“Lēsoni 135—Tokāteline mo e Ngaahi Fuakava 124: ʻTuku ke Langa ʻa e Falé Ni … Koeʻuhí Ke u Lava ʻo Fakahā ʻI Ai ʻa ʻEku Ngaahi Ouaú,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 124,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 135: Tokāteline mo e Ngaahi Fuakava 124
Tokāteline mo e Ngaahi Fuakava 124
“Tuku ke Langa ʻa e Falé Ni … Koeʻuhí Ke u Lava ʻo Fakahā ʻI Ai ʻa ʻEku Ngaahi Ouaú”
ʻI hono langa ʻe he Kāingalotú ʻa e kolo ko Nāvuú, naʻe fekauʻi kinautolu ʻe he ʻEikí ke nau langa ha temipale (vakai, Tokāteline mo e Ngaahi Fuakava 124:26–27). Naʻe fakahā ʻe he ʻEikí ʻi he Tokāteline mo e Ngaahi Fuakava 124, ha meʻa lahi ange fekauʻaki mo e taumuʻa ʻo e ngaahi temipalé ko ha feituʻu ke maʻu ai ʻa e ngaahi ouau toputapú. ʻE lava ke tokoni ʻa e lēsoni ko ʻení ke mahino ki he kau akó ʻa e mahuʻinga ʻo e temipale ʻo e ʻEikí mo e ngaahi ouau ʻoku fakahoko aí, kau ai ʻa e ʻenitaumení.
Ngaahi ʻEkitivitī Ako ʻOku Ala Fakahokó
Ko e ngaahi taumuʻa ʻo e temipalé
Fakatokangaʻi ange: ʻOku nofotaha ʻa e lēsoni ko ʻení ʻi he ngaahi fuakava mo e ngaahi ouau ʻo e temipalé. ʻOku nau toputapu pea ʻoku totonu ke aleaʻi kinautolu ʻi he mālūʻia (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 27.0, ChurchofJesusChrist.org).
Ke tokoni ke fakakaukau ʻa e kau akó ki he meʻa ʻoku nau lolotonga ʻilo fekauʻaki mo e ngaahi temipalé, fakaafeʻi kinautolu ke fakalaulauloto pe hiki ʻa e meʻa te nau lea ʻaki ki honau kaungāmeʻá ʻi he tūkunga ʻi laló.
Fakakaukauloto naʻe sio ha kaungāmeʻa ki ha tā ʻo ha temipale ʻi he mītia fakasōsialé pe fakaʻuli ʻo fakalaka ʻi ha temipale peá ne fehuʻi fakamātoato atu, “Ko e hā ʻa e temipale? Ko e hā ʻoku fakahoko ʻe he kakaí ʻi aí?”
Fakakaukau ke fakaʻaliʻali ʻa e ngaahi fakatātā ko ʻení:
ʻI hono fakaʻaongaʻi ʻa e lanu ʻo e maama halá (kulokula = ʻikai loto-falala; engeenga = loto-falala siʻisiʻi; lanu mata = loto-falala lahi), fili ha lanu ʻokú ne fakahaaʻi lelei taha hoʻo tali ki he ngaahi fehuʻi ko ʻení:
-
ʻOku fēfē hoʻo loto-falala te ke lava ʻo fakamatalaʻi lelei ʻa e temipalé mo hono ngaahi ouaú ki ho kaungāmeʻá?
-
ʻOku fēfē hoʻo loto-falala te ke lava ʻo fakamatalaʻi kinautolu ʻi ha founga ʻe ala tokoni ke fakatokangaʻi ʻe hoʻo kaungāmeʻá ʻa e founga ʻoku fakahaaʻi ai ʻe he ʻEikí ʻEne ʻofá ʻo fakafou ʻi he temipalé?
Ke tokoni atu ke ke sio ki he tali ʻa e kau akó, fakakaukau ke fakaafeʻi kinautolu ke tali ha ngaahi fehuʻi hangē ko e “Ko e toko fiha ʻiate kimoutolu naʻe lanu matá? engeengá? kulokulá?” mo e “Ko e hā naʻá ke fili ai ʻa e lanu naʻá ke filí?”
Poupouʻi ʻa e kau akó ke nau lotua ha mahino ʻo fakafou ʻi he Laumālie Māʻoniʻoní, ʻa ia ʻe lava ʻo tokoni ke nau tali ʻa e ngaahi fehuʻi hangē ko ia ʻi ʻolungá, pea pehē ki heʻenau ngaahi fehuʻi fekauʻaki mo e temipalé mo e ngaahi ouau fakatemipalé.
