“Lēsoni 132—Tokāteline mo e Ngaahi Fuakava 121:34–46: ‘Ngaahi Mālohi ʻo e Langí,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 121:34–46,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 132: Tokāteline mo e Ngaahi Fuakava 121–123
Tokāteline mo e Ngaahi Fuakava 121:34–46
“Ngaahi Mālohi ʻo e Langí”
ʻI he lotolotonga ʻo e ngaahi tūkunga faingataʻa ʻo e Fale Fakapōpula Lipetií, naʻe akoʻi ʻe he ʻEikí ʻa e Palōfita ko Siosefa Sāmitá ʻi he founga ke maʻu ai ʻa e ngaahi mālohi ʻo e langí ʻo fakafou ʻi he ngaahi tefitoʻi moʻoni ʻo e māʻoniʻoní. ʻE lava ke tokoniʻi ʻe he lēsoni ko ʻení ʻa e kau akó ke nau maʻu kakato ange ʻa e ngaahi mālohi ʻo e langí ʻi heʻenau moʻuí ʻaki ʻenau hoko ʻo anga faka-Kalaisi ange.
Ngaahi ʻEkitivitī Ako ʻOku Ala Fakahokó
Ko ʻetau loto-holi ke tokoniʻi e niʻihi kehé
Fakakaukau ke kamata e lēsoní ʻaki hono tokoniʻi e kau akó ke nau ʻiloʻi ʻe malava lelei ange ʻe heʻetau fehokotaki fakataautaha mo e ʻOtuá ʻo ʻai ke tau tokoniʻi e niʻihi kehe ʻoku tau feohí. Te ke lava ʻo fakaʻaongaʻi ha tūkunga nounou hangē ko ʻení ke kamataʻi ʻaki ha fealēleaʻaki.
Naʻe toki uiuiʻi ʻa Moli ke ngāue ʻi heʻene kau palesitenisī fakakalasí. ʻOkú ne fie tokoni ki he kau finemui ʻi heʻene kalasí ka ʻoku ʻikai ke ne fakapapauʻi pe ʻe founga fēfē.
-
Ko e hā ha faleʻi te ke fai kia Moli kapau naʻá ne kole atu ha faleʻi?
Hili ʻene kole faleʻi ki he palesiteni ʻo e kau finemuí, naʻe tohi ʻe he palesitení ʻa e fakamatala ko ʻení kia Moli mo faleʻi ia ke fakalaulauloto ki he founga ʻoku ʻaonga ai ki hono tokoniʻi ʻo kinautolu kuo ui ia ke ne tokoniʻí.
He ʻikai ke ke lava ʻo hiki hake ha laumālie ʻo ha tokotaha kehe kae ʻoua ke ke tuʻu ʻi ha feituʻu ʻoku māʻolunga ange ʻi he feituʻu ʻokú ne tuʻu aí. (Harold B. Lee, “Stand Ye in Holy Places,” Ensign, July 1973, 123)
-
ʻOkú ke pehē ʻoku kaunga fēfē ʻa e fakamatala ko ʻení ki he loto-holi ʻa Moli ke tokoniʻi e kau finemui ʻi heʻene kalasí?
Fakaafeʻi e kau akó ke nau fakalaulauloto pe ʻoku ʻi ai ha taha ʻoku nau fie tokoniʻi ke ʻunu ʻo ofi ange ki he Tamai Hēvaní mo Sīsū Kalaisi. Mahalo te nau fakakaukau ki ha ngaahi kaungāmeʻa, fāmili, niʻihi kuo ui ke nau ngāue fakaetauhi ki ai, pe ko kinautolu kuo uiuiʻi ke nau tokangaʻi ʻi heʻenau ngaahi kōlomú mo e kalasí. Mahalo te nau hiki ha ngaahi hingoa ʻe niʻihi ʻoku nau fakakaukau ki ai ʻi heʻenau tohinoa akó.
Poupouʻi e kau akó ʻi he lolotonga ʻo e lēsoní ke nau tokanga ki he ngaahi fakakaukau mo e ngaahi ongo ʻe ala maʻu mei he Laumālie Māʻoniʻoní fekauʻaki mo e founga te nau lava ai ʻo hoko ko e tākiekina lelei taha kiate kinautolu ʻoku nau holi ke tokoniʻí.
