Lēsoni 133: Tokāteline mo e Ngaahi Fuakava 121–123

Tokāteline mo e Ngaahi Fuakava 122

“[Ko e] Ngaahi Meʻá Ni Kotoa Pē … ʻe Hoko Ia ʻo ʻAonga Kiate Koe”

Lolotonga e faingataʻaʻia ʻa e Palōfita ko Siosefa Sāmitá ʻi he Fale Fakapōpula Lipetií, naʻe akoʻi ia ʻe he ʻOtuá neongo naʻe lahi mo fakamamahi ʻene faingataʻaʻiá, ka ʻe tokoni ia ke ne anga faka-Kalaisi ange. ʻE lava ke tokoni ʻa e lēsoni ko ʻení ke mahino ki he kau akó ʻe lava ke tokoniʻi kitautolu ʻe he ngaahi aʻusia faingataʻá ke tau fakalakalaka pea hoko ʻo hangē ko Iá, koeʻuhí ko Sīsū Kalaisi.

Ngaahi ʻEkitivitī Ako ʻOku Ala Fakahokó

Fakaleleiʻi ʻi he faingataʻá

Fakakaukau ke fakaʻaliʻali e ngaahi fakatātā ko ʻeni ʻo ha ngaahi foʻi maka petepete mo ngingila. Pe ko hoʻo ʻomi ha ngaahi foʻi maka petepete mo ngingila pe hamolemole ke sio mo ala ki ai e kau akó.

• Ko e hā ʻoku fiemaʻu kae lava ke hamolemole pe ngingila ʻa e ngaahi foʻi maka petepeté?

Te ke lava ʻo fakamatalaʻi ange ʻe lava ke ngingila ʻa e ngaahi foʻi maká ʻi haʻanau feoloʻaki pe fepakipaki mo e ngaahi foki maka kehé pe ʻoneʻoné ʻi ha vahaʻa-taimi fuoloa. ʻOku fakatokaleleiʻi ʻe he founga ko ʻení honau ngaahi ngataʻangá pea fakahaaʻi honau ngaahi lanu fakanatula angé.

Naʻe vahevahe ʻe he Palōfita ko Siosefa Sāmitá ʻa e meʻá ni fekauʻaki mo ia:

ʻOku ou hangē ha fuʻu maka petepete ʻoku teka hifo mei ha moʻunga māʻolungá, pea ko e meʻa pē ʻokú ne fakatokaleleiʻi aú, ko e taimi ʻoku ngaolo atu ai ha tuliki ʻi ha meʻa kehe ʻoku fakafekapaki mālohi mai … ; … ʻo matoʻo atu ai ha kiʻi konga hē mo ē; ʻoku pehē pē ʻeku hoko ko ha konga hamolemole mo ngingila ʻi he mālohi ʻo e Māfimafí. (Joseph Smith, in History, 1838–1856 [Manuscript History of the Church], volume D-1, 1556, josephsmithpapers.org)

• Ko e hā ha ngaahi faingataʻa te ke lava ʻo fakakaukau ki ai mei he moʻui ʻa Siosefa Sāmitá naʻe mei tokoni kiate ia ke ne hoko ai ko ha meʻangāue lelei ange ʻi he toʻukupu ʻo e ʻEikí?

ʻI hoʻo ako he ʻaho ní, fakakaukau ki he ʻuhinga ʻe fakaʻatā ai koe ʻe heʻetau Tamai Hēvani ʻofá ke ke foua ha ngaahi ʻahiʻahi fakamamahi. Fakalaulauloto ki he founga ʻe lava ke tokoniʻi ai koe ʻe he Fakamoʻuí ke ke hoko ʻo hangē ange ko Iá ʻi he ngaahi faingataʻa mo e mamahi te ke ala aʻusia ʻi hoʻo moʻuí.