Ko e Temipale Nāvuú
ʻI he nofo ʻa e Kāingalotú ʻi Nāvū, ʻIlinoisí, naʻe fekauʻi kinautolu ʻe he ʻEikí ke nau langa ha temipale (vakai, Tokāteline mo e Ngaahi Fuakava 124:31) ʻo hangē ko ia naʻá Ne fai kimuʻa ʻi Ketilani, ʻOhaioó; Vahefonua Siakisoní, Mīsuli; mo Hihifo Mamaʻo, Mīsulí (vakai, 88:119; 97:10; 115:7–8). ʻI he taimi ʻo e fekau ʻa e ʻEikí ke langa ʻa e Temipale Nāvuú, naʻá Ne ʻosi fakahā ʻa e tokāteline ʻo e papitaiso maʻá e kau pekiá ki he Palōfita ko Siosefa Sāmitá (vakai, Ngaahi Tefitó mo e Ngaahi Fehuʻí, “Papitaiso maʻá e Kakai Pekiá,” topics.ChurchofJesusChrist.org).
Fakakaukau ke hiki ʻi he palakipoé ʻa e “ʻOku fekau maʻu ai pē ki hoku kakaí ke nau langa ki hoku hingoa toputapú [ha ngaahi temipale]” (Tokāteline mo e Ngaahi Fuakava 124:39). ʻE lava ke fakaʻilongaʻi ʻe he kau akó ʻa e kupuʻi lea ko ʻení ʻi heʻenau folofolá.
Fakaafeʻi ʻa e kau akó ke ako ʻa e ngaahi veesi ko ʻení pea fakakaukau ke fakaʻilongaʻi ʻa e ngaahi tali ʻoku nau maʻú. Hili iá ʻe lava ke nau aleaʻi ʻa e meʻa ne nau akó ʻi ha fanga kiʻi kulupu iiki.
Tokoni ke aleaʻi ʻe he kau akó mo e niʻihi kehé ʻa e ngaahi meʻa ʻoku tui ki ai ʻa e ongoongoleleí: Ke akoako fakahoko lahi ange ʻeni, vakai ki he ako “Ngaahi fakaafe maʻá e kau akó ke fevahevaheʻaki ʻa e meʻa ʻoku nau akó,” ʻoku maʻu ʻi he Fakatupulaki ʻa e Ngaahi Taukei ʻa e Faiakó: Fakaafeʻi ʻa e Ako Fakamātoató.
Lau ʻa e Tokāteline mo e Ngaahi Fuakava 124:25–30, 36–41, 55, ʻo kumi ʻa e ngaahi ʻuhinga ʻoku fekauʻi ai ʻe he ʻEikí ʻa Hono kakaí ke langa ha ngaahi temipalé.
-
Ko e hā naʻá ke maʻú?
-
Ko e fē ʻi he ngaahi taumuʻa pe talaʻofa ʻa e ʻEikí ki hono langa ʻo e ngaahi temipalé ʻoku ʻuhingamālie taha kiate koé? Ko e hā hono ʻuhingá?
ʻE lava ke maʻu ʻe he kau akó ha ngaahi moʻoni kehekehe, hangē ko e ʻoku fekauʻi kitautolu ʻe he ʻEikí ke langa ha ngaahi temipale “ke ʻafio ai ʻa e Fungani Māʻolungá” (veesi 27); ke “fakafoki mai … ʻa e meʻa naʻe molé” (veesi 28); ke hoko ko ha feituʻu “hūfangaʻanga” (veesi 36); pea “koeʻuhí ke u tāpuakiʻi ʻa kimoutolu, pea fakakalauni ʻa kimoutolu ʻaki ʻa e lāngilangi, moʻui taʻe-faʻa-mate, mo e moʻui taʻengatá” (veesi 55). Kapau he ʻikai talaatu ʻe he kau akó, fakaafeʻi kinautolu ke toe vakaiʻi ʻa e veesi 40 pea tānaki atu ʻa e foʻi moʻoni ʻoku fekauʻi kitautolu ʻe he ʻEikí ke langa ha ngaahi temipale koeʻuhí ke tau lava ʻo maʻu ha ngaahi ouau toputapu. ʻE nofotaha ʻa e lēsoni ko ʻení ʻi he foʻi moʻoni fakaʻosi ko ʻení.
