Lēsoni 131: Tokāteline mo e Ngaahi Fuakava 121–123

Tokāteline mo e Ngaahi Fuakava 121–123

“Ke ʻi Ho Laumālié ʻa e Melinó”

Hili hono lavakiʻi mo puke pōpula ʻa e Palōfitá ʻi ha ngaahi tukuakiʻi loi, naʻe tuku pōpula ʻa e Palōfita ko Siosefa Sāmitá mo ha kau taki kehe ʻo e Siasí ʻi ha kiʻi fale fakapōpula siʻisiʻi ʻi Lipetī, Mīsuli. Lolotonga e faʻahitaʻu momoko ʻo e 1838–39, naʻe fāinga e Kāingalotu ʻi Mīsulí mo ha ngaahi tūkunga fakamamahi pea nau faingataʻaʻia lahi. ʻI he lotolotonga ʻo e faingataʻá ni, naʻe fakafiemālieʻi kinautolu ʻe he ʻEikí ʻaki ha faleʻi mo ha ʻilo manavaʻofa mei he langí. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻe lava ke tokoniʻi ai kitautolu ʻe he ʻOtuá ʻi hotau ngaahi ʻahiʻahí.

Ngaahi ʻEkitivitī Ako ʻOku Ala Fakahokó

“ʻE ʻOtua, ʻokú ke ʻi fē?”

Kimuʻa pea kamata e kalasí, fakakaukau ke fakaʻaliʻali e ngaahi fehuʻi ko ʻení ke vakai ki ai e kau akó ʻi heʻenau aʻu maí. ʻI he kamata pē ʻa e kalasí, fakaafeʻi e kau akó ke nau vahevahe ha ngaahi tūkunga moʻoni te ne ala takiekina ha taha ke ne fai ha ngaahi fehuʻi hangē ko ʻení.

• “ʻE ʻOtua, ʻokú ke ʻi fē?” (Tokāteline mo e Ngaahi Fuakava 121:1)

• “ʻE ʻEiki, ʻe fēfē hono fuoloa ʻo [ʻemau] kātakiʻi ʻa e ngaahi koví [ni] … ?” (Tokāteline mo e Ngaahi Fuakava 121:3)

Hili e vahevahe ʻa e kau akó, fakaafeʻi kinautolu ke fakakaukau ki ha ngaahi faingataʻa ʻoku nau lolotonga fehangahangai mo ia pe ko honau ngaahi ʻofaʻangá. Poupouʻi e kau akó ke lekooti ha faʻahinga fakakaukau pē pe ongo ʻoku nau maʻu fekauʻaki mo honau ngaahi faingataʻaʻiá, kau ai kapau kuo ʻi ai haʻanau ngaahi fehuʻi hangē ko ia ne ʻoatu ʻi he palakipoé.

ʻI he hokohoko atu e ako ʻa e kau akó, poupouʻi kinautolu ke fakaafeʻi e Laumālie Māʻoniʻoní ke tokoni ke nau ʻiloʻi e ngaahi tefitoʻi moʻoni fakalangi te ne lava ʻo ʻomi ha nonga mo ha fakafiemālie fakataautaha lolotonga honau ngaahi faingataʻaʻiá.

Puipuituʻa Fakahisitōliá

Ke tokoni ke mahino ki he kau akó ʻa e puipuituʻa fakahisitōlia ʻo e ngaahi konga te nau akó, fakakaukau ke huluʻi ʻa e vitiō “Lessons from Liberty Jail” ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku maʻu ʻi he ChurchofJesusChrist.org, mei he taimi 3:00 ki he 8:49. ʻE lava ke tokoni hono fakaʻaliʻali ha ʻū tā ʻo e Fale Fakapōpula Lipetií ke mahino ki he kau akó ʻa e meʻa naʻe foua ʻe Siosefa Sāmita mo e kau pōpula kehé.

