“Lēsoni 117—Ko e ʻApitanga ʻo ʻIsilelí: ʻʻE Muʻomuʻa ʻa ʻEku Kau ʻĀngeló ʻIate Kimoutolu,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko e ʻApitanga ʻo ʻIsilelí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 117: Tokāteline mo e Ngaahi Fuakava 102–105
Ko e ʻApitanga ʻo ʻIsilelí
“ʻE Muʻomuʻa ʻa ʻEku Kau ʻĀngeló ʻIate Kimoutolu”
Naʻe mavahe ʻa e ʻApitanga ʻo ʻIsilelí mei Ketilani, ʻOhaiō, ʻi Mē ʻo e 1834 ke kamata fononga lalo ʻi ha maile ʻe 800 tupu (kilomita ʻe 1,280). Neongo naʻe fehangahangai ʻa e kau mēmipa ʻo e ʻapitangá mo ha ngaahi pole mo ha ngaahi faingataʻa lahi ʻi heʻenau fonongá, ka naʻa nau aʻusia foki mo ha ngaahi tāpuaki lahi. ʻE lava ke tokoni ʻa e lēsoni ko ʻení ke mahino ki he kau akó ʻe ʻiate kinautolu ʻa e ʻOtuá mo tokoniʻi kinautolu ʻi he taimi ʻoku nau fili ai ke muimui kiate Iá.
Ngaahi ʻEkitivitī Ako ʻOku Ala Fakahokó
Ko e lēsoni hono ua ʻeni ʻo ha lēsoni ʻe tolu fekauʻaki mo e ngaahi aʻusia ʻa e ʻApitanga ʻo ʻIsilelí, ʻa ia ʻoku akoʻi ʻi he uike ki he Tokāteline mo e Ngaahi Fuakava 102–105. Kapau naʻe ʻikai ke ke akoʻi ʻa e lēsoni ki muʻá, fakakaukauʻi pe ʻe founga fēfē haʻo fakakau ha ngaahi konga mei ai ki he lēsoni ko ʻení.
Ko e Muimui kia Sīsū Kalaisí
Fakakaukau ke kamata ʻa e lēsoní ʻaki hano ako ʻa e lea ʻa ʻEletā Sefilī R. Hōlaní pea aleaʻi ʻa e ngaahi fehuʻi ʻoku muimui mai aí.
Naʻe fakamatalaʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e hala ʻe lava ke fiemaʻu ʻi he kau muimui ʻo Sīsū Kalaisí:
Siʻoku ngaahi tokoua mo e tuofāfine ʻofeina, ʻoku fakafiemālie ʻa e anga faka-Kalisitiané, ka ʻoku toe taʻe-fakafiemālie he taimi lahi. Ko e hala fononga lōloa mo faʻa faingataʻa ʻa e hala ko ia ki he māʻoniʻoní mo e fiefiá. ʻOku fiemaʻu ki ai ha taimi mo e loto-vilitaki ke fononga ai. Ka ko e pale ki hono fakahoko iá ʻoku lahi fau. (Jeffrey R. Holland, “Tatali ki he ʻEikí,” Liahona, Nōvema 2020, 116–117)
-
Ko e hā ha ngaahi fakakaukau pe ngaahi ongo ʻokú ke maʻu fekauʻaki mo e fakamatalá ni?
Fakaafeʻi ʻa e kau akó ke nau fakakaukau ki he meʻa te ne lava ʻo ʻai ke faingataʻa fakataautaha kiate kinautolu ʻenau muimui ki he Fakamoʻuí, pea pehē ki he meʻa ʻokú ne ʻai pe te ne ʻai ke feʻunga ʻānoa pē ʻenau feingá. Hili ha fakakaukau ʻa e kau akó ki honau ngaahi tūkungá, fakakaukau ke aleaʻi fakataha ʻa e ongo fehuʻi ko ʻení.
-
Ko e hā ha meʻa te ne lava ʻo ʻai ke faingataʻa ʻa e hoko ko ha tokotaha muimui ʻo Sīsū Kalaisi he ʻaho ní?
ʻE lava ke vahevahe ʻe he kau akó ha ngaahi fakakaukau hangē ko ʻení: ko e muimui ki he Fakamoʻuí ʻe lava ke taimi lōloa mo lahi ʻa e ngāué, pea ʻoku faʻa fiemaʻu ke kehe ʻa e kau muimui ʻo Sīsū Kalaisí mei māmani, pe ʻoku faʻa fakatangaʻi ʻa e kau muimui ʻo e Fakamoʻuí ʻe he niʻihi kehé.
