Lēsoni 110: Tokāteline mo e Ngaahi Fuakava 94–97

Tokāteline mo e Ngaahi Fuakava 95

“Ki Hono Langa ʻo Hoku Falé”

Naʻe fekauʻi ʻe Sīsū Kalaisi ʻa e Kāingalotú ke nau langa ha temipale ʻi Ketilani, ʻOhaiō, ko ha konga ʻo hono Fakafoki Mai ʻo ʻEne ongoongoleleí. Hili ha ngaahi māhina mei ai, ʻi he teʻeki kamata ʻe he kāingalotú ʻa e langá, naʻe valokiʻi kinautolu ʻe he Fakamoʻuí ʻi he ʻofa pea toe folofola ʻEne fekau ke langa Hono falé. Naʻe ngāue faivelenga ʻa e Kāingalotú ʻi he talangofua ke langa ʻa e Temipale Ketilaní. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke moihū ki he ʻEikí ʻi Hono temipalé.

Ngaahi ʻEkitivitī Ako ʻOku Ala Fakahokó

Ko hono fakamuʻomuʻa ʻo e moihū ʻi he temipalé

Ke tokoni ke fakakaukau ʻa e kau akó ki he mahuʻinga ʻo e moihū ki he ʻEikí ʻi Hono ngaahi temipalé, te ke lava ʻo tokoni ki he kau akó ke nau faʻu ha tūkunga ʻo ha talavou naʻe palani ke ʻalu ki he temipalé ka naʻá ne fili ke ʻoua te ne ʻalu. Ko e founga ʻe taha ke fai ai ʻení ko hono fakaʻaliʻali ʻa e fakakaukau ko ʻení pea kole ki he kau akó ke fakafonu ʻa e konga ʻoku ʻataá ʻaki ʻa e ngaahi ʻuhinga ʻe lava ke maʻu ʻe ha taha ki he ʻikai ʻalu ki he temipalé. Aleaʻi e ʻuhinga ʻoku ʻikai ke tau faʻa fakamuʻomuʻa ai e ʻalu ki he temipalé.

Kapau ʻokú ke nofo mamaʻo mo hoʻo kau akó mei ha temipale ke lava ʻo fakamuʻomuʻa e ʻalu ki he temipalé, te ke lava ʻo kamata e lēsoní ʻaki e fakafuofuaʻi pē kitá ʻoku hoko mai hili ʻa e ʻekitivitī fakafonu e konga ʻoku ʻataá.

Naʻá ku fie ʻalu ki he temipalé. Ka neongo ia, koeʻuhí ko e , naʻe ʻikai ke u ʻalu.

Fakaʻaongaʻi ʻa e meʻafua ko ʻení ke ke fakakaukau ki he tuʻunga mahuʻinga kiate koe ke moihū ki he ʻEikí ʻi he temipalé.

Poupouʻi e kau akó ke nau fekumi ki ha fakahā fakataautaha lolotonga e lēsoní ke ʻiloʻi e ngaahi founga te nau lava ai ʻo fakamuʻomuʻa ʻa e moihū ʻi he temipalé.

Kapau ʻoku ʻikai ofi hoʻo kau akó ki ha temipale, liliu e lēsoní ke tokoni ke tokoni ke ongoʻi ʻe he kau akó ʻa e mahuʻinga ʻo e teuteu ke ʻalu ki he temipalé ʻi ha ʻahó.

ʻOku valokiʻi ʻe he ʻEikí ʻa kinautolu ʻokú Ne ʻofa aí

ʻI he konga kimui ʻo Tīsema 1832, naʻe fekauʻi ʻe he Fakamoʻuí Hono kakaí ke nau langa e temipalé, pe “ko ha fale ʻo e ʻOtuá” (Tokāteline mo e Ngaahi Fuakava 88:119). ʻI he taimi naʻe fakahā ai ʻe he ʻEikí ʻa e Tokāteline mo e Ngaahi Fuakava 95 ʻi Sune ʻo e 1833, naʻe ʻosi fakatau ʻe he Kāingalotú ha konga kelekele, ka naʻe teʻeki kamata ʻa e langá.

• Lau ʻa e Tokāteline mo e Ngaahi Fuakava 95:1–3, ʻo kumi ʻa e meʻa naʻe folofola ʻe he ʻEikí ki Hono kakaí.

