“Lēsoni 124—Tokāteline mo e Ngaahi Fuakava 110, Konga 2: Ko Hono Fakafoki Mai ʻo e Ngaahi Kī ʻo e Lakanga Fakataulaʻeikí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 110, Konga 2,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 124: Tokāteline mo e Ngaahi Fuakava 109–110
Tokāteline mo e Ngaahi Fuakava 110, Konga 2
Ko Hono Fakafoki Mai ʻo e Ngaahi Kī ʻo e Lakanga Fakataulaʻeikí
Hili e mata meʻa-hā-mai ʻa Sīsū Kalaisi ʻi he Temipale Ketilaní ʻi he ʻaho 3 ʻo ʻEpeleli, 1836, “naʻe toe fakaava ʻa e ngaahi langí” (Tokāteline mo e Ngaahi Fuakava 110:11) kia Siosefa Sāmita mo ʻŌliva Kautele. Naʻe hā ha kau palōfita ʻe toko tolu ʻo e kuonga muʻá ʻo foaki kiate kinaua e ngaahi kī mahuʻinga ʻo e lakanga fakataulaʻeikí. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻe lava ke tāpuekina ai ʻe he ngaahi kī ʻo e lakanga fakataulaʻeiki kuo fakafoki mai ki he Palōfita ko Siosefa Sāmitá ʻa ʻenau moʻuí.
Ngaahi ʻEkitivitī Ako ʻOku Ala Fakahokó
Naʻe mei kehe fēfē nai ʻa e moʻuí?
Ke kamata ʻa e kalasí, fakakaukau ke hiki ʻa e fehuʻi taʻekakato ko ʻení ʻi he palakipoé:
Naʻe mei fēfē nai hoʻo moʻuí ka ne taʻeʻoua ?
Fakaafeʻi e kau akó ke fakakakato ʻa e fehuʻí ʻi heʻenau tohinoa akó ʻaki ha meʻa ʻoku nau ongoʻi ʻe faingataʻa ke moʻui taʻe kau ai ʻa e meʻa ko iá. Fakaafeʻi ha niʻihi ʻo e kau akó ke vahevahe ʻa e founga naʻa nau fakakakato ai ʻa e fehuʻí pea fakamatalaʻi nounou ʻa e ʻuhinga ʻe faingataʻa ai ʻenau moʻuí taʻe kau ai ʻa e meʻa ko iá.
Hili e vahevahe ʻa e kau akó, fakakakato e fehuʻi ʻi he palakipoé ʻaki ha ngaahi kupuʻi lea hangē ko e “ngāue fakafaifekaú,” “ko e kakato ʻo e ongoongoleleí,” “ngāue fakatemipalé mo e hisitōlia fakafāmilí,” mo e “faingamālie ke sila ki ho fāmilí.” Fakaafeʻi e kau mēmipa ʻo e kalasí ke nau fakakaukauloto ki he founga ne mei kehe ai ʻenau moʻuí ka ne taʻeʻoua ʻa e ngaahi tāpuaki ko ʻeni mei he Tamai Hēvaní pea lekooti ha faʻahinga ongo pē ʻoku nau maʻu. Poupouʻi e kau akó ke hokohoko atu ʻenau fakalaulauloto ki he mahuʻinga ʻo e ngaahi tāpuaki ko ʻení ʻi heʻenau moʻuí ʻi heʻenau ako fekauʻaki mo e ngaahi meʻa toputapu naʻe tokoni ke nau malava aí.
Ko e ngaahi kī ʻo e lakanga fakataulaʻeikí naʻe fakafoki maí
Mahalo te ke fie fakaʻaliʻali ha fakatātā ʻo e hā mai ʻa e Fakamoʻuí ʻi he Temipale Ketilaní ʻi he ʻaho 3 ʻo ʻEpeleli, 1836 (vakai, Tokāteline mo e Ngaahi Fuakava 110:1–10). Kapau kuo maʻu ʻe he kau akó ʻa e lēsoni “Tokāteline mo e Ngaahi Fuakava 110, Konga 1,” te ke lava ʻo ʻeke ange ʻa e fehuʻi ko ʻení:
-
Ko e hā ‘okú ke manatuʻi fekauʻaki mo e meʻa-hā-mai toputapu ko ʻení?
