“Lēsoni 134—Ko Hono Fokotuʻu ʻo Nāvuú: Ko e Kolo Fakaʻofoʻofá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono Fokotuʻu ʻo Nāvuú,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 134: Tokāteline mo e Ngaahi Fuakava 124
Ko Hono Fokotuʻu ʻo Nāvuú
Ko e Kolo Fakaʻofoʻofá
Hili hono tuli e Kāingalotú mei Mīsulí, naʻa nau langa ʻa e ano ʻi he veʻe Vaitafe Misisipí ʻo hoko ko ha kolo fakaʻofoʻofa. Naʻe hoko ʻa Nāvū, ʻIlinoisi, ko ha feituʻu fakaʻofoʻofa pea hoko ko e hetikuota ʻo e Siasí mei he 1839 ki he 1846. ʻE lava ke tokoni ʻa e lēsoni ko ʻení ki he kau akó ke fakatatau ʻa e folofolá mo e ngaahi fakamatala ʻi he hisitōlia ʻo e Siasí kiate kinautolu.
Ngaahi ʻEkitivitī Ako ʻOku Ala Fakahokó
Fakatatau kiate kitautolu
Fakaafeʻi e kau akó ke fakalaulauloto ki he tuʻo lahi ʻo ʻenau ako e ngaahi moʻoni ʻi he Tokāteline mo e Ngaahi Fuakavá mo e hisitōlia ʻo e Siasí ʻoku felāveʻi mo kinautolú.
ʻI he tafaʻaki ʻe taha ʻo e lokí, fakakaukau ke fakaʻaliʻali ai ha tatau ʻo e Tokāteline mo e Ngaahi Fuakavá pe ko ha fakatātā ʻo e Palōfita ko Siosefa Sāmitá ke fakafofongaʻi e kuonga ʻo e fuofua Kāingalotú. Fakaafeʻi ha tokotaha ako ke tuʻu ʻi he tafaʻaki ʻe taha ʻo e lokí ke fakafofongaʻi hotau kuongá. Fakamamafaʻi ange ʻa e vahaʻa ʻi he taimi ʻo Siosefa Sāmitá mo e taimi ní, pea ʻeke ange e ongo fehuʻi ko ʻení.
-
Ko e hā ha ngaahi founga ʻe ala faingataʻa ai ke tau fakafekauʻaki kia Siosefa Sāmita mo e fuofua Kāingalotú?
-
ʻI hoʻo ako ʻa e Tokāteline mo e Ngaahi Fuakavá mo e hisitōlia ʻo e Siasí, ko e hā ha ngaahi meʻa ʻokú ke fai ke fakafekauʻaki ai mo Siosefa Sāmita pea mo e fuofua Kāingalotú pe fakatatau ʻa e meʻa ʻokú ke akó kiate koé?
Hiki e tali ʻa e kau akó ki he fehuʻi fakaʻosí ʻi he palakipoé. Kapau he ʻikai talaatu ʻe he kau akó e ngaahi tefitoʻi moʻoni ʻe fā ko ʻení, fakakaukau ke hiki foki kinautolu ʻi he palakipoé. ʻE fakaʻaongaʻi kinautolu ʻe he kau akó ʻi he lolotonga ʻo e lēsoní.
-
Kumi ha ngaahi fakamatala fakaikiiki mahuʻinga.
-
Fakahoko ha ngaahi fakafehoanaki ki hoʻo moʻuí.
-
ʻIloʻi ha ngaahi lēsoni mahuʻinga.
-
Fakapapauʻi hono fakaʻaongaʻi fakatāutahá.
Fakaafeʻi e kau akó ke fakalaulauloto ki he meʻa ʻoku nau fiemaʻu taha ai e tokoni ʻa e ʻEikí ʻi he taimí ni ʻi heʻenau moʻuí.
Poupouʻi kinautolu ke fekumi ki ha fakahinohino mo ha tokoni mei he ʻOtuá ʻi he meʻá ni ʻi heʻenau ako fekauʻaki mo e Kāingalotu ʻi Nāvuú. Fakamoʻoni ange ʻe lava ke tali kinautolu ʻe he ʻOtuá ʻo fakafou ʻi he Laumālie Māʻoniʻoní.
ʻOku fakataumuʻa ʻa e naunau ko ʻení ke tataki e kau akó ʻi he taukei ʻo hono fakatatau mo teuteuʻi kinautolu ke nau fai ʻeni ʻiate kinautolu peé.