• Ko e hā ʻoku akoʻi ʻe he ngaahi veesi ko ʻení fekauʻaki mo e finangalo ʻo e ʻEikí ki he temipalé?

• Naʻe fakahaaʻi fēfē ʻe he ʻEikí ʻEne ʻofa ki Hono kakaí?

Mahalo ʻe lelei ke fehuʻi ki he kau akó pe ʻoku nau ʻilo e ʻuhinga ʻo e “valokiʻí.” Kapau ʻe fiemaʻu, fakamatalaʻi ange ʻoku ʻuhinga ʻa e “valokiʻí” ke fakatonutonu ʻi he taumuʻa ke fakaleleiʻi e ʻulungāngá.

Naʻe fekauʻi ʻe he ʻEikí Hono kakaí ke langa ha temipale

Lau ʻa e Tokāteline mo e Ngaahi Fuakava 95:4, 8–9, ʻo kumi e ngaahi ʻuhinga naʻe fekauʻi ai ʻe he ʻEikí ʻa e Kāingalotú ke langa Hono falé.

• ʻE tāpuekina fēfē ʻa e Kāingalotú ʻi heʻenau talangofua ki he fekau ʻa e ʻEikí ke langa ha temipalé?

• Ko e hā ha meʻa pau naʻe talaʻofa ʻe he Tamai Hēvaní kiate kinautolú?

  ʻI hono vahevahe ʻe he kau akó ʻa e ngaahi ʻuhinga naʻe fekau ai ʻe he ʻEikí ʻa e Kāingalotú ke langa Hono falé, tokoni ke nau ʻiloʻi ha tefitoʻi moʻoni hangē ko e ʻoku fekauʻi ʻe Sīsū Kalaisi Hono kakaí ke langa ha ngaahi temipale ke fakahoko e talaʻofa ʻa e Tamai Hēvaní ke fakakoloa kinautolu ʻaki ʻa e mālohí.

• ʻOkú ke pehē ʻoku ʻuhinga ki he hā ke fakakoloa ʻaki e mālohi ʻo e ʻOtuá?

  ʻO ka fiemaʻu, fakamatalaʻi ange ʻoku ʻuhinga ʻa e “fakakoloá” ke ʻoange ki ha taha ha meʻaʻofa. ʻOku ʻuhinga ʻa e fakakoloaʻi ʻi he temipalé ke maʻu ha meʻafoaki ʻo e ʻiló mo e mālohi fakalaumālié.

  ʻEke ha ngaahi fehuʻi ʻokú ne poupouʻi ʻa e fealēleaʻakí: ʻE lava ke fakaʻaongaʻi e ongo fehuʻi ko ʻení ke faʻu ʻaki ha fealēleaʻaki fakakalasi ʻoku mahuʻingamālié. Ki ha ako lahi ange ki he founga ke fakahoko ai ʻení, vakai ki he ako “Tokoni ki he Kau Akó ke Fatongia ʻAki ʻEnau Akó”, ʻoku maʻu ʻi he Fakatupulaki ʻa e Ngaahi Taukei ʻa e Faiakó. Fakakaukau ke akoako ʻa e taukei, “Taʻofi ʻa e fakahehema ke tali ki he fakamatala mo e fehuʻi kotoa pē kae fakaafeʻi ʻa e kalasí ke nau tali”.

• Ko e hā ha ngaahi founga kehekehe ʻe ala fili ai ʻe he ʻOtuá ke tāpuakiʻi kitautolu ʻaki Hono mālohí ʻo fakafou ʻi Hono ngaahi temipalé?

• ʻOkú ke pehē ʻe tokoniʻi fēfē koe ʻi ʻapi, ʻi ʻapiako, pe ʻi ha ngaahi tafaʻaki kehe ʻo hoʻo moʻuí ʻi hoʻo maʻu e mālohi ʻo e ʻOtuá ʻo fakafou ʻi Hono temipalé?

“Te mou maʻu ʻa e mālohi ke langa ia”

Lau ʻa e Tokāteline mo e Ngaahi Fuakava 95:11–14, ʻo kumi e ngaahi foʻi lea pe kupuʻi lea naʻá ne fakaʻaiʻai e Kāingalotú ke nau talangofua ki he fekau ʻa e ʻEikí ke langa ha temipalé.