ʻE lava ke hoko ʻa e ngaahi faingataʻá ko ha lelei maʻatautolu

Lolotonga e faʻahitaʻu momoko ʻo e 1838–39, naʻe tauhi pōpula taʻetotonu ai ʻa Siosefa Sāmita mo ha kau taki kehe ʻo e Siasí ʻi he Fale Fakapōpula Lipetií pea nau foua ha ngaahi faingataʻa lahi. Ko e konga ʻo ha tohi naʻe ueʻi fakalaumālie ki he Kāingalotu faingataʻaʻiá, naʻe fakakau ai ʻe Siosefa ha ngaahi moʻoni naʻe fakahā ange ʻe he ʻOtuá ʻo fekauʻaki mo e mamahi naʻá ne aʻusiá.

Fakakaukau ke fakaafeʻi e kau akó ke nau lau mo aleaʻi ʻi ha fanga kiʻi kulupu iiki ʻa e meʻa ʻoku nau ako mei he ngaahi veesi ʻi laló. Kapau ʻe fiemaʻu, te ke lava ʻo tataki e ngaahi fealēleaʻaki fakakulupú ʻaki ha ngaahi fehuʻi hangē ko ʻení:

• Ko e hā ha ngaahi moʻoni ʻokú ke vakai ʻoku akoʻi ʻe he ʻOtuá kia Siosefa ʻi he ngaahi veesi ko ʻení?

• Ko e hā ʻe ala faingataʻa ai ke fanongo ki he ngaahi moʻoni peheé ʻi he taimi ʻoku tau foua ai ha faingataʻá?

• Ko e hā ʻe ala hoko ai e ngaahi moʻoni peheé ko ha tāpuaki ke fanongoa lolotonga ha faingataʻa?

Lau ʻa e Tokāteline mo e Ngaahi Fuakava 122:5–7, ʻo kumi e meʻa naʻe finangalo e ʻOtuá ke mahino kia Siosefa fekauʻaki mo e ngaahi faingataʻa naʻe pau ke ne kātekina ʻi heʻene moʻuí.

Hili hono maʻu ʻe he ngaahi kulupú ha faingamālie ke alēleá, te ke lava ʻo fakaafeʻi ha fakafofonga mei he kulupu takitaha ke vahevahe ha foʻi moʻoni ne nau ako. Kapau ʻe fiemaʻu, tokoniʻi e kau akó ke nau ʻiloʻi ha moʻoni hangē ko ʻení: ʻOku fakaʻatā kitautolu ʻe he ʻOtuá ke tau foua e ngaahi faingataʻá koeʻuhí ʻokú Ne ʻafioʻi te nau lava ʻo ʻomi ha taukei pea hoko ʻo lelei kiate kitautolu.

• ʻOkú ke pehē ʻoku ʻuhinga ki he hā ʻa e lava ke ʻomi ʻe he ngaahi faingataʻá ha “poto” pea hoko “ʻo ʻaonga kiate [kitautolú]”? (veesi 7).

• ʻE fekauʻaki fēfē nai ʻa e moʻoni ko ʻení mo e ngaahi foʻi maka tokakovi mo tokalelei ʻi he kamataʻanga ʻo e lēsoní?

  Fakakaukau ke hiki ʻa e kupuʻi lea “Kapau kuo pau ke ke kātakiʻi …” ʻi he palakipoé. Lisi leva e ngaahi tali ʻa e kau akó ki he ngaahi fehuʻi ko ʻení:

• Ko e hā ha ngaahi faingataʻa ʻoku fehangahangai mo ha toʻu tupu tokolahi he ʻahó ni?

• Ko e hā ʻoku mahuʻinga ai ʻi he ngaahi tūkunga ko ʻení ke mahino ʻa e meʻa naʻe akoʻi ʻe he ʻOtuá ki he Palōfita ko Siosefa Sāmitá?

