“Lēsoni 122—Tokāteline mo e Ngaahi Fuakava 109: Ko e Temipale ʻo e ʻEikí: Ko ha Fale ʻo e Nāunau mo e Mālohi,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 109,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 122: Tokāteline mo e Ngaahi Fuakava 109–110
Tokāteline mo e Ngaahi Fuakava 109
Ko e Temipale ʻo e ʻEikí: Ko ha Fale ʻo e Nāunau mo e Mālohi
Naʻe ngāue ʻa e Kāingalotú ʻi ha meimei taʻu ʻe tolu ke langa ʻa e Temipale Ketilaní, ko e fuofua temipale ia naʻe langa ʻi he kuonga fakakosipeli ko ʻení. Ko e Tokāteline mo e Ngaahi Fuakava 109 ko e lotu fakatapui ia naʻe fakahā ʻe he ʻEikí ki he Palōfita ko Siosefa Sāmitá. ʻOku ʻi he lotu ko ʻení ha ngaahi tāpuaki te tau lava ʻo maʻu he ʻahó ni. ʻE lava ke tokoni ʻa e lēsoni ko ʻení ke ongoʻi ʻe he kau akó ha holi lahi ange ke ʻalu ki he temipalé pea maʻu ʻa e ngaahi tāpuaki kuo talaʻofa mai ʻe he ʻEikí.
Ngaahi ʻEkitivitī Ako ʻOku Ala Fakahokó
Ngaahi ongo fekauʻaki mo e temipalé
Fakakaukau ke fakaʻaliʻali ha ngaahi ʻata ʻo ha ngaahi temipale kehekehe. Te ke lava ʻo fehuʻi nounou ki he kau akó ha ngaahi meʻa kau ki he temipalé, hangē ko e temipale ʻe fiha ʻoku lolotonga ngāué, ko e temipale ʻe fiha naʻe fanongonongo ʻi he konifelenisi lahi fakamuimuitahá, ko e temipale fē ʻoku ofi taha ki he feituʻu ʻo hoʻo kalasí, mo e alā fehuʻi pehē.
-
Ko e hā ʻe ongoʻi fiefia ai ha kakai ʻe niʻihi ke ʻalu ki he temipalé? Ko e hā ka ʻikai ongoʻi fiefia ai ha niʻihi?
Fakaʻaliʻali e ngaahi fakamatala ko ʻení pea poupouʻi e kau akó ke fakalaulauloto ki he mālohi ʻo ʻenau tui ki he fakamatala takitaha. Pe ko hoʻo fakaafeʻi e kau akó ke hiki ʻenau ngaahi ongo fekauʻaki mo e ʻalu ki he temipalé ʻi heʻenau tohinoa akó.
-
Ko e temipalé ko e fale ia ʻo e ʻOtuá.
-
ʻOku mahuʻinga kiate au ʻeku teuteu pe ʻalu ki he temipalé.
-
ʻOku ou tui ʻoku ʻi ai ha ngaahi tāpuaki mahuʻingamālie ʻe foaki mai ʻe he ʻEikí kiate au ʻi heʻeku feinga ke moʻui taau ke hū ki Hono falé.
Fakalaulauloto ki ha ngaahi fehuʻi pe hohaʻa ʻokú ke maʻu fekauʻaki mo e teuteu mo e ʻalu ki he temipalé. ʻI hoʻo ako he ʻaho ní, mahalo te ke fie lotu ki he Tamai Hēvaní ke tokoniʻi koe ke ke ongoʻi ha loto-holi lahi ange ke ʻalu ki Hono temipale māʻoniʻoní.
Ko e Temipale Kirtland
Fakaʻaliʻali ha fakatātā ʻo e Temipale Ketilaní, hangē ko e fakatātā ʻoku maʻu ʻi he kamataʻanga ʻo e lēsoní. Vahevahe nounou ha niʻihi ʻo e ngaahi fakamatala fakahisitōlia fekauʻaki mo e temipale ko ʻení ʻi he lea pē ʻaʻau pe fakaafeʻi ha ongo tamaiki ako ke na lau e ngaahi palakalafi ko ʻení.
