Lēsoni 123: Tokāteline mo e Ngaahi Fuakava 109–110

Tokāteline mo e Ngaahi Fuakava 110, Konga 1

ʻE Fakahā ʻe he Fakamoʻuí Ia ki Hono Kāingalotú ʻi he Temipalé

ʻI he ʻaho 3 ʻo ʻEpeleli, 1836, naʻe hā ai ʻa e ʻEiki ko Sīsū Kalaisí kia Siosefa Sāmita mo ʻŌliva Kautele ʻi he Temipale Ketilaní, ʻo fakahoko ʻEne talaʻofa ke “fakahā [Ia] ki [Hono] kakaí … ʻi he falé ni” (Tokāteline mo e Ngaahi Fuakava 110:7). ʻE lava ke ʻaonga ʻa e talaʻofa ko ʻení kiate kitautolu he ʻahó ni. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻoku teuteuʻi ai kitautolu ʻe heʻetau moʻui tāú ke tau ofi ange ki he ʻEikí ʻi Hono temipalé.

Ngaahi ʻEkitivitī Ako ʻOku Ala Fakahokó

Kapau te ke lava ʻo fakataha mo e Fakamoʻuí

Ke kamata e kalasí, fakaafeʻi e kau akó ke nau fakakaukauloto ne nau maʻu e faingamālie ke mamata ki he Fakamoʻui ko Sīsū Kalaisí.

Pe, ko haʻo fakaʻaliʻali ha fakatātā ʻo e ngāue fakafaifekau ʻa e Fakamoʻuí ʻi he lotolotonga ʻo e kakai ʻo ʻAmelika he kuonga muʻá pe huluʻi e foʻi vitiō “Ko e Hā ʻa Sīsū Kalaisi ʻi he Ongo ʻAmelika he Kuonga Muʻá” mei he taimi 11:52 ki he 14:05. Fakaafeʻi e kau akó ke fakakaukauloto ne nau ʻi ai. Hili ʻa e vitioó, te ke lava ʻo ʻeke ha ngaahi fehuʻi hangē ko ʻení:

• Ko e hā ha ngaahi tāpuaki te ke ala maʻu mei hoʻo nofo mo e Fakamoʻuí?

• ʻE tokoniʻi fēfē ʻe he ngaahi tāpuaki ko ʻení hoʻo moʻuí?

ʻI hoʻo ako he ʻaho ní, kumi ha ngaahi founga te ke lava ai ʻo ofi fakalaumālie ki he ʻEikí mo fiefia ʻi he ngaahi tāpuaki ʻokú Ne finangalo ke foaki atú.

Ko e hā ʻa e Fakamoʻuí ʻi he Temipale Ketilaní

Ke teuteuʻi e kau akó ke ako fekauʻaki mo e hā ʻa e Fakamoʻuí ʻi he Temipale Ketilaní, ʻa ia ʻoku lekooti ʻi he Tokāteline mo e Ngaahi Fuakava 110, fakakaukau ke fakamanatu kiate kinautolu ʻa e ngaahi tāpuaki naʻe talaʻofa ʻe he ʻEikí ki he Kāingalotú kapau te nau langa ha temipalé (vakai, Tokāteline mo e Ngaahi Fuakava 97:15–16). ʻE lava foki ke toe vakaiʻi ʻe he kau akó ha niʻihi ʻo e ngaahi tāpuaki naʻe lotua ʻe Siosefa Sāmita ʻi hono fakatapui ʻo e temipalé (vakai, Tokāteline mo e Ngaahi Fuakava 109:12).

ʻE lava ke lau leʻolahi ʻa e palakalafi ko ʻení pe fakamatalaʻi fakanounou ke ʻomi ha puipuituʻa fakahisitōlia ʻo e Tokāteline mo e Ngaahi Fuakava 110. Fakaafeʻi e kau akó ke fakakaukauloto ki he ngaahi meʻa ko ʻeni naʻe hokó mo e ongo naʻá ne mei maʻu kapau naʻá ne ʻi ai.

