“134-р хичээл—Наувуг байгуулсан нь: Үзэсгэлэнт хот” Сургаал ба Гэрээний семинарын багшийн гарын авлага (2025)
“Наувуг байгуулсан нь,” Сургаал ба Гэрээний семинарын багшийн гарын авлага
134-р хичээл: Сургаал ба Гэрээ 124
Наувуг байгуулсан нь
Үзэсгэлэнт хот
Гэгээнтнүүд Миссуригээс хөөгдсөнийхөө дараа, Миссури мөрний дагуух намагтай газрыг хөгжин цэцэглэсэн хот болгон хувиргажээ. Иллиной мужийн Науву хот нь үзэсгэлэнтэй газар болон хувирч, 1839-1846 оны хооронд Сүмийн төв болон үйл ажиллагаа явуулж байв. Энэ хичээл судруудыг болон Сүмийн түүхийг өөрсөдтэйгөө адилтгахад суралцагчдад туслах болно.
Боломжит суралцах үйл ажиллагаа
Өөрсөдтэйгөө адилтгах
Сургаал ба Гэрээнээс болон Сүмийн түүхээс өөрсдөдөө хамааралтай үнэнийг хэр их олж мэддэг талаар тунгаан бодоход суралцагчдыг урь.
Эртний гэгээнтнүүдийн амьдарч байсан цаг хугацааг илэрхийлэх зорилгоор ангийн нэг талд Сургаал ба Гэрээний хуулбарыг эсвэл бошиглогч Иосеф Смитийн зургийг байрлуулах талаар бодож үзээрэй. Суралцагчдын дундаас нэгийг нь өнөөгийн бидний амьдарч буй цаг үеийг төлөөлөн гарч ирж ангийн нөгөө талд зогсоход урь. Иосеф Смитийн амьдарч байсан цаг хугацаа болон одоо үеийн хоорондох орон зайг онцолж, ийн асуугаарай.
-
Иосеф Смиттэй болон эртний гэгээнтнүүдтэй өөрсдийгөө хамаатуулахад бидэнд яагаад хэцүү байж болох вэ?
-
Та Сургаал ба Гэрээг болон Сүмийн түүхийг судалж байхдаа Иосеф Смиттэй болон эртний гэгээнтнүүдтэй ямар арга замаар өөрийгөө хамаатуулдаг эсвэл судалж буй зүйлээ өөрсөдтэйгөө адилтгахын тулд юу хийдэг вэ?
Сүүлийн асуултад өгсөн суралцагчдын хариултыг самбар дээр бич. Хэрэв суралцагчид эдгээр дөрвөн зарчмыг дурдаагүй бол тэдгээрийг самбарт бичих талаар бодож үз. Суралцагчид зарчмуудыг хичээлийн туршид ашиглана.
-
Чухал мэдээллийг олж харах
-
Амьдралтайгаа харьцуулах
-
Үнэ цэнтэй сургамж олж авах
-
Хувийн амьдралдаа хэрхэн хэрэгжүүлэхээ тодорхойлох
Яг одоо амьдралдаа Их Эзэний тусламж юунд хамгийн их хэрэгтэй байгаа талаар тунгаан бодоход суралцагчдыг урь.
Наувугийн гэгээнтнүүдийн талаар судалж байхдаа энэ асуудалд Бурханаас заавар, тусламж хайхад тэднийг урамшуул. Бурхан Ариун Сүнсээр дамжуулан тэдэнд хариулж чадна гэдгийг гэрчил.
Дараах материал адилтгах ур чадвараа хөгжүүлж, бие даан хийж чаддаг болоход нь суралцагчдыг удирдан чиглүүлэхэд зориулагдсан болно.
1-р алхам: Чухал мэдээллийг олж харах
Энэ алхмаар дадлага хийхийн тулд та өөрөө эсвэл нэг суралцагчаар дараах мэдээллийг чанга уншуулах үедээ чухал хэсгүүдийг анхааралтай сонсож авахад бусад суралцагчийг урь.