Pe ko hoʻo vahevahe ʻa e kau akó ki ha ngaahi kulupu tautau toko tolu pea ʻoange ha taha ʻo e ngaahi fakamatala fakanounou ko ʻení ki he tokotaha ako takitaha ʻi he kulupú. Fakaafeʻi kinautolu ke nau taufetongi ʻi hono lau ʻenau fakamatala fakanounoú pea vahevahe ʻa e meʻa ʻoku nau fakakaukau ki ai pe ongoʻi kapau naʻa nau ʻi ha ngaahi tūkunga tatau.

Fakamatala Fakanounou 1: ʻI he ʻaho 31 ʻo ʻOkatopa, 1838, naʻe lavakiʻi ʻe Siaosi Hingikolo, ko ha mēmipa ʻo e Siasí pea ko ha kēnolo ʻi he kau sōtia ʻo e siteiti ʻo Mīsulí, ʻa e Palōfita ko Siosefa Sāmitá. Naʻe talaange ʻe Hingikolo kia Siosefa naʻe fiemaʻu ʻe he kau mēmipa ʻo e kau sōtia Mīsulí, ʻa ia kuo nau ʻohofi e Kāingalotu ʻi Hihifo Mamaʻo, Mīsulí, ke nau fetaulaki ke aleaʻi ha ngaahi tūkunga fakamelino. ʻI he aʻu ʻa Siosefa mo e kau taki kehe ʻo e Siasí ki he fakataha fakamelinó, naʻe puke pōpula fakamālohiʻi ai kinautolu ko ha kau pōpula ʻo e taú.

Fakamatala Fakanounou 2: ʻI he māhina hono hokó, naʻe ngaohikovia ai ʻa Siosefa mo hono kaungā-fonongá pea nau hiki mei he fale fakapōpula ki he fale fakapōpula ʻi heʻenau tatali ki ha hopo naʻe fakatefito ʻi ha ngaahi tukuakiʻi loi. ʻI he ʻaho 1 ʻo Tīsema, 1838, naʻe tuku pōpula ai ʻa e kau tangatá ʻi ha kiʻi fale fakapōpula siʻisiʻi ʻi Lipetī, Mīsuli. ʻI he māhina ʻe fā hono hokó, naʻe tauhi ʻa Siosefa Sāmita, hono tokoua ko Hailamé, ʻĀlekisānita Mekilae, Laimani Uaiti, mo Kēlepi Palatiuini ʻi he loki pōpula ʻi lalo ʻo e fale fakapōpula Lipetií lolotonga ha faʻahitaʻu momoko faufaua. Naʻe ʻi ai foki mo Sitenei Likitoni ʻi ha vahaʻa-taimi, ka naʻe fakamafaiʻi ʻe ha fakamaau hono fakaʻatā iá ʻi he konga kimui ʻo Sānuali 1839.

Fakamatala Fakanounou 3: Naʻe meimei fute ʻe 14 tatau e fua takai ʻo e loki ki laló (mita ʻe 4.3 x mita ʻe 4.3), pea naʻe fute ʻe 6 ki he 6.5 hono māʻolungá ʻa e ʻaofí (mita ʻe 1.8 mo e 2). Ko e maama fakanatula pē pe ʻea foʻou ne nau maʻú naʻe hū mai ia mei ha ongo kiʻi matapā sioʻata ofi ki he ʻaofí. Mei tuʻa ʻi he ngaahi matapā sioʻata ko ʻení, naʻe faʻa manukiʻi mo fakaʻitaʻi ʻe he kakaí ʻa e kau pōpulá. Naʻe fakamālohiʻi ʻa e kau tangatá ke nau mohe ʻi he falikí ʻi ha mohuku ʻuli siʻisiʻi pē pea naʻe siʻi ha maluʻi mei he momokó. Naʻe ʻi ai ha kane pē ʻe taha ʻi he loki ʻi laló ki he fakaveve ʻa e faʻahinga ʻo e tangatá, pea ko e kiʻi meʻakai siʻi naʻe maʻú naʻe mātuʻaki palakū ia he naʻe lava pē ʻe he kau tangatá ʻo kai ko ʻenau mātuʻaki fiekaiá. Naʻe faʻa fakakonahi e meʻakaí. Naʻe ʻofa lahi ʻa e kau pōpulá ki honau ngaahi kaungāmeʻá mo e fāmilí pea naʻa nau ongoʻi mamahi lahi ʻi heʻenau fanongo ki hono tuli ʻo e Kāingalotú mei Mīsulí ʻi he lotolotonga ʻo e faʻahitaʻu momokó.