• Ko e hā ʻa e meʻa naʻá ke maʻú? Naʻe fakalotolahi fēfē nai ʻeni?

Fakakaukau ke vahevahe ʻa e kalasí ki ha fanga kiʻi kulupu iiki. Te ke lava ʻo ʻoange ki he kulupu takitaha ha tatau ʻo e laʻipepa tufa “Ngaahi Feilaulau Ne Fai ke Langa e Temipale Ketilaní.” Fakaafeʻi e kau akó ke nau laukonga fekauʻaki mo hono langa ʻo e Temipale Ketilaní ʻi he laʻipepa tufá pe ʻi he Kau Māʻoniʻoní, voliume 1, Ko e Fuka ʻo e Moʻoní, 231–32, 243.

ʻE lava ke hiki ʻe he kau akó ʻi he laʻipepa tufá pe ʻi he palakipoé ha ngaahi feilaulau naʻe fai ʻe he Kāingalotú maʻá e Temipale Ketilaní. Hili iá, ʻe lava ke nau aleaʻi mo lisi ʻa e ngaahi feilaulau te tau lava ʻo fai ke ʻalu ki he temipalé pe teuteu ke moihū ki he ʻEikí ʻi Hono ngaahi temipalé ʻi hotau kuongá ni.

Ngaahi Feilaulau Ne Fai ke Langa e Temipale Ketilaní

Hili pē hono maʻu ʻo e vahe 95, naʻe kamata fakaʻataʻatā leva ʻe Hailame Sāmita ʻa e feituʻu ʻe langa ai e temipalé. Ko ha pole faingataʻa hono langa ʻo e temipalé. Naʻe toko 150 pē nai ʻa e kāingalotu ʻo e Siasí ʻi he feituʻú. Naʻe ʻikai ke nau maʻu ha taukei pe pōtoʻi ngāue ke tokangaʻi ha fuʻu fale lahi pehē. ʻE hoko foki hono langa ʻo e temipalé ko ha kavenga fakapaʻanga ki he Siasí pea mo e kāingalotú. Ka neongo ia, naʻa nau ngāue, pea naʻe fakahoko ʻe he ʻEikí ʻa ʻEne talaʻofa ke foaki kiate kinautolu ʻa e “mālohi ke langa iá” (Tokāteline mo e Ngaahi Fuakava 95:11). Naʻe hiki mai ʻa ʻAtemasi Milei, ko ha papi ului mei Kānata mo ha tufunga tā maka taukei, ki Ketilani ʻo tokangaʻi e langá. Naʻe fai ʻe ha papi ului ʻe taha, ko Sione Tena, ha tokoni fakapaʻanga ʻi ha taimi faingataʻa. Naʻe foaki ʻe he houʻeiki tangata, fafine mo e fānau ʻi he feituʻú honau taimí, ngāué, mo e ngaahi maʻuʻanga tokoni ki hono langa ʻo e temipalé. (Vakai, Lisa Olsen Tait and Brent Rogers, “A House for Our God,” ʻi he Revelations in Context [2016], 167; Kau Māʻoniʻoní, voliume 1, Ko e Fuka ʻo e Moʻoní, 230–31.)

• Ko e hā ha ngaahi feilaulau naʻe fai ʻe he Kāingalotú ke langa ʻa e Temipale Ketilaní? Ko e hā ha meʻa ʻoku makehe kiate koe fekauʻaki mo e ngaahi feilaulau ko ʻení?

• Ko e hā ha ngaahi feilaulau te tau lava ʻo fai ke hū ai ki he fale ʻo e ʻEikí?

Hili ha taimi feʻunga, fakaafeʻi ʻa e kau akó ke nau vahevahe ʻa e meʻa naʻa nau akó. Fakakaukau ʻi he faʻa lotu ki he taimi te ke lava ai ʻo vahevahe mo e kau akó ʻa e fakamatala ko ʻeni meia Palesiteni Nalesoni ʻokú ne toe fakaongo mai ʻa e mahuʻinga ke fai ha ngaahi feilaulau ke moihū ki he ʻEikí ʻi he temipalé.