Sitepu 1: Kumi ha ngaahi fakaikiiki mahuʻinga
Ke ʻahiʻahi fakahoko ʻa e sitepu ko ʻení, fakaafeʻi e kau akó ke nau fakafanongo ki ha ngaahi fakaikiiki mahuʻinga ʻi hoʻo lau pe lau leʻolahi ʻe ha tokotaha ako ʻa e fakamatala ko ʻení:
Lolotonga e ʻi he Fale Fakapōpula Lipetií ʻa e Palōfita ko Siosefa Sāmitá, naʻe tuli ha Kāingalotu ʻe lauiafe mei honau ngaahi ʻapi ʻi Mīsulí. Hili hono tukuange iá, naʻe toe fakataha ʻa Siosefa mo hono fāmilí pea mo ha kau kumi hūfanga kehe ʻe meimei toko 5,000 mei Mīsuli ʻa ia ne tokonia ʻe he kakai angaʻofa ʻo Kuinisī, ʻIlinoisí.
Naʻe fakahinohino ʻe he ʻEikí ʻa e Kāingalotú ke nau fakatau mai mo fakatahataha ki he ngaahi konga kelekele ofi ki he ngataʻanga ʻo e vaitafe Mīsulí. Naʻa nau nofo ʻi ha ngaahi tēniti mo ha ngaahi saliote lolotonga ʻenau kamata ke langa ha kolo te nau ui kimui ange ko Nāvū. Naʻe fakatupu ʻe he namú ʻa e puke ʻa ha Kāingalotu tokolahi ʻi he malēliá, ʻa ia naʻe tupu ai ha mofi lahi, momoko, pea mo ha ngaahi mate lahi.
-
Ko e hā ha ngaahi fakaikiiki ʻo e fakamatala ko ʻení ʻoku ngali mahuʻinga kiate koé?
Sitepu 2: Fakahoko ha ngaahi fakafehoanaki ki hoʻo moʻuí
Fakaafeʻi e kau akó ke akoako fakahoko e sitepu hono uá ʻaki hono tali e fehuʻi ko ʻení, mo manatuʻi e ngaahi fakaikiiki mahuʻinga mei he sitepu 1.
-
Neongo ʻe kehe hotau ngaahi tūkungá, ka ko e hā ha ngaahi founga te tau lava ʻo fakafekauʻaki e meʻa naʻe hoko ki he Kāingalotú ʻi he taimi ko iá ki heʻetau moʻuí he ʻaho ní?
ʻE lava ke kau ʻi he ngaahi talí ʻa e ongoʻi hangē kuo tau ikuna ha faingataʻa ʻe taha pea hoko atu ki ha faingataʻa ʻe tahá, hiki ki ha feituʻu foʻou pe kamata foʻoú, moʻui ʻi ha ngaahi tūkunga faingataʻa, pe puke lahi.
-
Ko e hā ʻokú ke fai ke fakahaaʻi hoʻo tui ki he ʻEikí lolotonga e ngaahi tūkunga pehení?
Sitepu 3: ʻIloʻi ha ngaahi lēsoni mahuʻinga
Fakaafeʻi e kau akó ke kumi ha ngaahi lēsoni mahuʻinga ʻi heʻenau fakahoko ʻení: Mamata ʻi he “Joseph Smith: Prophet of the Restoration (faiva ʻo e 2002)” mei he taimi 47:39 ki he 50:54, pe fakamatalaʻi ange ʻi he ʻaho 22 ʻo Siulai 1839, naʻe hiki ai ʻa Siosefa Sāmita mo ha niʻihi kehe mei he fale ki he fale mo e tēniti ki he tēniti, ʻi hono fakamoʻui ʻo e kau puké. Hili iá pea fakamatalaʻi ange naʻe kau ʻi he niʻihi ne nau ʻaʻahi ki aí ʻa ʻIlaisiā Footihemi. Naʻá ne fuʻu puke lahi pea tangi mo teuteuʻi ʻe hono uaifi ko ʻAná hono vala tanú. Kole ki ha tokotaha ako ke lau leʻolahi e fakamatala ko ʻení:
Ne ʻunu atu ʻa Siosefa kia ʻIlaisiā peá ne puke hono nimá. Naʻá ne fehuʻi ange, “ʻE Misa Footihemi, ʻoku ʻikai nai haʻo tui ke fakamoʻui koe?”
Naʻá ne pehē ange, “ʻOku ou manavasiʻi kuo fuʻu tōmui.”
“ʻOkú ke tui nai ko Sīsū ʻa e Kalaisí?”
“ʻOku ou tui ki ai, Brother Siosefa.”
Naʻe pehē ange ʻe he palōfitá, “ʻIlaisiā, ʻoku ou fekauʻi koe ʻi he huafa ʻo Sīsū ʻo Nāsaletí, ke ke tuʻu peá ke moʻui.”
