“Leksiyon 124—Doktrina ug mga Pakigsaad 110, Bahin 2: Ang Pagpahiuli sa mga Yawe sa Pagkapari” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 110, Bahin 2,” Manwal sa Magtutudlo sa Seminary sa Doktrina ug mga Pakigsaad
Leksiyon 124: Doktrina ug mga Pakigsaad 109–110
Doktrina ug mga Pakigsaad 110, Bahin 2
Ang Pagpahiuli sa mga Yawe sa Pagkapari
Human sa panan-awon ni Jesukristo sa Templo sa Kirtland niadtong Abril 3, 1836, “ang mga kalangitan naabli pag-usab” (Doktrina ug mga Pakigsaad 110:11) ngadto kang Joseph Smith ug Oliver Cowdery. Tulo ka karaang mga propeta ang nagpakita kanila ug gihatag ang importanteng mga yawe sa pagkapari ngadto kanila. Kini nga leksiyon makatabang sa mga estudyante nga masabtan kon sa unsang paagi mapanalanginan ang ilang kinabuhi pinaagi sa napahiuli nga mga yawe sa pagkapari ngadto ni Propeta Joseph Smith.
Mga Posibleng Kalihokan sa Pagkat-on
Sa unsang paagi malahi ang kinabuhi?
Sa pagsugod sa klase, ikonsiderar ang pagsulat sa dili kompletong pangutana diha sa pisara:
Unsa kaha ang imong kinabuhi kon wala ?
Dapita ang mga estudyante nga kompletohon ang pangutana diha sa ilang mga journal sa pagtuon sa usa ka butang nga sila mobati nga lisod ang pagpakabuhi kon wala kini. Dapita ang pipila ka estudyante sa pagpakigbahin kon giunsa nila pagkompleto ug kon nganong lisod ang kinabuhi kon wala ni.
Human makapakigbahin ang mga estudyante, kompletoha ang pangutana sa pisara gamit ang mga hugpong sa mga pulong nga “misyonaryong buhat,” “ang kinatibuk-an sa ebanghelyo,” “ang buluhaton sa templo ug family history,” ug “ang kahigayonan nga maselyo ngadto sa imong pamilya.” Dapita ang klase nga hilom nga mamalandong kon unsa ka lahi ang kinabuhi kon wala ni nga mga panalangin gikan sa Langitnong Amahan ug sa pagrekord sa ilang mga pagbati. Dasiga ang mga estudyante nga padayong mamalandong sa kaimportante niini nga mga panalangin sa ilang kinabuhi samtang magkat-on sila bahin sa balaang mga hitabo nga nagpaposible niini.
Gipahiuli ang mga yawe sa pagkapari
Pwede nimong ipakita ang imahe sa pagpakita sa Manluluwas didto sa Templo sa Kirtland niadtong Abril 3, 1836 (tan-awa sa Doktrina ug mga Pakigsaad 110:1–10). Kon nahuman na sa mga estudyante ang leksiyon nga “Doktrina ug mga Pakigsaad 110, Bahin 1,” pwede nimong ipangutana ang mosunod:
-
Unsay imong nahinumdoman bahin niining balaang panan-awon?
Ikonsiderar ang pagsulat samosunod nga pinabaga nga kamatuoran diha sa pisara: Nagpadala ang Ginoo og langitnong mga mensahero aron ipahiuli ang mga yawe ngadto ni Propeta Joseph Smith. Aron matabangan ang mga estudyante nga masabtan ang kaimportante niini nga kamatuoran, kopyaha ang mosunod nga tsart diha sa pisara ug dapita ang mga estudyante nga kopyahon ni diha sa ilang mga journal sa pagtuon. (Ipasabot nga kinahanglang magbilin og lugar ang mga estudyante para sa dugang mga pangutana diha sa ubos nga bahin sa matag kolum sa ulahing bahin niini nga leksiyon.) Dapita ang mga estudyante sa paggamit sa ilang mga kasulatan aron sulatan ang tsart.