Te ke lava ʻo fakamahinoʻi ange ʻoku ʻi he Tokāteline mo e Ngaahi Fuakava 121–123 ha ngaahi tohi mei he Palōfita ko Siosefá ki he Kāingalotú. Naʻá ne tohi ia ʻo ofi ki he fakaʻosinga ʻo hono tuku pōpula ia ʻi he Fale Fakapōpula Lipetií hili ia ha ngaahi māhina ʻo ʻene faingataʻaʻiá. Naʻe kau ʻi he tohí ha niʻihi ʻo e ngaahi kole ʻa Siosefa naʻá ne fakahoko ʻi he faʻa lotu pea mo e faleʻi ʻofa ʻa e Fakamoʻuí.

Ngaahi Lēsoni mei he Falefakapōpula Lipetií

Lau ʻa e Tokāteline mo e Ngaahi Fuakava 121:1–6, ʻo kumi ha ngaahi fehuʻi mo ha ngaahi kole tautapa naʻe fakahoko ʻe Siosefa Sāmita ki he ʻEikí.

Tokoni ke fakafehokotaki ʻe he kau akó ʻa e folofolá ki heʻenau moʻuí: Ko e ngaahi fehuʻi ko ʻení ko ha sīpinga ia ʻo hono tokoniʻi e kau akó ke fakafehokotaki e meʻa ʻoku nau akó ki heʻenau moʻuí. Ki ha akoako lahi ange ʻo e founga hono fakahoko ʻení, vakai ki he ako “Teuteuʻi ha Ngaahi Fakaafe mo ha Ngaahi Lea Fakaʻaiʻai ʻe Tokoni ki he Kau Akó Ke Nau Maʻu ha Fakafehokotaki Fakataautaha ʻi Ha Konga Folofola,” ʻoku maʻu ʻi he Fakatupulaki ʻa e Ngaahi Taukei ʻa e Faiakó: Akoʻi ʻa e Tokāteliné.

• Ko e ngaahi fehuʻi pe kole fē meia Siosefa Sāmita ʻokú ke lava ʻo fakafekauʻaki ki aí?

• Naʻe fakahaaʻi fēfē ʻe he ngaahi lea ʻa Siosefa Sāmitá ʻene tui mo e ʻaʻapa ki he ʻOtuá?

Fakakaukau ke fakaafeʻi e kau akó ke fakahingoa ha peesi ʻoku ʻatā ʻi heʻenau tohinoá ko e, “Ngaahi Lēsoni mei he Fale Fakapōpula Lipetií.” ʻI heʻenau ako e tali ʻa e ʻOtuá ki he ngaahi lotu ʻa Siosefá, poupouʻi kinautolu ke ʻai ha lisi ʻo e ngaahi moʻoni ʻoku nau ʻiló.

Lau ʻa e Tokāteline mo e Ngaahi Fuakava 121:7–9, 26, 33; 123:17, ʻo kumi e faleʻi mei he ʻOtuá ʻe lava ʻo tokoni ki ha taha lolotonga ha ʻahiʻahi faingataʻa.

Hili hono fakatahatahaʻi ʻe he kau mēmipa ʻo e kalasí ʻenau ngaahi lisí, fokotuʻu ange ke nau fili ha meʻa ʻe ua ʻoku nau saiʻia moʻoni ai pea hiki ia ʻi ha laʻipepa kehe. ʻAi ke fakafetongi ʻe he kau akó ʻenau laʻipepá mo ha taha ʻoku tangutu ofi kiate kinautolu. Fakaafeʻi e kau akó ke nau siakaleʻi ha foʻi lea pe kupuʻi lea ʻoku nau saiʻia taha ai ʻi he laʻipepa ne nau maʻú pea hiki ha fakamatala nounou ki he ʻuhinga ʻoku nau saiʻia ai aí. ʻE lava ke toutou fakahoko tuʻo lahi ʻa e founga ko ʻení mo e kau ako kehé. ʻI he taimi ʻoku maʻu ai ʻe he kau akó ʻenau laʻipepá, poupouʻi kinautolu ke tānaki atu ha ngaahi fakakaukau ne nau ako mei he niʻihi kehé ki heʻenau ʻū peesi tohinoa akó.