Бошиглогч Иосеф Смитийг Либерти шоронд байх үед Миссуригийн олон мянган гэгээнтэн гэрээсээ хөөгдөж байв. Иосеф суллагдсаныхаа дараа гэр бүлийнхэнтэйгээ болон Иллиной мужийн Квинси хотын сайхан сэтгэлт хүмүүсийн хүлээн авч орогнуулсан Миссури мужаас дүрвэсэн 5000 орчим иргэдтэй эргэн уулзжээ.
Их Эзэн гэгээнтнүүдэд Миссури голын захын ойролцоо хямд газар худалдан авч, тэндээ цугларахыг хүсжээ. Хожим нь Науву гэж нэрлэх хотыг байгуулж эхлэхдээ тэд майхан, вагонд амьдардаг байв. Шумуулаас болж олон гэгээнтэн хумхаа өвчнөөр өвдсөн бөгөөд өндөр халуурч, хөлөрч, олон хүн үхсэн байна.
-
Энэ түүхээс танд юу нь чухал санагдаж байна вэ?
2-р алхам: Амьдралтайгаа харьцуулах
1-р алхмын чухал нарийн ширийн зүйлсийг санаж, дараах асуултад хариулах замаар хоёр дахь алхмаар дадлага хийхэд суралцагчдыг урь.
-
Хэдийгээр бидний нөхцөл байдал өөр хэдий ч тухайн үед гэгээнтнүүдэд тохиолдож байсан үйл явдлыг өнөөдрийн бидний амьдралтай хэрхэн холбон тайлбарлаж болох вэ?
Зөвхөн тухайн сорилтыг даван туулж байгаа маань дараагийн өөр нэгэн хүнд сорилт руу шилжихийн тулд туулж байгаа мэт санагдах эсвэл шинэ газар руу нүүх юм уу бүгдийг дахин шинээр эхлүүлэх, хүнд хэцүү нөхцөлд амьдрах эсвэл хүндээр өвдөх гэх мэт зарим хариулт багтаж болно.
-
Ийм хүнд нөхцөл байдлын үед та Их Эзэнд итгэх итгэлээ харуулахын тулд юу хийдэг вэ?
3-р алхам: Үнэ цэнтэй сургамж олж авах
Дараахыг гүйцэтгэхдээ үнэ цэнтэй сургамжийг олж авахад суралцагчдыг урь. “Иосеф Смит: Сэргээлтийн бошиглогч (2002 оны хувилбар)”-ийн цагийн код 47:39-өөс 50:54 хүртэлх хэсгийг үз эсвэл 1839 оны 7-р сарын 22-нд Иосеф Смит болон бусад хүн байшингаас байшин, майхнаас майхны хооронд явж өвчтэй хүмүүсийг эдгээж байсныг тайлбарла. Тэгээд тэдний зочилсон нэгэн бол Елиа Фордхэм байсныг тайлбарла. Тэр маш хүнд өвдсөн байсан тул эхнэр Анна нь гашуудан уйлж, оршуулгынх нь хувцсыг бэлдэж байв. Нэг суралцагчийг дараах хэсгийг уншихад урь.
Иосеф Елиа руу ойртон, түүний гарыг атгаж, “Фордхэм ах аа, та эдгэнэ гэдэгтээ итгэхгүй байна уу?” гэж асуув.
“Би хэтэрхий оройтсон гэж бодож байна” гэж тэр хариулжээ.
“Та Есүс бол Христ гэдэгт итгэдэггүй гэж үү?”
“Би итгэж байна, Иосеф ах аа.”
“Елиа, би чамд Назарын Есүсийн нэрээр босож, бүрэн эдгэхийг тушааж байна” гэж бошиглогч хэлэв.