Fakakaukau ke hiki ʻa e moʻoni ko ʻení ʻi he palakipoé: Naʻe fekauʻi ʻe he ʻEikí ha kau talafekau fakalangi ke fakafoki ʻa e ngaahi kī ʻo e lakanga fakataulaʻeikí ki he Palōfita ko Siosefa Sāmitá. Ke tokoni ke mahino lelei ange ki he kau akó ʻa e mahuʻinga ʻo e moʻoni ko ʻení, hiki ʻa e saati ko ʻení ki he palakipoé pea fakaafeʻi e kau akó ke nau toe faʻu ia ʻi heʻenau tohinoa akó. (Fakamatalaʻi ange ʻoku totonu ke tuku ʻe he kau akó ha feituʻu ʻatā feʻunga ke tānaki atu ha fehuʻi ʻe taha ki he konga ki lalo ʻo e kōlomu takitaha ʻamui ange ʻi he lēsoni ko ʻení.) Fakaafeʻi e kau akó ke fakaʻaongaʻi ʻenau folofolá ke fakafonu ʻaki e sātí.
Temipale Ketilaní—3 ʻEpeleli, 1836
|
Ko hai naʻe hā maí? Ko e hā e meʻa naʻá ne fakafoki maí? |
Ko hai naʻe hā maí? Ko e hā e meʻa naʻá ne fakafoki maí? |
Ko hai naʻe hā maí? Ko e hā e meʻa naʻá ne fakafoki maí? |
Hili hoʻo ʻoange ha taimi feʻunga ki he kau akó ke nau ako aí, fakaafeʻi ha niʻihi ʻe loto-fiemālie ke omi ki he palakipoé ʻo hiki ʻi he kōlomu takitaha ʻa e meʻa ne nau akó. Kapau ʻe fiemaʻu, fakamanatu ki he kau akó ʻa e ngaahi meʻa ko ʻení:
Manatuʻi “ko e ngaahi kī ʻo e lakanga fakataulaʻeikí ko e mafai ia ke tataki ʻa hono fakaʻaongaʻi ʻo e lakanga fakataulaʻeikí maʻá e fānau ʻa e ʻOtuá. Ko hono ngāue ʻaki ko ia e mafai kotoa ʻo e lakanga fakataulaʻeikí ʻi he Siasí ʻoku tataki ia ʻe kinautolu ʻoku nau maʻu ʻa e ngaahi kī ʻo e lakanga fakataulaʻeikí” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 3.4.1, ChurchofJesusChrist.org; vakai foki, Tokāteline mo e Ngaahi Fuakava 65:2).
Ke tokoni ke mahino lelei ange ki he kau akó ʻa e ngaahi kī naʻe fakafoki maí, fakaafeʻi kinautolu ke nau ako ʻa e ngaahi kī ko ʻení ʻaki hono fakaʻaongaʻi ha ngaahi potufolofola kehe, ngaahi lea ʻi he konifelenisi lahí, pe ngaahi maʻuʻanga tokoni fakalangi kehe. Te nau lava ʻo kumi ʻa e “ngaahi kī ʻo e lakanga fakataulaʻeikí,” ngaahi lea ʻoku ʻikai ke nau maheni mo iá, pe ko ha taha pē ʻo e ngaahi hingoa ʻo e kau ʻaʻahi fakalangí ʻi he Fakahinohino ki he Ngaahi Folofolá. Te nau lava ʻo kumi ʻa e “ngaahi kī kuo fakafoki mai ʻi he Temipale Ketilaní” ʻi he Gospel Library app.
Pe vahevahe ʻa e kau akó ki ha fanga kiʻi kulupu iiki pea ʻoange ki he kulupu takitaha ha taha ʻo e ngaahi ʻekitivitī ako mei he laʻipepa tufa ʻoku ui ko e “Ngaahi Kī ʻo e Lakanga Fakataulaʻeikí Naʻe Fakafoki Mai ʻi he Temipale Ketilaní.” Fakaafeʻi ʻa e kulupu takitaha ke nau aleaʻi fakataha ʻa e laʻipepa tufá pea tānaki atu ha ngaahi fakakaukau ki heʻenau sātí.