Templo sa Kirtland—Abril 3, 1836
|
Kinsa ang mipakita? Unsay iyang gipahiuli? |
Kinsa ang mipakita? Unsay iyang gipahiuli? |
Kinsa ang mipakita? Unsay iyang gipahiuli? |
Human nimo mahatagi ang mga estudyante og igong panahon sa pagtuon, pagdapit og mga boluntaryo nga moduol sa pisara ug isulat sa kolum ang ilang nakat-onan. Kon gikinahanglan, pahinumdomi ang mga estudyante sa mosunod:
Hinumdomi nga ang “mga yawe sa pagkapari mao ang awtoridad sa paggiya sa paggamit sa pagkapari alang sa mga anak sa Dios. Ang paggamit sa tanang awtoridad sa pagkapari diha sa Simbahan giyahan niadtong naghupot sa mga yawe sa pagkapari” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 3.4.1, ChurchofJesusChrist.org; tan-awa usab sa Doktrina ug mga Pakigsaad 65:2).
Aron tabangan ang mga estudyante nga mas masabtan ang gipahiuli mga yawe, dapita silang tun-an kini nga mga yawe gamit ang ubang mga tudling sa kasulatan, pakigpulong sa kinatibuk-ang komperensiya, o uban pang balaang kapanguhaan. Pwede nilang tun-an ang mga footnote o tan-awon ang “yawe sa pagkapari,” dili pamilyar nga mga pulong, o bisan unsang ngalan sa langitnong mga bisita diha sa Giya ngadto sa mga Kasulatan, Bible Dictionary, o Topical Guide. Pwede nilang pangitaon ang “napahiuli nga mga yawe sa Templo sa Kirtland” diha sa Librarya sa Ebanghelyo nga app.
O bahina ang mga estudyante sa gagmayng mga grupo ug hatagi ang matag grupo og usa ka kalihokan sa pagkat-on gikan sa handout nga nag-ulohan og “Gipahiuli ang mga Yawe sa Pagkapari sa Templo sa Kirtland.” Dapita ang matag grupo nga dungang hisgotan ang handout ug idugang ang ilang mga panglantaw diha sa tsart.
Gipahiuli ang mga Yawe sa Pagkapari sa Templo sa Kirtland
Kalihokan sa Pagtuon A
Gipahiuli ni Moises ang mga yawe sa “pagpundok sa Israel” (Doktrina ug mga Pakigsaad 110:11). Ang mga yawe sa pagpundok naghatag og awtoridad niadtong mga naggunit niini nga awtoridad sa pagsangyaw sa napahiuli nga ebanghelyo ni Jesukristo sa mga nasod sa yuta.
Si Presidente Russell M. Nelson mipahayag:
Kon maghisgot kita sa pagpundok sa Israel sa duha ka habig sa tabil, naghisgot kita, siyempre, sa buhat sa misyonaryo, templo, ug family history. Naghisgot usab kita sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo. (Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92)
-
Sa unsang paagi ka makatabang aron mouswag ang hugot nga pagtuo ug pagpamatuod diha sa mga kasingkasing niadtong makauban nimo matag adlaw?
-
Sa unsang paagi ang imong kinabuhi o kinabuhi niadtong imong kaila naimpluwensiyahan sa Ginoo sa pagtabang kanato pinaagi sa misyonaryo nga buhat?
Kalihokan sa Pagtuon B
Gihatag ni Elias ang dispensasyon sa ebanghelyo ni Abraham (tan-awa sa Doktrina ug mga Pakigsaad 110:12). Apil ani ang pagpahiuli sa pakigsaad ni Abraham.