Naʻe feilaulauʻi ʻe he kāingalotu ʻo e Siasí ʻi he vahaʻa ʻo Sune 1833 mo Māʻasi 1836, honau taimí, paʻangá, mo e koloá ke tokoni ke langa ʻa e fuofua temipale ʻi he kuonga fakakosipeli ko ʻení. Naʻe taukei e kau tangatá ʻi he ngāue ki hono langa ʻo e falé, pea naʻe ngaohi ʻe he kakai fefiné ha vala mo ha nofoʻanga maʻá e kau ngāué. Naʻe foaki ʻe ha Kāingalotu ʻe niʻihi ha konga lahi ʻo ʻenau koloá ki hono langa ʻo e temipalé. Naʻe fakafuofua e fakamole ki he temipalé ki ha paʻanga ʻAmelika nai ʻe 60,000—ko ha paʻanga lahi fau ia he taimi ko iá, tautautefito ʻi he masiva ʻa e Kāingalotú.
Naʻe fakatapui ʻa e Temipale Ketilaní ʻi he ʻaho 27 ʻo Māʻasi, 1836. Naʻe aʻusia ʻe he Kāingalotu tokolahi ʻo e Siasí naʻe kau atu ki he ngaahi ouau mo e ngaahi polokalama ʻo e fakatapuí ha ngaahi fakahā fakalaumālie maʻongoʻonga. Naʻe kau heni ʻa ʻenau fanongo ki he ongo ʻo ha matangi mālohi, lea ʻi ha ngaahi lea kehekehe, mamata ki ha ngaahi meʻa-hā-mai, mo mamata ki he ʻaʻahi mai ʻa e kau ʻāngeló.
Ko e Tokāteline mo e Ngaahi Fuakava 109 ko e lotu fakatapui ia naʻe fakahā ʻe he ʻEikí ki he Palōfita ko Siosefa Sāmitá. Naʻe lau leʻolahi ʻa e lotu ko ʻení lolotonga e ngaahi ouau fakatapuí. ʻOku kei hokohoko atu pē he ʻahó ni ʻa e sīpinga ko ʻení, ʻo ha lotu fakatapui naʻe ueʻi fakalaumālie lolotonga e fakatahaʻanga fakatapui ʻo e temipale takitaha.
ʻE lava ke ke fehuʻi ange pe kuo kau atu ha tokotaha ako ki hano fakatapui ʻo ha temipale. Kapau ʻoku ʻi ai, ʻe lava ke vahevahe ʻe ha tokotaha ako ʻa e meʻa ʻokú ne manatuʻi fekauʻaki mo e lotu fakatapuí.
Lau ʻa e Tokāteline mo e Ngaahi Fuakava 109:1–4, ʻo kumi e founga naʻe kamata ai ʻa e lotu fakatapui ueʻi fakalaumālie ko ʻení.
-
Ko e hā naʻe mahuʻingamālie kiate koe ʻi he ngaahi veesi ko ʻení?
ʻI he vahevahe ʻa e kau akó, te ke lava ʻo fai ha ngaahi fehuʻi vakaiʻi hangē ko e “Ko e hā ʻoku fakahā ʻe he ngaahi veesi ko ʻení fekauʻaki mo e ʻEikí?” pe “Ko e hā ʻoku makehe kiate koe fekauʻaki mo e tōʻonga ʻa e Kāingalotú?” (hangē ko e, vakai, veesi 1 mo e 4).
Ngaahi taumuʻa mo e ngaahi tāpuaki ʻo e temipalé
Fakapapauʻi ʻoku maʻu ʻe he kau akó ha taimi feʻunga ki he ʻekitivitī ako ko ʻení. Te ke lava ʻo hiki ʻa e ongo foʻi lea Ngaahi Taumuʻá mo e Ngaahi Tāpuakí ʻi he palakipoé.
ʻE lava ke ngāue ʻa e kau akó mo ha hoa ke fai ʻa e ngaahi meʻá ni pea fakaʻilongaʻi ʻa e meʻa ʻoku nau maʻú.
