Lēsoni 111: Tokāteline mo e Ngaahi Fuakava 94–97

Tokāteline mo e Ngaahi Fuakava 97

Saione—Ko e Loto Maʻa

Lolotonga hono aʻusia ʻe he Kāingalotu ʻi he fonua ko Saioné (Vahefonua Siakisoni, Mīsulí) ha fakatanga lahí, naʻa nau fie ʻilo ki he finangalo ʻo e ʻEikí maʻanautolú. Naʻe akoʻi kinautolu ʻe he ʻEikí fekauʻaki mo e ngaahi tāpuaki ʻo e loto-maʻá. ʻE lava ke tokoni ʻa e lēsoni ko ʻení ki he kau akó ke nau loto-maʻa.

Ngaahi ʻEkitivitī Ako ʻOku Ala Fakahokó

Vai maʻa

Fakakaukau ke kamata e kalasí ʻaki ha lēsoni fakataumuʻa ʻo fakaʻaongaʻi e vaí. Fakaʻaliʻali ki he kalasí ha vai maʻa, pea aleaʻi ʻa e ngaahi tāpuaki ʻo e vai maʻá pea mo e ngaahi nunuʻa ʻo hono fakaʻaongaʻi ʻo e vai taʻe maʻá. Te ke lava ʻo tokoni ki he kau akó ke fakafehoanaki ʻa e ngaahi tāpuaki ʻo e vai maʻá ki he ngaahi tāpuaki ʻo e maʻu ha loto-maʻá.

• Ko e hā ha ngaahi lelei ʻo hono maʻu ha vai ʻoku maʻa mo haohaoá?

• Ko e taimi ʻoku taʻemaʻa ai ʻa e vaí, ko e hā ha ngaahi founga ke sivi ai ia ke maʻá?

• ʻE lava fēfē ke fakafehoanaki ʻa e vai maʻá ki ha loto-maʻá?

Naʻe fakahā ʻe he ʻEikí ʻi he Tokāteline mo e Ngaahi Fuakava 97, ʻa ʻEne finangalo ke maʻu ʻe Hono kakaí ha loto-maʻá. ʻI hoʻo ako he ʻaho ní, fakakaukau ki he tuʻunga ho lotó. Fekumi ki ha ueʻi fakalaumālie ke mahino e ngaahi tāpuaki ʻo hono fakaʻatā e ʻEikí ke Ne fakamaʻa ho lotó.

Ko Saioné ko e loto-maʻa

Naʻe fiemaʻu ʻe ha kulupu ʻo ha kaumātuʻa ʻi “Saione,” ko ha hingoa naʻe fakaʻaongaʻi ʻi he taimi ko iá ʻi he taimi naʻe ʻuhinga ai ki he Vahefonua Siakisoni, Mīsulí, ke nau ʻilo ki he finangalo ʻo e ʻEikí maʻanautolú, ko ia ne nau fai ai ha tohi kia Siosefa Sāmita ke fekumi ki ha ngaahi tali. ʻI hono talí, naʻe fakamatalaʻi ʻe he ʻEikí ha ngaahi palani maʻongoʻonga ki he akó, Siasí, pea naʻa mo e temipale ʻi he fonua ko Saioné. Ke fakaʻaiʻai ʻa e Kāingalotú ke nau maʻa mo tali Iá, naʻe fakafehoanaki kinautolu ʻe he ʻEikí ki ha fuʻu ʻakau ʻe ua: ko e taha ʻe tuʻusi hifo pea mo e taha naʻe fua lahi (vakai, Tokāteline mo e Ngaahi Fuakava 97:1–10). Hangē pē ko hono ui ʻe he ʻEikí ʻa e kakai ʻo ʻĪnoké ko Saioné (vakai, Mōsese 7:18), naʻe finangalo ʻa e ʻEikí ke ui ʻEne Kāingalotu ʻi he ngaahi ʻaho kimui ní ko Saione. Naʻá Ne finangalo ke nau hoko ʻo hangē ko Iá, kae ʻikai nofo pē ʻi ha feituʻu ʻoku ui ko Saione.

Lau ʻa e Tokāteline mo e Ngaahi Fuakava 97:21, ʻo kumi e founga naʻe fakamatalaʻi ʻaki ʻe he ʻEikí ʻa Saioné.

