“Lēsoni 119—Tokāteline mo e Ngaahi Fuakava 107:1–20: ‘Ko e Lakanga Fakataulaʻeiki Māʻoniʻoní,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 107:1–20,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 119: Tokāteline mo e Ngaahi Fuakava 106–108
Tokāteline mo e Ngaahi Fuakava 107:1–20
“Ko e Lakanga Fakataulaʻeiki Māʻoniʻoní”
ʻI he fahaʻitaʻu failau ʻo e 1835, naʻe teu ke mavahe ai ʻa e kau mēmipa ʻo e Kōlomu foʻou naʻe toki fokotuʻu ʻo e kau ʻAposetolo ʻe Toko Hongofulu Mā Uá ʻi heʻenau fuofua ngāue fakafaifekaú. Naʻe ʻomai ʻe he fakahā ko ʻeni mei he ʻEikí ha ngaahi fakaikiiki ke tokoniʻi kinautolu mo ha niʻihi kehe ke nau fakahoko honau ngaahi fatongia lakanga fakataulaʻeikí. ʻE lava ke tokoni ‘a e lēsoni ko ʻení ke mahino ki he kau akó ʻa e mahuʻinga ʻo hono maʻu e mālohi ʻo e Fakamoʻuí mo Hono mafai ʻo e lakanga fakataulaʻeikí ʻi heʻenau ngāue ʻi Hono Siasí.
Ngaahi ʻEkitivitī Ako ʻOku Ala Fakahokó
Ngaahi Fakalahí
Kamata ʻa e kalasí ʻaki hano fakaafeʻi ha tokotaha ako ke ne tā ha fuʻu ʻakau mo ha ngaahi vaʻa ʻi he palakipoé. Fakaafeʻi ʻa e kalasí ke nau feinga ke ʻiloʻi pe ko e fē ʻi he ngaahi konga ʻo e fuʻu ʻakaú ko ha ngaahi konga pē (ʻū vaʻá mo e laú). Fakaafeʻi ʻa e tokotaha ako naʻá ne tā ʻa e fuʻu ʻakaú ke ne toʻo ha taha ʻo e ngaahi kongá ʻaki haʻane tāmateʻi ʻa e feituʻu ʻoku fehokotaki ai ʻa e vaʻá mo e sinoʻi ʻakaú. Kole ki he kalasí ke nau aleaʻi e ngaahi fehuʻi ko ʻení ke teuteuʻi kinautolu ke mahino e ʻuhinga ʻoku fiemaʻu ai ke tau kei fetuʻutaki maʻu pē mo e Fakamoʻuí mo Hono lakanga fakataulaʻeikí:
-
Ko e hā ha meʻa ʻoku hoko ki ha konga ʻi he taimi ʻoku motuhi ai mei he fuʻu ʻakaú? Ko e hā hono ʻuhingá?
Lau ʻa e Sione 15:5, ʻo kumi ʻa e meʻa naʻe akoʻi ʻe he Fakamoʻuí ʻoku fekauʻaki mo e lēsoni fakataumuʻa ko ʻení.
-
Ko e hā naʻá ke ʻiló?
-
Ko e hā ʻoku mahuʻinga ai ʻetau fetuʻutaki mo e Fakamoʻuí ʻi heʻetau feinga ke ngāue ʻi Hono Siasí?
ʻOange ha taimi ki he kau akó ke nau fakakaukau ai ki heʻenau fehokotaki mo Sīsū Kalaisí. Fakaafeʻi ke nau fekumi ki ha ueʻi fakalaumālie ʻi heʻenau fakakaukau ki ha founga he ʻikai ngata pē ʻi hono tāpuekina fakataautaha kinautolu ʻe he fehokotaki ko ʻení ka te ne to e fakaivia kinautolu ke tāpuekina ha niʻihi kehe ʻo fou ʻi he ngaahi uiuiʻi faka-Siasí mo e ngāue fakaetauhí.
Ngaahi fakalahi ki he lakanga fakataulaʻeikí
Vahevahe ʻa e fakamatala ko ʻení ʻi hoʻo lea pē ʻaʻau, ke tokoni ke mahino ki he kau akó ʻa e puipuituʻa ʻo e vahe 107:
ʻI he ʻaho 28 ʻo Māʻasi 1835, naʻe teuteu ai e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Ua ne toki fokotuʻú ke ngāue fakafaifekau ki he fakahahake ʻo e ʻIunaiteti Siteití. Naʻe ʻikai fakapapauʻi ʻe ha kau ʻAposetolo ʻe niʻihi ʻa e founga ke ngāue ai ʻi honau ngaahi uiuiʻi foʻoú. Naʻe fakahā ʻe he ʻEikí ʻa e Tokāteline mo e Ngaahi Fuakava 107 ke fakahinohinoʻi kinautolu fekauʻaki mo e lakanga fakataulaʻeikí mo poupouʻi kinautolu ʻi heʻenau ngāué.