Falepōpula Lipetií
Kapau naʻá ke akoʻi e lēsoni “Tokāteline mo e Ngaahi Fuakava 121–123,” fakakaukau ke fakaʻaliʻali e fakatātā ko ʻení pea fakaafeʻi e kau akó ke vahevahe e meʻa ʻoku nau manatuʻi fekauʻaki mo e puipuituʻa ʻo e ngaahi vahe ko ʻení.
Lolotonga hono tauhi pōpula ʻo Siosefa Sāmita ʻi he Fale Fakapōpula Lipetií, naʻe akoʻi ia ʻe he ʻEikí ki he mahuʻinga ʻo ʻetau fehokotaki fakataautaha mo e mālohi fakalangí.
Lau ʻa e Tokāteline mo e Ngaahi Fuakava 121:34–36, ʻo kumi ha ngaahi moʻoni fekauʻaki mo ʻetau fehokotaki mo e ngaahi mālohi ʻo e langí ʻi heʻetau moʻuí.
Ko e Tokāteline mo e Ngaahi Fuakava 121:34–36 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.
-
Ko e hā naʻá ke maʻú?
Tokoni ke ʻiloʻi ʻe he kau akó ʻoku ʻikai lava ke mapuleʻi pe ngāue ʻaki ʻa e ngaahi mālohi ʻo e langí kae ngata pē ʻi he ngaahi founga ʻo e māʻoniʻoní. Mahalo te ke fie poupouʻi kinautolu ke fakaʻilongaʻi ʻa e kupuʻi lea ko ʻení ʻi heʻenau folofolá.
Fakakaukau ke tohiʻi ʻa e “Ko e Ngaahi Mālohi ʻo e Langí” ʻi ʻolunga ʻi he palakipoé pea faʻu ha kōlomu ʻe ua ʻi lalo ai, fakahingoa ʻa e taha ko e “Maʻu lahi ange” pea tahá ko e “Fakafaingataʻaʻiaʻi hono maʻú.”
Fakaafeʻi e kau akó ke nau lau e fakamatala ko ʻení pea kamata ʻai ha lisi ʻo e ngaahi ngāue mo e tōʻonga ʻoku kaunga ki he kōlomu takitaha.
Palesiteni Russell M. Nelson
ʻOku tau ʻilo e meʻa te tau lava ai ʻo maʻu ʻa e lahi ange ʻo e ngaahi mālohi ʻo e langí. ʻOku tau toe ʻilo foki e meʻa te ne taʻofi ʻetau fakalakalaká—ʻa e meʻa ʻoku fiemaʻu ke taʻofi hono fakahokó kae lahi ange ʻetau maʻu e ngaahi mālohi ʻo e langí. (Russell M. Nelson, “Te Tau Lava ʻo Fai Lelei Ange pea toe Lelei Ange,” Liahona, Mē 2019, 68)
ʻE lava ke ako ʻe he kau akó e ngaahi veesi ko ʻení ʻi ha fanga kiʻi kulupu iiki. ʻE ala tokoni ke kumi ʻe he kau akó e ʻuhinga ʻo e ngaahi foʻi lea ʻoku ʻikai mahino kiate kinautolú. ʻI he taimi ʻoku ʻosi ai e ako ʻa e ngaahi kulupú, fakaafeʻi ha kau fakafofonga mei he kulupu takitaha ke tānaki atu e meʻa ne nau maʻú ki he ngaahi kōlomu totonú ʻi he palakipoé.
Lau ʻa e Tokāteline mo e Ngaahi Fuakava 121:35–45, ʻo kumi e ngāue pe ngaahi tōʻonga ʻokú ne fakatupulaki pe holoki ʻetau malava ke maʻu e ngaahi mālohi ʻo e langí.
-
ʻE lava fēfē nai ke ʻasi ha niʻihi ʻo e ngaahi tōʻonga mo e ʻulungaanga ko ʻení ʻi he moʻui ʻa ha toʻu tupu he ʻahó ni?
Fakakaukau ke tokoniʻi e kau akó ke nau ʻiloʻi naʻe faingataʻaʻia ʻa Siosefa Sāmita mo e Kāingalotú koeʻuhí naʻe fakaʻaongaʻi ʻe he kau taki fakapuleʻangá mo e kau fakatanga ʻi Mīsulí ha “pule taʻemāʻoniʻoni” (veesi 39) ke “puleʻi” (veesi 37) kinautolu. ʻI he tafaʻaki ʻe tahá, ʻoku finangalo ʻa Sīsū Kalaisi ke tau muimui ki Heʻene sīpingá ʻo takiekina e moʻui ʻa e niʻihi kehé ʻo fakafou ʻi he ngaahi tefitoʻi moʻoni ʻo e māʻoniʻoní hangē ko e “angavaivaí” mo e “ʻofá” (vakai, veesi 41).