Fakaafeʻi ha kau ako ʻe niʻihi ke hiki ha foʻi moʻoni mei heʻenau lisí ʻi he palakipoé. Ko ha ngaahi sīpinga ʻeni ʻo e ngaahi tefitoʻi moʻoni te nau lava ʻo vahevahé: ʻI he palani taʻengata ʻa e ʻOtuá, ʻe kiʻi fuoloa siʻi pē ʻa e ngaahi ʻahiʻahi ʻo e kau māʻoniʻoní; kapau te tau kātekina lelei hotau ngaahi ʻahiʻahiʻí, ʻe hakeakiʻi kitautolu ʻe he ʻOtuá ʻi ʻolunga; ʻe lava ke ʻomi ʻe he ʻOtuá ʻa e melinó kiate kitautolu ʻi he lotolotonga ʻo hotau ngaahi ʻahiʻahí. Fakakaukau ke fai ange ha ngaahi fehuʻi alēlea hangē ko ʻení.

• Kapau naʻá ke ʻi he Fale Fakapōpula Lipetií, ko e tefitoʻi moʻoni fē naʻe mei fakafiemālie lahi taha kiate koé? Ko e hā hono ʻuhingá?

• Ko e hā ha ngaahi founga kuo tāpuekina ai koe ʻe he ʻOtuá ʻaki ʻa e melinó mo e fiemālié lolotonga ha ʻahiʻahi?

• ʻOkú ke pehē ko e hā ʻa e faikehekehe ʻi hono kātekina ha ʻahiʻahi mo hono kātakiʻi lelei ha ʻahiʻahi?

• Ko e hā te tau lava ʻo ako mei he founga naʻe kātekina ai ʻe Sīsū Kalaisi Hono ngaahi ʻahiʻahí mo e faingataʻá?

Ke tokoni ki he kau akó ke mahino lahi ange ʻa e founga ʻe lava ke tokoniʻi ai kinautolu ʻe he ʻEikí ʻi he ngaahi ʻahiʻahi faingataʻá, fakakaukau ke vahevahe ange ʻa e lea ko ʻeni ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá.

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku akoʻi mai ʻe he ngaahi lēsoni ʻo e 1838–39 ʻe lava ke hoko ʻa e aʻusia kotoa pē ko ha aʻusia ʻaonga ʻo kapau te tau kei tuʻu maʻu mo e Tamai Hēvaní ʻi heʻetau foua iá. ʻOku akoʻi kitautolu ʻe he ngaahi lēsoni faingataʻa ko ʻení, ko e ngataʻanga ʻo e tangatá ko ha faingamālie ia ki he ʻOtuá, pea kapau te tau loto-fakatōkilalo mo faivelenga, kapau te tau tui kae ʻikai lea kovi ki he ʻOtuá ʻi heʻetau ngaahi palopalemá, te Ne lava ʻo liliu ʻa e ngaahi fale fakapōpula taʻetotonu mo taʻeʻofa mo fakavaivai ʻi heʻetau moʻuí ki ha tūkunga te ne lava ʻo ʻomai e fakafiemālié mo e fakahaá, feohi fakalangí mo e melinó. (Jeffrey R. Holland, “Lessons from Liberty Jail,” Ensign, Sepitema 2009, 28)

• Kuó ke fakatokangaʻi fēfē nai ʻa e moʻoni ʻo e lea ʻa ʻEletā Hōlaní ʻi hoʻo moʻuí pe ʻi he moʻui ʻa ha taha ʻokú ke ʻiloʻi?