Lau ʻa e Tokāteline mo e Ngaahi Fuakava 109:5, 11–16, 20–24, ʻo kumi ha niʻihi ʻo e ngaahi taumuʻa ʻa e ʻEikí ki hono langa Hono temipalé pea mo e ngaahi tāpuaki kuo talaʻofa mai ʻi hono fai iá.
Hili ha taimi feʻunga, fakaafeʻi e kau akó ke nau aleaʻi mo honau hoá ʻa e ngaahi taumuʻa mo e ngaahi tāpuaki ʻoku mahuʻinga taha kiate kinautolú pea mo hono ʻuhingá.
Fakaafeʻi e hoa takitaha ke nau faʻu ha fakamatala ʻo e moʻoní ʻo makatuʻunga ʻi ha taha ʻo e ngaahi fakakaukau mahuʻingamālie ne nau maʻú. (Pe, fakatatau mo e tokolahi ʻo e kalasí, te ke lava ʻo fakaafeʻi e tokotaha ako takitaha ke vahevahe.) Fakakaukau ke ʻoange ha laʻipepa ke hiki ai ʻe he kau akó ʻenau fakamatalá pea fakaʻaliʻali ia ʻi he palakipoé. Hili iá, ʻe lava ke vahevahe ʻe he kau akó ʻenau fakamatalá, veesi pe ngaahi veesi ʻoku fakatefito aí, pea mo e ʻuhinga ʻoku mahuʻinga ai kiate kinautolú.
ʻE lava ke vahevahe ʻe he kau akó ha ngaahi moʻoni hangē ko ʻení:
-
ʻI he temipalé, ʻe lava ke fakahā mai ʻe he ʻEikí Ia kiate kitautolu. (veesi 5, 12–13) (Fakatokangaʻi ange: Tokoni ke mahino ki he kau akó ʻoku lahi ha ngaahi founga ʻe lava ke fakahaaʻi mai ai ʻe he ʻEikí Ia. ʻE aleaʻi eni ʻi he lēsoni hokó.)
-
ʻI he temipalé, ʻe lava ke fakakoloa ai kitautolu ʻe he ʻEikí ʻaki Hono mālohí, maluʻí mo e tokoní. (veesi 13, 22)
-
Ko e temipalé ko ha feituʻu ia ʻo e ako. (veesi 14–15)
-
ʻE lava ke teuteuʻi kitautolu ʻe he moihū ʻi he temipalé ke tau ngāue maʻá e ʻEikí mo malanga ʻaki ʻEne folofolá. (veesi 22–23)
-
Ko e hā e tokoni ʻa e ngaahi veesi ko ʻení ke mahino kiate kitautolu fekauʻaki mo e Tamai Hēvaní mo Sīsū Kalaisí? Ko e hā ʻoku mahuʻinga ai ia kiate koé?
Fakakaukau ke fakaafeʻi ha kau ako ke lau ʻa e ngaahi fakamatala ko ʻeni mei he toʻu tupú fekauʻaki mo ʻenau ngaahi aʻusia ʻi he temipalé. Fakaafeʻi e kau akó ke nau kumi ha ngaahi sīpinga ʻo e ngaahi tāpuaki ʻoku hiki atu ʻi ʻolungá pea pehē ki ha ngaahi tāpuaki kehe.