Ne hangē ne hanga ʻe he ngaahi leá ni ʻo luluʻi ʻa e falé. Naʻe tuʻu hake ʻa ʻIlaisiā mei hono mohengá, pea naʻe toe foki mai ʻa e lanu ʻo hono matá. Naʻá ne teuteu, kole ha meʻa ke ne kai, pea muimui atu ʻia Siosefa ki tuʻa ke tokoni ki ha niʻihi kehe tokolahi. (Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, vōliume 1, Ko e Fuka ʻo e Moʻoní, 1815–1846 [2018], 444–45)
Lau ha potufolofola ʻe ua pe lahi ange, ʻo kumi e ngaahi faitatau ʻi he meʻa naʻe fai pe fakahā ʻe he Fakamoʻuí pea mo e talanoa ʻi ʻolungá: Mātiu 4:23; 1 Nīfai 11:31; Tokāteline mo e Ngaahi Fuakava 42:44; 66:9; 84:68.
-
Ko e hā e ngaahi lēsoni naʻá ke ako mei he ngaahi potufolofola ko ʻení pea mo e Kāingalotu ʻi Nāvuú?
Hiki e tali ʻa e kau akó he palakipoé. Ko ha sīpinga ʻe taha ʻoku pehē, ʻe lava ke tāpuekina mo fakamālohia kitautolu ʻe he ʻOtuá ʻo fakafou ʻi heʻetau tui kia Sīsū Kalaisí mo e mālohi ʻo Hono lakanga fakataulaʻeikí.
Ke tokoni ke mahino ki he kau akó ʻa e tefitoʻi moʻoni ko ʻení, fakakaukau ke fai ha ngaahi fehuʻi vakaiʻi hangē ko e “Ko e hā ʻoku akoʻi mai ʻe he foʻi moʻoni ko ʻení fekauʻaki mo e ʻEikí?” “Ko e hā ha ngaahi aʻusia kuó ke maʻu ʻokú ne fakapapauʻi mai ʻa e tefitoʻi moʻoni ko ʻení ʻi hoʻo moʻuí?” mo e “Makehe mei hono fakamoʻui kitautolú, ko e hā ha ngaahi founga kehe ʻe lava ke fakamālohia mo tāpuekina ai kitautolu ʻe he ʻEikí?” Fakakaukau ke fehuʻi ki he kau akó pe ʻoku ʻi ai haʻanau fehuʻi fekauʻaki mo e tefitoʻi moʻoni ko ʻení. Kapau ʻoku ʻi ai, aleaʻi fakakalasi kinautolu.
Fakamatalaʻi ʻeni:
Neongo ʻa e ʻaho ʻo e fakamoʻuí, naʻe hokohoko atu ʻa e mahamahakí ʻi he lotolotonga ʻo e Kāingalotú ʻi he ngaahi māhina hono hokó. Ka neongo ia, naʻa nau hokohoko atu ke fetauhiʻaki mo ngāue ʻaki ʻa e tui ki he ʻEikí. Naʻa nau keli ha ngaahi luo ke fakatafe e vaí mei he anó ki he vaitafé, ʻa ia naʻe faingofua ange ai hono fakaʻaongaʻi e kelekelé pea fakasiʻisiʻi ʻa e palopalema ʻo e namú. Naʻa nau langa ha kolo tuʻumālie pea faifai ʻo aʻu ki he Temipale Nāvuú.
Sitepu 4: Fakapapauʻi hono fakaʻaongaʻi fakatāutahá
ʻI he sitepu ko ʻení, fakaafeʻi e kau akó ke vahevahe ha ngaahi founga te nau lava ai ʻo fakaʻaongaʻi e ngaahi moʻoni ne nau akó. ʻE lava ke kau ʻi heʻenau ngaahi talí ʻa e ngaahi founga te nau lava ai ʻo fakaʻaongaʻi ʻa e tui ki he ʻEikí, kau ai hono kole ha ngaahi tāpuaki ʻo e lakanga fakataulaʻeikí.
Ngaahi lēsoni kehe
Ke hokohoko atu hono akoako fakatatau ʻe he kau akó ʻa e folofolá mo e hisitōlia ʻo e Siasí kiate kinautolú, ʻe lava ke nau fai e ngaahi ʻekitivitī ʻi he laʻipepa tufa “Ko Hono Fakatatau e Hisitōlia ʻo e Siasí kiate Kitautolú.” ʻE lava ke fakakakato fakafoʻituitui ʻe he kau akó e ngaahi ʻeikitivitií pe ʻi ha fanga kiʻi kulupu iiki. Fakaafeʻi e kau akó ke hiki e meʻa ne nau fai ki he sitepu takitaha ʻe faá.
