“Lēsoni 118—Tokāteline mo e Ngaahi Fuakava 105: ʻʻOku Totonu ke ʻOmai ʻa Kinautolu ʻo Aʻu Mai Ki Heni ke Siviʻi ʻa ʻEnau Tuí,’” Tohi Lēsoni ʻa e Faiako Semineli ki he Tokāteline mo e Ngaahi Fuakavá (2025)
“Tokāteline mo e Ngaahi Fuakava 105,” Tohi Lēsoni ʻa e Faiako Semineli ki he Tokāteline mo e Ngaahi Fuakava
Lēsoni 118: Tokāteline mo e Ngaahi Fuakava 102–105
Tokāteline mo e Ngaahi Fuakava 105
“ʻOku Totonu Ke ʻOmai ʻa Kinautolu ʻo Aʻu Mai Ki Heni ke Siviʻi ʻa ʻEnau Tuí”
Hili ha taimi nounou mei he tūʻuta ʻa e ʻApitanga ʻo ʻIsilelí ki Mīsulí, naʻe fakahā ʻe he ʻEikí “ke tatali … ʻo fuofuoloa siʻi” ʻa hono huhuʻi ʻo Saioné (Tokāteline mo e Ngaahi Fuakava 105:9, 13). ʻI heʻenau laka atu ʻi ha maile ʻe 800 (kilomita ʻe 1,280) mo ʻamanaki ke tokoni ki he Kāingalotu Mīsulí ke toe maʻu honau kelekelé, naʻe ongoʻi ʻe he kulupú naʻe siviʻi ʻenau tuí ʻi he fakahinohino ʻa e ʻEikí ke nau foki ki ʻapí. ʻE lava ke tokoni e lēsoni ko ʻení ke ongoʻi ʻe he kau akó ha holi lahi ange ke tauhi faivelenga ki he ʻOtuá ʻi he taimi ʻoku ʻahiʻahiʻi ai ʻenau tuí.
Ngaahi ʻEkitivitī Ako ʻOku Ala Fakahokó
Poupouʻi e teuteu ki he ngaahi aʻusia fakaakó. Ke ako lahi ange fekauʻaki mo hono tokoniʻi e kau akó ke nau teuteu ki he aʻusia fakaakó, vakai ki he ako “Fakaafeʻi e Kau Akó Ke Nau Teuteu ke Ako,” ʻoku maʻu ʻi he Fakatupulaki ʻa e Ngaahi Taukei ʻa e Faiakó: Fakaafeʻi ʻa e Ako Fakamātoató. Fakakaukau ke akoako ʻa e pōtoʻi ngāue “Faʻu ha ngaahi fakaafe ʻe tokoni ki he kau akó ke nau teuteu ki he aʻusia fakaako hokó.”
Ko e fakamuimui ʻeni ʻo ha ngaahi lēsoni ʻe tolu fekauʻaki mo e ngaahi aʻusia ʻa e ʻApitanga ʻo ʻIsilelí ʻi he uike Tokāteline mo e Ngaahi Fuakava 102–105. Kapau naʻe ʻikai ke ke akoʻi ha lēsoni ʻe taha pe fakatouʻosi ʻo e ongo lēsoni kuo ʻosí, fakakaukauʻi pe te ke fakakau fēfē ha konga ʻo e ongo lēsoni ko iá ʻi he lēsoni ko ʻení.
Ngaahi ʻahiʻahi ʻo ʻetau tuí
Fakakaukau ke vahevahe ha tūkunga hangē ko ʻení pea aleaʻi leva e ngaahi fehuʻí.
Talu e tupu ʻa Sisitā Konisālesi mo ʻene fiefia ke ngāue maʻá e ʻEikí ko ha faifekau taimi kakato. ʻI he kotoa ʻo ʻene ngāue fakafaifekaú, naʻá ne ngāue faivelenga mo falala ki he ʻEikí. Neongo e ngaahi feinga ko ʻení, ka naʻe maʻu ʻe Sisitā Konisālesi mo hono ngaahi hoá ha kakai tokosiʻi ʻaupito ke akoʻi, pea naʻe tokosiʻi ange ha niʻihi ne nau tali ʻenau fakaafe ke haʻu kia Kalaisi pea papitaisó. Ko e tokolahi taha ʻo e ngaahi kaungāmeʻa ʻo Sisitā Konisālesi ne ngāue fakafaifekaú ne hangē ne nau tokoniʻi ha kakai tokolahi ange ke nau tali e ongoongolelei ʻa e Fakamoʻuí ʻo lahi ange ʻi he meʻa naʻá ne faí.