Энэ үгс байшинг доргиох шиг болсон. Елиаг орноосоо босоход, түүний царай өнгө орон гэрэлтэж байлаа. Тэрээр хувцаслаж, юм идэхийг хүссэн ба дараа нь Иосефыг даган бусад олон хүнд тохинуулахад нь туслахаар гадагш гарав. (Гэгээнтнүүд: Хожмын үеийн Есүс Христийн Сүмийн түүх, 1-р боть, Үнэний жишиг, 1815–1846 [2018], 402–403)
Дараах хэсгүүдээс хоёроос доошгүйг уншаад, Аврагчийн хийсэн эсвэл илчилсэн зүйл болон дээрх түүх хоёрын ижил төстэй зүйлсийг хайж ол. Үүнд: Матай 4:23; 1 Нифай 11:31; Сургаал ба Гэрээ 42:44; 66:9; 84:68.
-
Та эдгээр судраас болон Науву дахь гэгээнтнүүдээс ямар сургамжтай зүйл олж мэдсэн бэ?
Суралцагчдын хариултыг самбар дээр жагсаан бич. Нэг жишээ нь: Бурхан биднийг Есүс Христэд итгэх бидний итгэлээр болон Түүний санваарын хүчээр адисалж, хүчирхэгжүүлж чадна.
Энэ зарчмыг ойлгоход нь суралцагчдад туслахын тулд “Энэ үнэн бидэнд Их Эзэний талаар юу зааж байна вэ?” “Таны амьдралд энэ зарчмыг баталсан ямар зүйл тохиолдож байсан бэ?” мөн “Биднийг эдгээхээс гадна Их Эзэн өөр ямар арга замаар биднийг хүчирхэгжүүлэн, адисалж болох вэ?” гэх мэт бататгах асуултууд тавихыг бод. Энэхүү зарчмын талаар асуух зүйлс байгаа эсэхийг суралцагчдаас лавла. Хэрэв байгаа бол үүнийг ангиараа ярилц.
Дараах зүйлсийг тайлбарла.
Тэр өдрийн эдгэрэлтээс үл хамааран, өвчний тархалт дараагийн хэдэн сарын турш гэгээнтнүүдийн дунд үргэлжилжээ. Гэсэн хэдий ч тэд нэг нэгнээ асран халамжилж, Их Эзэнд итгэх итгэлээ үйлдэл болгосоор байв. Тэд намгаас мөрөн рүү ус зайлуулах шуудуу ухсан ба энэ нь газрыг ашиглаж болохуйц болгосноос гадна шумуулын асуудлыг багасгасан юм. Тэд цэцэглэн хөгжих сууринг, эцэст нь Наувугийн ариун сүмийг байгуулжээ.
4-р алхам: Хувийн амьдралдаа хэрхэн хэрэгжүүлэхээ тодорхойлох.
Энэ алхмаар, олж мэдсэн үнэнээ ашиглаж болох зарим аргаа бусдадаа хуваалцахад суралцагчдыг урь. Тэдний хариултад санваарын адислалуудыг хүсэх зэрэг Их Эзэнд итгэх итгэлээ хэрэгжүүлэх арга замууд багтаж болно.
Нэмэлт хичээл
Судруудыг болон Сүмийн түүхийг өөрсөдтэйгөө адилтгах дадлагаа үргэлжлүүлэх боломжийг суралцагчдад олгохын тулд “Сүмийн түүхийг өөрсөдтэйгөө адилтгах” тараах материал дээрх үйл ажиллагааг гүйцэтгэж болно. Суралцагчид үйл ажиллагаануудыг бие даан эсвэл жижиг бүлгээр гүйцэтгэж болно. Дөрвөн алхам тус бүр дээр юу хийснээ бичиж тэмдэглэхэд суралцагчдыг урь.