Ngaahi Kī ʻo e Lakanga Fakataulaʻeikí Naʻe Fakafoki Mai ʻi he Temipale Ketilaní
Ako ʻa e ʻEkitivitī A
Naʻe fakafoki ʻe Mōsese ʻa e ngaahi kī ki hono “tānaki ʻo ʻIsilelí” (Tokāteline mo e Ngaahi Fuakava 110:11). ʻOku fakamafaiʻi ʻe he ngaahi kī ʻo e tānakí ʻa e kau tamaioʻeiki ko ia ʻoku nau maʻu ʻa e mafai ko ʻení ke malanga ʻaki ʻa e ongoongolelei ʻo Sīsū Kalaisi kuo fakafoki maí ki he ngaahi puleʻanga ʻo e māmaní.
Naʻe pehē ʻe Palesiteni Lāsolo M. Nalesoni:
Ko e taimi ʻoku tau lea ai kau ki he tānaki ʻo ʻIsileli ʻi he ongo tafaʻaki fakatouʻosi ʻo e veilí, ko ʻetau ʻuhingá ki he ngāue fakafaifekaú, ngāue fakatemipalé, mo e hisitōlia fakafāmilí. ʻOku tau toe ʻuhinga foki ai ki he langaki ʻo e tuí mo e fakamoʻoní ʻi he loto ʻo kinautolu ʻoku tau nofo, ngāue, pea mo tokoniʻí. (Russell M. Nelson, “Tuku ke Lāngilangiʻia ʻa e ʻOtuá,” Liahona, Nōvema 2020, 92)
-
Te ke tokoni fēfē ke langaki e tuí mo e fakamoʻoní ʻi he loto ʻo kinautolu ʻoku mou feohi fakaʻahó?
-
Kuo tākiekina fēfē nai hoʻo moʻuí pe moʻui ʻa ha taha ʻokú ke ʻiloʻi ʻe he tokoni mai ʻa e ʻEikí kiate kitautolu ʻo fakafou ʻi he ngāue fakafaifekaú?
ʻEkitivitī Ako E
Naʻe foaki ʻe ʻIlaiase ʻa e kuonga ʻo e ongoongolelei ʻo ʻĒpalahamé (vakai, Tokāteline mo e Ngaahi Fuakava 110:12). ʻOku kau heni hono fakafoki mai ʻo e fuakava faka-ʻĒpalahamé.
Naʻe fakamatalaʻi ʻe Palesiteni Lāsolo M. Nalesoni ʻo pehē:
[Naʻe kau] ʻi he fuakava naʻe fai ʻe he ʻOtuá mo ʻĒpalahamé … ha ngaahi talaʻofa lahi, [ʻo] kau ai [ʻa e] … ʻe tāpuekina ʻe hono hakó e puleʻanga kotoa pē ʻo e māmaní. …
… ʻOku tau toe maʻu ʻi hono fakafoʻou e talaʻofá ni, ʻa e lakanga fakataulaʻeiki māʻoniʻoní pea mo e ongoongolelei taʻengatá. ʻOku tau maʻu e totonu ke maʻu e kakato ʻo e ongoongoleleí, fiefia he ngaahi tāpuaki ʻo e lakanga fakataulaʻeikí, pea taau ke maʻu e tāpuaki mahuʻinga taha ʻa e ʻOtuá—ʻa ia ko e moʻui taʻengatá. (Russell M. Nelson, “Ngaahi Fuakavá,” Liahona, Nōvema 2011, 87–88)
-
Ko e hā ha ngaahi founga ʻoku tāpuekina ai ʻe he ʻEikí ʻa e fakafoʻituituí, ngaahi fāmilí, mo e ngaahi puleʻangá ʻo fakafou ʻi Heʻene ongoongoleleí mo Hono lakanga fakataulaʻeikí?
-
Ko e hā ha ngaahi tāpuaki mei he ʻEikí ʻokú ke aʻusia ʻo fakafou ʻi Heʻene ongoongoleleí mo Hono lakanga fakataulaʻeikí?
ʻEkitivitī Ako F
Naʻe fakafoki mai ʻe ʻIlaisiā ʻa e ngaahi kī ʻo e silá, ʻa ia ʻoku kau ai ʻa e mafai ke silaʻi fakataha ʻa e ngaahi fāmilí ʻi he temipalé.