ʻI he hoʻatā Sāpate Toetuʻú, ʻaho 3 ʻo ʻEpeleli 1836, naʻe fakahoko ai ha houalotu sākalamēniti ʻi he Temipale Ketilani ne toki fakatapuí. Hili hono fakahoko e sākalamēnití ki he haʻofangá, naʻe ʻalu ʻa Siosefa Sāmita mo ʻŌliva Kautele ki mui ʻi he puipui naʻá ne fakapuliki ʻa e ʻōlitá ke lotu fakalongolongo. Naʻá na mamata ai ki he hokohoko ʻo e ngaahi ʻaʻahi fakalangi ʻoku lekooti ʻi he Tokāteline mo e Ngaahi Fuakava 110. (Vakai, Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 262–63.)

Fakatokangaʻi ange: ʻOku fakamatalaʻi ʻi he lēsoni hokó (“Tokāteline mo e Ngaahi Fuakava110, Konga 2”) ʻa e ngaahi ʻaʻahi fakalangi naʻe hoko hili e hā mai ʻa e Fakamoʻuí ʻi he temipalé.

ʻI hoʻo lau e Tokāteline mo e Ngaahi Fuakava 110:1–4, fakalaulauloto ki he meʻa naʻá ke mei fakakaukau ki ai pe ongoʻi kapau naʻá ke ʻi ai mo Siosefa mo ʻŌliva lolotonga e meʻa-hā-mai ko ʻení.

• Ko e hā naʻe makehe kiate koe fekauʻaki mo e founga naʻe fakafeʻiloaki ai ʻe he Fakamoʻuí Ia ʻi he veesi 4?

• Ko e hā ʻene ʻuhinga kiate koe ko e Fakamoʻuí ʻa hotau Taukapo ki he Tamaí? (vakai, Tokāteline mo e Ngaahi Fuakava 45:3–5).

ʻOku talaʻofa mai ʻe he Fakamoʻuí te Ne fakahā Ia kiate kitautolu ʻi he temipalé

Lau ʻa e Tokāteline mo e Ngaahi Fuakava 110:5–10, ʻo kumi e ngaahi ʻuhinga naʻe folofola ʻe he Fakamoʻuí ʻoku totonu ke fiefia kotoa ai Hono Kāingalotú.

Nofotaha ʻi he ngaahi tefitoʻi moʻoni fakauluí: ʻE ala tokoni ʻa e ngāue ko ʻení ki he kau akó ke nau ʻiloʻi ha tefitoʻi moʻoni fakaului. Ki ha ako lahi ange ʻi he nofotaha ʻi he ngaahi tefitoʻi moʻoni fakauluí, vakai ki he ako “Tukutaha e tokangá ki he ngaahi moʻoni ʻoku nau tataki ki he uluí mo langaki ʻa e tui kia Sīsū Kalaisí” ʻi he Fakatupulaki Ngaahi Taukei ʻa e Faiakó: Akoʻi ʻa e Tokāteliné. Fakakaukau ke akoako ʻa e taukeí “ʻEke ha ngaahi fehuʻi ʻe tokoni ki he kau akó ke nau ʻiloʻi mo fakamatalaʻi ʻa e ngaahi tefitoʻi moʻoni fakauluí.”

• Ko e hā ha ngaahi lea pe ngaahi kupuʻi lea ʻi he ngaahi veesi ko ʻení naʻe ʻuhingamālie pe makehe kiate koe?

• ʻE tokoni fēfē nai ʻa e veesi 5 mo e 8 ke tau teuteu ke ofi ange ki he ʻEikí ʻi he temipalé?

  ʻI he ngaahi moʻoni ʻe ala ʻilo ʻe he kau akó mei he ngaahi veesi ko ʻení, tokoni ke mahino kiate kinautolu kapau te tau tauhi e ngaahi fekaú mo feinga ke maʻa ʻi he ʻao ʻo e ʻEikí, te Ne fakahā Ia kiate kitautolu ʻi Hono temipalé.

• Makehe mei he hā fakatuʻasinó, ko e hā mo ha ngaahi founga kehe ʻe lava ke fakahā mai ai ʻe he Fakamoʻuí Ia kiate kitautolu ʻi he temipalé? (ʻOku ʻasi ha ngaahi sīpinga ʻe niʻihi ʻi he veesi 8–9.)

