Leksiyon 122: Doktrina ug mga Pakigsaad 109–110

Doktrina ug mga Pakigsaad 109

Ang Templo sa Ginoo: Usa ka Balay sa Himaya ug Gahom

Hapit tulo ka tuig nga nagtukod ang mga Santos sa Templo sa Kirtland, ang unang templo nga natukod niini nga dispensasyon. Ang Doktrina ug mga Pakigsaad 109 mao ang pag-ampo sa pagpahinungod nga gipadayag sa Ginoo kang Propeta Joseph Smith. Kini nga pag-ampo naglangkob og mga panalangin nga atong madawat karon. Kini nga leksiyon makatabang sa mga estudyante nga mas tinguhaon ang pagtambong sa templo ug pagdawat sa gisaad nga mga panalangin sa Ginoo.

Mga Posibleng Kalihokan sa Pagkat-on

Pagbati bahin sa templo

Ikonsiderar ang pagpakitag mga imahe sa lainlaing mga templo. Pwede nimong pangutan-on kadali ang mga estudyante og pipila ka kamatuoran bahin sa templo, sama sa kon pila ka templo ang kasamtangan naglihok karon, pila ang gipahibalo sa miaging kinatibuk-ang komperensiya, unsang templo ang kinadul-an sa imong lokasyon, ug uban pa.

• Ngano kaha ang ubang mga tawo mibati nga naghinamhinam mahitungod sa pagtambong sa templo? Ngano kaha nga wala naghinamhinam ang uban?

  Ipakita ang mosunod nga mga pamahayag ug dasiga ang mga estudyante nga pamalandongan kon unsa sila ka uyon sa kada pahayag. Isip alternatibo, pwede pod nimong dapiton ang mga estudyante sa pagrekord diha sa ilang mga journal sa pagtuon kon unsay ilang kaugalingong pagbati bahin sa pagtambong sa templo.

• Ang templo mao ang balay sa Dios.

• Importante para nako ang pagpangandam o pagtambong sa templo.

• Nagtuo ko nga hatagan ko sa Dios og makahuloganong mga panalangin tungod sa pagpaningkamot nga mahimong takos nga motambong sa Iyang balay.

Pamalandonga ang bisan unsang pangutana o kabalaka nga naa ka bahin sa pagpangandam ug pagtambong sa templo. Samtang magtuon ka karon, pwede kang moampo sa Langitnong Amahan nga tabangan kang mas modako ang imong tinguha sa pagtambong sa Iyang balaang templo.

Ang Templo sa Kirtland

Pagpakitag litrato sa Templo sa Kirtland, sama sa naa sa sinugdanan sa leksiyon. Ipakigbahin kadiyot ang pipila ka makasaysayanon nga impormasyon bahin niini nga templo sa kaugalingon nimong mga pulong o dapita ang duha ka estudyante sa pagbasa sa mosunod nga mga parapo.

Tunga-tunga sa Hunyo 1833 ug Marso 1836, ang mga miyembro sa Simbahan misakripisyo og panahon, kwarta, ug mga kabtangan aron sa pagtukod sa unang templo niini nga dispensasyon. Ang mga lalaki naghatag og hanas nga paghago aron sa pagtukod sa bilding, samtang ang mga babaye ang naghimog mga sinina ug nag-atiman sa kapuy-an sa mga trabahante. Pipila sa mga Santos sa Ulahing mga Adlaw ang mihatag og dako sa ilang kabtangan sa pagtukod sa templo. Ang gibanabana nga nagasto sa templo mikabat og mga 60,000 sa Estados Unidos nga dolyar—dako kaayo nga kantidad nianang panahona, ilabina sa kapobrehon sa mga Santos.