Ko Hono Fakatatau e Hisitōlia ʻo e Siasí Kiate Kitautolú
ʻEkitivitī A
Ko hono malangaʻi e ongoongoleleí
Naʻe tohi ʻe he Palōfita ko Siosefa Sāmitá ʻo pehē, “Kuo ʻikai taʻofi ʻe he fakatangá ʻa e fakalakalaka ʻa e moʻoní” (History of the Church, 4:540). Naʻe ui ʻe he ʻEikí kimuʻa ha kau mēmipa tokolahi ʻo e Kōlomu ʻo e Kau ʻAposetolo ʻe Toko Hongofulu Mā Uá ke ngāue fakafaifekau ki he ngaahi fonua mulí. Neongo ʻa e mahamahakí mo e faingataʻá, ka naʻe mavahe ʻa e kau tangata loto vilitakí ni mei Nāvū ke ngāue. Ko hono olá, naʻe maʻu ʻe ha kakai ʻe lauiafe—tautautefito mei ʻIngilani—ha fakamoʻoni mei he ʻOtuá, kau ki he Siasí, pea nau fononga ki Nāvū. Naʻa nau hoko ko ha mālohinga lahi ki he Siasí.
Lau ʻa e 1 Nīfai 3:7 mo e Tokāteline mo e Ngaahi Fuakava 3:1, pea fakakaukau ki he founga ʻoku fekauʻaki ai ʻa e ngaahi veesi ko ʻení mo e sīpinga ko ʻeni ʻo e ngāue fakafaifekaú.
ʻEkitivitī E
Ko Hono Fokotuʻu ʻo e Fineʻofá
Lolotonga hono langa ʻe he Kāingalotú ʻa e Temipale Nāvuú, naʻe fakatokangaʻi ʻe ha kau fafine tokosiʻi naʻe ʻikai maʻu ʻe ha kau tangata tokolahi ne ngāue ʻi he temipalé ha ʻū sū, talausese, mo ha ʻū sote feʻunga. ʻI hono ueʻi kinautolu ʻe he ʻEikí, naʻa nau fokotuʻutuʻu ha kulupu ʻo ha kau fafine pea kamata ngāue fakataha ke ngaohi ʻa e ngaahi vala ko ʻení. Naʻa nau faʻu ha konisitūtone, ʻo hangē pē ko e ngaahi kulupu tatau ʻi he taimi ko iá. Naʻa nau ʻoatu ʻa e tohí kia Siosefa Sāmita ke ne fakangofua.
[ʻI he vakai ki ai] ʻa Siosefá, naʻá ne pehē ko e konisitūtone lelei taha ia ʻi hono faʻahingá. Naʻá ne pehē ange, “Ka ʻoku ʻikai ko e meʻa ʻeni ʻoku mou fiemaʻú. “Fakahā ki he kau fafiné kuo tali ʻe he ʻEikí ʻenau feilaulaú, pea ʻoku ʻi ai Haʻane meʻa ʻoku lelei ange maʻanautolu. … Te u fokotuʻu e houʻeiki fafiné ʻi he malumalu ʻo e lakanga fakataulaʻeikí ʻi he sīpinga ʻo e lakanga fakataulaʻeikí.” (Kau Māʻoniʻoní, 1:495)
ʻI he ʻaho 17 ʻo Māʻasi, 1842, naʻe fakahinohinoʻi ʻe he ʻOtuá ʻa Siosefa Sāmita ke fokotuʻu ʻa e Fineʻofá. ʻOku kei hokohoko atu pē hono ueʻi fakalaumālie ʻe he ʻOtuá e kau taki ʻo e Fineʻofá he ʻahó ni ke nau tokoni mo fakamālohia e kāingalotu ʻo e Siasí mo ha niʻihi taʻefaʻalaua kehe.
Lau ʻa e Tokāteline mo e Ngaahi Fuakava 58:26–28, ʻo kumi e founga ʻe ala fekauʻaki ai ʻa e ngaahi veesi ko ʻení mo e kau fafine ne ueʻi fakalaumālie ʻa ia naʻe iku ʻenau ngaahi ngāué ki hono fokotuʻu ʻo e Fineʻofá.
Hili hono fakakakato ʻe he kau akó ʻenau akó, fakaafeʻi kinautolu ke vahevahe e founga ne nau fakatatau ai e meʻa ne nau akó ki heʻenau moʻuí.
ʻOku kau ʻeni ʻi he ngaahi sīpinga ʻe niʻihi ʻo e ngaahi moʻoni te nau ala ʻiló: ʻOku teuteuʻi ʻe he ʻEikí ha founga maʻatautolu ke tau lavaʻi ai ʻa e meʻa ʻokú Ne fekau maí. He ʻikai lava ke taʻofi e ngāue ʻa e ʻOtuá. ʻOku fakapaleʻi ʻe he ʻOtuá ʻa kinautolu ʻoku feinga mālohi ke fakahoko ʻa e māʻoniʻoní.
-
Ko e hā ha meʻa naʻá ke ako mei he aʻusia ko ʻení?
-
ʻE tokoniʻi fēfē koe ʻi he kahaʻú ʻi hoʻo fakatatau ʻa e folofolá mo e ngaahi fakamatala ʻi he hisitōlia ʻo e Siasí ki hoʻo moʻuí?