Naʻe tāpuekina kitautolu ʻe Palesiteni Lāsolo M. Nalesoni ke tau fai ha feilaulau ke moihū ʻi he temipalé:

ʻE kāinga ʻofeina, mahalo he ʻikai hanga ʻe hono langa ʻo e ngaahi temipale ko ʻení ʻo liliu hoʻo moʻuí, ka kuo pau ke liliu ai ho taimi ʻi he loto temipalé. ʻI he laumālie ko iá, ʻoku ou tāpuakiʻi kimoutolu ke mou ʻiloʻi e ngaahi meʻa te mou lava ʻo tuku ki he tafaʻakí kae lava ke mou fakaʻaongaʻi ha taimi lahi ange ʻi he temipalé. (Russell M. Nelson, “Tuku Ke Tau Vilitaki Atu,” Liahona, Mē 2018, 119)

• Kuo tāpuekina fēfē koe pe ko ha niʻihi kehe ʻokú ke ʻiloʻi ʻi hono fai ha ngaahi feilaulau ke moihū ki he ʻEikí ʻi Hono temipalé?

  Kapau kuó ke maʻu ha ngaahi aʻusia ʻi he moihū ki he ʻEikí ʻi Hono temipalé, fakakaukau ke vahevahe e ngaahi founga kuo tāpuekina ai koe ʻe he ʻEikí ko hano olá. Kapau kuo teʻeki ke ke maʻu pe ko ha taha ʻo e kau akó ha faingamālie ke hū ki he temipalé, ʻe lava ke tokoni ʻa e foʻi vitiō “Ko e Temipalé ko ha Maama” (2:50) ke ongoʻi ʻe he kau akó ha loto-holi ke moihū ki he ʻEikí ʻi he temipalé, ʻo tatau ai pē pe ko e hā ʻa e feilaulaú.

  ʻE ala ʻaonga ki he kau akó hono lekooti ʻenau ngaahi tali ki he ngaahi fehuʻi ko ʻení ʻi heʻenau tohinoa akó. Hili iá, te ke lava ʻo fakaafeʻi ha kau ako ʻe loto-vēkeveké ke vahevahe ʻenau ngaahi fakakaukaú.

• ʻOkú ke pehē ʻe ʻaonga fēfē kiate koe he ʻahó ni ʻa e ngaahi akonaki ʻi he Tokāteline mo e Ngaahi Fuakava 95?

• Ko e hā kuó ke ako fekauʻaki mo e mahuʻinga ʻo e moihū ki he ʻEikí ʻi Hono ngaahi temipalé?

Ngaahi Maʻuʻanga Tokoni Kehé

Ko e hā ha niʻihi ʻo e ngaahi fuofua fakakaukau naʻe maʻu ʻe he Kāingalotú fekauʻaki mo hono langa ʻo e temipalé?

Naʻe manatuʻi ʻe he faʻē ʻa e Palōfitá, Lusi Meki Sāmita: “Naʻe ui ha fakataha alēlea pea kole ʻe Siosefa ki he kau tangatá, ki he tokotaha takitaha, ke nau tuʻu hake pea fakahaaʻi ʻenau ngaahi fakakaukaú, pea ʻi heʻenau ʻosí te ne ʻoatu ʻene fakakaukaú. … Naʻe pehē ʻe ha niʻihi ʻe lelei ange ke langa ha tokotuʻu [fale]. Naʻe pehē ʻe he niʻihi kehé ʻe fakamole lahi e tokotuʻú [fale] … , pea naʻe aofangatuku honau tokolahi tahá ki hono langa ha fale papa ka nau fikaʻi e meʻa te nau lava ʻo fai ki hono langá. Naʻe tuʻu hake ʻa Siosefa peá ne fakamanatu ange kiate kinautolu ʻoku ʻikai ko ʻenau langa falé maʻanautolu pē pe ko ha faʻahinga taha pē, ka ko ha fale maʻá e ʻOtuá: ‘Pea te tau langa ʻe ngaahi tokoua, ha fale maʻa hotau ʻOtuá ʻo ngaohi mei he ʻakaú? Ngaahi tokoua, ʻikai. ʻOku ʻi ai haʻaku palani ʻoku lelei ange ai. ʻOku ʻi ai haʻaku palani ki he fale ʻo e ʻEikí meiate Ia tonu. Te mou fakatokangaʻi heni e faikehekehe ʻi heʻetau ngaahi fakaʻutoʻutá mo ʻEne ngaahi fakakaukaú.’” Naʻe ʻoange leva ʻe he Palōfitá ʻa e “palani kakato ʻo e fale ʻo e ʻEikí ʻi Ketilaní,” ʻa ia naʻe “fiefia lahi” ai ʻa e houʻeiki tangatá. Hili e fakatahá, naʻa nau lue ki he tuʻuʻanga ʻo e falé ʻo kamata ngāue—ʻo toʻo ha ʻā, fakaʻataʻatā e kelekelé, mo keli ha fakavaʻe ki he holisí. (“Lucy Mack Smith, History, 1844–1845,” book 14, pages 1–2, josephsmithpapers.org; naʻe fakaleleiʻi e sipelá, fakaʻilonga leá mo e mataʻitohi lahí)