Lau ʻa e Tokāteline mo e Ngaahi Fuakava 107:1–4, ʻo kumi ʻa e meʻa naʻe akoʻi ʻe he ʻEikí fekauʻaki mo e lakanga fakataulaʻeikí.
-
Ko e hā ha meʻa naʻá ke ako fekauʻaki mo e Lakanga Taulaʻeiki Faka-Melekisētekí?
Fakafehoanaki ʻa e hingoa ʻo e lakanga fakataulaʻeikí ʻoku maʻu ʻi he veesi 3 mo e meʻa naʻe akoʻi ʻe palesiteni Palesiteni Tietā F. ʻUkitofa, ʻi heʻene kei ʻi he Kau Palesitenisī ʻUluakí::
ʻOku mei a Kalaisi ʻa e mafai mo e mālohi kotoa ʻo e lakanga fakataulaʻeiki moʻoní he māmaní. Ko ʻEne ngāue, pea ko hotau faingamālie ke tokoni. (Dieter F. Uchtdorf, “Ko e Fiefia ʻo e Lakanga Fakataulaʻeikí,” Liahona, Nōvema 2012, 59)
-
Ko e hā ʻokú ke ongoʻi ai ʻoku mahuʻinga ke mahino ʻoku maʻu fakahangatonu ʻa e mālohi kotoa ʻo e lakanga fakataulaʻeikí mei a Sīsū Kalaisí?
Kimuʻa pea lau ʻa e ngaahi veesi ko ʻení, fakaafeʻi ʻa e kau akó ke nau fakamanatu ʻenau aleaʻi ʻo e ngaahi kongá. Tā ha fuʻu ʻakau ʻe taha ʻi he palakipoé, pea fakahingoa ia ko e Siasi ʻo Sīsū Kalaisí. Hiki leva ʻeni ʻi he palakipoé: Lakanga Taulaʻeiki Faka-Melekisēteki, Lakanga Taulaʻeiki Faka-ʻĒlone, Fineʻofa, Kau Finemui, Lautohi Faka-Sāpate, Palaimeli.
Lau mo ha hoa ngāue ʻa e Tokāteline mo e Ngaahi Fuakava 107:5, 13–14, ʻo kumi pe ko e ngaahi foʻi lea fē ʻi he palakipoé te ke lava ʻo fakafehoanaki ki he sino ʻo e fuʻu ʻakaú pea mo e ngaahi lea te ke lava ʻo fakafehoanaki ki he ngaahi fakalahí.
-
Fakatatau ki he meʻa naʻá ke laú, ko e hā te ke lava ʻo fakafehoanaki ki he sinoʻi ʻakaú? Ko e hā ʻa e ngaahi kongá?
ʻI hono tali ʻe he kau akó ʻa e ongo fehuʻi kimuʻá, fakakaukau ke fakahingoa ʻa e sinoʻi ʻakaú ko e Lakanga Taulaʻeiki Faka-Melekisēteki mo e ngaahi kongá (pe ngaahi vaʻá) ko e Lakanga Taulaʻeiki Faka-ʻĒlone pea mo e ngaahi houalotu ʻo e Siasí ʻoku hiki ʻi he palakipoé.
Fakaafeʻi ʻa e kau akó ke nau fakaʻilongaʻi ʻa e foʻi moʻoni ʻi he veesi 5, ko e ngaahi mafai mo e ngaahi tuʻunga kotoa ʻi he Siasi ʻo e Fakamoʻuí ko e [ngaahi konga] ia ʻo e Lakanga Taulaʻeiki Faka-Melekisētekí.
-
Ko e hā te tau lava ʻo ako mei hono fakafehoanaki ʻe he ʻEikí ʻa e Lakanga Taulaʻeiki Faka-ʻĒloné mo e ngaahi houalotu ʻo e Siasí ki he “ngaahi konga” ʻo Hono Lakanga Taulaʻeiki Faka-Melekisētekí?
Fakaʻaongaʻi ʻa e ngaahi lea ʻa e kau palōfitá ke fakamamafaʻi ʻa e tokāteliné mo e ngaahi tefitoʻi moʻoní: Ko ha sīpinga ʻeni ʻo hono fakaʻaongaʻi ʻo e ngaahi lea fakaepalōfitá ke fakaloloto e mahino ʻa e kau akó ki he tokāteliné. Ki hano ako fakahoko lahi ange ʻeni, vakai ki he ako, “Faiako mei he ngaahi folofolá mo e ngaahi lea ʻa e kau palōfita ʻo e ngaahi ʻaho ki mui ní” ʻoku maʻu ʻi he Fakatupulaki ʻa e Ngaahi Taukei ʻa e Faiakó. Fakakaukau ke ako fakahoko ʻa e pōtoʻi ngāue, “Teuteuʻi ha ngaahi fakaafe ʻe tokoni ki he kau akó ke fakafehokotaki ʻa e ngaahi moʻoni ʻoku maʻu ʻi he folofolá ki he meʻa ʻoku lea ʻaki ʻe he kau palōfita moʻuí.”