-
ʻOkú ke pehē ko e hā ʻa e ʻuhinga ʻoku mātuʻaki ʻaonga ai ʻe te feinga ke muimui ki he Fakamoʻuí?
ʻI he lēsoni ko ʻení, te mou ako ai ki he fononga naʻe fai ʻe he ʻApitanga ʻo ʻIsilelí mei ʻOhaiō ki Mīsulí. Naʻe lōloa, faingataʻa mo fiemaʻu ha ngāue lahi ki heʻenau fonongá. Ka naʻe maʻu foki ʻe he kau mēmipa ʻo e ʻapitangá ha ngaahi tāpuaki maʻongoʻonga ʻi he fonongá. ʻI hoʻomou akó, kumi ha ngaahi moʻoni ʻe lava ke nau tokoniʻi kimoutolu ʻi he taimi ʻe faingataʻa ai ke ke hoko ko ha tokotaha ʻoku muimui ʻia Sīsū Kalaisí.
Ko e kamata ʻa e fononga ʻa e ʻApitanga ʻo ʻIsilelí
Fakakaukau ke fakaafeʻi ʻa e kau akó ke nau vahevahe ʻa e meʻa ʻoku nau manatuʻi fekauʻaki mo e taumuʻa ʻo e ʻApitanga ʻo ʻIsilelí. Kapau ʻe fiemaʻu, fakaʻaliʻali e mape ko ʻení pea vahevahe pe fakamatalaʻi fakanounou ʻa e palakalafi ʻi laló. Te ke lava foki ʻo huluʻi ʻa e “Zion’s Camp” (18:44), ʻoku maʻu ʻi he ChurchofJesusChrist.org, mei he kouti 2:13 ki he 3:02.
ʻI Mē ʻo e 1834, naʻe kamata e fononga ʻa e kau mēmipa ʻo e ʻApitanga ʻo ʻIsilelí ʻi ha maile ʻe 800 tupu (kilomita ʻe 1,280) ki Mīsuli. Naʻe mavahe ha kulupu ʻe ua ʻo e ʻapitangá ʻi he taimi tatau mei Ketilani, ʻOhaiō, pea mei Ponitieki, Vahefonua Misikení. Naʻe fāifai pea toki fakataha ʻa e ongo kulupú ʻi Mīsuli. Ko e ʻApitanga ʻo ʻIsilelí, naʻe ʻiloa kimui ange ko e ʻApitanga ʻo Saioné, ʻoku fakafuofua naʻe kau ai ha kau tangata ʻe toko 200, kau fafine ʻe toko 12, mo ha fānau ʻe toko 10. Ko ʻenau taumuʻá ke tokoni ke fakafoki mai ʻa e Kāingalotu ʻi Mīsulí ki honau ngaahi kelekele naʻe faʻao taʻetotonu meiate kinautolú.
ʻOku fakataumuʻa ʻa e konga ko ʻeni ʻo e lēsoní ke tokoni ki he kau akó ke nau ako ki ha niʻihi ʻo e ngaahi aʻusia ʻa e kau mēmipa ʻo e ʻApitanga ʻo ʻIsilelí he lolotonga ʻenau fonongá.
Fakakaukau ke tufa ʻa e laʻipepa tufa ʻoku ui ko e “Ngaahi Aʻusia mei he ʻApitanga ʻo ʻIsilelí.” ʻOange ha taimi ki he kau akó ke nau ako ʻa e fakamatalá pea aleaʻi ʻa e ngaahi fehuʻi mei he laʻipepa tufá.
Ke tānaki atu ha ngaahi founga kehekehe, te ke lava ʻo vahe ki ha kau ako ʻe toko tolu ʻoku nau loto ki ai, ke nau akoʻi ha konga taki taha ʻo e laʻipepa tufá. Te nau lava ʻo faiako ʻi muʻa ʻi he kalasí pe ʻi ha ngaahi feituʻu kehekehe ʻo e lokí kae vilo takai ha fanga kiʻi kulupu ʻo e kau akó ʻi he lokí.
Ko ha founga ʻe taha ko hano huluʻi ha ngaahi konga ʻo e foʻi vitiō “Zion’s Camp.” Fakakaukau ke kiʻi taʻofi ʻa e foʻi vitioó ʻi he ngaahi taimi takitaha ko ʻení pea ʻai ha tokotaha ako ke ne lau ʻa e aʻusia ʻoku fekauʻaki mo iá mei he laʻipepa tufá.