Tokāteline mo e Ngaahi Fuakava 95:4. Ko e hā e “ngāue fakaofo” ʻa e ʻEikí?

Naʻe kikiteʻi ʻe ʻĪsaia, ʻe hanga ʻe he ʻEikí ʻo “fai ʻene ngāué, ʻa ʻene ngāue fakaofó; ke ne fakahoko ʻa ʻene ngāué, ko ʻene ngāue foʻoú” kimuʻa he Hāʻele ʻAnga Ua Mai ʻa Sīsū Kalaisí (ʻĪsaia 28:21). ʻOku ʻuhinga ʻa e “ngāue fakaofo” naʻe lea ki ai ʻa ʻĪsaia, pea toe fakapapauʻi mai ʻi he fakahā ʻoku lekooti ʻi he Tokāteline mo e Ngaahi Fuakava 95, ki hono Fakafoki Mai ʻo e ongoongoleleí (vakai, Tokāteline mo e Ngaahi Fuakava 95:4; 101:95). Naʻe talaʻofa ʻe he ʻEikí, ko ha konga ʻo e ngāue ko ʻení ke “lilingi hifo ʻa [Hono] Laumālié ki he kakano kotoa pē” (Tokāteline mo e Ngaahi Fuakava 95:4; vakai foki, Soeli 2:28–32). Ko kinautolu ʻoku ʻikai ke nau tui ki he ngaahi ʻaʻahi fakalangí, fakahā, vīsone, meʻafoaki ʻo e Laumālié, mo e ngaahi meʻa fakalaumālie kehé, ʻe lava ke nau vakai ki he ongoongolelei kuo fakafoki maí ʻo pehē ʻoku “fakaofo.”

Naʻe fakahoko fēfē ʻe he ʻEikí ʻEne talaʻofa ʻi he Tokāteline mo e Ngaahi Fuakava 95:14?

“Hili ha ngaahi ʻaho siʻi mei ai [hili hono maʻu e fakahā ʻoku lekooti ʻi he Tokāteline mo e Ngaahi Fuakava 95], naʻe fakahoko leva ʻe he ʻEikí ʻEne talaʻofá, ʻo Ne ʻoange kia Siosefa Sāmita mo hono ongo tokoni ʻi he Kau Palesitenisī ʻUluakí ha meʻa-hā-mai fakaofo, ʻa ia ne nau mamata ai ki he fakaikiiki ʻo e palani ki he temipalé. Naʻe manatu ʻa Feletiliki G. Uiliamisi, ko e Tokoni Ua ʻi he Kau Palesitenisī ʻUluakí, kimui ange ʻo pehē: ‘Naʻe maʻu ʻe Siosefa [Sāmita] e folofola ʻa e ʻEikí ke ne ʻave hono ongo tokoní, [Feletiliki G.] Uiliamisi mo [Sitenei] Likitoni, pea ʻomi ki he ʻao ʻo e ʻEikí, pea te Ne fakahā kiate kinaua ʻa e palani pe sīpinga ʻo e fale ke langá. Naʻa mau tūʻulutui ai, ʻo ui ki he ʻEikí, pea naʻe lava ke mau mamata ki he falé, ʻa ia ko au naʻá ku muʻaki fakatokangaʻí. Hili ia pea mau toki mamata fakataha ki ai. ‘I he hili ‘o ‘emau vakai lelei ki he tafa‘aki ki tu‘á, na‘e hangē na‘e ha‘u ‘a e falé ‘i ‘olunga ‘iate kimautolú’ [Frederick G. Williams, fakamatalaʻi ʻe Truman O. Angell, ʻi he Truman Osborn Angell, Autobiography 1884, pp. 14–15, Church Archives, The Church of Jesus Christ of Latter-day Saints, Salt Lake City, Utah]” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 313).