-
Ko e hā ha ngaahi aofangatuku kovi ʻe ala ʻahiʻahiʻi ai ʻa Sisitā Konisālesi ke ne fakakaukau ki ai fekauʻaki mo ʻene ngāue fakafaifekaú?
-
Naʻe mei kehe fēfē nai ʻene aofangatukú kapau naʻá ne vakai ki heʻene ngāue fakafaifekaú ʻaki ha fakakaukau ʻoku taʻengatá?
Fakamatalaʻi ange ʻe lava ke ʻi ai ha ngaahi taimi ʻe lava ke kehekehe ai ʻa e ngaahi ola ʻo ʻetau feinga ke tokoni mo muimui ki he ʻEikí mei he meʻa naʻa tau ʻamanaki ki aí. Fakaafeʻi e kau akó ke nau vahevahe ha ngaahi sīpinga ʻo e faʻahinga tūkunga ko ʻení. ʻE lava ke kau ʻi he ngaahi sīpingá ʻa e ngaahi meʻá ni: feinga ke tauhi e ngaahi fekaú kae fakatokangaʻi ʻoku ngali lelei ange e niʻihi kehe ʻoku ʻikai muimui ki he ʻOtuá, ako maʻu pē e folofolá ka ʻoku ʻikai ke te ongoʻi ʻoku lahi ha meʻa te te maʻu, pe feinga ke moʻui ʻaki e ongoongoleleí ka ʻokú te aʻusia ha ngaahi faingataʻa hangē ko e loto-hohaʻá pe loto-mafasiá.
Fakaafeʻi e kau akó ke nau fakakaukau ki he founga kuo nau tali ʻaki pe te nau tali ʻaki e ngaahi tūkunga pehení. Poupouʻi kinautolu ke kumi ha ngaahi akonaki ʻi heʻenau akó ʻe lava ʻo tokoni kiate kinautolu ʻi he taimi ʻoku hoko ai ha ngaahi ola taʻeʻamanekina ʻi heʻenau feinga ke tokoni mo talangofua ki he ʻEikí.
Ko e ngaahi fakahinohino ʻa e ʻEikí ki he ʻApitanga ʻo ʻIsilelí
Kimuʻa pea vahevahe ʻa e fakamatala fakanounou ko ʻení, ʻoange ki he kau akó ha faingamālie ke vahevahe ha ngaahi fakaikiiki ʻoku nau manatuʻi mei he lēsoni kimuʻá fekauʻaki mo e ʻApitanga ʻo ʻIsilelí pea mo ʻenau laka mei ʻOhaiō ki Mīsulí.
Hili ʻenau laka ʻi ha meimei uike ʻe fitu mo aʻusia fakatouʻosi e ngaahi faingataʻá mo e ngaahi maná, naʻe fakaofi atu e ʻApitanga ʻo ʻIsilelí ki he Vahefonua Siakisoni, Mīsulí. Naʻe vēkeveke e kau mēmipa ʻo e ʻapitangá ke ʻiloʻi e finangalo ʻo e ʻEikí mo ʻilo e founga ʻe huhuʻi ai ʻa Saioné. Naʻe ʻuhinga hono huhuʻi ʻo Saioné, ki ha niʻihi tokolahi, ke toe maʻu ʻe he Kāingalotu Mīsulí honau ngaahi ʻapí mo e kelekelé. ʻI he ʻaho 22 ʻo Sune 1834, fakafuofua ko ha ʻaho pē ia ʻe taha mei heʻenau mavahe mei he Vahefonua Siakisoní, naʻe maʻu ai ʻe Siosefa Sāmita ʻa e fakahā ʻoku lekooti ʻi he Tokāteline mo e Ngaahi Fuakava 105.
Lau ʻa e Tokāteline mo e Ngaahi Fuakava 105:9, ʻo kumi e folofola ʻa e ʻEikí fekauʻaki mo hono huhuʻi ʻo Saioné.
-
Kapau naʻá ke hoko ko ha mēmipa ʻo e ʻApitanga ʻo ʻIsilelí, naʻá ke mei ongoʻi fēfē nai fekauʻaki mo e fakahinohino ko ʻení? Ko e hā hono ʻuhingá?
Lau ʻa e Tokāteline mo e Ngaahi Fuakava 105:10–14, 17–19, ʻo kumi e ngaahi fakaʻuhinga naʻe ʻoange ʻe he ʻEikí ki he ʻuhinga he ʻikai huhuʻi ai ʻa Saione ʻi he taimi ko iá.