Ke fakaʻosí, fakaafeʻi e kau akó ke fakakakato ʻeni ʻi heʻenau tohinoa akó. Te ke lava ke fakaafeʻi ha kau ako ʻe loto-fiemālie ke vahevahe e meʻa ne nau hikí.

Fakakaukau ki he ngaahi faingataʻa naʻá ke fakakaukau ki ai ʻi he kamataʻanga ʻo e lēsoní. Fili ha foʻi moʻoni ʻe taha pe lahi ange mei hoʻo lisi “Ngaahi Lēsoni mei he Fale Fakapōpula Lipetií” ʻe lava ʻo tokoni atu kiate koe pe ko e niʻihi kehé ʻi ha faingataʻa lolotonga. Fakamatalaʻi nounou ʻa e founga ʻe lava ke tāpuekina mo fakamālohia ai koe ʻe he ʻEikí ʻi hoʻo ngāue ʻi he tui ki he foʻi moʻoni ko ʻení.

Ngaahi Maʻuʻanga Tokoni Kehé

Ko e fē te u lava ʻo ako lahi ange ai fekauʻaki mo e aʻusia ʻa Siosefa Sāmita ʻi he Fale Fakapōpula Lipetií?

ʻOku ʻi he vahe 33 ʻo e Kau Māʻoniʻoní, voliume 1, Ko e Fuka ʻo e Moʻoní (425–38) ha fakamatala fakaikiiki ʻo hono tauhi pōpula ʻo Siosefa Sāmita ʻi he Fale Fakapōpula Lipetií.

Sio ʻi he foʻi vitiō “Joseph Smith: The Prophet of the Restoration” (1:02:04) mei he taimi 36:34 ki he 44:06.

ʻOku ʻomi ʻe he fakamatala “Ngaahi Lēsoni mei he Fale Fakapōpula Lipetií,” meia ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ha ngaahi fakakaukau mahuʻinga fekauʻaki mo e ngaahi faingataʻaʻia ʻa Siosefa Sāmitá pea mo e fakahinohino naʻá ne maʻu mei he ʻEikí.

Mou vakai ki ha foʻi vitiō ʻo e Fale Fakapōpula Lipetií.

Ngaahi ʻEkitivitī Fakalahi ki he Akó

fua takai ʻo e Fale Fakapōpula Lipetií

Ke tokoni ke maʻu ʻe he kau akó ha mahino ki he ngaahi tuʻunga fakamamahi naʻe fehangahangai mo e Palōfitá mo hono kaungāmeʻá lolotonga ʻenau ʻi he Fale Fakapōpula Lipetií, mahalo te ke fie fakaʻaongaʻi ha tepi pe ha ngaahi meʻa kehe ke fakaʻilongaʻi ha tapafā ʻi he falikí ʻoku fute ʻe 14 liunga 14 (mita ʻe 4.3 liunga 4.3). Fakaafeʻi ʻa e kalasí kotoa ke nau tuʻu ʻi he sikueá pea nofo ai lolotonga ʻa e konga ʻuluaki ʻo e lēsoní lolotonga ʻenau ako ʻa e puipuituʻa fakahisitōlia ʻo e ngaahi konga ko ʻení.

Fakamatala fakanounou fakahisitōlia makehe

Kapau ʻe feʻunga ʻa e taimí, ʻe lava ke fakahū ʻa e fakamatala fakahisitōlia ko ʻení ki he lēsoní ʻi he vahaʻa ʻo e fakamatala fakanounou 1 mo e 2.

Lolotonga e nofo ʻa Siosefa Sāmita mo ha kau taki kehe ʻo e Siasí ʻi he fale fakapōpula ʻi Lisimoni, Mīsulí, naʻa nau fanongo ki hano fakamatalaʻi ʻe he kau leʻo ʻo e fale fakapōpulá, ʻi ha lea ʻuli, ha konga lahi ʻo e ngaahi angafai fakalilifu naʻe fakahoko ki he Kāingalotu ʻo e Siasí. Naʻe kau ʻi he ngaahi angafai taʻe totonu ko ʻení ʻa e kaihaʻá, maumauʻi ʻo e koloá, tohotohoó, mo e fakapoó. Naʻe manatu ʻa Paʻale P. Pālati ki he meʻa naʻe fai ʻe Siosefa Sāmita hili haʻane fakafanongo mamahi ki he ngaahi fakamatala fakalilifu ko ʻení.

