“Lēsoni 112—Akoako Fakataukei Fakatokāteline 7: Ako Maʻulotó; Ko Hono Maʻu ʻo e ʻIlo Fakalaumālié,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Akoako Fakataukei Fakatokāteline 7,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 112: Tokāteline mo e Ngaahi Fuakava 94–97
Akoako Fakataukei Fakatokāteline 7
Ako Maʻulotó; Ko Hono Maʻu ʻo e ʻIlo Fakalaumālié
ʻE lava ke tokoni ʻa e fakataukei fakatokāteliné ki he kau akó ke langa ʻa e makatuʻunga ki heʻenau moʻuí ʻia Sīsū Kalaisi mo ʻEne ongoongoleleí. ʻE ʻoange ʻe he lēsoni ko ʻení ha ngaahi faingamālie ki he kau akó ke nau ako maʻuloto ʻa e ngaahi potufolofola fakataukei fakatokāteliné mo e tokāteline ʻoku nau akoʻí. ʻE tokoni foki ia ke nau ako mo fakaʻaongaʻi ʻa e ngaahi tefitoʻi moʻoni fakalangi ki hono maʻu ʻo e ʻilo fakalaumālié.
Ngaahi ʻEkitivitī Ako ʻOku Ala Fakahokó
Fakamanatu ʻo e fakataukei fakatokāteliné: ako maʻuloto
Fakakaukau ke kamata e kalasí ʻaki ha ʻekitivitī nounou ʻe lava ʻo tokoni ke mahino ki he kau akó ʻa e mahuʻinga hono ako maʻuloto ʻo e ngaahi potufolofola fakataukei fakatokāteliné mo e ngaahi kupuʻi lea mahuʻingá. Hangē ko ʻení, te ke lava ʻo fakaʻaliʻali ha paʻanga, meʻakai, tohinoa, pe ha ngaahi meʻa kehe ʻe ala tauhi ʻe he kakaí. Fakaafeʻi e kau akó ke aleaʻi e ngaahi fehuʻi ko ʻení mo hanau hoa.
-
Ko e hā e ʻuhinga ka tānaki pe tauhi ai ʻe he kakaí ʻa e ngaahi meʻa ko ʻení?
-
Ko e hā ha ngaahi meʻa kehe ʻe lava ke tānaki ʻe he kakaí pea tauhi ke fakaʻaongaʻi ʻi he kahaʻú?
-
ʻE lava fēfē ke fekauʻaki ʻeni mo hono ako maʻuloto ʻo e ngaahi potufolofola fakataukei fakatokāteliné mo e ngaahi kupuʻi folofola mahuʻingá?
Mahalo te ke fie fakaafeʻi e kau akó ke vahevahe e meʻa ne nau aleaʻi mo honau hoá. Fakakakato fakakalasi ʻeni.
Lau ʻa e Tokāteline mo e Ngaahi Fuakava 84:85. Fekumi ki he talaʻofa ʻoku ʻomi ʻe he ʻEikí kapau te tau tauhi pe mataʻikoloa ʻaki ʻEne folofolá ʻi hotau ʻatamaí.
-
Ko e ʻuhinga ki he hā ʻa e “ngaahi folofola ʻo e moʻuí”?
-
Ko e hā ha ngaahi founga kehekehe kuó ke feinga ai ke mataʻikoloa ʻaki e folofola ʻa e ʻOtuá ʻi ho ʻatamaí?
-
Kuo tokoniʻi fēfē koe ʻe he ngaahi ngāue ko ʻení ke ke ongoʻi e ʻofa pe mālohi ʻo e ʻOtuá ʻi hoʻo moʻuí?
Fakaafeʻi e kau akó ke nau fakakaukau ki ha ngaahi taimi ʻi heʻenau moʻuí kuo nau fakakaukau ai ki ha potufolofola fakataukei fakatokāteline pe ko ha potufolofola kehe ʻi ha taimi faingataʻa, hangē ko e taimi ne nau fehangahangai ai mo ha fili faingataʻa pe fekumi ki ha tali ki ha fehuʻi. Fakakaukau ke vahevahe ha ngaahi sīpinga ʻo e founga kuo faitāpuekina ai hoʻo moʻuí ʻi hono ako maʻuloto ʻo e folofolá.
-
Kuo tāpuekina fēfē koe ʻe he ʻEikí ʻaki hono tokoniʻi koe ke ke manatuʻi ha potufolofola ʻi he houa pē ko ia naʻá ke fiemaʻu aí?