Naʻe fakamatalaʻi ‘e ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehe:
ʻOku malava ke fakahoko e ngaahi ouau ʻi he temipale māʻoniʻoní ʻaki e ngaahi kī ne fakafoki mai ʻe he palōfita ko ʻIlaisiā ʻo e Fuakava Motuʻá. ʻOku fakaʻatā ʻe he ngaahi ouau ʻoku fakahoko he ngaahi temipale ko ʻení ʻa e fakafoʻituituí mo e fāmilí ke foki ki he ʻao ʻo ʻetau mātuʻa fakalangí. (Gary E. Stevenson, “ʻOku ʻi Fē ʻa e Ngaahi Kī mo e Mafai ʻo e Lakanga Fakataulaʻeikí?,” Liahona, Mē 2016, 31)
-
Ko e hā ha ngaahi founga ʻoku tāpuekina ai kitautolu ʻe he ʻEikí ʻo fakafou ʻi he ngāue fakatemipalé mo e silá?
-
Kuo tāpuekina fēfē nai koe mo ho fāmilí ʻe he ʻEikí, pe te Ne tāpuekina fēfē koe mo ho fāmilí ʻo fakafou ʻi he ngaahi ouau ʻo e temipalé?
Fakakaukau ke fakamanatu ki he kau akó ʻa e meʻa ne nau fakakaukau ki ai ʻi he kamataʻanga ʻo e lēsoní. Fakaafeʻi kinautolu ke hiki ʻi heʻenau tohinoa akó “Ko e hā ʻoku mahuʻinga ai ʻa e ngaahi kī ko ʻení kiate aú?” ʻOange ha taimi ke nau fakakaukauloto mo tali ai ʻa e fehuʻi ko ʻení ʻo makatuʻunga ʻi heʻenau akó pe ko e meʻa ne nau ako ʻi he ʻekitivitií.
“ʻI he teʻeki ai ke hoko ʻa e ʻaho lahi mo fakamanavahē ʻo e ʻEikí”
Toe vakaiʻi ʻa e Tokāteline mo e Ngaahi Fuakava 110:14–16, ʻo kumi ha ngaahi foʻi lea pe kupuʻi lea ʻoku felāveʻi mo e Hāʻele ʻAnga Ua Mai ʻa Sīsū Kalaisí.
-
Ko e hā ʻa e meʻa naʻá ke ʻiló?
Poupouʻi e kau akó ke fakaʻilongaʻi ʻi heʻenau folofolá ha ngaahi foʻi lea pe kupuʻi lea mahuʻinga ne nau maʻu.
-
ʻOku teuteuʻi fēfē kitautolu ʻe he Fakamoʻuí ki Heʻene Hāʻele ʻAnga Ua Maí ʻo fakafou ʻi he ngaahi kī ʻo e lakanga fakataulaʻeikí naʻe fakafoki mai ʻe Mōsese, ʻIlaiase, mo ʻIlaisiaá?
-
ʻOkú ke pehē ko e hā ʻe “teʻia ai ʻa e māmaní … ʻaki ha malaʻiá” (Tokāteline mo e Ngaahi Fuakava110:15) ʻi he hāʻele mai ʻa e ʻEikí ka ne taʻeʻoua hono fakafoki mai ʻo e ngaahi kī ko ʻeni ʻo e lakanga fakataulaʻeikí?
Ke fakaʻosí, fakaafeʻi e kau akó ke fakakakato ʻeni ʻi heʻenau tohinoa akó. Te ke lava ʻo kole ki ha niʻihi ke vahevahe e meʻa ne nau hikí.
Fakakaukauloto ʻoku talaatu ʻe haʻo kaungāmeʻa naʻá ne ako fekauʻaki mo e ngaahi kī ʻo e lakanga fakataulaʻeiki naʻe fakafoki mai ʻi he Temipale Ketilaní. ʻOku pehē atu leva ho kaungāmeʻá, “ʻOku ʻikai ke u fakapapauʻi pe ko e hā haʻaku fekauʻaki mo ia.” Fakaʻaongaʻi ʻa e meʻa naʻá ke ako he ʻaho ní ke fakamatalaʻi ʻa e ngaahi kī naʻe fakafoki maí mo e founga kuo nau tāpuakiʻi pe lava ke tāpuakiʻi ai ho kaungāmeʻá.