Сүмийн түүхийг өөрсөдтэйгөө адилтгах
Үйл ажиллагаа А
Сайн мэдээг номлох
Бошиглогч Иосеф Смит: “Мөрдлөг хавчлага үнэний өсөлт хөгжилтийг зогсоож чадаагүй юм” (History of the Church , 4:540) гэж бичжээ. Их Эзэн өмнө нь Арван хоёр төлөөлөгчийн чуулгын олон гишүүнийг хилийн чанадад номлолд үйлчлүүлэхээр дуудаж байсан. Өвчин, зовлон бэрхшээлээ үл харгалзан эдгээр ах Наувугаас хилийн чанадад үйлчлэхээр явцгаажээ. Үүний үр дүнд, мянга мянган хүн, ялангуяа англичууд Бурханаас гэрчлэл хүлээн авч, Сүмд нэгдэж, Науву руу нүүж очив. Тэд Сүмд агуу хүч нь болсон.
1 Нифай 3:7, Сургаал ба Гэрээ 3:1-ийг уншаад, эдгээр шүлэг номлолын ажлын энэ жишээтэй хэрхэн холбогдож болохыг бодож үзээрэй.
Үйл ажиллагаа Б
Халамжийн нийгэмлэгийг байгуулсан нь
Гэгээнтнүүдийг Наувугийн ариун сүмийг барьж байх үед ариун сүмд ажиллаж байсан олон эрэгтэйд хангалттай гутал, өмд, цамц дутмаг байгааг хэдэн эгч анзаарчээ. Тэд Их Эзэнд итгэж, хэсэг эмэгтэйг зохион байгуулж, эдгээр хувцсыг хангахаар хамтран ажиллаж эхэлсэн. Тухайн үеийн ижил төстэй бүлгүүдийн адилаар тэд үндсэн дүрмийг боловсруулан, уг бичгээ Иосеф Смитэд батлуулахаар танилцуулав.
Иосеф үүнийг [хараад], энэ төрлийн сайн үндсэн дүрэм болсон байна гэж хэлжээ. “Гэхдээ энэ нь та нарын хүссэн зүйл биш байна” гэснээ тэрээр: “Өргөлийг нь Их Эзэн хүлээн авсан бөгөөд Түүнд тэдэнд зориулсан өөр илүү чухал зүйл бий гэдгийг эгч нарт хэл. … Би эмэгтэйчүүдийг санваарын удирдлаган доор санваартнуудын жаягаар зохион байгуулна” гэж хэлжээ. (Гэгээнтнүүд, 1:448)
1842 оны 3-р сарын 17-нд Бурхан Иосеф Смитэд Халамжийн нийгэмлэгийг зохион байгуулахыг зааварласан. Бурхан өнөөдөр ч Халамжийн нийгэмлэгийн удирдагчдыг Сүмийн гишүүдэд төдийгүй тоо томшгүй олон хүнд үйлчилж, тэднийг хүчирхэгжүүлэхэд нь сүнслэгээр нөлөөлсөөр байна.
Сургаал ба Гэрээ 58:26–28-ыг уншиж, эдгээр шүлэг нь сүнслэг нөлөөгөөр Халамжийн нийгэмлэгийг байгуулсан эмэгтэйчүүдтэй хэрхэн холбогдож байгааг олж мэд.
Хичээлээ үзэж судалж дууссаны дараа сурч мэдсэн зүйлсээ амьдралтайгаа хэрхэн адилтгасан тухайгаа хуваалцахад суралцагчдыг урь.
Тэдний тодорхойлж болох зарим үнэний жишээг дурдвал: Их Эзэн тушаасан зүйлээ гүйцэлдүүлэхийн тулд бидний замыг бэлтгэж өгдөг. Бурханы ажилд саад учруулж болохгүй. Бурхан зөвт байдлыг авчрахаар идэвхтэй эрэлхийлдэг хүмүүсийг урамшуулан шагнадаг.
-
Та энэ туршлагаас юу ойлгож мэдсэн бэ?
-
Судруудыг болон Сүмийн түүхийг өөрсөдтэйгөө адилтгах нь ирээдүйд танд хэрхэн тусалж болох вэ?