ʻOange ha taimi ki he kau akó ke nau mataʻikoloa ʻaki e folofola ʻa e ʻOtuá ʻi honau ʻatamaí ʻaki hono ako maʻuloto e ngaahi potufolofola fakataukei fakatokāteliné mo e ngaahi kupuʻi folofola mahuʻingá. Ko ha founga ʻeni ʻe taha ke fakahoko ai ʻeni. (ʻOku maʻu ha ngaahi fakakaukau lahi ange ki he ako maʻulotó ʻi he fakalahi ʻa ia ʻoku ʻi he ngataʻanga ʻo e tohi lēsoni ko ʻení, ʻi he “Ngaahi ʻEkitivitī Fakamanatu ʻo e Fakataukei Fakatokāteliné.” ʻOku ʻikai totonu ke lōloa ange ʻi he miniti ʻe 10 pe 15 ʻa e ʻekitivitī ʻokú ke fili ke fakaʻaongaʻí koeʻuhí ke maʻu ʻe he kau akó ha taimi feʻunga ke nau ʻahiʻahi fakaʻaongaʻi ai e ngaahi tefitoʻi moʻoni ʻo hono maʻu ʻo e ʻilo fakalaumālié ʻamui ange ʻi he lēsoní.)
Fakakaukau ke teuteu ha fanga kiʻi laʻipepa pe kaati iiki maʻá e kau akó pea ʻoange kiate kinautolu ʻa e fakahinohino ko ʻení.
-
Fili ha potufolofola fakataukei fakatokāteline ʻe tolu ki he nima ʻokú ke ongoʻi ʻe mahuʻinga ke “mataʻikoloa ʻaki” pe ako maʻuloto.
-
Fakakaukau ki he founga ʻe ala tokoniʻi ai koe ʻe hono mataʻikoloa ʻaki e ngaahi potufolofola ko ʻení ke ke muimui kia Sīsū Kalaisi mo ʻEne ngaahi akonakí.
-
Faʻu ha kaati fakaʻaliʻali ki he potufolofola takitaha kuó ke filí ʻaki hono hiki e potufolofolá ʻi muʻa ʻi ha laʻipepa pea mo e kupuʻi folofola mahuʻingá ʻi mui.
-
Ako maʻuloto ʻa e meʻa ʻoku hiki ʻi he ongo tafaʻaki ʻo e kaati takitaha.
Hili ha taimi siʻi, ʻe lava ke fakafetongi ʻe he kau akó ʻenau ʻū kātí mo ha kaungā ako pea fakaangaanga ke ako maʻuloto ha ngaahi potufolofola fakataukei fakatokāteline lahi ange. Te nau lava foki ʻo fesiviʻiʻaki kinautolu ʻo fakaʻaongaʻi e fanga kiʻi kaati fakaʻaliʻali naʻa nau faʻú.
Ako mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié
ʻOku nofotaha e toenga ʻo e lēsoní ʻi hono tokoniʻi e kau akó ke toe vakaiʻi e ngaahi tefitoʻi moʻoni ʻo hono maʻu e ʻilo fakalaumālié pea akoako fakaʻaongaʻi kinautolu ʻi ha tūkunga fekauʻaki mo e Lea ʻo e Potó.
Fakakaukau ke ʻoange ki he kau akó ʻa e tūkunga ko ʻení. Te ke lava ʻo fakaafeʻi e kau akó ke nau tokoni ʻi hono liliu e tūkungá ke toe fenāpasi ange mo e ngaahi tūkunga ʻoku nau ala fehangahangai mo ia fekauʻaki mo e Lea ʻo e Potó.
Kuo ʻeke atu ʻe ha niʻihi ʻo ho ngaahi kaungāmeʻa ʻoku ʻikai kau ki he Siasí pe ko e hā e ʻuhinga ʻoku ʻikai ke ke inu kofi, tī, pe kava mālohi aí. Hili hoʻo fakamatalaʻi nounou ʻa e meʻa ʻokú ke ʻilo fekauʻaki mo e Lea ʻo e Potó, ʻoku tala atu ʻe hoʻo ngaahi kaungāmeʻá ʻoku nau fakakaukau ʻoku fuʻu mamafa ia pea ʻoku nau fehuʻi atu, “Ko e hā e ʻuhinga ka fie moʻui pehē ai ha taha?”
-
Ko e tefitoʻi moʻoni fē ʻi hono maʻu ʻo e ʻilo fakalaumālié ʻokú ke ongoʻi ʻe ʻaonga taha ke ke fakakaukau ki ai ʻi hoʻo fakahoko ha tali ki ho ngaahi kaungāmeʻá? Ko e hā hono ʻuhingá?