“Kae fakafokifā [naʻe] tuʻu hake [ʻa Siosefa] ki ʻolunga ʻo lea ʻi he leʻo naʻe hangē ha maná, pe ko ha laione ngungulú, ʻo ne lea ʻaki ʻa e ngaahi meʻa ko ʻení, ʻo fakatatau ki heʻeku manatú:

“‘FAKALONGOLONGO, ʻa kimoutolu ʻa e kakai angakovi ʻo helí. ʻI he huafa ʻo Sīsū Kalaisí ʻoku ou valokiʻi kimoutolu mo fekau ke mou fakalongolongo; he ʻikai ke u kātakiʻi ke u moʻui ʻi ha toe momeniti ʻe taha ʻo fanongo ki ha faʻahinga lea pehē. Taʻofi e talanoa ko iá, pe ko haʻamou mate pe ko au ʻi he MOMENITÍ NI PĒ!’”

Naʻe “kole fakamolemole [ange ʻa e kau leʻó], pea nau nofo fakalongolongo ai pē ʻo aʻu ki hono fetongi ʻo e kau leʻó.” Naʻe manatu ʻa Paʻale kimui ange ki he aʻusiá ni ʻo pehē: “Kuó u mamata ki he kau minisitā ʻo e fakamaauʻangá … ʻi he Fakamaauʻanga ʻo ʻIngilaní; kuó u sio tonu ʻi ha fakataha molumalu ʻo ha Falealea ke fokotuʻu e ngaahi lao ki he ngaahi puleʻangá; … ka kuo tuʻo taha pē, ʻeku mamata ʻi he molumalú mo e fakaʻeiʻeikí ʻi heʻene tuʻu ʻi he ngaahi sēini, ʻi he tuʻuapoó, ʻi ha loki pōpula ʻi ha kiʻi kolo ʻi Mīsuli” (Autobiography of Parley P. Pratt, ed. Parley P. Pratt Jr. [1938], 211; vakai foki ki he peesi 210).

Tokāteline mo e Ngaahi Fuakava 121:1. “ʻOku ʻi fē ʻa e fale ʻoku ʻufiʻufi ʻa ho fufūʻangá?”

ʻI he ako mo fakalaulauloto ʻa e kau akó ki ha niʻihi ʻo e ngaahi fehuʻi naʻe fai ʻe Siosefa Sāmita ʻi he Fale Fakapōpula Lipetií, mahalo ne nau fifili ki he ʻuhinga ʻo ʻene fehuʻi hono ua ʻi he veesi 1. Fakamatalaʻi ange ko e falé ko ha feituʻu pe faʻunga ia ʻokú ne ʻomi ha fakamalumaluʻanga. Mahalo naʻe ongoʻi mamaʻo ʻa e Palōfita ko Siosefá mei he ʻOtuá pea fifili pe ko e hā naʻá Ne mamaʻo pe puli ai ʻi ha vahaʻa-taimi. Fakakaukau ke vahevahe ʻa e fakamatala ko ʻeni ʻa Palesiteni Henelī B. ʻAealingi ʻo e Kau Palesitenisī ʻUluakí:

Tokāteline mo e Ngaahi Fuakava 121:7–8. Ngaahi tefitoʻi moʻoni ki hono maʻu ʻo e ʻilo fakalaumālié

ʻE ala ʻaonga ki he kau akó hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ke ʻanalaiso e tali ʻa e Fakamoʻuí kia Siosefa Sāmita ʻi he Fale Fakapōpula Lipetií. Hangē ko ʻení, hili hono lau e Tokāteline mo e Ngaahi Fuakava 121:7–8, te ke lava ʻo ʻeke ha ngaahi fehuʻi hangē ko ʻení:

• Ko e hā ha ngaahi tefitoʻi moʻoni ʻo hono maʻu ʻo e ʻilo fakalaumālié ʻokú ke vakai ki ai ʻi he veesi 7–8?

