“Lēsoni 121—Akoako Fakataukei Fakatokāteline 8: Fakaʻaongaʻi ʻa e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Akoako Fakataukei Fakatokāteline 8,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 121: Tokāteline mo e Ngaahi Fuakava 106–108
Akoako Fakataukei Fakatokāteline 8
Fakaʻaongaʻi ʻa e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié
ʻE lava ke tokoni ʻa e fakataukei fakatokāteliné ki he kau akó ke langa ʻa e makatuʻunga maʻa ʻenau moʻuí ʻia Sīsū Kalaisi mo ʻEne ongoongoleleí. ʻE tokoni ʻa e lēsoni ko ʻení ke fakaʻaongaʻi ʻe he kau akó ʻa e ngaahi moʻoni ʻoku maʻu ʻi he ngaahi potufolofola fakataukei fakatokāteliné pea ako mo fakaʻaongaʻi ʻa e ngaahi tefitoʻi moʻoni fakalangi ki hono maʻu ʻo e ʻilo fakalaumālié.
Ngaahi ʻEkitivitī Ako ʻOku Ala Fakahokó
Toe vakaiʻi ʻo e fakataukei fakatokāteliné: Fakaʻaongaʻí
Fakakaukau ke ʻoange ha kiʻi laʻipepa siʻisiʻi ki he tokotaha ako takitaha. Fakaafeʻi e kau akó ke hiki ʻi heʻenau laʻipepá ha tūkunga faingataʻa ʻoku fehangahangai mo ha taha ʻoku nau ʻilo pea faʻo ʻenau laʻipepá ʻi ha foʻi hina. Kole ange ki he kau akó ke ʻoua naʻa hiki ai ha hingoa pe fakaikiiki ʻoku fuʻu fakataautaha.
ʻAi ke tauhoa ʻa e kau akó pea ʻai ke fili ʻe he hoa takitaha ha laʻipepa ʻe ua mei he foʻi hiná. Fakaafeʻi e ngaahi hoá ke toe vakaiʻi e ngaahi potufolofola fakataukei fakatokāteline ʻo e Tokāteline mo e Ngaahi Fuakavá ʻo fakaʻaongaʻi e lisi ʻi he Fakamatala ki he ʻElito ʻo e Fakataukei Fakatokāteliné pea aleaʻi e founga ʻe lava ke fakaʻaongaʻi ai ha ngaahi potufolofola kehekehe ki ha taha ʻo e ngaahi tūkunga ʻi heʻenau laʻipepá. Kapau ʻe fiemaʻu, ʻe lava foki ke fakaʻaongaʻi ʻe he kau akó ha ngaahi potufolofola mei he ngaahi tohi folofola kehé. Hili ha taimi feʻunga, fakaafeʻi ha ngaahi hoa ke vahevahe mo e kalasí e founga ʻoku kaunga ai e ngaahi potufolofola ne nau aleaʻí ki ha tūkunga ʻi ha taha ʻo ʻenau ʻū laʻipepá.
Kapau ʻoku fiemaʻu tokoni e kau akó ʻi ha tūkunga ʻoku ʻikai fakamatalaʻi mahino ʻe ha potufolofola fakataukei fakatokāteline, te ke lava ʻo tataki kinautolu ki ha potufolofola ʻe lava ke fakaʻaongaʻi ki ha faʻahinga tūkunga pē, hangē ko e Tokāteline mo e Ngaahi Fuakava 8:2–3 pe 2 Nīfai 32:3.
Fakapapauʻi ʻoku miniti pē ʻe 10–15 ʻa e ʻekitivitī ko ʻení kae ʻi ai ha taimi feʻunga ki hono akoako fakaʻaongaʻi ʻo e fakataukei fakatokāteliné ʻamui ange ʻi he lēsoní.