-
Aʻusia #1: 3:02 ki he 5:00
21:29 -
Aʻusia #2: 5:01 ki he 8:02
21:29 -
Aʻusia #3: 8:03 ki he 13:06
21:29
Ngaahi aʻusia mei he ʻApitanga ʻo ʻIsilelí
Aʻusia #1
Naʻe manatuʻi ʻe ʻEletā Siaosi A. Sāmita (1817–75) ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi tūkunga naʻe fehangahangai mo e ʻApitanga ʻo ʻIsilelí he lolotonga ʻenau fonongá:
Naʻe fuesia ʻe he Palōfita ko Siosefá ʻa e faingataʻa ʻo e ongosiá ʻi hono kotoa ʻo e fonongá. Naʻe ʻikai ngata pē ʻi heʻene tokangaʻi mo toe puleʻi ʻa e ʻApitangá, ka naʻá ne lue lalo ʻi he taimi lahi ʻo ne aʻusia ai ʻa e fā, toto, pea mo e mamahi ʻo e vaʻé, pea ko e ola fakanatula pē ia ʻo e lue lalo ʻi ha maile ʻe 25 ki he 40 ʻi he ʻahó, ʻi he faʻahitaʻu vela ʻo e taʻú. Ka ʻi he lolotonga e fonongá kotoa, naʻe ʻikai te ne puʻaki ha foʻi lea hanu pe lāunga, ka ko hono tokolahi taha ʻo e kau tangata ʻi he ʻApitangá ne nau lāunga kiate ia ʻi he mamahi mo e fā honau vaʻé, lōloa ʻo e fonongá, siʻisiʻi e meʻakaí, kovi ʻa e maá, kovi ʻa e mā koané, kovi ʻa e patá, namu faikehe ʻa e honé, manua ʻa e pēkaní mo e sīsí, mo e hā fua. … Ka ko e ʻApitanga kimautolu ʻo Saioné, pea ko hamau tokolahi naʻe ʻikai toe lotu, taʻe fakakaukau, taʻe tokanga, talangataʻa, fakavalevale, pe anga fakatēvolo, ka naʻe ʻikai ke mau teitei fakatokangaʻi ia ʻe kimautolu. Naʻe pau ke kātekina kimautolu ʻe Siosefa mo akoʻi kimautolu hangē ha fānaú. Neongo ia, naʻe ʻi ai ha tokolahi ʻi he ʻapitangá naʻe ʻikai ke nau teitei lāunga ka naʻa nau mateuteu maʻu pē mo loto-fiefia ke fai ʻa e meʻa naʻe fiemaʻu ʻe homau takí. (George A. Smith, ʻi he Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 331–32)
-
ʻOkú ke pehē ko e hā e ʻuhinga naʻe kehekehe ai e tali ʻa e kau mēmipa ʻi he ʻapitangá ki he ngaahi tūkunga tatau?
-
Ko e hā ha meʻa ʻe lava ʻo tokoni mai ke tau fakatuʻamelie ʻi he taimi ʻoku tau aʻusia ai ha ngaahi faingataʻa ʻi heʻetau feinga ke muimui ki he Fakamoʻuí?
Aʻusia #2
Lau ʻa e Tokāteline mo e Ngaahi Fuakava 103:20 pea mo e lea ko ʻeni ʻa Palesiteni Hiipa C. Kimipolo (1801–68) ʻo e Kau Palesitenisī ʻUluakí:
Neongo ʻa e hokohoko hono fakamanamanaʻi kimautolu ʻe homau ngaahi filí ka naʻe ʻikai ke mau ilifia, pe te mau momou ke fakahoko ʻemau fonongá, he naʻe ʻiate kimautolu ʻEne kau ʻāngeló, pea naʻe tuʻu taʻeueʻia e tui ʻa ʻemau kiʻi kulupú. ‘Oku mau ‘ilo ko homau kaungāfonongá ‘a e kau ‘āngeló, he na‘a mau mamata kiate kinautolu.” (Heber C. Kimball, ʻi he Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 332)
-
ʻOkú ke pehē naʻe mei liliu fēfē koe ʻe he tāpuaki ko ʻení kapau naʻá ke kau ʻi he ʻApitanga ʻo ʻIsilelí?
-
Ko e hā ha ngaahi founga ʻoku tokoniʻi ai ʻe he ʻEikí Hono kau muimuí ke nau fai ha ngaahi meʻa faingataʻa he ʻahó ni?
