, Nōvema 2020, 97–98)

Tokāteline mo e Ngaahi Fuakava 103:20. Ko e hā hono tuʻo lahi hono fakaʻaongaʻi ʻe he ʻOtuá ʻa e kau ʻāngeló ke tokoniʻi kitautolú?

Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē:

Talu mei he kamataʻangá ʻo fai mai ʻi he ngaahi kuonga fakakosipelí mo hono ngāue ʻaki ʻe he ʻOtuá ha kau ʻāngelo ko hono kau fakafofonga ke fakahā ki Heʻene fānaú ʻa ʻEne ʻofá mo e tokangá. …

ʻOku ʻikai ke tau faʻa mamata kiate kinautolu. Ka ʻoku ʻi ai pē e taimi ʻoku fai ai e mamata kiate kinautolu. Ka neongo pe ʻoku ʻiloʻi pe taʻe-ʻiloʻi kinautolu, ʻoku nau [takaofi] maʻu pē. ʻI he taimi ʻe niʻihi ʻoku nau fakahoko ai ha fatongia fakaʻeiʻeiki ʻoku mahuʻinga fau ki he māmaní fakalūkufua. Ko e taimi ʻe niʻihi ʻoku fakafoʻituitui pē ʻa e pōpoakí. ʻI he taimi ʻe niʻihi ʻoku taumuʻa e kau ʻāngeló ke fai ha fakatokanga. Ka ko e lahi tahá ke fakafiemālieʻi, ʻoatu ha tokanga makehe ʻi he ʻaloʻofa pe tataki ʻi he ngaahi taimi ʻo e faingataʻá. (Jeffrey R. Holland, “Ko e Tauhi Mai ʻa e Kau ʻĀngeló,” Liahona, Nōvema 2008, 29)

Naʻe akonaki ʻa Palesiteni Lāsolo M. Nalesoni ʻo pehē:

ʻE ʻomi ʻe he talangofua ki he ngaahi fekau ʻa e ʻOtuá ha maluʻi fakatuʻasino mo fakalaumālie. Pea manatuʻi, ʻoku tuʻu mateuteu mai e kau ʻāngelo māʻoniʻoni ʻa e ʻOtuá ke tokoniʻi kitautolu. Kuo fakahā ʻe he ʻEikí, “Te u muʻomuʻa ʻi homou ʻaó. Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié, pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu” [Tokāteline mo e Ngaahi Fuakava 84:88]. [Ko ha] talaʻofa maʻongoʻonga ia! Te Ne faitokonia kitautolu mo ʻEne kau ʻāngeló he taimi ʻoku tau faivelenga aí. (Russell M. Nelson, “Fehangahangai mo e Kahaʻú ʻi he Tui,” Liahona, Mē 2011, 35)

Ngaahi ʻEkitivitī Fakalahi ki he Akó

ʻOku ʻomi ʻe he talangofuá ha ngaahi tāpuaki

Fakakaukau ke huluʻi e vitiō “Obedience Brings Blessings” (3:26). Te ke lava ʻo fakaafeʻi e kau akó ke nau tokanga ki he ngaahi tāpuaki naʻe fakamatalaʻi ʻe Palesiteni Tōmasi S. Monisoni (1927–2018) ʻa ia ʻoku lava ke maʻu ʻe kinautolu ʻoku talangofua ki he ngaahi fekau ʻa e ʻEikí.

Hili e vitioó, fakakaukau ke kole ki he kau akó ke nau aleaʻi e founga ʻe lava ke tokoniʻi ai kitautolu ʻe he fili ke ngāue ʻaki e tui kia Kalaisí ke talangofua ki he ngaahi fekau faingataʻá, ke fakatupulaki ha ngaahi ʻulungaanga hangē ko e Tamai Hēvaní mo Sīsū Kalaisí.

Fiemaʻu ha kau ngāue tokoni

Fakakaukau ke fakaʻaliʻali ha fakaʻilonga ʻoku pehē “Fiemaʻu Ha Kau Ngāue Tokoni.” Fakaafeʻi e kau akó ke nau fakakaukauloto ne nau nofo ʻi Ketilani, ʻOhaiō, ʻi Fēpueli 1834 pea naʻe fakaafeʻi kinautolu ki ha fakataha makehe ke aleaʻi e ngaahi faingataʻa ʻi Mīsulí. Sio ʻi he foʻi vitiō “Zion’s Camp” mei he taimi 0:24 ki he 1:57.

Hili e sio ʻa e kau akó ʻi he foʻi vitioó, ʻeke ange ʻa e ongo fehuʻí ni:

• ʻOkú ke pehē ko e hā ʻoku kole ai ʻe he ʻEikí ha kau ngāue tokoni ke fakahoko ʻEne ngāué?

• Ko e hā ha ngaahi founga ʻokú Ne tāpuekina ai kitautolu ʻi heʻetau foaki hotau taimí, ngaahi talēnití, iví, mo e koloá ke tokoniʻi ʻEne fānaú mo langa hake Hono puleʻangá?

Ko hono foaki ʻetau moʻuí ki he ʻEikí

Ke tokoni ke mahino lelei ange ki he kau akó e founga ʻe lava ke fakaʻaongaʻi ai e ngaahi akonaki ʻa e ʻEikí ʻi he Tokāteline mo e Ngaahi Fuakava 103:27 ki heʻenau moʻuí, fakakaukau ke vahevahe ʻa e lea ko ʻeni ʻa Palesiteni Sēmisi E. Fausi (1920–2007) ʻo e Kau Palesitenisī ʻUluakí:

Ki hotau tokolahi … ʻoku ʻikai ko e fiemaʻú ke tau mate maʻá e Siasí ka ke tau moʻui koeʻuhí ko ia. Mahalo ʻoku faingataʻa ki ha tokolahi ia ke nau moʻui faka-Kalaisi he ʻaho kotoa pē, ʻo faingataʻa ange ia ʻi hano toʻo atu ʻenau moʻuí. (James E. Faust, “Discipleship,” Liahona, Nov. 2006, 22)

Mahalo te ke fehuʻi ki he kau akó pe ʻoku fēfē nai ʻa e moʻui maʻa Sīsū Kalaisi mo ʻEne ongoongoleleí. Fakakaukauʻi ʻa e ngaahi fehuʻi ko ʻeni meia Palesiteni Lāsolo M. Nalesoní ko ha konga ʻo hoʻomou alēleá:

ʻOkú ke loto-fiemālie ke tuku ke lāngilangiʻia ʻa e ʻOtuá ʻi hoʻo moʻuí? ʻOkú ke loto-fiemālie ke tuku ke hoko ʻa e ʻOtuá ko e ivi tākiekina mahuʻinga taha ʻi hoʻo moʻuí? Te ke tuku nai ʻEne folofolá, ʻEne ngaahi fekaú, mo ʻEne ngaahi fuakavá ke nau tākiekina ‘a e meʻa ʻokú ke fai ʻi he ʻaho kotoa pē? Te ke tuku nai Hono leʻó ke muʻomuʻa taha ʻi ha toe meʻa? ʻOkú ke loto-fiemālie nai ke fakamuʻomuʻa ha meʻa pē ʻokú Ne finangalo ke ke fai, ʻi ha toe meʻa kehe ʻokú ke fakaʻamua? ʻOkú ke loto-fiemālíe nai ke fakamoʻulaloaʻi ho lotó ki Hono finangaló? (Russell M. Nelson, “Tuku ke Lāngilangiʻia ʻa e ʻOtuá,” Liahona, Nōvema 2020, 94)