Ako mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié
ʻOku fakataumuʻa e toenga ʻo e lēsoní ki hono tokoniʻi ʻo e kau akó ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga moʻoni ʻo e moʻuí. Kapau ʻe fiemaʻu, mahalo te ke fie fakaafeʻi e kau akó ke nau toe vakaiʻi e ngaahi tefitoʻi moʻoni ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné. ʻOku fakakau atu e ngaahi ʻekitivitī fakamanatu ʻoku fokotuʻu atú ʻi he “Ngaahi ʻEkitivitī Toe Vakaiʻi ʻo e Fakataukei Fakatokāteliné” ʻi he fakamatala fakalahi ʻo e tohi lēsoni semineli ko ʻení.
Fakakaukau ke fakaʻaliʻali ha fakatātā ʻo ha finemui hangē ko ʻení. Fakaafeʻi e kalasí ke nau faʻu taimi siʻi ha ngaahi fakaikiiki ki heʻene moʻuí ʻo makatuʻunga ʻi he kāingalotu ʻo e Siasí ʻi homou feituʻú. Hangē ko ʻení, ʻe lava ke vahevahe ʻe he kau akó ʻa e tuʻunga ʻoku ʻi ai hono fāmilí, meʻa ʻokú ne saiʻia aí mo e ngaahi ongo fekauʻaki mo e Siasí.
Fakaʻaliʻali ʻa e tūkunga ko ʻení. Kole ki he kau akó ke vahevahe ha ngaahi tefitoʻi moʻoni ki hono maʻu ʻo e ʻilo fakalaumālié ʻe lava ʻo tokoni ki ha finemui ʻi he tūkunga ko ʻení pea mo hono ʻuhingá.
(Pe, ko hoʻo tuku ʻatā ʻa e ngaahi hohaʻa ʻoku laineʻi ʻi he tūkungá pea fakaafeʻi e kau akó ke fakakakato ʻa e tūkungá ʻaki hono hiki ha ngaahi fehuʻi pe hohaʻa ʻi he palakipoé ʻe lava ke maʻu ʻe he finemuí fekauʻaki mo e houʻeiki fafiné mo e lakanga fakataulaʻeikí. ʻE lava ʻe hono fakaafeʻi e kau akó ke tānaki ha fakaikiiki ki he ngaahi tūkungá ʻo fakaʻatā kinautolu ke nau fakahaaʻi lelei ha ngaahi hohaʻa fakatāutaha ʻoku felāveʻi mo ʻenau moʻuí.)
Lolotonga e teuteu ʻa ʻEnitulia ke akoʻi ʻene kalasi Finemui ʻi he ʻaho Sāpaté, naʻá ne kamata ako ʻa e Tokāteline mo e Ngaahi Fuakava 107. Hili ʻene lau e veesi 8, naʻá ne kiʻi longo pea kamata ke fifili pe ʻoku kaunga fēfē ʻa e lakanga fakataulaʻeikí ki he kau finemuí. Naʻe kamata ke ne hohaʻa mo fifili pe ʻoku falala nai ʻa e ʻOtuá ki Hono ngaahi fohá ʻo lahi ange ʻi Hono ngaahi ʻofefiné. Naʻá ne manatuʻi foki naʻá ne toki mamata ʻi ha foʻi vitiō ʻi he ʻinitanetí mo ha ngaahi fakakaukau fekauʻaki mo e tuʻunga ʻo e houʻeiki fafiné ʻi he Siasi ʻo Sīsū Kalaisí. Naʻe fakaangaʻi ʻe ha taha ʻa e Siasí ʻaki ʻene pehē ʻoku taʻofi ʻa e houʻeiki fafiné ʻi he ʻikai ke nau maʻu ha ngaahi tuʻunga ʻo e lakanga fakataulaʻeikí.
Tuku ha taimi lahi ki he kau akó ke nau aleaʻi ai e ngaahi tefitoʻi moʻoni ʻoku nau ongoʻi ʻe ala tokoni kia ʻEnituliá. Makatuʻunga ʻi heʻenau fealēleaʻakí, te ke lava ʻo fili ha ngaahi konga mei he toenga ʻo e naunau fakalēsoní ʻe lava ʻo tokoni ke mahino lelei ange kiate kinautolu ʻa e ngaahi tefitoʻi moʻoni naʻe ʻikai ke nau aleaʻí.