Kapau ʻoku fiemaʻu tokoni ʻa e kau akó ke ʻiloʻi ʻa e ngaahi moʻoni ʻi he ngaahi veesi ko ʻení, fakakaukau ke hiki ʻa e fika ʻo e ngaahi veesi ʻoku ʻasi ʻi ʻolungá ʻi ha kōlomu ʻe taha pea mo e ngaahi kupuʻi lea ʻoku ʻoatú ʻi ha kōlomu ʻe taha. Hili iá, ʻe lava ke fakatauhoa ʻe he kau akó ʻa e kupuʻi leá mo hono veesi totonú.
ʻOku tokoni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ke mahino kiate kitautolu ʻa e taumuʻa ʻa e ʻEikí ʻi hono ʻomi kiate kitautolu ʻa e ngaahi ouau fakatemipalé.
ʻOku ʻikai ke tau langa pe hū ki he ngaahi temipale māʻoniʻoní ke maʻu pē ha aʻusia fakafoʻituitui pe fakafāmili ʻoku fakangalongataʻá. Ka, ko e ngaahi fuakava ʻoku maʻu aí mo e ngaahi ouau ʻoku fakahoko ʻi he ngaahi temipalé ʻoku mahuʻinga ia ki hono fakamāʻoniʻoniʻi hotau lotó pea mo e hakeakiʻi taupotu taha ʻa e ngaahi foha mo e ngaahi ʻofefine ʻa e ʻOtuá. (David A. Bednar, “Tuku Ke Langa ʻa e Falé Ni ki Hoku Hingoá,” Liahona, Mē 2020, 85)
-
Ko e hā naʻá ke ako meia ʻEletā Petinaá?
-
Ko e hā ha meʻa kuó ke ako mai ʻeni ʻe lava ʻo tokoni ke ke fakamatalaʻi ʻa e temipalé ki haʻo kaungāmeʻa?
Naʻe hā mai ʻa e Fakamoʻuí mo ha kau talafekau fakalangi kehe ʻi he Temipale Ketilaní (vakai, Tokāteline mo e Ngaahi Fuakava 110). Naʻe hoko foki ʻa e Temipale Ketilaní ko ha feituʻu ʻo e ueʻi fakalaumālie mo e ako. Naʻe fakahā ʻe he ʻEikí ʻi Nāvū ha toe ngaahi ouau kehe ʻoku fakahoko ʻi he ngaahi temipalé ʻi he ʻahó ni. ʻI he ngaahi temipalé ʻi he ʻahó ni, ʻoku fakahoko ʻe he kāingalotu faivelenga ʻo e Siasí ʻa e papitaiso maʻá e kau pekiá, maʻu ʻenitaumení (kau ai ʻa e fufulú mo e paní), pea kau ʻi he ngaahi sila ʻi he temipalé.
-
Ko e fē ʻi he ngaahi ouau ko ʻení naʻe folofola ʻa e ʻEikí kau ki ai ʻi he ngaahi veesi naʻá ke akó? (Vakai, Tokāteline mo e Ngaahi Fuakava 124:29–30, 37, 39.)
ʻE nofotaha ʻa e ngaahi lēsoni ʻi he kahaʻú ʻi he papitaiso maʻá e pekiá mo e sila ʻi he temipalé. ʻE nofotaha ʻa e toenga ʻo e lēsoni ko ʻení ʻi he ʻenitaumení.
Ko e ʻenitaumení
Ko e taha ʻo e ngaahi ouau naʻe fakahā ʻe he ʻEikí ki he Kāingalotu ʻi Nāvuú ko e ʻenitaumení.
Kimuʻa pea ako ʻa e ʻenitaumení, te ke lava ʻo ʻoange ki he kau akó ha ngaahi miniti siʻi ke nau fakakaukau pe ko e hā ha ngaahi fehuʻi ʻoku nau ala maʻu fekauʻaki mo e ʻenitaumení pea mo e ʻuhinga ʻoku mahuʻinga ai ke nau maʻu ʻenitaumení. Fakamatalaʻi ange ʻi heʻenau ako kau ki he ʻenitaumení, ʻe lava ke tokoniʻi kinautolu ʻe he Laumālie Māʻoniʻoní ke maʻu ʻa e tali ki heʻenau ngaahi fehuʻí.