  ʻE lava ke hoko ʻa e fehuʻi hokó ko ha faingamālie makehe ke fakakaukau, vahevahe, mo fanongo ai ʻa e kau akó ki he ngaahi aʻusia ʻa e niʻihi kehé. Fakakaukau ke tuku ha taimi ke tali ai ha niʻihi ʻe loto-fiemālie ke tali.

• Ko e fē nai ha taimi kuó ke aʻusia ai pe ko ha taha ʻokú ke ʻofa ai ha mamahi naʻe iku ʻo hoko ko ha tāpuaki?

• Ko e hā ʻe ala fiemaʻu ke fai ʻe ha taha ke fakaʻatā ai honau faingataʻaʻiá ke ne ʻoange kiate kinautolu ha aʻusia pea hoko ʻo lelei kiate kinautolu?

Ke vakai ki ha sīpinga ʻo ha taha taʻu hongofulu tupu naʻá ne ʻiloʻi ʻoku tuku ʻe he ʻOtuá ke tau foua e ngaahi faingataʻá koeʻuhí ke tau poto ai pea ʻaonga kiate kitautolu, fakakaukau ke huluʻi e foʻi vitiō “Faith Murray’s Story: Overcoming Adversity through Service” (4:52), ʻoku maʻu ʻi he ChurchofJesusChrist.org.

Faith Murray's Story: Overcoming Adversity Through Service

While she was struggling with CRMO (Chronic recurrent multifocal osteomyelitis), Faith found motivation in helping other people. We can feel love of God when we serve in ways they want us to.

Ko hono manatuʻi ʻa Sīsū Kalaisi ʻi hotau ngaahi faingataʻaʻiá

Ke tokoni ke fakakaukau e kau akó ki he tuʻunga malava makehe ʻa e Fakamoʻuí ke mahino kiate Ia mo Ne tokoniʻi kinautolu ʻi heʻenau foua e ngaahi faingataʻá, fakakaukau ke fakaafeʻi kinautolu ke fakakakato fakafoʻituitui ʻa e laʻipepa tufa “Ko Hono Manatuʻi ʻa Sīsū Kalaisi ʻi hotau Ngaahi Faingataʻaʻiá.” ʻE lava ke hoko ʻeni ko ha faingamālie lelei ki he kau akó ke nau fakaafeʻi ʻa e Laumālie Māʻoniʻoní ʻi heʻenau ako fakalongolongo, fakalaulauloto, mo tohí.

Ko Hono Manatuʻi ʻa Sīsū Kalaisi ʻi Hotau Ngaahi Faingataʻaʻiá

Lau ʻa e Tokāteline mo e Ngaahi Fuakava 122:8–9 pea feinga ke fakakaukauloto ʻoku folofola fakahangatonu mai ʻa e ʻOtuá kiate koe fekauʻaki mo e ngaahi tūkunga ʻokú ke fehangahangai mo ia mo ho fāmilí. Fakaʻilongaʻi e ngaahi kupuʻi lea naʻá Ne akoʻi ʻoku mahuʻinga ke ke fanongo ki aí. Mahalo te ke fie hiki e ngaahi fakakaukau mo e ngaahi ongo ʻokú ke maʻú ʻi hoʻo tohinoa akó pe folofolá.

Lau ʻa e ʻAlamā 7:11–12 mo e lea ko ʻeni ʻa Palesiteni Henelī B. ʻAealingi ʻo e Kau Palesitenisī ʻUluakí. Lekooti e meʻa ʻoku nau akoʻi fekauʻaki mo e Fakamoʻuí ʻoku tokoni ke mahino lelei ange kiate koe ʻa e Tokāteline mo e Ngaahi Fuakava 122:8–9.