Ang Templo sa Kirtland gipahinungod niadtong Marso 27, 1836. Daghan sa mga Santos sa Ulahing mga Adlaw nga mitambong sa mga seremonya ug mga kalihokan nga konektado sa pagpahinungod nakasinati og dagkong espirituwal nga mga pagpadayag. Apil niini ang pagkadungog og kusog nga dahunog sa hangin, pagsulti og mga pinulongan, pagkakitag mga panan-awon, ug pagsaksi sa pagbisita sa mga anghel.

Ang Doktrina ug mga Pakigsaad 109 mao ang pag-ampo sa pagpahinungod nga gipadayag sa Ginoo kang Propeta Joseph Smith. Kini nga pag-ampo gibasa og kusog panahon sa mga serbisyo sa pagpahinungod. Nagpadayon pa gihapon kini nga sumbanan sa atong panahon, uban sa dinasig nga pag-ampo sa pagpahinungod nga basahon atol sa matag sesyon sa pagpahinungod sa templo.

Ikonsiderar ang pagpangutana kon nakatambong na ba ang mga estudyante og pagpahinungod sa templo. Kon nakatambong na sila, pwedeng ipakigbahin sa usa ka estudyante kon unsay iyang nahinumdoman bahin sa pag-ampo sa pagpahinungod.

Basaha ang Doktrina ug mga Pakigsaad 109:1–4, nga mangita kon sa unsang paagi nagsugod kini nga pag-ampo sa pagpahinungod.

• Unsa ang makahuloganon kanimo niini nga mga bersikulo?

Samtang magpakigbahin ang mga estudyante, pwede kang magsukna og pipila ka follow-up nga mga pangutana nga sama sa “Unsay gipakita niini nga mga bersikulo bahin sa Ginoo?” o “Unsay mipatigbabaw kanimo bahin sa mga kinaiya sa mga Santos?” (pananglitan, tan-awa sa mga bersikulo 1 ug 4).

Mga katuyoan ug panalangin sa templo

Seguroa nga adunay igong panahon ang mga estudyante para sa mosunod nga kalihokan sa pagkat-on. Pwede nimong isulat ang mga pulong nga Mga Katuyoan ug Mga Panalangin diha sa pisara.

Pwedeng magparespares ang mga estudyante aron himoon ang mosunod ug markahan ang ilang makita.

Basaha ang Doktrina ug mga Pakigsaad 109:5, 11–16, 20–24, nga mangita sa pipila ka mga katuyoan sa Ginoo sa pagtukod sa Iyang templo ug sa gisaad nga panalangin sa pagbuhat niana.

Human ang igong panahon, dapita ang mga estudyante nga hisgotan uban sa ilang mga kapares kon hain sa mga katuyoan ug panalangin ang labing importante para nila ug kon ngano.

Dapita ang matag pares nga maghimog pamahayag sa kamatuoran base sa usa sa mga makahuloganong panglantaw nga ilang nakaplagan. (O, depende sa gidaghanon sa mga estudyante, pwede nimong dapiton ang matag estudyante nga magpakigbahin.) Ikonsiderar ang paghatag og gamayng papel aron sulatanan sa mga estudyante sa ilang pamahayag ug ipakita kini sa pisara. Pwede dayon nga ipakigbahin sa mga estudyante ang ilang pamahayag, ang gibasehang bersikulo o mga bersikulo, ug kon nganong importante kini para nila.

Pwedeng ipakigbahin sa mga estudyante ang mga kamatuoran nga sama sa mosunod:

• Sa templo, pwedeng ipakita sa Ginoo ang iyang kaugalingon kanato. (mga bersikulo 5, 12–13) (Timan-i: Tabangi ang mga estudyante nga masabtan nga daghang paagi nga ipakita sa Ginoo ang Iyang kaugalingon. Hisgotan kini sa sunod nga leksiyon.)