Ngāue ʻi he tuí
Fakakaukau ke vahevahe e kau akó ki ha fanga kiʻi kulupu iiki, fakaʻaliʻali e ngaahi fehuʻi ko ʻení, pea fakaafeʻi e kau akó ke aleaʻi ʻenau ngaahi talí mo ʻenau kulupú. ʻUnu takai holo ʻi he lokí pea fanongo ki heʻenau ngaahi fealēleaʻakí, ʻo tānaki atu ha ngaahi fakakaukau pe fakahinohino ʻo ka fiemaʻu.
-
ʻE lava fēfē ke hoko e ngaahi fehuʻi mo e hohaʻa ʻa ʻEnituliá ko ha faingamālie ke fakamālohia ai ʻene tui kia Sīsū Kalaisí mo ʻene tukupā ki Hono Siasí?
-
Ko e hā ʻe ala ʻahiʻahiʻi ai ia ʻe Sētane ke ne fai ki heʻene ngaahi fehuʻí mo e ngaahi meʻa ʻokú ne hohaʻa ki aí ʻa ia te ne lava ʻo taki ia ke mamaʻo meia Sīsuú?
-
Te ke fokotuʻu fēfē ange nai ke ne tali ʻene ngaahi fehuʻí mo e hohaʻá ʻi he tui?
Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
Fakaafeʻi ʻa e kau akó ke lau ʻa e palakalafi 8 ʻo e konga “Ko Hono Maʻu ʻo e ʻIlo Fakalaumālie” ʻi he Fakamatala ki he ʻElito ʻo e Fakataukei Fakatokāteliné, ʻo kumi ha ngaahi akonaki ʻe ala tokoni kia ʻEnitulia.
Ko e ʻekitivitī ko ʻení ko ha founga ia ʻe taha ʻe lava ke vahevahe ai ʻe he kau akó ʻa e meʻa naʻa nau maʻú. Kole ki he kau akó ke fakakakato ʻa e ʻuluaki sitepu ʻi laló. Tatali kae ʻoua kuo nau fakakakato ʻa e sitepu takitaha kimuʻa pea toki kole ange ke nau fakakakato ʻa e sitepu hokó.
-
Lekooti ʻi hoʻo tohinoa akó ha foʻi moʻoni ʻe taha mei he palakalafi 8 ʻokú ke pehē ʻe lava ʻo tokoni kia ʻEnitulia mo hono ʻuhingá.
-
ʻUnu takai holo ʻi he lokí, pea feinga ke kumi ha tokotaha ako ʻe taha naʻá ne fili ʻa e moʻoni tatau naʻá ke filí. Aleaʻi mo e niʻihi kehé ʻa e founga ʻe lava ke tokoni ai kia ʻEnituliá.
-
Tānaki ki hoʻo peesi tohinoá ha ngaahi fakakaukau mahuʻingamālie naʻe vahevahe ʻe he tokotaha ako ʻe tahá mo koe.
-
Toe ʻunu takai holo ʻi he lokí, pea kumi ha tokotaha ako ʻe taha naʻá ne fili ha foʻi moʻoni kehe mei he moʻoni naʻá ke filí. Fevahevaheʻaki ʻa e ngaahi fakakaukau mei hoʻo tohinoá.
Ka hili ʻa e ʻekitivitī fevahevaheʻaki kimuʻá, ʻe ala tokoni ha niʻihi ʻo e ngaahi fehuʻi ko ʻení ke faʻu ha fealēleaʻaki fakakalasi ʻe iku ki ha ngaahi fakakaukau lahi ange.