ʻI he tali ʻa e kau akó ki he fehuʻi kimuʻá, te ke lava ʻo fakafuofuaʻi ʻa e tuʻunga lelei ʻo ʻenau mahino ki he ngaahi tefitoʻi moʻoni ki hono maʻu ʻo e ʻilo fakalaumālié. Hili iá, ʻe lava leva ke ke fakaʻaongaʻi ʻa e ʻekitivitī ko ʻení pe liliu ia ʻo ka fiemaʻu.
Fakakaukau ke vahevahe fakakulupu iiki hoʻo kalasí. Fakaafeʻi e kulupu takitaha ke fili ha tefitoʻi moʻoni ʻo e ko hono maʻu ʻo e ʻilo fakalaumālié ke nau ako. Fakaafeʻi ʻa e kau akó ke ako ʻenau tefitoʻi moʻoni ne nau fili mei he palakalafi 5–12 ʻi he Fakamatala ki he ʻElito ʻo e Fakataukei Fakatokāteliné. ʻI heʻenau akó, fakaafeʻi e kulupu takitaha ke hiki ha fehuʻi ʻe taha pe ua ʻoku fekauʻaki mo ʻenau tefitoʻi moʻoní. ʻOku totonu ke hoko ʻeni ko ha ngaahi fehuʻi ʻe ala tokoni ke nau fakahoko ha tali ki honau ngaahi kaungāmeʻa ʻi he tūkunga kimuʻá. Te ke lava ʻo fakaʻaongaʻi e ngaahi fehuʻi ko ʻení ko ha ngaahi sīpinga pe kapau ʻoku fiemaʻu tokoni e kau akó.
Ngāue ʻi he tuí
-
ʻOku hoko fēfē hoʻo tukupā ke talangofua ki he Lea ʻo e Potó (vakai, Tokāteline mo e Ngaahi Fuakava 89) ko ha ngāue ʻo e tui kia Sīsū Kalaisí?
-
Ko e hā ʻokú ke ʻilo fekauʻaki mo Sīsū Kalaisi mo ʻEne ongoongoleleí ʻe lava ʻo tokoni atu ke ke talangofua ki he Lea ʻo e Potó neongo kapau naʻe ʻikai mahino kakato ia kiate koe?
Vakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
-
ʻOku tākiekina fēfē ʻe he mahino ʻokú ke maʻu ki he palani ʻa e ʻOtuá ki he fakamoʻuí hoʻo fakakaukau ki he Lea ʻo e Potó?
-
Ko e hā ha ngaahi lelei taimi nounou ʻe ala tui ʻa e kakaí te nau lava ʻo maʻu ʻi he ʻikai ke nau talangofua ki he Lea ʻo e Potó? ʻOku fakafehoanaki fēfē ʻa e ngaahi lelei ko ʻení ki he ngaahi tāpuaki taimi lōloa kuo talaʻofa ʻe he Fakamoʻuí ʻi heʻetau talangofua ki he Lea ʻo e Potó? (vakai, Tokāteline mo e Ngaahi Fuakava 89:18–21).
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
-
Ko e hā ha ngaahi meʻa kuó ke ako ʻi hoʻo ako ʻa e Tokāteline mo e Ngaahi Fuakava 89 ʻe ala tokoni ʻi hoʻo tali ki ho ngaahi kaungāmeʻá?
-
Ko e hā ha ngaahi potufolofola fakataukei fakatokāteline kehe ʻe lava ʻo tokoni?
-
Kuo takiekina fēfē ʻe he ngaahi maʻuʻanga tokoni kuo fokotuʻu fakalangi hangē ko e Laumālie Māʻoniʻoní, ko hoʻo mātuʻá, pe kau taki ʻo e Siasí hoʻo loto-holi ke talangofua ki he Lea ʻo e Potó?
ʻI he ʻosi ʻa e kau akó, fakaafeʻi ke nau fakafetongi fehuʻi mo ha kulupu ʻe taha. ʻOange ha taimi ke nau aleaʻi ai mo ʻenau kulupú ʻa e founga te nau tali ʻaki e ngaahi fehuʻi ʻa e niʻihi kehé. Hili iá, ʻe lava ke akoako fakafaivaʻi ʻe he kau akó ʻa e founga te nau tali ʻaki e tūkungá ʻaki hono fakaʻaongaʻi ʻenau ngaahi talí.
Hili e ʻekitivitií, fakaafeʻi e kau akó ke vahevahe e ngaahi fakakaukau ne nau maʻu mei he ngaahi fehuʻi pe tali ʻa e kau mēmipa ʻo ʻenau kulupú. Kapau ʻoku kei taimi, te ke lava foki ʻo fakaafeʻi e kau akó ke vahevahe ha ngaahi aʻusia ne nau maʻu ʻi hano akoʻi pe fakamoʻoniʻi e Lea ʻo e Potó ki he niʻihi kehé.