ʻI hoʻo fifili pe ko e hā hono lahi ʻo e mamahi te ke lava ʻo kātekina leleí, manatu kiate Ia. Naʻá Ne mamahi ʻi he meʻa ʻokú ke mamahi aí koeʻuhí ke Ne ʻafioʻi ʻa e founga ke hiki hake ai koé. Mahalo he ʻikai ke Ne toʻo ʻa e mafasiá, ka te Ne ʻoatu ʻa e mālohi, fakafiemālie, mo e ʻamanaki lelei. ʻOkú Ne ʻafioʻi ʻa e halá. Naʻá Ne inu ʻa e ipu mahí. Naʻá Ne kātekina ʻa e faingataʻaʻia ʻa e kakai kotoa pē.

ʻOku fafangaʻi mo fakafiemālieʻi koe ʻe ha Fakamoʻui ʻofa, ʻa ia ʻokú Ne ʻafioʻi ʻa e founga ke tokoniʻi ai koe ʻi ha faʻahinga sivi pē ʻokú ke foua. (Henry B. Eyring, “ʻOsi Siviʻi, Fakamoʻoniʻi, pea Fakaleleiʻi,” Liahona, Nōvema 2020, 97)

• ʻE tokoni fēfē kiate koe lolotonga hoʻo ngaahi faingataʻaʻiá ke ke ʻiloʻi naʻe “ʻalu hifo [ʻa Sīsū Kalaisi] ʻo māʻulalo ange ʻiate kinautolu kotoa pē”? (Tokāteline mo e Ngaahi Fuakava 122:8). ʻOkú ke pehē ko e hā ka Ne fakahoko ai iá?

• Ko e hā mo ha ngaahi potufolofola kehe kuo ʻuhingamālie kiate koe ʻi hoʻo foua e ngaahi faingataʻá?

ʻOange ha taimi ki he kau akó ke vahevahe ha konga ʻo e meʻa ne nau akó mo hanau hoa pe mo e kalasí. Poupouʻi kinautolu ke vahevahe ha ngaahi potufolofola kuo mahuʻingamālie kiate kinautolu ʻi heʻenau foua e ngaahi faingataʻá.

Fakakaukau ke fakaafeʻi e kau akó ke nau toe fakakaukau ki he founga ʻoku liliu ai kinautolu ʻe honau ngaahi faingataʻaʻiá. Fakaafeʻi kinautolu ke fakalaulauloto ki he fehuʻi ko ʻení:

• Ko e hā kuó ke ako pe ongoʻi he ʻahó ni fekauʻaki mo Sīsū Kalaisi ʻe lava ʻo tokoni atu ʻi hoʻo foua ho ngaahi faingataʻaʻiá?

Fakakaukau ke fakaʻosi ʻaki hoʻo fakamoʻoni ʻe lava ʻe heʻetau ngaahi faingataʻaʻia kotoa pē ʻo ʻomi ha poto pea hoko ʻo lelei kiate kitautolu ʻo fakafou ʻia Sīsū Kalaisi.

Ngaahi Maʻuʻanga Tokoni Kehé

ʻE lava fēfē ke tau maʻu ha lelei mei heʻetau ngaahi faingataʻaʻia kotoa pē?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Kuo Kafo

ʻOku poupouʻi ʻe ʻEletā ʻEnitasoni ʻa kinautolu ʻoku moʻua ʻi he ngaahi kafo fakatuʻasinó mo fakalaumālié ke fakatupulaki ʻenau tui kia Sīsū Kalaisí mo kolea Hono mālohi fai-fakamoʻuí.