Mahalo te ke fie hiki ʻa e Ko Saioné ko e loto-maʻa ʻi he palakipoé. ʻE lava ke ke fakaafeʻi e kau akó ke fakaʻilongaʻi ha ngaahi lea ʻi heʻenau folofolá ʻoku nau akoʻi e foʻi moʻoni ko ʻení.

Kapau ʻoku fiemaʻu tokoni ʻa e kau akó ki hono tali ʻo e fehuʻi ko ʻení, te ke lava ʻo fakahinohino kinautolu ki he Mōsaia 5:2 pe ʻAlamā 13:12.

• ʻOkú ke pehē ko e hā hono ʻuhinga ʻo e loto-maʻá?

Naʻe akonaki ʻa Palesiteni Lāsolo M. Nalesoni fekauʻaki mo e meʻa te tau lava ʻo fai ke maʻá:

ʻOku ʻikai ʻamanaki e ʻEikí ia te tau haohaoa ʻi he tuʻunga ko ʻeni ʻo ʻetau fakalakalaka taʻengatá. Ka ʻokú Ne ʻamanaki ke fakautuutu ange ʻetau haohaoá. Ko e fakatomala fakaʻahó ko e hala ia ki he maʻá, pea ʻoku ʻomi ʻe he maʻá ʻa e mālohí. (Russell M. Nelson, “Te Tau Lava ʻo Fai Lelei Ange pea toe Lelei Ange,” Liahona, Mē 2019, 68)

• Ko e hā ha meʻa ʻoku tokoni atu ʻa e kupuʻi lea ko ʻení ke mahino kiate koe fekauʻaki mo e maʻá?

ʻOku maʻu e ngaahi tāpuaki ʻa e ʻEikí ʻi he temipalé

ʻI he Tokāteline mo e Ngaahi Fuakava 97:10–21, naʻe ʻoange ai ʻe he ʻEikí ki Hono kakaí ha ngaahi fakahinohino ʻe tokoni kiate kinautolu ke nau loto-maʻa. Lau ʻa e Tokāteline mo e Ngaahi Fuakava 97:10–12, ʻo kumi e ngaahi fakahinohino naʻe ʻoange ʻe he ʻEikí ki Hono kakaí.

• Ko e hā ha meʻa ʻokú ke ʻilo fekauʻaki mo e ngaahi temipale ʻo e ʻEikí ʻoku tokoni ke mahino kiate koe ʻa e ʻuhinga te nau lava ai ʻo tokoniʻi Hono kakaí ke nau loto-maʻá?

ʻE lava ke hoko ʻeni ko ha taimi lelei ke ke tokoni ki he kau akó ʻi hono akoako fakahoko ʻa e taukei ako folofola ʻo hono kumi ha ngaahi lisi ʻi he folofolá. ʻE lava ke lisi ʻe he kau akó ʻa e ngaahi tāpuaki ʻe maʻu mei hono langa ʻo e temipalé.

Te ke lava foki ʻo tā ha fōtunga ʻo ha temipale ʻi he palakipoé. Fakaafeʻi e kau akó ke fakafonu ʻaki ia ha ngaahi lea mo e kupuʻi lea ʻoku nau fakamatalaʻi e ngaahi tāpuaki ʻa e ʻEikí.

Lau ʻa e Tokāteline mo e Ngaahi Fuakava 97:13–21, ʻo kumi e ngaahi tāpuaki naʻe fakamatalaʻi ʻe he ʻEikí ʻoku fehokotaki mo e moihū ʻi Hono temipalé.

• ʻE fakaʻaiʻai fēfē kitautolu ʻe he ngaahi tāpuaki ko ʻení ke tau loto-maʻá?

Mahalo naʻe fakatokangaʻi ʻe he kau akó ko e taha ʻo e ngaahi tāpuaki naʻe talaʻofa ʻe he ʻEikí ko kinautolu ʻoku loto-maʻá “te nau mamata ki he ʻOtuá” (veesi 16). Mahalo te ke fie fakaafeʻi e kau akó ke fakafehokotaki e veesi ko ʻení ki he Saame 24:3–5 mo e Mātiu 5:8 pea fehuʻi ki he kau akó pe ko e hā e ngaahi fehokotaki ʻoku nau fakatokangaʻi ʻi he ngaahi veesi ko ʻení ʻo fekauʻaki mo e loto-maʻá mo e mamata ki he ʻOtuá.