ʻE lava ke kau ʻi he ngaahi founga kehe ʻe lava ke fakahaaʻi mai ai ʻe he Fakamoʻuí Ia kiate kitautolú, ʻa e folofola mai kiate kitautolu ʻaki Hono leʻó (veesi 8) mo ʻomi kiate kitautolu ha ngaahi tāpuaki mo ha fakakoloa, pe meʻafoaki ʻo e mālohi fakalaumālié mei ʻolunga (veesi 9). Te tau lava ʻo maʻu ʻi he temipalé ha niʻihi ʻo e ngaahi tāpuaki tatau naʻe fakakaukau ki ai ʻa e kau akó ʻi he kamataʻanga ʻo e lēsoní. ʻE lava ke kau ʻi he ngaahi tāpuaki ko ʻení ʻa hono ʻiloʻi lelei ange ʻo e Fakamoʻuí mo maʻu ha fakahinohino, nonga, mo e fakamoʻui.

Ko hono tauhi e ngaahi fekau ʻa e ʻEikí mo e maʻá

Ke tokoni ke mahino lahi ange ki he kau akó hono tauhi e ngaahi fekaú mo feinga ke maʻá, te ke lava ʻo ʻai ke nau toe vakaiʻi e ngaahi fehuʻi lekomeni temipalé, ʻo kumi e meʻa ʻoku ʻamanaki mai ki ai e ʻEikí meiate kitautolu kimuʻa pea tau hū ki Hono falé (vakai, Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ([2022], 36–37). Mahalo kuo ʻosi fai ʻe he kau akó ha meʻa tatau ʻi heʻenau ako e lēsoni “Tokāteline mo e Ngaahi Fuakava 97.”

ʻE lava ke ke tā pe fakaafeʻi ha tokotaha ako ke tā ʻa e fakatātā ko ʻení ʻi he palakipoé. ‘E lava ke tā fakatatau ‘e he kau akó ʻa e fakatātaá ‘i heʻenau tohinoa akó. Te nau lava ʻo lisi e meʻa ʻoku nau ako mei heʻenau toe vakaiʻi mai ko ʻeni ʻa e ngaahi fehuʻi ki he lekomeni temipalé.

• ʻOkú ke pehē ko e hā ʻoku finangalo ai e ʻEikí ke tau feinga ke tauhi e ngaahi fekaú kae lava ke tau ofi ange kiate Ia ʻi he temipalé?

• Ko e hā ʻene ʻuhinga kiate koe ke hoko ʻo maʻa pe taau ʻi he ʻao ʻo e ʻEikí?

Naʻe akoʻi ʻe Brother Peletilī R. Uilikoki ʻo e Kau Palesitenisī Lahi ʻo e Kau Talavoú ʻo pehē:

Ko e pōpoaki ʻa e ʻOtuá ʻoku ʻikai haohaoa ʻa e moʻui tāú. Ko e moʻui tāú ko e faitotonu mo e feinga. Kuo pau ke tau faitotonu ki he ʻOtuá, kau taki lakanga fakataulaʻeikí, pea mo e niʻihi kehe ʻoku ʻofa ʻiate kitautolú, pea kuo pau ke tau faifeinga ke tauhi e ngaahi fekau ʻa e ʻOtuá pea ʻoua naʻa teitei foʻi koeʻuhí pē ko ʻetau fai ha fehalākí. …

… Manatuʻi ʻoku malava ʻa e liliú, ko e fakatomalá ko ha ngāue ia, pea ʻoku ʻikai haohaoa ʻa e moʻui tāú. Kae mahuʻinga tahá, manatuʻi ʻoku loto-fiemālie ʻa e ʻOtuá mo Kalaisi ke tokoniʻi kitautolu ʻi heni he taimí ni. …

… Kuo pehē ʻe ʻEletā Tieta F. ʻUkitofa: “ʻOku ʻikai fiemaʻu ia ʻe he ʻOtuá ha kakai ʻoku haohaoa. ʻOkú Ne fekumi kiate kinautolu te nau foaki ʻa e ‘loto mo e ʻatamai fie [ngāué]’ [Tokāteline mo e Ngaahi Fuakava 64:34], pea te Ne ngaohi kinautolu ke ‘haohaoa ʻia Kalaisi’ [Molonai 10:32–33].” (Bradley R. Wilcox, “ʻOku ʻIkai Haohaoa ʻa e Moʻui Tāú,” Liahona, Nōvema 2021, 62, 67)

• ʻE tokoni fēfē ʻa e pōpoaki ko ʻení ki ha taha ʻoku fifili pe ʻokú ne taau ke hū ʻi he temipalé pea tuʻu ʻi he ʻao ʻo e Fakamoʻuí?