-
Te ke fakamatalaʻi fakanounou fēfē nai e ngaahi akonaki ʻa e ʻEikí ʻi he veesi 19 ʻi he lea pē ʻaʻau?
Kimuʻa pea aleaʻi ʻa e fehuʻi hono hokó, fakamanatu ki he kau akó ʻa e tūkunga ʻo Sisitā Konisālesí mo e ngaahi sīpinga pē ʻanautolu ʻo e taimi ʻoku kehe ai e ngaahi ola ʻo e muimui ʻi he ʻEikí mei he meʻa ne tau ʻamanaki ki aí.
-
Ko e hā ha meʻa ʻokú ke ako mei he ngaahi veesi ko ʻení ʻe ala tokoni ʻi he taimi ʻoku ʻahiʻahiʻi ai ʻetau tuí?
ʻE lava ke vahevahe ʻe he kau akó ha ngaahi moʻoni kehekehe ʻi he lea pē ʻanautolu, kau ai ha meʻa hangē ko ʻení: Kuo teuteu ʻe he ʻOtuá ha ngaahi tāpuaki maʻongoʻonga maʻanautolu ʻoku kei loto-fakatōkilalo mo tui faivelenga kiate Ia lolotonga e ngaahi ʻahiʻahiʻi ʻo ʻenau tuí.
ʻO ka fiemaʻu, fakamatalaʻi ange ʻe lava pē ke hoko hono ʻahiʻahiʻi ʻo e tuí ko ha sivi pe te tau fili nai ke falala mo talangofua ki he ʻEikí neongo pe ko e hā e ngaahi tūkungá.
‘Oku maʻu e ngaahi tāpuakí hili e ngaahi ʻahiʻahiʻi ʻo e tuí
Fakamatalaʻi ange ʻoku lahi ha ngaahi moʻoni ʻi he folofolá te ne lava ʻo tokoniʻi kitautolu lolotonga e ngaahi ʻahiʻahiʻi ʻo ʻetau tuí. ʻE lava ke tokoni hono manatuʻi ʻo e ngaahi moʻoni ko ʻení lolotonga e ngaahi taimi faingataʻá ke tau kei tui faivelenga ai pē ki he ʻOtuá.
Fakaʻaongaʻi ha kiʻi taimi ke kumi ai ha ngaahi akonaki mei he folofolá pe kau taki ʻo e Siasí ʻe lava ʻo tokoni atu ke ke kei tui faivelenga ai pē ki he ʻOtuá ʻi he taimi ʻoku siviʻi ai hoʻo tuí. ʻE lava ke kau ʻi he ngaahi sīpingá ʻa e ʻĪsaia 55:8–9; Loma 8:28; ʻEta 12:6; Tokāteline mo e Ngaahi Fuakava 76:2–3.
Kimuʻa pea ʻeke ʻa e fehuʻi hono hokó, fakakaukau ke fakaafeʻi e kau akó ke nau hiki ʻi he palakipoé ha kupuʻi lea naʻa nau maʻu ʻoku mahuʻingamālié. Hili hono hiki ha ngaahi kupuʻi leá, tuhu ki ha ngaahi kupuʻi ʻe niʻihi, pea fakaafeʻi e kau ako naʻa nau hiki kinautolú ke fakamatalaʻi e ʻuhinga naʻe mahuʻingamālie ai kiate kinautolu ʻa e kupuʻi lea naʻa nau filí.
-
Ko e hā ha meʻa naʻá ke maʻu ʻe lava ʻo tokoni atu ke ke kei tui faivelenga ai pē ki he ʻOtuá ʻi he taimi ʻoku siviʻi pe ʻahiʻahiʻi ai hoʻo tuí?
-
Ko e hā ha ngaahi tāpuaki kuó ke maʻu pe ko ha niʻihi kehe koeʻuhí ko hoʻomou tauhi faivelenga ki he ʻOtuá lolotonga e ngaahi ʻahiʻahiʻi ʻo e tuí?
Lolotonga e fakakaukau ʻa e kau akó ki ha ngaahi aʻusiá, ʻe lava ke ke vahevahe haʻo aʻusia ʻaʻau. Te ke lava foki ʻo fakaafeʻi kinautolu ke kumi ha ngaahi sīpinga ʻo ha kakai ʻi he folofolá. ʻE lava ke kau ʻi he ngaahi sīpingá ʻa ʻĒpalahame (vakai, Sēnesi 22:1–18), Kitione (vakai, Fakamaau 6:11–16; 7:2–9, 15–21), pe ko Sīsū Kalaisi (vakai, 3 Nīfai 11:10–11).