Siʻoku kāinga, ko ʻeku palōmesi kiate kimoutolú, ʻe hanga ʻe hoʻomou fakatupulekina hoʻomou tui ki he ʻEiki ko Sīsū Kalaisí ʻo ʻoatu ha ivi mo ha ʻamanaki lelei lahi ange. Kiate kimoutolu, ko e kau māʻoniʻoní, ʻe fakamoʻui ʻe he Fai-fakamoʻui ʻo hotau laumālié, ʻi Hono taimi mo ʻEne founga pē ʻAʻana ʻa ho ngaahi kafó kotoa. ʻE ʻikai ha fakamaau taʻe-totonu, ʻikai ha fakatanga, ʻikai ha faingataʻa, ʻikai ha mamahi, ʻikai ha loto-mamahi, ʻikai ha ongosia, ʻikai ha kafo—neongo pe ko e hā hano loloto, fālahi, fakamamahi—ʻe toʻo mavahe mei he fakafiemālie, nonga, mo e ʻamanaki lelei tuʻuloa kiate Ia ʻe talitali ʻe Hono ongo toʻukupu kuo fakamafao ke talitali lelei kitautolu ki Hono ʻaó. ʻOku fakamoʻoni ʻa e ʻAposetolo ko Sioné, ʻi he ʻaho ko iá, ko e kau angatonú “ [ʻe] haʻu mei he mamahi lahí” [Fakahā 7:14] pea nau tuʻu “kuo nau kofu tōtōlofa [hinehina] … ʻi he muʻa nofoʻa fakaʻeiʻeiki ʻo e ʻOtuá.” Ko e Lamí ʻe “ʻafio ʻi [hotau] haʻohaʻongá … pea ʻe holoholo ʻe he ʻOtuá ʻa e loʻimata kotoa pē mei [homou] matá” [vakai, Fakahā 7:13, 15, 17]. ʻE hoko mai ʻa e ʻaho ko ʻení. ʻOku ou fakamoʻoni ki ai ʻi he huafa ʻo Sīsū Kalaisí. (Neil L. Andersen, “Kuo Kafo,” Liahona, Nōvema 2018, 86)

Naʻe pehē ʻe ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOfeina Lahi ʻe he ʻEikí

ʻOku akoʻi ʻe ʻEletā Sitīvenisoni neongo te tau fehangahangai mo e loto-mamahí mo e faingataʻá, ka te tau lava ʻo ʻilo ʻoku ʻofeina lahi kitautolu ʻe he ʻEikí.

ʻE kāinga, ʻoku ou tui ʻe ʻi ai ʻa e ʻaho, te mou takitaha nofo ai ʻo fakakaukau ki he ngaahi meʻa naʻe kaniselí, ko e mamahí, loto mamahí, mo e ongoʻi tuenoa ʻi he ngaahi taimi faingataʻa ʻoku tau fouá pea vakai ki hono kāpui ia ʻe he ngaahi tāpuaki funganí pea mo e tupulaki ʻo e tuí mo e fakamoʻoní. ʻOku ou tui ʻe fakatapui ʻi he moʻuí ni pea ʻi he maama kahaʻú ʻa hoʻomou ngaahi faingataʻaʻiá, … mo e Fale Fakapōpula Lipetií ki hoʻomou leleí. ʻOku ou lotua te tau fakahā fakataha mo Nīfai ʻa e ngaahi faingataʻa ʻi hotau ngaahi ʻahó mo ʻiloʻi he taimi tatau ʻoku ʻofeina lahi kitautolu ʻe he ʻEikí.

… [Ko] Sīsū Kalaisí, … naʻá Ne ʻalu hifo ʻo māʻulalo ange ʻi he meʻa kotoa pē ko ha konga ʻo ʻEne Fakalelei taʻefakangatangatá. ʻOku mahino kiate Ia hotau loto-mamahí, mamahí, mo e siva e ʻamanakí. Ko Ia hotau Fakamoʻuí, Huhuʻí, ʻamanaki leleí, fakafiemālié, mo hotau Haoʻangá. (Gary E. Stevenson, “ʻOfeina Lahi ʻe he ʻEikí,” Liahona, Nōvema 2020, 105)

Ko e hā ʻoku hoko ai ʻa e mamahí ko ha konga mahuʻinga ʻo e moʻui fakamatelié?