Fakatātaaʻi ʻa e mahino ʻokú ke maʻú

Ke tokoni ke fakahaaʻi ʻe he kau akó ʻenau mahinó, te ke lava ʻo ʻoange ha ngaahi tūkunga hangē ko ʻení:

Fakakaukauloto ʻoku fifili ha kaungāmeʻa pe ʻoku ʻaonga nai ke feinga ke taau ke moihū ʻi he temipalé. ʻOku fifili ha kaungāmeʻa ʻe taha pe ʻoku malava nai ke ne moʻui taau feʻunga ha taimi ke hū he temipalé. Fili ha taha ʻo e ngaahi tūkunga ko ʻení, pea tali ʻa e ongo fehuʻí ni:

• Mei he meʻa kuó ke ako he ʻaho ní, te ke tali fēfē ki he ngaahi hohaʻa ho kaungāmeʻá?

• Ko e hā ʻokú ke ʻamanaki ʻe mahino ki ho kaungāmeʻá fekauʻaki mo e Tamai Hēvaní, Sīsū Kalaisi, pea mo e temipalé?

Fakaafeʻi e kau akó ke vahevahe ʻenau ngaahi fakakaukaú. Fakakaukau ke vahevahe hoʻo ngaahi ongo fekauʻaki mo e talaʻofa ʻa e Fakamoʻuí ke fakahā Ia kiate kitautolu ʻi Hono ngaahi temipalé ʻi heʻetau feinga ke tauhi e ngaahi fekaú pea mo moʻui maʻá.

Ngaahi Maʻuʻanga Tokoni Kehé

Ko e hā ʻoku tau langa ai ha ngaahi temipale ʻi he funga ʻo e māmaní?

Naʻe fakamatalaʻi ʻe Palesiteni Lāsolo M. Nalesoni ʻo pehē:

ʻOku kau ʻa e temipalé ʻi he uho ʻo hono fakamālohia ʻo ʻetau tuí mo e ivi fakalaumālié he ko e Fakamoʻuí mo ʻEne tokāteliné, ko e ʻelito moʻoni ia ʻo e temipalé. Ko e meʻa kotoa ʻoku akoʻi ʻi he temipalé, ʻi he fakahinohinó pea ʻi he Laumālié, ʻokú ne fakatupulaki ʻetau mahino kia Sīsū Kalaisí. ʻOku haʻi kitautolu kiate Ia ʻe Heʻene ngaahi ouau mahuʻingá ʻo fakafou ʻi he ngaahi fuakava toputapu ʻo e lakanga fakataulaʻeikí. Pea, ʻi heʻetau tauhi ʻetau ngaahi fuakavá, ʻokú Ne fakakoloaʻi leva kitautolu ʻaki Hono mālohi fakaivia mo faifakamoʻuí. Pea, te tau fiemaʻu lahi Hono mālohí ʻi he ngaahi ʻaho ka hoko maí. …

… Ko e taimi te ke haʻu ai mo hoʻo lekomeni temipalé, loto-mafesifesí, mo e ʻatamai fifilí ki he fale ako ʻo e ʻEikí, te Ne akoʻi koe. (Russell M. Nelson, “Ko e Temipalé mo Ho Fakavaʻe Fakalaumālié,” LiahonaNōvema 2021, 93–95)

Ko e hā te u lava ʻo fai ke u ongoʻi taau ange ai ke hū ki he fale ʻo e ʻEikí?

Naʻe fakamanatu mai ʻe Sisitā Soi D. Sōnasi, Palesiteni Lahi mālōlō ʻo e Palaimelí:

Tuku muʻa ke u fakamahinoʻi ʻa e fiemaʻu ke fakafaikehekeheʻi ʻa e ongo foʻi lea mātuʻaki mahuʻinga ko ʻení: mahuʻingá mo e tāú. ʻOku ʻikai ke na tatau. ʻOku ʻuhinga ʻa e mahuʻinga fakalaumālié ki heʻetau fakamahuʻingaʻi kitautolu ʻi he founga ʻoku fakamahuʻingaʻi ʻaki ʻe he Tamai Hēvaní kitautolú, kae ʻikai ko e founga ʻa e māmaní. Naʻe fakapapauʻi hotau mahuʻingá kimuʻa pea tau toki haʻu ki he māmaní. “Ko e ʻofa ʻa e ʻOtuá ʻoku taʻe-fakangatangata pea ʻe tuʻuloa ʻo lauikuonga.”

