Ngaahi Tefitoʻi Moʻoni ʻo e Faiako Hangē ko Kalaisí: Akoʻi ʻa e Tokāteliné

Tokoniʻi ʻa e kau akó ke nau ongoʻi ha mahuʻingaʻia fakataautaha ʻi he tokāteline ʻo Sīsū Kalaisí.

Pōtoʻi Ngāué

Teuteuʻi ha ngaahi fakaafe mo ha ngaahi kupuʻi lea kamata ʻe tokoni ki he kau akó ke nau ongoʻi ha mahuʻingaʻia fakataautaha ʻi ha konga folofola.

fefine ʻokú ne akoʻi ha kau ako

Fakamatalaʻi

ʻE lava ke ongoʻi ʻe he kau akó ha mahuʻingaʻia fakataautaha ʻi he folofolá ʻi heʻenau fakakaukau ki he founga ʻe lava ke ʻuhingamālie mo ʻaonga ai ʻa e meʻa ʻoku nau akó ʻi honau ngaahi tūkungá. Ko e founga ʻe taha ʻe lava ke tokoni ai ʻa e kau faiakó ki he kau akó ʻi he founga ko ʻení ko hono teuteuʻi ha ngaahi fakaafe mo ha ngaahi lea fakaʻaiʻai ʻoku kau ai ʻa e ngaahi meʻá ni:

• Ko ha faingamālie ke fakakaukau ai ʻa e kau akó ki he ngaahi tūkunga lolotonga ʻo ʻenau moʻuí.

• Ko ha taimi ke lau ai ʻe he kau akó ha potufolofola.

• Ko ha kupuʻi lea kamata ʻe tokoni ki he kau akó ke ʻiloʻi ʻa e ngaahi meʻa ʻoku faitatau ʻi honau ngaahi tūkungá mo e ngaahi tūkunga ʻo kinautolu ʻoku nau lau fekauʻaki mo ia ʻi he folofolá. Hangē ko ʻení, “Ko ʻeku aʻusiá ʻoku hangē ia ko Pitá koeʻuhí …”

• Ko ha faingamālie maʻá e kau akó ke nau fakalaulauloto ki he founga ʻe lava ke ueʻi ai ʻe he ngaahi tali faivelenga ʻa kinautolu ʻi he folofolá ʻenau ngaahi tali faivelenga ʻi he ʻaho ní.

ʻE tokoni hono fai ʻení ke ako ʻe he kau akó ʻa e founga ke ako ai mei he folofolá mo fakaʻatā ʻa e Laumālie Māʻoniʻoní ke tokoniʻi kinautolu ke nau ongoʻi ha mahuʻingaʻia fakataautaha.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

ʻI he teuteu ʻe Sisitā Uiliamisi ʻene lēsoni ki he Ngāue 4–5, ʻokú ne fakakau ʻa e ngaahi meʻá ni ʻi heʻene palaní:

• Fehuʻi ki he kau akó: “Ko e hā ha meʻa ʻi hoʻo moʻuí te ke lava ala fiemaʻu ai ha tokoni ʻi he ʻahó ni?”

• Fakaafeʻi ʻa e kau akó ke nau lau pea tali: “ʻI hoʻo lau ʻa e Ngāue 4:1–13, kātaki ʻo teuteu ke fakaʻosi ʻa e kupuʻi lea kamata ko ʻení: ʻʻOku hangē ʻeku moʻuí ko Pita mo Sioné koeʻuhí …’”

• Fehuʻi ki he kau akó: “Ko e hā ʻokú ke ako mei he ngaahi tali ʻa Pita mo Sioné ʻe lava ʻo tokoni atu kiate koe?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

• Teuteuʻi ha ngaahi fakaafe mo ha ngaahi kupuʻi lea kamata ʻe tokoni ki he kau akó ke nau ongoʻi ha mahuʻingaʻia fakataautaha ʻi ha lēsoni ʻoku ʻamanaki ke fakahoko ʻi he uiké ni. Vahevahe hoʻo ngaahi fakaafé mo e ngaahi kupuʻi lea kamatá mo ha kaungāmeʻa, mēmipa ʻo e fāmilí, pe kaungā-ngāue pea kole ha fakamatala tokoni.

Aleaʻi pe Fakalaulauloto

• ʻE tokoni fēfē hono faʻu ʻo e faʻahinga fakaafe mo e ueʻi pehení ke maʻu ʻe he kau akó ha fakafehokotaki fakataautaha?

• ʻE fakaleleiʻi fēfē ʻe he faʻahinga fakaafe pehení ʻa e aʻusia fakaakó?

• Ko e hā ha ngaahi founga kehe te ke lava ai ʻo tokoni ki he kau akó ke nau ongoʻi ha mahuʻingaʻia fakataautaha ʻi he folofolá?

Fakakau

• Faʻu ha palani ke fakaangaanga faʻu ha ngaahi fakaafe mo ha ngaahi kupuʻi lea kamata ʻe tokoni ki he kau akó ke nau ongoʻi ha mahuʻingaʻia fakataautaha ʻi he tokāteline mo e tefitoʻi moʻoni ʻo e ongoongoleleí ʻokú ke akoʻí.

Fie Ako Lahi Ange?