• ʻE lava fēfē ʻe heʻetau vakai ki hotau ngaahi ʻahiʻahí mo e ngaahi faingataʻaʻiá ʻaki ha fakakaukau ʻoku taʻengatá, ʻo ʻomi ha fiemālie mo ʻomi ha nonga ki hotau laumālié?

• ʻE tokoniʻi fēfē kitautolu ʻe he falala kia Sīsū Kalaisi mo ngāue ʻi he tuí ke tau kātakiʻi lelei ʻa e ngaahi faingataʻá?

Tokāteline mo e Ngaahi Fuakava 123:11–14. Ko hono tokoniʻi e niʻihi kehé ke mahino ʻa e moʻoní

Ke tokoni ke mahino lelei ange ki he kau akó honau fatongia ke fakaafeʻi ʻa e kakai kotoa pē ke haʻu kia Sīsū Kalaisí, fakakaukau ke hiki ʻa e ngaahi potufolofola ko ʻení ʻi he palakipoé:

• Mātiu 5:14–16

• Maʻake 16:15–16

• Tokāteline mo e Ngaahi Fuakava 123:11–14

Fakaafeʻi ha kau ako ʻe toko tolu ke lau leʻolahi takitaha ʻa e ngaahi potufolofola ko ʻení. Fakaafeʻi e toenga ʻo e kau mēmipa ʻo e kalasí ke nau fakamatalaʻi ʻa e founga ʻoku nau pehē ʻoku felāveʻi ai ʻa e ngaahi potufolofolá. ʻE lava ke ke ʻeke ange ha ngaahi fehuʻi hangē ko ʻení:

• ʻOkú ke fakakaukau ko e ʻuhinga ki he hā ʻa e pehē ko e kakai tokolahi ʻi he māmaní ʻoku “fakakuihi ʻe he kākā olopoto ʻo e tangatá”? (Tokāteline mo e Ngaahi Fuakava 123:12).

• ʻE tokoni fēfē hono vahevahe e maama ʻa e Fakamoʻuí mo hono malangaʻi ʻEne ongoongoleleí ke ʻiloʻi ʻe he niʻihi kehé ʻa e moʻoní?

Fakaafeʻi e kau akó ke nau fekumi ki ha ngaahi foʻi lea mo e kupuʻi lea ʻi he Tokāteline mo e Ngaahi Fuakava 123:11–14 ʻokú ne fakamamafaʻi ʻa e mahuʻinga ʻo hono tokoniʻi e niʻihi kehé ke nau ʻilo ʻa e moʻoní pea haʻu kia Sīsū Kalaisí. Poupouʻi e kau akó ke fakaʻilongaʻi ʻa e ngaahi kupuʻi lea ko ʻení ʻi heʻenau folofolá pea hiki ha niʻihi ʻo e ngaahi tefitoʻi moʻoní ʻi he palakipoé. ʻE ala kau ʻeni ʻi he ngaahi tefitoʻi moʻoni ko ʻení: ʻOku ʻi ai hotau fatongia mahuʻinga ke tokoniʻi e niʻihi kehé ke nau ʻilo ʻa e moʻoní; ʻOku totonu ke tau fakaʻaongaʻi mo ngāue ʻaki ʻetau moʻuí ki hono vahevahe atu e maama ʻa e Fakamoʻuí; ʻOku totonu ke tau tokanga fakamātoato ki hotau fatongia ke malanga ʻaki ʻa e ongoongoleleí.

Fakamanatu ki he kau akó mahalo ʻoku tokolahi ha kakai ʻoku nau ʻilo ʻoku ʻikai ke nau ʻiloʻi e pōpoaki ʻo e Ongoongolelei Kuo Fakafoki Maí. Poupouʻi kinautolu ke fakakaukau ki ha ngaahi fakakaukau fekauʻaki mo e founga ke fakahaaʻi lelei ange ai e maama ʻo Sīsū Kalaisí pea fakaafeʻi e kakai ʻoku nau ʻiloʻí ke haʻu kiate Ia.