ʻI he tafaʻaki ʻe tahá, ʻoku maʻu ʻa e tāú ʻi he talangofuá. Kapau te tau faiangahala, ʻoku tau taʻe-taau, ka ʻoku ʻikai ʻaupito ke tau taʻe-mahuʻinga! ʻOku hokohoko atu pē ʻetau fakatomalá mo ʻetau feinga ke hangē ko Sīsuú, ka ʻoku kei kakato pē hotau tuʻunga mahuʻingá. Hangē ko e akonaki ʻa Palesiteni Pilikihami ʻIongí: “Ko e laumālie taʻe-feʻunga taha ʻi he funga ʻo e māmaní ʻi he taimi ní … ʻoku mahuʻinga tatau ia mo e ngaahi māmaní.” Te tau kei mahuʻinga pē ki he Tamai Hēvaní ʻo tatau ai pē. (Joy D. Jones, “Mahuʻinga Taʻe-Hano-Tatau,” Liahona, Nōvema 2017, 14)

Ko e hā te u lava ʻo fai ke u vakai lahi ange ai kia Sīsū Kalaisi ʻi heʻeku moʻuí?

Naʻe pehē ʻe Sisitā Tuleisī Y. Palauningi ʻo e Kau Palesitenisī Lahi ʻo e Palaimelí:

ʻI heʻetau hoko ko e fānau fuakava ʻa e ʻOtuá, kuo tāpuekina makehe kitautolu ʻaki ha ngaahi tāpuaki lahi ʻo ha ngaahi meʻangāue fakalangi kuo tuku mai ke ne fakatupulaki ʻetau mahino ki he ngaahi meʻa fakalaumālié. ʻOku lava ke tokoni e ngaahi folofola mo e ngaahi akonaki ʻa Sīsū Kalaisi ʻoku hiki ʻi he folofolá mo e ngaahi pōpoaki mei Heʻene kau palōfita kuo filí, mo e maʻu Hono Laumālié ʻi he lotu fakaʻahó, ʻalu maʻu pē ki he temipalé, pea ʻe lava ke tokoni ʻa e ouau fakauike ʻo e sākalamēnití ke fakafoki mai ʻa e melinó mo ʻomi e meʻa-foaki ʻo e faʻa ʻiloʻiló ʻa ia te ne ʻomi ai e maama ʻa Kalaisí mo ʻEne mahinó ki heʻetau ngaahi tōʻonga fakapulipulí ʻi ha māmani ʻoku ngali puputuʻú. ʻE toe lava foki ke hoko e Fakamoʻuí ko hotau kāpasa mo e pailate ʻi heʻetau fononga ʻi he ngaahi vai nonga mo hou tuʻu fakatouʻosi ʻo e moʻuí. Te Ne lava ke fakamahino e hala totonu te ne tataki kitautolu ki hotau ikuʻanga taʻengatá. Ko ia ai, ko e hā e meʻa te Ne finangalo ke tau sio ki aí, pea ko e fē e feituʻu te Ne finangalo ke tau ʻalu ki aí? (Tracy Y. Browning, “Vakai Lahi Ange kia Sīsū Kalaisi ʻi Heʻetau Moʻuí,” Liahona, Nōvema 2022, 13–14)

Ko e fē te u lava ʻo ako lahi ange ai fekauʻaki mo ha niʻihi ʻo e ngaahi ʻaʻahi ʻa e Fakamoʻuí ki Hono ngaahi temipalé?