-
Ko e hā ʻoku mahuʻinga ai ʻa e ngaahi ngāue mo e ngaahi tōʻonga ko ʻeni ʻokú ne fakafehokotaki kitautolu ki he ngaahi mālohi ʻo e langí ʻi he taimi ʻoku tuku mai ai hatau fatongia ke tokoniʻi e niʻihi kehé?
-
ʻE tokoni fēfē hono fakaʻaongaʻi e ngaahi tōʻonga mo e ʻulungaanga ko ʻení ke tau hoko ʻo anga faka-Kalaisi ange mo tākiekina e niʻihi kehé ʻi he founga naʻá Ne fakahokó?
Tuku ha taimi ki he kau akó ke nau vakaiʻi ʻa e founga naʻe fakahaaʻi ai ʻe Sīsū Kalaisi ʻa e ngaahi tefitoʻi moʻoni ʻo e māʻoniʻoní ʻi Heʻene ngāue fakafaifekaú. ʻE lava ke fili ʻe he kau akó ha sīpinga mei he moʻui ʻa Kalaisí ʻoku nau maheni mo ia pea fakamatalaʻi pe ko e tefitoʻi moʻoni pe ngaahi tefitoʻi moʻoni fē mei he vahe 121 ʻoku nau sio ʻokú Ne fakatātaaʻí.
Ke tokoni ki he kau akó, te ke lava ʻo tufa ha ngaahi fakatātā ʻo e ngaahi meʻa naʻe hoko mei he moʻui ʻa Sīsuú pe mamata ʻi ha Vitiō ʻo e Tohi Tapú mei he ChurchofJesusChrist.org, hangē ko e “Go and Sin No More” (3:18).
Te ke lava ʻo fakaafeʻi e kau akó ke vahevahe ha ngaahi sīpinga ʻo ha kakai ʻoku nau ʻilo ʻoku nau fakafōtunga ha taha ʻo e ngaahi tōʻonga pe ʻulungaanga ʻi he veesi 35–45 ʻoku tokoni ke fakafehokotaki kinautolu ki he mālohi ʻo e ʻOtuá.
Ngaahi tāpuaki kuo talaʻofa maí
Lau ʻa e Tokāteline mo e Ngaahi Fuakava 121:45–46, ʻo kumi e ngaahi tāpuaki ʻoku foaki ʻe he Fakamoʻuí kiate kinautolu ʻoku fāifeinga ke fakafehokotaki ki he ngaahi mālohi ʻo e langí ʻaki hono fakatupulaki e ngaahi ʻulungaanga faka-Kalaisi naʻá ke ako he ʻaho ní.
-
Ko e ngaahi kupuʻi lea pe ngaahi foʻi lea fē ʻoku ʻuhingamālie kiate koé?
-
ʻE tokoniʻi fēfē koe ʻe he ngaahi tāpuaki ko ʻení ke ke hoko ʻo hangē ange ko Kalaisí ʻi hoʻo tokoniʻi ʻa kinautolu ʻoku mou feohí?
Fakaafeʻi ʻa e kau akó ke fakalaulauloto ki he meʻa kuo nau ako mo ongoʻi ʻi he lēsoni ʻo e ʻaho ní. Poupouʻi kinautolu ke fekumi ki ha fakahinohino mei he Laumālie Māʻoniʻoní ʻi heʻenau fakakakato ʻa e fakamatala ko ʻení ʻi heʻenau tohinoa akó ʻo fakaʻaongaʻi ha ngaahi foʻi lea pe kupuʻi lea mei he Tokāteline mo e Ngaahi Fuakava 121:35–45.
Te u feinga ke fakatupulaki ʻeku malava ke maʻu e ngaahi mālohi fakalangí ʻaki ʻeku:
-
Feinga ke ikunaʻi ʻa e .
-
Feinga ke fakatupulaki ʻa e .
Ako Ma‘uloto
Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea fakafolofola mahuʻingá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻingá ko e “Ko e ngaahi totonu ʻo e lakanga fakataulaʻeikí … ʻoku ʻikai lava ke mapuleʻi pe ngāue ʻaki [kinautolu]… kae ngata pē ʻi he ngaahi founga ʻo e māʻoniʻoní.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Toe Vakaiʻi ʻo e Fakataukei Fakatokāteliné.”