Naʻe vahevahe ʻe Palesiteni Tāleni H. ʻOakesi ʻo e Kau Palesitenisī ʻUluakí ʻa e meʻá ni fekauʻaki mo e mafai ʻo e lakanga fakataulaʻeikí ʻi he ngaahi uiuiʻi faka-Siasí:
Ko e meʻatēpuú, ko e ngaahi kī kotoa ʻo e lakanga fakataulaʻeikí ʻoku maʻu ia ʻe he ʻEiki ko Sīsū Kalaisí, ʻa ia ʻoku ʻOʻona ʻa e lakanga fakataulaʻeikí. Ko Ia ʻa e tokotaha ʻokú Ne fakafuofuaʻi pe ko e hā ʻa e ngaahi kī ʻoku foaki ki he kakai fakamatelié mo e founga hono ngāue ʻaki ʻa e ngaahi kī ko iá. …
… Koeʻuhí ʻoku pehē ʻe he folofolá “ko e ngaahi mafai [mo e] ngaahi lakanga kehe kotoa pē ʻi he siasí ko e ngaahi konga pē ia ʻo e lakanga taulaʻeiki [Faka-Melekisētekí] ko ʻení” (T&F 107:5), ko ia ko e meʻa kotoa ʻoku fai ʻi he malumalu ʻo e tataki ʻa e ngaahi kī ʻo e lakanga fakataulaʻeiki ko iá, ʻoku fakahoko ʻaki ʻa e mafai ʻo e lakanga fakataulaʻeikí. (Dallin H. Oaks, “Ko e Ngaahi Kī mo e Mafai ʻo e Lakanga Fakataulaʻeikí,” Liahona, Mē 2014, 50)
Fakamanatu ki he kau akó ko Sīsū Kalaisi ʻa e maʻuʻanga ʻo e mālohi kotoa ʻo e lakanga fakataulaʻeikí (vakai, Tokāteline mo e Ngaahi Fuakava 107:3). Fakakaukau ke tohiʻi ʻa e Mālohi ʻo e Fakamoʻuí ʻi he tafaʻaki ʻo e Lakanga Taulaʻeiki Faka-Melekisētekí ʻi he sino ʻo e fuʻu ʻakaú.
-
ʻE ala tokoniʻi fēfē atu ʻa e mahino ʻoku fehokotaki ʻa e uiuiʻi kotoa pē ʻi he Siasí ki he mālohi ʻo e Fakamoʻuí ke ke tokoniʻi lelei ange ai ʻa kinautolu ʻoku mou feohí?
-
Ko e fē ha taimi kuó ke ongoʻi ai e mālohi ʻo e Fakamoʻuí ʻokú ne tokoniʻi koe ʻi hoʻo ngāue ʻi he Siasí?
Ko hono aʻusia e mālohi ʻo e lakanga fakataulaʻeikí
Fakaafeʻi ʻa e kau akó ke nau lau ʻa e ngaahi potu-folofola ko ʻení pea aleaʻi ʻa e fehuʻi ʻe tolu ʻi laló mo hanau hoa. Mahalo te ke fie fakaʻaliʻali e ngaahi fehuʻí ke vakai ki ai ʻa e kau akó.
Lau ʻa e Tokāteline mo e Ngaahi Fuakava 107:8, 18–20, ʻo kumi ʻa e ngaahi founga ʻoku ʻomai ai ʻe he Fakamoʻuí ʻa e mālohí ʻo fakafou ʻi Hono lakanga fakataulaʻeikí kiate kinautolu ʻoku ngāue ʻi he Siasí.
Ko e Tokāteline mo e Ngaahi Fuakava 107:8 ko ha potu-folofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potu-folofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.
-
Ko e hā ha ngaahi “meʻa fakalaumālie” (veesi 8) ʻoku tāpuekina ʻaki kitautolu ʻe he ʻEikí ʻo fakafou ʻi Hono Lakanga Taulaʻeiki Faka-Melekisētekí?
Tokoni ke mahino ki he kau akó ko e fakahoko ʻo e “ngaahi meʻa fakalaumālié” ʻoku kau ai hono fakahoko ʻo e ngaahi tāpuakí, ngaahi ouaú mo e ngaahi fuakavá.