Naʻe vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

ʻOsi Siviʻi, Fakamoʻoniʻi, pea Fakaleleiʻi

ʻOku akoʻi ʻe Palesiteni ʻAealingi ʻoku tokoni hono kātekina faivelenga e ngaahi faingataʻa ʻo e moʻui fakamatelié ke tau hoko ai ʻo hangē ange ko e Tamai Hēvaní mo Sīsū Kalaisí.

Mahalo te ke fifili ki he ʻuhinga ʻoku fakaʻatā ai ʻe ha ʻOtua ʻofa mo māfimafi ke fuʻu faingataʻa ʻa hotau sivi fakamatelié. He ko hono ʻuhingá ʻokú Ne ʻafioʻi kuo pau ke tau tupulaki ʻi he maʻa fakalaumālié mo e lahí kae lava ke tau nofo ʻi Hono ʻaó ko ha ngaahi fāmili ʻo taʻengata. Koeʻuhí ke lava ʻo hoko ia, naʻe foaki mai ai ʻe he Tamai Hēvaní ha Fakamoʻui pea mo e mālohi ke fili maʻatautolu ʻi he tui ke tauhi ʻEne ngaahi fekaú pea fakatomala mo haʻu kiate Ia.

Ko e uho ʻo e palani ʻo e fiefia ʻa e Tamaí ko ʻetau malava ko ia ʻo hoko ʻo hangē ange ko Hono ʻAlo ʻOfaʻanga ko Sīsū Kalaisí. ʻOku hoko e sīpinga ʻa e Fakamoʻuí ko ʻetau fakahinohino lelei taha ʻi he meʻa kotoa pē. Naʻe ʻikai fakaʻatā Ia mei he fiemaʻu ko ia ke fakamoʻoniʻi Iá. Naʻá Ne kātekina maʻá e fānau kotoa ʻa e Tamai Hēvaní, ʻo totongi kotoa ʻetau ngaahi angahalá. Naʻá Ne ongoʻi ʻa e faingataʻaʻia ʻa kinautolu kotoa kuo nau haʻu pe te nau haʻu ki he moʻui fakamatelié. (Henry B. Eyring, “ʻOsi Siviʻi, Fakamoʻoniʻi, pea Fakaleleiʻi,” Liahona, Nōvema 2020, 97)

ʻE lava fēfē ʻe hono manatua e mamahi ʻa e Fakamoʻuí ʻo fakaʻaiʻai ʻetau faivelengá?

Naʻe akoʻi ʻe ʻEletā ʻAlani D. Haini ʻo e Kau Fitungofulú ʻo pehē:

Ko e Manatu Kiate Ia ʻOku Tau Falalaʻiá

Elder Allen D. Haynie's address at the October 2015 General Conference.

Ko e meʻa ʻoku mahuʻingá ko Sīsū Kalaisi, ko e ʻAlo ʻo e ʻOtuá, naʻá ne kātakiʻi ʻa e “ngaahi mamahí mo e ngaahi faingataʻá pea mo e ngaahi ʻahiʻahi kehekehe kotoa pē” koeʻuhí “ke ne ʻafioʻi ʻo fakatatau ki he kakanó ʻa e founga ke tokoniʻi ai ʻa hono kakaí” [ʻAlamā 7:11, 12]. Ko e meʻa mahuʻingá ko ʻEne āfeitaulalo, ke hāʻele mai ki he māmaní pea hifo ki “lalo ʻi he ngaahi meʻa kotoa pē” [Tokāteline mo e Ngaahi Fuakava 88:6] ʻo mamahi “ʻo mālohi lahi ange ʻi ha tangata” te ne lavaʻi [Lectures on Faith, 59]. Ko e meʻa ʻoku mahuʻingá ko e tautapa ʻa Kalaisi maʻatautolu ʻi he ʻao ʻo e Tamaí, “ʻo pehē: ʻE Tamai, vakai ki he ngaahi mamahi mo e mate ʻaʻana ʻa ia naʻe ʻikai te ne fai ha angahalá; … Ko ia, ʻe Tamai, fakamoʻui ʻa kinautolú ni ko hoku kāinga ʻa ia ʻoku tui ki hoku hingoá, koeʻuhí ke nau haʻu kiate au ʻo maʻu ʻa e moʻui taʻengatá” [Tokāteline mo e Ngaahi Fuakava 45:4–5]. Ko e meʻa ia ʻoku mahuʻingá pea ʻoku totonu ke ne fakafoʻou ʻetau ʻamanaki leleí mo ha vilitaki ke toe feinga ange, koeʻuhí ʻoku ʻikai ngalo kitautolu ʻiate Ia. (Allen D. Haynie, “Ko e Manatu Kiate Ia ʻOku Tau Falalaʻiá,” Liahona, Nōvema 2015, 122–123)

