“Lēsoni 120—Tokāteline mo e Ngaahi Fuakava 107:21–100: Kau Fakamoʻoni Makehe ʻo Sīsū Kalaisi,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 107:21–100,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 120: Tokāteline mo e Ngaahi Fuakava 106–108
Tokāteline mo e Ngaahi Fuakava 107:21–100
Kau Fakamoʻoni Makehe ʻo Sīsū Kalaisi
Hangē ko ia naʻá Ne fai ʻi he kuonga ʻo e Fuakava Foʻoú, kuo ui ʻe Sīsū Kalaisi ha kau palōfita, kau ʻaposetolo, mo ha niʻihi kehe ke tataki Hono Siasí he ʻahó ni pea fakamoʻoni kiate Ia ʻi he funga ʻo e māmaní. Naʻe fakamatalaʻi ʻe Sīsū ʻi he Tokāteline mo e Ngaahi Fuakava 107, ʻa e fatongia ʻo e kau taki ko ʻeni kuo filí. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-falala lahi ange ko e kau ʻAposetoló ko ha kau fakamoʻoni makehe kinautolu ʻo Sīsū Kalaisi.
Ngaahi ʻEkitivitī Ako ʻOku Ala Fakahokó
Ko e Siasi ʻo Sīsū Kalaisí
Fakakaukau ke ʻomi ha ipu ʻe ono ki he kalasí pea langa ʻaki ha kiʻi pilamita siʻisiʻi. Tuku ha ipu ʻe tolu ʻi lalo, ua ʻi lotomālie, pea taha ʻi ʻolunga. Fakahingoa e ipu taupotu ki ʻolungá ko e Kau Māʻoniʻoní pea talaange ki he kau akó ʻokú ne fakafofongaʻi ʻa e kau mēmipa ʻo e Siasi ʻo e Fakamoʻuí. Fakamatalaʻi ange naʻe fokotuʻu ʻe Sīsū Hono Siasí ʻi he Fuakava Foʻoú ʻi ha founga te ne tāpuekina ai hono kau mēmipá.
Lau ‘a e ngaahi veesi ko ʻení. Kumi e ngaahi uiuiʻi naʻe fakaʻaongaʻi ʻe he Fakamoʻuí ke puleʻi ʻaki Hono Siasí mo poupouʻi e Kāingalotu ʻi Hono kuongá.
-
Ko e hā e meʻa naʻá ke maʻú?
Lolotonga e vahevahe ʻa e kau akó, te ke lava ʻo fakahingoa ʻa e ongo ipu ʻi loto-mālié ko e Kau Fitungofulú mo e Kau Pīsopé pea ipu ʻe tolu ʻi laló ko e Sīsū Kalaisi, Kau Palōfita, mo e Kau ʻAposetoló. Fakamatalaʻi ange neongo ʻoku lau ʻa e kau ʻAposetolo kotoa pē ko e kau palōfita, kau tangata kikite, mo e kau tangata maʻu fakahā, ka ʻoku tau faʻa ui ʻa e ʻAposetolo pulé ko e palōfita.
-
Ko e hā ʻoku mahuʻinga ai ke mahino kiate kitautolu ʻoku ʻi he fakavaʻe ʻo e Siasí ʻa Sīsū Kalaisi, kau palōfitá, mo e kau ʻaposetoló? (vakai, ʻEfesō 2:20).
Tokoni ke mahino ki he kau akó, ʻi he kuonga muʻá, ko e “fuʻu maka tulikí” (ʻEfesō 2:20) ko ha fuʻu maka lahi ia naʻe fakatoka ʻi he tuliki ʻo ha fakavaʻe. Ko e tuliki mo e tuʻuʻanga ʻo e fuʻu maka kehe kotoa pē naʻe fua ia mei he fuʻu makatulikí.
-
Ko e hā ʻokú ke ʻilo fekauʻaki mo Sīsū Kalaisi ʻoku tatau mo ha fuʻu makatuliki?
Fakaafeʻi e kau akó ke nau fakakaukau ki he ngaahi tāpuaki ʻo hono maʻu e kau taki ko ʻení ʻi he Siasi ʻo e Fakamoʻuí. Mahalo ʻe fehuʻi ʻe he kau akó kiate kinautolu pe ko e hā ʻoku nau fai ke maʻu ai e ngaahi tāpuaki ʻe lava ke maʻu ʻo fakafou ʻi he ngaahi lakanga ko ʻeni kuo fokotuʻu ʻe he Fakamoʻuí.
Poupouʻi e kau akó ke fakaafeʻi e ivi tākiekina ʻo e Laumālie Māʻoniʻoní ʻi heʻenau feinga ke mahino e fatongia ʻoku fakahoko ʻe he kau taki ʻo e Siasí ʻi hono fakamālohia ʻenau fakamoʻoni kia Sīsū Kalaisí.