-
ʻOku tokoni fēfē ʻa e “ngaahi ouau fakatuʻasino” ʻo e lakanga Taulaʻeiki Faka-ʻĒloné (hangē ko e papitaisó mo e sākalamēnití) ʻoku lave ki ai ʻi he veesi 20 ke fakafehokotaki koe kia Sīsū Kalaisi?
-
Ko e fē ha taimi kuo hoko ai ha fehokotaki ʻa ha niʻihi kehe mo e Fakamoʻuí, ʻi haʻanau fua fatongia, ko ha tāpuaki ki hoʻo moʻuí?
Fakakaukau ke vahevahe ha sīpinga ʻo ha taha naʻe tāpuekina ʻi ha taimi naʻe ngāue ai ha niʻihi kehe ʻi ha founga naʻá ne fakafehokotaki kinautolu mo e mālohi ʻo e Fakamoʻuí. ʻOku hā ha sīpinga ʻe taha ʻi he foʻi vitiō “The Tender Mercies of the Lord” mei he kouti 6:55 ki he 8:53, ʻoku ʻi he ChurchofJesusChrist.org. ʻI he lea ko ʻení, naʻe vahevahe ai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ha talanoa ki ha taki lakanga fakataulaʻeiki naʻe tataki ʻe he ʻOtuá ʻi heʻene ngāue fakaetauhi ki he toʻu tupu ʻi hono siteikí.
Fakaʻaongaʻi fakatāutahá
Naʻe akoʻi ʻe Sisitā Poni L. ʻOsikasoni, ko e Palesiteni Lahi mālōlō ʻo e Kau Finemuí, ʻa e founga ʻe lava ai ʻe he mafai ʻo e lakanga fakataulaʻeikí ʻo fakamālohia e kau finemuí ʻi honau ngaahi uiuiʻí. Kumi ʻa e founga ʻe lava ke ʻaonga ai ʻene fakamatalá ki he toʻu tupu kotoa pē ʻi heʻenau fua fatongiá.
ʻOku fiemaʻu ke ʻilo ʻe he Kau Finemui ʻo e Siasí ʻoku mahuʻinga ʻenau kau mai ki he ngāue ʻo e fakamoʻui ʻoku tataki ʻe he lakanga fakataulaʻeikí, kae ʻoua ʻe matavaʻinga pē pe kau poupou. ʻOku ʻi ai hamou ngaahi uiuiʻi, pea ʻoku vaheʻi kimoutolu ʻe ha niʻihi ʻoku nau maʻu ʻa e ngaahi kī ʻo e lakanga fakataulaʻeikí ke hoko ko ha kau taki ʻoku nau maʻu ʻa e mālohi mo e mafai ʻi he ngāue ko ʻení. ʻI hoʻo fua totonu ko ia ho ngaahi uiuiʻi ʻi he kau palesitenisī fakakalasí mo mateuteu fakalaumālie, fealēleaʻaki fakataha, tokoni ki he kau mēmipa hoʻo kalasí mo feakoʻiʻaki ʻa e ongoongoleleí, ko hoʻo fai ia ho fatongia totonú ʻi he ngāué ni pea ʻe tāpuekina fakatouʻosi koe mo ho kaungā-ngāué. (Bonnie L. Oscarson, “Kau Fefine ʻo Saione, Tuʻu Hake ʻi he Mālohi,” Liahona, Nōvema 2016, 14)
-
Ko e hā ha meʻa naʻe makehe kiate koe mei he fakamatala ko ʻení? Ko e hā hono ʻuhingá?
Fakaafeʻi e kau akó ke nau tali ʻa e fehuʻi ko ʻení ʻi heʻenau tohinoa akó. ʻE lava ke ke kole ki ha kau ako ʻe loto-fiemālie, ke vahevahe ʻenau ngaahi talí.
-
Ko e hā naʻá ke ako he ʻahó ni fekauʻaki mo e mahuʻinga ʻo hono fakaʻaongaʻi e mālohi ʻo e Fakamoʻuí mo Hono mafai lakanga fakataulaʻeikí ʻi hoʻo ngāue ʻi he Siasí?
Ako Ma‘uloto
Te ke ala tokoni tokoni ki he kau akó ke nau ako maʻuloto ʻa e fakamoʻoni folofola ki he fakataukei fakatokāteliné mo e kupuʻi lea mahuʻinga ʻo e potu-folofolá, lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea folofola mahuʻingá ko e “ʻOku maʻu ʻe he Lakanga Taulaʻeiki Faka-Melekisētekí … ʻa e mālohi mo e mafai … ke fakahoko ʻa e ngaahi meʻa fakalaumālié.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he nāunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”