Naʻe lea ʻaki ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e Tokāteline mo e Ngaahi Fuakava 97:15–17 pea akoʻi ʻa e ʻuhinga ʻo e mamata ki he ʻOtuá ʻi he temipalé:

Naʻe fakamahino mai ʻe Palesiteni Lāsolo M. Nalesoni kiate kitautolu te tau lava ʻo “mamata” ki he Fakamoʻuí ʻi he temipalé ʻi he ʻuhinga ko ia ʻoku ʻikai ke Ne toe sola kiate kitautolú. Naʻe pehē ʻe Palesiteni Nalesoni: “ʻOku tau maʻu ha mahino kiate Ia. ʻOku mahino kiate kitautolu ʻa ʻEne ngāué mo Hono nāunaú. Pea ʻoku kamata ke tau ongoʻi ʻa e taʻefakangatangata ʻo ʻEne moʻui taʻe-mafakatatauá” [Teachings of Russell M. Nelson (2018), 369].

Kapau te tau ō ki he temipalé ʻoku ʻikai ke tau maʻa feʻunga, he ʻikai ke tau lava ʻo mamata, ʻi he mālohi ʻo e Laumālie Māʻoniʻoní, ki he akonaki fakalaumālie fekauʻaki mo e Fakamoʻuí ʻa ia ʻoku tau lava ke maʻu ʻi he temipalé. (Henry B. Eyring, “Fie Siofia ha Temipale,” Liahona, Mē 2021, 30)

• ʻE fakaʻaiʻai fēfē nai ʻe he talaʻofa ko ʻení ha taha ke loto-maʻá?

• ʻOkú ke pehē ko e hā ʻoku fiemaʻu ai ʻe he ʻEikí ha taha loto-maʻa ke hū ki he temipalé?

Ko e hoko ʻo loto-maʻá

Te ke lava ʻo tokoni ke aleaʻi ʻe he kau akó ʻa e founga ʻe lava ke tokoniʻi ai kitautolu ʻe he ʻinitaviu lekomeni temipalé ke tau fakafuofuaʻi pe ʻoku tau loto-maʻá. ʻE lava ke vahevahe ha kau ako tokosiʻi ne toki ʻinitaviu ke maʻu ha lekomeni temipale pe naʻe fēfē ʻenau tali e ngaahi fehuʻi ko iá. Te ke lava foki ʻo fai ʻa e fakaafe ko ʻení:

ʻE lava ke maʻu ʻa e ngaahi fehuʻi ʻinitaviu lekomeni temipalé ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí. Tuku ha taimi ke fakalaulauloto ai ki he ngaahi fehuʻi takitaha ki he lekomeni temipalé. Fakakaukau ki he founga ʻoku fakahaaʻi ai ʻe hoʻo ngaahi talí ʻa e tuʻunga ho lotó.

ʻOange ha taimi ki he kau akó ke nau fakakaukau ai ki he ngaahi fehuʻi ko ʻení ʻi he kalasí. ʻI he ʻosi pē fakalaulauloto ʻa e kau akó ki he fehuʻi takitaha, te ke lava ʻo poupouʻi kinautolu ke nau fili ha meʻa ʻe taha pe ua te nau lava ʻo fai, ʻe lava ʻo tokoni ke fakamaʻa honau lotó. Te ke lava ʻo kole ki he kau akó ke nau tali ʻa e ongo fehuʻi ko ʻení ʻi heʻenau tohinoá:

• Ko e hā ha meʻa te ke fai ke fakaʻatā ʻa e ʻEikí ke Ne fakamaʻa ho lotó?

• ʻOkú ke pehē ko e hā e ʻuhinga ʻoku fuʻu mahuʻinga ai ki he Tamai Hēvaní mo Sīsū Kalaisi ke maʻa ho lotó?

Ngaahi Maʻuʻanga Tokoni Kehé

Tokāteline mo e Ngaahi Fuakava 97:11–12. Ko e hā e meʻa naʻe ʻuhinga ki ai ʻa e ʻEikí ʻi Heʻene kole ki ha vahehongofulu ke langa e temipalé?

Hangē ko hono fakaʻaongaʻi ʻi he vahe 97, naʻe ʻuhinga ʻa e vahehongofulú ki ha faʻahinga foaki tauʻatāina pē (vakai, The Joseph Smith Papers, Documents, Volume 3: February 1833–March 1834, 201, note 241).