Ke tokoni ke mahino lahi ange ki he kau akó ʻa e ʻenitaumení mo e ʻuhinga ʻoku finangalo ai ʻa e ʻEikí ke tāpuakiʻi kinautolu ʻo fakafou ʻi he ouau ko ʻení ʻi he temipalé, ʻe lava ke ke fakaʻaongaʻi ha taha ʻo e ngaahi fakakaukau ko ʻení:
-
ʻOange ha taimi ki he kau akó ke ako ʻa e ngaahi maʻuʻanga tokoni te nau fili mei he lisi ko ʻení.
-
ʻOange ki he kau akó ʻa e laʻipepa tufa ko ʻení ke nau ako.
-
Fakafaingamālieʻi ke ako ʻa e kau akó ʻiate kinautolu pē, mo hanau hoa, pe ʻi ha fanga kiʻi kulupu iiki.
Ako ha niʻihi ʻo e ngaahi maʻuʻanga tokoni ko ʻení, ʻo kumi ʻa e founga ʻoku tāpuekina ai kitautolu ʻe he ʻEikí ʻi heʻetau maʻu hotau ʻenitaumení ʻi he temipalé.
-
Fakahinohino ki he Ngaahi Folofolá, “ʻEnitaumení,” scriptures.ChurchofJesusChrist.org
-
“About the Endowment” mo e ngaahi maʻuʻanga tokoni kehe ʻoku maʻu ʻi he temples.ChurchofJesusChrist.org
-
Ngaahi Tefitó mo e Ngaahi Fehuʻí, “ʻEnitaumení,” topics.ChurchofJesusChrist.org
-
“What Is a Temple Endowment?” (1:59), ʻoku maʻu ʻi he ChurchofJesusChrist.org
1:59
Ko e ʻEnitaumení
Lau ʻa e fakamatala ko ʻeni ʻoku maʻu ʻi he temples.ChurchofJesusChrist.org, ʻo kumi ʻa e ngaahi tali ki he fehuʻi ko ʻení:
-
ʻOku tāpuekina fēfē au ʻe he ʻEikí ʻi heʻeku maʻu hoku ʻenitaumení?
ʻI hoʻo kau ki he Siasí, ʻokú ke maʻu ha ouau ʻe ua—ko e papitaisó mo e hilifakinimá. ʻI he founga tatau, ʻoku maʻu mo e ʻenitaumeni temipalé ʻi ha konga ʻe ua.
ʻI he konga ʻuluakí, te ke maʻu fakafoʻituitui ai ʻi he lilo ʻa e meʻa ʻoku ui ko e ngaahi ouau “ʻinisitolí”. ʻOku kau ʻi he ngaahi ouau ko ʻení ʻa e ngaahi tāpuaki makehe fekauʻaki mo ho tofiʻa mo e tuʻunga malava fakalangí. Ko e konga ʻo e ngaahi ouau ko ʻení, ʻe fakamafaiʻi foki koe ke ke tui ʻa e kāmeni temipale toputapú.
ʻI he konga hono uá, te ke maʻu ʻa e toenga ho ʻenitaumení ʻi ha kulupu. ʻOku fakahoko ʻeni ʻi ha loki fakahinohino fakataha mo e niʻihi kehe ʻoku omi ki he temipalé. ʻOku fakaʻaliʻali ha ngaahi meʻa naʻe hoko ʻa ia ko e konga ʻo e palani ʻo e fakamoʻuí. ʻOku kau ai ʻa e Fakatupú, ko e Hinga ʻa ʻĀtama mo ʻIví, ko e Fakalelei ʻa Sīsū Kalaisí, ko e Hē mei he Moʻoní, pea mo e Fakafoki Mai ʻo e Ongoongoleleí. Te ke ako lahi ange foki ai fekauʻaki mo e founga ʻe lava ai ʻa e kakai kotoa pē ʻo toe foki ki he ʻao ʻo e ʻEikí. ʻOku fakahoko ha konga ʻo e ʻenitaumení ʻo fakafou ʻi ha fakaʻaliʻali fakavitiō pea ko e konga ʻoku fakahoko ʻe he kau ngāue ʻi he temipalé.