Fakamatalaʻi ange naʻe fakatokangaʻi foki ʻe ha kau mēmipa tokolahi ʻo e ʻApitanga ʻo ʻIsilelí ha ngaahi tāpuaki maʻongoʻonga hili ʻenau kau atu ki aí.
Naʻe fakamatalaʻi ʻe Palesiteni Pilikihami ʻIongi (1801–77), ʻa ia naʻe laka mo e ʻApitanga ʻo ʻIsilelí, ha ngaahi fepōtalanoaʻaki naʻá ne fakahoko hili ʻene foki ki ʻapí:
Naʻe fehuʻi mai hoku ngaahi kaungāmeʻa tokolahi ʻi heʻeku fokí pe ko e hā ha meʻa ʻoku maʻu ʻi hono ui ha kau tangata mei heʻenau ngāué ke ō ki Mīsuli pea toe foki, taʻe te nau ikunaʻi ha meʻa ai. Naʻa nau fehuʻi ʻo pehē, “Ko hai naʻe ʻaonga ki aí? Kapau naʻe fekau ʻe he ʻEikí ke fakahoko ia, ko e hā ʻene taumuʻa ki hono fakahoko iá?” … Naʻá ku talaange ki he kau tangata ko iá naʻe totongiʻi lelei au—totongi ʻaki ha tupu lahi ʻaupito—ne fonu mahuohua ʻa e ʻilo naʻá ku maʻu ʻi heʻeku fononga mo e Palōfitá. (Brigham Young, “Discourse,” Deseret News, Dec. 3, 1862, 177)
-
Ko e hā ha ngaahi tāpuaki naʻe fakatokangaʻi ʻe Pilikihami ʻIongi kuó ne maʻu ko ha ola ʻo ʻene aʻusia ʻi he ʻApitanga ʻo ʻIsilelí?
Ke tokoni ki he kau akó ke nau sio ki ha sīpinga ʻe taha ʻo e ngaahi taumuʻa mo e ngaahi tāpuaki ʻa e ʻOtuá maʻanautolu naʻe laka faivelenga mo e ʻApitanga ʻo ʻIsilelí, vahevahe ʻa e fakamatala fakanounou ko ʻení. Pe ko hoʻo huluʻi ʻa e foʻi vitiō “Zion’s Camp” (18:44) mei he taimi 16:44 ki he 18:44. ʻOku maʻu ʻa e vitioó ni ʻi he ChurchofJesusChrist.org.
ʻI he poto haohaoa ʻa e ʻEikí, naʻe tokoni ʻa e sivi lolotonga e ʻApitanga ʻo Saioné ke teuteuʻi ha kau taki tokolahi ʻo e Siasí ki he kahaʻú. ʻI Fēpueli ʻo e 1835, naʻe fokotuʻutuʻu ai ʻe he Fakamoʻuí ʻa e Kōlomu ʻo e Kau ʻAposetolo ʻe Toko Hongofulu Mā Uá mo e Kōlomu ʻUluaki ʻo e Kau Fitungofulú ʻo fakafou ʻi he Palōfita ko Siosefa Sāmitá. Naʻe laka atu ha toko hiva ʻo e kau fuofua ʻAposetolo ko iá, kau Palesiteni kotoa ʻe toko fitu ʻo e Kau Fitungofulú, mo e kau mēmipa kotoa ʻe toko onongofulu mā tolu ʻo e Kōlomu ʻUluaki ʻo e Kau Fitungofulú mo e ʻApitanga ʻo ʻIsilelí ʻi he 1834.
Fakakaukau ki hoʻo moʻuí
ʻOange ha taimi ki he kau akó ke nau fakalaulauloto ki he meʻa kuo nau ako mo ongoʻi lolotonga ʻa e lēsoní. Ko e founga ʻe taha ke fai ai ʻení ko hono fakaafeʻi kinautolu ke tali ʻa e fehuʻi ko ʻení ʻi heʻenau tohinoa akó.
-
Ko e hā kuó ke ako pe ongoʻi he ʻahó ni ʻe lava ʻo tokoni ʻi he taimi ʻokú ke aʻusia ai hano ʻahiʻahiʻi ʻo hoʻo tuí?
Fakakaukau ke fakaafeʻi ha kau ako ʻe loto-fiemālie ke vahevahe ʻa e meʻa naʻa nau tohí. Ke fakaʻosí, fakakaukau ke ke fakamoʻoni ki he ngaahi moʻoni kuo mou aleaʻi he ʻaho ní.