Ko e hā e ngaahi tāpuaki ʻoku ʻomi ʻe he ʻEikí ʻo fakafou ʻi hono langa ʻo e ngaahi temipalé?

Naʻe akonaki ʻa Palesiteni Lāsolo M. Nalesoni ʻo pehē:

ʻOua muʻa naʻa teitei ngalo ʻiate kitautolu ʻa ia ʻoku fakahoko ʻe he ʻEikí maʻatautolu he taimi ní. ʻOkú Ne fakafaingamālieʻi lahi ange Hono ngaahi temipalé. ʻOkú Ne hiki e tuʻunga vave ʻo ʻetau langa e ngaahi temipalé. ʻOkú Ne fakalahi hotau ivi malava ke tānaki fakataha ʻa ʻIsilelí. ʻOkú Ne fakafaingofuaʻi ange foki ʻetau fakahaohaoaʻi fakalaumālie kitautolu takitahá. ʻOku ou palōmesi atu ʻi he lahi ange homou taimi ʻi he temipalé, ʻe tāpuekina hoʻomou moʻuí ʻi ha ngaahi founga taʻe-hano-tatau. (Russell M. Nelson, “Tokanga Taha ki he Temipalé,” Liahona, Nōvema 2022, 121)

ʻOku teuteuʻi fēfē au ki he temipalé ʻi heʻeku feʻunga ke maʻu ha lekomeni temipalé?

Naʻe fakamatalaʻi ʻe Palesiteni Lāsolo M. Nalesoni ʻo pehē:

Ko e moʻui taau fakafoʻituitui ke hū ki he fale ʻo e ʻEikí ʻoku fiemaʻu ai ha mateuteu fakalaumālie fakafoʻituitui lahi. Ka ʻi he tokoni ʻa e ʻEikí, ʻoku ʻikai ha meʻa ia ʻe taʻemalava. ʻI he ngaahi meʻa ʻe niʻihi, ʻoku faingofua ange ke langa ha temipale ʻi hano langaki ha kakai ʻoku mateuteu ki ha temipale. Ko e moʻui taau fakafoʻituituí ʻoku fiemaʻu ai e ului kakato ʻo e ʻatamaí mo e lotó ke tatau ange mo e ʻEikí, ke hoko ko ha tangataʻi fonua faitotonu, ke hoko ko ha faʻifaʻitakiʻanga lelei ange, pea mo hoko ko ha taha māʻoniʻoni ange. (Russell M. Nelson, “Lea Tukú,” Liahona, Nōvema 2019, 121–122)

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku tau fakaʻamu lahi ke moʻui taau ʻa e kāingalotu ʻo e Siasí ke maʻu ha lekomeni temipale. Mou kātaki ʻo ʻoua te mou pehē ko e temipalé ko ha taumuʻa ia ʻoku tāumamaʻo pe taʻemalava. ʻE lava ke aʻusia ʻe he tokolahi taha ʻo e kāingalotú e ngaahi fiemaʻu māʻoniʻoni kotoa pē ʻi ha kiʻi taimi nounou kapau ʻoku nau lotoʻaki ke taau mo fakatomala kakato mei he maumau fonó pea ngāue mo ʻenau pīsopé. (Quentin L. Cook, “Sio Kiate Koe ʻi he Loto Temipalé,” Liahona, Mē 2016, 98)

Ngaahi ʻEkitivitī Fakalahi ki he Akó

Tokāteline mo e Ngaahi Fuakava 97:1–2. Fekumi faivelenga ke ako ʻa e potó

ʻE ala ʻaonga ki he kau akó ʻenau ako fekauʻaki mo hono fakatupulaki ʻenau malava ke ʻilo ʻa e potó mo e moʻoní. Kole ki he kau akó ke vahevahe ha ngaahi ʻulungaanga mo ha ngaahi tōʻonga ʻa ha taha ʻokú ne maʻu ha holi lahi ke ako.