Ko e ngaahi fakakaukau langaki moʻuí pē ʻokú ne fakafonu hoku ʻatamaí ʻi he temipalé. Ko ha ongo fakaofo ia ke fakakaukau ki ha ngaahi meʻa te ke lava ʻo fai ke tokoni ki he niʻihi kehé. [Kolouī D.] …
… Kuo tokoniʻi au ʻe heʻeku toutou ʻalu ki he temipalé ke u ongoʻi lahi ange ʻa e Laumālié. Kuó ne ʻai moʻoni ke toe vāofi ange hoku ngaahi kaungāmeʻá. ʻIkai ngata aí, ʻoku fehuʻi mai ʻe ha tokolahi ʻo homau kaungāakó fekauʻaki mo ʻemau ngaahi ʻaʻahi ki he temipalé. …
… Naʻe lava ke maʻu ʻe haku kaungāmeʻa … ʻene fuofua lekomeni fakangatangatá, pea kuo fakafiefia ke vakai ki he ola lelei ʻoku hoko ʻi heʻene moʻuí. [ʻAnalise K.] …
… ʻI heʻeku luelue ʻataʻatā pē he [temipalé], ne u ongoʻi kuo mahuʻi kotoa atu e ngaahi faingataʻa ne u aʻusia ʻi he akó mo e ngaahi feituʻu kotoa pē. Naʻá ku ongoʻi nonga ʻi heʻeku ʻi he temipalé. Naʻe lōmekina au ʻe he ongoʻi fiefiá. Naʻe tokoni ʻeku ʻi he temipalé ke u tokanga taha ki he meʻa naʻe fiemaʻu ke u fai ʻi he lotú mo e ngaahi fatongia kehé. Naʻe matuʻaki fakaofo ke u lava ʻo ʻalu ʻo mavahe mei he ngaahi faingataʻa kotoa pē ne u aʻusiá. [Kouli E.] (“Youth Voices: Attending the Temple,” New Era, Apr. 2013, 5–7)
Ko e ʻalu ki he temipale māʻoniʻoni ʻo e ʻEikí
Fakakaukau ke huluʻi ʻa e foʻi vitiō “The Blessings of the Temple” (3:37) pe “Strength beyond My Own” (3:47). Fakaafeʻi e kau akó ke fakalaulauloto ki he ngaahi tāpuaki kuo nau ongoʻi ʻi heʻenau teuteu pe hū ki he temipalé. Ko ha fili ʻe taha ko hano hivaʻi ʻo e “Ko e Laumālie ʻo e ʻOtuá” (Ngaahi Himí, fika 2), ʻa ia naʻe faʻu ki hono fakatapui ʻo e Temipale Ketilaní, pe ko ha himi ʻe taha fekauʻaki mo e temipalé.
Naʻe fakamoʻoni ʻa Palesiteni Lāsolo M. Nalesoni ʻo pehē:
Ko Hono falé [ʻa e temipalé]. ʻOku fonu ia ʻi Hono mālohí. ʻOua muʻa naʻa teitei ngalo ʻiate kitautolu ʻa ia ʻoku fakahoko ʻe he ʻEikí maʻatautolu he taimi ní. … ʻOku ou palōmesi atu ʻi he lahi ange homou taimi ʻi he temipalé, ʻe tāpuekina hoʻomou moʻuí ʻi ha ngaahi founga taʻe-hano-tatau. (Russell M. Nelson, “Tokanga Taha ki he Temipalé,” Liahona, Nōvema 2022, 121)
-
Ko e fē ha taimi kuó ke aʻusia ai pe ko ha taha ʻoku ofi kiate koe ha ngaahi tāpuaki ʻo e temipalé?
Fakaafeʻi e kau akó ke fakamanatuʻi ʻenau ngaahi tali mei he kamataʻanga ʻo e lēsoní fekauʻaki mo e ʻuhinga ʻoku ʻikai ongoʻi vēkeveke ai ha kakai ʻe niʻihi ke ʻalu ki he temipalé.
-
Ko e hā kuó ke ako pe ongoʻi ʻe lava ʻo tokoni ki ha taha ke ne fehangahangai mo e ngaahi meʻa ʻoku nau hohaʻa ki aí pe ueʻi kinautolu ke nau ongoʻi makehe fekauʻaki mo e temipalé?
-
Kuo tākiekina fēfē he ʻahó ni hoʻo ngaahi ongo fekauʻaki mo e ʻEikí mo Hono temipale māʻoniʻoní?
Fakakaukau ke fakaafeʻi e kau akó ke fakaʻaliʻali ha fakatātā ʻo e temipalé ʻi ha feituʻu te nau toutou sio ki ai. Poupouʻi e kau akó ke hokohoko atu ʻenau lotu ki he Tamai Hēvaní ke maʻu ha ʻofa mo ha holi lahi ange ke ʻalu ki Hono ngaahi temipale māʻoniʻoní.