ʻOku tatau nai ʻa e fakakoloa naʻe talaʻofa ʻi he Temipale Ketilaní mo e ʻenitaumeni temipale ʻo e ʻaho ní?

ʻOku ʻikai tatau ʻa e fakakoloa ʻoku ʻasi ʻi he Tokāteline mo e Ngaahi Fuakava 95 pea mo e ouau ʻenitaumeni ʻoku fakahoko ʻi he ngaahi temipale kimui ní. Naʻe kau ʻi he ʻenitaumeni naʻe maʻu ʻe he kāingalotu ʻo e Siasí ʻi Ketilani, ʻOhaioó, ha ngaahi ouau tatau mo ia ʻoku fakahoko ʻi he ngaahi temipalé ʻi he ʻaho ní, ka naʻe kau foki ai mo ha ngaahi taimi naʻe lilingi hifo ai ʻe he ʻEikí ʻa Hono Laumālié pea fakakoloaʻi kinautolu ʻaki ha mālohi fakalaumālie (vakai, Tokāteline mo e Ngaahi Fuakava 109; 110 mo e Ngaahi Tefito ʻi he Hisitōlia ʻo e Siasí, “Fakakoloaʻi ʻaki e Mālohi,” Gospel Library). Ko e fuofua ʻenitaumeni temipale kakato ʻi he kuonga fakakosipeli ko ʻení naʻe fakahoko ia ʻe he Palōfita ko Siosefa Sāmitá ʻi Nāvū, ʻIlinoisi, ʻi Mē ʻo e 1842. Naʻe kau ai ha niʻihi ʻo e ngaahi meʻa naʻe fakahoko ʻi Ketilaní pea pehē foki ki ha ngaahi konga lahi kehe.

Ko e fē te u lava ʻo ako lahi ange ai fekauʻaki mo hono langa ʻo e Temipale Ketilaní?

• Vakai ki he Ngaahi Tefito ʻi he Hisitōlia ʻo e Siasí: Temipale Ketilaní

• Vakai, Lisa Olsen Tait and Brent Rogers, ʻi he “A House for Our God,” Revelations in Context (2016)

Ngaahi ʻEkitivitī Fakalahi ki he Akó

Tokāteline mo e Ngaahi Fuakava 95:1. “Ko kinautolu ʻoku ou ʻofa aí ʻoku ou tauteaʻi foki”

Fakakaukau ke tokoni ki he kau akó ke nau ako fekauʻaki mo e ʻulungaanga ʻo e Fakamoʻuí ʻaki hono maʻu ha mahino ki he ʻuhinga ʻokú Ne tauteaʻi ai kitautolú. Hili hono aleaʻi e ʻuhinga ʻo e tauteaʻí, ʻe lava ke fekumi e kau akó ʻi he ngaahi veesi ko ʻení, ʻo kumi e ngaahi ʻuhinga ʻoku tauteaʻi [chasten] ai ʻe he Fakamoʻuí Hono kakaí:

• Hepelū 12:5–7, 9

• Mōsaia 23:21

• Tokāteline mo e Ngaahi Fuakava 98:19–22

• Tokāteline mo e Ngaahi Fuakava 105:2–6

Kole ki he kau akó ke nau fakakaukau ki he founga ʻoku nau faʻa fakahoko ai ha tali ʻi he taimi ʻoku tauteaʻi ai kinautolú. Hili iá, te ke lava ʻo kole ange ke nau vahevahe ha ngaahi founga te tau lava ai ʻo tali faivelenga e taimi ʻoku tauteaʻi ai kitautolu ʻe he ʻEikí.

Ki ha fakamatala lahi ange ʻi he tauteaʻí, vakai, ʻEletā D. Todd Christofferson “Ko Kimoutolu ʻOku Ou ʻOfa aí, ʻOku Ou Valokiʻi mo Tauteaʻi,” Liahona, Mē 2011, 97–100; pe sio ʻi he foʻi vitiō “The Will of God” (3:02) ʻi he ChurchofJesusChrist.org.