Te ke lava ʻo fakamatalaʻi ange naʻe uiuiʻi ʻa Paʻale P. Pālati ke ne tokangaʻi ha akoʻanga ʻo e kaumātuʻa ʻi Saioné naʻe tatau mo e Akoʻanga ʻo e Kau Palōfitá naʻe fokotuʻu ʻe he Palōfita ko Siosefa Sāmitá ʻi ʻOhaioó. Naʻe fetohiʻaki ʻa Paʻale mo Siosefa, pea naʻe ʻomi ʻa e Tokāteline mo e Ngaahi Fuakava 97 ko ha tali ki ha taha ʻo e ʻū tohi ko iá. Fakaafeʻi e kau akó ke nau lau ʻa e veesi 1–2, ʻo kumi e meʻa naʻe folofola ʻe he ʻEikí naʻá ne ʻai e kaumātuʻa ʻi Saioné ke nau hoko ko ha kau ako leleí. Tokoni ki he kau akó ke nau ʻiloʻi ha foʻi moʻoni mei he ongo veesi ko ʻení, hangē ko e ʻoku ʻaloʻofa ʻa e ʻEikí pea te Ne tāpuekina kitautolu ʻaki ha poto mo ha moʻoni ʻi heʻetau fakavaivaiʻi kitautolu mo fekumi faivelenga ke akó.

Te ke lava ʻo kole ki he kau akó ke nau aleaʻi mo kumi ʻa e ʻuhinga ʻe ala hoifua lelei ai ʻa e ʻEikí ke tāpuakiʻi kitautolu ʻaki ʻa e potó mo e moʻoní ʻi he taimi ʻoku tau ako ai ʻi he founga ko ʻení.

Tokāteline mo e Ngaahi Fuakava 97:7–9. Fuʻu ʻakau ʻe ua

ʻE lava ke tokoni ʻa e Tokāteline mo e Ngaahi Fuakava 97:7–9 ke ako ʻa e kau akó fekauʻaki mo e meʻa te nau lava ʻo fai ke tali ai kinautolu ʻe he ʻEikí. Fakaafeʻi e kau akó ke fakalaulauloto ki he ʻuhinga te nau fiemaʻu ai ke tali kinautolu ʻe he ʻEikí. Te ke lava ʻo fakaafeʻi e kau akó ke fakamatalaʻi ʻa e ongo fuʻu ʻakau ʻi he ngaahi vēsí pe tā ha fakatātā faingofua ʻo e fuʻu ʻakau takitaha. Te nau lava ʻo fakahingoa ʻa e fuaʻiʻakau ʻi he fuʻu ʻakau leleí ʻaki ʻa e ngaahi ʻulungaanga ʻoku fakamatalaʻi ʻi he veesi 8. Aleaʻi hono ʻuhinga ʻo e maʻu ha loto-mafesifesi mo ha laumālie fakatomalá pea mo hono tauhi ʻetau ngaahi fuakavá ʻi he feilaulaú. Kole ki he kau akó ke vahevahe ʻa e founga ʻe lava ke tokoni ai hono fakahoko ʻo e ngaahi meʻa ko ʻení ke tali kitautolu ʻe he ʻEikí.

Tokāteline mo e Ngaahi Fuakava 97:18–28. “Saione—ko e loto-maʻá”

Mahalo ʻe lelei ke mahino ki he kau akó pe ko e hā ʻa Saione pea mo ʻene fekauʻaki mo kinautolú. Hiki e foʻi lea Saione ʻi he palakipoé pea kole ki he kau akó ke vahevahe ʻa e meʻa ʻoku nau ʻilo fekauʻaki mo Saioné. Tokoni ke mahino ki he kau akó naʻe ui ʻe he kakai naʻe nofo ʻi he Vahefonua Siakisoni, Mīsulí, ʻa e feituʻu naʻa nau nofo aí ko Saione. Naʻe fakaʻamu ʻa e Kāingalotu naʻe nofo ʻi Mīsulí ke fokotuʻu ʻa Saione ʻo tatau mo e meʻa ne nau laukonga ki ai ʻi he folofolá (vakai, Fakahinohino ki he Ngaahi Folofolá, “Saione”). Tokoni ke ʻiloʻi ʻe he kau akó e founga naʻe fakaʻuhingaʻi ai ʻe he ʻEikí ʻa Saioné ʻaki hono lau e Tokāteline mo e Ngaahi Fuakava 97:21 (vakai foki, Mōsese 7:18). Hili iá, te ke lava ʻo fakaafeʻi e kau akó ke nau ako ʻa e Tokāteline mo e Ngaahi Fuakava 97:18–28, ʻo kumi e ngaahi tāpuaki naʻe finangalo e ʻEikí ke foaki ki he Kāingalotu ʻi Mīsulí, kapau ne nau fili ke hoko ʻo “loto-maʻá” (Tokāteline mo e Ngaahi Fuakava 97:21).