Aʻusia #3
ʻI he ʻosi pē ha ʻaho ʻe taha ʻo e fononga ʻa e ʻApitanga ʻo ʻIsilelí mei he Vahefonua Siakisoní, naʻe fakaofi mai ha kau tangata ʻe toko nima mo ha ngaahi meʻatau kiate kinautolu. Naʻe pōlepole ʻa e kau tangatá ʻoku ʻi ai ha niʻihi kehe ʻe toko tolungeau tupu ʻoku omi ke ʻohofi ʻa e ʻapitangá. ʻI hono aleaʻi ʻe he kau mēmipa ʻo e ʻapitangá ʻa e meʻa ke faí, naʻe pehē ange ʻe he Palōfita ko Siosefa Sāmitá, “Tuʻu longo pē pea mamata ki he fakamoʻui ʻa e ʻOtuá.”
Hili ha miniti ʻe uofulu mei ai, naʻe tō ha ʻuha lōvai ʻi he ʻapitangá. Naʻe fakatupu ʻe he matangí ke aake māʻolunga ʻa e vaitafé, ʻo taʻofi ai honau ngaahi filí mei heʻenau kolosi mo ʻohofi kinautolú. Naʻe hūfanga ha kāingalotu tokolahi ʻo e ʻApitanga ʻo ʻIsilelí ʻi ha kiʻi falelotu ofi mai. Hili ha kiʻi taimi siʻi, naʻe hū atu ʻa Siosefa kuo pīponu ʻi he ʻuhá mo pehē, “ʻOku ʻi he matangí ni ʻa e ʻOtuá!”
ʻI he pongipongi hili ʻa e matangí, naʻe maʻu ʻe he kau mēmipa ʻo e ʻapitangá honau ʻū tēnití mo e ʻū naunaú kuo pīponu mo movetevete, ka naʻe ʻikai ke ʻohofi kinautolu ʻe ha kau (toʻo mo fakamatalaʻi fakanounou mei he Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 223–24).
-
Kapau naʻá ke kau ki he ʻApitanga ʻo ʻIsilelí, naʻe mei tokoni fēfē nai e aʻusia ko ʻení ki hoʻo ngaahi ongo fekauʻaki mo e Palōfita ko Siosefa Sāmitá?
-
Ko e hā ha meʻa ʻe lava ke akoʻi atu ʻe he aʻusia ko ʻení fekauʻaki mo e ʻOtuá lolotonga e ngaahi taimi faingataʻa ʻi hoʻo moʻuí?
Fakaafeʻi e kau akó ke nau aleaʻi e meʻa naʻa nau ako mei he ʻekitivitī ako ko ʻení ʻaki ʻenau ʻeke ha ngaahi fehuʻi hangē ko ʻení.
-
Ko e hā ha meʻa naʻe makehe kiate koe ʻi hoʻo ako ha niʻihi ʻo e ngaahi aʻusia ʻa e ʻApitanga ʻo ʻIsilelí?
-
Ko e hā ha ngaahi moʻoni te ke lava ʻo ako fekauʻaki mo e ʻEikí ʻi he ngaahi aʻusia ko ʻení?
ʻI he vahevahe ʻa e kau akó, te nau lava ʻo ʻiloʻi ha moʻoni hangē ko ʻení: ʻE ʻiate kitautolu ʻa e ʻOtuá mo tokoniʻi kitautolu ʻi heʻetau feinga ke muimui kiate Iá.
Fakaloloto ʻa e mahinó
Tuku ha taimi ke kumi mo ako ai ha potufolofola ʻe taha pe lahi ange ʻokú ne akoʻi e finangalo ʻa e ʻOtuá ke ʻiate kitautolu mo tokoniʻi kitautolu ʻi heʻetau moʻuí. Te ke lava ʻo fili haʻo folofola pē ʻaʻau pe fili mei he lisi ko ʻení:
-
Ko e hā ha meʻa naʻe makehe kiate koe mei he ngaahi potufolofola naʻá ke akó? Ko e hā hono ʻuhingá?
-
Ko e hā ha meʻa naʻá ke ʻilo ʻe ala tokoni ki ha taha ʻoku faingataʻa ke ne muimui ʻia Sīsū Kalaisi?
Fakakaukau ke fakamoʻoni ki he ngaahi moʻoni kuo mou aleaʻí pea poupouʻi ʻa e kau akó ke nau ngāueʻi ha faʻahinga ongo fakalaumālie pē kuo nau maʻu.