-
Tau pehē ʻoku ʻikai lava ʻa ʻEnitulia ʻo maʻu ha tali mahino ki he ʻuhinga ʻoku ʻikai maʻu ai ʻe he houʻeiki fafiné ha ngaahi tuʻunga ʻo e lakanga fakataulaʻeikí. Ko e hā ʻokú ke ʻilo fekauʻaki mo e palani ʻa e Tamai Hēvaní mo e ongo ʻokú Ne maʻu ki Hono ngaahi ʻofefiné te ke fiemaʻu ke ne manatuʻí?
-
Ko e fē ngaahi potufolofola fakataukei fakatokāteline mei he Tokāteline mo e Ngaahi Fuakavá (pe ngaahi tohi folofola kehé) ʻe lava ʻo tokoni ke fakamanatu kia ʻEnitulia ʻa e palani mo e ngaahi ongo ʻa e ʻOtuá maʻaná?
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
Fakakaukau ke fakaafeʻi e kau akó ke aleaʻi e ngaahi fakakaukau ko ʻení mo hanau hoa. Fakaafeʻi leva ha niʻihi ʻe loto-fiemālie ke vahevahe mo e kalasí ʻa e meʻa naʻa nau aleaʻí.
-
ʻOku mahuʻinga ʻa e ngaahi maʻuʻanga tokoni ʻoku fakaʻaongaʻi ʻe ʻEnitulia ke kumi fakamatala aí koeʻuhí …
-
Te u faleʻi ʻa ʻEnitulia ke kumi ha ngaahi tali ʻaki ʻene ʻalu ki he … pea ʻoua naʻa ʻalu ki he … ke kumi ha tali
ʻE lava ke kumi mo vahevahe ʻe he ngaahi hoá ha ngaahi sīpinga mei he folofolá, hisitōlia ʻo e Siasí, pe moʻui ʻa ha houʻeiki fafine ʻi hotau kuongá ni ʻokú ne fakahaaʻi e ʻofa mo e falala ʻa e Tamai Hēvaní ki Hono ngaahi ʻofefine faivelengá.
ʻE lava foki ke kumi mo vahevahe ʻe he ngaahi hoá ʻa e ngaahi fakamatala mei he kau taki ʻo e Siasí ʻi onopōní ʻe lava ʻo tokoni kia ʻEnitulia. Kapau ʻe fiemaʻu, te ke lava ʻo fokotuʻu ange ha ngaahi maʻuʻanga tokoni hangē ko ʻení:
-
Lea konifelenisi lahi hangē ko e “Ngaahi Koloa Fakalaumālie” (Russell M. Nelson, Liahona, Nōvema 2019, 76–79)
-
Ngaahi Akonaki ʻa e Kau Palesitenisī Lahi ʻo e Fineʻofá hangē koe “Relief Society General Presidency Addresses Four Key Questions about Women and the Priesthood” (Aubrey Eyre, Church News, May 2, 2019, thechurchnews.com)
-
Ngaahi konga mei he Tohi Tuʻutuʻuni Fakakātoa ʻa e Siasí hangē ko e “Ngaahi Tefitoʻi Moʻoni ʻo e Lakanga Fakataulaʻeikí” (vahe 3 ʻi he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ChurchofJesusChrist.org)
Fakaʻosí
ʻE lava ke ke fakaʻosi e kalasí ʻaki hono fakaafeʻi e kau akó ke nau tali ʻi he faʻa lotu ha taha ʻo e ongo fehuʻi ko ʻení ʻi heʻenau tohinoa akó:
-
Ko e hā ʻokú ke ongoʻi ʻe finangalo ʻa e Tamai Hēvaní ke ke fai ki hoʻo ngaahi fehuʻí pe hohaʻá?
-
ʻE liliu fēfē nai ho vā fetuʻutaki mo e Tamai Hēvaní mo Sīsū Kalaisí ʻi he taimi ʻoku hoko ai ha ngaahi fehuʻi pe hohaʻá ʻi hoʻo fili ke muimui ki he ngaahi tefitoʻi moʻoni ʻo hono maʻu ʻo e ʻilo fakalaumālié?