• Lisa Olsen Tait and Brent Rogers, “A House for Our God,” ʻi he Revelations in Context (2016), 165

• 3 Nīfai 11:8–10 (ko e hā mai ʻa e Fakamoʻuí ki he kakai Nīfaí ʻi he temipale ʻi he fonua ko Mahú)

• ʻĪsaia 6:1–9 (ko e hā mai ʻa e ʻEikí kia ʻĪsaiá)

• ʻEta 3:1–16; Mōsese 1:1–4 (ko e hā mai ʻa e ʻEikí ʻi he ngaahi moʻungá, ʻa ia naʻe faʻa hoko ko ha ngaahi temipale)

• LeRoi C. Snow, “Ko ha ʻAʻahi mei he Fakamoʻuí,” Liahona, Sepitema 2015, 80 (ko e hā mai ʻa e Fakamoʻuí kia Lōlenisou Sinou ʻi he Temipale Salt Lake)

Ngaahi ʻEkitivitī Fakalahi ki he Akó

“Māʻoniʻoni ki he ʻEikí—Ko e Fale ʻo e ʻEikí.”

ʻE ala tokoni ke mahino lelei ange ki he kau akó ʻa e ʻuhinga ʻoku fiemaʻu ai ʻa e teuteú ke hū ki he fale ʻo e ʻEikí.

Kole ange ke nau fakakaukauloto naʻa nau fakaafeʻi ha kaungāmeʻa ki ʻapi ke nau maʻu meʻatokoni efiafi.

• Ko e hā ha ngaahi lao fakafāmili te ke fie fakapapauʻi ʻoku mahino ki ho kaungāmeʻá ke ne fakahaaʻi ʻene fakaʻapaʻapa ki ho fāmilí mo ho ʻapí?

Hili iá pea fakaʻaliʻali ha fakatātā ʻo e temipale ofi tahá ʻoku hā ai ʻa e ngaahi lea “Māʻoniʻoni ki he ʻEikí—Ko e Fale ʻo e ʻEikí.”

• Ko e hā ʻoku talamai ʻe he tohi ko ʻení fekauʻaki mo e temipale kotoa pē ʻi he funga ʻo e māmaní?

• Ko e hā te tau lava ʻo fai ke fakahaaʻi ha fakaʻapaʻapaʻi ki he fale ʻo e ʻEikí?

Hili hono aleaʻí, te ke lava ʻo vahevahe ange ko e taha ʻo e ngaahi meʻa ʻoku tau fai ke fakaʻapaʻapaʻi pe ʻapasia ai ʻi he fale ʻo e ʻEikí ko hono fakapapauʻi ʻoku mateuteu lelei ʻa e tokotaha kotoa pē ʻoku hū ki he temipalé.

Naʻe fakamatalaʻi ʻe Palesiteni Lāsolo M. Nalesoni ʻo pehē:

Koeʻuhí ko e toputapu ʻa e temipalé, ʻoku kole mai ai e ʻEikí ke tau maluʻi ia mei hano ʻuliʻi. ʻE lava pē ke hū ki ai ha taha ʻoku loto fiemālie ke ne teuteu lelei atu ki he faingamālie ko iá. ʻE lava ʻe he teuteú ʻo fakamālohia e ngaahi tafaʻaki kehekehe ʻo e ngāué. ʻOku ou manatu ki heʻeku kei siʻí, ʻeku talaange ki heʻeku ongomātuʻá ʻoku ou fie hū ki he ʻunivēsití. Naʻá na talamai te u lava ʻo hū ki ai, ka ʻe toki lava pē ia kapau te u ngāue mālohi ʻi he akoʻanga māʻolungá mo fakakakato e ngaahi fiemaʻu kotoa ke hū ki he ʻunivēsití. ʻI he founga tatau, kuo pau ke tau feʻunga ke hū ki he temipalé. ʻOku tau teuteu fakatuʻasino, fakaʻatamai, mo fakalaumālie. Ko e feʻunga ʻa e tokotaha takitaha ʻoku kole lekomení, ʻoku fakapapauʻi fakafoʻituitui pē ia. …

… ʻOku faingofua pē e ngaahi meʻa ʻoku fiemaʻú. Ko hono fakanounoú, ʻoku fiemaʻu ʻa e fakafoʻituituí ke ne tauhi e ngaahi fekau ʻAʻana ʻoku ʻoʻona ʻa e falé. Ko Ia ʻokú Ne fokotuʻu e ngaahi tuʻunga moʻuí. ʻOku tau hū ki he temipalé ko ʻEne kau fakaafe. (Russell M. Nelson, “Teuteu ki he Ngaahi Tāpuaki ʻo e Temipalé,” Liahona, ʻOkatopa 2010, 42–43)