Tokāteline mo e Ngaahi Fuakava 94–97

Tokāteline mo e Ngaahi Fuakava 94–97

Vakai Fakalūkufuá

ʻI he konga kimui ʻo Tīsema 1832, naʻe fekauʻi ʻe he ʻEikí e Kāingalotú ke nau langa ha temipale ʻi Ketilani, ʻOhaiō. ʻI Sune ʻo e 1833, naʻe teʻeki ai pē ke nau kamata ʻa e langá. Naʻe valokiʻi ʻe he ʻEikí Hono kakaí mo toe fakapapauʻi ʻEne fekau ke langa Hono falé. ʻI he taimi naʻe kole ai ʻe he kau taki ʻo e Siasí ʻi Mīsulí kia Siosefa Sāmita ha ngaahi fakahinohinó, naʻe fekauʻi foki kinautolu ʻe he ʻEikí ke nau langa ha temipale.

Fai ha ngaahi fehuʻi ʻokú ne poupouʻi ʻa e fealēleaʻakí: ʻOku hoko ʻa e ngaahi fealēleaʻaki fakakalasi ʻoku mahuʻingamālié ʻi he taimi ʻoku fengāueʻaki ai ʻa e kau akó mo e faiakó pea ʻiate kinautolú. ʻEke ha ngaahi fehuʻi mahuʻinga ʻokú ne ʻomi ha ngaahi faingamālie ke fakahoko ai ʻe ha kau ako tokolahi ha tali. Te ke lava foki ʻo fai ha ngaahi fehuʻi te ne fakaafeʻi e kau akó ke fakahoko ha tali ki he fakamatala honau kaungā akó. Ki ha fakamatala lahi ange ʻi he founga naʻe fakaafeʻi ai ʻe he Fakamoʻuí e niʻihi kehé ke hoko ko ha kau ako longomoʻuí, vakai ki he konga “Naʻe Tokoniʻi ʻe he Fakamoʻuí ʻa e Niʻihi Kehé ke Nau Fatongia ʻAki ʻEnau Akó” ʻi he Ko e Faiako ʻi he Founga ʻa e Fakamoʻuí. Te ke lava ʻo vakai ki ha sīpinga ʻo hono fakaʻaongaʻi ʻo e ngaahi fehuʻí ke tokoni ki he kau akó ke nau longomoʻui ʻi heʻenau kau atu ki he lēsoni ʻo e uike ní “Tokāteline mo e Ngaahi Fuakava 95.”

Teuteu ke akoʻí

ʻOku ʻoatu ʻe he fakamatala ko ʻení ha ngaahi fakakaukau ʻo e meʻa ʻe ala fiemaʻu ke teuteuʻi kimuʻa ‘i he lēsoni takitaha.

Tokāteline mo e Ngaahi Fuakava 95

Taumuʻa ʻo e lēsoní: Ke tokoni ke ongoʻi ʻe he kau akó ha holi lahi ange ke moihū ki he ʻEikí ʻi Hono temipalé.

• Teuteu ʻa e tokotaha akó: Fakaafeʻi e kau akó ke tohi ʻi heʻenau tohinoá fekauʻaki mo e founga kuo tāpuekina ai kinautolu ʻe he ʻEikí ʻo fakafou ʻi heʻenau ʻilo ki he ngaahi temipalé. ʻE teuteuʻi heni kinautolu ke vahevahe ʻenau ngaahi aʻusiá mo e kalasí.

• Laʻipepa Tufa: “Ngaahi Feilaulau Ne Fai ke Langa e Temipale Ketilaní”

• Vitiō: “Ko e Temipalé ko ha Maama” (2:50)

Tokāteline mo e Ngaahi Fuakava 97

Taumuʻa ʻo e lēsoní: Ke tokoni ki he kau akó ke nau loto-maʻa.

• Teuteu ʻa e tokotaha akó: Fakaafeʻi e kau akó ke fakalaulauloto ki heʻenau ngaahi tali ki ha fehuʻi ʻe taha pe lahi ange ʻo e ngaahi fehuʻi lekomeni temipalé ʻi he fakamatala fakalahi ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ([tohi tufa, 2022], 36–37). ʻE lava ke tokoni ʻeni ke nau teuteu ke ako fekauʻaki mo e haohaoá.

• Ngaahi Meʻá: Ko ha ipu vai sioʻata pe hina vai ʻataʻatā mo ha ʻū tatau pe founga ke vakai ai ki he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí

• Vitiō: “Fie Siofia Ha Temipale,” (16:13; mamata mei he taimi 7:34 ki he 8:46)

Akoako Fakataukei Fakatokāteline 7

Taumuʻa ʻo e lēsoní: Ke ʻoange ki he kau akó ha ngaahi faingamālie ke ako maʻuloto ai e ngaahi potufolofola fakataukei fakatokāteliné mo e tokāteline ʻoku nau akoʻí pea tokoniʻi kinautolu ke ako mo fakaʻaongaʻi ʻa e ngaahi tefitoʻi moʻoni fakalangi ki hono maʻu ʻo e ʻilo fakalaumālié.

• Teuteu ʻa e tokotaha akó: Fakaafeʻi ʻa e kau akó ke fili ha potufolofola fakataukei fakatokāteline te nau fie ako maʻuloto. Poupouʻi kinautolu ke vaheʻi ha taimi ke ako maʻuloto ai ʻa e potufolofolá ʻo fakaʻaongaʻi ʻa e polokalama fakataukei fakatokāteliné pe ngaahi maʻuʻanga tokoni kehé.

• Ngaahi Meʻá: Fanga kiʻi laʻipepa pe kaati iiki ke faʻu ʻaki ha fanga kiʻi kaati fakaʻaliʻali