• Sa templo, pwede tang hatagan sa Ginoo sa Iyang gahom, proteksiyon, ug tabang. (mga bersikulo 13, 22)

• Ang templo maoy usa ka dapit sa pagkat-on. (mga bersikulo 14–15)

• Ang pagsimba sa templo makatabang natong makapangandam sa pagserbisyo sa Ginoo ug sa pagsangyaw sa Iyang pulong. (mga bersikulo 22–23)

• Unsay atong makat-onan bahin sa Langitnong Amahan ug kang Jesukristo pinaagi niini nga mga kamatuoran? Nganong bililhon kini para nimo?

Ikonsiderar ang pagdapit sa pipila ka estudyante nga basahon ang mosunod nga mga pamahayag gikan sa kabatan-onan bahin sa ilang mga kasinatian sa templo. Dapita ang mga estudyante nga mangita og mga ehemplo sa mga panalangin nga nalista sa ibabaw apil ang dugang mga panalangin.

Mga makapadasig lang nga mga butang ang sulod sa akong hunahuna diha sa templo. Nindot kaayo sa paminaw nga hunahunaon ang mga butang nga imong mahimo aron tabangan ang uban. [Chloé D.] …

… Nakatabang nako ang regular nga pagbisita sa templo aron kanunay nga mabati ang Espiritu. Mas nakapasuod kadto sa akong mga higala. Usab, daghan pod sa among mga klasmeyt ang mangutana bahin sa atong pag-adto sa templo. …

… Usa ka higala … ang nakadawat sa iyang unang rekomend nga adunay limitasyon ang paggamit, ug nindot kaayong makita ang positibong epekto niini sa iyang kinabuhi. [Annalise K.] …

… Bisag ang pagsulod pa lang [sa templo], paminaw nako nawala na ang tanan nakong problema sa eskwelahan ug sa uban pa. Mobati kog kalinaw kon naa ko sa templo. Malipay kaayo ko. Ang pag-adto sa templo nakatabang nako nga makatutok kon unsay angay nakong himoon sa simbahan ug sa ubang mga katungdanan. Nindot kaayo nga makaadto ug makabuhi gikan sa tanan nakong problema. [Kole E.] (“Youth Voices: Attending the Temple,” New Era, Apr. 2013, 5–7)

Pagtambong sa balaang templo sa Ginoo

Ikonsiderar ang pagpasalida sa bidyo nga “The Blessings of the Temple” (3:37) o “Strength beyond My Own” (3:47). Dapita ang mga estudyante sa pagpamalandong sa mga panalangin nga ilang gibati sa pagpangandam o pagsulod sa templo. Ang usa ka opsiyon mao ang pagkanta sa “Ang Espiritu sa Dios” (Mga Himno, num. 2), nga gisulat para sa pagpahinungod sa Templo sa Kirtland, o uban pang himno nga bahin sa templo.

Si Presidente Russell M. Nelson mipamatuod:

[Ang templo] mao ang Iyang balay. Kini puno sa Iyang gahom. Dili nato kalimtan kon unsa ang gibuhat sa Ginoo alang kanato karon. … Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo. (Russell M. Nelson, “Magpunting sa Templo,” Liahona, Nob. 2022, 121)

• Kanus-a ikaw o ang imong suod nga kaila nakasinati og mga panalangin sa templo?

Dapita ang mga estudyante nga hinumdoman ang ilang mga tubag gikan sa sinugdanan sa leksiyon kon nganong wala mobati nga naghinamhinam ang uban sa pagtambong sa templo.

• Unsay imong nakat-onan o nabati nga makatabang tingali sa uban nga atubangon ang ilang mga kabalaka o magdasig nila nga mausab ang ilang pagbati bahin sa templo?

• Sa unsang paagi naimpluwensiyahan karon ang imong pagbati bahin sa Ginoo ug sa Iyang balaang templo?

Ikonsiderar ang pagdapit sa mga estudyante nga magpakita og imahe sa templo sa usa ka lugar nga kanunay nilang makita. Dasiga ang mga estudyante nga magpadayon sa pag-ampo sa Langitnong Amahan para sa dugang gugma ug tinguha aron motambong sa Iyang balaang mga templo.