Ngaahi ʻEkitivitī Fakalahi ki he Akó

Ngaahi tefitoʻi moʻoni ki hono maʻu ʻo e ʻilo fakalaumālié

Ke tokoni ke fakakaukau lahi ange ʻa e kau akó ki he founga te nau lava ai ʻo tafoki ki he Fakamoʻuí kae lava ke maʻu mei honau ngaahi faingataʻaʻiá ha aʻusia pea hoko ʻo lelei kiate kinautolú, fakakaukau ke fakaafeʻi kinautolu ke nau lau ʻa e palakalafi 5–6, 8 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023). Te ke lava ʻo kole ki he kau akó ke nau kumi ha ngaahi fakakaukau ʻe tokoni ki ha taha ʻoku fekuki mo ha faingataʻa.

Fakahoko ʻa e kikité

Ko e founga ʻe taha te ke lava ai ʻo akoʻi ʻa e Tokāteline mo e Ngaahi Fuakava 122:1–4 ke kole ki he kau akó ke vahevahe ha ngaahi sīpinga ʻo e ngaahi kikite fakafolofola kuo fakahokó. ʻE lava ke kau ʻi he ngaahi sīpingá ʻa hono tā ʻo e maká mei he moʻungá taʻe kau ai ha nimá pea mo hono fakafonu ʻo e māmaní (vakai, Taniela 2:44–45), ngaahi tau mo e ngaahi ongoongo ʻo e taú (vakai, Mātiu 24:6), tau Fakalotofonua ʻa ʻAmeliká (Tokāteline mo e Ngaahi Fuakava 87), mo e alā meʻa peheé.

Hili iá, te ke lava ʻo kole ki he kau akó ke nau lau ʻa e Tokāteline mo e Ngaahi Fuakava 122:1–4, ʻo kumi e ngaahi kikite kuo nau mamata kuo fakahoko ʻi hotau kuongá. ʻE ala tokoni ʻa e ongo fehuʻi ko ʻení:

• ʻOku fēfē nai ʻetau kei fekumi ki ha faleʻi, mafai, pe ngaahi tāpuaki meia Siosefa Sāmita ʻi he ʻaho ní? (veesi 2).

• Kuó ke fakatokangaʻi fēfē ʻa hono fakahoko ʻo e veesi 3 ʻi hoʻo moʻuí?

Ngāue ʻa e faingataʻá ki heʻetau leleí

Naʻe vahevahe ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ha talanoa fekauʻaki mo e founga ʻe lava ke tokoniʻi ai kitautolu ʻe he faingataʻá ke tau aʻusia ʻa e tuʻunga ʻoku finangalo ʻa e ʻEikí ke tau aʻusiá:

Ko e Finangalo ʻo e ʻOtuá

ʻOku toe fakaʻaongaʻi ʻe he ʻOtuá ha founga ʻe taha ki he tauteá pe fakatonutonú ke tataki kitautolu ki ha kahaʻu ʻoku ʻikai ke tau lava ʻo sio ki ai he taimí ni, ka ʻokú Ne ʻafioʻi e hala ʻoku lelei ange kiate kitautolú.