Tokāteline mo e Ngaahi Fuakava 95:6. “ʻAʻeva ai ʻi he fakapoʻulí lolotonga ʻa e hoʻatā mālié”

ʻE lava ke tokoni e ʻekitivitī ko ʻení ke mahino ki he kau akó e mahuʻinga hono tauhi e ngaahi fekau ʻa e ʻEikí. Te ke lava ʻo fakaafeʻi e kau akó ke nau fakamatalaʻi ʻenau fakakaukau ki he ʻuhinga ʻo e kupuʻi lea “ʻaʻeva ai ʻi he fakapoʻulí lolotonga ʻa e hoʻatā mālié.” Hili iá, pea fakakaukau leva ke aleaʻi e ongo fehuʻi ko ʻení:

• Ko e hā ha founga ʻe ala tatau ai hono tukunoaʻi e fekau ʻa e ʻEikí ke langa ha temipalé mo e “ʻaʻeva ʻi he fakapoʻulí lolotonga ʻa e hoʻatā mālié”?

• Ko e hā e founga te tau ala “ʻaʻeva ai ʻi he fakapoʻulí lolotonga ʻa e hoʻatā mālié” kapau ʻoku tau fili ke tukunoaʻi ʻa e ngaahi fekau kehé? (vakai foki, Tokāteline mo e Ngaahi Fuakava 95:12).

Ngaahi Huafa ʻo Sīsū Kalaisí

ʻE lava ke tokoni ʻa e ʻekitivitī ko ʻení ki he kau akó ke nau ako lahi ange fekauʻaki mo Sīsū Kalaisi ʻaki ʻenau tokanga taha ki Hono ngaahi huafá. Fakaafeʻi e kau akó ke kumi e ngaahi huafa ʻo e Fakamoʻuí ʻi he Tokāteline mo e Ngaahi Fuakava 95:7, 17. ʻE lava ke vahevahe ʻe he kau akó ʻa e meʻa ʻoku nau ako fekauʻaki mo e Fakamoʻuí mei he ngaahi huafa ko ʻení.

Fakamatalaʻi ʻeni ʻo ka fiemaʻu:

ʻOku ʻomi ʻe he ʻEikí ʻi he veesi 7, ha fakaʻuhinga ki he ʻuhinga ʻo e huafa “ʻEiki ʻo e Sapaotí.” Ko ha foʻi lea faka-Hepelū foki ʻeni ko hono ʻuhingá ko e “ngaahi kau tau” pe “kau tau.” ʻOku kau ʻi he ngaahi kau taú ʻa e kau tau ʻa e kau ʻāngelo ʻo e langí (vakai, Bible Dictionary, “Sabaoth”).

Fakatatau kia Siosefa Sāmitá, ko e foʻi lea ʻĀmaní ko e huafa ia ʻo e ʻOtuá ʻi he lea haohaoa ʻa ʻĀtamá, pea ko e “ʻAlo ko ʻĀmaní” (veesi 17) ko e huafa ia ʻo e ʻAlo ʻo e ʻOtuá, ʻa Sīsū Kalaisi (vakai, The Joseph Smith Papers, Documents, Volume 2: July 1831–January 1833, ed. Matthew C. Godfrey and others [2013], 213–15). Naʻá ne fakamatalaʻi foki ʻoku ʻuhinga ʻa e ʻĀmaní “ko e ʻuluaki tangatá pe ʻuluaki ʻOtuá” (“Minutes, 5 April 1844,” page 84, josephsmithpapers.org; vakai foki, Tokāteline mo e Ngaahi Fuakava 78:20).

Ko e ʻAlifusí (ʻĀlifa) mo e ʻOmekusí (ʻŌmeka) ko e mataʻitohi ʻuluaki mo fakaʻosi ia ʻo e ʻalafapeti faka-Kalisí. ʻOkú na fakamatalaʻi ʻa e “natula kānokato ʻo Kalaisí, ko e ʻuluakí mo e fakaʻosí, ko e kamataʻangá mo e ngataʻangá” (Bible Dictionary, “Alpha”).