Dugang nga mga Kapanguhaan

Sa unsang paagi ang pagtambong sa mga templo makatabang sa akong adlaw-adlawng pagkinabuhi?

Si Elder David A. Bednar sa Korum sa Napulog Duha ka Apostoles mipamatuod:

Kita dili moadto sa templo aron motago o moeskapo sa mga kadaotan sa kalibotan. Hinoon, moadto kita sa templo aron sa pagbuntog sa kalibutan sa dautan. Samtang atong dapiton sa atong kinabuhi ang “gahom sa pagka-diosnon” [Doktrina ug mga Pakigsaad 84:20–21] pinaagi sa pagdawat sa mga ordinansa sa pagkapari ug sa paghimo ug pagtuman og sagradong mga pakigsaad, mapanalanginan kita og kusog nga lapas sa atong kaugalingon aron sa pagbuntog sa mga tintasyon ug mga hagit sa mortalidad ug sa paghimo ug pagkahimong maayo. (David A. Bednar, “Himoa Kini nga Balay nga Matukod ngadto sa Akong Ngalan,” Liahona, Mayo 2020, 86)

Asa ko makakat-on og dugang bahin sa pagpahinungod sa Templo sa Kirtland?

Daghang milagroso ug balaanong hitabo ang midungan sa pagpahinungod sa Templo sa Kirtland. Ang mosunod nga mga kapanguhaan mahimong makatabang:

• Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 239–244, 266–271

• “Mga Tingog sa Pagpahiuli” gikan sa leksiyon nga “Doktrina ug mga Pakigsaad 109–110” sa Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021, 168–169

Doktrina ug mga Pakigsaad 109:24. Unsay ipasabot sa “naghupot og usa ka ngalan ug katungdanan” diha sa templo?

Si Elder David A. Bednar sa Korum sa Napulog Duha ka Apostoles mitudlo:

Ang proseso sa pagdala nganha sa atong kaugalingon sa ngalan ni Jesukristo nga nagsugod sa tubig sa bunyag mapadayon ug mapalambo didto sa balay sa Ginoo. Sa atong pagbarog diha sa tubig sa bunyag, kita nagpaabot sa panalangin sa templo. Sa atong pag-ambit sa sakramento, kita naghunahuna sa templo. Nagsaad kita nga sa kanunay mohinumdom sa Manluluwas ug sa pagsunod sa Iyang mga sugo isip pagpangandam sa pag-apil diha sa sagrado nga mga ordinansa sa templo ug sa pagdawat sa labing taas nga mga panalangin nga anaa pinaagi ug sa awtoridad ni Ginoong Jesukristo. Busa, diha sa mga ordinansa sa balaang templo kita mas hingpit ug bug-os nga nagdala diha sa atong mga kaugalingon sa ngalan ni Jesukristo. (David A. Bednar, “Madungganon nga Paghupot og usa ka Pangalan ug Katungdanan,” Liahona, Mayo 2009, 98)

Doktrina ug mga Pakigsaad 109:79–80. Unsa ang Singgit nga Hosanna?

Kadtong kinsa mitambong sa pagpahinungod sa templo miapil sa Singgit nga Hosanna. Kini nga singgit maoy sama sa pagdayeg nga gitanyag sa mga sumusunod ni Jesukristo sa Iyang madaogong pagsulod sa Jerusalem [tan-awa sa Mateo 21:1, 8–9; Marcos 11:8–10; Juan 12:12–13]. Mitindog ang kongregasyon, giwarawara ang puti nga mga panyo, ug nagkahiusa sa pagsinggit og katulo sa mga pulong nga, “Hosanna, hosanna, hosanna ngadto sa Dios ug sa Kordero.” Ang pagsinggit natapos sa, “Amen, Amen, ug Amen.” (Mga Hisgotanan sa Kasaysayan sa Simbahan, “Mga Pagpahinungod sa Templo ug mga Pag-ampo sa Pagpahinungod,” ChurchofJesusChrist.org/study/history/topics)