ʻE lava ke ke fakamatalaʻi fakanounou pe lau ʻa e puipuituʻa ko ʻeni ki he Tokāteline mo e Ngaahi Fuakava 107.
Kuo fokotuʻu ʻe Sīsū Kalaisi Hono Siasi kuo fakafoki maí fakatatau mo e fakahinohino ʻa ʻEne Tamaí, ʻi hotau kuongá ʻi he fakavaʻe tatau naʻá Ne fokotuʻu ai lolotonga ʻEne ngāue fakafaifekau ʻi he māmaní (vakai, Ngaahi Tefito ʻo e Tuí 1:6). Naʻe kamata ke fakahā ʻe he ʻEikí ʻa e faʻunga fokotuʻutuʻú ki he Palōfita ko Siosefa Sāmitá pea ʻoku hokohoko atu ke Ne fakahā ia he ʻahó ni. ʻI he 1835, naʻe uiuiʻi ʻe he Fakamoʻuí ha Kau Palesitenisī ʻUluaki, Kōlomu ʻo e Kau ʻAposetolo ʻe Toko Hongofulu Mā Uá, Kau Fitungofulú, kau pīsopé, mo ha kau ʻōfisa lakanga fakataulaʻeiki kehe ke nau tokoni ki he Kāingalotú mo puleʻi Hono Siasí ʻi he māmaní. ʻOku fakamatalaʻi ʻe he Tokāteline mo e Ngaahi Fuakava 107 ha niʻihi ʻo e ngaahi fatongia kuo foaki ʻe he Fakamoʻuí kiate kinautolu kuo ui ki he ngaahi lakanga ko ʻení.
Ngaahi fatongia ʻo e kau taki ʻa e ʻEikí kuo filí
Fakakaukau ke hiki ʻa e ngaahi uiuiʻi takitaha ko ʻení ʻi ha ʻū laʻipepa kehekehe pea fakapipiki takai kinautolu ʻi he lokí. Te ke lava ʻo vahe ki he kau akó ke nau fakataha fakakulupu ke ako ha ngaahi uiuiʻi pau, pe ko haʻo fakaʻatā kinautolu ke nau ngaʻunu ki he uiuiʻi ʻoku nau fie akó.
Fakapapauʻi ke tuku ha taimi feʻunga ki he konga fakaʻosi ʻo e lēsoní.
Ako ʻa e ngaahi potufolofola ko ʻení, ʻo kumi e founga ʻoku fakaʻaongaʻi ai ʻe Sīsū Kalaisi ʻa kinautolu ʻokú Ne fokotuʻu ʻi he ngaahi uiuiʻi ko ʻení ke poupouʻi ʻa e Kāingalotu ʻi Hono Siasí:
-
Palōfita pe Palesiteni ʻo e Siasí: Tokāteline mo e Ngaahi Fuakava 107:65–67, 91–92
-
Kau Palesitenisī ʻUluakí: Tokāteline mo e Ngaahi Fuakava 107:9, 22
-
Kau ʻAposetolo ʻe Toko Hongofulu Mā Uá: Tokāteline mo e Ngaahi Fuakava 107:23–24, 33, 35, 58
-
Kau Fitungofulú: Tokāteline mo e Ngaahi Fuakava 107:25, 34, 38
-
Kau Pīsopé: Tokāteline mo e Ngaahi Fuakava 107:13–15, 71–74
ʻI he ʻosi e ako ʻa e ngaahi kulupú, fakaafeʻi ke nau vahevahe mo e kalasí ʻa e meʻa naʻa nau akó.
-
Kuo tāpuekina fēfē koe ʻe he Fakamoʻuí ʻo fakafou ʻiate kinautolu ʻoku nau maʻu e ngaahi uiuiʻi ko ʻení?
-
Ko e hā ha ngaahi meʻa te tau lava ʻo fai ke poupouʻi ai ʻa kinautolu ʻoku nau maʻu ʻa e ngaahi uiuiʻi toputapu ko ʻení? (vakai, Tokāteline mo e Ngaahi Fuakava 107:22).
Kau Fakamoʻoni Makehe ʻo Sīsū Kalaisi
ʻI he ʻosi e fevahevaheʻaki ʻa e ngaahi kulupú, poupouʻi e kau akó ke nau fakaʻilongaʻi ʻa e ngaahi foʻi lea pe kupuʻi lea ʻi he veesi 23 ʻokú ne akoʻi ʻoku ui ʻe Sīsū Kalaisi ʻa e kau ʻAposetoló ke nau fakamoʻoni makehe kiate Ia ʻi he funga ʻo e māmaní.
-
Ko e hā ha ngaahi founga ʻoku fakamoʻoni ai ʻa e kau ʻAposetoló kia Kalaisi ʻi he funga ʻo e māmaní ʻi hotau kuongá?
Naʻe fakamatalaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ke hoko ʻa e Kau ʻAposetoló “ko ha fakamoʻoni makehe ki he huafa ʻo Kalaisí” (veesi 23).