• Chad H Webb, “Ne ʻIkai ke Tau Fononga Lōloa Maí ke Tau Ngata Pē Heni (Fakamafola ʻo e Ako Fakataʻu ʻa e Seminelí mo e ʻInisititiuti Fakalotú, 9 Sune 2020), broadcasts.ChurchofJesusChrist.org

• “Fealēleaʻaki Fakapēnoló” (Fakamafola ʻo e Ako Fakataʻu ʻa e Seminelí mo e ʻInisititiuti Fakalotú, 9 Sune 2020), broadcasts.ChurchofJesusChrist.org

• “Fai ha Ngaahi Fehuʻi oku Ueʻi Fakalaumālié,” Ko e Faiako ʻi he Founga ʻa e Fakamoʻuí (2016), 31–32

Pōtoʻi Ngāué

Kamata ha ʻekitivitī ako ʻaki hano fakaafeʻi ʻa e kau akó ke fakalaulauloto ki ha tūkunga fakataautaha.

kau ako ʻoku tangutu ʻi ha loki ako

Fakamatalaʻi

Naʻe fakamoʻoni ʻa Palesiteni J. Lūpeni Kalake ko e Siʻí ʻi he The Charted Course of the Church in Education, kuo maʻu ʻe heʻetau kau akó ha ngaahi aʻusia fakalaumālie ʻi heʻene pehē, “Te u toe pehē, ʻoku siʻi ha toʻu tupu ʻe hū atu ʻi hoʻomou matapā ki he seminelí pe ʻinisititiutí kuo teʻeki ai ke nau maʻu ha ngaahi tāpuaki fakalaumālie” (9). Kimuʻa pea fakaafeʻi ʻa e kau akó ke lau ha potufolofolá, kole ange ke nau fakalaulauloto pe kuo nau aʻusia ha meʻa ʻi he moʻoni ʻoku ʻamanaki ke nau akó. ʻE lava ke fakaafeʻi ʻe ha faiako ʻa e kau akó ke nau vahevahe, ka ʻoku ʻikai mahuʻinga ke vahevahe ʻe he kau akó ʻa e meʻa ʻoku nau fakakaukau ki aí. ʻOku ʻoange ʻe he meʻá ni ha faingamālie ki he Laumālie Māʻoniʻoní ke ne ʻomi ha fehokotaki fakataautaha ʻi he kamataʻanga ʻo e ʻekitivitī akó.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

Ko ha ngaahi fehuʻi ʻeni te ke lava ʻo kamata ʻaki ha lēsoni ʻoku nofotaha ʻi he lotú:

• Ko e hā ha ngaahi aʻusia kuó ne akoʻi atu ʻa e mahuʻinga ʻo e lotú?

• Makatuʻunga ʻi hoʻo ngaahi aʻusia ʻi he lotú, ko e hā te ke fiemaʻu ke mahino ki he toenga ʻo e kalasí?

ʻOku kamata ʻe Sisitā Tanaka ʻa e kalasí ʻaki ʻene pehē, “Te tau talanoa ʻi he ʻahó ni fekauʻaki mo e ʻAlamā 36 mo e fakatomala ʻa ʻAlamaá. Kimuʻa pea tau kamatá, kātaki ʻo fakalaulauloto ki he fehuʻi ko ʻení: ʻKo e hā kuó ke ʻilo fekauʻaki mo e fakatomalá?ʻ”

Lomiʻi heni ke vakai ki ha vitiō ʻo e sīpinga ko ʻení.

Akoako

Ko e hā ha fehuʻi te ke lava ʻo fai ke tokoni ki he kau akó ke nau fakalaulauloto ki ha aʻusia fakataautaha kapau ʻokú ke akoʻi:

• Ha lēsoni fekauʻaki mo e akó.

• Malakai 3.

ʻI hoʻo lēsoni hokó, hiki hifo ha fehuʻi te ke lava ʻo fai ki hoʻo kau akó te ne lava ʻo ʻai ke nau fakalaulauloto ki ha ngaahi tūkunga fakataautaha ʻoku fekauʻaki mo ha tefitoʻi moʻoni fakatokāteline pe moʻoni ʻi he konga folofola te ke akoʻí.

Aleaʻi pe Fakalaulauloto

• Hili hoʻo akoakó, ko e hā ha mahuʻinga ʻi hono ʻai ke fakalaulauloto ʻa e kau akó ki ha ngaahi tūkunga fakataautaha ʻoku fekauʻaki mo e konga folofola ke kamataʻi ha kalasí?

• Ko e hā ha ngaahi tefitoʻi moʻoni kehe ʻe lava ke fakakaukauʻi ʻi he taimi ʻokú ke kamata ai ʻa e kalasí ʻaki hono fakaafeʻi hoʻo kau akó ke fakalaulauloto ki he ngaahi tūkungá?

Fakakau

• ʻI he ngaahi uike ka hokó, fakakaukau ke fai ha ngaahi fehuʻi ke kamata ha kalasi ʻokú ne fakaʻatā ʻa e kau akó ke nau fakalaulauloto ki ha ngaahi aʻusia ʻoku fekauʻaki mo ha foʻi moʻoni fakatokāteline pe tefitoʻi moʻoni ʻoku maʻu ʻi he konga folofola te ke akoʻí.

Fie Ako Lahi Ange?

• J. Rueben Clark Jr., The Charted Course of the Church in Education, rev. ed. [1994; address to Church Educational System religious educators, Aug. 8, 1993], Gospel Library