Ubos sa direksiyon sa mga lider sa Simbahan, pwedeng iapil ang Singgit nga Hosanna sa pagpahinungod sa ubang importanteng bilding sa Simbahan. Pananglitan, gipangunahan ni Presidente Gordon B. Hinckley ang mga miyembro sa Simbahan sa Singgit nga Hosanna sa pagpahinungod sa Conference Center sa Salt Lake City, Utah.

Usahay kining balaang buhat sa pagdayeg sa atong Langitnong Amahan ug kang Jesukristo gipahigayon agi og paghinumdom sa importanteng mga hitabo. Sa Abril 5, 2020, gipangulohan ni Presidente Russell M. Nelson ang mga miyembro sa Simbahan sa Singgit nga Hosanna aron hinumdoman ang Unang Panan-awon ni Joseph Smith sa Amahan ug sa Anak.

Dugang nga mga Kalihokan sa Pagkat-on

Ang imong pag-ampo sa pagpahinungod sa templo

Tingali interesado ang mga estudyante nga mabasa ang pag-ampo sa pagpahinungod sa inyong lokal nga templo. Pilia ang ngalan sa templo sa “Listahan sa Templo” sa temples.ChurchofJesusChrist.org; dayon pag-scroll sa “Milestones” aron makita ang link sa pag-ampo sa pagpahinungod.

Para sa dugang impormasyon, tan-awa ang Mga Hisgotanan sa Kasaysayan sa Simbahan, “Mga Pagpahinungod sa Templo ug mga Pag-ampo sa Pagpahinungod,” ChurchofJesusChrist.org/study/history/topics.

Doktrina ug mga Pakigsaad 109:36–37. Ang Templo sa Kirtland ug ang adlaw sa Pagkunsad

Aron tabangan ang mga estudyante nga masabtan kini nga mga bersikulo, konsiderar ang pagdapit sa usa ka estudyante sa pagbasa og kusog sa Mga Buhat 2:1–4. Ipatin-aw nga sa adlaw sa Pagkunsad, mitabang ang Espiritu Santo sa pag-andam sa mga Apostoles ug ubang mga tinun-an sa Manluluwas aron mahimong “mga saksi ngadto ni [Jesukristo] … hangtod sa kinatumyan sa yuta” (Mga Buhat 1:8). Ang dakong pagbubo sa Espiritu Santo nga nadawat sa unang Apostoles ug disipulo sa adlaw sa Pagkunsad nasinatian usab sa daghang Santos sa pagpahinungod sa Templo sa Kirtland.

Ikonsiderar ang pagpakigbahin og usa o kapin pang asoy sa mga saksi sa maong sagradong mga hitabo panahon sa pagpahinungod sa Templo sa Kirtland, sama sa makita diha sa “Dugang nga mga Kapanguhaan.” Dapita ang mga estudyante sa pagkosiderarn kon giunsa pagtabang sa Espiritu Santo aron maandam ang unang Apostoles ug ang mga Santos sa Kirtland aron ipakigbahin ang ebanghelyo sa ulanghing mga adlaw.

Dugang nga media

• “Practice, Celebration, Dedication: Temple Blessings in El Salvador” (5:51)—Ang pagpahinungod sa templo nakatabang sa usa ka pamilya nga mahimong aktibo pag-usab sa Simbahan.

• “Standing in Holy Places” (5:36)—Usa ka batan-ong babaye ang nakasinati og mga panalangin sa pagtambong sa templo.

• “The Temple Landmark for Eternity: Karen” (3:48)—Usa ka batan-ong babaye sa usa ka dakong siyudad ang nakakat-on bahin sa kaimportante sa pagtambong sa templo.