ʻOku tatau pē e fatongia ʻo ha ʻAposetolo he ʻahó ni mo ia ʻi he kuonga muʻá (vakai, Ngāue 1:22; 4:33). Ko homau tufakangá ke ʻalu atu ki he māmaní kotoa pē pea fakahā ʻa “Sīsū Kalaisi, mo hono tutukí” (vakai, Maʻake 16:15; 1 Kolinitō 2:2). Ko e ʻAposetoló ko ha faifekau ia mo ha fakamoʻoni makehe ki he huafa ʻo Kalaisí. ʻOku ʻuhinga ʻa e “huafa ʻo Kalaisí” ki he kotoa ʻo e ngāue fakafaifekau, pekia, mo e toetuʻu ʻa e Fakamoʻuí—Hono mafaí, ʻEne tokāteliné, mo Hono ngaahi ʻulungaanga makehe ko e ʻAlo ʻo e ʻOtuá ke hoko ko hotau Huhuʻi mo hotau Fakamoʻui. ʻI heʻemau hoko ko e kau fakamoʻoni makehe ki he huafa ʻo Kalaisí, ʻoku mau fakamoʻoni ki hono moʻoni, fakalangi, mo e toetuʻu ʻa Sīsū Kalaisí, ʻEne Fakalelei taʻefakangatangata mo taʻengatá, pea mo ʻEne ongoongoleleí. (David A. Bednar, “Special Witnesses of the Name of Christ,” Religious Educator: Perspectives on the Restored Gospel, vol. 12, no. 2 [2011], 1)
-
ʻOkú ke pehē ko e hā kuo ʻomi ai ʻe Sīsū Kalaisi ha kau ʻAposetolo moʻui ko ʻEne kau fakamoʻoni makehé ʻo tānaki ki Heʻene kau fakamoʻoni ʻi he folofolá?
Fakakaukau ke mamata ʻi ha vitiō ʻo ha ʻAposetolo ʻokú ne fai ha fakamoʻoni makehe kia Sīsū Kalaisi, hangē ko e “Neil L. Andersen: Special Witness of Christ” (5:24; mamata mei he taimi 4:15 ki he 5:24). Fakaafeʻi e kau akó ke nau tokanga ki he ongo ʻoku nau maʻu ʻi heʻenau fanongo ki heʻene fakamoʻoní.
Kapau ʻe fiemaʻu ki he ʻekitivitī ko ʻení, fakakaukau ke ʻoange ki he kau akó ʻa e ngaahi lea ʻo e konifelenisi lahi fakamuimuitahá pe ngaahi fakamatala fakamuimuitaha mei he kau ʻAposetoló.
Fekumi ʻi he ngaahi lea ʻo e konifelenisi fakamuimuitahá pe ko ha ngaahi fakamatala kehe kimuí ni ʻo hangē ko ha kau ʻAposetolo ʻoku fakahoko ʻenau fakamoʻoni makehe kia Sīsū Kalaisí. ʻI hoʻo fai iá, fakakaukau ke tali ha fehuʻi ʻe taha pe lahi ange mei he ngaahi fehuʻí ni ʻi hoʻo tohinoa akó:
-
ʻOku tākiekina fēfē ʻe he kau fakamoʻoni makehe ʻo e Kau ʻAposetolo ko ʻení hoʻo ngaahi ongo kia Sīsū Kalaisí?
-
Ko e hā ha meʻa naʻe vahevahe ʻe ha ʻAposetolo fekauʻaki mo Sīsū Kalaisi ʻokú ke tui foki ʻoku moʻoni? Kuó ke ʻilo fēfē ʻa e foʻi moʻoni ko iá maʻaú?
-
Ko e hā ha ngaahi meʻa te tau lava ʻo fai ʻi he kotoa ʻo ʻetau moʻuí ke hokohoko atu ʻetau ako mei he ngaahi fakamoʻoni makehe ʻa e Kau ʻAposetoló kia Sīsū Kalaisí?
Fakaafeʻi ha kau ako ke vahevahe ʻa e meʻa ne nau akó fakataha mo ha ngaahi fakakaukau ne nau tohi.
Poupouʻi e kau akó ke hokohoko atu hono fakaʻaongaʻi e ngaahi fakamoʻoni makehe ʻa e kau ʻAposetoló kia Sīsū Kalaisí ke fakamālohia ʻenau tui kiate Iá. Hangē ko ʻení, te ke lava ʻo fokotuʻu ange ke ako ʻe he kau akó ha lea konifelenisi lahi ʻe taha ʻi he uike takitaha, muimui ʻi he kau ʻAposetoló ʻi he mītia fakasōsialé, pe tokanga taha pē ki he ngaahi fakamoʻoni mo e akonaki ʻa e kau ʻAposetoló fekauʻaki mo Sīsū Kalaisí ʻi he konifelenisi lahi ka hokó.