Si Presidente Russell M. Nelson mipasabot:
Ang pakigsaad nga gihimo sa Dios uban kang Abraham … naglangkob og daghang mga saad, lakip ang … ang tanang kanasoran sa yuta mapanalanginan sa iyang binhi. …
… Atong nadawat, sama kanila sa karaan, ang balaang pagkapari ug ang mahangtorong ebanghelyo. Kita adunay katungod sa pagdawat sa kahingpitan sa ebanghelyo, pagpahimulos sa mga panalangin sa pagkapari, ug pagpakasarang sa labing dako nga panalangin sa Dios—kana mao ang kinabuhing walay kataposan. (Russell M. Nelson, “Mga Pakigsaad,” Liahona, Nob. 2011, 87–88)
-
Unsa ang pipila ka paagi nga gipanalanginan sa Ginoo ang mga indibiduwal, mga pamilya, ug mga nasod pinaagi sa Iyang ebanghelyo ug Iyang pagkapari?
-
Unsang mga panalangin gikan sa Ginoo ang imong nasinati pinaagi sa Iyang ebanghelyo ug sa Iyang pagkapari?
Kalihokan sa Pagtuon C
Gipahiuli ni Elijah ang mga yawe sa pagselyo, nga naglakip sa awtoridad sa pagselyo sa mga pamilya diha sa templo.
Si Elder Gary E. Stevenson sa Korum sa Napulog Duha ka Apostoles mipasabot:
Ang mga yawe sa pagbugkos nga gipahiuli sa Daang Tugon nga propeta nga si Elijah, nakapahimo sa mga ordinansa nga mapahigayon sa balaan nga mga templo. Ang mga ordinansa nga gipahigayon niini nga mga templo maghimo sa mga indibidwal ug mga pamilya nga makabalik ngadto sa presensya sa atong langitnong mga ginikanan. (Gary E. Stevenson, “Asa ang mga Yawe ug Awtoridad sa Pagkapari?,” Liahona, Mayo 2016, 31)
-
Unsa ang pipila ka paagi nga gipanalanginan kita sa Ginoo pinaagi sa mga buhat sa templo ug mga pagselyo?
-
Sa unsang paagi ang Ginoo mipanalangin, o sa unsang paagi siya mopanalangin, kanimo ug sa imong pamilya pinaagi sa mga ordinansa sa templo?
Ikonsiderar ang pagpahinumdom sa mga estudyante kon unsa ang ilang gipamalandongan sa sinugdanan sa leksiyon. Dapita sila sa pagsulat diha sa ilang mga journal sa pagtuon sa “Nganong importante para nako kini nga mga yawe?” Hatagi sila og panahon nga mamalandong ug tubagon kini nga pangutana base sa ilang pagtuon o unsa ang ilang nakat-onan sa kalihokan.
“Sa dili pa moabut ang mahinungdanon ug makalilisang nga adlaw sa Ginoo”
Rebyoha ang Doktrina ug mga Pakigsaad 110:14-16, nga mangita sa bisan unsang pulong o hugpong sa mga pulong nga konektado sa Ikaduhang Pag-anhi ni Jesukristo.
-
Unsay imong nadiskobrehan?
Dasiga ang mga estudyante nga markahan sa ilang mga kasulatan ang bisan unsang importanteng mga pulong o hugpong sa mga pulong nga ilang nakita.
-
Sa unsang paagi kita giandam sa Manluluwas para sa Iyang Ikaduhang Pag-anhi pinaagi sa mga yawe sa pagkapari nga gipahiuli ni Moises, Elias, ug Elijah?
-
Sa imong hunahuna, nganong ang kalibotan “silotan sa usa ka tunglo” (Doktrina ug mga Pakigsaad 110:15) sa pag-anhi sa Ginoo kon wala pa gipahiuli ang mga yawe sa pagkapari?
Sa pagtapos, dapita ang mga estudyante nga kompletohon ang mosunod sa ilang mga journal. Pwede nimong hangyoon ang pipila nga ipakigbahin ang ilang gisulat.
Handurawa nga giingnan ka sa usa ka higala nga nakat-onan niya ang bahin sa pagpahiuli sa mga yawe sa pagkapari didto sa Templo sa Kirtland. Dayon, miingon ang imong higala, “Dili ko sigurado kon konektado ba ni sa akoa.” Gamit ang imong nakat-onan karon, ipasabot kon unsang mga yawe ang gipahiuli ug sa unsang paagi gipanalanginan o mapanalanginan niini ang imong higala.