Lolotonga ʻa e ouau ʻenitaumení, ʻe fakaafeʻi koe ke ke fakahoko ha ngaahi fuakava pau mo e ʻOtuá. ʻOku kau ʻi he ngaahi fuakava ko ʻení ʻa e ngaahi meʻá ni:
-
Fono ʻo e talangofuá, ʻa ia ʻoku kau ai ʻa e fāifeinga ke tauhi ʻa e ngaahi fekau ʻa e ʻOtuá
-
Fono ʻo e feilaulaú, ʻa ia ʻoku kau ai hono fai ʻa e meʻa kotoa te tau lavá ke tokoni ki he ngāue ʻa e ‘Eikí pea fakatomala ʻi he loto-mafesifesi mo e laumālie fakatomala
-
Fono ‘o e ongoongoleleí, ʻa ia ko e fono māʻolunga ange ia naʻe akoʻi ʻe Sīsū ʻi Heʻene kei ʻi māmaní
-
Fono ʻo e angama‘á, ʻa ia ʻoku fekauʻaki mo e toki fakahoko pē ha fetuʻutaki fakasekisuale mo e tokotaha ʻoku tau mali mo ia ʻi he founga totonu mo fakalaó ʻo fakatatau mo e fono ʻa e ʻOtuá
-
Fono ʻo e fakatapuí, ‘a ia ʻoku fekauʻaki mo hono fakatapui hotau taimí, ngaahi talēnití mo e meʻa kotoa pē kuo tāpuekina ʻaki kitautolu ʻe he ‘Eikí ki hono langa hake ʻa e Siasi ‘o Sīsū Kalaisí ʻi he māmaní
ʻI he taimi ʻokú ke tauhi ai hoʻo ngaahi fuakavá, ʻokú ke toe ofi ange ai ki he Fakamoʻuí pea ʻoku tupulaki ho vā fetuʻutaki mo Iá ʻo mālohi ange. ʻOku talaʻofa ʻe he ʻOtuá ko kinautolu ko ia ʻoku tauhi ʻenau ngaahi fuakavá te nau maʻu ha ngaahi tāpuaki ʻi he moʻuí ni pea mo e faingamālie ke foki ʻo nofo mo Ia ʻo taʻengatá.
ʻI he fakaʻosinga ʻo e ʻenitaumení, ʻoku fakataipe ʻa e foki ʻa kinautolu ʻoku kau ki aí ki he ʻao ʻo e ʻEikí, ʻi heʻenau hū ki he loki silesitialé. Te ke lava ʻo fakaʻaongaʻi ai ha taimi ke fakalaulauloto, lotu, lau ʻa e folofolá pe vahevahe leʻosiʻi hoʻo ngaahi fakakaukaú mo ho fāmilí mo e kaungāmeʻá. Ko ha feituʻu ia ʻo e nonga, ʻa ia te ke lava foki ʻo maʻu ai ʻa e fiemālié mo e fakahinohino fakalangí. (Vakai, “About the Temple Endowment,” temples.ChurchofJesusChrist.org.)
ʻOange ha faingamālie ki he kau akó ke fakamatalaʻi pe ko e hā ʻa e ʻenitaumeni pea mo e founga ʻe lava ke tāpuekina ai kinautolu ʻe he ʻEikí ʻi heʻenau maʻu iá. Ke fai ʻení, te ke lava ʻo hiki ʻa e “Ko e hā ʻa e ʻenitaumeni temipale?” mo e “Ko e hā ʻoku mahuʻinga ai ʻa e ʻenitaumeni temipalé?” ʻi he palakipoé. Fakaafeʻi ha kau ako kehekehe ke nau tali. ʻE lava foki ke vahevahe ʻe he kau akó ʻa e ngaahi fehuʻi ʻoku nau maʻu fekauʻaki mo e ʻenitaumení, pea ʻe lava ke vahevahe ʻe he kau ako kehé ʻa e meʻa naʻa nau ako ʻe ala tokoní.
Ko e temipalé pea mo au
Fakakaukau ke toe fakaʻaliʻali ʻa e tūkunga ʻo e kaungāmeʻa mei he kamataʻanga ‘o e lēsoní. Fakaafeʻi ʻa e kau akó ke fakakaukau ki he meʻa kuo akoʻi ange ʻe he Laumālie Māʻoniʻoní ʻi he ʻaho ní pe tānaki atu ʻenau ngaahi fakakaukaú ki he meʻa ne nau hiki ʻi he kamataʻanga ʻo e kalasí. Fakaafeʻi ʻa e kau akó ke vahevahe ʻa e founga te nau fakahoko ai ha tali ki honau kaungāmeʻá ʻi ha founga ʻe tokoni ke nau ongoʻi ai ʻa e ʻofa ʻa e ʻEikí.